कोल्हापूर टाइम्स टीम 'आम्ही लोकसभा निवडणुकीच्या प्रचारासाठी पायाची चाळण केली. हाडाची काडं व रक्ताचं पाणी केले. पण काहींनी स्वार्थ व पैसाच पाहिला. शेवटच्या टप्प्यात शांत राहण्यासाठी शिवसेनेतील काहींनी ८० लाख घेतल्याची जोरदार चर्चा शहरात आहे. त्यांच्यामुळे आमच्यात संशयाचे वातावरण निर्माण झाले आहे. खासदार, विधानसभा संपर्कप्रमुख व त्रयस्थ यंत्रणेने त्यांचा शोध घेऊन अहवाल द्यावा. जो कुणी लोकप्रतिनिधी, पदाधिकारी, शिवसैनिक गद्दार असेल त्याची हकालपट्टीच झाली पाहिजे,' अशी जोरदार मागणी शिवसेनेचे जिल्हाप्रमुख संजय पवार यांनी केली. शिवसेनेने आगामी विधानसभा निवडणुकीच्या पार्श्वभूमीवर 'माझा महाराष्ट्र, भगवा महाराष्ट्र' या प्राथमिक सदस्य नोंदणी अभियानाला सुरुवात केली. त्याबाबत करवीरनिवासिनी सांस्कृतिक भवनमध्ये तालुकाप्रमुख, पदाधिकाऱ्यांचा मेळावा झाला. त्यावेळी पवार बोलत होते. त्यांनी भाषणात कुणाचेही नाव न घेता सामान्य शिवसैनिकांमधील या भावना असल्याचे नमूद केले. ते पुढे म्हणाले, 'शिवसेनाप्रमुख बाळासाहेब ठाकरे यांनी 'अन्याय करू नका व अन्याय सहनही करू नका' असे सांगितले आहे. आम्ही नुकत्याच झालेल्या लोकसभा निवडणुकीत रात्रीचा दिवस करून प्रचार केला. अगदी पहाटेपासून कामाला लागलो. घराघरापर्यंत पोहचलो. पण काही लोकांनी नेहमीप्रमाणे पैसा व स्वार्थच पाहिला. ८० लाख रुपये घेऊन काहींनी प्रचारात शांत राहण्याचा प्रकार केल्याची चर्चा आहे. त्यांच्या या नेहमीच्याच प्रकाराबाबत किती दिवस गप्प बसायचे? हे कुठे तरी थांबले पाहिजे. ज्यांनी भानगडी केल्या, त्यांचा त्यांना जाब विचारला पाहिजे. आम्ही काही केले तर लगेचच आमचा अहवाल मातोश्रीवर जातो. ८० लाखांच्या प्रकरणाची शहरात मोठी चर्चा असताना त्याचा अहवाल का गेलेला नाही? प्रत्येक विधानसभा मतदार संघातील संपर्कप्रमुख, खासदार व त्रयस्थ यंत्रणेने शोध घेऊन त्याचा अहवाल मातोश्रीपर्यंत पोहचवण्याची आवश्यकता आहे. तरच येथील शिवसेना बळकट होईल. आम्ही कायम कामच करायचे व दुसऱ्यांनी फायदे घ्यायचे हे चालणार नाही. माझा लढा कोणत्या व्यक्तिविरोधात नसून प्रवृत्तीविरोधात आहे. ती गाडली जाईपर्यंत माझा लढा सुरू राहणार आहे. पवार म्हणाले, 'कुणामुळे कुणाचे घर चालत नाही. त्यामुळे सामान्य शिवसैनिकांनी कुणाला घाबरण्याची गरज नाही. पक्षप्रमुख उद्धव ठाकरे ज्यावेळी या प्रकाराबाबत विचारणा करतील, त्यावेळी बाळासाहेब ठाकरेंना मानणारे खरे शिवसैनिक असाल तर खरे बोला. लाचारीने जगण्यापेक्षा एकदिवस वाघासारखे स्वाभिमानाने जगा. केव्हाही ठाकरे कुटुंबीयांना विसरू नका. त्यांचे आशीर्वाद जसे मिळतात, तसेच वाईट काम करणाऱ्यांना त्यांचे शापही मिळतात.' जिल्हाप्रमुख विजय देवणे म्हणाले, 'जिल्ह्यात पक्षसंघटनेचे काम चांगले असल्याचे वरिष्ठांचे मत आहे. आता सभासद नोंदणीचे काम मोठ्या ताकदीने करायचे आहे. विधानसभा निवडणूक असल्याने दररोज एक कार्यक्रम राबवावा लागणार आहे. राज्यात पुन्हा शिवसेना, भाजपचे सरकार सत्तेवर आणायचे आहे. सध्या राष्ट्रवादीतून फुटून चाललेले नेते पाहिल्यानंतर भविष्यात राष्ट्रवादी शिल्लक राहणार नाही, असेच दिसते. यावेळी माजी आमदार सुरेश साळोखे, सुजित चव्हाण, शिवाजी जाधव, महिला संघटक शुभांगी पोवार यांची भाषणे झाली. व्यासपीठावर दुर्गेश लिंग्रस, मेघना पेडणेकर, मंजित माने उपस्थित होते. तीन लाख सभासदांची भेट देणार जिल्हाप्रमुख पवार यांनी पक्षप्रमुख उद्धव ठाकरे यांच्या वाढदिवसानिमित्त जिल्ह्यातून तीन लाख नवीन सभासद नोंदणीची भेट द्यायची आहे. त्यासाठी ग्रामीण पातळीवरही जोरदार अभियान राबवले जावे. शाखा प्रमुखांचीही नेमणूक करण्यासाठी जोरदार प्रयत्न झाले पाहिजेत. पक्षप्रमुख उद्धव ठाकरे यांच्या वाढदिवसानिमित्त सीपीआरला १०० बेड भेट देण्याचा संकल्प केला आहे. त्यासाठी शिवसैनिकांनी प्रयत्न केले पाहिजेत, असे सांगितले. आमचा काय फायदा असा विचार करून पक्षात काम करू नका. काम करत रहा, पद आपोआप चालत येते, असेही पवार यांनी सांगितले.
मोबाइल अॅप डाउनलोड करा आणि राहा अपडेट
