म. टा. प्रतिनिधी, कोल्हापूर

शहरातील संवेदनशील भागातील गणेश आगमन मिरवणूक शांततेत पार पडण्यासाठी सोमवारी (ता. २) सकाळी आठ ते मिरवणूक संपेपर्यंत सशस्त्र बंदोबस्त तैनात केला जाणार आहे. शहरात ३०० पोलिसांचा फौजफाटा शहरावर लक्ष ठेवून असणार आहे.

श्रींचे आगमन सोमवारी (ता. २) होत आहे. गणेशमूर्तींची प्रतिष्ठापणा करण्यासाठी नागरिकांसह मंडळांच्या कार्यकर्त्यांची शहरात मोठी गर्दी होते. त्यासाठी पोलिसांनी वाहतुकीचे नियोजन आणि बंदोबस्ताची आखणी केली आहे. कायदा व सुव्यवस्था सुरळीत राहून नागरिकांच्या सुरक्षेसाठी शहरात सशस्त्र बंदोबस्त तैनात केला आहे. राजारामपुरीत गणेश आगमनादिवशी बहुतांश तरुण मंडळे उच्चध्वनी यंत्रणा लावतात. त्यामुळे या मार्गावरील मिरवणूक रेंगाळून गोंधळ निर्माण होतो. या वर्षीची गणेशोत्सव उच्चध्वनी यंत्रणा मुक्त साजरा करण्यासाठी काटेकोर नियोजन केले आहे.

असा आहे बंदोबस्त

पोलिस उपअधीक्षक : १

निरीक्षक : ५

उपनिरीक्षक : १२

पोलिस : १५०

होमगार्ड : ९०

जलद कृती दल : २ तुकड्या

राज्य राखीव दल : २ तुकड्या

म. टा. प्रतिनिधी, कोल्हापूर

विधान परिषदेतील आमदारांना विधानसभेची उमेदवारी न देण्याचा निर्णय काँग्रेसच्या छाननी समितीने घेतला आहे. त्यामुळे दक्षिण विधानसभा मतदारसंघातून आमदार सतेज पाटील यांचे पुतणे ऋतुराज पाटील यांना तयारीला लागण्याच्या सूचना पक्ष नेतृत्वाने दिल्या आहेत. ऋतुराज यांनी उत्तरमधून लढण्याची तयारी केली आहे. त्यामुळे कोणत्या मतदारसंघातून विधानसभा निवडणुकीला सामोरे जायचे यासाठी दोन्ही मतदारसंघातील कार्यकर्त्यांना मेळावा गुरुवारी (ता. ५) घेण्यात येणार आहे.

रमणमळा येथील वॉटर पार्कमधील मेळाव्यात कार्यकर्त्यांची मते अजमावल्यानंतर आमदार पाटील आपली भूमिका स्पष्ट करणार आहेत. मात्र आमदार पाटील हे कोणत्याही परिस्थितीत 'दक्षिण'मधूनच महाडिक यांच्याविरोधात उमेदवार देतील, अशी चर्चा राजकीय वर्तुळात सुरू आहे. आमदार पाटील यांचा विधान परिषदेचा कार्यकाळ अद्याप अडीच वर्षाचा शिल्लक असला, तरी यापूर्वीच दक्षिणमधून निवडणूक लढवण्याचा निर्णय जाहीर केला आहे. त्यांच्यासोबत त्याचे पुतणे ऋतुराज 'उत्तर' मतदारसंघातून लढणार हे जवळपास निश्चित होते. तशी तयारीही त्यांनी गेल्या तीन ते चार वर्षांपासून सुरू केली आहे. आमदार पाटील यांच्या निर्णयामुळे दक्षिणमध्ये पुन्हा पाटील विरुद्ध महाडिक अशी लढत होणार होती. पण राज्यातील काँग्रेस व राष्ट्रवादीमधील अनेक विद्यमान व माजी आमदार भाजप-सेनेच्या तंबूत दाखल होत आहेत. त्या पार्श्वभूमीवर विधान परिषदेतील संख्याबळही घटण्याची शक्यता निर्माण झाली आहे.

विधानसभेप्रमाणे विधानपरिषदेतील संख्याबळ कायम ठेवण्यासाठी काँग्रेसच्या वरिष्ठ स्तरावरील छाननी समिती विधान परिषदेतील आमदारांना विधानसभेची उमेदवारी न देण्याबाबत गांभीर्याने विचार करत आहे. उमेदवारी न मिळाल्यास आमदार पाटील यांच्यासमोर पेच निर्माण होणार आहे. त्यामुळेच पक्षाचे प्रदेशाध्यक्ष बाळासाहेब थोरात यांनी ऋतुराज यांना दक्षिण मतदारसंघातून तयारी करण्याची सूचना शुक्रवारी झालेल्या कार्यक्रमात केली. प्रदेशाध्यक्षांच्या या सूचनेमुळे आमदार पाटील यांच्यासह त्यांच्या गटामध्ये प्रचंड अस्वस्थता निर्माण झाली आहे. मात्र काही झाले तरी दक्षिण मतदारसंघातूनच महाडिक गटाविरोधात आमदार पाटील उमेदवार उभा करतील, अशी जोरदार चर्चा आहे.

