म. टा. प्रतिनिधी, कोल्हापूर

परीख पुलाच्या विस्तारिकरणासाठी समांतर पर्यायी योजना आणि सब-वे, क्रॉस ड्रेन करण्यासाठी तांत्रिक सर्व्हे करून विस्तृत आराखडा तयार करण्यास शनिवारी सुरुवात झाली. परीख पूल बचाव कृती समितीसह महापालिका आणि शहर वाहतूक शाखेच्या अधिकाऱ्यांनी सायंकाळी पाहणी केली. आमदार अमल महाडिक यांनी अचानक भेट देत या कामासाठी निधी देण्याची ग्वाही दिली.

परीख पुलांतून सुसह्य वाहतूक होण्यासाठी आयुक्त डॉ. मल्लिनाथ कलशेट्टी यांनी आवश्यक कामांसाठी पाहणी करून सर्व्हे करण्याची सूचना गुरुवारी बैठकीत केली होती. त्यानुसार बचाव समिती पदाधिकाऱ्यांसह शहर अभियंता नेत्रदीप सरनोबत, वाहतूक शाखेचे पोलिस निरीक्षक अनिल गुजर, नगरसेवक संजय मोहिते, आशिष ढवळे यांनी पाहणी केली. यावेळी सब-वे, क्रॉस ड्रेन आणि शिवाजी पार्कमधून जाणाऱ्या रस्त्याविषयी सविस्तर चर्चा झाली.

क्रॉस ड्रेन, पुलाचे विस्तारीकरण व समांतर पर्यायी योजना तयार करण्याच्या दृष्टीने जमिनीच्या पातळीचा अभ्यास करून तांत्रिक सर्व्हेद्वारे विस्तृत आराखडा तयार करण्यात येणार आहे. पाहणीदरम्यान आमदार महाडिक येथे आले. त्यांनी पुलाच्या प्रस्तावित कामाची माहिती घेतली. अंदाजित कामासाठी आवश्यक निधी मुख्यमंत्री देवेंद्र फडणवीस यांच्यामार्फत आणि आमदार फंडातून देण्याची ग्वाही दिली. शहर वाहतूक शाखेचे निरीक्षक अनिल गुजर, असोसिएशन ऑफ आर्किटेक्‍ट्स अँड इंजिनीअर्सचे अध्‍यक्ष अजय कोराणे, आर्किटेक्ट संदीप गुरव, इंजिनीअर प्रशांत काटे, प्रविणचंद्र वायचळ, समितीचे फिरोज शेख, राजवर्धन यादव, राहुल पाटील, संजयसिंह घाटगे, महेश दिघे आदी उपस्थित होते.

म. टा. वृत्तसेवा, बदलापूर

महालक्ष्मी एक्स्प्रेसमध्ये अनेक महिला आपल्या लहान मुलांसोबत आणि ज्येष्ठ नागरिक प्रवास करत होते. एनडीआरएफ तसेच इतर पथकांकडून या प्रवाशांची सुटका केल्यानंतर, मदत कक्षापर्यंतच्या खडतर प्रवासात अनेक महिला आणि ज्येष्ठ नागरीक अनवाणी पायांनी मुसळधार पावसात भिजलेल्या बॅगांचे ओझे खांद्यावर घेत करावा लागत होता. कासगाव आणि चामटोलीतील शेकडो तरुणांनी या प्रवाशांच्या बॅगा घेत त्यांना मार्ग दाखविण्याचे काम केले. बचाव कार्यात ही मतदही अत्यंत मोलाची ठरली.

महालक्ष्मी एक्स्प्रेस ते मूळ मदत कक्ष असलेल्या ठिकाणचे अंतर पाच ते सात किलोमीटरचे होते. मात्र, डोंगरातून खडतर प्रवास पार केल्यानंतर चामटोली गाव सुरू होताच गावातील अनेक कुटूंबांनी थकलेल्या आणि रडकुंडीला आलेल्या प्रवाशांच्या हातातील बॅगा घेत, त्यांच्यासाठी चहा, पाण्याची विचारपूस ग्रामस्थांनी केली. अनेकांनी तर महिला, ज्येष्ठ नागरिकांना विश्रांती करण्यासाठी तसेच जेवण करण्याचाही आग्रह केला. त्यामुळे थकून आलेल्या प्रवाशांच्या चेहऱ्यावर ग्रामस्थांच्या माणुसकीचे दर्शन पाहून एक समाधान पाहायला मिळत होते.

पाणी, बिस्किटांचा आधार

महालक्ष्मी एक्स्प्रेसमध्ये पँट्रीची सेवा नसल्याने, पुराच्या पाण्यात हजारो प्रवासी रात्रभर उपाशी होते. त्यात साधी पाण्याचीही सोय उपलब्ध नव्हती. अखेर सकाळी एनडीआरएफ आणि इतर पथकांकडून प्रवाशांची सुटका करतांना त्यांनी बिस्कीट आणि पाणी देण्यात आले. मात्र मूळ मदतकक्षाच्या परिसरात ग्रामस्थ, शहरातील व्यापारी, सामाजिक संघटना प्रवाशांच्या खाण्यापिण्याची भरपूर सोय केली. त्यामुळे प्रवाशांना चहा, पाणी आणि भरपेट जेवण मिळाल्याने प्रवाशांनाही दिलासा मिळाला होता.

दोन तासांचा प्रवास २४ तासांवर

नेरळ येथे राहणारी पूजा पवार आणि तिची आई संगिता पवार यांनी दादर येथून संध्यकाळी घरी जाण्यासाठी ट्रेन पकडली होती. मात्र अंबरनाथ ट्रेनने उतरल्यावर पुढे ट्रेन नसल्याने त्यांनी बदलापूर गाठण्यासाठी एका खासही बसद्वारे बदलापूर गाठले. मात्र बदलापूर स्टेशनवर आल्यावर त्यांना पुढे जाण्यासाठी ट्रेनच उपलब्ध नव्हती. अखेर महालक्ष्मी एक्स्प्रेस बदलापूर स्टेशनवर थांबली होती. ही एक्स्प्रेस पुढे सर्व स्थानकांवर थांबेल अशी उद्घोषणा होत होती. त्यामुळे या मायलेकी एक्स्प्रेसमध्ये बसल्या. मात्र, ही एक्स्प्रेस रात्रभर खोळंबल्याने त्यांचे अतोनात हाल झाले.

बॅड मेमरीजचे फोटो घेवू द्या

महालक्ष्मी एक्स्प्रेसमधून एनडीआरएफचे पथक प्रवाशांना पाण्यातून एका विशिष्ट जागेपर्यंत सोडत होते. मात्र या जागेपासून प्रवाशांना डोंगर आणि दऱ्यांतील चिखल, दगडांच्या मार्गातून आणि वरून पडणाऱ्या पावसातून पाच ते सात किलोमीटरचे अंतर पार करायचे होते. त्यात एका टेकडीवरून प्रवाशांना पाण्यात अडकलेली ट्रेन निदर्शनास पडताच, काही प्रवाशांनी या टेकडीवर थांबत या 'बॅड मेमरीज'चे फोटो घेऊ द्या असे सांगत आपल्या भावना व्यक्त केल्या.

म. टा. वृत्तसेवा, सोलापूर

'आगामी विधानसभा निवडणुकीत कॉँग्रेस-राष्ट्रवादी कॉँग्रेसचे आघाडी सरकार सत्तेत आल्यास स्थानिक तरुणांना नोकरीत ७५ टक्के आरक्षण देण्यात येईल,' अशी घोषणा राष्ट्रवादी कॉँग्रेसचे नेते, माजी उपमुख्यमंत्री अजित पवार यांनी केली आहे. पवार शुक्रवारी सोलापूर दौऱ्यावर होते. विधानसभेसाठी राष्ट्रवादीकडून इच्छुक असलेल्या उमेदवारांच्या मुलाखती घेतल्यानंतर आयोजित पत्रकार परिषदेत त्यांनी भाजप सरकारच्या कारभारावर ताशेरे ओढले.

'गेल्या ३० वर्षांचा अनुभव पाहता आघाडीच्या १७५ जागा निवडून आणण्याचा प्रयत्न सुरू आहे. विधानसभा निवडणुकीसाठी वंचित बहुजन आघाडी सोबत जाण्याचा राष्ट्रवादी काँग्रेस आणि काँग्रेसचा प्रयत्न आहे. वंचित बहुजन आघाडीच्या नेत्यांनी समंजस भूमिका घ्यावी,' असे आवाहनही पवार यांनी केले.

अजित पवार म्हणाले, 'अनेक ठिकाणी नोकरीसाठी जागा रिक्त असताना भरतीच्या बाबतीत जाणीवपूर्वक चालढकल करण्यात येत आहे. आताच नगरपरिषद, नगरपालिका आणि नगरपंचायतीमधील कर्मचाऱ्यांना सातवा वेतन आयोग लागू केला आहे. पाच वर्षे या सरकारला कोणी थांबविले होते. निवडणूक डोळ्यांसमोर ठेवून कॅबिनेटमध्ये असे निर्णय घेण्यात येत आहेत. राज्य सरकारकडून मते मिळविण्यासाठी अशा प्रकारचा केविलवाणा प्रयत्न केला जात आहे. आज शेती आणि पाण्याचे नियोजन बिघडले आहे, त्याला सरकार आणि त्या विभागाचे अपयश कारणीभूत आहे.'

चौकशी टाळण्यासाठी पक्षांतर

'महाराष्ट्रात १५ आणि केंद्रात १० वर्षे आघाडीचे सरकार होते. मात्र जाणीवपूर्वक कोणाला ही सरकारने त्रास दिला नाही. मात्र, भाजप सरकार ठरवून विरोधकांना अडचणीत आणण्यासाठी खेळी करीत आहे. काहींच्या चौकशा सुरू आहेत. काहींना साखर कारखान्यांसाठी पैसे हवे आहेत. काहींच्या पतसंस्था अडचणीत आहेत. काहींच्या कुकुटपालन संस्थेत गडबड आहे. एफआरपी दिलेली नाही. दूध संस्थांमध्ये गडबड आहे. त्यामुळे सत्ताधारी पक्षात राहिल्यास चौकशी करण्याचे धाडस अधिकारी करीत नाहीत. आता पक्षनिष्ठेला महत्त्व राहिले नाही,' असेही अजित पवार म्हणाले.

