कोल्हापूर टाइम्स टीम

शहरातील सर्वच प्रमुख रस्त्यांची अत्यंत दयनीय अवस्था झाल्याने वाहनधारकांचा नित्याचा प्रवास जीवघेणा बनला आहे. एकही रस्ता सुस्थितीत नसल्याने वाहनधारकांची हाडे खिळखिळी होत आहे. वाहने नादुरुस्त होण्याचे प्रमाणही मोठ्या प्रमाणात वाढले आहे. महापालिकेने सोमवारपासून रस्त्यांचे पॅचवर्क सुरू केले. मात्र हे कामही निकृष्ट दर्जाचे असल्याने शहरवासीयांमधून संताप व्यक्त केला जात आहे. पॅचवर्क पूर्ण होण्यास आणखी पंधरा दिवस लागणार असल्याने वाहनधारकांना खड्ड्यापासून मुक्ती मिळण्यासाठी आणखी काही दिवस प्रतीक्षा करावी लागणार आहे.

शहरात राज्य, जिल्हा आणि महापालिकेचे असे ७१४ किलोमीटर रस्त्यांचे जाळे विणले आहे. शहरातंर्गत रस्त्यांची चाळण झालेली असताना शहरातून जाणारे राज्य व जिल्हा मार्गांचीही अत्यंत दयनीय अवस्था झाली आहे. अतिवृष्टी आणि नंतर आलेल्या महापुराचे कारण देत शहरातील सुमारे २९९ किलोमीटरच्या रस्त्यांची दुर्दशा झाली आहे. या रस्त्यांवर खड्डे पडल्याची नोंद महापालिकेच्या दप्तरी आहे. मात्र त्यापेक्षा अधिक रस्त्यांची दुर्दशा झाली आहे.

शहरातील कोणत्याही रस्त्यावरुन प्रवास करायचे म्हटले, तरी एक किलोमीटरचा प्रवासही विनाखड्ड्यांचा करता येत नाही. बिंदू चौक, पापाची तिकटी, गंगावेश, बागल चौक, उमा चित्रमंदिर, संभाजीनगर अशा सर्वच मार्गावरील रस्त्यांची चाळण झाली आहे. नोकरी, व्यवसायानिमित्त अनेक मोटारसायकलवरून अनेकांना प्रवास करावा लागतो. रस्त्यामधील खड्ड्यांमुळे त्यांच्या मणक्याच्या विकारांबरोबर वाहनांमध्ये बिघाड होणाच्या घटनामध्ये दुप्पट ते तिप्पट वाढ झाली आहे. रस्त्यांची झालेल्या दुर्दशेला महापालिका प्रशासन कारणीभूत असल्याने अनेकांनी आपला संताप विविध मार्गांनी व्यक्त केला. शहरवासियांचा रोष वाढत गेल्यानंतर दोन दिवसांपासून पॅचवर्कला सुरुवात झाली. मात्र, सुरू असलेले कामही निकृष्ट झाल्याने किती दिवस पॅचवर्क टिकणार असा प्रश्न उपस्थित केला जाऊ लागला आहे. खराब रस्त्यांची दुरुस्ती करण्यासाठी महापालिकेकडील मनुष्यबळाचा विचार करता आणखी आठ ते १५ दिवसांचा कालावधी लागणार आहे. त्यामुळे किमान शहरवासीयांचा खड्ड्यांतून प्रवास सुरूच राहणार आहे.

खड्डे पडलेल्या रस्त्यांमुळे मोटारसायकल व मोपेडमध्ये बिघाड होण्याचे प्रमाण अधिक वाढले आहे. दुचाकीच्या पुढच्या चाकाचे बेअरिंग व शॉकऑबझर्व्हर निकामी होण्याचे प्रमाण वाढले आहे. बहुतांशी ग्राहक याच तक्रारी घेवून मोटारसायकल दुरुस्तीसाठी आणतात.

- युवराज पाटील, महालक्ष्मी होंडा सर्व्हिसेस

खराब रस्त्यामुळे वाहनधारकांना विशेषत: कंबर आणि मानदुखीचा त्रास अधिक होते. गेल्या काही महिन्यांपासून नोकरी किंवा व्यवसायानिमित्त नियमित प्रवास करणाऱ्या वाहनधारकांमध्ये मणक्याच्या विकारांत दुप्पटीने वाढ झाली आहे. मान व कंबरदुखीचा त्रास कमी करण्यासाठी अशा रुग्णांनी बेल्टचा वापर करणे आवश्यक आहे.

- डॉ. महावीर पाटील, वर्धामान हॉस्पिटल

या मार्गांची झाली चाळण

- बिंदू चौक ते आईसाहेब महाराज पुतळा

- पापाची तिकटी ते गंगावेश

- रंकाळा स्टँड

- बागल चौक ते भास्करराव जाधव पुतळा

- महावीर कॉलेज ते जिल्हाधिकारी कार्यालय

- उद्यमनगर ते गोखले कॉलेज चौक

- सावित्रीबाई फुले हॉस्पिटल चौक

- राजारामपुरी ते उमा चित्रमंदिर

- धैर्यप्रसाद मंगल कार्यालय चौक ते पितळी गणपती

- आदित्य कॉर्नर ते न्यू शाहूपुरी

- सासने ग्राउंड मार्ग

- परिख पूर परिसर

- निवृत्ती चौक ते बाबूजमाल व गांधी मैदान

- खरी कॉर्नर ते गांधी मैदान

कोल्हापूर टाइम्स टीम

शिवाजी विद्यापीठाच्या ५४ व्या दीक्षान्त समारंभातील दुबार प्रमाणपत्र छपाई आणि एका सहीचा घोळ प्रकरण तडीस लावण्याऐवजी त्यावर पडदा टाकण्यात आल्याची चर्चा कॅम्पसमध्ये रंगली आहे. दीड वर्षाचा कालावधी उलटला तरी अंतिम चौकशी अहवाल तयार झाला नाही. प्रशासनातील वरिष्ठ अधिकाऱ्यांभोवती हे प्रकरण फिरत असल्यामुळे चौकशी करण्यापासून ते दोषीवर जबाबदारी निश्चित करण्यापर्यंत सगळ्या पातळीवर चालढकल सुरू आहे. व्यवस्थापन परिषद सदस्यांनी याप्रश्नी साधलेली 'अळीमिळी गुपचिळी' आणि विविध संघटना व कृती समित्यांनी हा प्रश्न अर्ध्यावर सोडल्यामुळे प्रशासन आणि त्यांच्यामध्ये मिलीभगत झाल्याचे विद्यार्थ्यांचे म्हणणे आहे.

या प्रकरणाची चौकशी करण्यासाठी नेमलेल्या व्यवस्थापन परिषद सदस्य व चौकशी समिती प्रमुख डॉ. भारती पाटील, प्राचार्य डॉ. धनाजी कणसे व अमित कुलकर्णी या त्रिसदस्यीय समितीचा पहिला अहवाल वादग्रस्त ठरला. संबंधित अहवाल वरिष्ठांना वाचविणारा आणि कर्मचाऱ्यांना दोषी धरणारा असल्याची टीका संघटनांनी केली होती. समितीने व्यवस्थापन परिषदेला सादर केलेल्या अहवालात परीक्षा मूल्यमापन मंडळाचे तत्कालिन संचालक महेश काकडे यांना पदवी प्रमाणपत्रातील घोळ प्रकरणी जबाबदार धरले. दुसरीकडे विद्यापीठातील मिटिंग विभागाकडील कागदपत्रावरील नोंदीच्या आधारे कुलगुरू देवानंद शिंदे यांच्या आदेशानुसार एका सहीचा निर्णय झाल्याचे आढळते.

मात्र त्रिसदस्यीय समितीने अहवालात त्यासंदर्भात कुठलाही उल्लेख केला नाही. व्यवस्थापन परिषदेच्या २९ एप्रिल ०१९ रोजीच्या या बैठकीत त्रिसदस्यीय समितीच्या अहवालावर चर्चा होऊन समितीला तीन महिन्यात फेर अहवाल सादर करण्याच्या सूचना केल्या होत्या. फेरअहवाल सादर करण्याचा निर्णय होऊन सहा महिन्याचा कालावधी उलटला. समितीने मुदतीत फेरअहवाल सादर करण्याची तसदी घेतली नाही.दरम्यानच्या कालावधीत तत्कालिन परीक्षा संचालक महेश काकडे यांची विद्यापीठातील परीक्षा मूल्यमापन मंडळाच्या संचालकपदाची मुदत संपल्यामुळे ते अन्यत्र रुजू झाले. चौकशी समितीने अजूनही फेरअहवाल दिला नाही. यामुळे दोष निश्चित झाली नाही. विद्यापीठाचे आर्थिक नुकसान व नियम डावलून कामकाज केल्याप्रकरणी दीड वर्षे उलटूनही ठोस निर्णय घेण्यापर्यंत प्रशासन अपयशी ठरले आहे. दरम्यान चौकशी अहवालप्रश्नी चौकशी समितीचे अध्यक्ष डॉ. भारती पाटील यांच्याशी संपर्क असता त्यांनी मिटिंगमध्ये असल्याचे सांगत बोलणे टाळले.