समितीचा निर्णय झालाच तर कोणता निर्णय घ्यायचा याबाबत आमदार पाटील यांच्या उत्तर व दक्षिणमधील काँग्रेस कार्यकर्त्यांचा मेळावा घेण्यात येणार आहे. गुरुवारी (ता. ५) सकाळी ११ वाजता वॉटर पार्क येथे होणाऱ्या मेळाव्यासाठी कार्यकर्त्यांना निरोपही पाठवण्यात आले आहेत. मेळाव्यात कार्यकर्त्यांची मते अजमावल्यानंतर आमदार पाटील आपली भूमिका स्पष्ट करणार आहेत. आमदार पाटील व महाडिक गटातील राजकीय ईर्ष्या पाहता काही झाले तरी, दक्षिणमधूनच उमेदवार उभा करायचा असा निर्धार कार्यकर्ते करत आहेत. शनिवारी याबाबत अनेक प्रमुख कार्यकर्त्यांनी आमदार पाटील यांची भेट घेऊन आपली भूमिका मांडली असल्याचे समजते.

लॉटरी कोणाला लागणार?

आमदार पाटील यांनी ऋतुराज यांना दक्षिण मधूनच निवडणूक रिंगणात उतरवण्याचा निर्णय घेतल्यास उत्तर मतदारसंघातील काँग्रेस उमेदवारीची लॉटरी अचानकपणे कोणालाही लागण्याची शक्यता आहे. काँग्रेसचे माजी आमदार मालोजीराजे किंवा त्यांच्या पत्नी मधुरिमाराजे, दौलत देसाई, माजी स्थायी समिती सभापती सचिन चव्हाण यांची नावे अचानकपणे चर्चेत आली आहेत. राष्ट्रवादी काँग्रेसकडून उमेदवारीची मागणी केलेले ज्येष्ठ नेते व्ही. बी. पाटील यांनीही शुक्रवारी काँग्रेसच्या प्रमुख नेत्यांची भेट घेतल्याची चर्चा आहे. त्यामुळे ऐनवेळी त्यांचेही नाव पुढे येण्याची शक्यता आहे.

कोल्हापूर: महापालिकेच्या आरोग्य विभागाकडून सलग दुसऱ्या दिवसी प्लास्टिक विक्री करणाऱ्या विक्रेत्यांवर दंडात्मक कारवाई केली. लक्ष्मीपुरी परिसरातील ओम प्लास्टिक, आरती एजन्सी व पाटील एजन्सींना प्रत्येकी पाच हजार दंड पथकाने केला. शहरात होणारे प्लास्टिक उत्पादन आणि विक्रीला पायबंद घालण्याचा निर्धार महापालिका प्रशासनाने केला आहे. त्यानुसार सलग दोन दिवस दंडात्मक कारवाई करण्यात आली. मुख्य आरोग्य निरीक्षक जयवंत पोवार, आरोग्य निरीक्षक राहुल राजगोळकर व शिवाजी शिंदे यांनी कारवाई केली.

शालिनी कणबरकर

कोल्हापूर : शिवाजी विद्यापीठाचे माजी कुलगुरू दिवंगत डॉ. रा. कृ. कणबरकर यांच्या पत्नी शालिनी कणबरकर (वय ९४) यांचे निधन झाले. प्राचार्य कणबरकर यांच्या सामाजिक, शैक्षणिक वाटचालीत त्यांनी मोलाची साथ दिली. त्यांच्या पश्चात मुलगा डॉ. अरुण, स्नुषा सुवर्णा, तीन कन्या डॉ. अंजली साबळे, मेघा वागळे व डॉ. नमिता खोत असा परिवार आहे. रक्षाविसर्जन बुधवारी (ता.४) सकाळी नऊ वाजता पंचगंगा स्मशानभूमी येथे आहे.

००००

म. टा. प्रतिनिधी, कोल्हापूर

केंद्रीय पुरातत्व खात्याच्या अखत्यारित असलेला ब्रह्मपुरी टेकडीमुळे शिवाजी पुलाचे काम अनेक वर्षे रखडले. पण याच टेकडीवर बेकायदा रविवारी उत्खनन करण्यात आले. शिवाजी पुलाकडून पंचगंगा घाटाकडे येणाऱ्या रस्त्यालगत जेसीबीच्या सहाय्याने सपाटीकरण करण्यात आले. येथील अनेक घरांबाबत कोर्टात सुनावणी सुरू असताना टेकडीवर करण्यात आलेल्या उत्खननामुळे परिसरात उलटसुलट चर्चा होती.

प्राचीन टेकडी म्हणून येथील ब्रह्मपुरी टेकडीचे ओळख आहे. केंद्रीय पुरातत्व खात्याच्या परवानगीशिवाय येथे कोणत्याही प्रकारची खोदाई काम करता येत नाही. या जटील अटीमुळे नवीन शिवाजी पुलाचे काम अनेक वर्षे रखडले होते. मात्र येथे अनेक नागरिक वास्तव्यास असून महापालिकेच्यावतीने त्यांना पायाभूत सुविधा दिल्या आहेत. टेकडीची मालकी सध्या एका खासगी ट्रस्टकडे असली, तरी येथे उत्खनन करण्यास मनाई आहे. येथे उभारण्यात आलेल्या घरांचा प्रश्न न्यायालयीन प्रक्रियेत अडकला आहे. पण रविवारी येथे काहीजणांनी सपाटीकरणाच्या नावाखाली उत्खनन केले.

