म. टा. वृत्तसेवा, कुपवाड
'माजी मंत्री जयंत पाटील यांनी अनेकदा डबऱ्यात घातले तरीही मदन पाटील यांचे त्यांच्याशी कसे जमले, हे माहित नाही. खोबऱ्यासाठी भांडणारी मंडळी एकत्र येतात म्हणजे काहीही करायचे., पण सत्ता मिळवायची असाच हेतू दिसतो आहे. बँकेची आवस्था वाईट होण्याला तत्कालीन संचालकच जबाबदार असतात. एकदा सुरू झालेली चौकशी थांबत नाही. पाच वर्षे सहकार मंत्री राहिल्याने सर्वांच्या कुंडल्या आपल्याला माहित आहेत, असा इशारा माजी मंत्री पतंगराव कदम यांनी सोमवारी सांगलीत पत्रकारांशी बोलताना दिला.
कदम म्हणाले, 'जिल्हा बँकेच्या निवडणुकीच्या निमित्ताने समोर आलेली युती कसली आहे, सांगलीलाच काय संपूर्ण महाराष्ट्राला माहित आहे. जिल्हा बँकेचे खोबरे होऊ नये, याची काळजी लोक निश्चितच घेतील. सहकारी संस्था चांगल्या चालल्या पाहिजेत. भ्रष्टाचार करणारे आणि भ्रष्टाचार न करता बँक पुढे नेणारे कोण आहेत, हे न समजण्याइतपत जनता अडाणी राहिलेली नाही. वसंतदादा साखर कारखान्याचे अध्यक्ष विशाल पाटील यांनी आपल्याला फोनवरुन दोन टोळ्या एकत्र आल्याचे सांगितले. बँकेची आवस्था वाईट होती म्हणून नाबार्ड आणि रिझर्व्ह बँकेने प्रशासक आणला. त्यामुळे कोणी टिमकी वाजविण्याचे कारण नाही. प्रशासकांमुळे बँक सक्षम झाली आहे.'
'आमच्यात वाद नव्हता'
वसंतदादा पाटील घराण्यात आणि आपल्यात कधीच वाद नव्हता. आम्ही त्यांना नेहमीच बरोबर घेतले आहे. पण, आता घराण्यातील वाद बघून 'हे काय माझ्या नशिबाला आले' असे वसंतदादा स्वर्गात म्हणत असतील. माजी मंत्री मदन पाटील यांच्या बाबत योग्यवेळी योग्य निर्णय घेऊ, असेही कदम यांनी सूचित केले.
कपबशी विरोधात टेबल
सांगली जिल्हा मध्यवर्ती सहकारी बँकेच्या निवडणुकीतील उमेदवारांसाठी सोमवारी चिन्ह वाटप झाले. जयंत पाटील यांच्या नेतृत्वाखालील शेतकरी सहकारी पॅनेलला कपबशी तर मोहनराव कदम, विशाल पाटील यांच्या नेतृत्वाखालील रयत सहकार परिवर्तन पॅनेलला टेबल चिन्ह मिळाले आहे. दरम्यान, सोमवारी कदम-पाटील यांनी आपल्या पॅनेलच्या सतरा गटांतील सोळा उमेदवारांची यादी जाहीर केली. बॅकेच्या निवडणुकीत एकोणीस जागांसाठी ५३ उमेदवार रिंगणात उतरले आहेत. दोन्ही पॅनेलचे उमेदवार वगळता अन्य सतरा जण अपक्ष म्हणून निवडणूक लढवित असल्याचे सोमवारी स्पष्ट झाले.
'मदन पाटील दादाविरोधक'
'खासदार संजय पाटील यांनी आपली भेट घेतली. घरात वाद नको, असे सुचविले होते. मदन पाटील यांना तसे वाटत असेल तर त्यांनी ते पॅनेल सोडून बाहेर पडावे. त्यांना जाहीर पाठिंबा देवू, असे सांगत मी यासाठी त्यांना सोमवारी सकाळी नऊ वाजेपर्यंतचा वेळ दिला होता, मात्र ते आले नाहीत. म्हणून त्यांना वगळून आम्ही पॅनेलच्या उमेदवारांची घोषणा केलेली आहे. मदन पाटील हे शंभर टक्के वसंतदादांच्या विचारांच्या विरोधात आहेत. हेच पुढे कायम राहील, अशी कार्यकर्त्यांमध्ये भिती आहे. सर्वसामान्य आणि नवीन चेहऱ्यांना संधी देण्याचा दृष्टिकोन ठेवून आम्ही राष्ट्रवादीबरोबर चर्चेला तयार झालो होतो. ते त्यांना मान्य नव्हते. ते सगळे मोठे एकत्र आले असले तरी जनता त्यांना दणका देवू शकते. याबद्दल आम्हाला आत्मविश्वास आहे.
दरम्यान मोहनराव कदम म्हणाले, 'लाचारीचे राजकारण कधीच केले नाही आणि करणार नाही. सामान्य आमच्याबरोबर आहे. आमच्यातही कोणीही भानगडबाज नसल्याने आम्हीच सत्तेत जाणार आहोत. तिकडे भानगडबाजांचा भरणा अधिक आहे.'
'वसंतदादा-कदम गटाला आम्ही बाजूला केले नाही'
कॉँग्रेसने केलेले गुंडगिरीचे आरोप वैयक्तिक पातळीवरचे नाहीत. ज्या वेळी तसे आरोप वैयक्तिक पातळीवर येतील त्यावेळी जशास-तसे उत्तर देवू. अद्याप हालगी तापलेली नाही. हालगी तापूदे, मग आम्ही तोंड उघडू, असा इशारा खासदार संजय पाटील यांनी सोमवारी पत्रकारांशी बोलताना दिला. वसंतदादा-कदम गटाला आम्ही जाणीवपूर्वक बाजूला ठेवलेले नाही. चर्चेत ते मागे हटायला तयार नव्हते. त्यामुळे चर्चा थांबली. विशाल पाटील यांच्याकडे जावून आपण भावा-भावांत वाद नसावा, असा प्रयत्न केला होता. आमदार शिवाजीराव नाईक हे भाजपचे ज्येष्ठ नेते आहेत, यांची समजूत काढली आहे.'
मोबाइल अॅप डाउनलोड करा आणि राहा अपडेट
