शाळा, संस्था, मंदिरांमध्ये गुरुपौर्णिमा उत्साहात
म. टा. प्रतिनिधी, कोल्हापूर
प्रत्येकाच्या आयुष्यात गुरूचे स्थान उच्च असते. गुरुपौर्णिमेनिमित्त शाळा, महाविद्यालय, संस्था, मंदिरांमध्ये विविध कार्यक्रम आयोजित करण्यात आले होते. शाळांमध्ये विद्यार्थ्यांनी शिक्षकांचे स्वागत पुष्पगुच्छ देऊन केले, तर श्री दत्त मंदिर, साई मंदिर, स्वामी समर्थ मंदिरात भाविकांनी गर्दी केली होती.
विद्यापीठ हायस्कूल
मुख्याध्यापक बी. डी. कुंभार यांच्या हस्ते व्यासांच्या प्रतिमेचे पूजन करण्यात आले. एम. व्ही. कुंभार यांनी विद्यार्थ्यांना आपल्या जीवनातील गुरुचे महत्त्व विशद केले. कार्यक्रमास उपमुख्याध्यापिका एस. व्ही. रणनवरे, पर्यवेक्षक के. एम. जबडे, एस. वाय. कुंभार आदींसह शिक्षक, विद्यार्थी उपस्थित होते.
साई हायस्कूल
मान्यवरांच्या हस्ते व्यासांच्या प्रतिमेचे पूजन झाले. कावडे यांनी गुरूंच्या कार्याचा गौरव करून गुरुपौर्णिमेचे महत्त्व विशद केले. सर्व विद्यार्थी प्रतिनिधींनी गुरुजनांना वंदन केले. अध्यक्षस्थानी मुख्याध्यापक बी. एच. पाटील होते. प्रमुख पाहुणे म्हणून माजी मुख्याध्यापक जे. डी. कावडे व संस्थेचे अधीक्षक मदन बोडके उपस्थित होते.
गर्ल्स हायस्कूल
श्री प्रिन्स शिवाजी मराठा बोर्डिंग हाउसच्या गर्ल्स हायस्कूलमध्ये सरस्वतीच्या मूर्तीला हार घालून गुरुपौर्णिमा उत्साहात साजरी करण्यात आली. अध्यक्षस्थानी मुख्याध्यापिका एस. बी. शिंदे होत्या. डॉ. विलास पाटील प्रमुख पाहुणे होते. यू. एम. पाटील यांनी पाहुण्यांचा परिचय करून दिला. गुरुपौर्णिमेविषयी कोमल पाटील, सलोनी वारके, श्वेता पाटील, फिजा चौधरी, ऐश्वर्या सुतार या विद्यार्थिनींनी मनोगत व्यक्त केले.
तवनाप्पा पाटणे हायस्कूल
गुरुपौर्णिमेनिमित्त मान्यवरांच्या हस्ते संस्थेचे संस्थापक विभूते गुरुजी यांच्या प्रतिमेजे पूजन करण्यात आले. यावेळी ऋतुजा चव्हाण, मनाली दिवसे, अथर्व कुलकर्णी, श्रेया माळी या विद्यार्थ्यांनी गुरुबद्दल कृतज्ञता व्यक्त केली. एस. ए. पाटील यांनी माहिती दिली. जिमखानाप्रमुख गिरगावकर यांनी गुरूचे महत्त्व विशद केले. कार्यक्रमास मुख्याध्यापक एस. बी. सुतार, पर्यवेक्षक बी. बी. पाटील, शिक्षक-शिक्षकेतर उपस्थित होते.
न्यू हायस्कूल, पेटाळा
मुख्याध्यापक एस. पी. कणिरे यांच्या हस्ते व्यासांच्या प्रतिमेचे पूजन झाले. प्रमुख पाहुणे म्हणून माजी शिक्षक एस. आर. कांबळे उपस्थित होते. श्रेयस ठाकूर याने स्वागत केले. विद्यार्थी प्रथमेश भांदिगरे व पी. बी. परीट यांनी गुरुगीत सादर केले. अथर्व गोडसे, विराज कुलकर्णी, प्रणव वालावलकर या विद्यार्थ्यांनी गुरुचे महत्त्व विशद केले.
श्री दत्ताबाळ विद्यामंदिर
विद्यार्थ्यांनी महर्षी व्यास ते आपला पहिला गुरू आई, गुरुजन यांच्याविषयी आपल्या जीवनातील महत्त्व विशद केले. यावेळी शिक्षक कदम व पाटील यांनी गुरुबद्दल मनोगत व्यक्त केले. संस्थेच्या उपाध्यक्ष पल्लवी देसाई, सचिव नीलेश देसाई, मुख्याध्यापिका जयश्री सावंत उपस्थित होते.