सकाळी जेसीबी मशिनच्या मदतीने ५० बाय १०० मीटर टेकडीवरील जागा सपाट करण्यात आली. यावेळी येथे बघ्याची गर्दी जमली. मात्र टेकडीवरील जागा कोणी सपाट केली याची माहिती नव्हती. मात्र एका राष्ट्रीय पक्षाच्या कार्यकर्त्याच्या फॅब्रिकेशनच्या व्यवसायासाठी जमीन सपाट करत असल्याची चर्चा आहे. याबाबत महापालिका प्रशासनाशी संपर्क साधला असता, ब्रह्मपुरी टेकडी केंद्रीय पुरातत्व खात्याकडे असल्याने त्याच्याशी काही संबंध नसल्याचे सांगितले.

म. टा. प्रतिनिधी, कोल्हापूर

कोल्हापूर आणि सांगली जिल्ह्यांतील सहकारी आणि खासगी दूध संघांच्या प्रतिनिधींच्या बैठकीनंतर गायीच्या दूध दरात वाढ होणार आहे. ही बैठक येत्या बुधवारी किंवा गुरुवारी होण्याची शक्यता आहे. पुणे जिल्ह्यातील दूध संघांनी गायीच्या दुधाला प्रतिलिटर २८ रुपये दर जाहीर केला असून, रविवार (ता.१) पासून अंमलबजावणी सुरू झाली आहे. सध्या गोकुळ, वारण दूध संघ गायीच्या दुधाला प्रतिलिटर २५ रुपये दर दूध उत्पादकांना देतात.

पुणे जिल्ह्यात दूध उत्पादक संघांची शनिवारी (ता. ३१) बैठक झाली. यावेळी गायीच्या दुधाचा दर प्रतिलिटर २८ रुपये करण्याचा निर्णय घेतला. तसेच एक सप्टेंबरपासून दरवाढ लागू करण्यात आली. या बैठकीला गोकुळ, वारणासह कोल्हापूर आणि सांगली जिल्ह्यांतील प्रतिनिधी उपस्थित नव्हते. पुण्यातील बैठकीच्या निर्णयावर चर्चा करण्यासाठी येत्या बुधवारी किंवा गुरुवारी बैठक होणार आहे. सध्या दुधाचा तुटवडा जाणवत असून दूध पावडरला चांगला दर मिळत आहे. त्यामुळे दूध खरेदीदरात वाढ करण्याची स्पर्धा सुरू आहे. सोलापूर जिल्हा दूध संघाने ११ ऑगस्टला दूध दरात वाढ केली आहे.

जिल्ह्यातील दूध दरवाढीबाबत चर्चा करण्यासाठी संघांच्या प्रतिनिधींमध्ये पुढील आठवड्यात बैठक आयोजित केली जाणार आहे. दरवाढीची अंमलबजावणी कोणत्या तारखेपासून जाहीर करायची याबाबत निर्णय होण्याची शक्यता आहे. सध्या लोणी आणि दूध पावडरचे दर वाढले असून, गायीच्या दुधाला मागणी आहे, पण डिसेंबर महिन्यात अतिरिक्त दूध उत्पादन झाल्यावर खासगी दूध संस्था प्रतिलिटर १७ रुपयांना गायीचे दूध खरेदी करतात. पण सहकारी संस्थांना राज्य सरकारने ठरविलेल्या हमीभावाप्रमाणेच प्रतिलिटर २५ रुपयांनी दूध खरेदी करावे लागते. या सर्व बाबींवर चर्चा करण्यासाठी प्रतिनिधींची बैठक होणार आहे.

००००००

पुणे जिल्ह्यात खासगी दूध संघांनी गायीच्या दुधात दरवाढ केली आहे. कोल्हापूर आणि सांगली जिल्ह्यांतील दूध संघांचे प्रतिनिधी बैठकीला अनुपस्थित होते. दरवाढीबाबत निर्णय घेण्यासाठी पुढील आठवड्यात सर्व संघांच्या प्रतिनिधींची बैठक घेण्यात येणार आहे.

रवींद्र आपटे, अध्यक्ष, गोकुळ

०००००

कोल्हापूर: महापूर ओसरल्यानंतर घ्यावयाची काळजीसाठी नागरिकांचे चित्ररथाद्वारे आरोग्य शिक्षण देण्यात येणार आहे. जिल्हाधिकारी कार्यालय व जिल्हा परिषदेच्या आरोग्य विभागामार्फत चित्ररथ तयार केला आहे. शिरोळ, हातकणंगले व करवीर तालुक्यातील १२१ गावांमध्ये चित्ररथाचे आयोजन केले आहे.

या चित्ररथांवर डेंगी, हिवताप, अतिसार, स्वाइन फ्ल्यू या आजारांचा प्रतिबंध व उपचाराबाबतची माहिती चित्रस्वरुपात आकर्षक पद्धतीने दिली आहे. तसेच पाणी शुद्धीकरण, पाणी साठवण, मेडिक्लोरचा वापर याविषयी प्रबोधन करण्यात येणार आहे. पशुसंवर्धन विभागाची गोठा व्यवस्थापन, जनावरांचे खाद्य, स्वच्छतेविषयक माहितीचा समावेश आहे. साथरोग प्रतिबंधात्मक उपाययोजनांची माहिती, पाणी शुद्धीकरणसंबंधी ऑडिओ क्लीप तयार केली आहे. जिल्हा आरोग्य अधिकारी योगेश साळे यांनी सामाजिक वर्तनात संवादाद्वारे बदल घडविण्यासाठी आरोग्य शिक्षण महत्त्वाचे असल्याचे नमूद केले. जिल्हा परिषदेच्या अध्यक्षा शौमिका महाडिक यांच्या हस्ते चित्ररथाचे उद्घाटन झाले. याप्रसंगी उपाध्यक्ष सर्जेराव पाटील, उपमुख्य कार्यकारी अधिकारी प्रियदर्शिनी मोरे, जिल्हा माता बाल संगोपन अधिकारी डॉ. फारुख देसाई, जिल्हा हिवताप अधिकारी डॉ. विनोद मोरे आदी उपस्थित होते.

