मनपा लोगो

म. टा. प्रतिनिधी, कोल्हापूर

'महापालिकेच्या आस्थापनेवरील सुमारे ५,४०० अधिकारी व कर्मचाऱ्यांना सामूहिक वैयक्तिक अपघात विमा योजना लागू करण्यात येणार आहे. आयुक्त डॉ. मल्लिनाथ कलशेट्टी यांच्यासमवेत याबाबत कर्मचारी संघाच्या पदाधिकाऱ्यांची चर्चा होऊन प्रस्तावाला तत्वत: मान्यता दिली आहे. एक डिसेंबर २०१९ पासून अपघाती विमा योजनेची अंमलबजावणी करण्यात येणार आहे,' अशी माहिती महापालिका कर्मचारी संघाचे अध्यक्ष संजय भोसले, सहसचिव दिनकर आवळे यांनी दिली.

भोसले म्हणाले, 'विमा संचालनालय, राज्य सरकारच्या विमा निधी यांच्यावतीने राज्यातील सर्व शासकीय व निमशासकीय, जिल्हा परिषद, पंचायत समिती, महापालिका, नगरपालिका व सार्वजनिक उपक्रमातील सरकारी महामंडळाच्या आस्थापनेवरील अधिकारी कर्मचाऱ्यांना वैयक्तिक अपघात विमा योजना लागू केली आहे. योजनेसाठी लागणारी दहा लाखांची रक्कम महापालिका विमा कार्यालयाकडे जमा करणार आहे. योजनेत सहभाग घेतल्यानंतर एखाद्या अधिकारी अथवा कर्मचाऱ्याचा अपघाती मृत्यू झाल्यास त्याच्या वारसांना दहा लाखांचा परतावा मिळणार आहे. योजनेबाबतची माहिती आयुक्तांना दिल्यानंतर प्रस्तावाला त्यांनी तत्वत: मान्यता दिला. मुख्य लेखापाल संजय सरनाईक, मुख्य लेखापरिक्षक धनंजय आंधळे यांना पुढील कार्यवाही करण्याचे आदेश त्यांनी दिले आहेत.'

'समाजकल्याण विभागाकडून सफाईचे काम करणाऱ्या कर्मचाऱ्यांच्या मुलांसाठी असलेल्या शिष्यवृत्तीचा लाभ मिळवून देण्यासाठी कर्मचारी संघाने कालबद्ध कार्यक्रम निश्चित केला आहे. कर्मचाऱ्यांची क्रयशक्ती वाढवण्यासाठी हजेरीच्या ठिकाणी व कार्यालयामध्ये बैठका घेवून त्यांना मार्गदर्शन करण्यात येणार आहे. त्यासाठी श्रमिक महासंघाच्या माध्यमातून कामगार चळवळीत काम करणाऱ्या काही अनुभवी लोकांची मदत घेतली जाणार आहे,' असे भोसले यांनी सांगितले. पत्रकार बैठकीस रमेश पोवार, लक्ष्मण दाबाडे, सिकंदर सोनुले यांच्यासह संघाचे पदाधिकारी उपस्थित होते.

बाचूळकर यांचाही फोटो वापरावा

म. टा. प्रतिनिधी, कोल्हापूर

बेगोनिया या दुर्मिळ शोभिवंत वनस्पतीच्या दुसऱ्या नवीन जातीचा शोध लागला असून पश्चिम घाटातील केरळ राज्यातून शोधलेल्या या प्रजातीला ज्येष्ठ पर्यावरण तज्ज्ञ व या संशोधन मोहिमेतील संशोधक डॉ. मधुकर बाचूळकर यांच्या नावाने 'बेगोनिया बाचुळकरी ' असे नामकरण करण्यात आले आहे.

प्राचार्य डॉ. मधुकर बाचूळकर यांच्या वनस्पतीशास्त्र व पर्यावरण क्षेत्रातील कार्याच्या गौरवार्थ बेगोनियाच्या या जातीस त्यांचे नाव देण्यात आले. बेगोनियाची ही नवीन जात प्रा. डॉ. बाचूळकर यांच्या नावाने ओळखली जाणार आहे. गेली अनेक वर्ष त्यांनी वनस्पती वर्गीकरणशास्त्र, जैवविविधतेचे जतन आणि पर्यावरणाचे संरक्षण या क्षेत्रात काम केले आहे. या त्यांच्या कार्याचा गौरव म्हणून 'बेगोनिया बाचूळकरी' हे नाव देण्यात आले आहे, असे डॉ. मकरंद ऐतवडे आणि प्रा. डॉ. एस.आर. यादव यांनी सांगितले.

पश्चिम घाटातील बेगोनिया प्रजातींचा अभ्यास करत असताना वनस्पती अभ्यासक डॉ. मकरंद ऐतवडे आणि वनस्पती तज्ज्ञ प्रा. डॉ. एस. आर. यादव यांना केरळमधील निलयमपत्ती, पलक्कड याठिकाणी डिसेंबर २०१२ साली बेगोनियाची एक जात आढळून आली. या वनस्पतीचा सखोल अभ्यास केल्यानंतर ही जात नवीनच असून पश्चिम घाटातील 'बेगोनिया फ्लोसिफेरा' या जातीशी आप्तभाव दर्शविते असे आढळून आले. या नवीन जातीच्या शोधाबाबतचा शोधनिबंध न्यूझीलंडमधून प्रकशित होणाऱ्या 'फायटोटॅक्सा' या आंतरराष्ट्रीय नियतकालिकामध्ये नुकताच प्रसिद्ध झाला.

'बेगोनिया बाचूळकरी' ही वनस्पती साधारणपणे ५० ते ६० से. मी. उंच असून ती ओलसर ठिकाणी दमट हवामानात दगडांच्या फटींमध्ये वाढते. या वनस्पतीस जमिनीच्या वर खोड नसून ते रूपांतरित मूलक्षोड स्वरूपात जमिनीखाली आढळते. ही वनस्पती गोळा करण्यासाठी त्रिसूर, केरळ येथील भारतीय कृषि अनुसंधान परिषद-राष्ट्रीय पादप अनुवंशिक संसाधन केंद्राचे शास्त्रज्ञ डॉ. जोसेफ कट्टुकुनेल यांची मदत झाली. या संशोधनामध्ये डॉ. शरद कांबळे, रोहित माने आणि जगदीश दळवी यांचे सहकार्य लाभले.

........

कोट

'बेगोनिया बाचूळकरी या वनस्पतीची पाने आकर्षक आणि फुले देखणी आहेत. मूलक्षोडाद्वारे या वनस्पतीचे शाकीय प्रजजन करणे शक्य आहे. ही वनस्पती व्यावसायिकदृष्ट्या शोभिवंत म्हणून प्रसिद्धीस आणि प्रसारीत होऊ शकते यासाठी आम्ही प्रयत्न करणार आहोत. जेणेकरून ही जात संकटग्रस्त न होता तिचे जतन आणि संवर्धन होईल.

डॉ. मकरंद ऐतवडे

....

'नैसर्गिक संकटांमुळे अनेक वनस्पतींच्या जाती लुप्त होण्याच्या मार्गावर आहेत. पश्चिम घाटातील वनस्पतींच्या संवर्धनासाठी आम्ही अनेक यशस्वी प्रकल्प राबविले आहेत. शोभिवंत वनस्पतींमध्ये गणल्या जाणाऱ्या तसेच लुप्त होत चाललेल्या बेगोनियाच्या पश्चिम घाटातील जातींचे संरक्षण आणि संवर्धन करण्यासाठी प्रयत्न करणार आहोत.'

डॉ. एस.आर. यादव

म. टा. प्रतिनिधी, कोल्हापूर

अखिल भारतीय मराठी चित्रपट महामंडळाच्या कार्यालयासमोर लावलेल्या निषेध फलकाशी माजी उपाध्यक्ष मिलिंद अष्टेकर यांचा काही संबंध नाही. हा फलक सभासदांनी लावलेला होता. आक्षेपार्ह फलक लावून कार्यकारिणीची बदनामी केली म्हणून अष्टेकरांविरोधात अदखलपात्र गुन्हा दाखल करण्यापेक्षा सभासदांवर गुन्हा दाखल करा, असा आक्रमक पवित्रा सभासद व चित्रपट कामगारांनी शनिवारी घेतला. दुपारी वीसहून अधिक कामगार व सभासद महामंडळात जमले. त्यांनी महामंडळाचे उपाध्यक्ष धनाजी यमकर, खजानिस शरद चव्हाण यांच्याशी संपर्कही साधला. निवेदन देणार असल्याचे सांगितले. मात्र हे पदाधिकारी काही कार्यालयात आले नाहीत. अखेरीस संबंधित कर्मचाऱ्यांनी,महामंडळाचे प्रमुख व्यवस्थापक रवींद्र बोरगावकर यांच्याकडे निवेदन दिले.

चित्रपट महामंडळातील राजकारण गेली काही वर्षे गाजत आहे. अभिनेत्री छाया सांगावकर यांनी ३० जुलै २०१४ रोजी अष्टेकरांच्या विरोधात विनयभंगाची तक्रार केली होती. पुढे कोर्टाने याप्रकरणी अष्टेकरांची निर्दोष मुक्ततता केली. निकालाची प्रत मिळाल्यानंतर आठवडाभरापूर्वी अष्टेकर यांनी या प्रकाराविरोधात अभिनेत्री सांगावकर, अर्जुन नलवडे व सुरेंद्र पन्हाळकर यांच्या विरोधात २५ लाख रुपयांचा अब्रुनुकसानीच्या दाव्यासोबत फौजदारी गुन्हा नोंद केल्याचे सांगितले होते.