व्यवस्थापन परिषदेची भूमिका अधिकाऱ्यांच्या बाजूची

विद्यापीठाच्या विविध अधिकार मंडळापैकी व्यवस्थापन परिषद ही अतिशय महत्वाची. विद्यापीठाची ध्येय धोरणे आणि महत्वाच्या विषयाला व्यवस्थापन परिषदेची मान्यता महत्वाची असते. पदवी प्रमाणपत्राचा विषय हा विद्यार्थ्यांच्या भवितव्याशी निगडीत आहे. त्यामध्ये घोळ घातला गेला, तरीही व्यवस्थापन परिषदेने हे प्रकरण गांभीर्याने पाहिले नाही. विद्यार्थी हितासाठी या प्रकरणाचा सोक्षमोक्ष लावण्यासाठी कणखर भूमिका घेण्याऐवजी परिषदेतील काही सदस्य हे अधिकाऱ्यांच्या बाजूने निर्णय कसा होईल यासाठी धडपडत आहेत.

अर्ध्यावरील आंदोलनांमुळे विश्वासार्हतेवर प्रश्नचिन्ह

शिक्षक व शिक्षकेत्तर कर्मचाऱ्यांचे प्रतिनिधीत्व करणाऱ्या संघटना, विद्यार्थ्यांचे नाव घेऊन एकत्र आलेल्या समितींनी पदवी प्रमाणपत्रातील घोळ प्रश्नी आंदोलन पुकारले होते. मात्र काही कालावधीतच त्यांचे आंदोलन शमले. प्रश्नाची सोडवणूक होण्याअगोदरच आंदोलन थांबविण्याच्या प्रकारामुळे आंदोलनकर्त्यांच्या विश्वासार्हतेविषयी प्रश्नचिन्ह निर्माण झाले आहेत.

कोल्हापूर : न्यू करवीर अॅटो रिक्षा युनियन व स्वाभिमानी वृत्तपत्र विक्रेता संघटना एजंट असोसिएशनतर्फे समाजातील विविध क्षेत्रात कार्यरत व्यक्तींचा सत्कार करण्यात आला. सामाजिक कार्यकर्ते व उत्तरेश्वर पेठ फुटबॉल संघाचे व्यवस्थापक अविनाश पाटील, पत्रकार प्रमोद व्हणगुत्ते या दोघांचा गौरव झाला. शाल, श्रीफळ व पुष्पगुच्छ असे सत्काराचे स्वरुप होते.

रिक्षा युनियनचे नेते राजेंद्र थोरावडे, कॉम्रेड रघुनाथ कांबळे, वृत्तपत्र विक्रेते संघटनेचे जिल्हाध्यक्ष किरण व्हनगुत्ते यांच्या हस्ते सत्कार झाला. काँग्रेसचे कार्यकर्ते संपतराव पाटील यांनी कार्यक्रमामागील उद्देश सांगितला. याप्रसंगी सुरेश ब्रह्मपुरे, हिंदुराव शेळके, नंदू सुतार, गजानन नाकील, विनायक माजगावकर, गजानन विभुते, दीपक खांडेकर आदी उपस्थित होते.

कोल्हापूर टाइम्स टीम

दिवसभर नोकरी, व्यवसायाचा व्याप सांभाळून केवळ नाटक प्रेमापोटी राज्य नाट्य स्पर्धेतील मंच गाजवण्यासाठी हौशी रंगकर्मींच्या विश्वात सध्या चैतन्य आले आहे. राज्य नाट्य स्पर्धेचा पडदा उघडण्यासाठी अवघा एक आठवडा उरल्याने पडद्यामागील तालमींना वेग आला आहे. स्पर्धेसाठी नेपथ्य, पोषाख यासह इतर साहित्याची जुळवाजुळव करत प्रयोगाचा सरावही अंतिम टप्प्यात आला आहे.

महाराष्ट्र राज्य सांस्कृतिक संचालनालयातर्फे यंदा ५९ वी राज्य नाट्य स्पर्धा १५ नोव्हेंबरपासून सुरू आहे. कोल्हापूर केंद्रात १३ डिसेंबरपर्यंत सुरू राहणाऱ्या स्पर्धेच्या प्राथमिक फेरीत यावर्षी २९ नाट्यप्रयोग सादर होणार आहेत. संगीतसूर्य केशवराव भोसले नाट्यगृहात रंगणाऱ्या या स्पर्धेत कोल्हापूर, सांगलीसह बेळगाव येथूनही संघ सहभागी होणार आहेत.

दरवर्षी नोव्हेंबर महिना सुरू झाला की राज्य नाट्यस्पर्धेचे वेध लागतात. गणेशोत्सवानंतर जाहीर होणाऱ्या स्पर्धेच्या वेळापत्रकाकडे लक्ष लागून राहते. दिवाळी झाली की स्पर्धेचा कार्यक्रम प्रसिद्ध होत असला तरी स्पर्धेत भाग घेण्याची तयारी करणाऱ्या हौशी रंगकर्मी व नाट्यसंस्थांचे काम तीन महिने आधीपासूनच सुरू होते. यामध्ये संहिता, कलाकार, नेपथ्य यांची निवड केली जाते. संवाद वाचनासाठी तालमी रंगतात. स्पर्धा जाहीर झाल्यावर प्रत्यक्ष तालमींना रंग येतो.

सध्या स्पर्धेत सहभागी झालेल्या संघाच्या तालमी रंगू लागल्या आहेत. मुळातच राज्य नाट्य स्पर्धेत भाग घेणारे, अभिनयापासून ते इतर तांत्रिक सहकार्य करणारे रंगकर्मी हौशी आहेत. नोकरी, व्यवसाय सांभाळून ही हौस भागवत आहेत. त्यामुळे तालमींसाठी सायंकाळी सात वाजता सर्वजण एकत्र जमत आहेत. यासाठी काही शाळा व्यवस्थापनाला विनंती करून शाळेचा एखादा वर्ग तालमीसाठी घेतला आहे. तसेच भागातील छोटे सांस्कृतिक हॉल, तरुण मंडळांचे हॉल येथेही तालमी सुरू झाल्या आहेत. स्पर्धेला आठवडाभराचा अवधी राहिल्याने सध्याच्या तालमीत नेपथ्यासाठी वापरल्या जाणाऱ्या साहित्याचाही समावेश झाला आहे. काही संघांनी नाटकाच्या कॉश्च्यूमसह सराव येत्या आठवड्यात करण्याचे नियोजन केले आहे.

कोट

नाटक हौशी रंगभूमीवरचे असो किंवा व्यावसायिक रंगभूमीवरचे असो, तालीम हा कोणत्याही नाटकाचा गाभा आहे. जितकी जास्त तालीम होईल तितके नाटक सहजसुंदर सादर होत असते. नाटकातील व्यक्तिरेखा तालमीच्या निमित्ताने अधिक सहवासात येतात. केवळ संवाद पाठांतर आणि संवाद फेक म्हणजे तालीम नव्हे तर मंचावरील प्रकाशयोजन, आवाजातील चढउतार, शब्दोचाराचे महत्त्व, संवादातून व्यक्त होणाऱ्या भावना यांचीही तालीम होत असते. राज्य नाट्य स्पर्धेचा माहोल या तालमींमुळे अजून जीवंत होत आहे.

- समीर पंडितराव, रंगकर्मी

कोल्हापूर टाइम्स टीम

वर्षभर सलग रोज एक सांस्कृतिक कार्यक्रम सादर करून मनोरंजन क्षेत्रात नवा प्रयोग करणाऱ्या, समाजातील गरजूंच्या मदतनिधीसाठी सांस्कृतिक कार्यक्रम करणाऱ्या कोल्हापूरच्या प्रतीज्ञा नाट्यरंगच्या गौरवार्थ तसेच जागतिक रंगभूमी दिनाचे औचित्य साधून गोवा कला व सांस्कृतिक संचालनालयातर्फे गोमंतकीय कलाकारांनी नाट्यपराग ही नाट्यसंगीताची मैफल रंगवली. या मैफलीतून संकलित झालेला निधी प्रतीज्ञा नाट्यरंगच्या मदतीसाठी देण्यात आला.

