म. टा. प्रतिनिधी, कोल्हापूर

'केएमटीच्या जास्तीत जास्त बसेस मार्गस्थ ठेवा, प्रवाशांना चांगली सुविधा देताना त्यांच्याशी सौजन्यांची वर्तणूक ठेवा, चालक-वाहकांच्या गैरहजेरीचे प्रमाण कमी करा आणि उत्पन्नवाढीसाठी प्रयत्न करा,' असे साकडेच मंगळ‌वारी परिवहन सभापती अभिजित चव्हाण यांनी केएमटीच्या कर्मचारी संघटनेच्या पदाधिकाऱ्यांना घातले. अधिकाधिक प्रवासी येण्यासाठी प्रबोधनात्मक रॅली काढा, अशी सूचनाही त्यांनी बैठकीत केली.

महापालिकेच्या परिवहन उपक्रमांतर्गत (केएमटी) सार्वजनिक वाहतूक गेल्या अनेक वर्षांपासून तोट्यात धावत आहे. एकीकडे कर्मचाऱ्यांना वेळेवर वेतन मिळत नसताना अनेकप्रकारची सरकारी देणी थकीत गेली आहेत. नादुरुस्त बसेसबरोबर पूर्व परवानगीशिवाय गैरहजर राहणाऱ्या चालक-वाहकांमुळे केएमटीच्या उत्पन्नावर परिणाम होत आहे. कर्मचाऱ्यांच्या वेतनासाठी नेहमीच महापालिकेच्या तिजोरीवर भार टाकला जात आहे. मात्र स्वत:हून उत्पन्नवाढीसाठी नवे मार्ग शोधले जात नाहीत.

केएमटीचा तोटा दिवसेंदिवस वाढत असल्याने उशीरा का असेना स्वत: सभापती चव्हाण यांनी लक्ष घातले आहे. त्यासाठी त्यांनी म्युनिसिपल ट्रानस्पोर्ट वर्कर्स युनियनच्या पदाधिकाऱ्यांची चर्चा करत उत्पन्नवाढीसाठी प्रयत्न करण्याचे आवाहन केले. ते म्हणाले, 'उत्पन्नवाढीसाठी नादुरुस्त बसेसचे प्रमाण कमी करावे. गैरहजेरीचे प्रमाण कमी करण्याबरोबरच प्रवाशांना चांगली सेवा द्यावी. त्यांच्याशी सौजन्याने वागावे. तसेच प्रत्येक बस थांब्यावरील प्रवाशांचा उठाव करावा.' यावेळी वेळापत्रकांमध्ये सुधारणा करणे, ज्येष्ठतेप्रमाणे सर्वांना रोटेशनने ड्युटी देणे, रिलीव्हर ड्युटी सुरू करणे आदींवर चर्चा करण्यात आली.

यावेळी परिवहन समिती सदस्य अशोक जाधव, संदीप सरनाईक, चंद्रकांत सूर्यवंशी, संघटना प्रतिनिधी प्रमोद पाटील, निशिकांत सरनाईक, इर्षाद नायकवडी, विश्वनाथ चौगुले, मनोज नार्वेकर, आनंदा आडके आदी संघटना प्रतिनिधी उपस्थित होते.

फोटो

म. टा. प्रतिनिधी, कोल्हापूर

जोतिबाहून पन्हाळ्याला येत असताना दानेवाडी घाट येथे शैक्षणिक सहलीच्या एसटी बसचा ब्रेक निकामी झाल्याने चालकाने प्रसंगावधान दाखवून बस रस्त्याच्या कडेला असलेल्या कठड्याला धडकविली. त्यामध्ये बस चरीमध्ये एका बाजूला उलटल्याने ११ विद्यार्थिनी आणि तीन शिक्षक जखमी झाले. मंगळवारी सकाळी साडेनऊ वाजण्याच्या सुमारास ही घटना घडली. सांगली शिक्षण संस्थेच्या इंदिराबाई भिडे कन्या विद्यालय, विटा येथील शैक्षणिक सहलीची ही बस होती. जखमींवर सीपीआरमध्ये उपचार सुरु आहेत.

पोलिसांनी दिलेल्या माहितीनुसार, सांगली शिक्षण संस्थेच्या इंदिराबाई भिडे कन्या प्रशाला शाळेने मंगळवारी एक दिवसाची पन्हाळा, जोतिबा आणि कणेरी मठ शैक्षणिक सहल आयोजित केली होती. पहाटे तीन वाजता शाळेच्या तीन बस कोल्हापूरला रवाना झाल्या. सकाळी सव्वा नऊ वाजण्याच्या सुमारास सर्वजण जोतिबा डोंगरावर आले. दर्शन घेवून तिन्ही एस.टी बसेस घाटरस्त्याने पन्हाळ्याकडे जात होत्या. एसटी (एमएच ४०-२८२३) मध्ये ५० विद्यार्थिनी होत्या. दानेवाडी येथे रस्त्याच्या उतारावर आल्यानंतर या बसचा ब्रेक अचानक निकामी झाला. त्यामुळे चालकाने प्रसंगावधान राखून रस्त्याकडेला असलेल्या कठड्याला बस धडकविली. त्यामुळे बस एका बाजूला उलटली. चालकाच्या डाव्या बाजूला सुमारे १०० फूट खोल दरी होती. त्यांनी वेळीच उजव्या बाजूला बस कठड्याला धडकवून चरीमध्ये घातल्याने मोठा अनर्थ टळला. अपघात झाल्यानंतर विद्यार्थींनींनी आक्रोश सुरु केला. काही विद्यार्थींनी एकमेकींच्या अंगावर फेकल्या गेल्या. काहींच्या डोक्याला, हातापायाला गंभीर दुखापत झाली. विद्यार्थींनीचा आक्रोश पाहून स्थानिक रहिवाशी आणि वाहनाधारकांनी मदत करुन त्यांना रुग्णवाहिकेतून सीपीआरमध्ये दाखल केले. अचानक मोठ्या प्रमाणात रुग्ण दाखल झाल्याने अपघात विभागातील डॉक्टर व परिचारिकांची तारांबळ उडाली. त्यामुळे शासकीय महाविद्यालयाच्या अधिष्ठाता मीनाक्षी गजभिये यांनी बाहेरुन डॉक्टरांची अधिक कुमक मागविली. दरम्यान, तासगावच्या आमदार सुमनताई आर. पाटील या कोल्हापुरात काही कामानिमित्त आल्या होत्या. त्यांना अपघाताचे वृत्त समजताच त्यांनी सीपीआरला भेट देत जखमींची विचारपूस केली.

...........

पालकांची घालमेल

अपघाताची महिती मिळताच पालकांनी सीपीआरमध्ये धाव घेतली. 'माझ्या मुलाला काय झाले ते बघू द्या,' असे म्हणत काहींनी सीपीआरच्या दारात आक्रोश सुरु केला. आई वडिलांची घालमेल सुरु होती. अखेर मुलांना किरकोळ दुखापती झाल्याचे डॉक्टरांनी सांगितले. त्यांच्यावर उपचार करुन पाठीमागील वॉर्डमध्ये हलविण्यात आले.

....

