म. टा. प्रतिनिधी, कोल्हापूर

थकीत पाणीपट्टीच्या वसुलीसाठी नऊ गावांचा पाणी पुरवठा खंडीत करण्याच्या महाराष्ट्र जीवन प्राधिकरणच्या(एमजीपी) इशाऱ्यानंतर संबंधित गावांनी आणखी एका महिनाभराची मुदतवाढ मागितली आहे. यामुळे एक ऑगस्टपासून संबंधित गावांचा पाणी पुरवठा नियमितपणे सुरू राहील, असे जीवन प्राधिकरणच्या अधिकाऱ्यांनी सांगितले. मात्र प्राधिकरणच्या सहा कोटीच्या थकबाकी वसुलीच्या नोटिसीला ग्रामपंचायतीकडून फारसा प्रतिसाद मिळाला नाही. पाच कोटी ९० लाख रुपयांच्या थकबाकीपैकी केवळ २४ लाख रुपये जमा केले आहेत.

पाचगाव, गांधीनगर, वळीवडे, गोकुळ शिरगाव, सरनोबतवाडी, उचगाव, उजळाईवाडी, गडमुडशिंगी आणि कणेरी या गावांची पाणीपट्टी थकीत आहे. एमजीपीने थकीत रकमेच्या वसुलीसाठी २७ जुलैपर्यंत संबंधित गावांना अल्टिमेटम दिला होता. दरम्यान आमदार अमल महाडिक यांनी याप्रकरणी मध्यस्थी केली. विलंब आकार, दैनंदिन पाणी पुरवठ्याचा अहवाल आणि आस्थापना खर्च यासंदर्भात अहवाल सादर करण्याचे ठरले आहे.

नऊ गावांनी प्रति एक हजार लिटरला १५ रुपये या दराने पाणी पुरवठा करावा, अशी एमजीपीकडे मागणी केली आहे. शिवाय ग्रामपंचायतीने या संबंधीचा ठराव करून सरकारकडे द्यायचा आहे. एमजीपीच्या कार्यालयात मंगळवारी सरपंचासोबत झालेल्या बैठकीचा अहवाल वरिष्ठ कार्यालयाला पाठविला आहे. संबंधित गावांचा पाणी पुरवठा खंडीत करण्याबाबत तत्काळ निर्णय घेऊ नये, असे वरिष्ठ कार्यालयाने कळविले आहे. यामुळे नऊ गावांत नियमितपणे पाणी पुरवठा होईल असे अधिकाऱ्यांनी स्पष्ट केले.

म. टा. प्रतिनिधी, कोल्हापूर

जिल्हा परिषदेकडील ६८ प्राथमिक शिक्षकांच्या बदली कारवाई प्रकरणी विभागीय आयुक्त दीपक म्हैसेकर यांच्यासमोर बुधवारी सुनावणी झाली. त्यांच्यासमोर जि.प. प्रशासनातर्फे मुख्य कार्यकारी अधिकारी अमन मित्तल यांनी बाजू मांडली. शिक्षकांतर्फे वकिलांनी युक्तिवाद केला. सुनावणी दरम्यान दोन्ही बाजूचे म्हणणे ऐकून घेतल्यानंतर सोमवारी (ता.५) निकाल दिला जाईल, अशी शक्यता आहे. विभागीय आयुक्तांसमोर प्रशासन व शिक्षक या दोघांनीही लेखी स्वरुपातही म्हणणे मांडले. या सुनावणीप्रसंगी ६८ पैकी बहुतांश शिक्षकही उपस्थित होते.

गेले वर्षभर शिक्षक बदली प्रकरण गाजत आहे. चुकीची माहिती भरून सोयीचे ठिकाण मिळवल्याप्रकरणी सीईओ मित्तल यांनी ११८ शिक्षकांची कायमस्वरुपी एक वेतनवाढ रोखण्याची व बदलीची कारवाई केली होती. सीईओंच्या या कारवाईच्या विरोधात हायकोर्टात याचिका दाखल केली होती. कोर्टाने याप्रश्नी विभागीय आयुक्तांना सुनावणी व निर्णय घेण्याचे आदेश दिले होते.

याबाबत सीईओ मित्तल म्हणाले, 'शिक्षकांनी ऑनलाइन बदली प्रकरणी चुकीची माहिती भरली असल्याच्या तक्रारी होत्या. चुकीची माहिती भरल्यास शिस्तभंगाची कारवाई होऊ शकते यासंबंधी त्यांना माहिती होती. शिक्षण विभागाने रितसर नोटिसा काढून, संबंधित शिक्षकांचे म्हणणे ऐकून घेतल्यानंतर कारवाई केली. प्रशासनाने नियमानुसार कारवाई केली आहे.' याप्रसंगी सामान्य प्रशासन विभागाचे उपमुख्य कार्यकारी अधिकारी रविकांत आडसूळ, प्राथमिक शिक्षण विभागाचे शिक्षणाधिकारी आशा उबाळे उपस्थित होत्या.

शिक्षकांतर्फे वकिलांनी बाजू मांडली. विभागीय आयुक्तांसमोर सुनावणी आणि निकालही दिला जाईल म्हणून बहुसंख्य शिक्षक पुण्याला गेले होते. सुनावणी दरम्यान ते पूर्णवेळ थांबून होते. त्यांच्यातर्फे म्हणणे मांडताना वकिलांनी, 'बदलीप्रकरणी प्रशासनाची कारवाई चुकीची आहे. ऑनलाइन बदलीसंदर्भातील माहिती शिक्षकांनी नव्हे तर मुख्याध्यापकांनी भरली आहे. यामध्ये शिक्षकांचा काही दोष नाही. आम्ही निर्दोष आहोत'अशी बाजू मांडली.

खोटी माहिती अन् बदनामी

सुनावणी दरम्यान शिक्षकांतर्फे म्हणणे सादर केले आहे. चुकीची माहिती भरली म्हणून आमच्यावर केलेली कारवाई योग्य नाही. खोटी माहिती भरणारे शिक्षक म्हणून शिक्का मारला जात आहे. यामुळे आमची बदनामी होत आहे. प्रशासनाकडून कारवाईच्या नावाखाली सातत्याने हे प्रकरण सामोरे आणले जाते, त्यामुळे आमची बदनामी होत असल्याचे म्हणणे शिक्षकातर्फे मांडण्यात आले. दरम्यान शिक्षक बदली प्रकरणी आपल्या बाजूने निकाल लागेल म्हणून अनेक शिक्षक बदलीच्या ठिकाणी रुजू झाले नाहीत.

