म. टा. प्रतिनिधी, कोल्हापूर

कॉम्रेड गोविंद पानसरे हत्या प्रकरणी एसआयटीने सोमवारी (ता. ११) प्रथमवर्ग न्यायदंडाधिकारी एस. एस. राऊळ यांच्या कोर्टात पुरवणी आरोपपत्र दाखल केले. चारशे पानांच्या आरोपपत्रात आणखी चार संशयितांचा समावेश असून, ८५ साक्षीदारांच्या साक्षी आहेत. कर्नाटकातील ज्येष्ठ पत्रकार गौरी लंकेश हत्येतील आरोपींचा पानसरे हत्येशी संबंध आढळल्याने विचारवंतांच्या हत्यांमागे एकाच विचारधारेचे संशयित असल्याचे निश्चित होत आहे.

अमोल अरविंद काळे (वय ३४, रा. पिंपरी चिंचवड, जि. पुणे), वासुदेव भगवान सूर्यवंशी (२९, रा. यावली, जि. जळगाव), भारत उर्फ भरत जयवंत कुरणे (३७, रा. महाद्वार रोड, बेळगाव) आणि अमित रामचंद्र देगवेकर (३८, रा. कळणे, दोडामार्ग, जि. सिंधुदुर्ग) अशी आरोपपत्र दाखल झालेल्या संशयितांची नावे आहेत. हे चौघेही सध्या न्यायालयीन कोठडीत आहेत.

सरकारी वकील शिवाजी राणे यांनी दिलेल्या माहितीनुसार, १६ फेब्रुवारी २०१५ मध्ये कॉम्रेड गोविंद पानसरे यांच्यावर झालेला हल्ला आणि हत्येप्रकरणी पोलिसांनी आजवर सहा संशयितांना अटक केली. आठ संशयितांवर आरोपपत्र दाखल केले. यातील समीर विष्णू गायकवाड, डॉ. वीरेंद्रसिंह शरदचंद्र तावडे, विनय बाबुराव पवार आणि सारंग दिलीप अकोलकर या चौघांविरोधात १४ डिसेंबर २०१५ मध्ये आरोपपत्र दाखल केले आहे. यातील पवार व अकोलकर हे दोघे फरार आहेत. मुंबई आणि बेंगळुरू

पोलिसांकडून ताबा घेतलेल्या आणखी चौघांवर शुक्रवारी प्रथमवर्ग न्यायदंडाधिकारी एस. एस. राऊळ यांच्या कोर्टात आरोपपत्र दाखल करण्यात आले.

गुन्ह्याचा मुख्य सूत्रधार डॉ. वीरेंद्र तावडे यांना मदत करून कटात सामील होणे, खून करणे, खुनाचा प्रयत्न करणे, अवैध शस्त्र बाळगणे, विनापरवाना शस्त्रांचा वापर करणे, संगनमताने गुन्हा करणे असे आरोप या संशयितांवर लावले आहेत. चारही संशयितांचे जबाब, आधीच्या चार संशयितांशी असलेल्या संबंधाचे पुरावे, सर्व संशयितांनी एकमेकांना पाठवलेले इ-मेल्स, मोबाइल कॉल डिटेल्स, ८५ साक्षीदारांच्या साक्षींचा समावेश आरोपपत्रात आहे. संशयितांवरील गुन्हा सिद्ध करण्यासाठी आवश्यक असलेले सर्व पुरावे आरोपपत्रात असल्याची माहिती सरकारी वकील राणे यांनी पत्रकारांना दिली.

अखेरच्या क्षणी दाखल

संशयितांच्या अटकेनंतर ९० दिवसांच्या आत आरोपपत्र दाखल केले जाते. पानसरे हत्येतील चार आरोपींना अटक केल्यानंतर ८९ व्या दिवशी आरोपपत्र दाखल करण्यात आले. आरोपपत्र तयार झाल्यानंतर सोमवारी सकाळी एसआयटी प्रमुख तिरुपती काकडे यांनी पथकासह पोलिस अधीक्षक डॉ. अभिनव देशमुख यांची भेट घेतली. दुपारी तीनपर्यंत त्यांची बैठक सुरू होती. यानंतर विशेष पोलिस महानिरीक्षक विश्वास नांगरे-पाटील यांची भेट घेऊन चर्चा केली. संध्याकाळी पाचच्या सुमारास आरोपपत्र दाखल करण्यात आले.

.. .. .. ..