यावेळी प्रतीक्षा नाट्यरंगचे संचालक प्रशांत जोशी यांचा गोवा कला व सांस्कृतिक संचलनालयातर्फे सन्मान करण्यात आला. शाहूपुरीतील हॉटेल झोरबाच्या आनंद हॉलमध्ये मंगळवारी सायंकाळी हा कार्यक्रम झाला. या मैफलीत अजय नाईक, नीलेश शिंदे, राजवी नाईक यांनी गायन सादर केले. 'नमन नटवरा' या गीताने मैफलीला प्रारंभ झाला. त्यानंतर 'घेई छंद मकरंद', 'परदेश सजणा', 'छेडून गेले मधुर स्वर', 'जय शंकरा' आदी गीते सादर झाली. 'गर्द सभोवती', 'मुरलीधर श्‍याम', 'सूर सुखकनी तू विमला', 'हे सुरांनो चंद्र व्हा', 'अवघे गरजे पंढरपूर', 'या भवनातील गीत पुराने', 'वद जाऊ कुणाला शरण', 'कैवल्याच्या चांदण्याला' आदी गीतांनी मैफलीला रंगत आणली.

आज रंगणार 'इथे ओशाळला मृत्यू'

गेल्या तीन दिवसांपासून गोवा कला व सांस्कृतिक संचलनालायतर्फे सांस्कृतिक उपक्रमांचे आयोजन केले आहे. या उपक्रमाचा समारोप आज, (ता. ७ नोव्हेंबर) इथे ओशाळला मृत्यू या ऐतिहासिक नाटकाने होणार आहे. संगीतसूर्य केशवराव भोसले नाट्यगृहात रात्री साडेनऊ वाजता होणाऱ्या या नाटकात गोव्याचे सांस्कृतिक मंत्री गोविंद गावडे हे छत्रपती संभाजी महाराजांची भूमिका सादर करणार आहेत.

दोन फोटो

म. टा. प्रतिनिधी, कोल्हापूर

'आयोध्येतील रामजन्मभूमी आणि बाबरी मशिदच्या वादग्रस्त जागेसंदर्भात सर्वोच्च न्यायालयाकडून येत्या पाच सहा दिवसांत निकाल लागेल. निकाल काहीही लागला तरी शहर, जिल्ह्यातील सर्व जातीधर्मातील लोक तो मान्य करतील व शांतता, सुव्यवस्थेचा आदर्श कायम राखतील', असे प्रतिपादन श्रीमंत शाहू महाराज छत्रपती यांनी बुधवारी केले.

ईद-ए-मिलाद सण व रामजन्मभूमी बाबरी मशिद जागेसंदर्भात सर्वोच्च न्यायालयाच्या निकालाच्या पार्श्वभूमीवर सामाजिक शांतता व सुव्यवस्थेसाठी आयोजित बैठकीत ते अध्यक्षस्थानावरून बोलत होते. येथील शाहू स्मारक भवनात जिल्हा प्रशासनातर्फे बैठकीचे आयोजन केले होते.

श्रीमंत शाहू महाराज म्हणाले, ' कोल्हापूरला छत्रपती शिवाजी महाराज, राजर्षी शाहू महाराजांच्या विचारांचा वारसा आहे. पुरोगामी विचार, मानवता, महात्मा गांधीजींच्या अहिंसेच्या विचाराला महत्व देणारा हा जिल्हा आहे. म्हणून जिल्ह्याची वाटचाल आदर्शवादीच राहीली आहे. यामुळे आयोध्येतील रामजन्मभूमीच्या जागेसंदर्भात काहीही निकाल लागला तरी शहरात, जिल्ह्यात अनुचित प्रकार घडणार नाही. सर्वजण न्यायालयाच्या निकालाचा आदर करतील. बहुतांशी लोकांना रोजच्या जगण्याचे प्रश्न भेडसावत आहेत. देशात मंदीचे वातावरण आहे. महापुरात नुकसान झालेल्या सर्वांना भरपाई मिळालेली नाही. याची चिंता सामान्य लोकांना 'त्या' निकालापेक्षा अधिक आहे. तरीही प्रशासनाने सतर्कता म्हणून बैठक बोलावून निकालानंतर शांताता राखण्याचे आवाहन केले आहे. त्यास कोल्हापूरकर चांगला प्रतिसाद देतील. प्रशासन, सरकार अडचणीत येईल, अशी कोणतीही कृती कोल्हापूरकर करणार नाहीत.'

खासदार धैर्यशील माने म्हणाले, 'मशिदीमध्ये गणपती आणि हिंदू गल्लीमध्ये पीर बसवण्याची परंपरा शहर तसेच जिल्ह्यात आहे. मानवतेच्या भूमिकेने वाटचाल करणारा जिल्हा असल्याने आयोध्येचा निकाल काहीही लागला तरी शांततेला बाधा येणार नाही. आता कोणतीही निवडणूक नसल्याने राजकीय पोळी भाजून घेण्यासाठी दंगा घडवण्याचा प्रयत्न कुणी करणार नाही. परिणामी आयोध्या निकालानंतरही कोल्हापूरच्या आदर्श शांततेचे अभिनंदन संसदेत करण्याची संधी मला नक्कीच मिळेल.'

आमदार चंद्रकांत जाधव म्हणाले,' प्रत्येकाने सर्वप्रथम आपल्या आणि कुटुंबाच्या प्रगतीवर लक्ष केंद्रीत केले पाहिजे. जातीधर्माचा विचार सोडून पुढील पिढीच्या भवितव्याचा विचार करणे काळाची गरज आहे. आयोध्या प्रकरणाचा निकाल लागल्यानंतर अफवा पसरण्याची शक्यता आहे. यामुळे त्या दिवशी व्हॉटस् ॲप बंद करावे.'

पश्चिम महाराष्ट्र देवस्थान समितीचे अध्यक्ष महेश जाधव म्हणाले, 'आयोध्या निकालानंतर सोशल मीडियावर बंधने आणावीत. काही मूठभर लोक शांतता बिघडवण्याचा प्रयत्न करीत असल्यास त्यांना लोकप्रतिनिधींनी पाठिशी घालू नये.'

याप्रसंगी जिल्हाधिकारी दौलत देसाई, जिल्हा पोलिसप्रमुख डॉ. अभिनव देशुमख, माजी महापौर आर. के. पोवार, मौलाना इरफान, गणी आजरेकर, निवास साळोखे, उत्तम कांबळे, सलीम अत्तार, शिवाजी व्यास यांची भाषणे झाली. यावेळी महानगरपालिका आयुक्त डॉ. मल्लिनाथ कलशेट्टी, अपर पोलिस अधीक्षक श्रीनिवास घाडगे, प्रांताधिकारी वैभव नावडकर, तहसीलदार शीतल मुळे यांच्यासह विविध पक्ष, संघटनेचे पदाधिकारी, सामाजिक कार्यकर्ते उपस्थित होते. अपर पोलिस अधीक्षक तिरूपती काकडे यांनी आभार मानले.

....

चौकट आहे ....

Maruti.Patil

@timesgroup.com

tweet: @MarutipatilMT

कोल्हापूर

महापालिकेच्या मालकीच्या जेम्सस्टोन व्यापारी संकुलाची मालमत्ता दाखवून कोट्यवधी रुपयांच्या कर्जाची उचल केल्याचा प्रकार समोर आला. महापालिका अधिकाऱ्यांच्या वरदहस्ताने झालेल्या या प्रकरणाची चौकशी करण्यासाठी द्विसदस्यीय चौकशी समिती नेमण्यात आली. पण पाच महिन्यानंतरही चौकशीचा एकही कागद जागेवरुन हललेला नाही. त्यामुळे चौकशी समिती बासनात गुंडाळली का? असा प्रश्न उपस्थित केला जात आहे. चौकशीला विलंब लावून एकप्रकारे भ्रष्टाचाराला अभय देण्याचा प्रयत्न असल्याचा आरोपही केला जात आहे.