कोल्हापूर: जिल्हा परिषदेच्या प्राथमिक शाळेत शिक्षकांची संख्या अपुरी असताना जिल्ह्यातील विविध ठिकाणच्या मिळून तब्बल ११२० वर्ग खोल्या मोडळकीस आल्या आहेत. वर्ग खोल्या खराब झाल्यामुळे विद्यार्थ्यांना पाणी गळतीला सामोरे जावे लागत आहे. शिक्षण विभागाकडील माहितीनुसार ३८० वर्ग खोल्या या धोकादायक स्थितीत आहेत. शिक्षण विभागाने असा खोल्या निर्लेखन करण्याचा प्रस्ताव तयार केला आहे. मात्र ४४ खोल्या वगळता अन्य प्रस्ताव तांत्रिक प्रक्रियेत अडकले आहेत.

महाबॅँकेच्या इमारतीचा स्लॅब कोसळला;

एका ग्राहकाचा मृत्यू, २३ जण जखमी

म. टा. वृत्तसेवा, पंढरपूर

करमाळा येथील महाराष्ट्र बॅँकेच्या इमारतीचा स्लॅब कोसळून झालेल्या दुर्घटनेत एका बॅँक ग्राहकाचा मृत्यू झाला असून, २३ जण जखमी झाले आहेत. ही घटना बुधवारी सकाळी घडली. या दुर्घटनेस जबाबदार असणाऱ्यांवर कडक कारवाईची ग्वाही पालकमंत्री विजय देशमुख यांनी जखमींच्या नातेवाईकांना दिली आहे. दरम्यान, या दुर्घटने प्रकरणी बँकेचे व्यवस्थापकांनी इमारतीच्या मालकाविरुद्ध पोलिसांत तक्रार दिली आहे.

तीन मजली इमारतीच्या तळमजल्यावर बँक, पहिल्या मजल्यावर वरद हॉस्पिटल आहे. बुधवारी सकाळी नेहमीप्रमाणे बॅँकेचे कामकाज सकाळी अकरा वाजता सुरू झाले आणि अचानक बॅँकेचा स्लॅब कोसळला. स्लॅबसह पहिल्या मजल्यावरील हॉस्पिटलमधील रुग्ण बॅँकेचे कर्मचारी आणि ग्राहकांवर कोसळले. या घटनेत बँकेतील कर्मचारी आणि ग्राहक स्लॅबखाली दबले गेले. दुर्दैवाने स्लॅब पडल्याने बॅँकेत प्रवेश करायचा दरवाजा बंद झाला. घटनेची माहिती मिळताच परिसरातील नागरिकांनी बॅँकेकडे धाव घेतली. तत्काळ जेसीबी आणून बॅँकेचा दरवाजा मोकळा केला. त्या नंतर जखमींना बाहेर काढण्यासाठी स्लॅब हटविण्यास सुरुवात झाली. तोपर्यंत नगरपालिका अधिकारी, तहसीलदार व पोलिस प्रशासन घटनास्थळी पोहोचले. जवळपास तीन तासांच्या प्रयत्नानंतर ढिगाऱ्याखाली अडकलेल्या २३ जणांना बाहेर काढून उपचारासाठी करमाळा उपजिल्हा रुग्णालयात पाठविण्यात आले.

या दुर्घटनेत एका महाविद्यालयाचे पैसे भरण्यासाठी आलेले लिपिक प्रशांत बागल यांचा मृत्यू झाला. गंभीर जखमी झालेली एक महिला आणि एका मुलाला उपचारासाठी तातडीने अकलूजकडे हलविले. इतर दहा जखमींना पुढील उपचारासाठी सोलापूरला पाठविण्यात आले. या घटनेची माहिती मिळताच पालकमंत्री विजय देशमुख यांनी तातडीने घटनास्थळी भेट दिली. या घटनेस जबाबदार असणाऱ्यांवर तातडीने कडक कारवाई करण्याची ग्वाही त्यांनी दिली.

जागेच्या भाड्यासाठी लोकांच्या जीवांशी खेळ

दुर्घटनाग्रस्त इमारत तीन मजली आहे. इमारतीच्या तळमजल्यावर बॅँक तर पहिल्या मजल्यावर वरद हॉस्पिटल आहे. बॅँकेला जागा भाड्याने देताना पहिल्या मजल्याच्या निम्या भागावर लोखंडी अॅगल टाकून छत तयार करण्यात आले होते. पहिल्या मजल्याच्या अॅगलचा भाग कोसळल्याने दवाखान्यात उपचारासाठी आलेले रुग्ण खाली पडले. जागेचे भाडे मिळवण्यासाठी निरपराध लोकांच्या जिवाशी खेळ करणाऱ्या मालकावर गुन्हा दाखल करण्यात आला आहे. दुर्घटनेत महाराष्ट्र बॅँकेचे व्यवस्थापक अमित कुमार ही गंभीर जखमी झाले आहेत. त्यांच्यावर सोलापूरमध्ये उपचार सुरू आहेत.

महामार्गावरील भीषण अपघातात कुटुंबातील सात ठार

म. टा. वृत्तसेवा, सातारा

हज यात्रेसाठी निघालेल्या आई-वडिलांना मुंबईपर्यंत सोडण्यासाठी निघालेल्या धारवाडमधील कुटुंबातील सात जणांचा साताऱ्याजवळ काशीळ‌ येथे बुधवारी अपघाती मृत्यू झाला. पुणे-बेंगळुरू राष्ट्रीय महामार्गावर बुधवारी पहाटेच्या सुमारास भीषण अपघात झाला आहे. चालक आणि एक लहान मुलगी गंभीर जखमी आहे. चालकाचे वाहनावरील नियंत्रण सुटल्याने अपघात झाल्याची माहिती समोर येत आहे.

निजामुद्दीन अब्दुलनबी सौदागर (वय ६९), सफुरा निजामुद्दीन सौदागर (वय ५८), मन्सुब निजामुद्दीन सौदागर (वय ४०), नाफिया मन्सुब सौदागर (वय ३५), तैयबा मन्सुब सौदागर (वय ६), आकसा मन्सुब सौदागर (वय ४ ), अहमदरजा मन्सुब सौदागर (वय २, सर्व रा. मदिहाळ डेअरी भंडारी गल्लीरोड, धारवाड, कर्नाटक) अशी अपघातात ठार झालेल्यांची नावे आहेत.

