कोल्हापुरातील गुंडाचे अंडवर्ल्ड कनेक्शन असल्याची धक्कादायक माहिती पुढे आली आहे. हा गुंड कोल्हापूर महानगरपालिकेच्या निवडणुकीची तयारी करू लागला आहे. या गुंडाला रोखण्यासाठी पोलिसांनी मोका व हद्दपारीसाठी तयारी सुरू केली असून त्यादृष्टीने पुरावे गोळा करण्यास सुरूवात केली आहे.
ज्येष्ठ नेते कॉम्रेड गोविंदराव पानसरे यांचा हत्येचा तपास करताना कोल्हापुरातील गुंडाच्यांवर पोलिसांनी शॅडो वॉच ठेवला होता. या शॅडो वॉचमध्ये काही गुंडांचे संबध थेट अंडरवर्ल्ड असल्याचे लक्षात आले आहे. कळंबा कारागृहात मुंबई टोळीयुद्धातील गुंड आहेत. अटक केलेल्या स्थानिक गुंडांनी कळंबा कारागृहात टोळी युध्दातील गुंडाशी जवळीक साधली आहे. या जवळकीतून एका गुंडाने थेट अंडरवर्ल्डमधील गुंडाशी संपर्क साधल्याचे लक्षात आले आहे.
टोळी युध्दातील गुंडाशी जवळीक साधणाऱ्या स्थानिक गुंडांचे रेकॉर्ड तयार करण्याचे काम पोलिसांनी सुरू केली आहे. काही गुंड व्हाईट कॉलर बनण्यासाठी महानगरपालिकेच्या निवडणुकीकडे पहात असून नगरसेवक होण्याचे 'स्वप्न' पहात आहेत. एका गुंडाने मुक्त सैनिक वसाहत परिसरात वाढदिवसाच्या माध्यमातून दहशत माजवण्यासाठी प्रयत्न केल्याचे लक्षात आल्यावर पोलिसांनी त्या गुंडाचा वाढदिवस उधळून लावला होता. त्याच्या वाढदिवसाच्या पत्रिकेवर एका आमदाराचेही नाव होते.
शहरातील १५० हून अधिक गुंडाच्या हद्दपारीचे ठराव महसूल प्रशासनाकडे आहेत. त्यांनी या प्रस्ताव निर्णय न दिल्याने पोलिस अधीक्षकांकडे असलेल्या अधिकाराचा वापर करून या गुंडांनी निवडणुकीत उतरू नये यासाठी प्रयत्न पोलिस प्रशासनाकडून केले जात आहेत.
मोबाइल अॅप डाउनलोड करा आणि राहा अपडेट