जखमींची नावे

शिक्षिका कविता कुपाडे (३७, रा. विटा),शिक्षिक गोविंद धर्मे (३६, देशिंग), स्वागत कांबळे (२८, कागल), निमिषा साळुंखे (१६, मादळमुटी, जि. सांगली), अंजली कांबळे (१५, विटा ), पूजा जगताप (१५,भाग्यनगर), गौरी पाटील (१५), तन्मयी साठे (१५), पायल खांडेकर (१४), ज्योती सपकाळ (१५, सर्व, रा. विटा), इथिता यादव (१५, रा. नागेवाडी), सृष्टी जाधव (१५, रा. कारवे), प्रीती मोरे (१५, रा. आमरापूर), ऋतुजा जाधव (१५, रा. कार्वे)

Maruti.Patil@timesgroup.com

tweet: @MarutipatilMT

कोल्हापूर : रब्बी हंगामातील पिकांपासून सरासरी उत्पादन मिळविण्यासाठी नोव्हेंबरअखेर पेरणी करणे आवश्यक असते. उशिरात उशिरा १५ डिसेंबरपर्यंत पेरणी केल्यास हमखास उत्पादन मिळते. मात्र, जिल्ह्यातील एकूण क्षेत्रापैकी केवळ २३ टक्के क्षेत्रावर रब्बी हंगामातील पिकांची पेरणी झाली आहे. पेरणी झालेल्या पिकांना थंडीचा कालावधी कमी मिळणार असल्याने तापमानवाढीमुळे रब्बीचे उत्पादन घटण्याची शक्यता कृषी क्षेत्रातील तज्ज्ञांकडून व्यक्त केली जात आहे. अतिवृष्टी आणि महापुरामुळे खरीप हंगाम फलदायी ठरलेला नसतानाच रब्बी हंगामातूनही अपेक्षित उत्पन्न मिळणार नसल्याने शेतकरी धास्तावला आहे.

साधारणत: १५ ऑक्टोबरपासून रब्बी हंगामाला सुरुवात होते. जिल्ह्यातील बारमाही वाहणाऱ्या नद्यांमुळे अनेक ठिकाणी सिंचनाची सुविधा निर्माण झालेली असली, तरी दरवर्षी सुमारे ४० ते ४५ हजार हेक्टर क्षेत्रावर रब्बी हंगामातील पिकांचे उत्पादन घेतले जाते. त्यामध्ये प्रामुख्याने ज्वारी, गहू, हरभरा यासह कडधान्य व गळीत धान्यांची पेरणी केली जाते. कृषी विद्यापीठ आणि तज्ज्ञांच्या शिफारसीनुसार या सर्व पिकांची पेरणी नोव्हेंबरपूर्वी किंवा उशिरात उशिरा १५ डिसेंबरपर्यंत होणे अपेक्षित आहे. मात्र, यावर्षी शेतकऱ्यांचे पीक नियोजनाचे संपूर्ण गणित कोलमडून गेले आहे.

ऑगस्टमध्ये आलेला महापूर आणि त्यानंतर परतीच्या पावसाचा मुक्काम वाढल्याने रब्बी पेरणीवर गंभीर परिणाम झाल्याचे दिसून येत आहे. नोव्हेंबरअखेर जिल्ह्यातील एकूण क्षेत्राच्या केवळ चार टक्के पेरण्या पूर्ण झाल्या होत्या, तर १० डिसेंबरपर्यंत केवळ २३ टक्के पेरण्या पूर्ण झाल्या आहेत. त्यामुळे उर्वरित ७७ टक्के क्षेत्रावर केवळ चार दिवसांत पेरणी होणे अशक्य बनले आहे. उशिरा होणाऱ्या पेरणीमुळे रब्बीच्या पीक उत्पादकतेवर परिणाम होण्याची भीती कृषी अभ्यासकांकडून व्यक्त केली जाऊ लागली आहे. गहू, हरभरा व ज्वारी यांसारख्या पिकांना हवामानातील गारवा पोषक ठरतो. अद्याप पुरेशी थंडी नसताना मार्चपूर्वीच तापमानात वाढ होऊ लागल्यास या पिकांसह गळीत धान्यांच्या उत्पादनात काही प्रमाणात घट होणार आहे. उशिरा पेरणी झाल्याने पिके पक्व अवस्थेत असताना एक डिग्री सेल्सिअर तापमानात वाढ झाल्यास तब्बल ५० किलो उत्पादनामध्ये घट होईल. त्यानंतरही तापमानात वाढ होत गेल्यास उत्पादन घटण्याचे प्रमाणही वाढणार आहे. गेल्या वर्षभरात विविध नैसर्गिक संकटांमुळे आर्थिक संकटात आलेला शेतकऱ्याला रब्बी हंगामातूनही कमी उत्पादन मिळणार असल्याचा तज्ज्ञाचा अंदाज आहे. त्यामुळे त्यांच्या आर्थिक अडचणीत आणखी भर पडण्याची चिन्हे दिसू लागली आहेत.

००००

'रब्बी' पीकनिहाय उद्दिष्ट (प्रत्यक्ष पेरक्षेत्र, हेक्टरमध्ये)

१५,९६२ (४,७३९)

ज्वारी

७,७६७ (३११)

गहू

५,७९१ (४१२)

मका

१०,२६७ (२,४२८)

कडधान्य

७५ (५)

गळीत धान्य

४०,२९७

एकूण पेरणीखालील क्षेत्र

७,९५६

प्रत्यक्ष पेरणी झालेले क्षेत्र

००००

कोट

यावर्षी पावसाचा हंगाम लांबल्याचा परिणाम थंडीवर दिसून येत आहे. गहू, हरभरा पिकांना थंडीचे वातावरण पोषक असते, तर ज्वारी व तेलवर्गीय पिकांना जमिनीतील ओलावा महत्त्वाचा असतो. थंडीचा कालावधी कमी होऊन तापमानात वाढ झाल्यास सरासरी उत्पादनावर गंभीर परिणाम दिसून येईल.

प्रा. अशोक पिसाळ, कृषी महाविद्यालय

०००००

म. टा. प्रतिनिधी, कोल्हापूर

'हुतात्मा गार्डन येथे बटरफ्लाय झोन विकसित करण्यासाठी आवश्यक प्रलंबित कामे त्वरीत मार्गी लावा. ग्रीन स्पेसमध्ये वन औषधी उद्यान विकसित करा आणि सीएसआर फंडाच्या माध्यमातून महावीर उद्यान येथे पूर्ववत मत्सालय सुरू करा,' असे आदेश महापौार अॅड. सूरमंजिरी लाटकर यांनी मंगळवारी जैवविविधता समितीच्या बैठकीत संबंधित अधिकाऱ्यांना दिले. शहरातील जैविविधता अबाधित ठेवण्यासाठी प्लास्टिकचा वापर टाळण्याचे ‌आवाहनही त्यांनी शहरवासियांना केले. आयुक्त डॉ. मल्लिनाथ कलशेट्टी यावेळी प्रमुख उपस्थित होते.

जैवविविधता नोंदवही तयार करण्याचे काम अंतिम टप्प्यात असल्याचे आयुक्तांनी स्पष्ट केले. 'महापालिकेच्या ग्रीन स्पेसमध्ये वन औषधी उद्यान विकसित करण्यासाठी जागा निश्चित कण्याबरोबरच महावीर उद्यानातील मत्सालय पूर्ववत विकसित करा. नोंदवही तयार करण्यासाठी समितीच्या तांत्रिक सहाय्यता गटामध्ये तज्ज्ञ सरकारी अधिकारी, विद्यापीठातील अभ्यासू व्यक्तींचा समावेश करण्याची सूचना त्यांनी उद्यान अधीक्षकांना केली.

महापौर अॅड. लाटकर म्हणाल्या,'हुतात्मा गार्डनमध्ये बटरफ्लाय झोन तयार करण्यासाठी प्रलंबित कामे तातडीने मार्गी लावा. समितीसाठी आवश्यक निधीसाठी प्रस्ताव सादर करा. शहरातील मुले, नागरिक व पर्यटकांना दुर्मीळ झाडे, हेरिटेज वास्तूंची माहिती देण्यासाठी आठवड्यातून एकदा केएमटी बस सुरू करावी. त्याचा लाभ महापालिकेच्या शाळेतील विद्यार्थ्यांना द्या.'