कोल्हापूर: देवस्थान व्यवस्थापन समिती, पश्चिम महाराष्ट्रतर्फे पूरबाधित गावातील शाळा तसेच मंदिराच्या जिर्णोद्धारासाठी भरीव स्वरुपात मदत करण्याचा निर्णय समितीच्या बैठकीत घेण्यात आला. समितीचे अध्यक्ष महेश जाधव यांच्या अध्यक्षतेखाली बैठक झाली. या बैठकीत कसबा बावडा येथील सेवा रुग्णालय व महापालिकेच्या मालकीचे शुक्रवार पेठेतील पंचगंगा हॉस्पिटलसाठी आवश्यक वैद्यकीय यंत्रसामुग्री खरेदी करण्यासाठी ३० लाख रुपयांचे अर्थसहाय्य करण्याचे ठरले. समितीवर नव्याने सदस्य म्हणून नियुक्त झालेल्या राजेंद्र नारायण जाधव यांचे पुष्पगुच्छ देऊन अभिनंदन करण्यात आले.

यशवंतनगर नवी खडकी येरवडा पुणे येथील नवज्योत मित्र मंडळतर्फे पूरबाधित लोकांसाठी शेकडो गणेशमूर्ती देवस्थान समितीकडे दिल्या आहेत. मूर्ती प्रतिष्ठापणेसाठी कसबा बावडा भगवा चौक, उत्तरेश्वर पेठ वाघाची तालीम मंडळ, पंचगंगा तालीम शुक्रवार पेठ आणि लक्ष्मीपुरीतील रिलायन्स मॉलच्या समोर संपर्क साधावा असे आवाह देवस्थान व्यवस्थापन समितीने केले आहे.

कोल्हापूर: येथील राजर्षी छत्रपती शाहू कॉलेजमध्ये फिट इंडिया मुव्हमेंट कार्यक्रमाचे आयोजन केले होते. आंतरराष्ट्रीय हॉकीपटू मेजर ध्यानचंद यांच्या जन्मदिवस २९ ऑगस्ट हा राष्ट्रीय क्रीडा दिवस म्हणून साजरा होतो. त्या दिनाचे औचित्य साधून कॉलेजमध्ये फिट इंडिया मुव्हमेंटचा कार्यक्रम झाला. या संकल्पनेुसार कॉलेजमधील २३० विद्यार्थ्यांनी १० हजार पावले चालण्याचे उद्दिष्ट पूर्ण केले. पंतप्रधान नरेंद्र मोदी यांच्या फिट इंडिया मुव्हमेंट उद्घाटन समारंभाचे प्रक्षेपण राष्ट्रीय सेवा योजना व छात्र सेनेच्या विद्यार्थ्यांना दाखविण्यात आले. दरम्यान कॉलेजचे प्राचार्य डॉ. एस. टी. साळुंखे यांच्या हस्ते मेजर ध्यानचंद यांच्या प्रतिमेचे पूजन झाले. कार्यक्रमाचे नियोजन प्रा. जी. एम. लवंगारे, प्रा. डॉ. आर. एन. भेंडिगिरी, प्रा. जी. एन. चौगुले, प्रा. ए. एस. टोणे यांनी केले.

आउटगोइंग सुरू झाल्याने पवारांचा तिळपापड

चंद्रकांत पाटील यांचा हल्लाबोल

म. टा. वृत्तसेवा, सोलापूर

'शरद पवार यांच्या जिवाभावाची आणि जवळची माणसं त्यांना सोडून जात असल्यानेच शरद पवारांचा तिळपापड झाला आहे. आपल्या पक्षातील आमदार-खासदार भाजप-शिवसेनेत जात असल्यामुळे शरद पवार यांचा त्रागा झाला. त्यामुळेच ते पत्रकारांवर चिडले. उदयनराजे भोसले, जयकुमार गोरे, शिवेंद्रराजे भोसले, धनंजय महाडिक काय पोर आहेत का? ही सर्व समजदार माणसं आहेत. आम्ही पोरं पळविणारी टोळी नाही. विरोधकांना नेहमीच जातीच राजकारण दिसते. महाजनादेश यात्रेने विरोधकांची झोप उडाली आहे,' असे प्रतिपादन भारतीय जनता पक्षाचे प्रदेशाध्यक्ष चंद्रकांत पाटील यांनी केले. सोलापुरात आयोजित जाहीर सभेत पाटील बोलत होते.

पाटील म्हणाले, 'सरकारने पाच वर्षांत काय केले, याचा हिशोब देण्यासाठी मुख्यमंत्र्यांनी महाजनादेश यात्रा काढली आहे. आभार मानण्यासाठी, हिशोब देण्यासाठी, सूचना मागण्यासाठी ही यात्रा काढली आहे.'