दुसरीकडे विनयभंगाच्या गुन्ह्यातून निर्दोष मुक्तता झाल्यानंतर अष्टेकरांच्या अभिनंदनाचा तर त्यांच्यावर गुन्हा दाखल केल्याप्रकरणी त्या तिघांच्या निषेधाचा फलक महामंडळाच्या कार्यालयासमोर काहींनी लावला होता. मात्र अष्टेकरांनीच हा फलक लावून कार्यकारिणीची बदनामी केली म्हणून त्यांना महामंडळाने नोटीस लागू केली, महामंडळात काही पदाधिकारी मनमानी कामकाज करत आहेत. त्यांना सभासदांच्या भावनांची कदर नाही. महामंडळाच्या कार्यालयासमोर लावलेल्या निषेध फलकाशी अष्टेकरांचा संबंध नाही. सभासदांनी त्या तिघांविरोधात निषेध फलक उभारला होता' अशी भूमिका घेत सागर भोसले, शशिकांत कांबळे, किरण कांबळे, विश्वास कांबळे, समाधान सावंत, सतीश कांबळे, सतेज स्वामी, समीर कामत, स्नेहलराज संकपाळ आदींनी महामंडळाचे कार्यालय गाठले.

म. टा. प्रतिनिधी, कोल्हापूर

देशातील सर्व टोल नाक्यांवर वाहनधारकांकडून रोख रक्कम घेताना होणारा विलंब टाळण्यासह टोल वसुलीत सुसूत्रता यावी यासाठी सर्व प्रकारच्या वाहनांना 'फास्टटॅग' बंधनकारक केले आहे. फास्टटॅग स्टीकर नसल्यास वाहनधारकांना दुप्पट टोल भरावा लागणार आहे. राष्ट्रीय महामार्ग प्राधिकरणाच्या निर्णयाची अंमलबजावणी एक डिसेंबरपासून सुरू होणार आहे. त्यामुळे फास्टटॅग मिळवण्यासाठी वाहनधारकांची धांदल सुरू आहे.

राष्ट्रीय महामार्ग प्राधिकरणच्या अखत्यारितील महामार्गांवर सध्या बहुतांश टोल वसुली रोख स्वरुपात होते. गेल्या दीड वर्षांपासून विक्री होणाऱ्या नवीन वाहनांसाठी फास्टटॅग बंधनकारक केले आहे. मात्र, नवीन वाहनांकडूनही फास्टटॅगचा नियमित वापर होत नाही. फास्टटॅगचा वापर वाढावा, यासाठी सर्व टोल नाक्यांवर स्वतंत्र मार्गिका सुरू केली. पण याचा अपेक्षित वापर होत नव्हता. वाहनधारकांकडून रोख रक्कम घेताना टोल नाक्यांवर वाहनांच्या रांगा वाढत होत्या. याचा त्रास सर्वच वाहनधारकांना सहन करावा लागत होता. टोल नाक्यांवरील गर्दी टाळून वाहतूक गतिमान करण्यासाठी राष्ट्रीय महामार्ग प्राधिकरणने सर्व टोलनाक्यांवर सर्व प्रकारच्या वाहनांसाठी फास्टटॅग बंधनकारक केले आहे. त्यामुळे मार्ग फास्ट होणार असल्याचा दावा प्राधिकरणाचा आहे.

फास्टटॅग स्टिकर देण्याची व्यवस्था सर्व टोल नाक्यांवर केली आहे. याशिवाय काही बँकांमध्येही ही सोय उपलब्ध आहे. वाहतूकदार संघटनांचे प्रबोधन करून फास्टटॅग स्टीकर घेण्याच्या सूचना दिल्या जात आहेत. जास्तीत जास्त वाहनधारकांनी स्टीकर घ्यावे, यासाठी १०० रुपये अनामात रक्कम आकारली जात आहे. एक डिसेंबरपासून अनामत रक्कम ५०० रुपये केली जाणार आहे. मोबाइलवरही अॅपद्वारे फास्टटॅगची सुविधी दिली जात आहे. फास्टटॅगचे खाते वाहनधारकांच्या बँक खात्याशी जोडले असून, टोल नाक्यावरून जाताना थेट बँक खात्यातून टोलची रक्कम वजा होणार आहे. फास्टटॅगच्या वापरावर अडीच टक्के सवलत दिली जाणार आहे. एकदा घेतलेले स्टीकर पाच वर्षांसाठी चालेल. फास्टटॅगमुळे टोल नाक्यांवर रांगा दिसणार नाहीत, तसेच टोलवसुलीत पारदर्शकता येईल, असा विश्वास महामार्ग प्राधिकरणच्या अधिकाऱ्यांनी व्यक्त केला.

एक डिसेंबरपासून विना फास्टटॅग वाहनांसाठी दुप्पट टोलची आकारणी करण्याचे आदेश प्राधिकरणने दिले आहेत. याची काटेकोर अंमलबजावणी केली जाईल, अशी माहिती महामार्ग प्राधिकरणचे कोल्हापुरातील अधीक्षक बी. एस. साळुंखे यांनी दिली.

टोल नाक्यांसह मार्केट यार्डमध्ये फास्टटॅग

एक डिसेंबरपूर्वी जास्तीतजास्त वाहनधारकांना फास्टटॅग स्टीकर मिळावे, यासाठी किणी, तासवडे येथील टोल नाक्यांवर विक्रीची व्यवस्था सुरू आहे. याशिवाय शहरातील मार्केट यार्ड परिसरातही फास्टटॅगची व्यवस्था केली आहे. सर्व वाहतूकदार संघटनांशी संपर्क साधून वाहनधारकांना फास्टटॅग स्टीकर दिले जात आहे.

फास्टटॅगमुळे महामार्गांवरील वाहतूक गतिमान होऊन याचा फायदा वाहनधारकांना होईल. यातून महामार्गांवरील नेकमी कमाईदेखील स्पष्ट होईल. यानंतर तरी टोलची रक्कम किंवा टोल वसुलीचा कालावधी कमी व्हावा, अशी अपेक्षा आहे.

- सुधाकर इंगळे, वाहनधारक

प्राधिकरणच्या आदेशानुसार एक डिसेंबरपासून टोल नाक्यांवर फास्टटॅगची अंमलबजावणी सुरू होईल. तत्पूर्वी वाहनधारकांचे प्रबोधन आणि फास्टटॅगची विक्री सुरू आहे. फास्टटॅग नसल्यास दुप्पट टोलवसुली होणार असल्याने वाहनधारकांनी तातडीने फास्टटॅग स्टीकर घ्यावे.

- बी. एस. साळुंखे, अधीक्षक, राष्ट्रीय महामार्ग प्राधिकरण

म. टा. प्रतिनिधी, कोल्हापूर

गेल्या आठवड्यात भडकलेले धान्य, कडधान्यांचे दर आठवड्यात स्थिर असले तरी ज्वारीच्या दरात प्रतिकिलो दोन रुपयांनी वाढली आहे. तूरडाळ, मूगडाळीचा दर प्रतिकिलो १०० रुपयांवर स्थिर आहे.

परतीचा पाऊस, अतिवृष्टीने धान्य, कडधान्याच्या पिकाला मोठा फटका बसला असून उत्पन्न कमी येण्याची शक्यता व्यक्त केली जात आहे. त्यामुळे धान्य आणि कडधान्याची आवकही कमी झाल्याने दर वाढत चालले आहेत. ज्वारीच्या दरात वाढ झाली असून बार्शी शाळूचा दर प्रतिकिलो पन्नास रुपयांवरुन ५२ ते ५४ रुपये झाला आहे. तूरडाळ आणि मूग डाळीच्या दरात सव्वा महिन्यात मोठी वाढ झाली असून दोन्ही डाळीचा दर १०० रुपयांवर स्थिर आहे. उडीद डाळीचा दर १२० रुपये, बेळगावी मसूरीचा १४०, मटकीचा दर १२० रुपयांवर कायम आहे. डाळी आणि कडधान्यांचे दर शंभर रुपये आणि शंभरीपार झाल्याने महागाई वाढल्याची चिंता ग्राहकांना सतावू लागली आहे. डाळी आणि कडधान्यांना पर्याय नसल्याने ग्राहकांना चढ्या दराने खरेदी केली जात आहे. मिरची पिकालाही मोठा फटका बसल्याने मिरची आणि मिरची पुडीच्या दरात प्रतिकिलो २० ते ४० रुपये इतकी वाढ झाली आहे.

किराणा मालाचे दर (प्रतिकलो रुपयांत)

पोहे : ४४

साखर : ३८

शेंगदाणा : १२०

मैदा : ३२

आटा : ३२

रवा : ३२

गूळ : ५०

साबुदाणा : ८४

वरी : ९२

डाळींचे दर (प्रतिकिलो रु.)