या अपघातात चालक शहाबाज इस्माईल भंडारी (वय ३०) हा गंभीर जखमी झाला आहे. जिल्हा सरकारी रुग्णालयात त्याच्यावर उपचार सुरू आहेत. निजामुद्दीन सौदागर आणि सफुरा सौदागर हे दाम्पत्य हज यात्रेला जाणार होते. त्यांना सोडण्यासाठी मुलगा मन्सुब आणि सून नाफिया आपल्या तीन चिमुकल्यांसह मुंबईला निघाले होते. कर्नाटकातून सर्वजण कारने (के २५ एमसी ४३५९) कोल्हापूरमार्गे मुंबईला निघाले होते. शहाबाज भंडारी कार चालवत होता. कराडजवळ त्यांनी जेवण केल्यानंतर हे सर्वजण पुढील प्रवासाठी निघाले. सातारा तालुक्यातील काशीळ गावाजवळ आल्यानंतर चालकाला अचानक डुलकी लागली. त्यामुळे भरधाव असलेली कार महामार्गाकडेला असलेल्या गुलमोहरच्या झाडावर जोरदार आदळली. ही धडक इतकी भीषण होती की, सहा जण जागीच ठार झाले. या अपघाताची माहिती बोरगाव पोलिसांना मिळाल्यानंतर पोलिसांनी तत्काळ घटनास्थळी धाव घेतली. कारमध्ये अडकलेल्या तैयबा सौदागर आणि चालक शहाबाज भंडारी याला कसेबसे बाहेर काढले. त्या नंतर दोघांनाही तत्काळ जिल्हा सरकारी रुग्णालयात दाखल करण्यात आले. मात्र, तैयबा सौदागरचा सकाळी उपचारादरम्यान मृत्यू झाला. या अपघातात संपूर्ण सौदागर कुटुंबच मृत्युमुखी पडल्याने सर्वत्र हळहळ व्यक्त होत आहे. धारवाडमध्ये सौदागर कुटुंबीयांचा फूल विक्रीचा व्यवसाय आहे. हज यात्रेला जाण्यापूर्वीच या कुटुंबावर काळाने घाला घातल्याने नातेवाइकांवर दु:खाचा डोंगर कोसळला आहे.

भूमिपुत्रांसाठी स्थानिक पातळीवर उद्योगधंदे आणणार

आदित्य ठाकरे यांची सोलापुरात तरुणांना ग्वाही

म. टा. वृत्तसेवा, सोलापूर

भूमिपुत्रांसाठी स्थानिक पातळीवर कारखाने आणि उद्योगधंदे आणण्यासाठी प्रयत्नशील असल्याची ग्वाही युवा सेनेचे प्रमुख आदित्य ठाकरे यांनी दिली. सोलापुरातील वालचंद कॉलेज येथे तरुणाईशी संवाद साधत त्यांनी सर्वांची मने जिंकली. आपल्या परिसरातील प्रश्नांसाठी चळवळ करून तरुणांनी चळवळीचे नेते व्हावे, असे आवाहन ही आदित्य यांनी केले.

दुसऱ्या टप्प्यातील जनआशीर्वाद यात्रेनिमित्त बुधवारी सोलापुरात आलेल्या आदित्य ठाकरे यांनी वालचंद कॉलेज येथे तरुणाईशी संवाद साधत त्यांच्या प्रश्‍नांना समर्पक उत्तरे दिली. या प्रसंगी महाविद्यालयीन तरुणाईने आदित्य यांना सोलापूरमधील बेरोजगारीविषयी प्रश्‍न विचारले. 'आजचे तरुण, तरुणी सोशल मीडियावरील टीक-टॉक, फेसबुक, व्हॉटसअ‍ॅप या माध्यमांवर एकत्र येत असेल, तर मग जात आणि पाण्यावरून आपण भांडणे का? करीत आहोत,' असा सवाल ठाकरे यांनी तरुणाईला केला. आदित्य म्हणाले, 'जातीला पोट असते, परंतु पोटाला जात नसते. त्यामुळे समाज आणि देश बदलण्याचे सामर्थ्य तरुणाईमध्ये आहे. जिथे-जिथे आवाज द्याल तिथे युवा सेना तुमच्या मागे खंबीरपणे उभे राहील.' नागनाथ हिंगमिरे यांनी स्पोर्टससाठी मुलींना व मुलांना सराव करण्यासाठी भौतिक सुविधा नसल्याचे सांगितले. त्या प्रश्‍नाला उत्तर देताना ठाकरे म्हणाले, 'येणाऱ्या पंधरा दिवसांत ते काम पूर्ण करू. समाजामधील शेवटच्या घटकांतील प्रश्‍न सोडविणे हीच माझी विचारधारा आहे. जात, धर्म, भाषा यापेक्षा समाजातील प्रश्‍न माझ्यासाठी महत्वाचे आहेत. जोपर्यंत गल्‍लीतले प्रश्‍न सुटणार नाहीत, तोपर्यंत दिल्‍ली सुधारणार नाही.'

या वेळी सोलापूरचे सहपालकमंत्री तानाजी सावंत, उस्मानाबादचे खासदार ओमराजे निंबाळकर, सचिन अहिर, सिद्धेश कदम, उर्वेश सरनाईक, रुपेश कदम, साईनाथ दुर्गे यांच्यासह युवा सेनेचे कार्यकर्ते मोठ्या संख्येने उपस्थित होते. ठाकरे यांची तरुणाईमध्ये चांगलीच क्रेझ असल्याचे दिसून आले. त्यांनी वालचंद महाविद्यालयात प्रवेश करताच शिट्ट्या आणि आवाजाने परिसर दुमुदुमला. जय भवानी, जय शिवाजी, शिवसेना जिंदाबादच्या घोषणांनी कॉलेज परिसर दणाणून गेला होता. विशेष म्हणजे, आदित्य यांच्यासोबत सेल्फी काढण्यासाठी तरुणाई धडपड करीत असल्याचे दिसून आले.

आदित्य ठाकरे उवाच...

एमपीएससी आणि युपीएससीसाठी प्रयत्न करणाऱ्या मुलांसाठी शिवसेनेची बाळासाहेब ठाकरे आयएएस अकॅडमी

धरण खेकड्यामुळे किंवा इतर कोणत्या कारणामुळे फुटले याचा विचार करण्यापेक्षा जिथे धरणे नाहीत तिथे, कशी बांधता येतील याचा विचार करू या

कोणत्याही राजकीय पक्षाचे, कोणत्याही जाती-धर्माचे असाल तरी संकटात शिवसेनेला हाक मारा

वाळू माफियांवर कारवाईसाठी

गेलेल्या पोलिसांनी पकडली गाढवं

म. टा. वृत्तसेवा, पंढरपूर

चंद्रभागेचे वाळवंट ओसाड बनवणाऱ्या वाळू माफियांच्या विरोधात पोलिसांनी कंबर कसली आहे. बुधवारी वाळू चोरी सुरू असताना पोलिसांनी टाकलेल्या छाप्यात ४३ गाढवांना ताब्यात घेण्यात आले असून, ४ दुचाकी जप्त करण्यात आल्या आहेत.

