सहकार संपविलेल्या राष्ट्रवादी काँग्रेसला गाडण्यासाठी शिवसेनेने कंबर कसली आहे. त्यामुळे पापाचे पाय घेऊन श्रावणबाळ झालेल्या आमदार हसन मुश्रीफ व त्यांच्या बगलबच्च्यांना जागा दाखवा. शिवसेना कार्याध्यक्ष उद्धव ठाकरे यांच्या आदेशानुसार आपण स्थानिक स्वराज संस्था पूर्ण ताकतीने लढवा. यातील पहिला टप्पा असलेल्या कृषी उत्पन्न बाजार समितीसाठी उभारलेल्या उमेदवारांना प्रचंड मतांनी विजयी करा, असे आवाहन जिल्हा संपर्क प्रमुख अरुण दुधवाडकर यांनी केले.
गडहिंग्लज कृषी उत्पन्न बाजार समिती निवडणूकीच्या पार्श्वभूमीवर शिवसेना, स्वाभिमानी व मित्रपक्षाच्या 'शिवशाहू शेतकरी परिवर्तन आघाडी'चा शुभारंभप्रसंगी ते बोलत होते. नगरपालिकेच्या शाहू सभागृहात कार्यक्रमाचे आयोजन करण्यात आले.
जिल्हाप्रमुख देवणे म्हणाले, बाजार समिती वाटून खाणारे गटतट निवडणुकीच्या निमित्ताने एकत्र आले. त्यांनी उमेदवारी वाटून घेऊन बिनविरोध करण्याचा प्रयत्न केला. पण आम्ही भ्रष्टाचाराविरोधात पॅनेल उभे केले. हि निवडणूक आपल्याला जिंकायचीच असून संपूर्ण मतदारसंघ पिंजून काढा व सभासदांना आपली भूमिका पटवून द्या. आपल्याला विजय मातोश्रीपर्यंत घेऊन जायचा आहे. त्यासाठी वाटेल ती किंमत मोजायला तयार आहोत.
मुरलीधर जाधव म्हणाले, शेतकऱ्यांना न्याय देण्याचे काम कृषी उत्पन्न बाजार समितीच्या माध्यमातून केले जाते. शेतकऱ्यांना योग्य हमीभाव समितीमार्फत दिला जातो. मात्र निवडणुकीच्या माध्यमातून सर्व सहकारी संस्था मोडीत काढणाऱ्यांच्या हातात संस्था ठेवायच्या प्रयत्न होत आहे. शेतकऱ्यांच्या सर्व सहकारी संस्था, भू-विकास बँक बंद पडणारे केवळ भूखंडांचे वाटप करण्यासाठीच एकत्र आलेत. त्याला विरोध म्हणून शिवसेनेने पॅनेल करण्याचे निश्चित केले.
यावेळी माजी आमदार घाटगे, जिल्हाप्रमुख संजय पवार, स्वाभिमानीचे राजेंद्र गड्ड्याण्णावर , सुभाष शिरकोळे, बी. एम. पाटील, तानाजी देसाई आदींनी मनोगत व्यक्त केले. प्रा.सुनील शिंत्रे यांनी स्वागत केले. तालुकाप्रमुख दिलीप माने यांनी सूत्रसंचालन तर सूर्यकांत देसाई यांनी आभार मानले.
आता तुमची बारी आली...
आली रे आली.. आता मुश्रीफ तुमची बारी आली... असे म्हणत नुकतेच शिवसेनेत प्रवेश केलेले संग्राम कुपेकर यांनी आमदार हसन मुश्रीफ यांचेवर थेट हल्ला केला. राष्ट्रवादीने तालुक्यातील तालुका संघ, बाजार समिती, कुकुटपालन संस्था, भू-विकास बँक, सुतगिरणीसह सर्व सहकार भ्रष्टाचार करून संपविला आहे. गडहिंग्लजचा एक कारखाना तुम्ही संपवला आहात. पण लक्षात ठेवा आम्ही दुसरा कारखाना काढू, असे आव्हानही दिले.
मोबाइल अॅप डाउनलोड करा आणि राहा अपडेट