तूरडाळ : १००

मूगडाळ : १००

उडीद डाळ : १२०

हरभरा डाळ : ६८

मसूर डाळ : ६८

मसूर : ८० ते १४०

चवळी : ८०

हिरवा वाटाणा : १००

काळा वाटाणा : ७२

मूग ९२

मटकी : १२०

छोले : १००

धान्याचे दर (प्रतिकिलो रु.)

बार्शी शाळू : ४२ ते ५४

गहू : ३० ते ३६

हायब्रीड ज्वारी : ३८

बाजरी : ३२

नाचणी : ३६

तेलाचे दर (प्रतिकलो रु.)

शेंगतेल : १३५

सरकी तेल : ९२

खोबरेल : २४०

सूर्यफूल : ९० ते १०५

मसाले दर (प्रतिकलो रु.)

तीळ : १८०

जिरे : २८०

खसखस : ९००-१४००

खोबरे : १८०

वेलदोडे : ५०००

म. टा. प्रतिनिधी, कोल्हापूर

राष्ट्रवादी काँग्रेसचे नेते अजित पवार यांच्या समर्थनावर देवेंद्र फडणवीस यांनी पुन्हा मुख्यमंत्रीपदाची शपथ घेतल्यानंतर भाजपला पाठिंबा दिलेल्या आमदारांच्या आशा पल्लवित झाल्या आहेत. विशेषत: प्रकाश आवाडे आणि विनय कोरे यांचे मंत्रिपदासाठी लॉबिंग सुरू झाले आहे. दरम्यान, आवाडे यांनी मुंबईत अपक्ष आमदार राजेंद्र पाटील-यड्रावकर यांची भेट घेऊन भाजपला पाठिंबा देण्याबाबत मनधरणी केली.

गेली २०-२५ दिवस राज्यात सत्तेचा लोलक सतत दोलायमान होत राहिल्याने अपक्ष आमदारांमध्ये अस्वस्थता होती. जनसुराज्य शक्ती पक्षाचे आमदार विनय कोरे यांची निवडणुकीआधीच भाजपशी जवळिक होती. त्यांनी अधिकृतपणे भाजपला पाठिंबाही जाहीर केला. इचलकरंजीचे अपक्ष आमदार प्रकाश आवाडे यांनीही भाजपला पाठिंबा देऊन सत्तेसोबत जाणे पसंत केले. राजेंद्र पाटील-यड्रावकर यांनी मात्र शिवसेनेला पाठिंब्याचे पत्र दिले. भाजपने सत्ता स्थापन करण्यात असमर्थता दाखवल्यांतर मात्र आमदार कोरे आणि आवाडे यांच्यात अस्वस्थता निर्माण झाली. सत्तेचे सूत्र बदलत असताना आता काय भूमिका घ्यायची? असा प्रश्न त्यांना पडला. मात्र, झाकली मूठ सव्वालाखाची याप्रमाणे त्यांनी शांत राहणे पसंत केले. गेल्या १५ दिवसातील घडामोडींवर त्यांनी एकदाही जाहीरपणे प्रतिक्रिया व्यक्त केली नाही. कोणत्याही चित्रात न येता ते घडामोडींवर लक्ष ठेवून होते. शनिवारच्या नाट्यमय घडामोडींनंतर शनिवारी देवेंद्र फडणवीस यांनी मुख्यमंत्री पदाची शपथ घेतल्यानंतर अपक्ष आमदारांमध्ये पुन्हा उत्साह निर्माण झाला. भाजपच्या मंत्रीमंडळात स्थान मिळवण्यासाठीही हालचाली गतिमान झाल्या.

दरम्यान, उपमुख्यमंत्री अजित पवार यांच्यासोबत गेलेले राष्ट्रवादीचे काही आमदार पुन्हा स्वगृही परतत आहेत. अशावेळी सभागृहात बहुमत सिद्ध करण्यासाठी भाजपला अपक्षांची मदत महत्त्वाची ठरणार आहे. अपक्षांनी अन्य पक्षातील आमदार सोबत आणल्यास त्यांचे वजन आणखी वाढणार आहे. त्यामुळे अपक्षांनी आपली राजकीय ताकत वाढवण्यासाठी हालचाली सुरू केल्या आहेत. आमदार प्रकाश आवाडे यांनी मुंबईत राजेंद्र पाटील यांची भेट घेतली. यड्रावकरांनी शिवसेनेला पाठिंबा दिला आहे. मात्र, त्यांनी भाजपला पाठिंबा द्यावा, अशी गळ घातली जात आहे. यड्रावकरांची मनधरणी करण्यास आवाडे यशस्वी झाल्यास त्यांचा मंत्रिपदाचा दावा अधिक भक्कम होणार आहे. दरम्यान, भाजपचे बहुमत सिद्ध होईपर्यंत आणखी कोणत्या घडामोडी घडतात याचीही हूरहूर अपक्षांना आहे.

म. टा. प्रतिनिधी, कोल्हापूर

आयुक्त डॉ. मल्लिनाथ कलशेट्टी यांच्या आदेशानंतरही युनिटी कन्सल्टंट कंपनीने काळम्मावाडी थेट पाइपलाइन योजनेतील कामांच्या बिलांचा ताळेबंद शहर पाणीपुरवठा विभागाला सादर केलेला नाही. परिणामी कामाचे मुख्य ठेकेदार असलेल्या जीकेसी कंपनीला अद्याप बिले मिळालेली नाहीत. त्यामुळे पंधरा दिवसांनंतरही कंपनीचे कार्यालय सुरू झालेले नाही. बंद कार्यालयासोबत योजनेचे कामच ठप्प आहे.

शहराला पाणीपुरवठा करण्यासाठीच्या महत्त्वाकांक्षी थेट पाइपलाइन योजनेचे काम संथगतीने सुरू आहे. या कामात दररोज नवनवे अडथळे येत आहेत. गेल्या चार महिन्यांपासून जीकेसी कंपनीची सुमारे ३८ कोटी रुपयांची बिले महापालिकेकडे थकीत आहेत. कंपनीची बिले थकीत असल्याने उप ठेकेदारांची बिले मुख्य कंपनीकडे प्रलंबित राहिली. त्यामुळे संतप्त ठेकेदारांनी सोमवारी (ता. ४) पुईखडी येथील कंपनीच्या कार्यालयाला टाळे ठोकले होते. ठेकेदारांच्या कृतीमुळे महापालिका वर्तुळात खळबळ उडाली होती. या घटनेची गंभीर दखल घेत आयुक्त डॉ. कलशेट्टी यांनी मंगळवारी (ता. ५) पाणीपुरवठा विभागाच्या वरिष्ठ अधिकाऱ्यांसह जीकेसी व युनीटी कन्सल्टंटच्या कंपनीच्या अधिकाऱ्यांची बैठक घेतली. बैठकीत त्यांनी जीकेसी कंरनीला तातडीने सात ते आठ कोटी रुपये देण्याची सूचना पाणीपुरवठा विभागाला केली. युनीटी कन्सल्टंटला आतापर्यंत झालेल्या कामाच्या बिलांचा ताळेबंद पाणीपुरवठा विभागाकडे सादर करण्याचे आदेश दिले होते. मात्र, गेल्या पंधरा दिवसांपासून कन्सल्टंट कंपनीने बिले सादर केलेली नाहीत. कंपनीला तात्पुरत्या स्वरुपात देण्यात येणारी रक्कमही महापालिका प्रशासनाकडून प्राप्त झालेली नाही. त्यामुळे गेल्या पंधरा दिवसांपासून जीकेसी कंपनीचे कार्यालय बंद आहे. उप ठेकेदारांकडून पुरावठा होणारे साहित्य पूर्ण थांबले असल्याने थेट पाइपलाइन योजनेचे कामही ठप्प झाले आहे.

'युनीटी' कंपनी नेहमीच वादात

थेट पाइपलाइन योजनेवर देखरेखीसाठी, आवश्यक ठिकाणी सूचना करण्यासाठी युनीटी कन्सल्टंट कंपनीची नियुक्ती करण्यात आली. कंपनीला त्यासाठी लाखो रुपयांचे शुल्क दिले जाते. मात्र कंपनीने योजनेतील त्रुटी समोर आणल्या नाहीत. काम चुकीचे होत असताना त्याकडे दुर्लक्ष केले. त्यामुळे कंपनीवर नेहमीच टीका होत आली आहे. उप ठेकेदारांनी कंपनीच्या कार्यालयाला टाळे लावल्यानंतर त्यांना तातडीने ताळेबंद सादर करण्याचे आदेश देण्यात आले. मात्र अद्याप ताळेबंद दिलेला नाही. त्यामुळे कन्सल्टंट कंपनी पुन्हा वादाच्या भोवऱ्यात अडकली आहे. याबाबत कंपनीच्या अधिकाऱ्यांशी संपर्क साधण्याचा प्रयत्न केला. मात्र तो होऊ शकला नाही.

०००

(मूळ कॉपी)

म. टा. प्रतिनिधी, कोल्हापूर

आयुक्तांच्या आदेशानंतरही युनिटी कन्सलटंट कंपनीने काळम्मावाडी थेट पाइपलाइन योजनेतील कामांच्या बिलांचा ताळेबंद शहर पाणीपुरवठा विभागाला सादर केलेला नाही. परिणामी मुख्ये ठेकेदार कंपनी जीकेसीला अद्याप बिले मिळालेली नसल्याने पंधरा दिवसानंतरही कंपनीचे कार्यालय सुरू होऊ शकलेले नाही. बंद कार्यालयसोबत संपूर्ण योजनेचे कामच ठप्प राहिले आहे.