म. टा. प्रतिनिधी, कोल्हापूर

पावसाने सलग दुसऱ्या दिवशी शनिवारी दमदार बॅटिंग केली असून, धरणक्षेत्रात झालेल्या अतिवृष्टीने धरणांच्या पाणीपातळीत वाढ झाली आहे. वारणा धरणक्षेत्रात तब्बल २३० मि.मी. पावसाची नोंद झाली आहे. गगनबावडा तालुक्यात सर्वाधिक १६३ मि.मी. पाऊस झाला. पन्हाळा (८६.८६ मि.मी.), शाहूवाडी (६९.३३), राधानगरी (६३.८३), करवीर (६३.४५), आजरा (६३) या पाच तालुक्यांत अतिवृष्टी झाली. जिल्ह्यातील २७ बंधारे पाण्याखाली गेले असून, जनजीवन विस्कळीत झाले आहे.

शुक्रवारी दिवसभर पावसाची संततधार सुरू होती. रात्री पावसाचा जोर वाढल्याने नद्यांची पाणीपातळी वाढली. शनिवारी सकाळी दिवसभर पावसाच्या जोरदार सरी कोसळत होत्या. काही वेळ विश्रांती घेऊन पाऊस कोसळत होता. पावसाने ओढे-नाले भरून वाहिल्याने नद्यांच्या पाणीपातळी वाढली. जिल्ह्यातील २७ बंधारे पाण्याखाली गेले आहेत. पंचगंगा नदीवरील राजाराम, शिंगणापूर, सुर्वे, रुई, इचलकरंजी, तेरवाड आणि शिरोळ बंधारे पाण्याखाली गेले आहेत. पंचगंगा नदीच्या पाणीपातळीत नऊ फुटांनी वाढ झाली असून, पाणी दुसऱ्यांदा पात्राबाहेर पडले आहे. राजाराम बंधाऱ्यावर पाणीपातळी २९ फूट ७ इंच होती. राधानगरी धरणातून १४०० क्युसेक्स पाण्याचा विसर्ग होत असून, घटप्रभा धरणातून २७०९ क्युसेक्स विसर्ग सुरू आहे.

भोगावती नदीवरील हळदी, राशिवडे, सरकारी कोगे, खडक कोगे, तर कासारी नदीवरील करंजफेण, पेंडाखळे, बाजारभोगाव, बालोली, ठाणे आळवे, पुनाळ तिरपण, यवलूज हे बंधारे पाण्याखाली गेले आहेत. कडवी नदीवर सवते सावर्डे, शिरगाव, पाटणे, कोपार्डे हे बंधारे पाण्याखाली गेल्याने पर्यायी मार्गावरून वाहतूक वळविली आहे.

००००

धरणक्षेत्रातील पाऊस (मि.मी.)

धरण पावसाचे प्रमाण

कडवी १६५

कुंभी १४०

घटप्रभा १३३

वारणा २३०

जांबरे १५४

कोदे १५८

राधानगरी ८०

तुळशी ११३

दूधगंगा ८१

चित्री ७६

०००००००००००

भुदरगडमध्ये दमदार पाऊस

गारगोटी : तालुक्यात पावसाची संततधार सुरूच होती. पाटगाव प्रकल्पाच्या श्री मौनी सागर जलाशयाच्या पाणीपातळीत वाढ झाली आहे. काही ठिकाणी वीजपुरवठा खंडित झाल्याने जनजीवन विस्कळीत झाले. तालुक्याच्या पश्चिम भागातील कडगाव-पाटगाव परिसरात पावसाचा जोर अधिक आहे. तालुक्यात सरासरी पाऊस ४६.४० मि.मी. झाला. कोंडुशी तलावाच्या सांडव्यावरून विसर्ग सुरू असून, वेदगंगा नदीच्या पाण्याची पातळी सातत्याने वाढत असल्याने नदीकाठच्या गावांना भुदरगड प्रशासनाच्या वतीने सतर्कतेचा इशारा दिला आहे.

एक ऑगस्ट रोजी

'लोकयात्री'चे प्रकाशन

सोलापूर :

सहकार मदत व पुनर्वसन मंत्री सुभाष देशमुख यांच्या जीवनावर आधारित सुरेखा शहा यांनी लिहिलेल्या 'लोकयात्री' पुस्तकाचे प्रकाशन एक ऑगस्ट रोजी हुतात्मा स्मृती मंदिर येथे सकाळी ११.४५ वाजता केंद्रीय भूपृष्ठ वाहतूक मंत्री नितीन गडकरी याच्या हस्ते होणार आहे, अशी माहिती असल्याची माहिती महाराष्ट्र साहित्य परिषद दक्षिण सोलापूर शाखेच्या अध्यक्षा रेणुका महागावकर यांनी दिली.

ग्रंथाली प्रकाशन मुंबई यांच्या वतीने प्रकाशित होणाऱ्या या कार्यक्रमास विनोद तावडे आणि निरूपणकार विवेक घळसासी उपस्थित राहणार आहेत.

म. टा. प्रतिनिधी, कोल्हापूर

'अडचणीच्या काळात पक्ष सोडून जाणारे हे उंदरांसारखे आहेत. जहाज बुडताना पहिल्यांदा उंदीरच बाहेर उड्या मारतात' अशा शब्दात राष्ट्रवादी काँग्रेसचे प्रदेश उपाध्यक्ष, आमदार हसन मुश्रीफ यांनी पक्षाला सोडचिठ्ठी देणाऱ्यांवर टिकास्र सोडले. राष्ट्रवादी काँग्रेसतर्फे जिल्ह्यातील विधानसभा निवडणुकीसाठी इच्छुकांच्या मुलाखती शनिवारी सर्किट हाऊसवर घेण्यात आल्या. यावेळी दोन दिवसांपूर्वी कागल येथील त्यांच्या निवासस्थानासह साखर कारखाना व ऑफिसेवर प्राप्तिकर विभागाने छापे घातले होते. याबाबत 'दिस जातील दिस येतील, भोग सरल, सुख येईल' या गाण्याचा उल्लेख करीत त्यांनी भविष्याविषयी आशावाद व्यक्त केला.

गेल्या काही दिवसांत राष्ट्रवादीतील बडे नेते भाजप आणि शिवसेनेत प्रवेश करीत आहेत. त्यांच्या पक्षांतरावर बोलताना मुश्रीफ म्हणाले 'पक्षाचे राष्ट्रीय अध्यक्ष शरद पवार यांनी अनेकांना सत्ता दिले, पदे दिली. आमदार, खासदार केले. या वयातही ते पक्षासाठी राबत आहेत. आता काही मंडळी त्यांना सोडून सत्ता, उमेदवारीसाठी भाजप-सेनेत प्रवेश करीत आहेत. ही मंडळी त्या उंदरांसारखे वागत आहेत. जहाज बुडताना पहिल्यांदा उंदीर बाहेर पळतात. अशा पद्धतीने उड्या मारणे शोभणारे नाही.'

'ईव्हीएम'मुळेच भाजपचा '२२०'चा दावा

'जनता जागरुक आहे. भाजप-सेनेवाले अन्य पक्षातील नेत्यांना उमेदवारीची ऑफर देत त्यांच्या पक्षात घेत आहेत. पक्षांतर केलेल्या मंडळींना तिकीट मिळाले तर त्या पक्षातील इच्छुक नाराज होतील. अशा नाराजांना आम्ही तिकीट देऊ. निवडणुका मतपत्रिकेवर झाल्या पाहिजेत. ईव्हीएम विरोधात ऑगस्ट क्रांतीदिनी मुंबईतील मोर्चात सहभागी होणार आहे. आगामी निवडणुकीत २२० जागा जिंकण्याचा भाजपचा दावा ईव्हीएममुळेच आहे' असे मुश्रीफ म्हणाले.

'प्राप्तिकर'ची धाड पडेल हे स्वप्नातही वाटले नव्हते

प्राप्तिकर विभागाच्या कारवाईवर मुश्रीफ म्हणाले, 'दिसं जातील... दिसं येतील या गाण्यातील अर्थावर माझा विश्वास आहे. सध्याची स्थिती बदलेल. छापासत्रादरम्यान अधिकाऱ्यांनी त्रास दिला नाही. मात्र कौटुंबिक जीवन अस्ताव्यस्त बनले. घरातील महिलांची कुचंबणा झाली. छाप्यादरम्यान अधिकाऱ्यांनी तपासणीत उशा फाडल्या, गाद्या फाडल्या. तिजोरी, कपाट उचकटले. बाथरुमही तपासून पाहिले. अजून प्रक्रिया सुरू आहे. त्यांनी काही कागदपत्रे सोबत नेली आहेत. मी लोकशाही मानणारा कार्यकर्ता आहे, यामुळे छाप्याविषयी काही बोलणार नाही. अधिकाऱ्यांना पूर्ण सहकार्य केले. सासऱ्याच्या घरी प्राप्तिकर विभागाची धाड पडेल हे माझ्या सुनांना स्वप्नातही वाटले नव्हते.'

कुपेकर आणि पवार या एकाच नाण्याच्या बाजू

डॉ. नंदिनी बाभूळकर यांच्या भाजप प्रवेशाच्या चर्चेवर मुश्रीफ म्हणाले, 'पक्षाचे नेते शरद पवार आणि दिवंगत बाबासाहेब कुपेकर यांचे नाते सर्वश्रृत आहे. कुपेकर आणि पवार हे एकाच नाण्याच्या दोन बाजू आहेत. त्यामुळे बाभूळकर पक्ष सोडतील यामध्ये तथ्य नाही.'

