म. टा. प्रतिनिधी कोल्हापूर
गेल्या काही दिवसांपासून जिल्ह्यात सुरू असलेल्या पावसाने सोमवारी काही काळ उसंत घेतली. सकाळपासून ढगाळ वातावरण, दुपारी ऊन आणि सायंकाळी पाऊस असे दिवसभरातील वातावरण होते. गेल्या दोन दिवसांच्या जोरदार पावसामुळे जिल्ह्यातील नद्या दुथडी भरून वाहत आहेत. काही नद्यांचे पाणी पात्राबाहेर गेले तर काही बंधारेही पाण्याखाली गेले आहेत.
भोगावती व तुळशी नदीचे पाणी पात्राबाहेर
कुडित्रे: तीन-चार दिवसांच्या पावसाच्यया हजेरीमुळे भोगावती व तुळशी नदीच्या पाणीपातळीत झपाट्याने वाढ झाली असून दोन्ही नद्यांचे पाणी पात्राबाहेर पडले आहे. नदीच्या पाणीपातळीत वाढ होत असल्याने कोगे आणि बहिरेश्वर येथील बंधारे पाणीखाली गेले आहेत. पावसाचा जोर कायम राहिला हळदी, शिंगणापूर आदी बंधारेही पाण्याखाली जाऊ शकतात. भोगावती व तुळशी नदीच्या पाणीपातळीत वाढ होत असल्याने या नद्यांचे पाणी पात्राबाहेर पडले आहे. करवीरच्या पश्चिम भागातील कोगे व बहिरेश्वर येथील बंधारे पाण्याखाली गेल्याने परिसरातील ग्रामस्थांना व प्रवाशांना पर्यायी मार्गाचा अवलंब करावा लागत आहे.
आजऱ्यात काही ठिकाणी पडझड
आजरा: गेल्या दोन दिवसांपासून पडत असलेल्या जोरदार पावसाने सोमवारी उसंत घेतली. दरम्यान गेल्या दोन दिवसांत तालुक्यात चार ठिकाणी घराच्या भिंतींची पडझड झाल्याची नोंद झाली आहे. यात दोन लाख रुपयांचे नुकसान झाल्याचे पंचनामे करण्यात आले आहेत. तालुक्यात सरासरी ७२.५० मि.मी. पाऊस झाला. गवसेत सर्वात जास्त ९० मि.मी. पाऊस झाला. आजरा ७४, मलिग्रे ६०, तर उत्तूर भागात ६६ मि.मी. पाऊस झाला. आजअखेर १२७७ मि. मी. पाऊस झाला. दरम्यान, तालुक्यात छाया कांबळे (रा.बुरूडे) यांच्या घराच्या भिंतीची पडझड होऊन अंदाजे २५ हजार, सरिता रेडेकर (रा. लाकडवाडी) यांच्या घराच्या भिंतीच्या पडझडीने २० हजार, शिवाजी रावण (रा. सरंबळवाडी) यांचे ५० हजार, गंगाराम रावण (रा. सरंबळवाडी) यांच्या विहिरीचा कठडा पडल्याने एक लाखाचे नुकसान झाले.
चंदगडमध्ये शेतीकामांना वेग
चंदगड: गेले चार दिवस सुरू असलेल्या संततधार पावसामुळे शेतीकामांना वेग आला होता. जनजीवनही विस्कळीत झाले होते. मात्र आज दिवसभर पावसाने काहीशी उसंत दिली. गेले दोन तीन दिवस पाऊस सुरु असल्याने शेतीकामांना वेग आला होता. सोमवारी सकाळी आठ वाजेपर्यंत झालेल्या २४ तासांत तालुक्यात सरासरी ६६.०० मि. मी. पावसाची नोंद झाली. दरम्यान रविवारी सायंकाळी मौजे शिरगाव येथील सुरेश कुंदेकर यांच्या गोठ्यावर झाड पडून अंदाजे सुमारे दहा हजार रुपयांचे नुकसान झाले आहे.
राधानगरी धरण क्षेत्रात मुसळधार
राधानगरी: तालुक्यात धरण क्षेत्रात मुसळधार पाऊस सुरू आहे. तालुक्यात इतरत्र मात्र पावसाची उघडझाप आहे. सलग चार दिवस पडणाऱ्या पावसामुळे नदी, ओढे,नाले दुथडी भरून वाहत आहेत. भोगावती नदीवरील राशिवडे, हळदी येथील बंधारे पाण्याखाली गेले आहेत. पर्यायी पुलामुळे वाहतूक सुरळीत झाली.
राधानगरी तालुक्यात दाजीपूर, राधानगरी आणि धामोड परिसरात धरण क्षेत्रात पावसाचा जोर कायम आहे. गेल्या २४ तासांत ११४ मिलीमीटर पावसाची नोंद झाली असून राधानगरी लक्ष्मी जलाशय परिसरात आज अखेर ६८५ मि. मी.ची नोंद झाली आहे. राधानगरी लक्ष्मी जलाशयाची पाण्याची पातळी साडे पाच फुटांनी वाढली आहे.
भुदरगडमध्ये मुसळधार पाऊस
गारगोटी: भुदरगड तालुक्यात आज दिवसभर उघडीप दिली. दिवसभर स्वच्छ वातावरण होते. पण सायंकाळी पाचच्या सुमारास अचानक मुसळधार पाऊस झाला. अचानक झालेल्या पावसाने जनजीवन विस्कळीत झाले होते. गेले दोन दिवस सुरू असलेल्या संततधार पावसामुळे वेदगंगा नदी पात्राबाहेर आली आहे. ओढे, नाले तुडुंब भरून वाहत आहेत.
पश्चिम पावसाचा जोर
शाहूवाडी: शाहूवाडीत आंबा, मलकापूर, करंजफेण या पश्चिमेकडील भागात मात्र काहीप्रमाणात पावसाचा जोर कायम आहे. सलग दोन तीन दिवस पाऊस सरी दमदार कोसळत राहिल्यामुळे शेत शिवारात पाणीचपाणी साचले आहे. दरम्यान तालुक्यात पडझड अथवा नुकसानीची कोणतीही घटना घडली नसल्याचे आपत्ती व्यवस्थापन विभागाकडून सांगण्यात आले.
पन्हाळ्यावर दुपारनंतर जोरदार
पन्हाळा: रविवारी आणि सोमवारी दुपारपर्यंत विसावलेल्या पावसाने दुपारनंतर पन्हाळा परिसरात पुन्हा एकदा जोरदार सुरुवात केली. सोमवारी सकाळ पर्यंतच्या २४ तासांत पन्हाळा तालुक्यात एकुण १३४ मिलीमीटर पावसाची नोंद झाली आहे. कोतोली येथे सर्वात जास्त ३२ मिमी., पन्हाळ्यात ३०मिमी. पावसाची नोंद झाली. पन्हाळ्यावर पावसाळी पर्यटकांचा ओघ कायम असून आजही पन्हाळा रस्त्याला चारचाकी वाहनांची अक्षरश: रीघ लागली होती.
दुपारपर्यंत पावसाने चांगलीच उघडीप दिली होती. दोन दिवसापूर्वी सुरू झालेल्या ओढ्या ओघळांचे पाणी कमी झाले होते. पण दुपारी तीन नंतर पन्हाळ्यावर धुक्याने एकदम अंधारून आले. आणि थोड्यावेळाने मोठ्या पावसाला सुरुवात झाली.
