म. टा. प्रतिनिधी, कोल्हापूर
'मासिक पाळीवेळी महिलांना दर्जेदार आणि पर्यावरणपूरक सॅनिटरी नॅपकीन विकत घेणे परवडत नाहीत. ही उणीव भरून काढण्यासाठी स्टेपअप फाउंडेशनच्या मदतीने सामान्य, गरीब महिलांना परवडेल अशा दरात सॅनिटरी नॅपकीन उत्पादीत करण्यासाठी प्रयत्न सुरू आहेत,' असे प्रतिपादन महाराष्ट्र आर्थिक विकास महामंडळाच्या अध्यक्षा ज्योती ठाकरे यांनी शनिवारी केले. सरोजीनिदेवी विश्वनाथ विश्वस्त मंडळातर्फे स्वयंसिद्धा संस्थेच्या २७ व्या वर्धापन दिनानिमित्त आयोजित कार्यक्रमात त्या बोलत होत्या. रामगणेश गडकरी सभागृहात कार्यक्रम झाला.
अध्यक्षा ठाकरे म्हणाल्या, 'बीड जिल्ह्यातील ऊसतोड कामगारांच्या महिलांना मासिक पाळी दरम्यानच्या वेदना सहन होत नाहीत. उपचार घेणे परवडत नाही. या कारणांमुळे गर्भाशय पिशवी काढून घेत असल्याचे काही दिवसांपूर्वी पुढे आले. म्हणून राज्यातील महिला बचत गटातर्फे स्वस्तात सॅनिटरी नॅपकीन वितरण करण्यासाठी महामंडळ धडपडत आहे. त्यासाठी स्टेपअप फाउंडेशनची मदत मिळाली आहे. लवकरच त्याचे उत्पादन सुरू होईल. जन्मताच बचत करणे, प्रामाणिकपणा, सचोटी, कष्ट करण्याचे गुण महिलांकडे असतात. याच जोरावर त्या छोटे-मोठे उद्योग करून स्वावलंबी बनत आहेत. अशा महिलांना स्वयंसिद्धा पाठबळ देत आहे. समाजातील खालच्या स्तरातील गरजू महिलांना व्यवसायासाठी संस्था मदत करत आहे, हे कौतुकास्पद आहे. सरकारची कोणतीही आर्थिक मदत न घेते असे काम केले जात आहे हे विशेष.'
अध्यक्षा ठाकरे म्हणाल्या, 'राज्यात बचत गटांच्या माध्यमातून महिला एकत्र येत आहेत. महामंडळाने प्रोत्साहन दिल्याने राज्यात १४ लाख महिला बचत गट तयार झाले आहेत. त्यापैकी साडेसात लाख महिला सक्षम झाल्या आहेत. त्यांना उद्योग, व्यवसायासाठी विविध बँकांनी २ हजार ५५६ कोटींचे कर्ज वितरण केले. इतक्या कर्जाची परतफेड संबंधीत महिलांनी प्रामाणिकपणे परतफेड केली. म्हणूनच बँका महिला बचत गटांकडे जाऊन कर्ज घेण्याचे आवाहन करीत आहेत.'
यावेळी ठाकरे यांना कै. मधुकर सरनाईक परिवर्तन दूत पुरस्कार देऊन गौरवण्यात आले. इतर पुरस्कारप्राप्त व्यक्तींचा सन्मान मान्यवरांच्याहस्ते करण्यात आला. कार्यक्रमात नृत्य, गणेश, शिववंदना, गीत, अभिनय गीत, कृष्ण नृत्य सादर करण्यात आले. तृप्ती पुरेकर यांनी प्रास्ताविक केले. संतोष माने यांनी पुरस्काराबद्दल कृतज्ञता व्यक्त केली. स्वयंसिद्धाच्या संचालिका कांचन परूळेकर, सरोजिनीदेवी विश्वनाथ विश्वस्त मंडळाचे अध्यक्ष व्ही. बी. पाटील, उगार महिला मंडळाच्या अध्यक्षा स्मिता शिरगांवकर, डॉ. व्ही. टी. पाटील फाउंडेशनच्या अध्यक्षा सौम्या तिरोडकर, स्वयंप्रेरिका महिला सहकारी औद्योगिक संस्थेच्या अध्यक्षा जयश्री गायकवाड आदी उपस्थित होते. सुनिता शिरगोपीकर यांनी सूत्रसंचालन तर तृप्ती पुरेकर यांनी आभार मानले.
पुरस्कार प्राप्ता मान्यवर असे
स्मिता शिरगावकर (उगार, कर्नाटक), अभिजित सोनवणे (पुणे), स्वामिनी महिला बचतगट (वेंगुर्ला), विश्वनाथ आपटे, वैशाली आपटे, संतोष माने (बोरमाळ, ता. शाहूवाडी), दीपक कांबळे (तरसंबळे), ज्योती चव्हाण (कोल्हापूर), स्नेहल पवार, साक्षी लोहार (कोल्हापूर), किर्ती कुळे (आरवली, जि. सिंधुदूर्ग), शंकुतला औंधकर (कोल्हापूर), साहील शेख, ओंकार खोपडे, बन्सी पटेल, प्रतिक्षा कुऱ्हाडे, सोनू गोरल, सिद्धी हुंबे, शिवमाला भोसले, निर्मला शिंदे, माधुरी हांडे, सुचेता बेंडके, सुर्यप्रभा भोसले, पल्लवी नलवडे, वैशाली चौगुले, नीता दटमजगे.