०००

(मूळ कॉपी)

राष्ट्रवादी सोडणारे उंदरासारखे, मुश्रीफांची पक्ष बदलणाऱ्यांवर जळजळीत टीका

म. टा. प्रतिनिधी, कोल्हापूर

'दिस जातील दिस येतील, भोग सरंल, सुख येईल' असा आशावाद राष्ट्रवादी काँग्रेसचे प्रदेश उपाध्यक्ष व आमदार हसन मुश्रीफ यांनी सध्य स्थितीवर व्यक्त केला. दोन दिवसापूर्वी त्यांच्या कागल येथील निवासस्थानासह कारखाना व ऑफीसवर प्राप्तिकर विभागाने छापे घातला होते. त्या पार्श्वभूमीवर मुश्रीफांनी शनिवारी पत्रकारांशी बोलताना सिनेगीताचा आधार नजीकच्या काळात त्यांनी स्वतसह पक्षाला चांगले दिवस येतील अशा भावना व्यक्त केल्या. त्याचवेळी'अडचणीच्या काळात पक्ष सोडून जाणारे हे उंदरासारखे आहेत. जहाज बुडताना पहिल्यांदा उंदीरच बाहेर उड्या मारतात' अशा शब्दांत सत्ता व पदासाठी पक्षाला सोडचिठ्ठी देणाऱ्यांवर त्यांनी जहरी टीका केली.

राष्ट्रवादी काँग्रेसतर्फे कोल्हापूर जिल्ह्यातील विधानसभा निवडणुकीसाठी इच्छुक उमेदवारांच्या मुलाखती शनिवारी सर्किट हाऊस येथे झाल्या.मुश्रीफ यांनी कागल विधानसभा मतदारसंघातून उमेदवारी मागितली. याप्रसंगी ते पत्रकारांशी बोलत होते. गेल्या काही दिवसात राष्ट्रवादीतील बडे पदाधिकारी भाजप, सेनेत प्रवेश केला. त्या पक्षांतर करणाऱ्या मंडळींची उंदरांशी तुलना करत मुश्रीफ म्हणाले 'पक्षाचे राष्ट्रीय अध्यक्ष शरद पवार यांनी अनेकांना सत्ता दिले, पदे दिली, त्यांच्यामुळे अनेकांना मानमरातब मिळाला.अनेकांना आमदार, खासदार केले. या वयातही ते पक्षासाठी राबत आहेत. आता काही मंडळी त्यांना सोडून सत्ता व उमेदवारीसाठी भाजप-सेनेत प्रवेश करत आहेत. पक्षांतर करणारी ही मंडळी उंदरांसारखे वागत आहेत. जहाज बुडताना पहिल्यांदा उंदरं बाहेर पळतात. अशा पद्धतीने उड्या मारणे शोभणारे नाही. स्वार्थासाठी उड्या मारणाऱ्यांना उंदरंच म्हणावे लागेल.'

ईव्हीएममुळेच भाजपचा २२०चा दावा

जनता खूप जागरुक आहे. भाजप-सेनेवाले अन्य पक्षातील नेत्यांना उमेदवारीची ऑफर देत त्यांच्या पक्षात घेत आहेत. त्यामुळे पक्षांतर केलेल्या मंडळींना तिकीट मिळाले तर त्या पक्षातील इच्छुक उमेदवार नाराज होणार. अशा नाराजांना आम्ही तिकीट देऊ. निवडणुका या मतपत्रिकेवर झाल्या पाहिजेत. ईव्हीएम विरोधात ऑगस्ट क्रांती दिनी मुंबईतील मोर्चात सहभागी होणार आहे. भाजपवाल्यांचा आगामी विधानसभा निवडणुकीत २२० जागा जिंकण्याचा दावा हा ईव्हीएम मशिनमुळेच आहे.'

..........

प्राप्तिकरची धाड पडेल हे स्वप्नातही कधी वाटले नव्हते

प्राप्तिकर विभागाच्या कारवाईवर बोलताना मुश्रीफ यांनी दिस जातील, दिस येतील' या गाण्याचा संदर्भ दिला. ते म्हणाले, 'त्या गाण्यातील अर्थावर माझा विश्वास आहे. सध्याची स्थिती बदलेल. 'छापासत्रादरम्यान अधिकाऱ्यांनी काही त्रास दिला नाही. मात्र छापासत्राच्या कालावधीत कौटुंबिक जीवन अस्ताव्यस्त बनले. घरातील महिलांना फ्रेश होता आले नाही. छापा दरम्यान अधिकाऱ्यांनी उशा फाडल्या, गाद्या फाडल्या. तिजोरी, कपाट उसकटले. बाथरुम, संडास सगळे तपासले. अजून अजून प्रक्रिया सुरू आहे. त्यांनी काही कागदपत्रे सोबत नेली आहेत. मी लोकशाही मानणारा कार्यकर्ता आहे, यामुळे त्या छाप्याविषयी काही बोलणार नाही. अधिकाऱ्यांना पूर्ण सहकार्य केले. सासऱ्याच्या घरी प्राप्तिकर विभागाची धाड पडेल हे माझ्या सुनांना स्वप्नातही वाटले नव्हते. '

................................

कुपेकर आणि पवार एकाच नाण्याच्या दोन बाजू

डॉ. नंदिनी बाभूळकर यांच्या भाजप प्रवेशाच्या चर्चेवर मुश्रीफ म्हणाले, 'पक्षाचे नेते शरद पवार आणि दिवंगत बाबासाहेब कुपेकर यांचे नाते सर्वश्रृत आहे. कुपेकर आणि पवार हे एकाच नाण्याच्या दोन बाजू आहेत. त्यांच्यातील नातं घट्ट आहे. यामुळे डॉ. बाभूळकर हे पक्ष सोडतील यामध्ये काही तथ्य नाही.'

म. टा. वृत्तसेवा, कराड

मागील दिवसांपासून कोयना धरण पाणलोट क्षेत्रात मुसळधार पर्जन्यवृष्टी सुरू आहे. शिवसागर जलाशयातील पाणीसाठ्यात वेगाने वाढ होत आहे. शनिवारी सायंकाळी सहा वाजता संपलेल्या चोवीस तासांत कोयना धरणातील पाणीसाठ्यात सहा टीएमसीने वाढ झाली आहे. पावसाचा जोर वाढल्याने २१ हजार ३६९ क्युसेकने पाण्याची आवक धरणात होत आहे. धरणातील पाणीसाठा ६१ टीएमसी झाला आहे. नवजा येथे सर्वात जास्त म्हणजे 271 मिली मीटर पावसाची नोंद झाली आहे.

धरण पाणलोट क्षेत्रात पावसाने चांगलाच जोर धरला असून, धरणातील पाण्याची पातळी झपाट्याने वाढत आहे. धरणात पाण्याची आवक २१३६१ क्युसेक प्रती सेकंद वेगाने होत असल्याने धरणातील पाण्याची पातळी २११७.०१ फूट म्हणजेच ६४५.२८७ मीटर तर पाणीसाठा ६१ टीएमसी झाला आहे. शनिवारी कोयनानगर येथे २३७, नवजात सर्वात जास्त २७१ आणि महाबळेश्वर येथे २०४ मी. मी. पावसाची नोंद झाली आहे. दरम्यान, पाटण तालुक्यात सर्वदूर जोरदार पावसाच्या सरी कोसळू लागल्या आहेत. जनजीवन विस्कळीत झाले आहे. शुक्रवारी रात्रीपासून मुसळधार पावसामुळे नद्या, ओढ्यांना पूर आल्याने पाटण नवीन बसस्थानकात आणि आजूबाजूच्या दुकान गाळ्यात पाणी शिरले होते. दुपारी पाणी ओसरल्यावर वाहतूक सुरळीत झाली.

कराड परिसरातील शेती जलमय

पाटण प्रमाणेच कराड परिसरातही शनिवारी दिवसभर पावसाची दमदार हजेरी कायम होती. खरीपातील भात, सोयाबीन, ज्वारी, मका आणि लागणीचा ऊस पाण्याखाली गेला आहे. पाऊस असाच काही दिवस कायम राहिला तर पिके धोक्यात येण्याची भितीही शेतकऱ्यांमधून व्यक्त होत आहे. आजच्या पावसामुळे येथील नाले, ओढे, वगळींमधून पाणी वाहू लागले आहे. कृष्णा व कोयना नद्यांच्या पाणी पातळीतही वाढली आहे. मात्र, पावसाचे पाणी गढूळ असल्याने जलशुद्धीकरणाची सोय नसलेल्या गावांतील पिण्याच्या पाण्याची समस्याही उभी राहिली आहे.

..............

कोयनेत ३.१ रिश्टर स्केलचा भूकंप

कोयना परिसरात शुक्रवारी रात्री १०.३६ वाजता ३.१ रिश्टर स्केलच्या भूकंपाचा सौम्य धक्का बसला. या भूकंपाचा केंद्रबिंदू वारणा खोऱ्यात होता. भूकंपाचा धक्का सौम्य असल्याने कोणत्याही स्वरूपाची जीवित अथवा वित्तहानी झाली नसल्याची माहिती महसूल विभागाकडून देण्यात आली आहे.

................

नांदेड- जिल्ह्याच्या वेगवेगळ्या भागात शनिवारी दमदार पाऊस झाल्याने बळीराजा सुखावला आहे. गेल्या काही दिवसांपासून करण्यात येत असलेली मुसळधार पावसाची प्रतीक्षा मात्र अजूनही कायमच आहे.

नांदेड जिल्ह्यातील काही भागात शुक्रवारी सायंकाळी पावसाला सुरुवात झाली. काही वेळ विश्रांती घेत पावसाच्या सरी बरसत होत्या. संततधार पावसाने शहरातले अनेक रस्ते निसरडे झाले असून काही ठिकाणी खड्डे उघडे पडल्याने मोठ्या प्रमाणाता पाणी साचले आहे. गोदावरी नदीच्या लाभक्षेत्रात पाऊस झाल्याने विष्णुपूरी धरणाच्या पाणी पातळीत वाढ होण्याची शक्यता व्यक्त केली जात आहे. राज्यातल्या अन्य भागात तसेच लगतच्या परभणी, हिंगोली जिल्ह्यात मुसळधार पाऊस पडत असताना नांदेडमध्ये मात्र पावसाचा जोर अजूनही नाही. पावसामुळे खरीप पिकांना जीवदान मिळाले आहे.