विचारे मार्केट येथील रिसनं ५१७/२ 'ई' वॉर्ड येथील ८,९०३.१ चौ. मी. जागेवर बीओटी तत्वावर जेम्सस्टोन व्यापारी संकुल उभा केले. संकुल उभारणीचे काम जयहिंद कॉन्ट्रॅक्टर्स लिमिटेड, डिव्हिजन ऑफ भारत उद्योगने केले. २००६ मध्ये व्यापारी संकुल महापालिकेकडे हस्तांतरित करण्यात आले. त्यामुळे ठेकेदाराचेच सर्व हक्क संपुष्टात आले. २०० भाजी मार्केट गाळ्यांसह २०,६९६ स्क्वेअर फूट पार्किंगची जागाही हस्तांतरित झाली. त्यानंतर महापालिका प्रशासनाच्या ताब्यात गाळे आले. महापालिकेने सर्व गाळे ९९ वर्षांच्या कराराने भाडेकरुंना देण्यात आले.

ठेकेदार कंपनीचे हक्क संपुष्टात आलेले असताना मुंबई येथील करुर वैश्य बँकेच्या राजारामपुरी शाखेकडून ६५ कोटींचे तर सार्वजनिक वापराच्या पार्किंगच्या जागेवर आठ कोटी अशी ७३ कोटी कर्जाची उचल केली. त्यासाठी आवश्यक असणारे 'ना हरकत प्रमाणपत्र' महापालिकेचे तत्कालीन सहायक आयुक्त संतोष जिरगे व इस्टेट ऑफिसर राम काटकर यांनी दिले आहे. त्यामध्ये कोट्यवधी रुपयांचा भ्रष्टाचार झाल्याचा आरोप उपमहापौर भूपाल शेटे यांनी केला होता. तसेच दोन्ही अधिकाऱ्यांवर फौजदारी गुन्हा दाखल करण्याची मागणी केली.

या प्रकरणाची गंभीर दखल घेत आयुक्त डॉ. मल्लिनाथ कलशेट्टी यांनी एक जुलै रोजी अतिरिक्त आयुक्त श्रीधर पाटणकर व मुख्य लेखापाल धनंजय आंधळे यांची द्विसदस्यीय चौकशी समिती नेमली. समितीच्या कामकाजाला सुरुवात होण्यापूर्वीच पाटणकर यांची बदली झाल्यानंतर नूतन अतिरिक्त आयुक्त नितीन देसाई यांचा समितीमध्ये समावेश केला. मात्र गेल्या पाच महिन्यानंतरही चौकशीचे कामकाज तसूभरही हललेले नाही. त्यामुळे चौकशीच्या अहवालावरच आता इतर चौकशींप्रमाणे धूळ साचू लागली आहे. ठेकेदार कंपनीच्या माध्यमातून महापालिकेला आर्थिक फटका बसलेला असताना चौकशी समितीचे कामकाज थांबल्याने एकप्रकारे भ्रष्टाचाराच्या साखळीमध्ये सहभागी असलेल्या अधिकाऱ्यांना अभय दिले जात आहे.

...

कोट

'चौकशी समितीच्या स्थापनेनंतर अधिकाऱ्यांची बदली झाली. नवीन अधिकाऱ्यांची नियुक्ती झाली आहे. नुकतीच आयुक्तांसोबत बैठक झाली असून आठ दिवसांत चौकशीचा अहवाल सादर करु.

धनंजय आंधळे, मुख्य लेखापाल व चौकशी समिती सदस्य

....

'जेम्स स्टोन प्रकरणामध्ये अधिकाऱ्यांचा सहभाग आहे. त्यामुळे महापालिकेचे आर्थिक नुकसान झाले आहे. चौकशीसाठी सातत्याने पाठपुरावा सुरू आहे. हा विषय आता महासभेमध्ये उपस्थित करणार आहे.

भूपाल शेटे, उपमहापौर

युवराज पाटील, कुडित्रे

करवीर तालुक्याचा गाडा हाकणाऱ्या पंचायत समिती कार्यालयाची प्रचंड दुरवस्था झाल्यामुळे तसेच महापुरात मोठे नुकसान झाल्यामुळे दुरुस्तीचा प्रश्न ऐरणीवर आहे. मागणीनंतर जिल्हा परिषदेने १० लाखांचा निधी मंजूर केला असला तरी पंचायत समितीने मात्र ३५ लाखांच्या निधीची मागणी केली आहे. त्यामुळे अपुऱ्या निधीत कार्यालयाची दुरुस्ती कशी करायची, याचा मोठा पेच निर्माण झाला आहे.

ऑगस्टच्या पहिल्या आठवड्यात आलेल्या महापुरामुळे करवीर पंचायत समितीच्या सर्व कार्यालयांत पाणी शिरल्यामुळे कार्यालयाच्या भिंती, फर्निचर, काही कागदपत्रांचे मोठे नुकसान झाले. मोठ्या पावसात कार्यालयाला गळती लागली. साधारण ५० कम्प्युटर व १०० खुर्च्या टेबल, व फर्निचर खराब झाल्याचे सांगण्यात येत आहे. त्यामुळे पंचायत समितीत कार्यरत असलेल्या विविध विभागांचे सोयीनुसार तीन ठिकाणी तात्पुरते स्थलांतर करण्यात आले आहेत. त्यानुसार सध्याच्या मूळ ठिकाणी आवारात ग्रामपंचायत, जिल्हा ग्रामीण विकास यंत्रणा, रोजगार हमी योजना, अर्थ, पशुसंवर्धन, आस्थापना विभाग यांच्यासह सभापती व गटविकास अधिकारी कार्यालये कार्यरत आहेत. तर पिवळा वाडा येथे पाणीपुरवठा, आरोग्य व कृषी विभाग तसेच कागलकर हाऊस येथे बांधकाम विभाग कार्यरत आहेत.

कार्यालयाची अनेक ठिकाणी विभागणी झाल्यामुळे नागरिकांना एकाच कामासाठी अनेक ठिकाणी हेलपाटे मारावे लागत आहेत. तसेच महापुरामुळे, अतिवृष्टीमुळे व परतीच्या पावसाने शेतकऱ्यांचे, पूरग्रस्ताचे मोठ्या प्रमाणात नुकसान झाले आहे. त्यामुळे नुकसानभरपाईच्या कामांना गती मिळत नाही, पंचनाम्याच्या अनेक तक्रारी आहेत, मदत मिळण्यात दिरंगाई होत आहे यास्तव आपली अनेक कामे घेऊन येणाऱ्या नागरिकांचा कामापेक्षा विविध कार्यालयात फेऱ्या मारण्यातच वेळ, पैसा व श्रम वाया जात आहे. या सर्व घटनांची गंभीर दखल घेत सभापती राजेंद्र सूर्यवंशी व सर्व सदस्यांनी कार्यालय दुरुस्तीसाठी ३५ लाखांचा निधी मिळावा यासाठी आग्रह धरला असून सर्व कार्यालये पूर्ववत एकाच ठिकाणी सुरू राहावीत, अशी मागणी केली आहे.

करवीर पंचायत समितीच्या वतीने कार्यालयाच्या दुरुस्तीसाठी जिल्हा परिषदकडे अनेक वेळा मागणी केल्यानंतर दहा लाखांचा निधी मंजूर करण्यात आला आहे. मात्र हा निधी अपुरा पडत असून सुमारे ३५ लाखांचा ज्यादा निधी मिळावा, अशी मागणी पंचायत समिती सभागृहाची आहे. दुरुस्तीसाठी जिल्हाधिकाऱ्यांकडेही मागणी करण्यात आली आहे. दरम्यान नुकतीच पंचायत समिती सदस्यांची याबाबत बैठक झाली. जिल्हा परिषदेचे पाणीपुरवठा विभागाचे मनीष पवार, बांधकाम विभागाचे व्ही. के. पाटील यांच्या उपस्थितीसोबत गटविकास अधिकारी सचिन घाडगे, सभापती राजेंद्र सूर्यवंशी, माजी उपसभापती विजय भोसले यांनी कार्यालयाची पाहणी केली.

\Bकामे रखडली\B

करवीर पंचायत समिती कार्यालयाची दुरुस्तीची कामे लवकर पूर्ण होऊन सर्व कार्यालये एकाच ठिकाणी आणण्याची गरज आहे. याकरिता जिल्हा परिषद प्रशासनाने गंभीरपणे याचा विचार करून हा प्रश्न सोडवण्याची गरज आहे. तरच लोकांची गैरसोय थांबून जनतेच्या आणि पंचायत समितीच्या कामांना गती प्राप्त होणार आहे.