संथगतीने थेट पाइपलाइन योजनेचे काम सुरू असताना कामामध्ये दररोज नवनवीन अडथळे येत आहेत. गेल्या चार महिन्यापासून महापालिकेकडे जीकेसी कंपनीचे सुमारे ३८ कोटीची बिले थकीत आहेत. कंपनीची बिले थकीत असल्याने सब ठेकेदारांची बिले मुख्य कंपनीकडे प्रलंबित राहिली आहेत. त्यामुळे संतप्त झालेल्या ठेकेदारांनी सोमवारी (ता. ४) पुईखडी येथील कंपनीच्या कार्यालयाला टाळे ठोकले होते. ठेकेदारांच्या कृतीमुळे महापालिका वर्तुळात एकच खळबळ उडाली होती.

घटनेची गंभीर दखल घेत आयुक्त डॉ. मल्लिनाथ कलशेट्टी यांनी मंगळवारी (ता.५) पाणीपुरवठा विभागाच्या वरिष्ठ अधिकाऱ्यांसह जीकेसी व युनिटी कन्सलटंटच्या कंपनीच्या अधिकाऱ्यांची बैठक घेतली. बैठकीत त्यांनी पाणीपुरवठा विभागाला जीकेसीला तातडीने सात ते आठ कोटी रुपये देण्याची सूचना केली. तसेच युनिटी कन्सलटंटला आतापर्यंत झालेल्या कामाच्या बिलांचा ताळेबंद पाणीपुरवठा विभागास सादर करण्याचे आदेश दिले. मात्र गेल्या पंधरा दिवसांपासून कन्सलटंट कंपनीने बिले सादर केलेली नाहीत. तसेच कंपनीला तात्पुरत्या स्वरुपात देण्यात येणारी रक्कमही महापालिका प्रशासनाकडून प्राप्त झालेली नाही. त्यामुळे गेल्या पंधरा दिवसांपासून जीकेसीचे कार्यालय बंद स्थितीत आहे. सब ठेकेदारांकडून पुरावठा होणारे साहित्य पूर्णपणे थांबले असल्याने थेट पाइपलाइनचे कामही ठप्प झाले आहे.

...................

चौकट

'युनिटी' नेहमीच वादाच्या भोवऱ्यात

योजनेवर देखरेख ठेवण्यासाठी आवश्यक ठिकाणी सूचना करण्यासाठी युनिटी कन्सलटंट कंपनीची नियुक्ती केली. कंपनीला त्यासाठी लाखो रुपयाचे शुल्क दिले जात आहे. कंपनीने मात्र योजनेतील त्रुटी समोर आणल्या नाहीत. काम चुकीचे होत असताना त्याकडे दुर्लक्ष केले. त्यामुळे कंपनीवर नेहमीच टिका होत आली आहे. सब ठेकेदारांनी कंपनीच्या कार्यालयाला टाळे लावल्यानंतर त्यांना तातडीने ताळेबंद सादर करण्याचे आदेश दिले होते. पण अद्याप ताळेबंद दिलेला नाही. त्यामुळे कन्सलटंट कंपनी पुन्हा एकदा वादाच्या भोवऱ्यात अडकली आहे. याबाबत कंपनीच्या अधिकाऱ्यांशी संपर्क साधण्याचा प्रयत्न केला. पण संपर्क होऊ शकला नाही.

म. टा. प्रतिनिधी, कोल्हापूर

अत्यंत नाट्यमय घडामोडीनंतर मुख्यमंत्री देवेंद्र फडणवीस आणि उपमुख्यमंत्री अजित पवार यांनी शपथ घेतल्यानंतर भाजपच्या कार्यकर्त्यांनी शहरात फटाके वाजवून आणि साखर वाटून जल्लोष साजरा केला. मिरजकर तिकटी, रेगे तिकटी आणि ताराराणी चौकातही फटाक्यांची आतषबाजी करण्यात आली.

मुख्यमंत्रीपदी देवेंद्र फडणवीस यांनी आज सकाळी शपथ घेतल्याचे कळताच कार्यकर्त्यांना मोठा धक्का बसला. त्यानंतर सकाळी अकरा वाजता कार्यकर्ते बिंदू चौकात जमू लागले. जिल्हाध्यक्ष राहुल चिकोडे, पश्चिम महाराष्ट्र देवस्थान समितीचे अध्यक्ष महेश जाधव, प्रदेश उपाध्यक्ष, माजी खासदार धनंजय महाडिक, माजी आमदार अमल महाडिक यांच्या नेतृत्वाखाली बिंदू चौक ते शिवाजी चौक अशी रॅली काढली. फटाक्यांची आतषबाजी आणि गुलालाची उधळण करून जल्लोष सुरू झाला. कार्यकत्यांनी 'भारतीय जनता पक्षाचा विजय असो,' 'चंद्रकांतदादा आगे बढो, हम तुम्हारे साथ है,' 'मुख्यमंत्री देवेंद्र फडणवीस यांचा विजय असो' अशा घोषणा दिल्या. यावेळी ढोल-ताशा व फटाक्यांच्या आतषबाजीसह साखर-पेढे वाटून आनंद साजरा करण्यात आला.

पश्चिम महाराष्ट्र देवस्थान व्यवस्थापन समितीचे अध्यक्ष महेश जाधव, माजी खासदार महाडिक, जिल्हाध्यक्ष चिकोडे यांनी मुख्यमंत्री फडणवीस यांच्या नेतृत्वाखाली सरकार पाच वर्षे स्थिर राहील, असा विश्वास व्यक्त केला. भाजप सरचिटणीस अशोक देसाई, विजय जाधव, संतोष भिवटे, सुभाष रामुगडे, दिलीप मेत्राणी, अॅड. संपतराव पवार, नगरसेवक अजित ठाणेकर, विजय खाडे-पाटील, गटनेते विजय सूर्यवंशी, उपाध्यक्ष मारुती भागोजी, हेमंत आराध्ये, दिग्विजय कालेकर, विद्या पाटील, अश्विनी पाटील आदी उपस्थित होते.

मिरजकर तिकटी येथे चंद्रकांत पाटील विचार मंचच्यावतीने साखर वाटून आनंदोत्सव साजरा करण्यात आला. निवासराव साळोखे, बाबा पार्टे, प्रसाद जाधव यांच्यासह कार्यकर्ते मोठ्या संख्येने उपस्थित होते.

म. टा. प्रतिनिधी, कोल्हापूर

महापालिकेच्या नगररचना (टीपी) विभागाने शनिवारी घेतलेल्या विशेष कॅम्पमध्ये १०८ फायलींना मंजुरी देण्यात आली. प्रलंबित भोगवटा प्रमाणपत्र, बांधकाम परवानगी जोता पातळी तपासणी व आराखडा मंजुरी मिळण्यासाठी ६४ जणांच्या अर्जांसह प्रत्यक्षही कॅम्पमध्ये नागरिक सहभागी झाले होते. त्यानुसार १२३ प्रकरणांची छाननी करण्यात आली.

राजारामपुरीतील टीपी कार्यालयात सकाळी १० ते ६ वाजेपर्यंत कॅम्पचे आयोजन केले होते. टीपीमधील प्रलंबित फायलींचा निपटरा करण्यासाठी आयुक्त डॉ. मल्लिनाथ कलशेट्टी यांनी विशेष कॅम्प घेण्याचे आदेश दिले होते. त्यानुसार शनिवारी तिसरा कॅम्प झाला. बांधकाम परवानगी, जोता पातळी तपासणी, भोगवटा प्रमाणपत्र, अनामत रक्कम मागणी अर्ज, ले-आऊट मंजुरी, बांधकाम परवानगी मुदतवाढ आदी ६४ प्रकारचे अर्ज टीपीकडे दाखल झाले होते. अर्जांची छाननी सुरू झाल्यानंतर प्रत्यक्ष कॅम्पमध्ये नागरिकांनी विविध मागण्यांचे अर्ज सादर केले. त्यापैकी १२३ अर्जांची छाननी करण्यात येऊन १०८ अर्जांना मान्यता देण्यात आली. दुपारी कॅम्पला आयुक्तांनी भेट देऊन कामाचा आढावा घेतला. टीपीमधील झिरो पेंडन्सी होईपर्यंत विशेष कॅम्पचे आयोजन करण्यात येणार आहे असे महापालिकेतील सूत्रांनी सांगितले.

म. टा. प्रतिनिधी, कोल्हापूर

राज्य जिल्हा परिषद सेवानिवृत्त कर्मचारी सेवा समितीच्या जिल्हा शाखेतर्फे बुधवारी (ता. २७) जिल्हा अधिवेशन होणार आहे. जिल्हाध्यक्ष विश्वास साबळे व सचिव मकतुम देसाई यांनी पत्रकार परिषदेत ही माहिती दिली. जिल्हा परिषदेतील विविध विभागातील निवृत्त कर्मचाऱ्यांच्या प्रश्नांच्या सोडवणुकीसाठी निवृत्त कर्मचाऱ्यांची संघटना स्थापन केल्याचे त्यांनी सांगितले.

