'राष्ट्रवादी काँग्रेस पक्षाचे अध्यक्ष शरद पवार यांच्या राजकीय व सामाजिक कारकिर्दीइतकेही वय नसलेल्या खासदार राजू शेट्टी यांच्याकडे पवार यांच्यावर बोलण्याइतपत कुठून मस्ती आली आहे? हे पहावे लागेल. ही मस्ती जनता निश्चित उतरवेल', अशा शब्दात राष्ट्रवादीचे आमदार हसन मुश्रीफ यांनी समाचार घेतला. यापुढील काळात पवार यांच्यावर टीका सहन करणार नाही असा इशाराही दिला आहे.
माजी मंत्री छगन भुजबळ यांच्यावर इडीने केलेल्या कारवाईनंतर शरद पवार यांनी भुजबळ यांच्या पाठीशी रहात, 'आम्ही तुरुंगात जाण्याची वाट पाहतोय' असे वक्तव्य केले होते. त्यावर शेट्टी यांनी, 'पवार यांनी तुरुंगात जाऊन आत्मचिंतन करावे' अशी टिका केली होती. त्याबाबत मुश्रीफ यांनी पत्रकार परिषद घेऊन शेट्टी यांच्या विचाराचे व 'घालीन लोटांगण' पद्धतीच्या राजकारणाचे वाभाडे काढले.
मुश्रीफ म्हणाले, 'शेट्टी यांच्या या वक्तव्याचा आम्ही निषेध करत आहोतच. पण ऊसकरी शेतकऱ्याला ऊसाचा दर मिळत नसतानाही त्यांच्या जिवावर राजकारण करणारे शेट्टी मूग गिळून गप्प आहेत. साखर कारखान्यांच्या इतिहासात साखर दराचा १९०० रुपये इतका नीचांक झाला आहे. त्याबाबत काही बोलत नाहीत. लोकसभेतही ते जात नाहीत. नुकत्याच केंद्र सरकारने घेतलेल्या लेखाजोख्यामध्ये शेट्टी यांचे निष्क्रिय खासदार म्हणून नाव आले आहे. केंद्राने साखरेचा ५० लाख टन बफर स्टॉक केल्यास दर वाढतील अशी शक्यता असताना अन्न व नागरी पुरवठा मंत्री रामविलास पासवान यांनी ग्राहकांचे साखरेचे दर वाढतील म्हणून त्यांनी बफर स्टॉक करण्यास नकार दिला. शेतकऱ्यांची त्यांना चिंता नाही. याबाबतही शेट्टी काही म्हणत नाहीत. यापाठीमागे शेट्टी यांचे युती सरकारपुढे घालीन लोटांगण हेच धोरण स्पष्ट होत आहे. आम्ही युती सोडणार नाही, हवे तर काढून टाकावे अशी भूमिका घेतली आहे.'
'शेट्टी यांच्या या भूमिकेचा १०० वा प्रयोग पाहून कोल्हापूरकर कंटाळले आहेत' असे सांगत मुश्रीफ म्हणाले, 'आम्ही मुख्यमंत्र्यांना विनंती करत आहे की शेट्टी यांची लाल दिव्याची आस, महामंडळाचे दोन चार तुकडे टाकून लाचारी संपवावी. आम्ही शेतकऱ्यांसोबत आयुष्य घालवले आहे. त्यामुळे कसे आंदोलन करावे हे शेट्टी यांनी सांगू नये. शेतकऱ्यांसाठी आम्हाला त्यांच्यासारखे पायाला फडके बांधून फिरण्याचे नाटक जमणार नाही.' याप्रसंगी ए. वाय. पाटील, युवराज पाटील, भैय्या माने, राजू लाटकर, अनिल साळोखे उपस्थित होते.
मोबाइल अॅप डाउनलोड करा आणि राहा अपडेट
