उदयसिंग पाटील, कोल्हापूर
काँग्रेस पक्षाशी आघाडी करून राष्ट्रवादी काँग्रेस पक्ष महानगरपालिकेतील सत्ताधारी बनला. आघाडीमध्ये ठरल्याप्रमाणे पक्षाच्या वाट्याला आलेल्या महापौरपदापासून इतर पदांवर जास्तीत जास्त नगरसेवकांच्या नेमणूक करुन समतोल साधण्याचा प्रयत्न केला. त्याचवेळी जाहीरनाम्याप्रमाणे नागरिकांच्या सुविधांसाठी प्रशासनाशी कधी थेट टक्कर देत तर कधी सामंजस्याच्या भूमिकेतून पाठपुरावा करून सुविधा पुरविण्यात यश साधले. पक्षासोबत जनसुराज्य शक्ती व अपक्षांच्या आघाडीला बरोबर ठेवताना त्यांनाही पदाचा लाभ देण्यात यश आले. मात्र, माजी महापौर तृप्ती माळवी यांच्या लाचखोरीच्या प्रकरणाने राष्ट्रवादीने चार वर्षात केलेल्या चांगल्या कामांमध्ये एक डाग लागला आहे. सध्याच्या निवडणुकीत या सर्वांच्या पाठबळावर राष्ट्रवादी कितपत भरारी मारते? यावर गेल्या पाच वर्षातील टायमिंग साधले का हे स्पष्ट होणार आहे.
महानगरपालिका म्हणजे ताराराणी आघाडीची सत्ता असे समीकरण असलेल्या राजकारणात राष्ट्रवादी काँग्रेसने नेते हसन मुश्रीफ यांच्या नेतृत्वाखाली पक्षाने २६ जागा पटकावल्या. यावेळी जनसुराज्य शक्ती, अपक्ष, शिवसेना, भाजप या पक्षांचेही नगरसेवक निवडून आलेले असताना पक्षाने जनसुराज्य, अपक्षांची आघाडी करत काँग्रेसबरोबर सत्ता मिळवली. या सत्तेतील भागीदारीमध्ये महापौर तसेच विविध पदांच्या वाटण्याही केल्या. महापौरपद महिलांसाठी राखीव असल्याने तीन पदे मिळाली. त्याशिवाय विविध पदाधिकाऱ्यांच्याही नियुक्ती करताना नेत्यांनी योग्य समतोल राखल्याने नगरसेवकांमध्ये पदांवरून फार मोठी खळखळ झाल्याचे दिसून आले नाही. यासाठी एक पद मिळालेल्या नगरसेवकाला, दुसऱ्या पदाचा लाभ न देण्याचे पाळलेले धोरण महत्वाचे ठरले. तसेच पद व स्थायी समितीतील सदस्यपद देतानाही विचार केला गेला. यामुळे जवळपास निम्म्या नगरसेवकांना पदावर बसवता आले. सर्वच सदस्यांना कोणती ना कोणती समितीवर जाता आले. मात्र, पक्षातील या सभागृहात ज्येष्ठ असलेले जालंदर पोवार, भूपाल शेटे, सर्जेराव पाटील यांना पद मिळाले नाही. त्याचवेळी पक्षाबरोबर असलेली जनसुराज्यशक्ती अपक्ष या आघाडीतील मधुकर रामाणेही पदापासून वंचित राहिले. राष्ट्रवादी काँग्रेसने राजकीय समतोल राखत असताना विकासकामाबाबतही आखलेले धोरण कामकाजात दिसत होते. नागरिकांना सुविधा देण्याचे धोरण प्राधान्यक्रमावर होते. त्याप्रमाणे पाणीपुरवठा, आरोग्य, परिवहन या क्षेत्रात पक्षाचा पाठपुरावा महत्वाचा ठरला. आरक्षण उठवणार नाही हा मुश्रीफ यांनी प्रचारांमध्ये दिलेला शब्द पाळण्याचे काम केले. त्याचवेळी जनतेच्या भावना लक्षात घेऊन मुश्रीफ हे त्यावेळी मंत्री असतानाही राष्ट्रवादीच्या तत्कालिन महापौर सुनीता राऊत व इतर नगरसेवकांनी टोल आंदोलनात घेतलेला पुढाकार जनतेच्या प्रश्नाशी पक्ष निगडीत असल्याचे दाखवून दिले. यावेळी महापौरांना धक्काबुक्कीही झाली होती. मात्र टोल आंदोलनातील पक्षाचा सहभाग नागरिकांना भावला.