जिल्हा शाखेचे हे पहिलेच अधिवेशन आहे. जिल्हा परिषद कर्मचारी सहकारी सोसायटीच्या महालक्ष्मी सांस्कृतिक हॉलमध्ये सकाळी दहा ते दुपारी दोन या वेळेत अधिवेशन होणार आहे. सामान्य प्रशासन विभागाचे उपमुख्य कार्यकारी अधिकारी रवीकांत आडसूळ आणि मुख्य वित्त व लेखा अधिकारी संजय राजमाने हे प्रमुख उपस्थित राहणार आहेत. त्यांच्या उपस्थितीमध्ये निवृत्तांच्या अडचणींविषयी चर्चा होणार आहे. तत्पूर्वी सकाळी १०.३० वाजता डॉ. फिरोज गुड्ड यांचे 'संपूर्ण हृदयशुद्धीकरण' या विषयावर व्याख्यान होईल. दुपारी १२.३० वाजता आर. पी. नाईक यांचे 'जीवन कसे जगावे' या विषयी व्याख्यान आहे. अधिवेशनात निवृत्त कर्मचाऱ्यांचा सत्कार होणार आहे.

पत्रकार परिषदेला विलास पाटील, प्रभाकर जंगम, श्रीपाद कुलकर्णी, कृष्णात डवरी, मंजूर अरब, रविंद्र पोवार, पांडूरंग उनाळे आदी उपस्थित होते.

दर तीन महिन्याला पेन्शन अदालत

निवृत्तांना फंडाचे पैसे लवकर मिळत नाहीत, पेन्शनची रक्कम मिळण्यास विलंब, निवृत्तीचे लाभ मिळण्यात अडचणी अशा विविध समस्या आहेत. संघटनेकडून प्रशासनाकडे वारंवार पाठपुरावा करुन ५७ तक्रारींची सोडवणूक झाली आहे. निवृत्तांच्या प्रश्नांच्या सोडवणुकीसाठी प्रशासनाने तीन महिन्यांतून एकदा पेन्शन अदालत घ्यावी, तालुका पातळीवर कॅम्प आयोजित करावे अशी मागणी करण्यात आली आहे.

म. टा. प्रतिनिधी, कोल्हापूर

प्रवासी भाड्यात आर्थिक लुबाडणूक, कागदपत्र नसणे आणि शिस्तीचे पालन न करणाऱ्या शहरातील रिक्षाचालकांवर शनिवारीही शहर वाहतूक नियंत्रण शाखा आणि प्रादेशिक परिवहन कार्यालयाने संयुक्तपणे कारवाईचा बडगा उगारला. दिवसभरात ३२१ रिक्षांची तपासणी करुन ३० रिक्षांना मेमो देण्यात आला. त्यापैकी २१ रिक्षाचालकांजवळ कोणतेही कागदपत्रे नसल्याने त्या ताब्यात घेऊन पोलिस मुख्यालयात ठेवण्यात आल्या.

शहर वाहतूक शाखेने शुक्रवारी शहरातील रिक्षा संघटनाची बैठक घेवून नियम पाळण्याच्या सूचना केल्या. त्याच दिवशी दुपारपासून मध्यवर्ती बसस्थानकासमोरील रिक्षा स्टॉपवर एकेरी रांग करण्यात आली. वाहनांची कागदपत्रे जवळ ठेवण्याच्या आणि शिस्तीचे पालन करण्याच्या सूचना लाउडस्पीकरवरुन करण्यात आल्या. शनिवारी प्रत्यक्ष रिक्षाचालकांवर कारवाई सुरू करण्यात आली. अचानक सुरू झालेल्या कारवाईने रिक्षाचालकांची ताराबंळ उडाली. मध्यवर्ती बसस्थानक, बिंदू चौक, शिवाजी चौक, दसरा चौक, शाहूपुरी, लक्ष्मीपुरी, शिवाजी पेठेतील काही स्टॉपवर रिक्षाच्या कागदपत्रांची तपासणी करण्यात आली. दिवसभरात ३२१ रिक्षांची तपासणी आरटीओ आणि वाहतूक शाखेच्या कर्मचाऱ्यांनी केली. रिक्षा चालकांचे लायसन्स, बॅच-बिल्ला, परमीट, फिटनेस, इ-मीटर सीलची तपासणी केली. त्यामध्ये काही रिक्षा चालकांकडे इ-मीटर सील नसल्याचे निदर्शनास आले.

तपासणीत ३० रिक्षांचालकांना जागेवरच मेमो देण्यात आला. त्यापैकी २१ रिक्षाचालकांकडे कोणतीही कागदपत्रे जवळ नसल्याचे स्पष्ट झाले. त्या रिक्षा पोलिस आणि आरटीओंनी ताब्यात घेऊन मुख्यालयाजवळील मैदानावर ठेवल्या. या रिक्षांच्या मूळ मालकांना बोलावून त्यांची चौकशी करण्यात आली. या वाहनांची मूळ कागदपत्रे आणण्याच्या सूचना केल्या. दरम्यान रिक्षाचालकांच्यावर कारवाईची मोहीम सुरुच राहणार असल्याचे पोलिसांनी सांगितले.

सीबीएसवरील राजर्षी शाहू महाराज डे-नाइट रिक्षा मित्र मंडळासमोर दिवसभर पोलिस निरीक्षक वसंत बाबर, उपनिरीक्षक शाम देवणे यांच्यासह दहाहून अधिक कर्मचारी कार्यरत होते. मोटार वाहन निरीक्षक सुभाष देसाई हे त्यांच्या पथकासह तैनात होते. मध्यवर्ती बसस्थानकासमोरील ऑटो रिक्षा स्टॉपमधील व्यावसायिकांनी शिस्तीचे पालन करावे, कोणत्याही प्रवाशाचे भाडे नाकारू नये, नियमानुसार भाडे आकारणी न करता लुबाडणूक करण्याचा प्रकार निदर्शनास आल्यास कडक कारवाईचा इशारा पथकाने दिला. लायसन्स, परमीट असल्याखेरीज व्यवसाय करू नये, अन्यथा कारवाईला सामोरे जावे लागेल, असा इशाराही यावेळी देण्यात आला.

रात्रीही विशेष मोहीम

रात्रीच्या वेळी रिक्षाचालक प्रवाशांना भाडे नाकारतात. इच्छित ठिकाणी जाण्यासाठी तिप्पट, चौपट दराची आकारणी करतात. अनेकदा इ-मीटर प्रमाणेही आकारणी केली जात नाही. त्यासाठी आगामी दोन दिवसांत रात्री ११ ते पहाटे पाच वाजेपर्यंत विशेष मोहीम राबविली जाणार असल्याचे शहर वाहतूक नियंत्रण शाखेचे निरीक्षक वसंत बाबर यांनी सांगितले.

रिक्षांची कागदपत्रे असल्याशिवाय कोणत्याही चालकाने प्रवासी वाहतूक करू नये. अन्यथा त्यांच्यावर कडक कारवाई केली जाईल. फिटनेस आणि परमीट सक्तीचे आहे.

- सुभाष देसाई, मोटार वाहन निरीक्षक, आरटीओ

फोटो ओळी

मध्यवर्ती बसस्थानकासमोरील रिक्षा स्टॉपवर आरटीओ आणि शहर वाहतूक शाखेच्या कर्मचाऱ्यांनी शनिवारी रिक्षाच्या कागदपत्रांची तपासणी केली. दरम्यान, कागदपत्रे नसलेल्या २१ रिक्षा पोलिस मुख्यालयाच्या परिसरात ठेवण्यात आल्या.

(अर्जुन टाकळकर)

म. टा. प्रतिनिधी, कोल्हापूर

राज्यात सरकार स्थापनेच्या घडामोडीच्या पार्श्वभूमीवर शहरात सकाळपासून सशस्त्र पोलिस बंदोबस्त तैनात करण्यात आला. महत्त्वाचे चौक, धार्मिक स्थळे, गर्दीची ठिकाणे आणि सर्व पक्षांच्या कार्यालयांबाहेर पोलिस तैनात केल्याने ठिकठिकाणी छावणीचे रूप आले होते.

शनिवारी पहाटे भाजप आणि राष्ट्रवादी काँग्रेसचे नेते अजित पवार यांच्या नेतृत्वाखाली सरकार स्थापन झाल्याच्या वृत्ताने जिल्ह्यात खळबळ उडाली. शिवसेना, काँग्रेससह राष्ट्रवादीच्या कार्यकर्त्यांत असंतोषाचे वातावरण निर्माण झाल्याने कायदा व सुव्यवस्थेचा प्रश्न निर्माण होऊ नये, यासाठी खबरदारी म्हणून बंदोबस्त तैनात केला. काही नागरिक चौकाचौकात थांबून या धक्कादायक राजकीय घटनाक्रमावर चर्चा करीत होते. भाजपचे कार्यकर्ते साखर-पेढे वाटप करत होते. शिवसेना, काँग्रेस व राष्ट्रवादीच्या कार्यकर्त्यांत असंतोषाची लाट पसरण्याची शक्यता गृहीत धरुन जिल्ह्यातील सर्व पोलिसांना अलर्ट राहण्याच्या इशारा जिल्हा पोलिस अधीक्षक डॉ. अभिनव देशमुख यांनी दिला होता.