पंढरपूर शहरातील चंद्रभागा वाळवंटाच्या प्रत्येक घाटांवरून वाळू माफिया गाढवांवरून वाळू तस्करीचा व्यवसाय करतात. या बाबत अनेकवेळा तक्रारी झाल्यावर माफिया वाळू आणि गाढव सोडून पाण्यातून पळून जात असल्याने पोलिसांच्या हाती काहीच लागत नसे. बुधवारी मात्र पोलिसांनी बेकायदा वाळू वाहतुकीचे मुख्य साधन असलेली गाढवाचं जप्त केली. बुधवारी नगरपालिका पाणीपुरवठा केंद्र जवळून टाकलेल्या छाप्यात ४३ गाढवे आणि ३ ब्रास वाळू पोलिसांनी जप्त केली. पोलिस येताना दिसताच वाळू माफिया पाण्यात उद्या टाकून पळून गेले, मात्र, ४३ गाढवांसोबत त्यांच्या दुचाकी ही पोलिसांनी जप्त केल्या आहेत. जप्त केलेल्या चार दुचाकींमधील दोन दुचाकी चोरीच्या असल्याचे उघड झाले आहे.

पोलिसांनी वाळू माफियांना धडा शिकवण्यासाठी चक्क गाढवे जप्त केली. मात्र, या गाढवांना चारा-पाणी देण्याची वेळ पोलिसांवर आली. पंढरपूर शहर पोलिस ठाण्यात ही सर्व गाढवे दिवसभर आणून ठेवल्याने पोलिस स्टेशनला कोंडवाड्याचे स्वरूप आले होते. गाढवांना प्राणीमित्र संघटनेच्या ताब्यात देण्याचा निर्णय पोलिसांनी न्यायालयाच्या सूचनेनुसार घेतला आहे. या गाढवांच्या अज्ञात मालकांवर बेकायदा वाळू चोरीसोबत मुक्या प्राण्यांवरील अत्याचाराची कलमे लावल्याने या गुन्ह्याचे गांभीर्य वाढले आहे. पंढरपूर शहरात पाच हजारांपेक्षा जास्त गाढवांचा वापर वाळू माफिया वाळू उपशासाठी आणि वाहतुकीसाठी करीत आहेत. एक गाढव मालकाला दिवसभरात ५ ते १० हजार रुपयाचा व्यवसाय करून देते. पोलिस शहरातील गाढवे पकडून त्यांच्या मालकांवर गुन्हे दाखल करण्याची मोहीम हाती घेणार आहेत.

म. टा. प्रतिनिधी, कोल्हापूर

अंबाबाई मंदिरात दर्शनासाठी येणाऱ्या भाविकांच्या वाहने लावण्यासाठी आणि उत्पन्न वाढीसाठी येथील शिवाजी स्टेडियममध्ये भूमिगत वाहनतळ करता येणे शक्य आहे का, याबाबत तांत्रिक बाबी तपासून प्रस्ताव द्यावे, अशा सूचना जिल्हाधिकारी दौलत देसाई यांनी बुधवारी दिल्या. जिल्हाधिकारी कार्यालयात झालेल्या जिल्हा क्रीडा संकुल कार्यकारी समिती बैठकीत ते बोलत होते.

जिल्हाधिकारी देसाई म्हणाले, 'शिवाजी स्टेडियमाच्या देखभाल दुरुस्ती, व्यवस्थापनासाठी उत्पन्नाची गरज आहे. त्यासाठी स्टेडियमवरील कोणत्याही प्रकारच्या खेळास व्यत्यय न येता भूमिगत वाहनतळ करता येते का याचा अभ्यास क्रीडा अधिकाऱ्यानी करावा. अशाप्रकारे वाहन तळ केल्यास पार्किंगचा प्रश्नही निकालात निघणार आहे.

जिल्हा क्रीडा संकुलातील जलतरण तलावाची दुरुस्ती की नव्याने निर्मिती करावी याबाबत तीन आठवड्यामध्ये अहवाल सादर करावा. संकुलात व्यायामशाळा, स्टीम बाथ, सोना बाथ अशा सुविधा द्यायला हव्यात. त्याचबरोबर क्रीडा संकुल सौर उर्जेवरील वीज वापरण्यासंबंधी प्रस्ताव तयार करावा. स्टेडियममधील गाळेधारकांचा करार संपलेला आहे. त्यांच्यासोबत नवीन दराने करार करावे. ज्या गाळेधारकांनी पोट भाडेकरू ठेवले आहेत, त्यांना काढून टाकावे. बैठकीत जिल्हा क्रीडा संकुलाकडे मानधनावर कार्यरत असणाऱ्या कर्मचाऱ्यांच्या मानधनात ५०० रुपयांनी वाढ करणे, रोजंदारीवर असणाऱ्या कर्मचाऱ्यांना एक हजार रुपयांची वाढ करण्याचा निर्णय घेण्यात आला. जिल्हा क्रीडाधिकारी चंद्रशेखर साखरे यांनी स्वागत केले. बैठकीला पोलिस उप अधीक्षक (गृह) अशोक पवार, उद्योजक व्ही. बी. पाटील, सामाजिक कार्यकर्ते अशोक पोवार, रमेश मोरे उपस्थित होते.

कोल्हापूर: शहरातील कचरा कोंडाळे किंवा रस्तावर पडणारा सुका व प्लास्टिक कचऱ्याचे प्रमाण कमी करण्यासाठी १३ ठिकाणी महापालिकेच्यावतीने कचरा संकलन केंद्रे सुरू केली आहेत. सकाळी सहा ते दुपारी दोन पर्यंत संकलन केंद्रात कचरा संकलित केला जाईल. प्लास्टिक बॉटल्स, पिशवी, पाकिटे यांसह सुका कचरा मोठ्याप्रमाणात रस्त्यावर टाकला जातो. हा कचरा गटारीमध्ये अडकल्याने सांडपाण्याला अटकाव होतो. त्यामुळे अशाप्रकारचा कचरा संकलित करण्यासाठी कपिलतीर्थ मार्केट, रेसकोर्स नाका फिल्टर हाउस, गोविंदराव पानसरे शाळा सानेगुरुजी वसहात, मंगळवापेठ ताराराणी विद्यालय, पद्माराजे विद्यालय शनिवार पेठ, पंचगंगा हॉस्पीटल, शास्त्रीनगर ग्राऊंड फायर स्टेशन, तात्यासाहेब मोहिते विद्यालय, शाहुपूरी व्यापार पेठ, कवळा नाका फायर स्टेशनसमोर, कसबा बावडा पॅव्हेलियन हॉल, महाडिक माळ कुंटुब कल्याण केंद्र, निमार्ण चौक मैदान, आरोग्य विभाग शाहू क्लॉथ मार्केट याठिकाणी केंद्र सुरू केली आहेत.

