म. टा. प्रतिनिधी, कोल्हापूर
राष्ट्रवादी आणि काँग्रेसच्या नेत्यांनी गुरुवारी रात्रीपासून शुक्रवार दुपारपर्यंत चर्चा करून तालुका पातळीवरील विकास सेवा संस्था गटातील उमेदवारांव्यतिरिक्त इतर सात गटांतील ९ जागांसाठी श्री छत्रपती शेतकरी विकास आघाडीची स्थापना केली. यात चार राष्ट्रवादीला, चार काँग्रेसला तर प्रत्येकी एक जागा माजी मंत्री सतेज पाटील आणि माजी मंत्री विनय कोरे यांना असे जागावाटप करण्यात आले. ए. वाय. पाटील यांनी राष्ट्रवादी काँग्रेसच्या कार्यालयात काँग्रेस, राष्ट्रवादी, जनसुराज्य शक्ती पक्ष आणि शिवसेनेला एकत्र घेवून पॅनल केले असल्याची घोषणा केली.
कृषी पणन आणि शेतीमाल प्रकिया संस्था गटातील दोन जागांपैकी एका जागेवर राष्ट्रवादीच्यावतीने बाबासाहेब पाटील-असुर्लेकर यांना संधी देण्यात आली. या गटातील दुसरी जागा प्रा. मंडलिक यांना देण्यात आली. महिलांसाठीच्या दोन उमेदवारांपैकी एक माजी खासदार निवेदिता माने यांना तर काँग्रेसची जागा उदयनी साळुंखे यांना देण्यात आली. पतसंस्था आणि अर्बन बँक गटातून राष्ट्रवादीचे प्रा. जयंत पाटील, पाणीपुरवठा, दूधसंस्था, गृहनिर्माण संस्थांतून राष्ट्रवादीच्यावतीने प्रताप उर्फ भैय्या माने यांची उमेदवारी निश्चित करण्यात आली. काँग्रेसच्यावतीने भटक्या विमुक्त जाती-जमातीतून आप्पी पाटील, मागासवर्गीय गटातून राजीव आवळे, इतर मागासवर्गीय गटातून विलास गाताडे हे उमेदवार आहेत.
अप्पी पाटील यांच्या उमेदवारीला राष्ट्रवादीने विरोध दर्शविला होता. तरीही त्यांची उमेदवारी कायम राहिली. गाताडे यांना उमेदवारी देऊन माजी मंत्री प्रकाश आवाडे यांची नाराजी दूर करण्याचा प्रयत्न झाला. सेवा-संस्था गटातून गगनबावडा येथून माजी मंत्री सतेज पाटील यांना माघार घेतली. तेथे मानसिंग पाटील यांना पूर्वी शब्द दिल्याने माघार घेतल्याचे सतेज पाटील यांनी सांगितले. केडीसीसीत स्वत:चे पॅनल न देण्याचा निर्णय यापूर्वीच जाहीर केला असल्याचे ते म्हणाले.
सेवा संस्थांतील लढती
सेवा संस्था गटातून आमदार महादेवराव महाडिक (हातकणंगले), माजी आमदार पी. एन. पाटील (करवीर), माजी मंत्री विनय कोरे (पन्हाळा), ए. वाय. पाटील (राधानगरी) यांची बिनविरोध निवड निश्चित झाली आहे. अन्य तालुक्यांचा विचार केल्यास आजरा तालुक्यातून अशोक चराटी यांच्याविरोधात जयवंतराव शिंपी, भुदरगड तालुक्यात माजी आमदार के. पी पाटील यांच्या विरोधात नंदकुमार ढेंगे, चंदगड तालुक्यात गोपाळराव पाटील यांच्याविरोधात माजी आमदार नरसिंग गुरुनाथ पाटील, गडहिंग्लज येथे संतोष पाटील यांच्याविरोधात बाबासाहेब आरबोळे, गगनबावडा तालुक्यात मानसिंग पाटील यांच्याविरोधात पी. जी. शिंदे, कागल तालुक्यात माजी मंत्री हसन मुश्रीफ यांच्याविरोधात दत्तात्रय वालावलकर, शाहूवाडी तालुक्यात मानसिंगराव गायकवाड यांच्याविरोधात पृथ्वीराज खानविलकर, सर्जेराव पाटील तर शिरोळ तालुक्यात विठ्ठलराव नाईक-निंबाळकर यांच्याविरोधात राजेंद्र पाटील-यड्रावकर अशी लढत होईल.
