म. टा. प्रतिनिधी, कोल्हापूर मागासवर्गीय आणि मुस्लिम मतदार ही काँग्रेसची पारंपारिक व्होट बँक. या हुकुमी मतदारांसह बहुजन समाजातील विविध घटकांना वंचित बहुजन आघाडीच्या झेंड्याखाली आणण्याचा प्रयत्न अॅड. प्रकाश आंबेडकर यांनी केला आहे. वंचित बहुजन आघाडीने लोकसभा निवडणुकीत मिळवलेली मते आणि विधानसभेसाठी इच्छुकांची संख्या यामुळे प्रस्थापितांना धडकी भरत आहे. 'वंचित'कुणाला तारणार आणि कुणाला पराभवाची चख चाखायला लावणार अशी चर्चा राजकीय वर्तुळात रंगली आहे. वंचितला सक्षम उमेदवार मिळाल्यास युती व दोन्ही काँग्रेस समोर तगडे आव्हान उभे राहू शकते. 'वंचित'ने लोकसभा निवडणुकीत कोल्हापूर आणि हातकणंगले मतदारसंघात मिळून १ लाख ८६ हजार ८५८ मते मिळवली. यामध्ये कोल्हापूर लोकसभा मतदारसंघातील उमेदवार डॉ. अरुणा माळी यांना ६४ हजार ४३९ तर हातकणंगले मतदारसंघात अस्लम सय्यद यांना १लाख २३ हजार ४१९ मते मिळाली आहेत. 'वंचित'ने विधानसभेच्या सर्व जागा लढविण्याची घोषणा केली आहे. यामुळे जिल्ह्यातील दहाही विधानसभा मतदारसंघातील इच्छुकांच्या अपेक्षा उंचावल्या. काँग्रेस, राष्ट्रवादी काँग्रेसमधील मंडळीही वंचितच्या संपर्कात आहेत. वंचित आघाडीचे नेते आंबेडकर यांनी 'काँग्रेसमधील नाराज, बिगर नाराज सगळेच आमच्या संपर्कात आहेत. आणि चर्चेसाठी आमचे दरवाजे खुले आहेत, असे जाहीर करून इतरांना साद घातली आहे. लोकसभा निवडणुकीला हातकणंगले, इचलकरंजी, शिरोळ, करवीर या मतदारसंघातील वंचितला मिळालेली मते लक्षणीय आहेत. विधानसभा निवडणुकीत या मतदारसंघात वंचितकडे तगडा उमेदवार मिळाल्यास, ज्या त्या मतदारसंघातील निकालावर परिणाम होऊ शकतो, अशी स्थिती आहे. अॅड. आंबेडकर यांच्या दौऱ्यावेळी कोल्हापूर, सांगलीतील वेगवेगळ्या पक्षातील मंडळींनी त्यांची भेट घेतल्याने आगामी निवडणुकीत वेगळे चित्र आकाराला येऊ शकते. ऑगस्ट महिन्यात झालेल्या मुलाखतीदरम्यान इचलकरंजी नितीन लायकर, नगरसेवक अब्राहम आवळे, भुदरगड तालुकामधून जीवन पाटील, दयानंद कांबळे, कोल्हापूर दक्षिणमधून प्रा. बी. जी. मांगले, शिरोळमधून समाजकल्याण समितीचे माजी सभापती विलास कांबळे, तर हातकणंगलेत शामराव गायकवाड, डॉ. मिलिंद हिरवे, अॅड. प्रेमकुमार माने, अॅड. इंद्रजित कांबळे यांनी मुलाखती दिल्या होत्या. \Bहातकणंगलेत भाऊगर्दी, उत्तर, दक्षिण, शिरोळमध्येही इच्छुक जास्त \B ऑगस्ट महिन्याच्या पहिल्या आठवड्यात वंचित बहुजन आघाडीतर्फे जिल्ह्यातील दहा विधानसभा मतदारसंघासाठी मुलाखती झाल्या. दहा ठिकाणी मिळून ७२ इच्छुकांनी मुलाखती दिल्या. यामध्ये कोल्हापूर उत्तरमध्ये नऊ, कोल्हापूर दक्षिणमध्ये आठ, चंदगडमध्ये सात, शाहूवाडीत सहा, करवीरमध्ये सात, हातकणंगलेत १४, राधानगरीत तीन, कागलमध्ये सहा आणि शिरोळमध्ये नऊ जणांनी उमेदवारी मागितली आहे. हातकणंगले तालुक्यात सर्वाधिक १४ उमेदवार वंचितच्या तिकिटासाठी प्रयत्नशील आहेत. त्या पाठापोठ कोल्हापूर उत्तर, दक्षिण, शिरोळमध्येही इच्छुकांची संख्या मोठी आहे. जिल्हा परिषद सदस्य, नगरसेवकांनी 'वंचित'कडे उमेदवारीची मागणी केली आहे. दहा विधानसभा मतदारसंघात वंचितला लोकसभेतील मते कोल्हापूर उत्तर: ७१८३ कोल्हापूर दक्षिण: ११,३७३ करवीर: १६,५२२ कागल: ९८३३ राधानगरी: १०,४४४ चंदगड : ७८९६ शाहूवाडी: १३,३१७ हातकणंगले: ४१,२११ इचलकरंजी : १७,२४८ शिरोळ : २०,४४२
मोबाइल अॅप डाउनलोड करा आणि राहा अपडेट