धनंजय महाडिक, जयकुमार गोरे, राणा जगजितसिंह पाटील भाजपमध्ये

कोल्हापूरचे राष्ट्रवादी काँग्रेसचे माजी खासदार धनंजय महाडिक, सातारा जिल्ह्यातील माण-खटावचे काँग्रेसचे विद्यमान आमदार जयकुमार गोरे, उस्मानाबादचे राष्ट्रवादीचे विद्यमान आमदार राणा जगजितसिंह पाटील यांनी रविवारी महाजनादेश यात्रेच्या दुसऱ्या टप्प्याच्या समारोपानिमित्त आयोजित जाहीर सभेत भारतीय जनता पक्षात प्रवेश केला. भाजपचे अध्यक्ष, केंद्रीय गृहमंत्री अमित शहा, मुख्यमंत्री देवेंद्र फडणवीस, प्रदेशाध्यक्ष, महसूलमंत्री चंद्रकांत पाटील यांनी त्यांचे पक्षात स्वागत केले.

महाजनादेश यात्रेच्या दुसऱ्या टप्प्याचा समारोप रविवारी पार्क मैदानावरील जाहीर सभेने झाला. या यात्रेचे अमित शहा यांनी सोलापुरातील तुळजापूर नाका येथे सायंकाळी साडेसात वाजण्याच्या सुमारास स्वागत केले. तुळजापूर नाका, पुना नाका मार्गे रोड शो करीत यात्रा पार्क मैदान येथे दाखल झाली.

म. टा. प्रतिनिधी, कोल्हापूर

कोल्हापूर जिल्हा सहकारी मध्यवर्ती बँकेतील अनुकंपा तत्वावरील ७० जणांची भरती अंतिम टप्प्यात आली आहे. महापुरामुळे या भरतीला ब्रेक लागला असल्याने निवडणूक आचारसंहितेपूर्वी भरती व्हावी, यासाठी आर-पारची लढाई करण्याबाबत आंदोलकांची मन:स्थिती तयार केली आहे.

नोकरीत असताना कर्मचाऱ्याचा मृत्यू झाला तर त्यांच्या वारसांना अनुकंपा तत्वावर नोकरीत घेण्याचा कायदा आहे. पण, सहकार विभागाने नोकरभरती बंद केल्याने अनुकंपा तत्त्वावरील उमेदवार गेली दहा वर्षे लढा देत आहेत. बँक ऑफ एम्प्लॉइज युनियनसह जिल्हा बँकेतील कामगार संघटनांनी अनुकंपा तत्वावर भरती व्हावी, यासाठी कोर्टात धाव घेतली. कोर्टाने अनुकंपा तत्वावरील उमेदवारांची भरती करावी असा आदेश दिला आहे. जिल्हा बँकेत अतिरिक्त कर्मचारी असल्याने २०१० पासून प्रशासनाकडून नोकर भरतीसाठी चालढकल करण्यात आली.

जिल्हा बँकेने अनुकंपा तत्वावरील भरतीसाठी बँकेचा आकृतीबंद सहकार विभागाला पाठवला आहे. पण सहकार खात्याकडून मोघम उत्तर आलयाने अनुकंपा तत्त्वावरील भरतीस परवानगी करता येत नाही, असे बँक प्रशासनाकडून उत्तर दिले जात आहे. वर्षभर उमेदवारांनी लोकशाही मार्गाने बँक प्रशासनाला निवेदन देऊन भरतीची मागणी केली जात आहे. गेल्या महिन्यात कामगारांनी बँकेच्या दारात बेमुदत साखळी उपोषण सुरू करुन प्रशासनाचे लक्ष वेधले. बँकेचे अध्यक्ष आमदार हसन मुश्रीफ, मुख्य कार्यकारी अधिकारी डॉ. ए. बी. माने, कामगार संघटनेचे अध्यक्ष अतुल दिघे, सरचिटणीस नारायण मिरजकर, आय. बी. मुन्शी, अशोक यादव यांच्या शिष्टमंडळाने मुख्यमंत्री देवेंद्र फडणवीस आणी सहकारमंत्री सुभाष देशमुख यांची भेट घेऊन निवेदन दिले. मुख्यमंत्री आणि सहकार मंत्र्यांनी सहकार खात्याला अनुकंपान्त्त्वावरील भरती करण्याबाबत स्पष्ट सरकारी अध्यादेश काढण्याचा आदेश दिला. सहकार आयुक्तांनी याबाबत आदेश काढला असून तो महापुरामुळे सरकारी दप्तरात रेंगाळला आहे. बँक आणि कामगार संघटनांकडून त्याबाबत पाठपुरावा सुरू आहे.

विधानसभा निवडणुकीची आचारसंहिता १५ ते २० सप्टेंबर दरम्यान लागू होईल. आचारसंहिता सुरू होण्यापूर्वी सहकार खात्याचा अध्यादेश मिळावा, अशी मागणी अनुकंपा तत्त्वावरील उमेदवारांकडून होत आहे. अध्यादेश प्राप्त झाल्यानंतर संचालक मंडळाने नोकर भरतीवर शिक्कामोर्तब करणे महत्वाचे ठरणार आहे. ही प्रक्रिया आचारसंहितेपूर्वी व्हावी, यासाठी युद्धपातळीवर प्रयत्न होण्याची गरज उमेदवारांकडून होत आहे.

अनुकंपा तत्त्वावरील भरतीबाबत मुख्यमंत्री आणि सहकार मंत्री सकारात्मक आहे. बँकेचे अध्यक्ष आणि संचालक मंडळाने सहकार्य केले आहे. सहकार खात्याचा आदेश मिळाल्यानंतर भरती प्रक्रिया सुरू होईल.