असे लावले अरोप

हत्येचा कट रचणे - कलम १२० ब

खून करणे - ३०२

खुनाचा प्रयत्न करणे - ३०७

संगनमत करणे - ३४

अवैध शस्त्र बाळगणे - ३ (१) (अ)

विनापरवाना शस्त्र वापरणे - २५-१ ब (५)(५) आणि २७

.. .. .. .. .. .. .. ..

अजय जाधव, जयसिंगपूर

शिरोळ तालुक्यात कोंडीग्रेच्या माळरानावर श्रीवर्धन बायोटेकच्या हरितगृहात फुललेला गुलाब 'व्हॅलेंटाईन डे'साठी जपान, ऑस्ट्रेलिया, कुवेत, हॉलंड तसेच लंडनच्या बाजारपेठेत पोहोचला आहे. 'व्हॅलेंटाईन डे'साठी तब्बल ११ लाख फुलांचे उत्पादन घेण्यात आले आहे. लालजर्द गुलाब फुलांची निर्यात करण्यात आली आहे. गुरुवारी 'व्हॅलेंटाईन डे'ला ही फुले प्रेमीजनांमध्ये संवाद साधतील.

कोंडीग्रे येथे फोंड्या माळरानावर उद्यानपंडीत गणपतराव पाटील यांनी १०० एकर क्षेत्रात अत्याधुनिक तंत्रज्ञानाद्वारे फुलशेती विकसीत केली आहे. येथे नारळाच्या भुग्याचा वापर करून मातीविना शेतीचा प्रयोग यशस्वी केला आहे. हरितगृहामध्ये विविध जातीच्या रेड, यलो, पिंक, ऑरेंज, व्हाइट यांसह अन्य रंगांच्या गुलाब फुलांचे उत्पादन घेतले जाते. 'व्हॅलेंटाईन डे'साठी देश, विदेशातून लाल रंगाच्या फुलांना मोठी मागणी असते.

'व्हॅलेंटाईन डे'साठी फुलांची तोडणी करता यावी याकरिता हरितगृहामध्ये तीन महिने आधी तयारी केली जाते. गुलाब रोपांची छाटणी करून त्यांना ठिबकद्वारे पाणी व खते दिली जातात. 'व्हॅलेंटाईन डे'पूर्वी आठवडाभर अगोदर फुले तोडणीसाठी लगबग सुरू होते. तयार झालेल्या कळ्या तोडून त्या शीतगृहात पाच अंश सेल्सियस तापमानात ठेवल्या जातात. यानंतर मागणीप्रमाणे योग्य लांबीचा फुलांचा देठ ठेवून छाटणी केली जाते. पॅकिंग करून कळ्या वातानुकुलीत गाडीतून विमानतळावर पाठविण्यात येतात. विमानातून ही फुले परदेशी बाजारपेठेत जातात. कोल्ड स्टोअरेजमधून सामान्य तापमानाला आल्यानंतर कळ्या उमलण्याची प्रक्रिया सुरू होते.

'व्हॅलेंटाईन डे'च्या पार्श्‍वभूमीवर देश विदेशातील बाजारपेठेतून श्रीवर्धन बायोटेकच्या गुलाब फुलांना मागणी असते. यंदा आठ लाख लाल जर्द फुले जपान, ऑस्ट्रेलिया, कुवेत, हॉलंड तसेच लंडन येथे निर्यात करण्यात आली आहेत. देशातील कोल्हापूर, सांगली, सातारा, पुणे, मुंबई, बेळगाव, दिल्ली, हैदराबाद, भोपाळ, औरंगाबाद, जबलपूर, नागपूर येथील बाजारपेठेत तीन लाख फुले पाठविण्याची लगबग सुरू आहे. यंदा हवामान चांगले असले तरी फुलांचे उत्पादन कमी आहे. यामुळे मोठी मागणी आहे. सहा रुपयांपासून दहा रूपयापर्यंत फुलांना भाव मिळत आहे.

'व्हॅलेंटाईन डे'साठी गुलाबाला देश-विदेशातून मोठी मागणी असते. यंदा जपान, ऑस्ट्रेलिया, लंडन, हॉलंड, कुवेत येथे आठ लाख फुले निर्यात केली आहेत. तीन लाख फुले देशातील विविध बाजारपठांत पाठविण्यात येत आहेत. लाल फुलांना चांगली मागणी आहे.