शहरातील महत्त्वाचे चौक, संवेदनशील परिसर, धार्मिक स्थळे, राजकीय पक्षांची कार्यालये आदी ठिकाणी सशस्त्र पोलिस होते. शहर पोलिस उपअधीक्षक प्रेरणा कट्टे यांच्यासह लक्ष्मीपुरी, जुना राजवाडा, राजारामपुरी, शाहूपुरी, शहर वाहतूक शाखेचे निरीक्षक दिवसभर महत्वाच्या ठिकाणी पाहणी केले. रात्री उशिरापर्यंत हा बंदोबस्त कायम होता.

कायदा व सुव्यवस्था बिघडू नये, यासाठी पोलिस प्रशासन सतर्क आहे. जिल्ह्यात महत्त्वाच्या ठिकाणी सशस्त्र बंदोबस्त तैनात केला असून परिस्थिती शांत आहे.

- डॉ. अभिनव देशमुख, पोलिस अधीक्षक

म. टा. प्रतिनिधी, कोल्हापूर

राष्ट्रवादी काँग्रेसचे नेते, अजित पवार यांनी केलेल्या बंडाला पाठिंबा न देता राष्ट्रवादीचे अध्यक्ष शरद पवार यांच्या समवेतच राहण्याचा निर्णय जिल्ह्यातील पक्षाच्या दोन्ही आमदारांनी घेतला. आमदार हसन मुश्रीफ व राजेश पाटील हे दोघेही दिवसभर पवारांसमवेत होते, शिवाय मुश्रीफ यांना पक्षाने अजित पवारांची समजूत काढण्यासाठी दिलीप वळसे-पाटील, सुनील तटकरे यांच्यासोबत कार्यरत होते.

राज्यात महाविकासआघाडीचे सरकार येणार, मुश्रीफ व सतेज पाटील मंत्री होणार अशी चर्चा गेले आठ दिवस जिल्ह्यात सुरू होती. शिवसेनेकडून प्रकाश आबिटकर यांना संधी मिळेल अशी शक्यता होती. आमदार प्रकाश आवाडे, विनय कोरे यांनी भाजपला तर राजेंद्र पाटील-यड्रावकरांनी शिवसेनेला पाठिंबा दिला आहे. या पार्श्वभूमीवर सकाळी अचानक भाजपने सरकार स्थापन केले. मुख्यमंत्री म्हणून देवेंद्र फडणवीस तर उपमुख्यमंत्री म्हणून अजित पवारांनी शपथ घेतली. राष्ट्रवादी काँग्रेसमध्ये फूट पडल्याने कोल्हापूर व सांगली जिल्ह्यातील आमदार काय करणार? याची उत्सुकता वाढली. पण या भागातील एकही आमदार अजित पवारांसमवेत नसल्याचे स्पष्ट झाले.

मुश्रीफ व शरद पवारांचे संबंध अतिशय निकटचे आहेत. त्यांनी पवार यांच्यासोबत राहून अजित पवारांचे मन वळविण्याचा प्रयत्न केला. त्यांना भेटायला गेलेल्या नेत्यांमध्ये मुश्रीफ यांचा समावेश होता. राजेश पाटील यांनीदेखील काही होवो, शरद पवार यांची साथ सोडणार नसल्याचे स्पष्ट केले. सांगली जिल्ह्यातील तिन्ही आमदार पक्षासोबत राहिले. प्रदेशाध्यक्ष असलेले जयंत पाटील, सुमन पाटील आणि मानसिंग नाईक यांच्या या भूमिकेने बंडखोरीला ताकदच मिळाली नाही.

राजेंद्र पाटील-यड्रावकरांनी शिवसेनेला पाठिंबा दिला आहे. त्यांना भाजपसोबत आणण्यासाठी प्रकाश आवाडे यांनी प्रयत्न सुरू केले आहेत. त्यांना भेटून त्यांचे मन वळविण्याचा प्रयत्न करणार असल्याचे त्यांनी सांगितले. भाजपने बहूमत सिद्ध् केल्यास आवाडे व कोरे यांना मंत्रीपद मिळण्याची चिन्हे आहेत. पण, त्याचा फैसला ३० नोव्हेंबरनंतरच होणार आहे.

काँग्रेसचे आमदार रवाना

जिल्ह्यातील काँग्रेसचे चारही आमदार तातडीने मुंबईला रवाना झाले. पी. एन. पाटील, चंद्रकांत जाधव, ऋतुराज पाटील व राजू आवळे या चारही आमदारांना तातडीने मुंबईला येण्याची सूचना पक्षाच्यावतीने करण्यात आली. त्यानुसार ते रवाना झाले. दोन दिवसांपूर्वीच हे आमदार कोल्हापुरात आले होते. पण, नव्या राजकीय घडामोडींमुळे आता आठ दिवस त्यांना बाहेर रहावे लागणार आहे.

म. टा. प्रतिनिधी, कोल्हापूर

'आर्थिक मंदीच्या काळात उद्योजकांनी नव्या गरजा ओळखून गुंतवणूक करावी. नफ्याचे प्रमाण वाढवण्यासह खर्चावरही नियंत्रण हवे. केंद्र सरकारच्या बजेटमधील गुंतवणुकीचा कल पाहून वर्षभराचे नियोजन करावे,' असा सल्ला उद्योग सल्लागार नरेंद्र माटे यांनी उद्योजकांना दिला. कोल्हापूर इंजिनीअरिंग असोसिएशनमार्फत आयोजित केलेल्या चर्चासत्रात ते बोलत होते. उद्यमनगर येथील असोसिएशनच्या कार्यालयात शनिवारी (ता. २३) सायंकाळी चर्चासत्र झाले.

गेल्या आठ-दहा महिन्यांपासून उद्योगांमध्ये आर्थिक मंदीचे परिणाम सुरू आहेत. एमआयडीसींमध्ये पाच दिवसांचा आठवडा करण्याची वेळ आली आहे, तर कामगारांना सक्तीच्या सुट्ट्या द्याव्या लागत आहेत. तोटा टाळण्यासाठी उद्योजकांची धडपड सुरू आहे. या स्थितीत सरकारी योजना आणि धोरणांचा कसा फायदा करून घ्यावा, याबाबत कोल्हापूर इंजिनीअरिंग असोसिएशनने चर्चासत्राचे आयोजन केले होते. उद्योग सल्लागार नरेंद्र माटे यांनी चर्चासत्रात उपस्थितांना मार्गदर्शन केले.

यावेळी माटे म्हणाले, 'भारतीय उद्योगांना प्रोत्साहन देण्यासाठी केंद्र आणि राज्य सरकार विविध प्रकारे मदत करते. धोरण निश्चित करून त्यानुसार अर्थसंकल्प तयार केले जातात. उद्योजकांनी सरकारच्या अर्थसंकल्पांचा अभ्यास करणे गरजेचे आहे. सरकारने कोणत्या क्षेत्रांमध्ये गुंतवणूक वाढवली आहे, याचा अभ्यास करून त्या क्षेत्रातील उत्पादनांच्या निर्मितीवर अधिक भर द्यावा. सध्याच्या घडीला काजू उत्पादक, टेक्स्टाईल मशिनरी, सिरॅमिक उत्पादने, स्टील व ब्रास मेटल, इलेक्ट्रीक वाहने, अपारंपरिक उर्जा उत्पादने, खेळांचे साहित्य, संरक्षण क्षेत्रातील उत्पादनांना लाभ उठवण्याची संधी आहे. मेट्रो प्रकल्पांना लागणारी विविध अवजारे, वनग्रीड पॉवर, वनग्रीड वॉटर, वन ग्रीड गॅस प्रकल्प, इस्त्रोला लागणारी उपकरणे, ग्रामीण आणि शहरी भागातील बांधकामांसाठी लागणारे साहित्य, रस्तेबांधणी, पर्यटन सुविधांमध्ये अधिक संधी आहेत.'

आर्थिक मंदीच्या काळात उद्योजकांनी कोणती दक्षता घ्यावी, याबद्दलही त्यांनी मार्गदर्शन केले. ते म्हणाले, 'जुन्या उत्पादनांबरोबरच नव्या गरजा ओळखून उत्पादने आणि सेवा वाढवाव्यात. विक्रीसोबत नफा वाढावा, तसेच खर्चावरही नियंत्रण हवे. अडचणीच्या काळात चार-पाच उद्योजकांनी एकत्र येऊन कलेक्टिव्ह प्रोडक्शन आणि कलेक्टिव्ह मार्केटिंगच्या तंत्रांचा वापर करावा. कोल्हापुरात तयार होणाऱ्या यंत्रसामग्रींचे आवश्यक पार्ट्सही कोल्हापुरातच तयार व्हावेत, यातून स्थानिक उद्योगांचे काम वाढेल. सध्याचे उद्योग बंद न करता विविध संधींचा अभ्यास करून उद्योग वाढवावा.'

कोल्हापूर इंजिनीअरिंग असोसिएशनचे अध्यक्ष अतुल आरवाडे यांनी माटे यांचे स्वागत व प्रास्ताविक केले. सचिव प्रदीप व्हरांबळे यांनी सूत्रसंचालन व आभार मानले. यावेळी कमलाकांत कुलकर्णी, प्रसन्न तेरदाळकर, रामप्रताप झंवर, उमेश महाजनी, अविनाश शिरगावकर, श्यामसुंदर देशिंगकर, जयंत जिरगे, आदी उपस्थित होते.