- अतुल दिघे, अध्यक्ष, बँक एम्प्लॉइज युनियन

कोल्हापूर टाइम्स टीम

दसरा चौक ते कसबा बावडा मार्गावरील खानविलकर पेट्रोलपंपाजवळ (नागाळा पार्क) सुरू असलेले पाइपलाइन व क्रॉस ड्रेनचे काम पूर्ण होण्यास अद्याप एक महिन्याचा कालावधी लागणार आहे. ऐन पावसाळ्यात सुरू केलेल्या या कामामुळे नागरिक संताप व्यक्त करीत असतानाच कामाला विलंब लागणार असल्याचे स्पष्ट झाल्याने त्यांच्या मन:स्तापामध्ये आणखी भर पडणार आहे. आगामी नवरात्रोत्सवाच्या काळात शियेमार्गे शहरात येणाऱ्या भाविकांना महावीर कॉलेज ते जिल्हाधिकारी कार्यालय मार्गेच शहरात प्रवेश करावा लागेल. परिणामी वाहतूक कोंडीत भरच पडणार आहे.

२०१८ मध्ये महापालिकेच्या पवडी विभागाने याच रस्त्यावर ड्रेनेज लाइनचे क्रॉसड्रेन घेण्यात आले. त्याचवेळी पाइपलाइनचे काम करण्याची आवश्यकता होती. मात्र महापालिकेच्या नियोजनशून्य कारभारामुळे नुसतेच क्रॉसड्रेनचे काम झाले. दसरा चौक ते कसबा बावडा रोडवर नागाळा पार्कात ११० मीटर पाइपलाइन, दोन क्रॉसड्रेन व दोन चेंबर बांधणीसाठी १० जून रोजी काम सुरू करण्यात आले. २९ जुलैपर्यंत हे काम पूर्ण होणार असल्याचे पाणीपुरवठा विभागाने जाहीर केले होते. प्रत्यक्षात तीन महिने झाले तरी अद्याप काम पूर्ण झालेले नाही. काम पूर्ण होण्यासाठी आणखी महिनाभर अवधी असल्याचे महापालिकेचे अधिकारीच सांगत आहेत.

या रस्त्यावर सुमारे ३० फूट खोल पाइपलाइन टाकण्यासाठी रस्त्याची खोदाई केली गेली आहे. त्यामुळे राष्ट्रीय महामार्गावरुन शिये-कसबा बावडा मार्गे येणारी वाहतूक महावीर कॉलेजमार्गे जिल्हाधिकारी कार्यालयामध्ये वळविण्यात आली. केव्हिज पार्क, पाटील वाड्यासमोर अत्यंत अरुंद रस्त्यावर वाहने येत असल्याने येथे सातत्याने वाहतूक कोंडी होत आहे. शिवाय ताण येऊन रस्त्याची प्रचंड दुरावस्था झाली.

एकीकडे वाहनधारकांना वाहतूक कोंडीचा सामना करावा लागत असताना कामातही तांत्रिक अडचणी निर्माण झाल्या आहेत. ११० मीटर पाइपलाइनपैकी ८० मीटरचे काम पूर्ण झाले असून २० मीटरचे काम शिल्लक आहे. यापूर्वी घेतलेल्या क्रॉसड्रेन खालून पाइप टाकावी लागणार आहे. येथे काळी माती असल्याने पावसामुळे खोदाई केलेली माती पुन्हा खाली पडत आहे. त्यामुळे पावसाने उघडिप देईपर्यंत काम थांबवावे लागणार आहे.

सार्वजनिक गणेशोत्सवात विसर्जन मिरवणुकीमध्ये सहभागी होण्यासाठी या मार्गावरुन मोठ्या प्रमाणात गणेशमूर्ती नेल्या जातात. या सर्व गणेशभक्तांना अन्य मार्गाचा अ‌वलंब करावा लागणार आहे. गणेशोत्सवानंतर २९ सप्टेंबरपासून नवरात्रोत्सवाला सुरुवात होणार आहे. या कालावधीत करवीर निवासिनी अंबाबाई दर्शनासाठी भाविक मोठ्या संख्येने येतात. महामार्गावरून अनेक भाविक शिये मार्गे मंदिराकडे येतात. या भाविकांना शहरात प्रवेश करताना प्रचंड त्रासाला सामोरे जावे लागणार आहे.

कोट

पाइपलाइन टाकण्यासाठी खोदाई करताना काळी माती वारंवार पडत आहे. केवळ २० मीटर अंतराचे काम शिल्लक आहे. मात्र पावसाने उघडिप देईपर्यंत काम करणे शक्य नाही. त्यामुळे काम पूर्ण होण्यास महिन्याचा कालावधी लागेल.

- सुरेश कुलकर्णी, जलअभियंता

लोगो : मी सुखकर्ता

Appasaheb.mali@timesgroup.com

Tweet:Appasaheb_MT

कोल्हापूर : ते विद्यार्थी ना त्या शिक्षकांच्या नातेसंबंधातील. ना मित्र परिवरातील कुटुंबीयांतील सदस्य. वास्तविक शाळेत प्रवेश घेतल्यानंतर त्या मुलांचा त्यांचा संबंध आला. गरजू आणि गरीब मुलांतील टँलेंट शोधून कुणी त्यांचे शैक्षणिक पालकत्व स्वीकारलं. तर कुणी वर्षानुवर्षे अशा मुलांची शैक्षणिक वाटचाल सुलभ बनावी, गरीब कुटुंबीयांत शिक्षणाचा प्रचार, प्रसार व्हावा म्हणून त्यांच्या अपरोक्ष आर्थिक हातभार लावतात. सामान्य कुटुंबातील मुलांच्या जीवनात सुखकर्ता ठरलेल्या समाजातील दानशूर व्यक्ती, शिक्षक, प्राध्यापकांची ही प्रातिनिधीक ओळख. आयुष्यभर ज्ञानार्जनाचे कार्य करणाऱ्या शिक्षकांपैकी काहीजण निवृत्तीनंतरही वडिलकीच्या नात्याने सामान्य मुलांचे आधारवड ठरले आहेत.