म. टा. प्रतिनिधी, कोल्हापूर

'गटारी अमावस्या आणि बुधवार' असा योग जुळून आल्यामुळे नागरिकांनी मटण, चिकन आणि मासे यावर मनसोक्त ताव मारला. गटारी साजरी करण्याठी सकाळपासून बेत आखले. मटण, चिकन व मासे विक्रेत्यांनी गटारीनिमित्त जवळपास पाच टन मालाची विक्री झाल्याचा दावा केला आहे. सायंकाळनंतर मटणाचा तुटवडा निर्माण झाला. मटणाचा बेत हुकल्यामुळे खवैय्यांनी चिकनकडे मोर्चा वळविला.

शहरातील हॉटेल आणि बारही सायंकाळनंतर फुल होते.अनेकांनी मित्रमंडळीसोबत रात्री उशिरापर्यंत गटारी साजरी केली. गप्पागोष्टी, सोबत मटण व चिकनच नानाविध प्रकार यामुळे गटारीचा माहौल उत्तरोत्तर रंगत गेला. सार्वजनिक बागा, मैदाने येथे सामूहिकपणे गटारी अमावस्या साजरी केली. शहरातील मटण आणि मासे विक्रीच्या सेंटरसमोर रांगा लागल्या होत्या. मटणाचा दर ५०० रुपयांपर्यंत होता. चिकनची १५० रुपये किलो दराने विक्री झाली. बांगडा, सुरमई, पापलेट, कोळंबीची विक्री धडाक्यात झाली. पावसातही लोकांनी खरेदीसाठी गर्दी केली होती.

सायंकाळी मटणाचा तुटवडा निर्माण झाल्यामुळे चिकन व मासे असा बेत अनेकांनी आखला. बकऱ्यांची आवक कमी झाल्याचे कारण सांगण्यात आले. रात्री आठ वाजण्याच्या सुमारास मटण विक्रीची दुकाने बंद होती. विक्रेत्यांच्या म्हणण्यानुसार बुधवारी दिवसभरात एक हजार किलो मटण, दोन हजार किलो चिकन आणि दोन टनाहून अधिक मासे विक्री झाली. बांगड्याचा दर २२० ते २४० रुपये किलो असा होता.

म. टा. प्रतिनिधी, कोल्हापूर अंबाबाई मंदिरात दर्शनासाठी येणाऱ्या भाविकांच्या वाहने लावण्यासाठी आणि उत्पन्न वाढीसाठी येथील शिवाजी स्टेडियममध्ये भूमिगत वाहनतळ करता येणे शक्य आहे का, याबाबत तांत्रिक बाबी तपासून प्रस्ताव द्यावे, अशा सूचना जिल्हाधिकारी दौलत देसाई यांनी बुधवारी दिल्या. जिल्हाधिकारी कार्यालयात झालेल्या जिल्हा क्रीडा संकुल कार्यकारी समिती बैठकीत ते बोलत होते. जिल्हाधिकारी देसाई म्हणाले, 'शिवाजी स्टेडियमाच्या देखभाल दुरुस्ती, व्यवस्थापनासाठी उत्पन्नाची गरज आहे. त्यासाठी स्टेडियमवरील कोणत्याही प्रकारच्या खेळास व्यत्यय न येता भूमिगत वाहनतळ करता येते का याचा अभ्यास क्रीडा अधिकाऱ्यानी करावा. अशाप्रकारे वाहन तळ केल्यास पार्किंगचा प्रश्नही निकालात निघणार आहे. तलावाची दुरुस्ती की नव्याने निर्मिती करावी याबाबत तीन आठवड्यांमध्ये अहवाल सादर करावा. संकुलात व्यायामशाळा, स्टीम बाथ,अशा सुविधा द्यायला हव्यात. गाळेधारकांचे नवीन दराने करार करावे. ज्या गाळेधारकांनी पोट भाडेकरू ठेवले आहेत, त्यांना काढून टाकावे. यावेळी कर्मचाऱ्यांच्या मानधनात ५०० रुपयांनी वाढ करणे, रोजंदारीवर असणाऱ्या कर्मचाऱ्यांना एक हजार रुपयांची वाढ करण्याचा निर्णय घेण्यात आला. जिल्हा क्रीडाधिकारी चंद्रशेखर साखरे यांनी स्वागत केले. बैठकीला पोलिस उपअधीक्षक (गृह) अशोक पवार, उद्योजक व्ही. बी. पाटील, अशोक पोवार, रमेश मोरे उपस्थित होते.

कोल्हापूर टाइम्स टीम

गेल्या आठ दिवसांपासून कोसळणाऱ्या मुसळधार पावसाने जिल्हा आपत्ती व्यवस्थान पथक सक्रिय झाले आहे. विविध सामाजिक, स्वयंसेवी संस्थांतर्फे ५०० स्वयंसेवक कार्यरत आहेत. गुरुवारी पथकातील कार्यकर्त्यांनी पंचगंगा नदीत अडकलेल्या एका युवकाचा जीव वाचवला. जिल्हा आपत्ती नियंत्रण कक्षात १ अधिकारी, २१ कर्मचारी चोवीस तास कार्यरत आहेत.

जिल्ह्यात डोंगरालगत १७ आणि पूरबाधीत १२९ गावे आहेत. यावर महसूल विभाग, आपत्ती व्यवस्थापन प्रशासनाने लक्ष केंद्रीत केले आहे. डोंगरमाथ्यावर दरडी कोसळण्याचे प्रकार घडत आहेत. तेथील ग्रामसेवक, तलाठ्यांतर्फे ग्रामस्थांना सतर्क राहण्याचे आवाहन केले आहे. अती पावसामुळे कृष्णा, दूधगंगा, वारणा, पंचगंगा, भोगावती, कुंभी, कासारी, दूधगंगा, कडवी नद्यांना पूर आला आहे. नद्यांचे पाणी पात्राबाहेर पडले आहे. नदीकाठावरील १२९ गावांना पुराचा धोका पोहोचत आहे. त्या गावांना आवश्यकतेनुसार यांत्रिक बोटी पोहचण्याची व्यवस्था केली आहे. त्यासाठी प्रत्येक तालुक्याच्या ठिकाणी एक बोट ठेवण्यात आले आहे.