असोसिएशन तयार करणार पोर्टल

कोल्हापुरातील उद्योगांसाठी आवश्यक असणारी सर्व माहिती एकाच ठिकाणी मिळावी यासाठी कोल्हापूर इंजिनीअरिंग असोसिएशन पोर्टल तयार करणार आहे. या पोर्टलवर उत्पादनांच्या माहितीसह अन्य पूरक माहितीही असेल. उद्योगांशी संबंधित सेवापुरवठादार, विक्रेते, खरेदीदार, आदी माहिती या पोर्टलवर मिळेल, अशी माहिती अध्यक्ष आरवाडे यांनी दिली.

म. टा. प्रतिनिधी, कोल्हापूर

भाजप नेते देवेंद्र फडणवीस आणि राष्ट्रवादी काँग्रेसचे नेते अजित पवार यांनी अनुक्रमे मुख्यमंत्री, उपमुख्यमंत्रीपदाची शपथ घेतल्यानंतर राज्यात सरकार स्थापन झाल्याचे वृत्त पसरताच सर्वच राजकीय पक्षांना धक्का बसला. भाजपने आनंदोत्सव साजरा केला तर राष्ट्रवादी काँग्रेस, काँग्रेस आणि शिवसेनेने महाविकास आघाडीचीच सत्ता स्थापन होईल, असा विश्वास व्यक्त केला आहे. जिल्ह्यातील राजकीय पक्षाच्या प्रमुखांच्या आणि अभ्यासकांच्या प्रतिक्रिया अशा.

महाराष्ट्राचे व्यापक हित लक्षात घेत भाजपा व अजित पवार यांनी घेतलेला निर्णय योग्य आहे. संपूर्ण महाराष्ट्र त्यांच्या पाठीशी राहील. या सरकारमुळे महराष्ट्रातील विकास कामे व शेतकरी वर्गाला मोठा दिलासा मिळणार आहे.

- धनंजय महाडिक, प्रदेश उपाध्यक्ष भाजप

मुख्यमंत्री फडणवीस आणि उपमुख्यमंत्री पवार यांचा शपथविधी झाल्यावर पहिल्यांदा धक्का बसला. पण त्यानंतर काँग्रेस राष्ट्रवादी आघाडी सावध झाली असून शिवसेनेसह महाविकास आघाडीची राज्यात सत्ता येईल. त्यासाठी तिन्ही पक्षांची मूठ घट्ट झाली आहे.

- आमदार सतेज पाटील, जिल्हाध्यक्ष काँग्रेस

अजित पवार यांनी उपमुख्यमंत्रीपदाची शपथ घेतल्याचे समजल्यावर वाईट वाटले. पण, माझी निष्ठा शरद पवारांवर आहे. जिल्ह्यातील राष्ट्रवादीचे सर्व नेते, पदाधिकारी शरद पवारांच्या पाठीशी आहेत. राष्ट्रवादी काँग्रेस परत एकत्र झाली असून महाविकास आघाडीची सत्ता स्थापन होईल.

- आमदार हसन मुश्रीफ

अजित पवारांनी उपमुख्यमंत्रीपदाची शपथ घेतली असली तरी राष्ट्रवादीचे आमदार परतले आहेत. त्यामुळे राज्यात महाविकास आघाडीची सत्ता स्थापन होईल. काँग्रेसचे सर्व आमदार पक्षाशी एकनिष्ठ आहेत.

- आमदार पी. एन. पाटील, काँग्रेस

सत्ताधारी, विरोधकांची

सभागृहात लागणार कसोटी

राज्यपालांनी घाईगडबडीने सरकार स्थापन केले आहे. पण, विधानसभेत भाजपला बलाबल सिद्ध करावे लागणार आहे. राष्ट्रवादीचे नेते, उपमुख्यमंत्री अजित पवार यांच्याकडे असलेले आमदार आणि अपक्ष आमदारांच्या मदतीने सरकार स्थापन करण्याचा भाजपचा प्रयत्न आहे. सकाळी राष्ट्रवादीमध्ये फूट पडल्याचे दिसत होते. मात्र, सायंकाळनंतर अजित पवारांच्या सोबतचे आमदार पुन्हा स्वगृही परतले आहेत. ३० नोव्हेंबरला भाजपला बहुमत सिद्ध करायला लागेल. पण शरद पवारांनी भाजपचे बहुमत सिद्ध होऊ नये यासाठी चंग बांधल्याचे दिसते. राष्ट्रवादीत फूट पडल्यानंतर नवीन गट स्थापन करण्यासाठी दोन तृतीयांश सदस्यांची गरज आहे. संख्याबळानुसार या पक्षाचे ३६ आमदार फुटायला हवेत. पण सध्या तसे दिसत नाही. पक्षाविरोधात राष्ट्रवादीच्या आमदारांनी भूमिका घेतली तर त्यांचे पद रद्द होऊ शकते. नवीन आलेले आमदार पक्षविरोधी भूमिका घेणार नाहीत. सभागृहात सत्ताधारी आणि विरोधकांची कसोटी लागणार आहे. २८ तारखेपासून हंगामी अध्यक्षांची निवड होऊन आमदारांचा शपथविधी होईल. त्यानंतर अध्यक्षपदासाठी गुप्त पद्धतीने निवड होईल. यात ज्या पक्षाचा उमेदवार निवडून येईल, त्या पक्षाची सत्ता येईल. त्यामुळे आज दिवसभर ज्या घटना घडल्या आहेत, त्याचे पडसाद ३० नोव्हेंबर रोजी विधानसभेत दिसून येईल.

- डॉ. अशोक चौसाळकर, राजकीय विश्लेषक

म. टा. प्रतिनिधी, कोल्हापूर

'त्वचा रोग आजारामध्ये 'टिनिया'चा फैलावर मोठ्याप्रमाणात होत आहे. स्टेरॉइडचा वापर करुन तयार केलेल्या क्रिम बाजारात सहजरित्या उपलब्ध होत असल्याने जंतू संसर्गांचे प्रमाण वाढत आहे. अशा घातक क्रिमचा वापर करण्यापासून रुग्णांना प्रवृत्त करण्यासाठी जनजागृतीबरोबर सामुदायीक प्रयत्नांची आवश्यकता आहे' असे मत आयएडीव्हीएलचे राष्ट्रीय अध्यक्ष डॉ. किरण गोडसे यांनी व्यक्त केले. हॉटेल सयाजी येथे आयोजित महाराष्ट्र राज्य त्वचारोग तज्ज्ञांच्या 'क्युटीकॉन २०१९' परिषदेच्या उद्घाटनप्रसंगी बोलत होते. अध्यक्षस्थानी राज्य संघटनेचे अध्यक्ष डॉ. शरद मुतालिक होते.

डॉ. गोडसे म्हणाले, 'बाजारात एकीकडे घातक द्रव्यांतून तयार केलेल्या क्रीमचा वापर मोठ्या प्रमाणात केला जात आहे. त्याचे गंभीर परिणाम काळानुरुप समोर येतात. त्वचा रोग असलेल्या रुग्णांकडे पाहण्याचा दृष्टिकोन फारसा चांगला नसताना बाजारातील नव्या औषधांमुळे त्यामध्ये अधिक भर पडत आहे. त्वचा रोगाचे समूळ उच्चाटन करण्यासाठी सामुदायिक प्रयत्नांची आवश्यकता आहे. एमडी, टीडीव्ही, डीव्हीबी अशी पदवी असणारे रुग्णांवर उपचार करतात. पण गेल्या काही वर्षात अशा प्रकराची कोणतीही पदवी प्राप्त नसलेले त्वचा रोगावर मार्गदर्शन करुन औषधोपचार करतात. अपुऱ्या ज्ञानावर दिलेल्या औषधांमुळे रुग्णांना गंभीर परिणामाना सामोरे जावे लागते. अशा लोकांना अटकाव करण्यासाठी संघटनेच्या माध्यमातून अटकाव करण्याची आवश्यकता आहे' असे डॉ. गोडसे यांनी सांगितले.

तत्पूर्वी दिवसभरात चर्चा, व्याख्याने व परिसंवाद विविध सभागृहात पार पडली. त्यामध्ये ७०० त्वचारोग तज्ज्ञांनी सहभाग घेतला. सोरियॉसिस, वांग, चामखिळ, शिशू वर्गाचे त्वचाविकार, लेसर, कॉस्मटॉलॉजी, त्वचेचे कॅन्सर, त्वचेवरील शस्रक्रिया विषयावर व्याख्याने झाली. डॉ. विक्रांत सावजी, डॉ. भूषण मडके, डॉ. यशवंत तावडे, डॉ. धनश्री भिडे, डॉ. सोमेश गुप्ता, डॉ. संजीव औरंगाबादकर, डॉ. अतुल कुलकर्णी, डॉ. चित्रा नायक, डॉ. धनंजय चव्हाण, डॉ. उदय खोपकर यांनी विविध विषयावर व्याख्याने दिली. रविवारी (ता. २४) परिषदेची सांगता होणार आहे.

फोटो अर्जुन (फोटो ओळी - महाराष्ट्र राज्य त्वचारोग तज्ज्ञांच्या 'क्युटीकॉन २०१९' परिषदेच्या उद्घाटनप्रसंगी बोलताना राष्ट्रीय अध्यक्ष डॉ. किरण गोडसे. व्यासपीठावर डॉ. रश्मीकांत शहा, शरद मुतालिक, शर्मिला पाटील, रणजीत रानडे, विनयश्री मेने आदी.)