……………

होस्टेलसह शैक्षणिक खर्चाची जबाबदारी

सामान्य कुटुंबातील हुशार मुलांची बेताच्या परिस्थिमुळे शैक्षणिक कुचंबणा होऊ नये, त्यांच्या शिक्षणात परिस्थिती अडसर बनू नये यासाठी अमेरिकेतील डॉ. सर्जेराव रामराव देशमुख आणि त्यांच्या पत्नी डॉ. प्रतिभा यांनी ट्रस्टची स्थापना करुन मुलांच्या शिक्षणाची जबाबदारी उचलली. देशमुख कुटुंब मूळचे साताऱ्यातील. कामानिमित्त अमेरिकत स्थायिक आहेत. त्यांनी उत्पन्नातील काही वाटा समाजातील हुशार मुलांसाठी खर्च करायचे ठरविले. उजळाईवाडी येथे रविराई कल्चरल एज्युकेशनल सोशल अँड चॅरिटेबल ट्रस्टची स्थापना केली. त्या ठिकाणी मुलांची निवास व भोजन व्यवस्थेसह शैक्षणिक खर्चही संस्था करते. संस्थेत वीस मुले असून त्यांना रोज शाळेत ये-जा करण्यासाठी वाहनाची सोय केली आहे. मुलींच्या शिक्षणाचे पालकत्वही त्यांनी स्वीकारले आहे.

गरीब मुलावर पोटच्या मुलासारखे प्रेम

महापालिकेच्या शाळेतील सहायक शिक्षक सुनील पाटील हे गेली वीस वर्षे शिक्षण क्षेत्रात आहेत. आजरा तालुक्यातील लाटगाव हे त्यांचे मूळ गाव. ज्योतिर्लिंग विद्यामंदिर येथे नोकरी करत असताना शाळेतील अखिलेश सूर्यकांत करोशी या सामान्य कुटुंबातील हुशार मुलाने त्यांचे लक्ष वेधले. करोशी कुटुंबीयांची परिस्थिती हलाखीची. यामुळे त्याच्या शिक्षणात खंड पडू नये म्हणून पाटील यांनी त्याचे शैक्षणिक पालकत्व स्वीकारले आहे. शैक्षणिक खर्चाची जबाबदारी उचलली. स्वत:च्या मुलाबरोबर त्याला शिकवले. खासगी शिकवणीला घातले. सध्या हा मुलगा बारावीत शिकत आहे. नववीपासून तो उजळाईवाडी येथील रविराई ट्रस्टच्या होस्टेलमध्ये आहे. मात्र त्यांची नाळ तुटली नाही. उन्हाळी सुट्टीत, सण समारंभाला घरी आणतात. सुर्यकांतचे शैक्षणिक करिअर घडविण्याचा त्यांचा मानस आहे.

गुरुकुलमधील मुलीचे शैक्षणिक पालकत्व

निवृत्तीनंतचे आयुष्य म्हणजे निवांतपणे जगायचे असा काहींचा समज असतो. व्यंकटराव हायस्कूल अँड ज्युनिअर कॉलेजमधील निवृत्त प्राध्यापक श्रीकांत अडिवरेकर हे गरीब मुलांच्या शैक्षणिक वाटचालीला पूरक काम करत आहेत. २०११ मध्ये ते निवृत्त झाले. तत्पूर्वी १९८९ पासून ते गरीब मुलांना शैक्षणिक मदत, शैक्षणिक साहित्याचे वाटप करण्यास सुरुवात केली. सध्या ते, कणेरी मठाचे स्वामी अदृश्य काडसिद्धेश्वर महाराज यांनी सुरू केलेल्या गुरुकुलामध्ये मराठी, इतिहास विषयाचे अध्यापन करतात. त्यांनी, २०१७ पासून गुरुकुलमधील एका विद्यार्थिनीचे शैक्षणिक पालकत्व स्वीकारले आहे. वर्षाला साधारणपणे वीस ते बावीस हजार रुपये खर्च ते यासाठी करतात. एक मुलगी शिकली तर एक कुटुंब सुधारते. यासाठी मुलींच्या शिक्षणाला चालना दिली आहे. शैक्षणिक पालकत्व स्वीकारल्याचे ते सांगतात.

विद्यार्थ्यांशी जडले आपुलकीचे नाते

शिक्षकी पेशा म्हटली की शालेय वेळेत कामकाज, नित्याचे अध्यापन हे ठरलेले. मात्र त्या पलीकडे जाऊन विद्यार्थ्यांच्या गरजा ओळखून त्यांना शैक्षणिक साहित्याची मदत, त्यांच्या अडचणीची सोडवणूक करत शिक्षिका स्मिता समीर कारेकर यांनी शिक्षक व विद्यार्थ्यांत वेगळे नाते निर्माण केले आहे. महापालिकेच्या शाळेत नोकरी करणाऱ्या कारेकर यांनी अनिकेत परुळेकर या गरीब विद्यार्थ्याचे शैक्षणिक पालकत्वही स्वीकारले आहे. त्याने महापालिकेच्या शाळेतील शिक्षणानंतर माध्यमिक शिक्षणासाठी अन्यत्र प्रवेश घेतला. त्यानंतरही त्या मुलाचा शैक्षणिक खर्च कारेकर करीत आहेत. कारेकर यांनी सदरबाजार, जाधववाडी, जरगनगर, डॉ. सर्वपल्ली राधाकृष्णन विद्यालय, प्रतिभानगर परिसरातील वि. स. खांडेकर विद्यालय अशा विविध ठिकाणी काम करताना हुशार आणि गरीब मुलांना मदतीचा हात दिला आहे.