- रमेश पाटील, श्रीवर्धन बायोटेक

म. टा. वृत्तसेवा, कुडित्रे

कुंभी-कासारी सहकारी साखर कारखान्याचे संस्थापक चेअरमन, डी. सी. नरके यांच्या २१व्या स्मृतिदिनानिमित्त पुरुषांसाठी अर्धमॅरेथॉन स्पर्धा रविवारी (ता. १७ फेब्रुवारी) आयोजित केली आहे. कुंभी कारखाना कार्यस्थळावर सकाळी ८.३० वा स्पर्धा होणार असल्याची माहिती कारखान्याचे चेअरमन आमदार चंद्रदीप नरके यांनी दिली.

आमदार नरके म्हणाले, 'स्पर्धेत खुल्या गटासाठी कारखाना स्थळापासून ते कळे-खेरीवडेपर्यंत व परत कारखाना कार्यस्थळापर्यंत असे २१ किलोमीटरचे अंतर आहे. खुल्या गटात अनुक्रमे ९ हजार, ७ हजार, ५ हजार व ३ हजार रुपये अशी बक्षिसे आहेत. सब ज्युनिअर गटामध्ये ( १४ वर्षाखालील) कारखाना स्थळापासून ते कोपार्डे-आडूरपर्यंत व परत कारखाना कार्यस्थळापर्यंत असे ५ किलोमीटरचे अंतर आहे. या गटात अनुक्रमे ५ हजार, ४ हजार, ३ हजार व २ हजार रुपये अशी बक्षिसे आहेत. जिल्ह्यातील स्पर्धकांनी शनिवारपर्यंत ( ता. १६ ) कारखान्याच्या सिक्युरिटी ऑफिसमध्ये नावनोंदणी करावी. त्याचबरोबर कुंभी-कासारी कामगार कल्याण मंडळातर्फे रविवारी ( ता. १७ ) सकाळी ९ वाजता कारखाना दवाखान्यामध्ये रक्तदान शिबिराचेही आयोजन केले आहे. इच्छुकांनी रक्तदान करावे असे आवाहन केले.

यावेळी कुंभी बँकेचे चेअरमन अजित नरके, कारखान्याचे व्हा.चेअरमन अॅड. बाजीराव शेलार, संचालक, कार्यकारी संचालक प्रकाश चिटणीस, सेक्रेटरी एम. ए. पाटील, कामगार प्रतिनिधी उपस्थित होते.

राधानगरी : कौलव (ता. राधानगरी) येथील बाळासाहेब पाटील कौलवकर हायस्कूलचे साक्षी चरापले आणि प्रसाद नाधवडे हे विद्यार्थी एनएमएमएस शिष्यवृत्तीसाठी पात्र ठरले आहेत. साक्षी आनंदराव चरापलेला १४९ गुण मिळाले असून ती जिल्ह्यात पंधरावी आली आहे. तर प्रसाद राजेंद्र नाधावडेला १३७ गुण मिळाले असून तो जिल्हा गुणवत्ता यादीत चमकला आहे. या विद्यार्थ्यांना प्रतिवर्षी बारा हजार रुपये अशी चार वर्षे शिष्यवृत्ती मिळणार आहे. विद्यार्थ्यांचा सत्कार कोल्हापूर आर्य समाज शिक्षण संस्थेचे अध्यक्ष दिलीपसिंह पाटील, मानद सेक्रेटरी अनिरुद्ध पाटील यांच्या हस्ते करण्यात आला. समृद्धी यादव ,यश चरापले यांनीही यश संपादन केले आहे. मुख्याध्यापक एस. वाय. पाटील, वर्गशिक्षिका एस. एस. खाडे, संतोष फुटाणे, सोमनाथ जाधव, एस. आर. कलिकते यांचे मार्गदर्शन विद्यार्थ्यांना मिळाले.

बाजीराव खाडे यांचा सत्कार

म. टा. वृत्तसेवा, कुडित्रे

कॉंग्रेस पक्षाच्या जाहीरनामा कमिटीवर सदस्यपदी करवीर तालुक्यातील सांगरुळचे राजीव गांधी पंचायतराज कमिटीचे सदस्य बाजीराव खाडे यांची निवड झाली. याबद्दल सांगरुळमध्ये पांडुरंग सेवा सोसायटी, दत्त दूध संस्था, खंडोबा दूध संस्था, मारुतराव खाडे हरहर महादेव दूध संस्था व गावातील विविध तरुण मंडळांच्यावतीने सत्कार करण्यात आला. अध्यक्षस्थानी आर. बी. पाटील खत कारखान्याचे माजी व्हा. चेअरमन तुकाराम नाळे होते.