बैठकीस भाजपचे गटनेते विजय सूर्यवंशी, नगरसेवक सुभाष बुचडे, विभागीय वनअधिकारी एम. बी. चंदनशिवे, वनक्षेत्रपाल जी. आर. कुंभार, पशुसंवर्धन उपायुक्त डॉ. वाय. ए. पठाण, रोग अन्वेषण विभागाचे डॉ. सॅम लुद्रिक, पशुसंवर्धन अधिकारी डॉ. यु. एस. पाटील, पर्यावरण अभियंता समीर व्याघ्रांबरे, विज्ञान प्रबोधिनीचे उदय गायकवाड आदी उपस्थित होते.

म. टा. प्रतिनिधी, कोल्हापूर

' जागतिक स्तरावर एकूण १८ जैवविविधता हॉट स्पॉट आहेत. त्यापैकी देशात दोन असून कोल्हापूर जिल्ह्याचा जैवविविधता हॉट स्पॉटमध्ये समावेश आहे. यामुळे पर्यावरणाचे संवर्धन होण्याच्या दृष्टीने अचूकपणे सर्व माहिती लोकजैवविविधता नोंदवहीमध्ये नोंदवणे गरजेचे आहे,'असे मत जिल्हा परिषदेचे मुख्य कार्यकारी अधिकारी अमन मित्तल यांनी व्यक्त केले.

जिल्हा परिषदेच्या ग्रामपंचायत विभागातर्फे लोक जैवविविधता नोंदवही तयार करण्याची रुपरेषा ठरविण्यासाठी जैव विविधता व्यवस्थापन समिती व विविध संस्था प्रतिनिधींची बैठक झाली. याप्रसंगी सीईओ मित्तल बोलत होते. याप्रसंगी मार्गदर्शन त्यांनी 'जैवविविधता नोंदवही ही पुढील पिढीसाठी मार्गदर्शक व दिशादर्शक ठरणारी आहे. यामुळे या कामात सर्वांनी मनापासून सहकार्य करावे,'असे आवाहन केले.

सातारा येथील प्रगती महिला शेतकरी संस्थेच्या अलका पाटील यांनी स्वयंसेवी संस्थांनी जैवविविधतेची माहिती प्रत्यक्ष जागेवर जाऊन जमा करावी, असे सांगितले. स्वप्नजा भांदुर्गे यांनी कायदेशीर बाबींबाबत मार्गदर्शन केले. प्रिती पाटील यांनी, लोक जैवविविधता नोंदवही तयार करण्यासाठी सायन्स कॉलेजमधील विद्यार्थ्यांचे सहकार्य घ्यावे. तसेच स्वयंसेवी संस्थांनी गावांचे गट तयार करावेत, असे नमूद केले. उपमुख्य कार्यकारी अधिकारी राजेंद्र भालेराव यांनी आभार मानले.

.....

पंचायत समितीत कार्यशाळा

लोकजैवविविधता नोंदवही तयार करण्यासंदर्भात प्रत्येक पंचायत समितीमध्ये कार्यशाळा होणार आहे. जिल्ह्यातील प्रत्येक गावात जैवविविधता व्यवस्थापन समितीची स्थापना व नोंदवही तयार करण्यात येणार आहे. यासाठी प्रत्येक पंचायत समितीत कार्यशाळा आयोजित केल्या आहेत. चंदगड, आजरा, गडहिंग्लज आणि भुदरगड पंचायत समितीमध्ये १६ डिसेंबर रोजी कार्यशाळा होणार आहे. राधानगरी, कागल, शाहूवाडी आणि पन्हाळा पंचायत समितीमध्ये १७ तारखेला तर शिरोळ, हातकणंगले, गगनबावडा आणि करवीर पंचायत समितीमध्ये १८ डिसेंबरला कार्यशाळा होईल.

म. टा. प्रतिनिधी, कोल्हापूर

'हॅलो, मी राष्ट्रीयकृत बँकेतून बोलतोय, तुमचे बँक खाते डिअ‍ॅक्टिवेट झाले आहे, तुमच्या मोबाइलवरील लिंक तातडीने लिंक करा, अशा भूलथापा मारुन हॅकर्सने देशभक्त रत्नाप्पाण्णा कुंभार कॉलेज ऑफ कॉमर्स तसेच नाइट कॉलेजचे सेवानिवृत्त प्राचार्य एस.बी.उर्फ शिवगौंडा भीमगौंडा पाटील (वय ६०, रा. हनुमाननगर, उजळाईवाडी) यांना २३ लाख ४८ हजार रुपयांचा गंडा घातला. ओटीपी क्रमांक विचारुन त्यांच्या खात्यावरील ही रक्कम परस्पर काढून घेत फसवणूक केल्याचा प्रकार उघडकीस आला. या प्रकरणी मंगळवारी सायबर पोलिस ठाण्यात गुन्हा दाखल झाला.

सायबर क्राइमचे निरीक्षक संजय मोरे यांनी दिलेल्या माहितीनुसार, शिवगौंडा पाटील (वय ६०, रा. हनुमाननगर, उजळाईवाडी) हे येथील नाईट कॉलेजचे माजी प्राचार्य आहेत. चार महिन्यांपूर्वीच ते निवृत्त झाले आहेत. ७ डिसेंबर रोजी दुपारी चार वाजण्याच्या सुमारास कसबा बावड्याहून घरी जात असताना त्यांच्या मोबाइलवर अज्ञाताचा फोन आला. 'मी स्टेट बँक ऑफ इंडियामधून बोलत आहे, तुमचे बँक खाते डिअ‍ॅक्टिवेट झाले आहे, असे सांगून पाटील यांच्या मोबाइलवर एक लिंक पाठवून क्लिक करण्यास सांगितली. भूलथापा मारुन त्यांच्या स्टेट बँक व बँक ऑफ महाराष्ट्र येथील दोन्ही खात्यांची माहिती घेतली. त्यानंतर त्यांच्या मोबाइलवर आलेला ओटीपी क्रमांक विचारून घेत काही वेळाने मोबाइल बंद केला. काही वेळात पाटील यांच्या खात्यावरील २३ लाख ४८ हजार रुपये परस्पर दुसऱ्या अनोळखी व्यक्तीच्या खात्यावर ट्रान्सफर झाल्याचा संदेश आला. लाखो रुपयांची रक्कम अचानक डेबिट झाल्याने पाटील यांना धक्का बसला. त्यांनी बँकेत चौकशी केली असता, असा कोणताही फोन येथून केला नसल्याचे सांगण्यात आले. त्यांना फसवणूक झाल्याचे लक्षात आल्यानंतर सायबर शाखेकडे धाव घेवून घडलेला प्रकार सांगितला. त्यानंतर हॅकर्स विरोधात फिर्याद दाखल करण्यात आली.

म. टा. प्रतिनिधी, कोल्हापूर

आरोग्य, पाणी, लाइट, रस्ते, पार्किंग अशा महापालिकेकडून शहरवासियांना पुरवण्यात येणाऱ्या पायाभूत सुविधांचा आढावा मंगळवारी महापौर अॅड. सूरमंजिरी लाटकर यांनी घेतला. विभागनिहाय झालेल्या बैठकीत त्यांनी विविध सूचना केल्या. घरफाळा व परवाना विभागांना ऑनलाइन प्रणालीचे काम जलदगतीने करण्याबरोबरच गाडीअड्डा येथील वाहनतळ त्वरीत सुरू करण्याचे आदेश शहर अभियंत्यांना दिले. बैठकीतील सूचनांप्रमाणे कामांची पूर्तता करुन बुध‌वारपर्यंत (ता. १८) अहवाल सादर करण्याचे आदेशही त्यांनी सर्व विभागप्रमुखांना दिले.