म. टा. वृत्तसेवा, इचलकरंजी

रस्ते विकास प्रकल्पांअंतर्गत शहरात १०७ कोटी ३० लाख रुपये खर्चातून सुरू असलेली कामे गुणवतापुर्ण होण्यासाठी राज्य सरकारच्या प्रकल्प व्यवस्थापन सल्लागार नेमण्याबाबतच्या मार्गदर्शक सूचनांसह इचलकरंजी नगरपरिषदेने केलेल्या काउन्सिल ठरावाचे तंतोतंत पालन करण्यात यावे,' अशी मागणी काँग्रेसचे नगरसेवक शशांक बावचकर यांनी मुख्याधिकारी दीपक पाटील यांच्याकडे निवेदनाद्वारे केली.

सर्व कामे गुणवत्तापुर्ण व दर्जेदार होण्याच्या दृष्टीने प्रकल्प व्यवस्थापन सल्लागार नेमण्याची कार्यवाही न झाल्यास या संदर्भात वरिष्ठांकडे दाद मागणार असल्याचेही बावचकर यांनी निवेदनात म्हटले आहे.

इचलकरंजी शहरातील मुख्य व अंतर्गत रस्ते, फुटपाथ व गटारी प्रकल्पासाठी राज्य शासनाकडून १०७ कोटी ३० लाख रुपयांचे अनुदान प्राप्त झाले आहे. या कामांसाठी प्रकल्प व्यवस्थापन सल्लागार नेमण्याबाबत नगरपरिषदेकडून दुर्लक्ष केले गेल्याने स्थानिक मक्तेदारांकडून कोणतेही काम गुणवत्तापूर्ण होण्याची शक्यता दिसून येत नाही, अशी शंका बावचकर यांनी उपस्थित केली आहे.

या संदर्भात दिलेल्या निवेदनात म्हटले आहे, रस्त्यांच्या कामावर योग्य ते नियंत्रण राहण्यासाठी तसेच कामाचे लाइनआऊट करुन देणे, कामाच्या गुणवत्तेवर देखरेख ठेवणे, रनिंग बिले तयार करणे, काम करत असताना काही तक्रारी आल्यास त्यावर मार्ग काढण्यासह नगरपरिषद, राज्य सरकार व ठेकेदारात योग्य तो संवाद साधून कामे गुणवत्तापुर्ण होण्यासाठी अनुभवी संस्था वा आर्किटेक्टची नेमणूक करण्यासंबंधी २२ जून, २०१९ प्रमाणे या कामाच्या निविदा मागविण्याचा ठराव नगरपालिकेच्या सभेमध्ये करण्यात आला आहे. परंतु, प्रत्यक्षात ही कामे ठरावाची अंमलबजावणी न करताच सुरू करण्यात आल्याचे समजते. नगरपालिकेकडे या कामांवर नियंत्रण ठेवणेसाठी आवश्यक क्षमता असलेले कर्मचारी, अधिकारी उपलब्ध नसल्याने प्रकल्प व्यवस्थापन सल्लागार नेमण्याचे ठरले असताना चार महिन्यांनंतरही अनुभवी संस्था वा आर्किटेक्टकडून निविदा मागवणेत आल्या नाहीत.'

म. टा. प्रतिनिधी, कोल्हापूर

पुणे विभाग पदवीधर आणि शिक्षक आमदार निवडणुकीसाठी बुधवारी मतदार नोंदणीच्या अखेरच्या दिवशी सायंकाळी उशिरापर्यंत अर्ज दाखल करण्यासाठी जिल्हाधिकारी, प्रांत व तहसीलदार कार्यालयात मोठी गर्दी झाली होती. यामुळे अखेरच्या दिवशी किती अर्ज दाखल झाले याची नेमकी आकडेवारी जिल्हा निवडणूक प्रशासनाकडे एकत्र होऊ शकली नाही.

दरम्यान, मंगळवारअखेर 'पदवीधर'साठी २४ हजार २५१ तर 'शिक्षक'साठी ५ हजार ४२८ अर्ज आले आहेत. अर्ज छाननी प्रक्रिया पूर्ण होऊन अंतिम मतदार यादी डिसेंबरमध्ये प्रसिध्द होणार आहेत. त्यानंतर पुरवणी मतदार यादीसाठी जानेवारी ते उमेदवारी अर्ज दाखल करण्याच्या शेवटच्या दिवसापर्यंत मतदार नोंदणीची संधी मिळणार आहे. यामुळे या मतदार नोंदणी प्रक्रियेवेळी वंचित राहिलेल्यांना नाव नोंदणी करता येणार आहे.

पुणे पदवीधर, शिक्षक आमदार मतदारसंघाची निवडणूक जून २०२० मध्ये होत आहे. ३१ ऑक्टोबर २०१६ पूर्वीचे पदवीधर तर सलग तीन वर्षे शिक्षक म्हणून कार्यरत असलेले शिक्षक मतदानासाठी पात्र आहेत. शेवटच्या दिवशीच मोठ्या संख्येने अर्ज आल्यामुळे जिल्हा निवडणूक विभागासह सर्वच महसूल विभागाच्या कार्यालयात दिवसभर मोठी गर्दी राहिली. येथील संपूर्ण यंत्रणा अर्ज स्वीकारण्यातच व्यस्त होती.

...

मतदारांची संख्या वाढली ...

मतदार नोंदणीस पहिल्या टप्प्यात कमी प्रतिसाद होता. यामुळे जिल्हाधिकारी दौलत देसाई यांनी व्यापक प्रसिध्दीचे आदेश दिले. सर्व सरकारी कार्यालयातील अधिकारी, कर्मचाऱ्यांना नाव नोंदणी करणे बंधनकारक केले. त्यानंतर मतदारांची संख्या वाढली.

फाइल फोटो घ्या

म. टा. प्रतिनिधी, कोल्हापूर

राजारामपुरी खाऊ गल्लीतील ५१ पैकी ३२ केबिन अनधिकृत असल्याचे स्पष्ट झाले आहे. अतिक्रमण कारवाईनंतर कागदपत्रे व बायोमेट्रिक कार्डची तपासणी करुन केबिन लावण्यास परवानगी देणार असल्याचे महापालिकेने स्पष्ट केले होते. त्यानंतर दोन दिवसांत केवळ १९ केबिनधारकांनी महापालिकेच्या अतिक्रमण विभागाकडे कागदपत्रे सादर केली आहेत. सर्व कागदपत्रे इस्टेट विभागाकडे तपासणीसाठी पाठवली जाणार आहेत. त्यानंतर पट्टे मारण्याची कामे हाती घेतले जाणार आहेत. दरम्यान, ज्या ठिकाणी केबिन होत्या, ती जागा जनता बझारची असल्याने केबिन लावताना वाद निर्माण होण्याची शक्यता आहे.

राजारापुरी पहिली गल्ली व खाऊ गल्ली येथे महापालिकेकडे प्राप्त असलेल्या नोंदीनुसार १७ अधिकृत केबिनधारकांनी व्यवसाय परवाना घेतला आहे. प्रत्यक्षात अनधिकृतरित्या अनेक केबिन लावण्यात आल्या होत्या. बेकायदेशीर केबिनमुळे महापालिकेला आर्थिक नुकसान सोसावे लागत असतानाच स्थानिक नागरिकांनाही त्याचा त्रास होत होता. खाऊ गल्लीतील अनधिकृत केबिन काडण्याची मागणी सातत्याने केली जात होती. त्यानुसार सोमवारी या परिसरात अतिक्रमण विभागाने कारवाई केली. कारवाईत येथील ५१ केबिन अतिक्रमण विभागाने हटवल्या. कारवाईदरम्यान कागदपत्रे असल्याशिवाय केबिन लावण्यास परवानगी देणार नसल्याचे महापालिका प्रशासनाने स्पष्ट करत त्वरीत कागदपत्रे सादर करण्याची सूचना केली होती.

सूचनेनुसार दोन दिवसांत केवळ १९ केबिनधारकांनी आपली योग्य कागदपत्रे सादर केली आहेत. उर्वरित ३२ केबिनधारकांनी कागदपत्रे सादर केलेली नाहीत. त्यामुळे हे सर्व केबिनधारक फाळकूट दादांच्या आशिर्वादाने व्यवसाय करत असल्याचे सिद्ध झाले आहे. अतिक्रमण विभागाकडे सादर झालेली केबिनधारकांची कागदपत्रे इस्टेट ‌विभागाकडे तपासणीसाठी सादर केली जाणार आहेत. इस्टेटकडून त्याची तपासणी झाल्यानंतर पट्टे मारुन जागा देण्यात येणार आहे.

...