शरद पवार, बदलापूर

पुराने वेढा घातल्याने महालक्ष्मी एक्स्प्रेस जागची हलत नव्हती. त्यामुळे सात तरुण प्रवासी खाली उतले. रस्त्यावरून पुढचा प्रवास करू असा विचार करत त्यांनी पाण्यातून वाट काढण्यास सुरूवात केली. मात्र, सुरुवातीला गुढग्यापर्यंत असलेले पाणी पुढे छाती आणि गळ्यापर्यंत येऊ लागल्याने सातही जण भेदरले. तोपर्यंत सभोवताली दाखल झालेल्या ग्रामस्थांनी गटांगळ्या खाणाऱ्या सात जणांना पाहीले आणि काही ट्रेकर्सच्या मदतीने त्यांना मोठ्या धाडसाने पाण्याबाहेर काढले. वेळीच ही मदत मिळाली नसती तर हे सातही जण पुराच्या पाण्यात वाहून गेले असते. आकाश दुबळे, गणेश पांडव, सचिन रोकडे, संदीप शिंदे, विशाल पांडव, सुमिन सायेकर आणि मेहबूब नांबोळी अशी त्या सात प्रवाशांची नावे आहेत. कासगावचे ग्रामस्थ आणि ट्रेकर्स त्यांच्यासाठी देवदूत ठरले.

कॅन्सरग्रस्त रुग्णाचे हाल !

पुण्याचे रहिवासी असलेला कॅन्सरग्रस्त तरुण आपल्या पत्नीसह शुक्रवारी टाटा हॉस्पिटलमध्ये उपचारांसाठी गेला होता. महालक्ष्मी एक्स्प्रेसने परतीचा प्रवास त्यांना भलताच तापदायक ठरला. पाण्याच्या वेढ्यात अडकलेली एक्स्प्रेस ते सुखरूप स्थळापर्यंतचा डोंगराळ भागातली तब्बल आठ किलोमीटरची पायपीट करताना त्यांचे प्रचंड हाल झाले. खांद्यावर पाण्याने भिजलेली जड बॅग, चपला हरविल्याने अनवाणी पायपीट, हातात वैद्यकीय रिपोर्टची फाईल आणि चेहऱ्यावरील हतबलता बघून अनेकांचे डोळे पाणावले. इतर प्रवासी त्यांच्या मदतीसाठी नेटाने प्रयत्न करत होते. मानसिक आधार देत त्यांना मार्गक्रमण करण्यासाठी प्रोत्साहीत करत होते.

अजमेरच्या कुटूंबाची व्यथा

अजमेर येथून दहा नागरिकांचे कुटूंब महालक्ष्मी एक्स्प्रेसमधून प्रवास करत होते. या प्रवाशांचे सामानही मोठ्या प्रमाणात होते. मात्र महालक्ष्मी एक्स्प्रेस पाण्यात अडकल्याने, प्रवाशांचे जीव वाचवण्याला बचाव पथके प्राधान्य देत होते. त्यामुळे या प्रवाशांचे कुटूंब सुखरूप बाहेर आले. मात्र, यातील एका जोडप्याच्या जुळ्या मुलांच्या अंगावरील कपडेही बॅगांमध्येच राहिले. बचाव पथकाने दिलेल्या चादर अंगावर टाकलेल्या आफीया आणि सोफीया या जुळ्या बहिणी थंडीत कुडकुडत होत्या. सामानाच्या बँगा घेतल्याशिवाय जायचे कसे? हा प्रश्न त्यांच्या चेहऱ्यावर दिसत होता.

मणिपूरते कासगाव

मणिपूर येथून मनी लांबा हे पत्नी आणि तीन वर्षांच्या मुलीसोबत पहिल्यांदाच मुंबई आणि महाराष्ट्रातील काही पर्यटनस्थळे फिरण्यासाठी आले होते. 'आमच्या महाराष्ट्र पर्यटनातील हा अनुभव सर्वात कटू अनुभव होता' अशी प्रतिक्रीया त्यांनी दिली. रात्रभर काहीही न खाता पिता आणि लहानग्या मुलीसह पावसात भिजत आणि अनवाणी डोंगर दऱ्यांतला प्रवास हा आजवरच्या आयुष्यातला सर्वात धक्कादायक प्रसंग असल्याचे लांबा यांनी सांगितले.

म. टा. प्रतिनिधी, कोल्हापूर

'विधानसभा निवडणुकीत ज्याच्याकडे निवडून येण्याची क्षमता आहे, त्यालाच पक्षाची उमेदवारी' हे सूत्र निश्चित असल्याचे राष्ट्रवादी काँग्रेस पक्षाचे निरीक्षक व आमदार शशिकांत शिंदे यांनी शनिवारी कोल्हापुरात स्पष्ट केले. जिल्ह्यातील दहा विधानसभा मतदारसंघासाठी पक्षातर्फे इच्छुकांच्या मुलाखती झाल्या. आमदार हसन मुश्रीफ, संध्यादेवी कुपेकर, माजी आमदार के. पी. पाटील, जिल्हाध्यक्ष ए. वाय. पाटील, राजेंद्र पाटील-यड्रावकर यांच्यासह तीस जणांनी मुलाखती दिल्या.

पक्ष निरीक्षक शिंदे, माजी मंत्री अण्णासाहेब डांगे, सांगलीचे माजी महापौर सुरेश पाटील, मानसिंगराव गायकवाड, कार्याध्यक्ष अनिल साळोखे, महिला आघाडीच्या जिल्हाध्यक्षा संगीता खाडे यांच्या उपस्थितीत येथील सर्किट हाऊस येथे दिवसभर मुलाखती झाल्या. राधानगरी मतदारसंघातून दुपारी जिल्हाध्यक्ष ए. वाय. पाटील यांनी निरीक्षकांकडे उमेदवारी मागितली. तर माजी आमदार के. पी. पाटील हे सायंकाळी त्यांना भेटले. के. पी. यांच्या उमेदवारीसाठी जि. प. सदस्य जयवंत शिंपी, मुकुंद देसाई, धैर्यशील पाटील, पंडितराव केणे, उमेश भोईटे यांनी निरीक्षकांकडे पाठपुरावा केला. पक्ष जो आदेश देईल, त्याप्रमाणे काम करण्याची ग्वाही के. पी. आणि ए. वाय. यांनी दिली.

बाबासाहेब पाटील आसुर्लेकर यांनी शाहूवाडी मतदारसंघातून यापूर्वी मी निवडणूक लढवली आहे. यंदा तरुण नेतृत्वाला संधी मिळावी. संतोष धुमाळ यांना उमेदवारी द्या असे सुचविले. त्यांनी उमेदवारी अर्ज नेऊनही मुलाखत दिली नाही. कागलमधून आमदार मुश्रीफ हेच उमेदवार असतील तर त्यांना माझा पाठिंबा असेल असे भैय्या माने स्पष्ट केले. कोल्हापूर उत्तर मतदारसंघातून सात इच्छुकांनी तिकीटाची मागणी केली. ज्येष्ठांना उमेदवारी ठरल्यास शहराध्यक्ष आर. के. पोवार यांना पाठिंबा आणि तरुणांना संधी हा निकष लावल्यास मला मिळावी अशी मागणी आदिल फरास यांनी केली.

'प्रत्येक मतदारसंघात इच्छुकांची संख्या जादा असली तरी पक्ष देईल त्या उमेदवाराच्या पाठीशी ठामपणे उभे राहण्याचा शब्द इतर इच्छुकांनी दिला आहे. उमेदवारांना प्रचारासाठी पुरेसा कालावधी मिळावा म्हणून ऑगस्ट महिन्याच्या मध्यापर्यंत पक्षाकडून उमेदवारी जाहीर होईल. काँग्रेस, स्वाभिमानी संघटनेसह मित्रपक्षांसोबत आघाडीची चर्चा सुरू आहे.'

- आमदार शशिकांत शिंदे, पक्ष निरीक्षक

मतदारसंघनिहाय इच्छुक उमेदवार

कोल्हापूर उत्तर : शहराध्यक्ष आर. के. पोवार, उद्योजक व्ही. बी. पाटील, माजी महापौर हसिना फरास, माजी नगरसेवक आदिल फरास, रोहित दि. पाटील, महेंद्र चव्हाण, महिला आघाडी शहराध्यक्षा जहिदा मुजावर.

कोल्हापूर दक्षिण : रोहित पाटील, निरंजन कदम, महादेव माने.

कागल आमदार : हसन मुश्रीफ, भैय्या माने.

इचलकरंजी : नितीन जांभळे, बाळासाहेब देशमुख.

हातकणंगले : भास्कर शेटे, अनिल कांबळे, लखन बेनाडे.

करवीर : सोनाजी पाटील, मधुकर जांभळे.

चंदगड : आमदार संध्यादेवी कुपेकर, एम. जे. पाटील.

शाहूवाडी : संतोष धुमाळ.

शिरोळ : राजेंद्र पाटील यड्रावकर, चंगेजखान पठाण.

राधानगरी-भुदरगड : माजी आमदार के. पी. पाटील, जिल्हाध्यक्ष ए. वाय. पाटील, रणजित के. पाटील, धैर्यशील पाटील, उमेश भोईटे.

म. टा. प्रतिनिधी, कोल्हापूर

' गेल्या साठ वर्षांत राज्यातील २५० घराण्यांनी महाराष्ट्र लुटला आहे. राज्यात येणारे नवीन मजबूत सरकार या घराण्यांचा हिशोब चुकता करेल', असा इशारा भाजपचे प्रदेशाध्यक्ष चंद्रकांत पाटील यांनी दिला. देशात ६० वर्षे कमीअधिक प्रमाणात नेहरु घराण्याने सत्ता राबवली. त्याचप्रमाणे राज्यातही शरद पवारांनी आपल्या घराण्याची सत्ता राबवली. भाजपमध्ये येण्यासाठी कोणावरही प्राप्तीकर, ईडीचा दबाव टाकला जात नसून काँग्रेस व राष्ट्रवादीमधील नेत्यांना आमचा विचार पटल्यामुळेच ते प्रवेश करत आहेत', अशी स्पष्टोक्तीही त्यांनी दिली.

माजी राज्यमंत्री भरमू सुबराव पाटील यांच्या भाजपप्रवेश कार्यक्रमात ते बोलत होते. 'काँग्रेस व राष्ट्रवादीतील प्रमुख नेत्यांसह कार्यकर्ते मोठ्या संख्येने प्रवेश करत असल्याने भाजप शिवसेना युतीच्या २५० जागा निवडून येतील', असा विश्वासही प्रदेशाध्यक्षांनी व्यक्त केला.