विद्यार्थ्यांच्या अडचणी दूर करण्यासाठी धावपळ

पैशा अभावी गरीब मुलांचा प्रवेश रखडलाय, मुलींना बस पास काढण्यात अडचणी उद्भवत आहेत. एखाद्या मुलाकडे गणवेश नाही, शैक्षणिक साहित्य घेणे परवडत नाही अशी मुले आढळली की त्यांना मदत करायची. कुणाला वह्या विकत घेऊन द्यायच्या. जमेल त्या पद्धतीने विद्यार्थ्यासाठी धाव घेणाऱ्या शिक्षकात न्यू कॉलेजमधील प्रा. टी. के. सरगर यांचा समावेश होतो. दरवर्षीच ते मुलामुलींना मदत करत आहेत. ग्रामीण भागातील मुलींना अनेकदा बस पास काढण्याची प्रक्रिया माहीत नसते. रोजचा खर्च त्यांना परवडणारा नसतो हे लक्षात घेऊन गेल्या दोन वर्षात त्यांनी जवळपास ४०० हून अधिक मुलींना पास मिळवून देण्यासाठी बस डेपो गाठला. कागदपत्रांची पूर्तता करून दिली. वीटभट्टी कामगारांच्या मुलांना मदत केली. विद्यार्थ्यांच्या अडचणी दूर करण्यासाठी सरगर कार्यरत असतात.

कोल्हापूर टाइम्स टीम

महापुरात खराब झालेल्या अन्नधान्याची पुन्हा विक्री होऊ नये, यासाठी खराब झालेले सुमारे पाच कोटी रुपयांचे अन्नधान्य आणि खाद्यपदार्थ नष्ट करण्यात आले. पुरात बुडालेली औषधेही नष्ट करण्याच्या सूचना अन्न व औषध प्रशासनाने केमिस्ट असोसिएशनला दिल्या आहेत. गणेशोत्सवाच्या पार्श्वभूमीवर मिठाईची तपासणी सुरू झाली आहे. शिरोळ तालुक्यात ३३ ठिकाणी तपासण्या करण्यात आल्या.

महापुरामुळे कोल्हापूर शहरातील सुमारे अडीचशे दुकानांचे नुकसान झाले. दुकानांमधील अन्नधान्य आणि खाद्यपदार्थही खराब झाले. दुग्धजन्य पदार्थ, मिठाई, फरसान, केक, पुरात भिजलेल्या डाळी, पीठ यांची पुन्हा विक्री होऊ नये, यासाठी अन्न व औषध प्रशासन विभागाने दक्षता घेतली आहे. पूर ओसरताच सात पथकांद्वारे पूरबाधित परिसरात विक्रेते, व्यावसायिकांचे प्रबोधन केले जात आहे. पुराने खराब झालेले सर्व खाद्यपदार्थ कुठेही उघड्यावर टाकू नयेत, अशा सूचना विक्रेत्यांना दिल्या आहेत. खराब मालामुळे विषबाधा होऊ नये, यासाठी सुमारे पाच कोटी रुपयांचे अन्नधान्य आणि खाद्यपदार्थ नष्ट करण्यात आले. यात मोठ्या प्रमाणात मिठाई आणि बेकरीतील खाद्यपदार्थांचा समावेश होता. कोल्हापूर शहर, इचलकरंजी, नृसिंहवाडी, शिरोळ येथे खराब माल नष्ट करण्यासाठी विशेष मोहीम राबवण्यात आल्याचे अन्न व औषध प्रशासन अधिकारी मोहन केंबळकर यांनी सांगितले.

पुराच्या पाण्यात बुडालेल्या औषधांचा पुनर्वापरही धोकादायक ठरतो, यामुळे पूरबाधित क्षेत्रातील सर्व मेडिकल व्यावसायिकांना खराब औषधांचा साठा शास्त्रीय दृष्ट्या नष्ट करण्याच्या सूचना दिल्या आहेत. पुरानंतर खाद्यपदार्थ तयार करणाऱ्या व्यावसायिकांवर अन्न व औषध प्रशासनाची विशेष नजर आहे. पुरात खराब झालेल्या मालाचा वापर होऊ नये, यासाठी नियमित तपासण्या सुरू आहेत. शिरोळ तालुक्यात ३३ ठिकाणी तपासण्या केल्या आहेत. तपासणीसाठी घेतलेले पदार्थांचे नमुने प्रयोगशाळेत पाठवले आहेत. दोषी विक्रेते आणि व्यावसायिकांवर कायदेशीर कारवाई केली जाणार आहे.

गणेशोत्सवाच्या पार्श्वभूमीवर मुंबई, गुजरात येथून येणारा खवा, तयार मिठाई यांची तपासणी होणार आहे. मिठाईची छुपी वाहतूक रोखण्यासाठीही पथके तैनात केली आहेत.

मोहन केंबळकर, अन्न व औषध प्रशासन अधिकारी