कृषी पणन
संजय मंडलिक यांच्याविरोधात नामदेवराव नार्वेकर, दिलीप पाटील, बाबासाहेब पाटील.
नागरी सहकारी बँक
प्रा. जयंत पाटील यांच्या विरोधात अनिल पाटील, व्ही. बी. पाटील, गजानन देसाई, यशवंत सोनार.
शेतीसंस्था आणि व्यक्ती
प्रताप माने यांच्याविरोधात विलास पाटील, रघुनाथ पाटील, सातगोंडा पाटील, सितराम रवंदे आणि के. एस. चौगुले.
इतर मागासवर्गीय
विलास गाताडे विरोधात अविनाश पाटील, शाहू चव्हाण, सुधीर मुंज.
अनुसूचित जाती
राजू आवळे यांच्याविरोधात आमदार सुजित मिणचेकर, शिवाजी कांबळे, व्यंकट कांबळे आदी.
विमुक्त जाती
अप्पी पाटील यांच्या विरोधात परशराम तावरे, नाळे उदय इत्यादी.
महिला
माजी खासदार निवेदिता माने, उदयानी साळुंखे यांच्याविरोधात जयश्री रेडेकर, सुजाता सातवणेकर.
यांनी घेतली माघार
खासदार धनंजय महाडिक, राजू शेट्टी, माजी मंत्री सतेज पाटील, अरुंधती महाडिक, माजी आमदार संजय घाटगे, अमरीश घाटगे, बाबूराव हजारे, भगवान काटे,
निलेश सरनाईक, प्रकाश आवाडे, आनंद माने, शेखर मंडिलक, भैय्यासाहेब कुपेकर, अरुण डोंगळे, सुनील मोदी.
सतेज पाटील यांची हुशारी
काँग्रेस-राष्ट्रवादीच्या पॅनलचा निर्णय झाल्यानंतर सतेज पाटील आणि विनय कोरे यांना अन्य गटांतील नऊपैकी एक जागा देण्याचा निर्णय झाला. आपल्या वाटणीची जागा प्रा. संजय मंडलिक यांना देण्याचा आग्रह धरत सतेज पाटील यांनी हसन मुश्रीफ तसेच महाडिक गटावर कुरघोडी केली. त्यांच्या इच्छेनुसार संजय मंडलिक यांना श्री छत्रपती शेतकरी विकास आघाडीत स्थान देण्यात आले. मंडलिक यांना उमदेवारी देण्यासह सतेज पाटील यांनी स्वत: माघार घेत गगनबावडा येथून मानसिंग पाटील यांना संधी दिली. त्यांच्या या निर्णयामुळे जिल्ह्याच्या राजकारणात त्यांनी मंडलिक गट आपल्यासोबत जोडून घेतला.
समझोता एक्स्प्रेस!
श्री छत्रपती शेतकरी विकास आघाडीचे मुख्य संकल्पक माजी मंत्री मुश्रीफ आहेत. त्यांचे विरोधक प्रा. मंडलिक यांना स्थान मिळाल्याने कागल तालुक्यातून सेवा-संस्था गटातून मुश्रीफ यांना निवडून येण्यास अडथळा उरलेला नाही. त्यामुळे भविष्यात मंडलिक गटाशी तह करण्याचा मार्ग मुश्रीफ यांनी खुला केल्याची चर्चा होती. दुसरीकडे करवीर तालुक्यातून नरके गटाने र्यकर्त्यांचे अर्ज मागे घेत पी. एन. पाटील यांचा मार्ग मोकळा केला.
मोबाइल अॅप डाउनलोड करा आणि राहा अपडेट