गुरूवारी सकाळी आठ वाजता इचलकरंजीजवळ पंचगंगा नदीतील पाण्यातील झाडात एकजण अडकल्याचे आपत्ती व्यवस्थापन पथकाचे संभाजी झुटाळ, जमीर फनीबंद, संजय कांबळे यांच्या निदर्शनास आले. त्यांनी तातडीने यांत्रिक बोटीच्या सहायाने त्या व्यक्तीस सुखरुपपणे बाहेर काढले. शहर जिल्ह्यात जीवनज्योती, जीवन आधार, जीवन मुक्ती, आधार, स्वराज या स्वयंसेवी संस्थांतर्फे त्वरीत पूरग्रस्तांना मदतीची मोहीम राबवण्यात येत आहे. याशिवाय २०० आपदा मित्र, सखी कार्यरत आहेत. आंबोली, फोंडा, करुळ, भुईबावडा, आंबा, पन्हाळा, तिलारी घाटात दरड कोसळल्यास रस्ता खुला करण्यासाठी सार्वजनिक बांधकाम विभागाने जेसीबी, पोकलॅन, क्रेन, डंपरची व्यवस्था केली आहे.

रबर बोटीही उपलब्ध

पूरग्रस्तांच्या सुटकेसाठी यंत्रणा सज्ज करण्यात आली आहे. १५ रबर बोट, ४० सर्च टॉर्च, ३० लाइफ बाइज, ८ इन्फ्लेटबल रबर बोट, २०० लाइफ जॅकेट आणि लाइफबॉय रिंग, १०० फ्लोटिंग रोप उपलब्ध करण्यात आले आहे.

अतीपावसामुळे पूरस्थिती निर्माण होत आहे. जिल्ह्यातील अनेक मार्ग बंद झाले आहेत. आवश्यक त्या ठिकाणी मदतीसाठी आपत्ती व्यवस्थापनातर्फे ५०० स्वयंसेवक सक्रिय आहेत.

- प्रसाद संकपाळ, जिल्हा आपत्ती व्यवस्थापन अधिकारी

कोल्हापूर : छत्रपती राजाराम महाराजांच्या जयंतीनिमित्त महापालिकेच्यावतीने अभिवादन करण्यात आले. व्हीनस कॉर्नर येथील त्यांच्या पुतळ्यास महापौर माधवी गवंडी व आयुक्त डॉ. मल्लिनाथ कलशेट्टी यांनी पुष्पहार अर्पण केला. नगरसेवक अशोक जाधव, राहुल चव्हाण, शहर अभियंता नेत्रदीप सरनोबत, उपशहर अभियंता आर. के. जाधव, विक्रांत वासुदेव, अॅड. प्रताप जाधव, राजेश मणियार, करण लाटवडे, संजय परब, फिरोज महात, दीपक लालवाणी, अनुप देसाई आदी उपस्थित होते.

कोल्हापूर टाइम्स टीम

जिल्ह्यात सर्वत्र दमदार पावसामुळे भाजीपाला आणि फळांची आवक २० ते ३० टक्क्यांनी घटली आहे. दूध संकलनावरही थोडा परिणाम झाला असला तरी मुंबई व पुण्याला नियमित दूध पाठवले जात आहे.

जिल्ह्यातील ८३ बंधारे पाण्याखाली गेले असून अनेक मार्ग वाहतुकीसाठी बंद केले आहे. त्याचा फटका दूध वितरणाला बसला आहे. जिल्हा सहकारी दूध उत्पादक संघाकडून (गोकुळ) पर्यायी मार्गांवरुन गावोगावी जाऊन दूध संकलन केले जात आहे. गोकुळचे ४६० रुट असून संकलित केलेले दूध बिद्री, बोरवडे, गडहिंग्लज, तावरेवाडी, शिरोळ सॅटेलाइट, गोगवे येथे चिलिंग सेंटरमध्ये नेले जाते. जिल्ह्यातील ६० दूध डेअऱ्यांत बल्क कुलर आहेत. बल्क कुलरमध्ये तीन दिवस दूधाची साठवण करण्याची यंत्रणा आहे. सध्या नऊ ते सव्वानऊ लाख लिटर दुधाचे संकलन सुरू आहे. सद्यस्थितीत राधानगरी तालुक्यातील पिसात्री, काळजवडे हा दूध संकलानाचा रुट बंद आहे. शाहूवाडी तालुक्यातील पाल मरळे हा रुट बंद आहे. त्यामुळे म्हशीच्या दूध संकलनात ३३४५ लिटर तर गाईच्या दूधात १६४५ लिटरची घट झाली आहे.

राधानगरी धरणाच्या सर्व सात दरवाजांतून पाण्याचा विसर्ग झाला तर दूध संकलनावर दाट परिणाम होण्याची शक्यता आहे. मुंबई-बेंगळुरू महामार्ग खुला असल्याने पुणे व मुंबईत दूध पाठवले जात आहे. वारणा, शाहू आणि स्वाभिमानी दूध संघासह खासगी संस्थाच्या दूध संकलनावर परिणाम झाला आहे.

दरम्यान, पावसामुळे शेती उत्पन्न बाजार समितीती भाजापाल्याची आवक २० ते ३० टक्क्यांनी घटली आहे. मार्केट यार्डमध्ये हातकणंगले, शिरोळ, घटप्रभा येथून भाजीपाला येतो. सध्या मेथी व कोथंबिरीची १५ हजार पेंढ्यांची आवक होत आहे. कांदा व बटाटा मुख्य मार्केट असल्याने साठवण क्षमतेमुळे कोणताही परिणाम होणार नाही. पावसामुळे शेतकरीही भाजीपाला काढण्यास शेतात जात नसल्याने आवकेवर परिणाम झाला आहे. फळांच्या आवक मात्र घटली आहे. सफरचंद, मोसंबी, लिंबू, चिकू, पेरू, सिताफळ या फळांची आवक कमी झाली आहे. देशभर पाऊस सुरू असल्याने विविध राज्यातून फळांची आवक कमी झाल्याचे व्यापाऱ्यांनी सांगितले.