तपास यंत्रणांच्या धाकाने सत्ताधारी सत्तांतर घडवताहेत, असा आरोप राष्ट्रवादीचे अध्यक्ष शरद पवार यांनी भाजपवर केला आहे. या टीकेचा प्रदेशाध्यक्ष पाटील यांनी आपल्या भाषणात समाचार घेतला. ते म्हणाले, 'त्यांना आपल्या घरात आपली माणसे सुरक्षित ठेवता येत नाहीत. त्यांच्या माणसांना नेतृत्वाबद्दल आदर राहिलेला नाही. त्यांची तुम्ही चौकशी करत नाही, म्हणून या मंडळींची भाजपमध्ये येण्यासाठी रांग लागली आहे. प्राप्तीकर खात्याची धाड अवघ्या आठ दिवसात डिझाईन होत नाही हे पवारांना माहीत आहे. न्यायालय, प्राप्तीकर, ईडी, निवडणूक आयोग या स्वायत्त संस्था असून या संस्था पंतप्रधान नरेंद्र मोदींचे आदेश पाळत नाहीत. धाड टाकण्यापूर्वी प्राप्तीकर विभाग दोन ते तीन वर्षे मेहनत घेत असतो. प्राप्तीकरचा छापा ज्यांच्यावर पडला आहे, ते जिल्ह्यातील नेते सहानुभुती मिळवण्याचा प्रयत्न करत आहेत. पवारांनी आपले आमदार व कार्यकर्ते भाजपमध्ये प्रवेश का करत आहेत, याचा विचार करावा.'

प्रदेशाध्यक्ष पाटील पुढे म्हणाले, 'गेल्या ६० वर्षात कमी अधिक प्रमाणात नेहरु कुटुंबातील व्यक्तीकडे सत्ता असावी असा जाणीवपूर्वक प्रयत्न करण्यात आला. काँग्रेसने डॉ. बाबासाहेब आंबेडकरांना तिकीट मिळवून दिले नाही. त्यांना पराभूत केले. त्यांना लोकसभेत बोलू दिले नाही. सरदार वल्लभभाई पटेलांना पुढे येऊ दिले नाही. काँग्रेसची हीच पद्धत पवारांनी कमी अधिक प्रमाणात राज्यात वापरली. पवार आपल्या मुलीला बारामतीत तिकीट देतात. पार्थ पवारांना लोकसभा निवडणुकीत मावळमधून उमेदवारी देतात. आता दुसरा नातू विधानसभेला उभा राहणार आहे. घराणेशाहीमुळे सामान्यांना तिकीट मिळत नसल्याने आज त्यांच्या पक्षातील लोक फुटून बाहेर पडत आहेत. महाराष्ट्र राज्याच्या स्थापनेपासून २०० ते २५० घराण्यांनी सत्ता चालवली. या घराण्यांतील व्यक्ती खासदार, आमदार, जिल्हा परिषद अध्यक्ष, कारखान्यांचा अध्यक्ष होतात. एक कारखाना बंद पाडायचा आणि दुसरा कमी किंमतीत विकत घ्यायचा, असे व्यवहार केले असून या घराण्यांनी महाराष्ट्र लुटला आहे. या सर्वांचे हिशोब आता चुकते करायचे असून त्यांची सुटका नाही. '

...

३१ जुलैला फुटणार मोठा बॉम्ब

'काँग्रेस आणि राष्ट्रवादीमधील दिग्गज नेत्यांना भाजपमध्ये प्रवेश देणार असून ३१ जुलैला मुंबईत मोठा बॉम्ब फुटणार आहे', असा गौप्यस्फोट प्रदेशाध्यक्ष पाटील यांनी केला. मुख्यमंत्र्यांची जनादेश यात्रा ऑगस्ट महिन्यात असली तरी दर मंगळवारी मुंबईत ते मंत्रिमंडळाच्या बैठकीला उपस्थित राहणार आहेत. त्यावेळी प्रत्येक मंगळवारी छोटे मोठे बॉम्ब फुटणार असल्याचेही ते म्हणाले.

म. टा. प्रतिनिधी, कोल्हापूर

महापालिकेच्यावतीने रविवारी शहरातील अनेक भागात स्वच्छता मोहीम राबवली. मोहिमेदरम्यान लक्ष्मीपुरी रिलायन्स मॉलच्यामागे उघड्यावर कचरा टाकल्याचे निदर्शनास आले. कचरा टाकणाऱ्या रोहित सलवळकर यांना महापालिका प्रशासनाने तत्काळ ५०० रुपयाचा दंड केला.

व्याघ्र दिन ... विशेष ... लोगो

म. टा. प्रतिनिधी, कोल्हापूर

समृद्ध पर्यावरणाचे प्रतीक म्हणजे वाघ अशी ओळख आहे. पश्चिम घाटातील सह्याद्री व्याघ्र प्रकल्प परिसर अतिशय पोषक समजला जात आहे. या परिसरात वाघांची संख्या वाढावी यासाठी व्याघ्र प्रकल्पाच्या माध्यमातून जाणीवपूर्वक प्रयत्न सुरू आहेत. तृणभक्षक प्राण्यांची संख्या वाढविण्यासाठी गवताळ पट्टा तयार केला जात आहे. भविष्यात सह्याद्री व्याघ्र प्रकल्प हा वाघांच्या अस्तित्वाचे प्रमुख क्षेत्र असेल असे वन्य जीव अभ्यासकांचे म्हणणे आहे. २०१४ मधील गणनेनुसार सह्याद्री व्याघ्र प्रकल्पात तीन वाघ आढळल्याच्या नोंदी आहेत.

पर्यावरण,वन्यजीव अभ्यासकांच्या मते ही संख्या पाचपर्यंत असल्याचे सांगितले जात असले तरी अधिकृत नोंदी आढळत नाहीत. तर महाराष्ट्रातील वाघांची संख्या २५० च्या घरांत पोहचली असल्याचे अभ्यासकांचे म्हणणे आहे. चांदोली आणि कोयना परिसरात चार, तिलारीत दोन व राधानगरी परिसरात एका वाघाचे अस्तित्व आढळल्याचे अभ्यासक सांगतात. २९ जुलै हा व्याघ्रदिन म्हणून साजरा होतो. दर चार वर्षांनी वाघांची गणना होते. राज्यात एकूण सहा व्याघ्र प्रकल्प आहेत. यामध्ये अमरावती जिल्ह्यातील मेळघाट, चंद्रपूर जिल्ह्यातील ताडोबा-अंधारी, नागपूर जिल्ह्यातील पेंच, भंडारा व गोंदिया जिल्ह्यातील नवेगाव-नागझिरा, वर्धा व नागपूर जिल्ह्यातील सीमारेषेवरील बोर आणि पश्चिम घाटातील सह्याद्री व्याघ्र प्रकल्पाचा समावेश आहे. सह्याद्री व्याघ्र प्रकल्पासाठी कोयना व चांदोली अभयारण्यातील परिसर राखीव ठेवला आहे.

कोयना, चांदोली अभयारण्यमधील राखीव जागा व राधानगरी, तिलारी जंगलाचा परिसर हा 'टायगर कॅरिडॉर'म्हणून ओळखला जातो. सह्याद्री व्याघ्र प्रकल्पाचे अधिकारी, वन्यजीव अभ्यासकांच्या म्हणण्यानुसार 'कोयना, चांदोली, राधानगरी, तिलारी ते पुढे गोवा आणि कर्नाटकातील जंगल असा वाघांच्या संचाराचा मार्ग आहे. हा जंगल परिसर वाघासाठी पोषक आहे. येथे मानवी उपद्रव व घुसखोरी कमी आहे.

...

कोट

'सह्याद्री व्याघ्र प्रकल्पात वाघांची संख्या वाढावी यासाठी नियोजनबद्ध प्रयत्न सुरू आहेत. वाघाचा अधिवास व वाढीसाठी पोषक वातावरण, खाद्यान्न याकडे लक्ष दिले आहे. मुळात या भागात वाघांची संख्या कमी आहे, त्याचे कारण म्हणजे तृणभक्षक प्राण्यांची अपुरी संख्या हे आहे. सांबर, भेकर हे वाघाचे खाद्य आहे. या प्राण्यासाठी गवताळ क्षेत्र तयार केले जात आहे. गवताच्या प्रजाती वाढाव्यात म्हणून अखाद्य वनस्पती हटविल्या जातात.

सत्यजित गुजर, क्षेत्र संचालक, सह्याद्री व्याघ्र प्रकल्प

...

महाराष्ट्रातील वाघांची संख्या

२००६ : १०३

२०१० : १६९

२०१४ : १९०

२०१८ : २५० (अंदाजित)

...

आज जाहीर होणार देशातील वाघांची संख्या

पंतप्रधान कार्यालयामार्फत व्याघ्रदिनाचे औचित्य साधून सोमवारी नवी दिल्ली येथे विशेष कार्यक्रमाचे आयोजन केले आहे. पंतप्रधान नरेंद्र मोदी यांच्या उपस्थितीत हा कार्यक्रम होणार आहे. याप्रसंगी २०१८ मधील देशभरातील वाघांची संख्या घोषित करण्यात येणार आहे.

म. टा. प्रतिनिधी, कोल्हापूर

'सहकारी, नागरी बँकांनी एकमेकांशी स्पर्धा करण्याऐवजी सहकार्याने खासगी बँकांना तोडीस तोड उत्तर देणे गरजेचे आहे. त्यासाठी राज्य सहकारी बँक राज्यातील सर्व सहकारी, नागरी बँकांचे पालकत्व स्वीकारेल,' अशी ग्वाही राज्य बँक प्रशासकीय मंडळाचे अध्यक्ष विद्याधर अनास्कर यांनी रविवारी दिली.

दि महाराष्ट्र स्टेट को-ऑप. बँकेच्या (राज्य बँक) पुढाकाराने आयोजित कोल्हापूर, सांगली जिल्ह्यांतील नागरी बँक पदाधिकाऱ्यांच्या वार्तालाप कार्यक्रमात ते बोलत होते. हॉटेल वृषाली येथे कार्यक्रम झाला. जिल्हा नागरी बँक असोसिएशनचे अध्यक्ष निपुण कोरे यांची प्रमुख उपस्थिती होती.