चौकट

जागेवरुन वाद चिघळणार

राजारामपुरी पहिल्या गल्लीतील जनता बझारच्या जागेत अनेक केबिन उभारल्या होत्या. त्यातील काही केबिनना महापालिकेने परवानगी दिली. पण सोमवारी कारवाईनंतर मोकळ्या जागेवर जनता बझार व्यवस्थापनाने कंपाउंड मारण्याचा प्रयत्न केला. त्याला स्थानिक नागरिकांनी विरोध केला. जनता बझारने महापालिकेकडून जागा भाडेपट्टीवर घेतली आहे. यापूर्वी केबिन लावताना जनता बझार व्यवस्थापनाने विरोध केला नाही. पण सद्य:स्थितीत त्यांनी विरोध करण्यास सुरुवात केली आहे. त्यामुळे अधिकृत केबिनधारकांना जागा देताना जनता बझार व महापालिकेमध्ये वाद निर्माण होण्याची शक्यता आहे.

म. टा. वृत्तसेवा, इचलकरंजी

गावभागात डेंगींसदृश आजारामुळे महिलेचा मृत्यू झाल्यानंतर इचलकरंजीतील आरोग्य यंत्रणा खडबडून जागी झाली आहे. साथीचे रोग आटोक्यात आणण्यासाठी नगरपालिकेचे ६०० कर्मचारी, ४० महिला परिचारिका अशी आरोग्य यंत्रणा कार्यरत करण्यात आली आहे. रुग्णांची प्रकृती गंभीर असेल असेल तर कोल्हापुरातील सीपीआर मध्ये स्वतंत्र व्यवस्था करण्यात आली आहे. तर डेंगी सदृश परिस्थितीत रक्त तपासणीसाठी इंदिरा गांधी सामान्य रुग्णालयात स्वतंत्र व्यवस्था करण्यात आली आहे. आठवडाभरात शहरातील ही परिस्थिती आटोक्यात आणण्याचा प्रयत्न प्रशासनाच्यावतीने केला जात असल्याची माहिती प्रांताधिकारी डॉ. विकास खरात यांनी दिली.

प्रांत कार्यालयात प्रांताधिकारी डॉ. विकास खरात यांच्या प्रमुख उपस्थितीत शासकीय व प्रशासकीय अधिकाऱ्यांची बैठक झाली. डेंगीसदृश परिस्थिती हाताळण्यासाठी करावयाचे उपाय व उपचार यंत्रणा यावर विस्तृत चर्चा करण्यात आली. अधिक माहिती देताना प्रांताधिकारी खरात यांनी, डेंगी सदृश परिस्थितीत समाज व रुग्णांच्या भावना दुखावल्या जातील असे वर्तन कोणीही करू नये, अशा सूचना केल्या. तर नगरपालिका प्रशासनाच्या वतीने शहरातील मुख्य चौकात जनजागृती फलक लावण्यात येणार आहेत. तसेच शहरातील विविध सामाजिक संस्था, विविध महाविद्यालयातील राष्ट्रीय सेवा योजना राष्ट्रीय छात्र सेना विद्यार्थी यांच्या माध्यमातून मोठ्या प्रमाणात नागरिकांचे प्रबोधन करण्यात येणार असल्याचे सांगितले.

सीपीआर चे सिव्हिल सर्जन डॉ. विलास देशमुख यांनी, कोल्हापुरातील सीपीआर रुग्णालयात डेंगीवर उपचारासाठी स्वतंत्र कक्ष निर्माण करण्यात आला असून उपचारासाठी महात्मा फुले आरोग्य योजना, मुख्यमंत्री आरोग्य सहायता निधीतून रुग्णांना मदत मिळवून दिली जाणार असल्याचे सांगितले. शहरात उद्भवलेली ही डेंगी सदृश परिस्थिती लवकरात लवकर आटोक्यात येईल, असा विश्‍वास उपस्थित अधिकाऱ्यांनी व्यक्त केला. यावेळी तालुका आरोग्य अधिकारी डॉ. सुहास कोरे, मुख्याधिकारी दीपक पाटील, पालिका आरोग्य अधिकारी डॉ. सुनीलदत्त संगेवार, वैद्यकीय अधीक्षक डॉ. रवी शेटे, डॉ. वैशाली पाटील, डॉ. राजेश पोतदार, डॉ. अनिकेत पोतदार, डॉ. सॅम्युअल भंडारे आदी उपस्थित होते.

दरम्यान, डेंगी सदृश्य परिस्थिती हाताळण्यासाठी शहरातील स्थानिक डॉक्टरांची शुक्रवार (ता. ८) रोजी मेडिकल असोसिएशनच्या सभागृहात एक व्यापक बैठक आयोजित करण्यात आली असल्याचे सांगण्यात आले.

थंडी, तापाचे ४३० रुग्ण

पंचगंगा नदीचा महापूर आणि त्या पाठोपाठ आलेल्या अवकाळी पावसाने झोडपून काढल्यानंतर बदलत्या वातावरणामुळे शहरात साथीचे रोग झपाट्याने फैलावत आहेत. इचलकरंजीला मागील १५ दिवसांपासून डेंगी सदृश तापाने विळखा घट्ट केला आहे. शहरात थंडी तापाचे सुमारे ४३० रुग्ण खासगी व सरकारी रुग्णालयात उपचार घेत आहेत. यामध्ये २८ रुग्ण डेंगी सदृश असल्याचे निष्पन्न झाले आहे. दोन दिवसांपूर्वी गावभागातील एका महिलेचे डेंगीने मृत्यू झाल्यानंतर प्रशासकीय यंत्रणा खडबडून जागी झाली. शहरात साफसफाई सह जनजागृती मोहीम राबवली जात आहे. बदलत्या वातावरणामुळे थंडी, तापाचे रुग्ण मोठ्या प्रमाणात आढळून येत आहेत.

म. टा. प्रतिनिधी, कोल्हापूर

शुक्रवारी (ता. ८) होणाऱ्या महापालिकेच्या सभेत महापौर माधवी गवंडी राजीनामा देणार आहेत. महापौरपदासाठी राष्ट्रवादी काँग्रेसकडून अॅड. सुरमंजिरी लाटकर यांचे नाव निश्चित झाले आहे. ताराराणी आघाडी निवडणुकीत इर्ष्येने उतरणार असल्याने महापौर निवडीत चुरस निर्माण होईल. ताराराणी आघाडीकडून स्मिता माने यांची उमेदवारी जाहीर झाल्यानंतर राजकीय हालचालींना वेग येईल. लाटकर, माने यांच्यातील लढतीला राष्ट्रवादी विरुद्ध ताराराणी आघाडी असे स्वरुप येणार आहे.

काँग्रेस-राष्ट्रवादी आघाडीकडे महापालिकेची सत्ता आहे. डिसेंबर महिन्यापर्यंत महापौरपद राष्ट्रवादी काँग्रेसकडे असेल. या पदासाठी अॅड. लाटकर या एकमेव इच्छुक आहेत. त्यांच्या उमेदवारीला आव्हान देण्यासाठी त्यांचे पारंपरिक विरोधक माने यांना रिंगणात उतरवण्यात येणार आहे. काँग्रेसचे ३०, राष्ट्रवादीचे १४ नगरसेवक असून त्यांना शिवसेनेच्या चार नगरसेवकांचा पाठिंबा नेहमीच मिळाला आहे. विरोधी ताराराणी आघाडीचे १९ व भाजपचे १४ नगरसेवक आहेत. संख्याबळानुसार काँग्रेस-राष्ट्रवादीची सत्ता अबाधित राहील अशी शक्यता आहे. मात्र नुकत्याच झालेल्या विधानसभा निवडणुकीचे पडसाद या निवडीवर पडण्याची शक्यता आहे.

कोल्हापूर उत्तर विधानसभा मतदारसंघातून काँग्रेसचे चंद्रकांत जाधव विजयी झाले. त्यांच्या पत्नी जयश्री जाधव व भाऊ संभाजी जाधव हे भाजपचे नगरसेवक आहेत. महापौर निवडीत दोघांची भूमिका महत्वपूर्ण ठरणार आहे. विधानसभा निवडणुकीमध्ये माजी आमदार अमल महाडिक यांना राष्ट्रवादी काँग्रेसच्या नगरसेविका व महिला बालकल्याण सभापती अनुराधा खेडकर यांच्या कुटुंबीयांनी पाठिंबा दिला. त्यानंतर अवघ्या दोन दिवसात भाजपच्या नगरसेविका अश्विनी बारामते व संतोष गायकवाड यांनी काँग्रेसचे उमेदवार ऋतुराज पाटील यांना पाठिंबा दिला. या फोडाफोडीच्या राजकारणाचेही महापौर निवडीवर पडसाद उमटणार आहेत. निवडीला हजर राहण्याऐवजी गैरहजर ठेवून एकमेकांचा राजकीय हिशोब चुकता करण्याचा प्रयत्न केला जाईल.