केएमटी, पाणीपुरवठा, अतिक्रमण, आरोग्य, घरफाळा, परवाना विभागांकडून दैनंदिन करण्यात येत असलेल्या कामांचा व नागरी सुविधांचा आढावा घेण्यासाठी महापौर कार्यालयात विभागप्रमुखांची बैठक झाली. आरोग्याधिकारी डॉ. दिलीप पाटील यांनी पंचगंगा, आयसोलेशन, सावित्रीबाई फुले हॉस्पिटलमार्फत देण्यात येणाऱ्या महात्मा फुले जनआरोग्य योजना आणि इतर आरोग्य सेवेची माहिती दिली. कर निर्धारक व संग्राहक दिवाकर कारंडे यांनी घरफाळा व परवाना विभागाचे परवाने ऑनलाइन झालेले नसल्याचे स्पष्ट करत पाणीपुरवठा, घरफाळा, परवाना विभागांनी एकत्रीत सर्व्हे करण्याची आवश्यकता व्यक्त केली. उपजल अभियंता बी. एम. कुंभार यांनी पाणीपुरवठा विभागाकडील अमृत योजनेतंर्गत ड्रेनेज व पिण्याची पाइपलाइन, काळम्मावाडी थेट पाइपलाइन योजनेची माहिती दिली. तसेच शहर अभियंता कार्यालयामार्फत व्हिनस कॉर्नर येथील गाडीअड्डा, राजारामपुरी, पांजरपोळ, शिरोली जकात नाका, तावडे हॉटेल आदी जागा पार्किंगसाठी निश्चित केल्या असल्याचे सांगितले.

महापौरांनी सर्व विभागांचा आढावा घेतल्यानंतर विविध सूचना केल्या. गाडीअड्डा येथील वाहनतळ त्वरीत सुरू करा, शहरातील मार्केट परिसरात फूटपाथवर बसलेल्या विक्रेत्यांना हटवा. पार्किंग नसलेल्या व्यापाऱ्यांवर कारवाई करा. नवीन घरफाळा लागू करण्यासाठी आवश्यक मनुष्यबळाचा वापर कार्यक्षमतेने करण्याबरेबरच पाणीपुरवठा जोडणीसाठी नाहक त्रास देवू नका, आदी सूचना केल्या. त्याचबरोबर याबाबत केलेल्या कार्यवाहीचा अहवाल १८ डिसेंबरपर्यंत देण्याचे आदेश दिले.

म. टा. प्रतिनिधी, कोल्हापूर

बेस्ट ग्लोबल युनिव्हर्सिटी रँकिंगअंतर्गत शिवाजी विद्यापीठाच्या मटेरियल सायन्स विभागाचा देशात दहावा क्रमांक आला आहे. यूएस न्यूज एज्युकेशन रँकिंगद्वारे ही क्रमवारी संकेतस्थळावर जाहीर करण्यात आली. या गुणवत्ता यादीत इंडियन इन्स्टिट्यूट ऑफ टेक्नॉलॉजी व शिवाजी विद्यापीठ या दोनच विद्यापीठांचा समावेश आहे.

ही गुणवत्ता यादी तयार करण्यासाठी वेब ऑफ सायन्स या आंतरराष्ट्रीय दर्जाच्या संशोधन पत्रिका संग्रहाचा संदर्भ देण्यात आला आहे. या मानांकनासाठी आंतरराष्ट्रीय गुणवत्ता मापन करणारी कार्यप्रणाली वापरण्यात आली आहे. शिवाजी विद्यापीठामध्ये मटेरियल सायन्स या विषयात २०१३ ते २०१७ या कालावधीत केलेले संशोधन, गुणवत्ता, संशोधन पत्रिका, त्याबाबत वापरण्यात आलेले संदर्भ यांचा जागतिक संशोधनावर झालेला परिणाम यांचा विचार केला आहे.

शिवाजी विद्यापीठामध्ये भौतिकशास्त्र, रसायनशास्त्र व इतर अधिविभागांनी केलेल्या संशोधनास या रँकद्वारे जागतिक मान्यता मिळाल्याचे स्पष्ट झाले आहे. या अधिविभागांमध्ये 'मटेरियल सायन्स' या विषयात गेल्या तीस वर्षांपासून संशोधन कार्य सुरू आहे. सौर ऊर्जेवर आधारीत उपकरणे, ऊर्जा साठवणूक करण्यासाठी लागणारी यंत्रणा, विषारी वायूंचे प्रमाण तपासण्यासाठी आवश्यक घटक, नॅनो मटेरियल व नॅनो कोटींग या विषयांचा समावेश आहे.

या संशोधनांसाठी आवश्यक असलेला निधी अधिविभागातील शिक्षकांनी विविध राष्ट्रीय शिखर संस्थांकडून प्रकल्प निधीद्वारे मिळवला आहे. या संशोधनाचा फायदा अधिविभागातील संशोधक विद्यार्थ्यांना झाला आहे. जर्मनी, युरोप, जपान, अमेरिका, येथील जागतिक दर्जाच्या शिष्यवृत्ती मिळवण्यासाठी मटेरियल सायन्स विभागातील संशोधनाचा लाभ विद्यार्थ्यांना झाला आहे.

.......

कोट

'शिवाजी विद्यापीठ संशोधनामध्ये गेल्या काही वर्षात अव्वल कामगिरी करत आहे. देशात दहाव्या स्थानावर मटेरियल सायन्स विभागाचे नाव कोरले जाणे ही विद्यापीठासाठी अत्यंत अभिमानास्पद गोष्ट आहे. तसेच ज्या दोन विद्यापीठांना या रँकमध्ये स्थान मिळाले आहे त्यामध्ये एक शिवाजी विद्यापीठ आहे. या क्रमवारीतील स्थानाचा विद्यापीठातील विद्यार्थ्यांमध्ये संशोधनासाठी प्रेरणा निर्माण करण्यात मोठा वाटा आहे.

डॉ. देवानंद शिंदे, कुलगुरू, शिवाजी विद्यापीठ

.........

कोट

'मटेरियल सायन्समध्ये सातत्याने होणाऱ्या संशोधनाचा व त्यातून समाजाला उपयुक्त ठरणाऱ्या निष्कर्षांचे हे यश आहे. विद्यापीठानेही मटेरियल सायन्समध्ये संशोधन करण्यासाठी भौतिकशास्त्र, रसायनशास्त्र यासह नॅनो सायन्समधील शिक्षक, विद्यार्थ्यांना पाठबळ दिले. देशाच्या क्रमवारीत दहावे स्थान मिळवण्यासाठी केलेल्या कष्टांचे चीज झाले.

डॉ. पी.एस पाटील, विभागप्रमुख, पदार्थविज्ञान विभाग

udaysing.patil@timesgroup.com

udaysingpatilMT

राज्यात सर्वत्र एकच बांधकाम नियमावली राबवण्यात येणार असून, बांधकाम परवानेही ऑनलाइनद्वारे दिले जाणार आहेत. त्यासाठी सरकारतर्फे ऑनलाइन बिल्डिंग प्लॅन अ‍ॅप्रुव्हल सिस्टीमसाठीचे (ओबीपीएएस) सॉफ्टवेअर बनवले आहे. त्याचाच वापर करण्याची सूचना महापालिका, पालिका तसेच प्राधिकरणांना केली जाणार आहे. प्रस्ताव दिल्यानंतर ६० दिवसांच्या आत सर्व प्रक्रिया पूर्ण करण्याचा कालावधी आहे. त्यामुळे नागरिक आणि बांधकाम व्यावसायिकांचे खेटे वाचणार आहेत.

बांधकाम परवानगी मिळवणे म्हणजे दिव्यच असते. बांधकाम परवानगीच्या फाइल्स ज्या त्या अधिकाऱ्यांच्या टेबलवर आणण्यासाठीही प्रचंड खस्ता खाव्या लागतात. दबाव आणला तर अनेकदा ती फाइल सापडत नसल्याचेही प्रकार व्यावसायिकांना अनुभवयाला येतात. या प्रकाराने बांधकाम व्यवसाय करणारे वैतागून गेले आहे. सामान्य नागरिकांचे हाल तर पाहवत नाहीत. यातूनच बेकायदेशीर बांधकामे व भ्रष्टाचार बोकाळला आहे. यासाठी सरकारने 'ओबीपीएएस' राबवण्याचे ठरवले आहे.