अनास्कर म्हणाले, 'सहकारी आणि राज्य बँकेने मोठ्या प्रमाणात साखर कारखान्यांना कर्ज दिले आहेत. मात्र, अलीकडे कारखान्यांची आर्थिकस्थिती कमकुवत झाल्याने बँका अडचणीत आल्या आहेत. त्यातून मार्ग काढण्यासाठी इतिहासात पहिल्यादांच पुण्यात साखर परिषद घेण्यात आली. केंद्रीय मंत्री नितीन गडकरी, मुख्यमंत्री देवेंद्र फडणवीस, सहकार मंत्री सुभाष देशमुख यांच्या उपस्थित परिषदेत सकारात्मक चर्चा झाली. त्यातील काही मागण्यांचे निर्णयही सरकारी पातळीवर झाले आहेत. अशाप्रकारे राज्य बँक कर्जदारांचे उत्पन्न वाढविण्यासाठी हातभार लावत आहे. बँक आणि सभासद यांच्यातील विविध दाव्यांतील न्यायालयीन दाव्यांतील खर्च टाळण्यासाठी राज्य बँक उपविधीत दुरूस्ती करून तडजोड समितीची निवड करणार आहे. त्याचा इतर नागरी, सहकारी बँकांनी आदर्श घ्यावा.'

राज्य बँकेचे सदस्य अविनाश महागावकर म्हणाले, 'राज्यातील बहुसंख्य जिल्हा मध्यवर्ती बँका अडचणीत आहेत. ही संधी हेरून नागरी बँकांनी आपला विस्तार गतीने करावा. बचत गट ही संकल्पना मागे पडल्याने स्त्री-पुरुषांचे गट तयार करून त्यांना कर्जपुरवठा करावा.'

माजी मंत्री प्रकाश आवाडे म्हणाले, 'नागरी बँकांचे प्रश्न सोडविण्यासाठी शिखर संस्था म्हणून राज्य बँकेने पुढाकार घ्यावा. बहुराज्य नोंदणी असलेल्या बँकांना लहान सहकारी बँकांना कर्जपुरवठा करण्यास परवानगी मिळावी.'

वीरशैव बँकेचे संचालक अनिल सोलापुरे यांनी विविध सूचना मांडल्या. यावेळी सांगली जिल्हा नागरी बँक असोसिएशनचे अध्यक्ष सुधीर जाधव, महेश धर्माधिकारी, वैभव पवार, डॉ. अजित देखमुख, संजय घाटगे आदी उपस्थित होते.

०००००

सर्वाधिक घोटाळे राष्ट्रीयीकृत बँकेत

नोटबंदी आणि त्यानंतर सर्वाधिक घोटाळे राष्ट्रीयीकृत बँकांमध्ये झाले आहेत. तरीही त्यांना सरकार अर्थपुरवठा करते. काहीजण सहकारी, नागरी बँकांबद्दल चुकीचे समज पसरवत आहेत. मात्र, ग्रामीण भागात पतपुरवठा करण्यात सहकारी बँकांच आघाडीवर आहेत. त्यांना सक्षम करण्याचा निर्णय राज्य बँकेने घेतला आहे. परकीय व्यवहारासाठी अमेरिकेतील हबीब बँकेशी करार केला आहे. छोट्या बँकांच्या व्यवसायवृद्धीसाठी सुलभपणे त्यांना कर्ज मिळवून दिले जात आहे, असेही अनास्कर यांनी सांगितले.

०००००

राज्य बँकेकडे चार हजार कोटी स्वभांडवल

अनास्कर म्हणाले, 'सध्या राज्य बँक आर्थिकदृष्ट्या सक्षम बनली आहे. यावर्षी बँकेला ३५१ कोटींचा नफा झाला. चार हजार कोटींचे स्वभांडवल आहे. यामुळे अडचणीतील नागरी, सहकारी बँकांना आर्थिक मदत केली जाईल. सहकारी, नागरी बँकाचे संचालक मंडळाच्या निवड प्रक्रियेत बदल करण्यासंबंधी आरबीआय, सरकारी पातळीवर हालचाली सुरू होत्या. मात्र, त्या यशस्वी झाल्या नाहीत. म्हणून पूर्वीप्रमाणेच संचालकांची निवड होईल.

०००००

म.टा. प्रतिनिधी, कोल्हापूर

'भाजपमध्ये नवीन येणाऱ्या व्यक्तीचे स्वागत व सन्मान केला जाईल. पण त्याच बरोबर पक्ष कार्यात पूर्वीपासून काम करत आहेत त्यांना भविष्यात मोठी संधी मिळणार आहे. विधानसभेच्या चार जागा भाजप लढणार असून आगामी काळात होणाऱ्या जिल्हा परिषद, पंचायत समिती, महानगरपालिका, नगरपालिका, जिल्हा बँक, गोकुळ,बाजार समितीची निवडणूक लढवली जाणार आहेत. या निवडणुकीत प्रत्येकाला स्थान दिले जाईल,' असे आश्वासन भाजपचे प्रदेशाध्यक्ष चंद्रकांत पाटील यांनी दिले. प्राप्तिकर विभागाच्या छाप्यानंतर जिल्ह्यातील नेते सहानभूती मिळविण्याचा प्रयत्न करत आहेत, असा टोलाही त्यांनी आमदार हसन मुश्रीफ यांचे नाव न घेता लगावला.

पाटील यांच्या उपस्थितीत माजी मंत्री भरमू सुबराव पाटील, त्यांचा मुलगा 'गोकुळ'चे संचालक दीपक पाटील, सून माजी जि. प. सदस्य ज्योती पाटील, माजी नगरसेवक अजिंक्य चव्हाण यांच्यासह पाचशेहून अधिक कार्यकर्त्यांनी भाजपमध्ये प्रवेश केला. या कार्यक्रमात पाटील बोलत होते.

ते म्हणाले, 'भाजपमध्ये येण्यासाठी प्रवेशाची रांग लागली असली असून सकाळपासून अनेकजण भेटून गेले. जिल्ह्यात १३ ऑगस्टला मोठा हॉल भाड्याने घ्या. त्या दिवशी जिल्ह्यातील अनेक कार्यकर्ते प्रवेश करणार आहेत. केंद्रात व राज्यात गेल्या पाच वर्षात सरकारने सर्वसामान्यांसाठी मोठी कामे केली असल्याने विरोधी पक्षातील नेते व कार्यकर्ते प्रवेश करत आहेत.'

ते पुढे म्हणाले, 'चंदगड मतदारसंघ भाजपकडे जाणार की शिवसेनेकडे जाणार अशी बांधावरची चर्चा बंद करून भाजपमध्ये या. पक्षात नवीन येणाऱ्यांचे स्वागत केले जाईल, त्यामुळे जुन्या कार्यकर्त्यांनी त्यामुळे अस्वस्थ होऊ नये. महेश जाधव, बाबा देसाई यांच्यासह सर्वांना पदे दिली आहेत. जे शिल्लक आहेत त्यांनाही पदे मिळतील राज्यात १३० महामंडळे असून त्यावर १३०० कार्यकर्त्यांना स्थान दिले जाईल.'

भरमू पाटील म्हणाले, 'महाडिक यांच्या संबधाखातर लोकसभा निवडणुकीत भाजपच्या विरोधात राष्ट्रवादीच्या धनंजय महाडिक यांचा प्रचार केला होता. पण कोल्हापूरला प्रथमच एका राष्ट्रीय पक्षाच्या प्रदेशाध्यक्षपदाची संधी चंद्रकांत पाटील यांच्या रूपाने मिळाली आहे. गेल्या २० वर्षांत तालुक्यातील सर्व सिंचन प्रकल्प रखडले आहेत. सत्ता नसतानाही जिल्हा परिषद, पंचायत समिती, ग्रामपंचायतीच्या निवडणुकीत जनता आमच्यासोबत आहे. तालुक्याच्या सर्वांगीण विकासासाठी भाजपमध्ये प्रवेश करत आहे.'

यावेळी आमदार अमल महाडिक, जिल्हाध्यक्ष हिंदुराव शेळके, गोकुळचे संचालक बाबा देसाई, गोपाळराव पाटील, अशोक चराटी, उद्योजक चंद्रकांत जाधव उपस्थित होते. स्वागत महानगरअध्यक्ष राहुल चिकोडे यांनी केले तर सूत्रसंचालन विजय जाधव यांनी केले.

दादांनी जिल्हा खाऊन टाकला

काही पक्ष लहान भाऊ म्हणून आम्हाला उपमा देतात. पण पालकमंत्री चंद्रकांत पाटील यांच्या नेतृत्वाखाली जिल्ह्याला शिवसेनेचे दोन खासदार मिळाले आहेत. जिल्हा परिषद, पंचायत समिती, नगरपालिकेत सत्ता मिळवली आहे. जिल्ह्यात भाजप प्रथम क्रमांकाचा पक्ष झाला आहे. पालकमंत्री चंद्रकांत पाटील यांनी जिल्हा खाऊन टाकला आहे, असे पश्चिम महाराष्ट्र देवस्थान समितीचे अध्यक्ष महेश जाधव यांनी करताच हशा पिकला.

चंदगडवासीय स्टेजवर बसले

माजी मंत्री पाटील यांचे समर्थक मोठ्या संख्येने आल्याने संगीतसूर्य केशवराव भोसले नाट्यगृह खचाखच भरले होते. ग्रामीण भागातून आलेल्या कार्यकर्त्यांना बसायला जागा नसल्याने पालकमंत्री पाटील यांनी कार्यकर्त्यांना थेट स्टेजवर बसायला बोलावले. त्यामुळे स्टेज खचाखच भरले होते.

'मिश्किल वक्तव्याचा मुश्रीफांकडून विपर्यास'

प्राप्तिकर खात्याचे छापे आणि ईडीची भीती दाखवून काँग्रेस आणि राष्ट्रवादीच्या आमदारांचा पक्षप्रवेश करून घेतला जात आहे, या पवारांनी केलेल्या टीकेचा त्यांनी समाचार घेतला. 'जिल्ह्यातील राष्ट्रवादीच्या एका नेत्याला भाजपमध्ये प्रवेश करा, असे मिश्किलपणे म्हणालो होते. त्यानंतर त्या नेत्याच्या घरावर प्राप्तिकर विभागाच्या टीमने छापा टाकला. माझ्या विधानाचा विपर्यास करून भाजपमध्ये प्रवेश करण्यासाठी छापा टाकण्यात आला अशी टीका होत आहे. पण प्राप्तिकर खात्याकडून छापा टाकण्यासाठी दोन वर्षे तयारी केले जाते, हे पवारांनाही माहीत आहे. 'प्राप्तिकर'च्या छाप्यानंतर जिल्ह्यातील नेते सहानभूतीची लाट मिळवत आहेत. पण छाप्यात काय घडले ते खाते सांगेल, असेही ते म्हणाले.

