राजर्षी शाहू समाधीस्थळ विकसित करण्यासंदर्भात महापालिकेत अधिकाऱ्यांची बैठक झाली. बैठकीत शाहू समाधीस्थळ विकसित करण्यासाठी ग्रीन झोन बदलण्याबाबतचा प्रस्तावाला येत्या महासभेत मान्यता घेऊन सरकारकडे पाठविण्याचा निर्णय घेण्यात आला. स्थायी सभापती आदिल फरास अध्यक्षस्थानी होते. सरकारकडून झोन बदलण्यासंदर्भातील परवानगी मिळताच तातडीने समाधीस्थळ विकसित करण्याच्या सूचना सभापती फरास यांनी केल्या. आयुक्त पी. शिव शंकर उपस्थित होते.
राजर्षी छत्रपती शाहू महाराज यांनी त्यांची समाधी ही नर्सरी बागेतील छत्रपती शिवाजी महाराज यांच्या स्मृति मंदिर परिसरात व्हावी असा उल्लेख त्यांच्या मृत्यूपत्रात केला होता. महापालिकेने नर्सरी बागेत राजर्षी छत्रपती शाहू महाराज यांचे समाधीस्थळ विकसित करण्याचा निर्णय घेतला आहे. महापालिकेने त्यासाठी ५० लाखांची तरतूद केली आहे.
नर्सरी बागेतील जागा ही शाहू चॅरिटेबल ट्रस्टची आहे. या संदर्भात श्रीमंत शाहू छत्रपती यांच्याशी चर्चा करून समाधीस्थळ विकसित करण्यात येईल, असे सभापती फरास यांनी सांगितले. सभापती फरास यांनी समाधीस्थळ विकसित करण्यासंदर्भात अधिकाऱ्यांशी चर्चा करताना तांत्रिक बाबी पूर्ण करण्याच्या सूचना केल्या.
बैठकीत कळंबा येथील ख्रिश्चन, मुस्लिम, लिंगायत समाजाकरिता दफनभूमी व हिंदू समाजाच्या स्मशानभूमीकरिता आरक्षित जागेची आयुक्तांसोबत पाहणी करण्याचे ठरले. जागेची पाहणी करून पर्यायी रस्ते करण्याच्या सूचना करण्यात आल्या. उपायुक्त विजय खोराटे, शहर अभियंता नेत्रदीप सरनोबत आदी उपस्थित होते.
मोबाइल अॅप डाउनलोड करा आणि राहा अपडेट