गोकुळ दूध संघाच्या निवडणुकीत दोन पॅनेल होणार हे निश्चित आहे. त्यामुळे दोन्ही पॅनेलचे नेते गोकुळसाठी मदत होणाऱ्या गटांना आपल्याकडे ओढण्यासाठी प्रयत्नशील आहेत. त्याचवेळी वेगवेगळ्या गटांनी आपल्याला किमान एक जागा मिळावी अशी अपेक्षा व्यक्त करत नेत्यांच्या भेटीगाठी घेण्यास सुरूवात केली आहे. माजी राज्यपाल डी. वाय. पाटील यांनी मंडलिक गटाच्या नेत्याशी चर्चा केली. तर आमदार चंद्रदीप नरके गटाने आमदार महादेवराव महाडिक यांची भेट घेऊन आपल्याला करवीर मतदारसंघातील एक जागा देण्याची मागणी केली. अन्यथा वेगळा विचार करावा लागेल, अशी आक्रमक भूमिकाही घेतली.
गोकुळ दूध संघासाठी नेत्यांच्या आणि कार्यकर्त्यांच्या जोरदार भेटीगाठी सुरू आहेत. गोकुळमध्ये सर्वांनी एकत्र येऊन लढावे, यासाठी आमदार महादेवराव महाडिक आणि माजी आमदार पी. एन. पाटील यांचा प्रयत्न सुरू असताना वेगवेगळ्या गटांची जुळवाजुळव सुरू आहे. तर या गटांनी आपल्याला एखाद दुसरी जागा मिळावी यासाठी नेत्यांकडे हट्ट करण्यास सुरूवात केली आहे. गटांना आपल्याकडे वळविण्यासाठी माजी मंत्री सतेज पाटील यांनी देखील प्रयत्न सुरू केले आहेत. त्यासाठी खुद्द माजी राज्यपाल डी. वाय. पाटील यांनी पुढाकार घेतला असून माजी खासदार सदाशिवराव मंडलिक यांच्या निधनाच्या निमित्ताने विचारपूस करण्यासाठी मंडलिक गटाचे नेते संजय मंडलिक यांची त्यांनी भेट घेतली. यावेळी सतेज पाटील करत असलेल्या पॅनेलला मदत करावी, अशी अपेक्षा त्यांनी व्यक्त केली.
आमदार चंद्रदीप नरके यांच्या गटानेही आमदार महादेवराव महाडिक गटाची भेट घेतली. आमदार म्हणून आपल्याला एक जागा मिळावी, अशी मागणी आमदार गटाकडून करण्यात आली आहे. करवीर तालुक्यात आमदार म्हणून चंद्रदीप नरके गटाची जी ताकद आहे. त काही नेत्यांना चार चार जागा दिल्या जातात. त्याप्रमाणे आमदार गटाने केवळ एकच जागा मागितली असल्याचे आमदार गटाचे म्हणणे आहे. आमदार गटाच्यावतीने अनिल पाटील (वाकरे) आणि किशोर पाटील (शिरोली) या दोन इच्छुकांनी उमेदवारी अर्ज दाखल केले आहेत.
'चुयेकरांची जागा आम्हाला द्या'
दिवंगत आनंदराव पाटील चुयेकर यांच्या निधनानंतर त्यांच्या रिकाम्या झालेल्या जागेवर देण्यात येणारा उमेदवार हा चंद्रदीप नरके गटाला असे म्हटले जात असले तरी चुयेकरनी संघाच्या उभारणीत दिलेल्या योगदानाचा सन्मान करणे हे नेत्यांचे काम आहे. त्यासाठी त्यांच्या वारसांना उमेदवारी दिली पाहिजे. ती उमेदवारी आमदार गटाची होत नाही. त्याबरोबरच ज्येष्ठ संचालक अरुण नरके यांचेही वेगळे योगदान आहे. त्याचा विचार नेत्यांनी करायचा आहे. त्यामुळे आमदार नरके म्हणून असलेल्या ताकदीचा विचार करून एक जागा देण्याची मागणी करण्यात आली आहे.
'गोकुळच्या निवडणुकीत कोणाला मदत करायची याबाबत कार्यकर्त्यांशी चर्चा करण्यात आलेली आहे. याबाबतचा निर्णयही झालेला आहे. पण, याबाबत चार एप्रिलला निर्णय जाहीर करण्यात येणार आहे.'
- प्रा. संजय मंडलिक
'गोकुळमध्ये करवीरमधील एक जागा तत्कालीन आमदार सतेज पाटील यांना देण्यात आली होती. आता ती जागा रिकामी झाल्याने त्यावर आम्ही हक्क सांगितला आहे. आमच्या ताकदीचा विचार करता ही जागा आम्हाला मिळावी अशी आमची अपेक्षा आहे.'
- आमदार चंद्रदीप नरके
मोबाइल अॅप डाउनलोड करा आणि राहा अपडेट