म. टा. प्रतिनिधी, कोल्हापूर

वेळ सकाळी सव्वा आठची. 'शिवसेना पक्षप्रमुख उद्धव ठाकरे मुख्यमंत्री होणार, दोन्ही काँग्रेसचा सत्तेत सहभाग' या कालच्या घडामोडींविषयी चर्चा असताना सोशल मीडिया आणि वृत्तवाहिन्यांवर देवेंद्र फडणवीस आणि अजित पवार यांचा अनुक्रमे मुख्यमंत्री, उपमुख्यमंत्रीपदाचा शपथविधी झाल्याच्या बातम्या झळकल्या. आपण जे पाहतोय आणि वाचतोय त्यावर विश्वासही बसेना. या सगळ्या प्रकाराची खातरजमा करण्यासाठी कोणी मित्रांना फोन केले, कोणी घरी टीव्हीसमोर ठिय्या मारला.

बदलत्या राजकीय खेळीमुळे सगळेजण आश्चर्यचकित बनले. महाराष्ट्राच्या राजकारणातील नव्या समीकरणाविषयी चर्चेला उधाण आले. कोण संताप व्यक्त करत होता, तर कोण हा राजकीय खेळखंडोबा म्हणत टिप्पणी करत होते. महाराष्ट्र साखर झोपेत असताना राजभवनात पार पडलेल्या शपथविधीचा नेटकऱ्यांनी यथेच्छ समाचारही घेतला. भाजपविरोधी सगळे पक्ष एकवटत असताना अजित पवारांचा भाजपसोबत जाण्याचा निर्णय अनेकांना आवडला नाही. सोशल मीडियावर अजित पवारांच्या विरोधात पोस्ट व्हायरल झाल्या. व्हॉट्सअॅप, फेसबुकवरुन नागरिकांनी भावना व्यक्त करत अजित पवारांविरोधात संताप व्यक्त केला. 'पुतण्यामुळे काकांची पुन्हा गोची' अशा शब्दांत नागरिकांनी राष्ट्रवादीतील राजकारणावर टिकाटिप्पणी केली.

राज्यातील बदलत्या सत्ता समीकरणावर प्रत्येकजण आपापल्या पद्धतीने तर्क लढवित होते. अजित पवारांना राष्ट्रवादीतील नेत्यांची फूस, त्यांनी पक्षातील ज्येष्ठ नेत्यांना अंधारात ठेवले, भाजपने त्यांना कारवाईची भीती दाखवली अशा अनेक प्रकारच्या चर्चा आणि गप्पांचा फडच रंगला होता. पवार कुटुंबीयांत फूट पडली, अजित पवारांसोबत कोण आमदार भाजपसोबत जाणार यासंबंधी आकडेमोड सुरू केली. दरम्यान दुपारी पत्रकार परिषदेत राष्ट्रवादीचे नेते शरद पवार यांनी अजित पवारांना राष्ट्रवादी काँग्रेसचा पाठिंबा नाही असे जाहीर करताच चर्चेचा नूरही पालटला. शनिवारची सुट्टी राजकीय घडामोडीची चर्चा करण्यातच खर्ची पडली.

सोशल मीडियावर अजित पवार 'लक्ष्य', भाजपची धुलाई

राष्ट्रवादीचे नेते शरद पवार यांनी महाविकास आघाडीचे सरकार स्थापन करण्यात पुढाकार घेतला. शिवसेना व काँग्रेसचे नेते मंडळीसोबत शुक्रवारी बैठक झाली होती. मुख्यमंत्रीपदासाठी शिवसेना पक्षप्रमुख उद्धव ठाकरे यांच्या नावाविषयी सहमती झाल्याचेही पवार यांनी सांगितले होते. मात्र भाजप आणि अजित पवार यांनी एकत्र येऊन शनिवारी जी नवी समीकरणे जुळविली त्याविषयी सोशल मीडियावर भाजप आणि अजित पवारांचा समाचार घेणाऱ्या पोस्ट व्हायरल झाल्या. 'पळून जाऊन राजभवनात लग्न केले, महाराष्ट्राच्या पुरोगामी राजकारणाला काळीमा फासला' अशा जळजळीत प्रतिक्रिया उमटल्या. भाजपला उद्देशून 'एका रात्रीत लेटर पाठवले, एका रात्रीत राष्ट्रपतींना रिपोर्ट पाठविला. एका रात्रीत राष्ट्रपती राजवट उठवली, दिवस उगवल्या उगवल्या शपथविधी. एवढी तत्परता शेतकऱ्यांना मदत करायला, विमे पंचनामा करताना का दाखविली नाही' अशा पोस्ट फिरत होत्या. नेटकऱ्यांनी शिवसेना आणि दोन्ही काँग्रेसच्या नेत्यांची फिरकीही घेतली.

लोकशाही काळिमा फासणारा निर्णय भाजपने घेतला. हुकूमशाहीकडे वाटचाल करणारीच ही घटना आहे. सर्व नियम , कायदे गुंडाळून ठेवताना रात्रीच्या अंधारात भाजपने जे काही केले, ते राज्यातील जनतेला कदापि मान्य होणार नाही.

- मधुकर रामाणे, माजी नगरसेवक

कोल्हापूर : विधापरिषदेच्या पुणे पदवीधर व शिक्षक मतदारसंघाची प्रारुप मतदार यादी शनिवारी (ता. २३) प्रसिद्ध करण्यात आली. जिल्हा प्रशासनातर्फे पदवीधर व शिक्षक मतदारसंघाची प्रारुप मतदार यादी पुणे विभागीय आयुक्त कार्यालयाकडे सादर करण्यात आली. जिल्हाधिकारी कार्यालयातील कर्मचारी प्रारुप यादी घेऊन पुण्याला गेले आहेत. पुणे विभागात पदवीधर मतदारसंघासाठी यंदा कोल्हापूर जिल्ह्यातून सर्वाधिक पदवीधर मतदारांची नोंदणी झाली आहे. तब्बल ७५,८२३ नोंदणी अर्ज दाखल झाले आहेत. या अर्जाची छाननी करुन मतदार यादी तयार करण्याचे काम जिल्हा प्रशासनाकडून सुरू होते. शिक्षक मतदारसंघासाठी नोंदणीसाठी १० हजार अर्ज दाखल झाले होते. शिक्षक व पदवीधर मतदारसंघातील प्रारुप मतदार याद्या पुणे विभागीय आयुक्त कार्यालय, जिल्हाधिकारी कार्यालय, जिल्ह्यातील प्रांत व तहसिलदार कार्यालयात पाहण्यासाठी उपलब्ध आहेत. या यादीवर २३ ते ९ डिसेंबर या कालावधीत हरकती नोंदविता येणार आहेत. त्याचवेळी या दोन्ही मतदारसंघासाठी मतदारांना नऊ डिसेंबरपर्यंत नावनोंदणी करता येणार आहे.

कोल्हापूर : शाहूपुरी जिमखाना मैदानावर झालेली तात्यासाहेब पाटणे आंतरमहाविद्यालयीन स्पर्धा नाइट कॉलेजने जिंकली. त्यांनी अंतिम सामन्यात संजय घोडावत कॉलेजचा नऊ विकेट्सनी पराभव केला. जिल्हा क्रिकेट संघटनेने स्पर्धेचे आयोजन केले आहे.

संक्षिप्त धावफलक असा : घोडावत कॉलेज सर्वबाद ११६ धावा. शुभम नांगरे २१, नितेश काळे १७ धावा. रोहित चौगुले चार बळी, साईराज भोसले, विश्वजीत जगताप प्रत्येकी दोन बळी. अशितोष अंबपकर एक बळी. नाइट कॉलेज १६ षटकांत एक बाद ११८ धावा. चेतन नार्वेकर नाबाद ५६, वैभव पाटील ४०, रणजीत निकम नाबाद १८ धावा.

कोल्हापूर : अखिल भारतीय आंतरविद्यापीठ कर्मचारी कुलगुरू चषक टी ट्वेंटी क्रिकेट स्पर्धेत शिवाजी विद्यापीठ आणि पंजाबी विद्यापीठाने प्रतिस्पर्धी संघांवर मात करत पुढील फेरीत प्रवेश केला. शिवाजी विद्यापीठाने गोरखपूर विद्यापीठाचा सहा विकेट्सनी पराभव केला. गोरखपूर विद्यापीठाच्या मनीष श्रीवास्तवने ८६ धावा केल्या. तर शिवाजी विद्यापीठाकडून सागर पवारने ४६, रमेश ढोणुक्षेने ३२ तर राजेश कोळीने २६ धावा केल्या. शिवाजी विद्यापीठाच्या विश्वनाथ वरुटेने हॅटट्रिकसह पाच गडी बाद केले. पंजाबी विद्यापीठाने अजमेरच्या महर्षी दयानंद सरस्वती विद्यापीठावर सात विकेट्सनी विजय मिळवला. दयानंद सरस्वती विद्यापीठाने प्रथम फलंदाजी करत ५८ धावा केल्या. प्रत्युत्तरादाखल पंजाबी विद्यापीठाने तीन गडी गमावून ५९ धावा केल्या.