गारगोटी शहरातील भर रहदारीच्या रस्त्यावरील स्टेट बँकेची दोन एटीएम फोडून चोरट्यांनी गारगोटी पोलिसांच्या समोर चांगलेच आवाहन निर्माण केले आहे. या प्रकरणी वरिष्ठ पोलिस अधिकाऱ्यांनी गारगोटीत तळ ठोकला असून तपासाची तीन पथके रवाना केल्याची माहिती अप्पर पोलिस अधिकारी एम. एम. मकानदार यांनी दिली. चोरीसाठी वापरलेले कटर मांगनूर घाटात सापडल्याने चोरटे गडहिंग्लजमार्गे कर्नाटकात पळाल्याची शक्यता आहे.
रविवारी रात्री स्टेट बँकेच्या एकाच रूम मधील दोन एटीएम मशीन अज्ञात चोरट्यांनी फोडून त्यातील २५ लाख रुपये लंपास केले होते. इतकी मोठी चोरी होण्याचे हे गारगोटी शहरातील पहिलेच प्रकरण आहे. यापूर्वी सुध्दा दोन वेळा एटीएम मशीन फोडण्याचा गारगोटीत प्रकार झाला होता. या दोन्हीही चोऱ्यांचा तपास आजअखेर पूर्ण झालेला नाही. आणि रविवारी पुन्हा तिसरा एटीएम फोडीचा प्रकार घटल्याने पोलीस यंत्रणा खडबडून जागी झाली आहे. चोरट्यांनी ही चोरी करताना कटरच्या सहाय्याने एटीएम मशीन उचकटून व सीसीटीव्ही कमेराच्या वायरी कापून ही चोरी केली. चोरीचा एकंदरीत प्रकार पाहता हे चोर सराईत असल्याचे समोर येते. कारण गारगोटी पोलीस ठाण्यापासून हाकेच्या अंतरावर असणाऱ्या भागातच ही चोरी झाली. या परिसरात रात्रीच्या वेळी सुध्दा तुरळक रहदारी असते.
दरम्यान, मंगळवारी सकाळी एटीएम फोडण्यासाठी वापरण्यात आलेला कटर सिलेंडर मांनगुर घाटात टाकून दिल्याची माहिती पोलिसांना मिळाली. घटनास्थळी ठसे तज्ज्ञ, पोलिस अधिकारी यांनी धाव घेवून कटर सिलेंडरची तपासणी केली. रस्त्यापासून शंभर फूट दरीत हे सिलेंडर टाकून देण्यात आले होते. सिलेंडरच्या वर्णनावरून हे सिलेंडर कर्नाटक राज्यातील असावे असा अंदाज व्यक्त करण्यात येत होता. यावरून पोलिसांनी आपला मोर्चा कर्नाटककडे वळविला आहे.
तालुक्यातील सर्वच बँकांच्या एटीएमची संपूर्ण व्यवस्था खासगी कंपन्यांकडे आहे. या कंपन्यांनी सीसीटीव्ही व्यतिरिक्त कोणतीही सुरक्षा व्यवस्था केल्याचे दिसत नाही. यामुळे एटीएममधील पैसा रामभरोसेच आहे.
मोबाइल अॅप डाउनलोड करा आणि राहा अपडेट