Appasaheb.mali@timesgroup.com

Tweet:Appasaheb_MT

कोल्हापूर : गावपातळीवरील कुरघोडीचे राजकारण, सार्वजनिक आरोग्याविषयीची अनास्था आणि ग्रामपंचायतीमधील गटातटाची सत्ता यामुळे दहा गावांतील सांडपाणी प्रक्रिया प्रकल्प कागदापुरताच सीमित राहिला. राज्य सरकार नाबार्डच्या माध्यमातून 'ग्रामीण पायाभूत विकास निधी' योजनेंतर्गत अर्थसाह्य करणार होते. मात्र, नऊ गावांनी गेल्या सहा वर्षांत प्रकल्पासाठी जागाच उपलब्ध करून दिली नाही. दुसरीकडे नाबार्डने ही योजनाच बंद केल्यामुळे निधी मिळण्याची शक्यता मावळली. गावांमध्ये जागेअभावी प्रकल्प आराखडा बनला नसल्याने निधीही लांबला. यामुळे सांडपाणी प्रक्रिया प्रकल्प या गावांतून हद्दपार झाला आहे.

'नाबार्ड'च्या योजनेतून ११ पैकी केवळ पन्हाळा तालुक्यातील कोडोली येथे सांडपाणी प्रक्रिया प्रकल्पाचे काम सुरू आहे. येत्या आठ-नऊ महिन्यांच्या कालावधीत कोडोलीतील प्रकल्प पूर्ण होईल असे महाराष्ट्र जीवन प्राधिकरणच्या अधिकाऱ्यांनी सांगितले. राज्य सरकारने मोठ्या लोकवस्तीच्या गावांत सांडपाणी प्रक्रिया प्रकल्प व घनकचरा व्यवस्थापन करण्यासाठी राज्यातील ११० गावांचा सर्व्हे झाला. यामध्ये कोल्हापूर जिल्ह्यातील २८ गावांचा समावेश होता. ग्रामपंचायतीने जागा उपलब्ध करून द्यायची आणि प्रकल्पाचा खर्च नाबार्ड देणार असे धोरण ठरले होते. सर्व्हेच्या कालावधीत फक्त ११ गावांनी तशी सहमती दिली होती. मात्र, प्रकल्पासाठी प्रत्यक्ष जागा निश्चिती, लाइनआउट करायची वेळ आली तेव्हा रुकडी, कबनूर, कोरोची, हुपरी, पट्टणकोडोली, अब्दुललाट, शिरोळ, उचगाव आणि रेंदाळ गावांनी प्रकल्पासाठी जागाच उपलब्ध केली नाही.

नाबार्डच्या माध्यमातून २०१३ पासून दरवर्षी या योजनेला मुदतवाढ दिली. प्रत्येकवेळी संबंधित गावांना आवाहन केले, पण गावांनी फारसा प्रतिसाद दिला नाही. उचगावने पहिल्यांदा स्मशानभूमीजवळ जागा उपलब करून देण्याची तयारी दर्शविली होती. नंतर जागा नसल्याचे सांगितले. रुकडीने तलाव परिसरातील जागा सुचविली होती. कोरोचीने गायरान उपलब्ध असल्याचे सांगितले होते. या गावांसह पट्टणकोडोली, कबनूर, शिरोळ, रेंदाळने जागा नसल्याचे कारण सांगत प्रकल्पाविषयी अनास्था दाखविली. लोकसंख्येच्या आधारावर या प्रकल्पासाठी दोन ते पाच कोटी रुपयांचा निधी मंजूर होणार होता. कोडोली व पुलाची शिरोली गावांनी जागा देण्याचा ठराव केला. या दोन्ही गावांना प्रत्येकी पाच कोटी रुपयांहून अधिक निधी मंजूर झाला. सहा वर्षांच्या कालखंडानंतर नाबार्डने 'ग्रामीण पायाभूत विकास निधी' योजना मागे घेतली. यामुळे सांडपाणी प्रक्रिया प्रकल्प आता गावपातळीतून हद्दपार झाले.

००००

शिरोलीतील प्रकल्पाबाबत प्रश्नचिन्ह

शिरोलीतील सांडपाणी प्रक्रिया प्रकल्प राजकीय कुरघोडीत रखडला. शिरोलीसाठी पाच कोटी चार लाख रुपयांचा निधी मंजूर होता. मात्र, मुदतीत जागा ताब्यात घेण्याची प्रक्रिया पूर्ण झाली नाही. दरम्यानच्या कालावधीत नाबार्डने ग्रामीण पायाभूत विकास निधी योजनेला ब्रेक दिला आहे. दुसरीकडे मुंबईतील बैठकीत कृषी राज्यमंत्री सदाभाऊ खोत यांनी प्रकल्पाचे काम सुरू करण्याचे आदेश दिले आहेत. मात्र, या कामासाठी सरकारला नव्याने निधीची तरतूद करावी लागणार आहे. यासाठी राजकीय इच्छाशक्ती आणि मंत्रालयापर्यंत पाठपुरावा आवश्यक आहे. मात्र, गावात टोकाचे राजकारण आहे.

००००

जागेच्या ठिकाणी व्हॉलिबॉल मैदान

अब्दुललाट (ता. शिरोळ) येथे सांडपाणी प्रक्रिया प्रकल्पासाठी जागा द्यायचे निश्चित झाले होते. अधिकाऱ्यांनी सर्व्हेही केला होता. ग्रामस्थांना विश्वासात घेतले. दुसऱ्या दिवशी अधिकारी त्या गावात लाइनआउटसाठी गेले. मात्र, तोपर्यंत सांडपाणी प्रकल्प प्रक्रियेच्या जागेवर व्हॉलिबॉल मैदान तयार केले होते. मैदानाचे कारण सांगत प्रकल्पाला जागा उपलब्ध नसल्याचे सांगितले.

०००००

म. टा. प्रतिनिधी, कोल्हापूर

'केवळ शिवसेनेत नाही, तर काँग्रेस, राष्ट्रवादी, भाजप अशा सर्वच पक्षांत अंतर्गत वाद आहेत. त्यामुळे सेनेतील अंतर्गत वादातून झालेल्या टीकेला आमदार राजेश क्षीरसागर उत्तर देण्यास समर्थ आहेत. पक्षांतर्गत वादावर कार्याध्यक्ष उद्धव ठाकरे तोडगा काढतील,' असा आशावाद शिवसेना शहरप्रमुख रविकिरण इंगवले यांनी व्यक्त केला. महालक्ष्मी एक्स्प्रेसमध्ये अडकलेल्या प्रवाशांना मदत करणारे ठाण्याचे पालकमंत्री एकनाथ शिंदे यांचे आभार व्यक्त करण्यासाठी आयोजित पत्रकार परिषदेत ते बोलत होते.

'लोकसभा निवडणूक प्रचारादरम्यान ८० लाख घेणाऱ्या सेनेतील गद्दारांचा शोध घ्या,' या जिल्हाप्रमुख संजय पवार यांच्या वक्तव्याबाबत विचारले असता इंगवले म्हणाले, 'शिवसेनेतील अंतर्गत वादातून झालेली ही टीका असली तरी कोणत्या पक्षात वाद नाही? काँग्रेसमध्ये आमदार सतेज पाटील, माजी आमदार महादेवराव महाडिक, राष्ट्रवादीमध्ये आमदार हसन मुश्रीफ, माजी खासदार धनंजय महाडिक, भाजपमध्ये नवा-जुना असा अंतर्गत वाद आहे. तसाच वाद सेनेत आहे. मात्र, या वादातून झालेल्या टीकेला उत्तर देण्यास आमदार समर्थ आहेत. तसेच सेनेतील वादावर कार्याध्यक्ष ठाकरे तोडगा काढतील.'

'महालक्ष्मी एक्स्प्रेसमध्ये अडकलेल्या प्रवाशांना सुखरून बाहेर काढण्यासाठी सरकारी यंत्रणांसह ठाण्याचे पालकमंत्री एकनाथ शिंदे यांनी मोलाची मदत केली. 'संकटात धावते ती फक्त शिवसेनाच' याची प्रचिती या घटनेमुळे पुन्हा आली. रेल्वेतील काही प्रवाशांनी हेल्पलाइनद्वारे आमदार क्षीरसागर यांच्याशी संपर्क साधून वस्तुस्थिती स्पष्ट केली. त्यांनी तातडीने पालकमंत्री आणि खासदार श्रीकांत शिंदे यांच्याशी संपर्क साधून मदतीचे आवाहन केले. पालकमंत्र्यांनी रेल्वेतील प्रवाशांना सुखरूप बाहेर काढत आवश्यक वैद्यकीय सुविधाही दिल्या. त्यांच्या या कामगिरीबद्दल शहर शिवसेनेच्यावतीने आभार व्यक्त करत आहे,' असे इंगवले यांनी सांगितले.

०००००

कोल्हापूर टाइम्स टीम

गेल्या आठवडाभरात दमदार पावसाने पुन्हा हजेरी लावली आहे. त्यामुळे जिल्ह्यातील सर्व धरणे ५० टक्क्यांपर्यंत भरली आहेत. कोल्हापूर शहराची तहान भागवणारे राधानगरी धरण ८४ टक्के भरले असून धरणात सात टीएमसी पाणीसाठा झाला आहे. जिल्ह्यात चार मोठी धरणे असून नऊ मध्यम तर ५४ लघू सिंचन पाटबंधारे प्रकल्प आहेत. जिल्ह्यात या धरणांच्या माध्यमातून ८७ टीएमसी पाणी अडवले जाते.