राज्यात सर्वत्र एकच बांधकाम नियमावली करण्याचे काम अंतिम टप्प्यात आहे. मंत्रिमंडळ स्थापन झाले नसल्याने ती जाहीर केलेली नाही. ही नियमावली केली जात असतानाच त्यानुसार बांधकाम परवानगी देण्याचे सॉफ्टवेअरही बनवले आहे. काही प्राधिकरण व पालिकांच्या ठिकाणी प्रायोगिक तत्त्वावर ही प्रक्रिया राबवण्यात येत होती. कोल्हापूर महापालिकेतही काही काळ हा प्रयोग करण्यात आला. पण काही त्रुटी समोर आल्याने प्रयोग थांबवला. त्या त्रुटींचा विचार करुन सॉफ्टवेअर बनवले जात आहे. परवानगी प्रक्रियेतील प्रत्येक टप्प्यावरील मंजुरीसाठी कालावधी ठरवला आहे. यामुळे ६० दिवसात मंजुरी दिली जाणार आहे. त्याबाबतचा निर्णयही संबंधितांना कळवला जाईल. परवानगीसाठीचा प्रस्ताव आर्किटेक्ट, इंजीनिअर्सकडून सादर केला जात असल्याने त्यांनाही सॉफ्टवेअर घेणे क्रमप्राप्त आहे. त्याद्वारे ट्रॅकिंगही करता येणार आहे. यामुळे प्रस्तावाच्या फाइल्स गहाळ होणे, प्रत्येक कागदपत्रासाठी वारंवार खेटे मारणे, प्रकल्प रखडणे, त्यातून आर्थिक नुकसान हे प्रकार बंद होणार आहेत.

............

बांधकाम नियमावलीबरोबरच सरकारकडून अद्ययावत सॉफ्टवेअर बनवण्यात येत आहे. काही दिवसांत त्याची अंमलबजावणी होण्याची शक्यता आहे. त्याद्वारे ऑनलाइन बांधकाम परवानगी दिली जाणार आहे. दिलेल्या वेळेत ती द्यावी लागणार आहे.

नारायण भोसले, उप शहर रचनाकार, कोल्हापूर

.. ..

कोल्हापूर

शहरात दुर्गंधीयुक्त व गढूळ पाणीपुरवठा होत असल्याच्या पार्श्वभूमीवर मंगळवारी स्थायी समिती सभापती शारंगधर देशमुख, उपमहापौर संजय मोहिते यांच्यासह पदाधिकाऱ्यांनी कळंबा, पुईखडी, बालिंगा व बावडा फिल्टर हाऊसच्या जलशुद्धीकरण केंद्राची पाहणी केली. फिल्टेरेशनसाठी वापरण्यात येणारी ब्लिचिंग पावडर, क्लोरिन व कर्मचारी हजेरीबुकाची तपासणी केली. फ्लॅश मिक्सर, पी. ए .सी .टँक मिक्सर, क्लॅरी फॅक्युलेटर, एअर ब्लोअर, अप वॉशपंपची दुरुस्ती व अन्य कामे त्वरीत करण्याची सूचना सभापतींनी जलअभियंता सुरेश कुलकर्णी यांना केली.यंता मिलींद पाटील आदी उपस्थित होते.

कोल्हापूर

महाराष्ट्र राज्य कंत्राटी वीज कामगार संघ, कोल्हापूर शाखेतर्फे वेतन व इतर मागण्यासाठी मंगळवारी ताराबाई पार्क येथील महावितरण कार्यालयासमोर धरणे आंदोलन पुकारले होते. दरम्यान, प्रशासन, ठेकेदार प्रतिनिधी व कामगार संघांच्या प्रतिनिधीमध्ये चर्चा झाली. कामगारांच्या प्रश्नांची सोडवणुकीसाठी सकारात्मक चर्चा झाली. यामुळे आंदोलन काही दिवसांसाठी स्थगित केले. यामुळे मंगळवारचे धरणे आंदोलन रद्द करत काही दिवस पुढे ढकलले असल्याचे कामगार संघाने म्हटले आहे.

कोल्हापूर टाइम्स टीम

एसटी महामंडळाच्या वतीने ज्येष्ठ नागरिकांना अर्ध्या तिकिटात प्रवास करता यावा, यासाठी सुरू असलेल्या सवलतीसाठी स्मार्ट कार्ड योजना सुरू करण्यात आली आहे. स्मार्ट कार्ड काढण्यासाठी बुधवारी ज्येष्ठ नागरिकांनी मध्यवर्ती बसस्थानकात मोठ्या संख्येने गर्दी केली. स्मार्ट कार्डची मागणी करणाऱ्या ज्येष्ठांच्या तुलनेत महामंडळाची यंत्रणा तोकडी असल्याने लांब रांगा लागल्या आहेत.

यापूर्वी ज्येष्ठ नागरिकांना आधार कार्ड दाखवून सवलतीच्या दरात प्रवास करण्याची मुभा होती. मात्र, बोगस आधारकार्ड काढून अनेकांनी सवलतीचा लाभ उठवला असल्याची प्रकरणे समोर आली आहेत. ६५ वयाच्या आतील अनेकजण आधारकार्डवरील जन्मतारखेत बदल करून एसटीच्या योजनेचा फायदा लाटताना दिसतात. त्यामुळे ज्येष्ठ नागरिक म्हणून प्रवास करणाऱ्या बोगस प्रवाशांना रोखण्यासाठी स्मार्टकार्ड वितरित करण्यात येत आहे. यामध्ये अंगठ्याचे ठसे घेतले जात असल्याने बोगस स्मार्ट कार्ड काढता येणार नाही. मतदान ओळखपत्र, आधारकार्ड व आधारकार्डशी संलग्न असणारा मोबाइल क्रमांक या आधारे आगारस्तरावर ही नोंदणी सुरू करण्यात आली आहे. या कार्डच्या माध्यमातून वर्षभरात चार हजार किलोमीटर अंतराचा प्रवास सवलतीत करता येणार आहे.

दरम्यान पास वितरण यंत्रणेसाठी संगणक कमी पडत असल्याने ज्येष्ठ नागरिकांना प्रतीक्षा करावी लागत आहे. वितरण कक्षासमोर मोठी गर्दी झाली आहे. परिणामी ज्येष्ठ नागरिकांना तासनतास रांगेत उभे रहावे लागत आहे. एसटीचा प्रवास कॅशलेस करण्याबरोबर स्मार्ट करण्याची घोषणा महामंडळाच्या वतीने करण्यात आली असून एसटीकडून प्रवाशांना देण्यात येणाऱ्या मोफत सवलतीसाठी प्रत्येकाला यापुढे स्मार्टकार्ड अनिवार्य करण्यात आले आहे. स्मार्ट कार्ड वितरणप्रसंगी अनेकांचे अंगठ्याचे ठसे रेकॉर्डशी जुळत नसल्याने त्यांना त्रासाला सामोरे जावे लागले. तसे एकच मोबाइल क्रमांकावर दोन कार्ड काढता येत नसल्याने एकच मोबाइल घेऊन आलेल्या दाम्पत्याला वेगवेगळे मोबाइल क्रमांक हवेत या कारणासाठी त्रास सहन करावा लागला.

ज्येष्ठ नागरिक स्मार्ट कार्ड काढताना

या कार्डावर एक वर्षासाठी चार हजार किलोमीटरचा प्रवास अर्ध्या तिकिटावर करता येईल. एक वर्षे पूर्ण झाल्यावर कार्ड परत रिचार्ज करावे लागेल. यासाठी आधारकार्डावर ६५ वर्षे पूर्ण झालेली असणे गरजेचे आहे. आधार कार्डाच्या दोन झेरॉक्स प्रती आवश्यक आहेत. ओटीपीसाठी व्यक्तीकडे मोबाइल आवश्कय आहे. एका मोबाइलवर दोन व्यक्ती प्रक्रिया करू शकणार नाहीत. प्रत्येक मोबाइलवर किमान दहा रुपयांचा बॅलन्स हवा. ज्येष्ठ नागरिकांनी मोबाइलच्या मेसेज बॉक्समधील मेसेज कमी करावेत जेणेकरून ओटीपी मेसेज तात्काळ मिळेल, असे आवाहन महामंडळाने केले आहे. प्रत्येक स्मार्ट कार्डसाठी ५० रुपये फी आकारण्यात येते.

