उन्हाचा तडाखा पचवत ,पोटाची आबाळ करत हक्काच्या जमिनीसाठी रस्त्यावर उतरलेले चांदोली अभयारण्यग्रस्त गावाकडून पाठवलेली भाकरी दोन दिवस पुरवून खात होते. एकीकडे उष्म्यामुळे अंगाची लाही होत असताना पोटाला चिमटा देत महिलांसह पावणेदोनशे आंदोलक जिल्हाधिकारी कार्यालयासमोरील रस्त्यावरच्या फूटपाथवर न्यायासाठी ठिय्या मारून बसले आहेत.
गेल्या १९ दिवसांपासून हाच दिनक्रम सुरू असताना शुक्रवारी मात्र या आंदोलकांनी तृप्तीचा ढेकर दिला. कोल्हापुरातील राजस्थानी जैन मारवाडी समाजाच्यावतीने या आंदोलकांना भोजन देण्यात आले. तसेच आंदोलन संपेपर्यंत दररोज दोन्हीवेळचे जेवण समाजातर्फे देण्यात असल्याची माहिती ईश्वर परमार यांनी दिली.
चांदोली अभयारण्यासाठी ज्यांच्या जमिनी संपादित केल्या त्यांना गेल्या १८ वर्षापासून पर्यायी जागा मिळालेली नाही. त्यासाठी गेल्या १९ दिवसांपासून या अभयारण्यग्रस्तांनी जिल्हाधिकारी कार्यालयासमोर न्याय मागण्यासाठी आंदोलन सुरू केले आहे. या आंदोलकांमध्ये महिला, तरूण व पुरूष असे पावणेदोनशे आंदोलक रस्त्यावरच ठाण मांडून बसले आहेत. यामध्ये काही वृद्ध महिलाही आहेत. आंदोलकांमधील काही तरूण दोन ते तीन दिवसांतून एकदा गावाकडे जाऊन आंदोलकांसाठी त्यांच्या घरातून भाकरी, चटणी घेऊन येत होते. पुढची भाकरी आणेपर्यंत आणलेल्या तीनचार भाकऱ्या चटणीच्या पाण्यासोबत खाऊन आंदोलकांनी १९ दिवस भूक भागवली.
आंदोलकांना पोटभर जेवण नाही आणि त्यात उन्हाच्या झळांमध्ये दिवसभर बसल्यामुळे आरोग्य बिघडण्याचा धोका लक्षात घेऊन राजस्थानी समाजातील कार्यकर्त्यांनी या आंदोलकांना भोजन देण्याचा निर्णय घेतला. शुक्रवारी जोतिबा यात्रेच्या मुख्य दिवसाचा मुहुर्त साधत समाजातील कार्यकर्ते आंदोलनस्थळी आले आणि त्यांनी आंदोलकांची पंगत बसवून आग्रहाने भोजन वाढले. कोल्हापुरात मिळालेल्या या अनोख्या पाहुणचाराने अभयारण्यग्रस्त भारावून गेले. नरेंद्र ओसवाल, जवाहर गांधी, कांतीलाल ओसवाल, माणिक ओसवाल, प्रकाश ओसवाल, श्रेणिक ओसवाल, राजेंद्र ओसवाल, राजेश राठोड यांनी उपक्रमासाठी योगदान दिले.
या लोकांचे हक्काच्या जागेसाठी आंदोलन सुरू आहे. जेवणाची सोय नसल्याने आंदोलक बरेचदा उपाशीच राहत असल्याचे समजल्यानंतर त्यांच्यासाठी रोज भोजन देण्याचे ठरवले आणि समाजातील सर्वजणांनी यासाठी आर्थिक मदत दिली. त्यामुळे आंदोलनाची सांगता होईपर्यंत हा उपक्रम सुरू ठेवला जाणार आहे. भगवान महावीरांचा दुसऱ्यांना मदतीचा संदेश आचरणात आणल्याचे समाधन आहे.
ईश्वर परमार, सदस्य, जैन समाज संघ
मोबाइल अॅप डाउनलोड करा आणि राहा अपडेट