महापालिकेत थेट पाइपलाइन योजना असो, नगरोत्थानचे रस्ते, नवीन बसेस असतील व कचरा उठावसाठी केलेली यंत्रणा याबाबत राष्ट्रवादीचे नगरसेवक प्रयत्नशील राहिले. प्रशासनावर वचक ठेवण्याचा प्रयत्न राष्ट्रवादीच्या नगरसेवकांकडून होत राहिला. या कामकाजाच्या जोरावर व नगरसेवकांना दिलेल्या विविध पदांच्या संधींमुळे पक्षाकडे पुढील निवडणुकीसाठी नक्कीच उमेदवारांची पसंती असण्याची शक्यता आहे. पण नवीन निवडणुकीला सामोरे जात असताना जाहीरनामा काय देणार आहे? हेही महत्वाचे ठरणार आहे.
माळवींच्या लाचखोरीचा फटका
एकीकडे जास्तीत जास्त नगरसेवकांना पदाधिकारी बनवण्याचा प्रयत्न सुरू असताना तृप्ती माळवी यांच्या लाचखोरीच्या प्रकरणाने पक्षाच्या प्रतिमेला चांगलाच तडा गेला. शहराच्या प्रथम नागरिक म्हणून मान असलेल्या या पदावरील व्यक्तीच लाचसारख्या प्रकरणात सापडण्यावरुन पक्ष बराच बॅकफूटवर गेला. त्यातून सावरण्यासाठी पक्षाने त्यांच्याकडून राजीनाम्याची मागणी केली. मात्र त्यांनी राजीनामा न देता पक्षालाच आव्हान दिले. लाचप्रकरणानंतर राजीनाम्याचे नाट्यही रंगले. सरकार, हायकोर्टापर्यंत पोहचलेल्या या नाट्यातून गेल्या पाच वर्षात पक्षाने जपलेल्या प्रतिमेला चांगला धक्का बसला आहे. त्याचे पडसाद या निवडणुकीतही उमटणार आहेत.
शेवटच्या टप्प्यात धुसफूस
गेल्या पाच वर्षात काँग्रेसमध्ये पदे देण्यावरुन बरीच धुसफूस झाली असली तरी तुलनेत राष्ट्रवादी व जनसुराज्य शक्ती पक्षाच्या आघाडीत फार तणाव झाला नव्हता. मात्र, स्थायी सभापती आदिल फरास यांचा राजीनामा काही दिवसानंतर घेण्यावरुन मात्र पक्षाच्या महापालिकेतील पदाधिकाऱ्यांमध्ये काही विसंगती दिसली. पक्षातील नवे, जुने असे म्हणण्यापर्यंत वाद गेला. फरास व लाटकर यांच्यातील प्रकारामध्ये मुश्रीफांना हस्तक्षेप करावा लागला. शेवटच्या टप्प्यात ही धुसफूस दिसली.
पक्षातील पदाधिकारी
महापौर - कादंबरी कवाळे, सुनीता राऊत, तृप्ती माळवी उपमहापौर - प्रकाश पाटील, सचिन खेडकर, परिक्षित पन्हाळकर, ज्योत्स्ना मेढे स्थायी सभापती - महेश सावंत, राजेश लाटकर, रमेश पोवार, आदिल फरास बालकल्याण सभापती - शारदा देवणे, रोहिणी काटे शिक्षण मंडळ सभापती - रशीद बारगीर, महेश जाधव परिवहन सभापती - प्रकाश कुंभार गटनेता - प्रकाश पाटील, राजेश लाटकर ....