येथे आहेत सुविधा

संभाजीनगर, रंकाळा बसस्थानक, कागल, इचलकरंजी, गडहिंग्लज, गारगोटी

लोगो : बाजार समिती

कोल्हापूर टाइम्स टीम

शेती उत्पन्न बाजार समितीमध्ये नोकरभरतीवरून नेते आणि संचालकांत वाद निर्माण झाला आहे. बाजार समितीतून कमी केलेल्या ३७ कर्मचाऱ्यांना परत घ्यावे यासाठी नेते मंडळींनी संचालकांवर दबाव आणला आहे. तर कमी केलेल्या कर्मचाऱ्यांना परत न घेता नवीन नोकरभरती करावी यासाठी संचालकांनी प्रयत्न सुरू केले आहेत.

रविवारी सरकारी विश्रामगृहावर नेत्यांनी नवीन सभापती निवडीसाठी बैठक घेतली होती. बैठकीत नेत्यांनी सभापती बाबासाहेब लाड राजीनामा देण्याची सूचना केली. यावेळी कमी केलेल्या ३७ कर्मचाऱ्यांना परत घ्यावे, असा ठराव करण्यासाठी नेत्यांनी कोऱ्या इतिवृत्तावर संचालकांच्या सह्या घेतल्याची चर्चा आहे. त्याविरोधात दोन संचालकांनी जिल्हा उपनिबंधकाकडे लेखी तक्रार केली आहे. त्यामुळे नेत्यांत खळबळ उडाली आहे. तक्रार अर्ज मागे घ्यावा यासाठी संचालकांकडे मनधरणी सुरू आहे.

२०१५ मध्ये बाजार समितीचे तत्कालिन प्रशासक रंजन लाखे यांनी ३७ कर्मचाऱ्याना कमी केले होते. प्रशासकांच्या कारवाईविरोधात कर्मचारी कोर्टात गेले. कामगार न्यायालयाने कर्मचाऱ्यांना परत हजर करून घेण्याचे आदेश दिले होते. या आदेशाला सभापती बाबासाहेब लाड यांनी औद्योगिक न्यायालयातून स्थगिती आणली. तसेच २५ ऑक्टोबरच्या सभेत कमी केलेल्या कर्मचाऱ्यांना परत हजर करून घ्यायचे नाही, असा ठराव केला आहे. पण नेत्यांनी कमी केलेल्या कर्मचाऱ्यांना परत घेण्याचा ठराव करण्यासाठी इतिवृत्तावर सह्या करुन घेतल्याने नवीन पेच निर्माण झाला आहे.

Sachin.Yadav@timesgroup.com

Tweet : sachinyadavMT

कोल्हापूर : 'हॅलो, मी बँकेतून बोलतोय, तुमचे बँक खाते डिअ‍ॅक्टिवेट झाले आहे, तुमच्या मोबाइलवरील लिंक तातडीने क्लिक करा, ओटीपी द्या, 'तुम्हाला लॉटरी लागली आहे''तुमच्या खात्यात एक लाख रुपये जमा झाले आहेत, त्यासाठी मोबाइलवर पाठविलेला ओटीपी क्रमांक द्या. तुमच्या खात्यातून दुसऱ्या खात्यात पैसे वर्ग होत आहेत तातडीने बँक डिटेल्स, डेबिट आणि क्रेडिट कार्डची माहिती द्यावा'अशा भूलथापा मारून हॅकर्सकडून मोठ्या प्रमाणात फसवणूक होत आहे. त्यामध्ये उच्चशिक्षितांसह ज्येष्ठ नागरिक मोठ्या संख्येने बळी पडत आहेत.

मंगळवारी सकाळी हॅकर्सने देशभक्त रत्नाप्पाण्णा कुंभार कॉलेज ऑफ कॉमर्स तसेच नाइट कॉलेजचे सेवानिवृत्त प्राचार्य एस. बी. उर्फ शिवगोंडा भीमगोंडा पाटील (वय ६०, रा. हनुमाननगर, उजळाईवाडी) यांना २३ लाख, ४८ हजार रुपयांचा गंडा घातला. ओटीपी क्रमांक विचारून त्यांच्या खात्यावरील ही रक्कम परस्पर काढून घेतली. गेल्या चार महिन्यांपूर्वी एका शिक्षकेला लॉटरी लागल्याचे सांगून त्यांच्या खात्यावरील एक लाख रुपयाची रक्कम काढून घेतली. कसबा बावडा आणि शिवाजी पेठेतील तरुणाला मोबाइलवरुन आलेला ओटीपी क्रमांक विचारुन ३० आणि ५० हजारांची रक्कमेला गंडा घातला. फसवणुकीच्या या घटनांत सातत्याने वाढ होत असून त्या रोखण्यासाठी सर्वसामान्य नागरिकांनी काळजी घेण्याची गरज आहे. लॉटरी लागल्याचे सांगून कार, लॅपटॉप, मोबाइल, टीव्ही, फ्रीज या प्रकारच्या वस्तू सोडविण्यासाठी टॅक्स भरावा लागेल वगैरे असे कारणे दाखवून पैसे लुटले जात आहेत.

फसवणुकीचे प्रकार

सैन्य किंवा निमलष्करी दलाचा जवान असल्याचे सांगून सायबर गुन्ह्यांना अनेक जण बळी पडतात. सायबर गुन्हेगार ओएलएक्सवर सायकल, कार, मोबाइल, घरगुती उपयोगाच्या वस्तूची विक्री करायची आहे. सैनिक असल्याने बदली तत्काळ कमी किंमतीत विक्री करावयाची आहे. त्यासाठी सैन्यात असल्याचे बनावट आयडी कार्ड, व्हॉटसअॅपवर पाठवून ग्राहकांचा विश्वास संपादन केला जातो.

खोटी जाहिरात

सायकल, कार किंवा अन्य कोणतीही वस्तू विक्रीची जाहिरात करण्यासाठी मूळ मालक असल्याचा पुरावा मागण्यासाठी व्हॉटसअॅवर महत्त्वाची कागदपत्रे सायबर गुन्हेगार मागवितात. त्याद्वारे तुमच्या नावाने खोटी जाहिरात करुन फसवणूक केली जाते.

रिक्वेट मनीची लिंक

वस्तू खरेदीसाठी ई-वॉलेट किंवा यूपीआय, पेटीएम यासारख्या ई-वॉलेट माध्यमातून पेमेंट करताना अडचणी निर्माण होत असल्याचे सांगून रिक्वेस्ट मनीची लिंक पाठविली जाते. त्यावर यूपीआय पिन टाका म्हणजे पैसे तुमच्या बँक खात्यात जमा होतील, अशी थाप मारली जाते. मात्र रिक्वेस्ट मनी लिंकशी जोडल्याने तुमच्या खात्यातील पैसे सायबर गुन्हेगाराच्या खात्यात काही सेकंदात वर्ग केले जातात.

