म. टा. वृत्तसेवा, आजरा 'समाजाच्या उन्नयनासाठी थोर विचारवंतांनी जन्माला घातलेल्या विचारांचे उत्तरदायित्व रक्तातूनच यायला हवे, असे नाही. सर्वसामान्यांच्या वृत्ती, कृती आणि भूमिकेतूनही त्यांचा जन्म होतो. मात्र सध्याच्या स्थितीत अशा सर्वसामान्यांच्या विचारांना दडपून टाकले जात आहे. पण शास्वत मूल्यांचा पुरस्कार करणाऱ्या विचारांची कोणी पायमल्ली करू नये म्हणून त्यांची मशाल पेटती ठेवून वैचारिक जागर घालत राहणे, गरजेचे आहे. लोकशाहीर गव्हाणकरांचा शाहिरी जागर तसाच होता,' असे प्रतिपादन सुप्रसिद्ध सिनेदिग्दर्शक नागराज मंजुळे यांनी आजरा येथे केले. आजरा तालुका द. ना. गव्हाणकर समितीच्यावतीने यंदाचा लोकशाहीर गव्हाणकर स्मृती पुरस्कार सुप्रसिद्ध दिगदर्शक मंजुळे यांना प्रदान करण्यात आला. यावेळी ते बोलत होते. अध्यक्षस्थानी जेष्ठ संपादक संजय आवटे होते. येथील आण्णा-भाऊ सांस्कृतिक सभागृहात पुरस्कार सोहळा संपन्न झाला. आवटे म्हणाले, 'आजच्या भयावह आणि अस्थिरतेच्या युगात सर्वसामान्य माणूसच सत्तेच्या केंद्रस्थानी असून तोच निर्माता आहे. भीतीच्या अंधारात चाचपडणाऱ्यांना आजही तोच प्रकाशवाट दाखवतो आहे. कितीही अंधार झाला तरी हा सर्वसामान्य माणूसच समाजाला ठरतो आणि पुढे नेतो, हे इतिहासानेही सिद्ध केले आहे. सामुदायिक किंवा सामाजिक सौहार्दता हेच भारतीय लोकशाहीचे वेगळेपण आहे. आणि लोकशाहीर गव्हाणकरांनी देखील चळवळ आणि शाहिरी कलेतून त्याचाच जागर घातला हे विसरू नये.' यावेळी मान्यवरांच्या हस्ते मंजुळे यांना गव्हाणकर स्मृतीपुरस्काराने सन्मानित करण्यात आले. मुंकुद देसाई यांनी स्वागत केले. संपत देसाई यांनी प्रास्ताविकात पुरस्कारामगील हेतू स्पष्ट केला. आमदार राजेश पाटील, 'गोकुळ'चे अध्यक्ष रवींद्र आपटे, नाट्यकर्मी संभाजी तांगडे यांनी मनोगते व्यक्त केली. या कार्यक्रमास प्रांताधिकारी डॉ. संपत खिलारी, आजरा तहसिलदार विकास अहिरे, पंचायत समिती सभापती रचना होलम, आजरा कारखान्याचे अध्यक्ष प्रा. सुनील शिंत्रे, प्रा. अर्जुन अबिटकर उपस्थित होते. डॉ. सुधीर येसणे यांनी सूत्रसंचालन केले. जयवंत शिंपी यांनी आभार मानले. फोटो : आजरा येथे नागराज मंजुळे यांना पुरस्कार प्रदान करताना संजय आवटे, रवींद्र आपटे, संपत देसाई, रचना होलम आदी.
मोबाइल अॅप डाउनलोड करा आणि राहा अपडेट
