लोकसभा निवडणुकीच्या कामासाठी मतदान केंद्रावर डमी व्यक्तीस पाठवल्याचे प्रकरण सांगली जिल्ह्यातील मणदूर (ता. शिराळा) येथील धनगरवाडा केंद्रावर उघड झाले. याप्रकरणी जिल्हाधिकाऱ्यांच्या आदेशाचा भंग करणे, कर्तव्यात कसुरी केल्याने विलास गणपती पाटील याच्यावर गुन्हा दाखल करण्यात आला. परिणामी अधिकाऱ्यांची दिशाभूल करून निवडणूक काम टाळण्यासाठी केलेली बनावटगिरी विलासला चांगलीच महागात पडली.
फिर्यादीत म्हटले आहे, करूंगली (ता. शिराळा) येथील मातोश्री हिराबाई देशमुख माध्यमिक विद्यालयात विलास शिपाई आहे. २३ एप्रिलला झालेल्या लोकसभा मतदान प्रक्रियेसाठी त्याची मदतनीस म्हणून हातकणंगले मतदारसंघातील मणदूर केंद्रावर नियुक्ती झाली होती. त्याच्या नियुक्तीचा आदेश सांगलीच्या जिल्हाधिकाऱ्यांनी काढला. मात्र ते प्रत्यक्षात कामावर हजर नव्हते. त्याची चौकशी तहसीलदार गणेश शिंदे यांनी केली. त्यावेळी पाटील यांनी आपल्या जागेवर लक्ष्मण पाटील नावाच्या त्रयस्त व्यक्तीस पाठवले, असल्याचे समोर आले. लक्ष्मण यांनी दिवसभर काम करून भत्ताही घेतल्याचे स्पष्ट झाले. अशाप्रकारे फसवणूक करून कर्तव्यात कसुरी केल्याने विलास पाटील यांच्यावर गुन्हा दाखल करण्यात आला. नायब तहसीलदार कृष्णा नाईक यांनी फिर्याद दिली आहे.
नियोजनबद्ध दिशाभूल
विलास पाटील यांनी निवडणूक प्रशासनाची दिशाभूल नियोजनबद्धरित्या केल्याचेही चौकशीतून पुढे आले. त्याने आपल्या आडनावाशी साधर्म्य असलेल्या त्रयस्त व्यक्तीस केंद्रात कामास पाठवले. केंद्रात पाठवण्यासाठी विलास त्याला प्रशिक्षणासाठी सोबत घेऊन गेल्याचेही सांगितले जात आहे. विलास यांच्या सांगण्यावरून डमी लक्ष्मणने दिवसभर केंद्रात काम केले आहे. यामुळे लक्ष्मणला कारवाईतून वगळण्यात आले आहे.
मोबाइल अॅप डाउनलोड करा आणि राहा अपडेट