फसवे फोन कॉल

आपले कार्ड ब्लॉक झाले आहे

अकाउंट डिअॅक्टिव्हेट झाले आहे

खात्याचे व्हेरिफिकेशन

खात्यातील रक्कम अन्य खात्यात वर्ग होत आहे

हा व्यवहार थांबविण्यासाठी सर्व माहिती मागतात

काय माहिती मागितली जाते

डेबिट किंवा क्रेडिट कार्ड क्रमांक

कार्डवरील तीन अंकी सीव्हीही क्रमांक

कार्ड वैधता महिना वर्ष

मोबाइलवर मिळणारा ओटीपी एसएमएस

सायबर गुन्ह्याचे प्रकार

फिशींग

हॅकिंग

नायजेरियन फ्रॉड

सायबर बुलिंग

डेटा थेप्ट

क्रिप्टोग्राफी

सॉफ्टवेअर पायरसी

सायबर स्टॉकिंग

पोर्नोग्राफी

काय काळजी घ्याल

नामांकित कंपनीच्या वस्तू कधीही कमी किंमतीत विकल्या जाऊ शकत नाहीत. फसवणूक करणारी व्यक्ती या वस्तू कमी किंमतीत विक्री करत असल्यास तो फसवणूक करत असल्याचे स्पष्ट होते. ओएलएक्स किंवा तत्सम वेबसाइटवरुन खरेदी करताना व्हॉटस् अॅप चॅटवर पाठविलेले आयडी प्रुफ किंवा मेसेज यावर विश्वास ठेवून ऑनलाइन पैसे भरू नका.

कुरिअर स्लिप तपासा

विक्रेत्याने साहित्य पाठविले आहे, असे सांगून कुरिअर स्लिप पाठवली असल्यास त्याची पडताळणी करून घ्या. त्या स्लिपवरील फोनवरुन फोन करुन ती कंपनी अस्तित्वात आहे का किंवा पूर्वी सेंड झालेली कुरिअर पावती असल्याची खात्री करा.

रिक्वेस्ट मनी लिंकची विनंती नकोच

ओएलक्सवर वस्तू खरेदीसाठी ई-वॉलेट किंवा यूपीआय, पेटीएम ई वॉलेटवर पे सेंड मनी पर्यायावर क्लिक करु नका.

नेहमी विश्वसनी वेबसाईटवरुनच खरेदी करा. वेबसाइटची विश्वसनीयता जाणून घेण्यासाठी त्या वेबसाइटचे पब्लिक रिव्हीव तपासा. ज्या वेबसाइट वर http:// असेल त्याच वेबसाइटवरुन शक्यतो खरेदी विक्री करावी.

समोर भेटल्यावर पैसे द्या

ओएलएक्स किंवा तत्सम वेबसाइटवरुन खरेदी करताना सार्वजनिक ठिकाणी भेटून व व्यवहार करणाऱ्या व्यक्तिची पडताळणी करूनच पैसे द्या.

सायबर गुन्हा घडल्यानंतर काय कराल

सर्वप्रथम जवळच्या पोलिस ठाण्यासोबत संपर्क साधा

ही तक्रार पोलिस स्टेशनकडून सायबरकडे पाठवा

बँक फ्रॉड तक्रारीसाठी बँकेचे स्टेटमेंट गरजेचे

डेबिट, क्रेडीट कार्डची झेरॉक्स अर्जासोबत जोडा

फेसबुक संदर्भातील तक्रार आक्षेपार्ह प्रोफाइलची यूआरएलसह प्रिन्ट, स्क्रिनशॉट जोडा

उपाययोजना

डेटा सुरक्षित करण्यासाठी अद्यावत अॅन्टिव्हायरस वापरा

सातत्याने पासवर्ड बदलत रहा

ऑनलाइन व्यवहारासाठी एकच पासवर्ड वापरू नका

मोबाइल स्मार्टफोनला पासवर्ड ठेवा

बँकेची महत्त्वाची माहिती मोबाइलमध्ये नको

क्रेडिट, डेबिटवरील १६ अंकी नंबर, पासवर्ड कोणालाही देऊ नका

पॅनकार्ड, आधारकार्ड, ओटीपीची माहिती दूरध्वनी, मोबाइलवरून देऊ नका

फसवे फोन कॉल आणि फसवे कारण सांगून अनेकांची फसवणूक होऊ शकते. फोनवर विचारणाऱ्या व्यक्तीला काहीही माहिती देऊ नका. जवळच्या बँक शाखेत तत्काळ संपर्क साधा.

संजय मोरे, पोलिस निरीक्षक, सायबर शाखा

भूमिका

दक्ष रहा...

आयुष्यभर कष्टाने कमविलेली रक्कम सायबर गुन्हेगारांकडून हातोहात लंपास केली जात आहे. काही ज्येष्ठ नागरिकांना डेबिट, क्रेडिट, मोबाइलमधील टेक्निकल माहिती नसल्याचा फायदा घेवून सायबर चोरांचा सुळसुळाट झाला आहे. काही कॉलेजचे तरुणही याला बळी पडत आहेत. हे रोखण्यासाठी बँक, सायबर शाखेने प्रबोधन वर्ग घेण्याची गरज आहे. फसवणूक टाळण्यासाठी नागरिकांच्यासाठी स्वतंत्र कार्यशाळा घेण्याची गरज आहे. फसवणुक टाळण्यासाठी ग्राहकांनी दक्ष राहण्याची गरज आहे.

कोल्हापूर टाइम्स टीम

विज्ञानाचा वापर करून दैनंदिन जीवनातील कामे सुसह्य बनविणारी साधने, विज्ञानाच्या आधारे पर्यावरण संवर्धन करू शकणारी यंत्रणा आणि मोबाइल चार्जिंगपासून ध्वनी व हवा प्रदूषण रोखणाऱ्या यंत्रापर्यंतचा आविष्कार शालेय मुलांनी वैज्ञानिक उपकरणातून उलगडला आहे. सुमारे २०० हून अधिक विद्यार्थ्यांनी वेगवेगळ्या विषयावरील उपकरणांची निर्मिती करत आपल्यातील हुशारी आणि वैज्ञानिक दृष्टिकोनाची प्रचिती घडविली आहे. विद्यार्थ्यांनी लहानसहान वस्तूंचा वापर करत घडविलेला आविष्कार पाहून प्रमुख पाहुणे ही भारावले. अशा विज्ञान प्रदर्शनाच्या माध्यमातून नवीन वैज्ञानिक घडण्यास सुरुवात होईल अशा शब्दांत त्यांनी सदिच्छा व्यक्त केल्या.

जिल्हा परिषदेचा माध्यमिक शिक्षण विभाग आणि सेंट झेविअर्स हायस्कूल यांच्या संयुक्त विद्यमाने आयोजित ४५ व्या शहरस्तरीय विज्ञान प्रदर्शनाला बुधवारी सुरुवात झाली. या तीन दिवसीय प्रदर्शनात शहरातील प्राथमिक आणि माध्यमिक मिळून ६० शाळांनी सहभाग नोंदविला आहे. जिल्हा परिषदेच्या अध्यक्षा शौमिका महाडिक यांच्या हस्ते माजी राष्ट्रपती डॉ. ए. पी. जे. अब्दुल कलाम यांच्या प्रतिमेस पुष्पहार अर्पण करून आणि रोपट्यास पाणी घालून प्रदर्शनाचे उद्घाटन झाले. प्रदर्शनासाठी अग्रक्रमाने नावनोंदणी केलेल्या राजर्षी छत्रपती शाहू विद्यालयातील शिक्षकांना उद्घाटन सोहळ्यात सामावून घेतले.

उद्घाटनानंतर कार्यक्रम संपल्यानंतर शिवाजी विद्यापीठातील संख्याशास्त्र विभागातील प्रा. शशीभूषण महाडिक, पर्यावरणवादी कार्यकर्ते सुहास वायंगणकर, राज्य माध्यमिक व उच्च माध्यमिक शिक्षण मंडळाचे सचिव सुरेश आवारे, शिक्षण उपसंचालक कार्यालयातील सहसंचालक सुभाष चौगुले यांनी विद्यार्थ्यांनी संवाद साधला. माध्यमिक विभागाचे शिक्षणाधिकारी किरण लोहार यांनी विज्ञान प्रदर्शन आयोजनाचा हेतू सांगितला. दरम्यान इयत्ता सहावी ते आठवी आणि इयत्ता नववी ते बारावी अशा दोन गटात प्रकल्पाची मांडणी केली आहे. याशिवाय माध्यमिक व प्राथमिक शिक्षकांनी तयार केलेली सहा उपकरणे प्रदर्शनात आहेत.

