Satish.ghatage.timesgroup.com Tweet.satishgMT कोल्हापूर विधानसभा रणसंग्राम नुकताच संपला असून पुढील वर्षी २०२० मध्ये जिल्ह्यातील सहकारी संस्थांच्या निवडणुकीचा धुरळा उडणार आहे. एक हजारहून अधिक छोट्यामोठ्या सहकारी संस्थांची निवडणूक पुढच्या वर्षी होणार असून जिल्ह्याचे आर्थिक केंद्र असलेल्या जिल्हा सहकारी दूध उत्पादक संघ (गोकुळ), कोल्हापूर जिल्हा मध्यवर्ती सहकारी बँक (केडीसीसी), राजाराम, शरद, वारणा, कुंभी या सहकारी साखर कारखान्यांच्या निवडणूका होणार आहेत. गोकुळ आणि जिल्हा बँकची निवडणूक मे २०१९ मध्ये होण्याची शक्यता आहे. पुढील वर्षी मे महिन्यात गोकुळ आणि जिल्हा बँकेच्या संचालक मंडळाची मुदत संपणार आहे. गोकुळवर सध्या आमदार पी.एन. पाटील आणि माजी आमदार महादेराव महाडिक यांची सत्ता आहे. लोकसभा, विधानसभा निवडणुकीत महाडिक गटाचा पराभव केल्यानंतर आमदार सतेज पाटील गतवेळच्या निवडणुकीप्रमाणे यंदाही पूर्ण ताकदीने निवडणुकीच्या रिंगणात उतरतील. त्यामुळे गोकुळची निवडणूक अटीतटीची होण्याची शक्यता आहे. जिल्हा बँकेवर आमदार हसन मुश्रीफ यांच्या नेतृत्वाखाली राष्ट्रवादी आणि काँग्रेसची सत्ता आहे. गतवेळी जिल्हा बँकेची निवडणूक बिनविरोध करण्यात मुश्रीफांना यश आले होते. पण यंदा सत्ताधारी संचालकांविरोधात भाजप शिवसेना पूर्ण ताकदीने रिंगणात उतरण्याची शक्यता वर्तवली जात आहे. मे महिन्यात या दोन्ही संस्थांच्या निवडणुका होणार आहेत. शरद सहकारी साखर कारखाना नरंदे आणि डी.वाय. पाटील साखर कारखान्याच्या संचालक मंडळाची मुदत मार्च २०२० मध्ये संपणार आहे. दोन्ही कारखान्यांच्या निवडणुका बिनविरोध होण्याची शक्यता आहे. कसबा बावडा येथील राजाराम साखर कारखान्याची निवडणूक एप्रिलमध्ये होणार असून या निवडणुकीतही गतवेळेप्रमाणे महाडिक आणि पाटील या पारंपरिक गटात लढत होण्याची शक्यता आहे. मे महिन्यात तात्यासो कोरे वारणा कारखान्याची तर डिसेंबर महिन्यात कुंभी कारखान्याची निवडणूक होणार आहे. 'वारणे' त आमदार विनय कोरे आणि 'कुंभी' त माजी आमदार चंद्रदीप नरके यांना विरोधकांकडून आव्हान मिळण्याची शक्यता आहे. गोकुळ, जिल्हा बँक, साखर कारखान्यांबरोबरच कोल्हापूर शेती उत्पन्न बाजार समितीची मुदत ऑगस्ट २०२० ला संपणार आहे. सध्या समितीवर राष्ट्रवादी, जनसुराज्य, काँग्रेस, शेकाप आणि शिवसेनेची सत्ता आहे. विधानसभा निवडणुकीत राजकीय संदर्भ बदलले असल्याने बाजार समितीची निवडणूक चुरशीची होण्याचे संकेत मिळत आहेत. पुढील वर्षी सहकारी आणि नागरी बँका, दूध संघ, संस्था, पंतसंस्थाच्याही निवडणुका होणार आहेत. कोल्हापूर शहरातील राजर्षी शाहू गर्व्हमेंट सर्व्हंटस बँकेची निवडणूक मार्च महिन्यात होणार आहे. तसेच दि अर्बन को ऑपरेटिव्ह बँक, कोल्हापूर महिला बँक, सत्यशोधक बँक, यूथ बँक, श्रीपतराव, गणेश बँक यड्राव, अण्णासाहेब चौगुले अर्बन बँक या नावाजलेल्या संस्थांच्या निवडणुका होणार आहेत. ... कोट 'विधानसभा निवडणुकीची आचारसंहिता संपली असून २०२० मध्ये मुदत संपणाऱ्या संस्थांच्या निवडणुकीचा कार्यक्रम हाती घ्यावा लागणार आहे. कोल्हापूर विभागात सहकारी संस्थांचे मोठे जाळे असून विभागीय निबंधक, जिल्हा उपनिबंधक, साखर सहसंचालक कार्यालय, पदुम,पणन यांच्यामार्फत निवडणुकीचा कार्यक्रम राबवला जाणार आहे. अरुण काकडे, विभागीय निबंधक ... निवडणूक असलेल्या प्रमुख संस्था जिल्हा बँक गोकुळ दूध संघ बाजार समिती ... साखर कारखाने राजाराम, कुंभी, वारणा, शरद. ... सहकारी बँका अर्बन, कोल्हापूर महिला, गव्हर्मेंट सर्व्हंटस्, यूथ, श्रीपतराव, गणेश, सत्यशोधक, अण्णासाहेब चौगुले.
मोबाइल अॅप डाउनलोड करा आणि राहा अपडेट