- शीला राजेंद्र निम्बोरकर

(निवृत्त लेफ्टनंट जनरल राजेंद्र निम्बोरकर यांच्या पत्नी)

अन् हृदयातून बॉम्बचा तुकडा निघाला

'२६ जुलै हा कारगील विजय दिवस. घरी सकाळी चहा पित चर्चेत कारगीलच्याच गोष्टी होत्या. त्यामुळे जुन्या आठवणी जाग्या झाल्या. हे त्यावेळेला नौशेरा सेक्टरमधील सुंदरबनीला 'युनीट १५ पंजाब' कमांड करीत होते. मी दिल्लीला सेपरेटेड फॅमिली अॅकोमोडेशनमध्ये मुलींसोबत रहायचे. त्यांच्या शिक्षणासाठी. शाळांना सुट्ट्या लागल्या की सुंदरबनीला जायचो. फिल्ड एरियातल्या घरात राहायला मुलींना आवडायचे.

पण, त्यावेळी सुट्ट्या संपण्याआधीच परतावं लागलं. युद्धाचं वातावरण तापलं होतं. सर्व जवानांच्या कुटुंबीयांना परत पाठविण्याची तयारी सुरू झाली. कमांडरची पत्नी या नात्याने इतरांना समजावून सांगण्याची जबाबदारी माझीच होती. 'घाबरू नका. सर्व काही ठीक होईल' असे त्यांना सांगताना माझ्या मनातील धाकधूक त्यांना कळू द्यायची नव्हती.

युनिटलगत हायवे होता. तेथून बोफार्स गन जाताना दिसत होत्या. त्यावरुन अंदाज येत होता. एकदा ह्यांच्या हाताला एक छोटी अॅल्युमिनियमची कॉइन बांधलेली दिसली, ज्यावर ह्यांचा सर्व्हिस नंबर होता. विचारलं तर म्हणाले, 'युनिटमध्ये सगळ्यांनाच हे हाताला लावलं आहे. ओळख पटविण्यासाठी लावतात.' जास्त विचारलं नाही. कारण कळून चुकलं की, कुठल्या परिस्थितीत त्याची गरज लागते.

मुलींसोबत दिल्लीला परतले. दुसऱ्या दिवशी आवराआवर करेस्तोवर संध्याकाळ झाली. तुळशीला दिवा ठेवायला मी अंगणात जायला निघाले. दार उघडलं तर आमच्या युनिटचा जवान उभा होता. 'सत् श्रीअकाल' म्हणून त्यांनी अभिवादन केले. मी म्हटलं, 'हां, कैसे आना हुआ.'

तो म्हणाला, 'साहब ने भेजा है, मेसेज है आपके लिए. साहब को गोली लगी है छाती में. जख्मी हुए है. एलसी से उनको अस्पताल लाये है' मी मागे वळून ड्रेसिंगरुममध्ये बसले. त्याला म्हटलं, 'आप ठीकसे बताओ, किसको गोली लगी है' तो पुन्हा म्हणाला, 'जी सीओ साहबको.' माझा विश्वासच बसेना. खात्री करण्यासाठी पुन्हा विचारलं, 'किसको गोली लगी है?' 'अपने साहबको, निंभोरकर साहबको' त्याने पुन्हा होकार दिला. मुली घरीच होत्या. त्यांना एकदम धक्का बसला. मोठी दहावीत, धाकटी आठवीत होती. त्यांना चांगलीच समज होती.

मला वाटतं, देव अशा वेळेला तुम्हाला काहीतरी बळ देतो. मी अजिबात गर्भगळीत झाले नाही. रडले नाही. नुकतीच नवीन घरात शिफ्ट झाल्यामुळे फोन सुरू नव्हता. पैसे घेतले आणि समोरच्या एसटीडी बूथमध्ये गेले. एसएम साहेबांना फोन लावला. त्यांना म्हटलं, 'साहब आपको, वाहे गुरुजीकी सौगंध है, साहब जिस भी हालत मे है सही बताओ' ते म्हणाले, 'साहब को मोर्टर बॉम्ब का स्प्लीटर लगा है छाती में. लेकिन आप धीरज रखो. साहब को कुछ नही होगा. तुसी फिक्र ना करो.'

घरी परतले. आम्हा तिघांच्या विमानाचं तिकीट काढायला सांगितलं. मैत्रिण म्हणाली, की मुलींना माझ्याकडेच राहू दे. खूप खर्च होईल.' त्यावेळी विमानप्रवास आमच्या बजेटला परवडणारे नसायचे. पण तिला म्हटलं, 'त्यांना भेटणं मुलींना फार जरुरीचं आहे. ज्या कंडिशनमध्ये असतील, त्यांना आपल्या बापाला बघू देत.' मला अजून आठवतं, त्याच विमानात बरखा दत्त आणि तिची टीम होती. कारगीलकडे निघाले होते. माझी मन:स्थिती ठीक नव्हती. त्यामुळे तिच्याशी संवाद साधला नाही. बोलणं झालं असतं तर, कारगील युद्धाचं बरखाचे पहिलं प्रक्षेपण तिथूनच झालं असतं.

आम्ही जम्मूला उतरुन मिलीटरी हॉस्पिटल गाठलं. त्याही परिस्थितीत द्यांनी स्मितहास्य केलं आणि माझ्या डोक्यावरचं मणामणाचं ओझं कमी झालं. डॉक्टरांना भेटले. ते म्हणाले, 'काळजी करू नका.'

तेवढ्यात कोअर कमांडर आले. डॉक्टरांनी त्यांना ह्यांच्या प्रकृतीबद्दल सांगितलं. त्यांनी विचारलं पुढे काय करणाार? डॉक्टर म्हणाले, 'इथून आम्ही त्यांना उधमपूर बेस हॉस्पिटलला पाठवू. नंतर तिथे डॉक्टर्स ठरवतील तसे होईल.' कोअर कमांडर म्हणाले,'डोन्ट डिलाय. सेंड हिम टू दिल्ली.'

डॉक्टरांच्या सल्ल्याप्रमाणे छातीमध्ये स्प्लींटर असल्यामुळे विमानप्रवास ठीक नव्हता. मी लगेच रेल्वेच्या आरक्षणासाठी सांगितलं. आवश्यक सामान घेऊन ह्यांना व्हीलचेअरमध्ये ठेवून आम्ही स्टेशनकडे निघालो तर गाडी स्टेशनवरुन सुटत होती. आमचे बंदे धावत स्टेशन मास्तरकडे गेले. गाडी थांबवली. ह्यांना व्हीलचेअरमधून बर्थवर ठेवलं. तिथले अटेंडंट खूप उशा घेऊन आले, ह्यांना आरामशीर व्हावं म्हणून. एकाही प्रवाशाने उशीर झाला म्हणून कुरकुर केली नाही.