सणगर तालीम मंडळ
मंडळाच्यावतीने गुरुपौर्णिमेनिमित्त कार्यक्रमाचे आयोजन केले होते. यावेळी सुप्रिया मेटील, एस. एस. कुलकर्णी यांनी गुरुपौर्णिमेचे महत्त्व सांगितले. कार्यक्रमाला पतंजली योगपीठाचे प्रभारी बापू पाडळकर, शेखर खापणे उपस्थित होते. सूर्यकांत गायकवाड यांनी सूत्रसंचालन केले. अरविंद पोवार यांनी आभार मानले.
देशभूषण हायस्कूल
शाळेची माजी विद्यार्थिनी मुमताज इनामदार हिच्या हस्ते सरस्वती प्रतिमेचे पूजन करण्यात आले. दहावीच्या विद्यार्थ्यांनी मुख्याध्यापकांसह शिक्षक-शिक्षकेतर कर्मचाऱ्यांना पेन भेट देऊन कृतज्ञता व्यक्त केली. ऐश्वर्या पोवार हिने गुरुपौर्णिमेविषयी माहिती सांगितली. सहायक शिक्षक एम. बी. तेरदाळे, मुख्याध्यापक आर. ए. गाट यांनी विद्यार्थ्यांना मार्गदर्शन केले.
ज्ञानगंगा हायस्कूल
मार्केट यार्डमधील सौ. सुनीतादेवी सोनवणे ज्ञानगंगा हायस्कूलमध्ये अनिकेत पवार यांच्या हस्ते प्रतिमा पूजन झाले. रूक्साना सय्यद, वैष्णवी कांबळे, कादंबरी खैरमोडे, गौरी सुतार, अंकिता कुंभार, प्रतीक्षा कुंभार या विद्यार्थिनींनी मनोगत व्यक्त केले. आर्ट ऑफ लिव्हिंगतर्फे विद्यार्थ्यांना रोपांचे वाटप करण्यात आले.
प्रायव्हेट हायस्कूल
विभूते गुरूजी, अ. वि. जोशी, व्यास, सरस्वती यांच्या प्रतिमा पूजनाने प्रायव्हेट हायस्कूलमधील गुरूपौणिमा सोहळ्यास सुरुवात झाली. दहावीच्या विद्यार्थ्यांनी प्रज्ञावर्धन स्तोत्र सादर केले. आर्या नितीन जोशी, शिक्षिका एस. एस. देशपांडे यांनी मनोगत व्यक्त केले. पर्यवेक्षक एम. आर. गोरे, जिमखाना प्रमुख ए. व्ही. कुंभार, श्रीमती एस. एस. लुकतुके आदी उपस्थित होते.
महाराष्ट्र विद्यालय
कसबा बावडा येथील मनपा महाराष्ट्र विद्यालय क्र.२५ मध्ये मुख्याध्यापिका राजश्री कोळी यांच्या हस्ते प्रतिमा पूजन झाले. विद्यार्थ्यांनी शिक्षकांना पुष्पगुच्छ व श्रीफळ देऊन आदर व्यक्त केला. यावेळी प्रदीप पाटील, कोळी, थोरवत, शमीम मुजावर आदी उपस्थित होते. शहाजी पाटील यांनी प्रास्ताविक केले. संतोष कदम सूत्रसंचालन यांनी केले.
मगदूम हायस्कूल
दादासाहेब मगदूम हायस्कूल येथे कार्यक्रम झाले. अध्यक्षस्थानी मुख्याध्यापक एस. आर. भेंडे होते. समर्थ ओतारी, रोहन मोरे,
स्वप्नील वाघ, गौरी हसबनीस, वृषाली पाटील, वैष्णवी आरगे, ऋतुजा पिसाळ विद्यार्थ्यांनी गुरुविषयी
मनोगतातून आदर व्यक्त केला. एस. एस. कापसे, आर. जे. पाटील यांनी विद्यार्थ्यांना मार्गदर्शन केले.
वीरशैव लिंगायत समाज
चित्रदुर्ग मठात झालेल्या गुरूपौर्णिमा उत्सवास मठाधीश चंद्रशेखर महास्वामी उपस्थित होते. मानवी जीवनात शांतीसाठी अध्यात्माची जोड देणे आवश्यक असल्याचे मत महास्वामी यांनी व्यक्त केले. यावेळी मनोहर गाडवे यांच्या हस्ती महास्वामींची पाद्यपूजा करण्यात आली. राजू वाली यांनी स्वागत केले. बी. एस. पाटील यांनी आभार मानले.
मोबाइल अॅप डाउनलोड करा आणि राहा अपडेट
