म. टा. प्रतिनिधी, कोल्हापूर कडकनाथ कोंबडीपालन व्यवसायाचे आमिष दाखवून शेतकऱ्यांची सुमारे चार कोटी रुपयांची फसवणूक करणाऱ्या महारयत अॅग्रो कंपनीची दोन बँक खाती शाहूपुरी पोलिसांनी सील केली. दोन खात्यांवरील सुमारे एक कोटीची रक्कम गोठवली असून, अन्य खात्यांचीही तपासणी सुरू आहे. महारयत अॅग्रो कंपनीने कडकनाथ कोंबडी पालनाचे आमिष दाखवून शेतकऱ्यांची फसवणूक केली आहे. याप्रकरणी कंपनीचे पदाधिकारी सुधीर शंकर मोहिते आणि संदीप सुभाष मोहिते (दोघेही रा. इस्लामपूर, जि. सांगली) यांच्यावर शाहूपुरी पोलिस ठाण्यात फसवणुकीचा गुन्हा दाखल आहे. कराराचे उल्लंघन करून शेतकऱ्यांना तीन कोटी ९४ लाख रुपयांचा गंडा घातल्याने शाहूपुरी पोलिसांकडून या गुन्ह्याचा तपास सुरू आहे. शहरातील स्टेशन रोड येथे मलबार हॉटेलच्या वरच्या मजल्यावर कंपनीचे कार्यालय आहे. पोलिसांनी कार्यालयाची झडती घेतली असून, काही महत्त्वाची कागदपत्रे जप्त केली आहेत. यात शेकडो शेतकऱ्यांशी केलेली करारपत्रेही आहेत. कंपनीची इस्लामपूर येथे खासगी बँकांमध्ये खाती आहेत. यापैकी एका बँकेतील दोन खात्यांची पोलिसांनी तपासणी केली. एका खात्यावरील ३० लाख ९५ हजार ५०० रुपये, तर दुसऱ्या खात्यावरील ६३ लाख ५७ हजार रुपयांची रक्कम शिल्लक आहे. पोलिसांनी बँक अधिकाऱ्यांशी चर्चा करून दोन्ही खाती गोठवली. कंपनीची अन्य बँकांमध्येही खाती असल्याची माहिती पोलिसांना मिळाली आहे. संशयित सर्व बँक खात्यांची चौकशी केली जाणार आहे. खाती गोठवल्याने कंपनीला रक्कम काढता येणार नाही, अशी माहिती पोलिस निरीक्षक संजय मोरे यांनी दिली. दरम्यान, इस्लामपुरातही महारयत अॅग्रो कंपनीवर फसवणुकीचा गुन्हा दाखल झाल्याने इस्लामपूर पोलिसांकडूनही तपास सुरू आहे. कंपनीच्या संस्थांपकांपैकी एका संशयितास पोलिसांनी अटक केली असून, त्याची चौकशी सुरू आहे. .. ..
मोबाइल अॅप डाउनलोड करा आणि राहा अपडेट