कोल्हापूर

आयआरबी कंपनीकडून भूखंड हस्तांतर करताना सभागृहाची पूर्वपरवानगी न घेता म्युन्सिपल फंडाची रक्कम नोंदणी शुल्कासाठी वापरली आहे. सभागृहाची मंजुरी न घेता फंड वापरला असल्यास संबंधित अधिकाऱ्यांकडून वसूल करावा, अशी मागणी आयुक्त डॉ. मल्लिनाथ कलशेट्टी व महापौर माधवी गवंडी यांच्याकडे सामाजिक कार्यकर्ते दिलीप देसाई यांनी निवेदनाद्वारे केली आहे. निवेदनात म्हटले आहे, 'एकात्मिक रस्ते विकास प्रकल्पासाठी आयआरबी कंपनीला टेंबलाईवाडी येथील भूखंड दिला होता. भूखंड ताब्यात घेण्यासाठी महापालिकेने ७१ लाखांचे नोंदणी शुल्क जमा केले. पण शुल्क जमा करताना महापालिकेच्या महासभेची अथवा स्थायी समितीची परवानगी घेतलेली नाही. याद्वारे अधिकाऱ्यांची मनमानी दिसत आहे. कर स्वरुपात जमा झालेली रक्कमेची ही विना परवाना उधळपट्टी असून अशा अधिकाऱ्यांकडून खर्च झालेली रक्कम वसूल करावी.

म. टा. वृत्तसेवा, हातकणंगले

अतिवृष्टी मुळे हातकणंगले तालुक्यातील वारणा व पंचगंगा नदीकाठासह अनेक गावातील ऊस, सोयाबीन, भूईमूग आदी पिकांना मोठ्या प्रमाणात धोका निर्माण होऊन पिकांवर लोकरी मावा, तांबेरा या रोगाच्या प्रादुर्भावाने मोठ्या प्रमाणात नुकसान होणार आहे. महाभयंकर महापूर त्यानंतर अतिवृष्टीमुळे तालुक्यातील प्रमुख पीक असलेल्या उसाच्या उत्पादनात घट होणार असल्याने शेतकरी वर्ग हवालदिल झाला आहे.

सर्वात सधन तालुके म्हणून शिरोळ व हातकणंगले तालुका गणले जातात. वारणा आणि पंचगंगा या दोन्ही नद्या बारमाही वाहत असल्याने पिकांची स्थिती दर्जेदार व चांगली असते. कोठेही दुष्काळ सदृश्य स्थिती असली तरी तालुक्यातील काही गावांना फरक पडत नाही. दरम्यान गेल्या महिन्यांपासून सुरू असलेल्या जोरदार पावसाने वारणा व पंचगंगा नदीला दोनवेळा महापूर आला तसेच वारणा नदीकाठावरील निलेवाडी, पारगाव, चावरे, भेंडवडे, भादोले, खोची, कुंभोज व पंचगंगा नदीकाठावरील रुकडी, माणगाव, रुई, इंगळी, पट्टणकोडोली, हुपरी, रेंदाळ, रांगोळी आदी गावातील शेतजमिनी पाण्याखाली गेल्या होत्या. त्यानंतर मागील आठवड्यात झालेल्या अतिवृष्टीने नदीकाठावरील तसेच माळरानावरील सोयाबीन, भूईमूग, भात आदी पिके पाण्याखाली राहिल्याने कोंब येऊन कुजण्यास सुरुवात झाली आहे. तालुक्यातील प्रमुख पीक असलेल्या ऊस सारख्या पिकांवर लोकरी मावा, तांबेरा या रोगांचा प्रादुर्भावाची शक्यता होऊन उत्पादनात मोठ्या प्रमाणात घट होऊन घातलेला उत्पादन खर्च निघणे अवघड होणार आहे. सोयाबीन, भूईमूग, भात आदी पिकांचे कोंब फुटण्यास येत असताना या अतिवृष्टीने पिकांचे कुजले आहेत. यामुळे अगोदरच आर्थिक संकटात सापडलेल्या शेतकऱ्यांचे कंबरडे मोडणार असून सरकारने याकडे लक्ष देणे गरजेचे बनले आहे.

महापुरानंतर अतिवृष्टीने शेतकरी कोलमडून जाणार असून ऊसासह सोयाबीन, भूईमूग, भात, ताग आदी हातातोंडाशी आलेली पिके या अतिवृष्टीने वाया जाण्याची शक्यता आहे. उत्पादन खर्च देखील निघणे अवघड असल्याने सोसायटी, बँकांची कर्जे फेडणे कठीण जाणार आहे. याकडे सरकारने या अतिवृष्टीत बाधक शेतकऱ्यांना मदत करणे गरजेचे आहे.

-शीतल घोरपडे, हुपरी

म. टा. वृत्तसेवा, गारगोटी

परतीच्या पावसाने भुदरगड तालुक्यातील पिकांचे मोठे नुकसान झाले आहे. भात कापणी हंगामातच पाऊस सुरू झाल्याने हातातोंडाशी आलेली पिके वाया गेली आहेत. अचानक झालेल्या पावसाने बळीराजा मात्र चिंतेत सापडला असून भात पीक कापणी, मळणीच्या सुगीतच झालेल्या पावसाने शेतकऱ्यांचे कंबरडे मोडले आहे. पावसाच्या माऱ्याने भात पिक भुईसपाट होऊन कष्टानं पिकवलेले पीक वाया जाण्याची वेळ आली असून गवताच्या गंज्या भिजल्यामुळे जनावरांच्या चाऱ्याचा प्रश्न गंभीर होणार आहे. तालुक्यातील पिकांच्या नुकसानीचे पंचनामे करण्याची कार्यवाही उद्यापासून (बुधवार) सुरू करण्यात येणार असल्याचे कृषी अधिकाऱ्यांनी सांगितले.

मंगळवारी गारगोटी म्हसवे मार्गे कूर मार्गावरील परिसराची प्रत्यक्ष पाहणी केली असता बहुतांश भागात भाताचे पीक आडवे पडल्याचे निदर्शनास आले. त्यापुढील दारवाड, निळपण परिसरात जनावरांसाठी साठवणूक केलेल्या गवताच्या गंज्यांत पावसाचे पाणी घुसल्याने जनावरांच्या चाऱ्याचीचा प्रश्न निर्माण होणार आहे. त्यातूनही हाताला मिळेत ते घेण्यासाठी शेतकऱ्यांची धावपळ सुरू असल्याचे दिसते. तालुक्यातील ऊस, सोयाबीन, नाचणा, भुईमुगासह अन्य पिकांचेही मोठ्या प्रमाणावर नुकसान झाले आहे.

अतिवृष्टीमुळे बऱ्याच ठिकाणी पिकांना कोंब फुटल्याचे दिसले. अतिवृष्टीतून वाचलेल्या डोंगर भागातील शेतीचे नुकत्याच झालेल्या परतीच्या पावसाने नुकसान केले आहे. अजूनही काही ठिकाणी वाफ्यात साचलेले पाणी आजही असल्याचे दिसते. काढणीला आलेले भात पीक पूर्णतः कोलमडले आहे. यंदा डोंगरी भागातील पिके फुलली होती. पण पावसामुळे शेतकऱ्यांचे मोठे नुकसान झाले आहे. परतीच्या पावसात पिके उद्ध्वस्त झालीच पण जनावरांसाठी ठेवलेल्या गवताच्या गंजीत पाणी घुसल्याने गवतही खराब झाल्याने जनावरांच्या चाऱ्याचा प्रश्न गंभीर झाला आहे. सर्वत्र पिकांच्या नुकसानीचे पंचनामे करण्याची कार्यवाही सुरू झाली असली तरी तालुक्यात मात्र उद्यापासून पंचनामे करण्यात येणार आहेत.