यंदा पावसास उशिरा सुरुवात झाली. जूनच्या शेवटच्या आठवड्यात पावसाला सुरुवात झाली. जुलैच्या पहिल्या आठवड्यातही चांगला पाऊस झाला. पण नंतरच्या दहा दिवसांत पावसाने पुन्हा पाठ फिरवल्याने चिंतेचे ढग उतरले होते. पण आता पुन्हा दमदार पावसास सुरुवात झाली असून धरणे भरण्यास सुरुवात झाली आहे. सर्व धरणांनी ५० टक्क्यांचा टप्पा पूर्ण केला आहे. त्यामुळे जिल्ह्यातील पाण्याचा प्रश्न जवळजवळ सुटला आहे.

राधानगरी धरण ८४ टक्के भरले असून सात टीएमसी पाणीसाठा यात झाला आहे. तुळशी धरणात ६४ टक्के तर वारणा धरणात ७२ टक्के पाणी आहे. वारणा धरणाची साठवण क्षमता सर्वाधिक ३४ टीएमसी असून यामध्ये २४ टीएमसी पाणीसाठा झाला आहे. दूधगंगा धरण भरण्याची गती संथ असली तरी या धरणातही आतापर्यंत ५० टक्के पाणीसाठा झाला आहे. चंदगड तालुक्यातील जांबरे व घटप्रभा हे मध्यम प्रकल्प १०० टक्के भरले असून कोदे लघू पाटबंधारे प्रकल्पही पूर्ण भरले आहे. कडवी, कासारी, जंगमहट्टी या मध्यम प्रकल्पांतील साठा ८० टक्क्यांवर गेला असून पाटगावमधील साठा ७० टक्क्यांवर गेला आहे. आजरा तालुक्यातील चिकोत्रा प्रकल्प ५४ टक्के भरले आहे.

धरणाचे नाव क्षमता आजचा साठा टक्केवारी

राधानगरी ८.३६१ ७.०० ८४

तुळशी ३.४७१ २.२२५ ६५

वारणा ३४.३९९ २४.७० ७२

दूधगंगा २५.३९२ १२.७४ ५०

कासारी २.७५२ २.२६ ८२

कडवी २.५१५ २.२० ८७

कुंभी २.७१३ २.०६ ७६

पाटगांव ३.७१६ २.७२ ७३

चिकोत्रा १.५२२ ०.८३ ५४

चित्री १.८८२ १.३४ ७१

जंगमहट्टी १.२०८ १.०८ ८८

घटप्रभा १.५६० १.५६ १००

जांबरे ०.०८२ ०.८२ १००

कोदे ०.२१४० ०.२१ १००

०००

(मूळ कॉपी)

धरणे भरली फिफ्टी प्लस

धरणे भरली फिफ्टी प्लस

म. टा. प्रतिनिधी, कोल्हापूर

दमदार पावसाने सर्वत्र पुन्हा हजेरी लावली असून जिल्ह्यातील सर्व धरणे ५० टक्क्याच्यावर भरली आहेत. कोल्हापूर शहराची तहान भागवणारे राधानगरी धरण ८४ टक्के भरले असून सात टीएमसी पाणीसाठा जमा झाला आहे.

कोल्हापूर जिल्ह्यात राधानगरी धरणाची उभारणी राजर्षी शाहू महाराजांच्या कारकीर्दीत सुरु झाली आणि छत्रपती राजाराम महाराजांच्या काळात पूर्ण झाली. राधानगरी धरण कोल्हापूरची जीवनवाहिनी ठरली आहे. देशाला स्वातंत्र्य मिळाल्यानंतर गेल्या ६० वर्षात चार मोठे, नऊ मध्यम आणि ५४ लघु सिंचन प्रकल्पाची उभारणी करुन जमीन पाण्याखाली आणण्यात आली. जिल्ह्यात धरणांच्या माध्यमातून ८७ टीएमसी पाणी अडवले जाते.

यंदा पावसास उशिरा सुरुवात झाली. मृग नक्षत्र कोरडे गेल्यानंतर जूनच्या शेवटच्या आठवड्यात पावसास सुरुवात झाली. आर्द्रा नक्षत्राच्या सुरवातीला पावसाने दडी मारली होती. जून महिन्याच्या शेवटच्या आठवड्यात दमदार पावसास सुरुवात झाली. जुलैच्या पहिल्या आठवड्यातही चांगला पाऊस झाला. पण त्यानंतर मधल्या दहा दिवसात पावसाने पाठ फिरवल्याने चिंतेचे ढग उतरले होते. पण पुष्य नक्षत्रात पुन्हा दमदार पावसास सुरुवात झाली असून धरणे भरण्यास सुरुवात झाली असून सर्व धरणांनी ५० टक्क्याचा टप्पा पूर्ण केला आहे. त्यामुळे जिल्ह्यातील पाण्याचा प्रश्न जवळजवळ सुटला आहे.

राधानगरी धरणात ८४ टक्के भरले असून सात टीएमसी पाणीसाठी झाला आहे. तुळशी धरण ६४ टक्के तर वारणा धरण ७२ टक्के भरले आहे. वारणा धरणाची साठवण क्षमता सर्वाधीक असून ३४ टीएमसी क्षमता असलेल्या या धरणात २४ टीएमसी पाणी साठा झाला आहे. दूधगंगा धरण भरण्याचा कालावधी संथ असला तरी याही धरणात ५० टक्के पाण्याचा साठा झाला आहे.

चंदगड तालुक्यातील जांबरे व घटप्रभा हे मध्यम प्रकल्प १०० टक्के भरले असून कोदे लघु पाटबंधारे धरणही पूर्ण भरले आहे. कडवी, कासारी, जंगमहट्टी या मध्यम प्रकल्पातील साठा ८० टक्क्यावर गेला असून पाटगाव आणि चिकोत्र्यातील साठा ७० टक्क्यावर गेला आहे. आजरा तालुक्यातील चिकोत्रा धरण ५४ टक्के भरले आहे.

००००००

धरणाचे नाव क्षमता आजचा साठा टक्केवारी

राधानगरी ८.३६१ ७.०० ८४

तुळशी ३.४७१ २.२२५ ६५

वारणा ३४.३९९ २४.७० ७२

दूधगंगा २५.३९२ १२.७४ ५०

कासारी २.७५२ २.२६ ८२

कडवी २.५१५ २.२० ८७

कुंभी २.७१३ २.०६ ७६

पाटगांव ३.७१६ २.७२ ७३

चिकोत्रा १.५२२ ०.८३ ५४

चित्री १.८८२ १.३४ ७१

जंगमहट्टी १.२०८ १.०८ ८८

घटप्रभा १.५६० १.५६ १००

जांबरे ०.०८२ ०.८२ १००

कोदे ०.२१४० ०.२१ १००

कोल्हापूर टाइम्स टीम

खासबाग येथील खाऊ गल्लीत ६२ केबिनधारकांचे पुनर्वसन करण्यात आले. मात्र सद्यस्थितीत तेथे दुप्पट केबिन असून येथील संख्या १२०च्याही पुढे गेली आहे. अशीच स्थिती राजारामपुरीतील खाऊगल्लीत झाली आहे. परिणामी येथे वाहतूक कोंडी आणि कचऱ्याचा गंभीर प्रश्न निर्माण झाला आहे. खासबाग परिसरात अस्ताव्यस्त पार्किंगमुळे पादचाऱ्यांना चालणेही मुश्कील बनले आहे.

महापालिकेने अंबाबाई मंदिर आणि भाऊसिंगजी रोडवरील केबिनधारकांना हटविल्यानंतर त्यांचे खासबागेत पुनर्वसन केले. त्यामध्ये ६२ केबिनधारकांचा समावेश होता. पण कालांतराने पदाधिकाऱ्यांच्या वरदहस्ताने केबिन्स वाढू लागल्या. केबिनची संख्या वाढत असताना प्रशासनाने कारवाई करण्याची अपेक्षा होती. पण याकडे दुर्लक्ष करण्यात आले. त्यामुळे गेल्या काही दिवसांत येथे परवानगी असलेल्या केबिनधारकांएवढी अनधिकृत केबिन्सची संख्या झाली आहे.

येथे सहकुटुंब येणाऱ्या खवय्यांचीही संख्या अधिक असते. दुपारी चार वाजल्यापासून रात्री अकरा वाजेपर्यंत खवय्यांची मोठी गर्दी जमते. आलेले नागरिक आपली वाहने केएमटी बसस्टॉपपर्यंत पार्क करतात. तसेच खाऊ गल्लीतही मोटारसायकली लावल्या जातात. त्यातूनच पादचाऱ्यांना वाट काढावी लागते. ही स्थिती केशवराव भोसले नाट्यगृह ते देवल क्लबपर्यंत असते.

खासबागेलगत असलेला रिक्षा स्टॉप आणि देवल क्लबजवळील सहा आसनी रिक्षांमुळे येथे रात्री मोठी वाहतूक कोंडी निर्माण होते. एकीकडे वाहतूक कोंडीचा त्रास सहन करावा लागत असताना केबिनधारक रात्री शिल्लक राहिलेले अन्न व कचरा तेथेच टाकतात. त्यामुळे येथे नेहमी अस्वच्छता असते. परिणामी येथे येणाऱ्या खवय्यांसह परिसरातील नागरिकांच्या आरोग्याचा प्रश्न निर्माण होऊ लागला आहे.

अशीच स्थिती राजारामपुरी येथील खाऊ गल्लीमध्ये झाली आहे. येथे सात बायोमेट्रिक कार्डधारक केबिन्सधारक व फेरीवाले होते. पण येथेही अनधिकृत विक्रेत्यांची संख्या दुप्पट झाली आहे. येथे जवळच उघड्या गटर आहेत. परिसरात अस्वच्छता आहे. खाऊ गल्लींमध्ये वाढणाऱ्या केबिन्स आणि टाकण्यात येणाऱ्या कचऱ्याबाबत दंडात्मक कारवाई करण्याचे आदेश स्थायी समितीने दिले. पण वाढलेल्या केबिन्सला कोणाचा वरदहस्त आहे याबाबत मात्र चर्चा झालेली नाही.

खासबाग व राजारामपुरी येथील केबिनधारकांची तपासणी केली जाणार आहे. त्यानंतर इस्टेट, विभागीय कार्यालय आणि अतिक्रमण विभागाच्यावतीने आठवड्यात कारवाई करण्यात येईल.

- प्रमोद बराले, इस्टेट अधिकारी