राष्ट्रवादी काँग्रेस पक्षाने गेल्या दोन निवडणुकांपासून पक्षाच्या चिन्हावर निवडणूक लढवण्यास सुरुवात केली आहे. यंदाही तीच पद्धती कायम ठेवत एकहाती सत्ता घेण्याचे उद्दिष्ट असेल. गेल्या पंचवार्षिकमध्ये शहरात पक्षाच्या माध्यमातून विविध कामे केली आहेत. इतिहासात कधीही आला नाही, इतका निधी या पाच वर्षात महापालिकेला मिळाला आहे. त्यामुळे कोल्हापूरची जनता सहकार्य करेल. निवडणूक प्रक्रिया जाहीर झाल्यानंतर पक्षाचा जाहिरनामा जाहीर करणार आहोतच. हसन मुश्रीफ, आमदार राष्ट्रवादी काँग्रेस
प्रत्येक पदाधिकाऱ्याकडून चांगले काम
घोडेबाजार रोखण्यासाठी पक्षाने निवडणूक लढवली व सत्ता मिळवली. या सत्तेनंतर जे जे पक्षाचे नगरसेवक पदाधिकारी बनले. त्यांनी पक्षाची छाप उमटवली. सुनीता राऊत यांचे टोल आंदोलनातील नेतृत्व असो, प्रकाश कुंभार परिवहन सभापती असताना केएमटीच्या जागांवर लावण्यात आलेली नावे व जागेवरील काढण्यात आलेली अतिक्रमणे, शारदा देवणे महिला व बालकल्याण सभापतीपदावर असताना घेतलेल्या विविध स्पर्धा अशी उदाहरणे सांगता येतील. थेट पाइपलाइन योजना, तेराव्या वित्त आयोगातून आरोग्य विभागाकडे यंत्रणा उभी करुन कचरा उठाव महापालिकेमार्फत सुरू करणे, झोपडपट्टी विकासासाठी, नगरोत्थानमधील रखडलेल्या रस्त्यांच्या कामासाठी, केएमटीच्या बसेस आणण्यासाठी सातत्याने पाठपुरावा केल्यानेच यामध्ये यश मिळाले. कर्मचाऱ्यांच्या प्रश्नांबाबतही राष्ट्रवादीने आघाडी घेतली. कोणतीही आरक्षणे उठवायची नाहीत हे पक्षाने धोरण ठरवले होते. त्याची या पाच वर्षांमध्ये काटेकोरपणे अंमलबजावणी करुन शहरवासियांना विश्वास दिला आहे. आगामी सभागृहातही चांगले काम करण्यासाठी प्रयत्न असेल. कोल्हापूरचे वेगळेपण जपून शहराची राजकारणात उंची वाढवण्याचा प्रयत्न असेल. राजेश लाटकर, गटनेता, राष्ट्रवादी काँग्रेस .... राष्ट्रवादी, जनसुराज्य अपक्ष आघाडीचे सदस्य
राष्ट्रवादी - २६, जनसुराज्य - ४, अपक्ष - ५ ... अपुऱ्या कामांसाठी प्राधान्य
गेल्या पाच वर्षात अनेक विकासकामे घेऊन पक्षाने वाटचाल केली. त्यामध्ये पक्षाचे अध्यक्ष शरद पवार यांच्यासह वरिष्ठ नेत्यांनी प्रयत्न केले. त्यातून ज्या योजना राबवण्यात येत आहेत, त्यातील काहींची कामे अपुरी आहेत. आगामी सभागृहात पक्षाच्यावतीने ती पूर्ण करण्याचा विश्वास शहरवासियांना देण्यात येणार आहे. शहरवासियांना चांगल्या सुविधांसाठी पक्ष प्रयत्नशील आहे. स्मार्ट सिटी योजनेमध्ये शहराचा समावेश झाला नाही तरी महापालिकेच्या पातळीवर शहर स्मार्ट करण्याचा प्रयत्न असेल. मंदिर विकास आराखड्याबाबतही सातत्याने पाठपुरावा केला जाणार आहे.
आर. के. पोवार, राष्ट्रवादी काँग्रेस
मोबाइल अॅप डाउनलोड करा आणि राहा अपडेट