सकाळी दिल्ली स्टेशनवरुन आर. आर. हॉस्पिटलला गेलो. लगेच डॉ. बोरकर, त्यांच्या टीमने चेकअप केलं आणि सांगितलं की, अजिबात हालचाल करायची नाही. कारण स्प्लींटर अगदी हृदयाजवळ आहे एक-दोन सेंटीमीटरवर. आणि फ्रेनिक नर्व्हमध्ये रुतून बसलाय. ती नर्व्ह श्वासोच्छासाच्या प्रक्रियेतील महत्वाचा भाग असतो. स्प्लींटर हलले तर धोका उद्भवू शकतो. त्यामुळे दुसऱ्याच दिवशी ऑपरेशन करायचं ठरवलं. रात्रभर झोप आली नाही. पहाटे ४.३० वाजता उठून अंघोळ करुन पूजा केली. देवाला हात जोडले आणि अश्रू अनावर झाले. देवाला म्हटलं, 'आम्ही दोघांनी कधीच कुणाचे वाईट केले नाही. आम्हाला वाईट दिवस दाखवू नको.'

ऑपरेशन व्यवस्थित पार पडलं. डॉ. गांगुलीनी ह्यांच्या छातीतून काढलेला बॉम्बचा तो तुकडा माझ्या हातावर ठेवला आणि म्हणाले, 'धिस इज द स्प्लींटर. ही इज आऊट ऑफ डेंजर.' त्यावेळी मला त्यांच्यामध्ये देवच दिसला. सोबतचे जवान ऑपरेशन थिएटरपासून हलायला तयार नव्हते. डॉक्टरांनी रागावलं की तात्पुरते गायब व्हायचे. डॉक्टर गेले की पुन्हा हजर. 'जब तक साहब का ऑपरेशन खतम होकर बाहर नही लाते, तबतक हम यहाँसे हिलेंगे नही.'

खूप जीव टाकतात लोक. जेव्हा हे जखमी झाले, तेव्हा ह्यांना घेऊन जीपमध्ये ठेवलं तर त्या जीपच्या बॉनेटवर बॉम्ब पडला. तिथून ह्यांना उचलून दुसऱ्या जीपमध्ये ठेवलं. जीप थांबवता येत नव्हती. आपण सिनेमात पाहतो, त्याप्रमाणे सोबतचे जवान जीपला लटकून कितीतरी अंतर गेले. पण ह्यांची साथ सोडली नाही. जखमेतून फवाऱ्यासारखे रक्त उडत होते. एकाने आपली पगडी जखमेवर घट्ट बांधली. सुरक्षित ठिकाणावर आल्यानंतर ह्यांना हॉस्पिटलला आणलं.

या सर्वातून देवाच्या असीम कृपेने बाहेर पडले. आणि दिल्ली पोस्टिंगची चॉईस असूनसुद्धा ह्यांनी परत आपल्या युनिटमध्येच जाणं पसंत केलं. सर्जन कमांडट बोरकरांनी म्हटलं की, 'मी आज ह्यांना, 'प्लीट टू कमांड' सर्टिफिकेट देतो. हा चमत्कार आहे. जो बॉम्बचा तुकडा ह्यांच्या खांद्यातून आतमध्ये शिरला, त्याने फुप्फुसाला गंभीर इजा पोहोचली. पण चमत्कार असा की, तो तुकडा हृदयापासून एक सेंटीमीटरवर थांबला. तुम्ही लोकांनी काही चांगली कामं केली असतील, त्याचं फळ असावं' हे डॉक्टरांचे शब्द.

आणखी दुसरी फार चांगली गोष्ट. आमच्या युनिटमध्ये एकही जिवितहानी झाली नाही. इतक्या भयंकर गोळीबारात, बॉम्ब वर्षावात आमचे ट्रूप्स असूनसुद्धा गंभीर जखम कमाडिंग ऑफिसरलाच झाली. त्यामुळे युनिटचे लोक म्हणायचे की, 'सीओ कमांडिग ऑफिसर साहबने पुरे युनिटका खतरा अपने उपर ले लिया.' या युद्धात अनेक लोक वीरगतीला प्राप्त झाले. त्यांना शतश: नमन. सर्वांना स्मरण करुन त्यांच्याप्रती कृतज्ञता व्यक्त करते, जय हिंद!

फोटो आहे

म. टा. प्रतिनिधी, कोल्हापूर

महापालिका, वस्तू व सेवा कर विभाग आणि गार्डन्स क्लबच्यावतीने रविवारी तपोवन प्रभागात जागतिक वनसंवर्धन दिनानिमित्त वृक्षारोपण करण्यात आले. आयुक्त डॉ. मल्लिनाथ कलशेट्टी यांच्या हस्ते उपक्रमाला सुरुवात केली. यावेळी विजयसिंह सावंत यांच्या 'वृक्ष लागवड' या ई-माहिती पुस्तिकेचे प्रकाशन करण्यात आले. तब्बल १,५०० झाडे लावून प्रभाग हरित करण्यात येणार आहे.

राज्य सरकारने ३३ कोटी वृक्ष लागवडीचा उपक्रम हाती घेतला आहे. तपोवन प्रभागात दोन विभागाच्यावतीने वृक्षरोपण करण्यात येणार आहे. प्रभागात खुल्या जागा जास्त असल्याने या प्रभागाची निवड करण्यात आली. १,५०० झाडांपैकी वनसंवर्धनदिनी २०० झाडांचे रोपण करण्यात आले. सुमारे चार ते साडेचार फुटांची रोपे लावून त्याची जबाबदारी स्थानिक नागरिकांकडे सोपण्यात आली. प्रामुख्याने देशी प्रजातींच्या रोपांची लागवड करण्यात आली.

उपक्रमाचे आयोजन नगरसेवक विजयसिंह खाडे-पाटील यांनी केले होते. यावेळी उद्यान अधिकारी अपर्णा जाधव, उदय गायकवाड, वस्तू व सेवा कर विभागाचे अधिकारी, न्यू कॉलेज ऑफ आर्किटेक्ट विद्यार्थी, योगदान फाउंडेशन, गार्डन्स क्लबचे सदस्य व प्रभागातील नागरिक उपस्थित होते. क्लबच्या अध्यक्षा कल्पना सावंत यांनी प्रास्ताविक केले. सचिव पल्लवी कुलकर्णी यांनी स्वागत केले. वंदना पुसाळकर यांनी आभार मानले.