बहुमत असेल तर भाजपने सरकार बनवून दाखवावे: सेना

लोगो : युवामुद्रा

Sachin.patil1@timesgroup.com

Tweet@sachinpMT

कोल्हापूर : नोकरीतील व्यस्त दिनक्रमामुळे सामाजिक कामात सहभागी होता येत नसल्याची तक्रार अनेकजण करतात. मात्र, सुनील दळवी या तरुणाने एसटी महामंडळातील नोकरी सांभाळत सामाजिक कार्यात सहभाग नोंदवला. कोल्हापुरात उद्भवलेल्या पूरपरिस्थितीत केलेल्या मदतकार्याबद्दल माजी राष्ट्रपती प्रतिभाताई पाटील यांच्या हस्ते त्याला नुकतेच पुण्यात पुरस्काराने गौरविण्यात आले. सामाजिक कार्यात योगदान देण्याची इच्छा असलेल्या तरुणाईसाठी सुनीलचे काम प्रेरणादायी आहे.

सुनील हे शेतकरी कुटुंबातील असून त्यांचे मुळगाव राधानगरी तालुक्यातील दुबळेवाडी-वाकीघोल आहे. त्याचे प्राथमिक शिक्षण गावात झाले. माध्यमिक शिक्षणाची गावात सुविधा नसल्याने त्याने कागल तालुक्यातील कसबा सांगाव येथे दहावीपर्यंतचे शिक्षण पूर्ण झाले. त्याने बारावी भवानी मंडपातील विद्यापीठ हायस्कूलमध्ये पूर्ण केली. त्यानंतर पेठवडगावमधून त्याने डीटीएड अभ्यासक्रम पूर्ण केला. शिवाजी विद्यापीठातून कला शाखेत पदव्युत्तर शिक्षण घेतले. लष्करात जाऊन देशसेवा करण्याचे त्याचे स्वप्न होते. मात्र सैनिक भरतीत त्याला यश आले नाही.

ॉएसटी महामंडळात लिपिक पदावर रुजू झाल्यानंतर त्याने सामाजिक कामात हिरीरीने सहभाग घेतला. सुरवातील शहरातील व्हाइट आर्मी संस्थेबरोबर काम सुरू केले. बेवारस मृतदेहांचे दहन करणे, आपत्ती व्यवस्थापन आदी उपक्रमात त्याने सहभाग घेतला. २०१७ मध्ये सुनीलच्या गावी एक दुर्घटना घडली. विजेचा शॉक लागून झालेल्या आपत्तीवेळी मदतीत त्याने पुढाकार घेतला. शिवाजी विद्यापीठ एनसीसी भवनजवळ झालेल्या अपघातात साताऱ्यातील रुपा बलुगडे जखमी झाल्या होत्या. घटनेचे गांभीर्य ओळखून त्याने बलुगडे यांना तातडीने प्राथमिक उपचारासाठी तात्काळ रुग्णालयात पोचवले. पावसाळ्यात चिपळूण येथील तिवरे धरण फुटल्यानंतर मृतदेह बाहेर काढण्याचे कामही त्याने केले आहे. स्वयंसेवक म्हणून आठवडाभर तो तिवरे गावी थांबला होता. तो दरवर्षी करुणालय संस्थेतील एड्सग्रस्त मुलांना कपडे आणि खाऊचे वाटप करतो.

शिवाजी विद्यापीठातील स्पर्धा परीक्षांची तयारी करणाऱ्या तरुणांच्या मदतीने पॅरा ऑलम्पिकमध्ये सहभागी झालेल्या दिव्यांग खेळाडू आरती पाटीलला त्याने आर्थिक मदत मिळवून दिली. पूर परिस्थितीमध्ये आंबेवाडी, चिखली गावातील लोकांना सुरक्षित स्थळी हलवण्यात त्याने योगदान दिल्याबद्दल एस. टी. महामंडळाच्यावतीने त्याचा पुण्यात सत्कार करण्यात आला.

युवकांनी सामाजिक भान ठेवून अपघातस्थळी, आपत्तीवेळी प्रसंगावधान दाखवून मदतीचा हात द्यावा. नोकरी सांभाळत सामाजिक कामात योगदान देता येते. तरुणांनी सामाजिक प्रश्नांवर काम करण्यासाठी पुढे यायला हवे.

- सुनील दळवी, लिपिक, एस. टी. महामंडळ

म. टा. प्रतिनिधी, कोल्हापूर

पुणे विभाग पदवीधर आणि शिक्षक आमदार निवडणूक मतदार नोंदणीत पुणे विभागात कोल्हापूर आघाडीवर राहिले. शेवटच्या दिवसाअखेर 'पदवीधर'चे ७५ हजार ८२३ तर 'शिक्षक'साठी १० हजार ३२४ जणांचे अर्ज दाखल झाले. या अर्जाची छाननी करून २३ नोव्हेंबरला प्रारूप मतदार यादी प्रसिध्द करण्यात येणार आहे. अंतिम मतदार यादी ३० डिसेंबर रोजी प्रसिध्द करण्यात येणार आहे. त्यानंतर १ जानेवारी ते उमेदवारी अर्ज दाखल करण्याच्या शेवटच्या दिवसाअखेर पुरवणी यादीसाठी मतदार नोंदणीची संधी मिळणार आहे.

पुणे पदवीधर, शिक्षक आमदार मतदारसंघाची जून २०२० मध्ये निवडणूक होत आहे. ३१ ऑक्टोबर २०१६ पूर्वीचे पदवीधर आणि सलग तीन वर्षे शिक्षक म्हणून कार्यरत असलेले शिक्षक मतदानासाठी पात्र आहेत. त्यासाठी १ ऑक्टोबरपासून मतदार नोंदणीची प्रक्रिया सुरू झाली. दरम्यान, पदवीधर, शिक्षक मतदार नोंदणी प्रक्रियेला अल्प प्रतिसाद होता. यामुळे सुरूवातीला कमी मतदार नोंदणी झाली. म्हणून जिल्हाधिकारी दौलत देसाई यांनी मुख्याध्यापक, शिक्षकांचे मेळावे आयोजित करण्याचे आदेश दिले. सर्व सरकारी कार्यालयातील अधिकारी, कर्मचाऱ्यांना 'पदवीधर' मतदार नोंदणी सक्ती केली. त्यानंतर चांगला प्रतिसाद मिळू लागला. काँग्रेस, भाजपसह विविध राजकीय पक्षांच्या प्रतिनिधींनीही मतदार नोंदणीची मोहिम राबवली. जिल्ह्यातील सर्व तहसीलदार, गटविकास अधिकाऱ्यांना मतदार नोंदणी अधिकारी पदाची जबाबदारी दिली. त्यामुळे 'पदवीधर'साठी नाव नोंदणीच्या अर्जाचे ओघ वाढले. तुलनेत शिक्षक मतदार नोंदणीला कमी प्रतिसाद मिळाला.

...

जिल्हानिहाय नोंदणी

पुणे विभागात जिल्हानिहाय आलेले पदवीधर आणि कंसात शिक्षकसाठी आलेले अर्ज असे : कोल्हापूर : ७५ हजार ८२३ (१० हजार ५२४), पुणे : ५८ हजार ९१६ (१८ हजार ७२१), सातारा : ३२ हजार ९३९ (५३ हजार), सांगली : ७३ हजार ७८८ (६ हजार ३२३), सोलापूर : ३७ हजार ३९ (१० हजार ९२८).

....

चौकट

'पदवीधर'साठी आलेल्या अर्जांची संख्या

जिल्हाधिकारी कार्यालय :३५०, करवीर प्रांत कार्यालय :५३७२, इचलकरंजी : ६१०३, आजरा : १७८८, गडहिंग्लज : ३९९५, चंदगड :२३६२, करवीर :१०४३१, कागल : ६८६८, राधानगरी :३७९५, हातकणंगले : ७०६१, शिरोळ : ५२७, पन्हाळा : १०२१.

...

कोट

'पदवीधर आणि शिक्षक मतदार नोंदणीला चांगला प्रतिसाद मिळाला. यामुळे पुणे विभागात मतदार नोंदणीत कोल्हापूर जिल्हा आघाडीवर राहिला. अंतिम मतदार यादी प्रसिध्द झाल्यानंतर पुरवणी मतदार यादीसाठी १ जानेवारीपासून पुन्हा मतदार नोंदणीची प्रक्रिया सुरू होणार आहे.

सतीश धुमाळ, उपजिल्हाधिकारी, निवडणूक

...

कोट

'पुणे विभागात पदवीधर मतदार नोंदणीत कोल्हापूर जिल्हा प्रथम क्रमांकावर आहे. मतदार नोंदणीसाठी भाजप आणि मित्रपक्षाने चांगले प्रयत्न केले. त्यास यश मिळाले. या प्रक्रियेत नाव न नोंदवलेल्यांना जानेवारीनंतर पुन्हा संधी मिळणार आहे.

माणिक पाटील - चुयेकर, मतदार नोंदणी समन्वयक