सेंट झेविअर्स हायस्कूलचे मुख्याध्यापक फादर जेम्स थोरात यांनी प्रास्ताविक केले. उपमुख्याध्यापिका बेनिता माँटेरो यांनी स्वागत केले. कार्यक्रमाला सेंट झेविअर्स हायस्कूलचे व्यवस्थापक फादर डेनिस बोर्जिस, जिल्हा शैक्षणिक व्यासपीठाचे एस. डी. लाड, कोल्हापूर जिल्हा शिक्षण संस्था संघाचे सचिव जयंत आसगावकर, महापालिकेच्या शिक्षण समितीचे प्रशासनाधिकारी शंकर यादव यांची प्रमुख उपस्थिती होती.

दैनंदिन वापरातील वस्तूमधून

बनविली उपकरणे

व्हॅक्युमच्या सहाय्याने उष्णधूर ओढून घेऊन उंच हवेत सोडणारे हवा शुद्धीकरण यंत्र, ऊर्जा बचत करणारा एनर्जी फ्रेंड, पवनऊर्जापासून मोबाइल चार्जिंग, विद्युत चुंबकीय ऊर्जानिर्मिती, भूंकपसूचक यंत्र, पाणी पातळी सूचक विद्युत उपकरण, धूर शोषक यंत्रण, सायकलवर मोबाइल चार्जिंग, गवत कापणी यंत्र अशी उपकरणे बनविली आहेत. बॅटरी, लाकडी फळ्या, स्वीच, तांब्याची तार, बल्ब, सेल, वायर बल्ब, फॅन, वायर, पाइप्स अशा दैनंदिन वापरातील वस्तूचा वापर करत मुलांनी वेगवेगळी उपकरणे तयार केली आहेत.

शालेय विज्ञान प्रदर्शन हा प्राथमिक व माध्यमिक विद्यार्थ्यांना विज्ञानाविषयी आवड निर्माण करणारा उपक्रम आहे. नवीन वैज्ञानिकांची बीजे अशा प्रदर्शनातून रोवली जातात. या विद्यार्थ्यांमधूनच भविष्यात संशोधक, शास्त्रज्ञ घडतील. या प्रदर्शनामागील हाच प्रमुख उद्देश आहे

फादर जेम्स थोरात, मुख्याध्यापक सेंट झेविअर्स हायस्कूल

कोल्हापूर टाइम्स टीम

कोल्हापूर जिल्ह्यात पशुवैद्यकीय महाविद्यालय मंजूर करावे, अशी शिफारस सरकारकडे करणार असल्याची माहिती महाराष्ट्र राज्य पशू व मत्स्य विज्ञान विद्यापीठचे नागपूर कार्यकारिणी सदस्य आमदार प्रकाश गजभिये यांनी पत्रकार परिषदेत दिली.

गजभिये यांच्यासह कार्यकारिणी सदस्य व जिल्हा परिषदेचे उपाध्यक्ष सर्जेराव पाटील, सुहास सोरटे यांनी जिल्हा परिषद येथे पशुधन व दुग्धव्यवसायासंदर्भात माहिती घेतली. गोकुळ दूध संघासही भेट देऊन जिल्ह्यातील दुधाची उपलब्धता व व्यवस्थापनसंदर्भात जाणून घेतले. दरम्यान उपाध्यक्ष पाटील यांनी, जिल्ह्यामध्ये दुग्धव्यवसाय वाढीस लागावा या उद्देशाने पशुवैद्यकीय महाविद्यालय कोल्हापुरात मंजूर करावे, अशी मागणी केली होती. कार्यकारिणी सदस्यांनी मंगळवारी विविध ठिकाणी पाहणी केली.

यानंतर पत्रकारांशी बोलताना गजभिये यांनी कोल्हापूर येथे पशुवैद्यकीय महाविद्यालयास मंजुरी मिळावी अशी सरकारकडे शिफारस करणार आहे. तसेच जिल्ह्यातील पशुसंवर्धन विभागाकडील डॉक्टर्सची रिक्त पदे तातडीने भरावेत याविषयी कळविणार असल्याचे सांगितले.

उपाध्यक्ष पाटील म्हणाले, 'सरकारमार्फत सर्वसाधारण गटासाठी राबविली जाणारी दुधाळ जनावरांसाठीची योजना बंद आहे. ही योजना विदर्भ, मराठवाडा विभागात सुरू आहे. पश्चिम महाराष्ट्रात ही योजना सुरू करावी.' पत्रकार परिषदेला प्रा. डॉ. विकास वास्कर, डॉ. प्रकाश डोईफोडे, जिल्हा पशुसंवर्धन अधिकारी विनोद पवार, जिल्हा परिषद सदस्य प्रसाद खोबरे उपस्थित होते.

नुकसानभरपाई वाढून मिळावी

महापुरामध्ये जिल्ह्यातील १२७७ जनावरे दगावली. दुधाळ जनावरासाठी ३० हजार रुपये इतकी नुकसान भरपाई जाहीर करून आतापर्यंत दोन कोटी ९१ लाख रुपयांचे वाटप केले आहे. दरम्यान नुकसान भरपाईची रक्कम कमी असून त्यामध्ये वाढ करून दुधाळ जनावरांसाठीची ७५ हजार रुपये द्यावेत, अशी मागणी सरकारकडे करणार असल्याचे समिती सदस्यांनी सांगितले. तसेच दुधाची उपलब्धता वाढविण्यासाठी सिमेन्स कलेक्शन उपक्रम राबविला जाणर असल्याचे सांगितले.

कोल्हापूर: पन्हाळा तालुक्यातील बाजारभोगाव येथील प्राथमिक आरोग्य केंद्रातील वैद्यकीय अधिकारी लता सरोळे यांच्याविषयीच्या तक्रारींची सुनावणी झाली. सरोळे यांच्याविषयी तक्रारी झाल्याने प्रशासनाने चौकशीसाठी त्रिसदस्यीय समितीची नेमणूक केली आहे. समितीला तक्रारीची चौकशी करून आठ दिवसांत अहवाल देण्याची सूचना केली होती. सीईओकडे हा अहवाल दिला जाणार आहे. दुसरीकडे प्रशासनाने, राज्य सरकारच्या सार्वजनिक आरोग्य विभागाकडे सरोळे यांची खातेनिहाय चौकशी करण्यात यावी, असा प्रस्ताव पाठविला आहे.

कोल्हापूर: शिक्षक बदलीप्रकरणी घेतलेल्या आक्षेप व हरकतींच्या अनुषंगाने जिल्हा परिषदेत ५७ शिक्षकांची सुनावणी घेण्यात आली. मुख्य कार्यकारी अधिकारी अमन मित्तल, उपमुख्य कार्यकारी अधिकारी रविकांत अडसूळ आणि प्राथमिक शिक्षणाधिकारी आशा उबाळे यांनी सुनावणी घेतली. करवीर, हातकणंगले व शिरोळ तालुका वगळून बदल्यांची प्रक्रिया राबविण्यात आली. बदली प्रकरणात काही सदस्यांनी मध्यस्थी व सोयीच्या ठिकाणी बदली मिळवून देण्यासाठी पडद्याआड राहून प्रयत्नशील होते. मात्र सीईओ मित्तल यांनी शिक्षक बदली प्रकरणात स्वत: लक्ष घालत सुनावणी घेतली. सुनावणीनंतर काही शिक्षकांना बदलीचे आदेश लागू केले. तर काही शिक्षकांना बदलीसाठी आवश्यक कागदपत्रांची पूर्तता करण्याची सूचना केली. शिक्षक पती-पत्नी आणि दिव्यांग, आजारी या कारणामुळे बदली मागणाऱ्या शिक्षकांच्या सुनावण्या घेण्यात आल्या.