बाजीराव खाडे म्हणाले, 'पक्षाने नेहमीच शेतकरी हिताला प्राधान्य देऊन ग्रामीण विकासाला चालना दिली आहे. त्यामुळे कॉंग्रेसचे सरकार आणण्यासाठी युवकांनी पक्षाची ध्येयधोरणे जनतेपर्यंत पोहचवावीत.'

भगवान लोंढे, प्रा. टी. एस. जंगम, एम. बी. खाडे, कृष्णात चाबूक, नामदेव खाडे, एन. डी. खाडे, महेश खाडे, मुरलीधर कासोटे यांनी मनोगत व्यक्त केले. पांडुरंग सेवा संस्थेचे संचालक आनंदराव नाळे यांनी स्वागत केले. गोकुळचे संचालक बाळासाहेब खाडे, करवीरच्या माजी सभापती सीमा चाबूक, पंचायत समिती सदस्या अर्चना खाडे, सांगरुळ शिक्षण संस्थेचे संचालक आनंदराव कासोटे आदी उपस्थित होते. कृष्णात खाडे यांनी आभार मानले.

फोटो : सांगरुळ येथे बाजीराव खाडे यांचा सत्कार करताना विनोद यादव. सोबत बाळासाहेब खाडे, तुकाराम नाळे, कृष्णात लव्हटे, सीमा चाबूक, अर्चना खाडे व इतर.

म. टा. वृत्तसेवा शाहूवाडी

शाहूवाडी पोलिस ठाण्याच्या हद्दीतील शिवारे (ता. शाहूवाडी) येथील सद्गुरू बाळूमामा मंदिरात वर्षभरापूर्वी घडलेल्या चोरीतील दोन प्रमुख आरोपींना शाहूवाडी-मलकापूर न्यायालयाने प्रत्येकी तीन वर्षे सश्रम कारावास व एक हजार रुपये दंड अशी शिक्षा सुनावली. मिनीनाथ विश्वंभर गायकवाड (रा. पत्राचाळ, अजंठानगर, चिंचवड-पुणे), सिद्धनाथ सुदाम गायकवाड (रा. गोरेवाडी, ता. खानापूर, जि. सांगली) अशी शिक्षा झालेल्या आरोपींची नावे आहेत. प्रथम वर्ग न्यायदंडाधिकारी ए. ए. वाळुंजकर यांनी ही शिक्षा सुनावली. शिवारे येथील बाळूमामा मंदिरात ६ व ७ जानेवारी २०१८ यांदरम्यान चोरी झाली होती. चोरट्यांनी मंदिरातील सोन्या, चांदीचे दागिने, मूर्ती व दानपेटीतील रोख रक्कम पळवली होती. चोरीची घटना सीसीटीव्हीत दिसली होती. याप्रकरणी संजय पाटील (रा. शिवारे) यांनी दिलेल्या फिर्यादीनुसार पोलिसांनी भारतीय दंड विधानसंहिता कलम ४५७, ३८०, ३४ प्रमाणे चोरट्यांविरुद्ध शाहूवाडी पोलिसांत गुन्हा दाखल केला होता. तत्कालीन सहाय्यक पोलिस उपनिरीक्षक पडवळ यांनी तपास करून चोरट्यांना पकडले होते

चंदगड : बेळगाव-वेंगुर्ला मार्गवर मोबाईल कंपनीच्या केबलसाठी रस्त्याकडेला जेसीबीच्या सहाय्याने चरखोदाई सुरू आहे. यातील माती रस्त्यालाकडेला पडून रस्त्यावरुन येजा करणाऱ्या वाहनांमुळे धुळीचे साम्राज्य पसरले आहे. याचा वाहनधारकांना त्रास होत असून त्यांच्यातून नाराजी व्यक्त होत आहे. एका मोबाइल कपंनीने केबल टाकण्याचे काम हाती घेतले असून चंदगड तालुक्यातील बेळगाव-वेगुर्ला मार्गावर काम सुरू आहे. बेळगाव ते वेंगुर्ला ह्या मुख्य मार्गाच्या एका बाजुने जेसीबी मशिनद्वारे खोल चर खोदाईचे काम सुरू आहे. मुख्य रस्त्याला लागून चर खोदाई सुरू असल्याने चरीतील माती मुख्य रस्त्यालगत टाकली आहे. रस्त्याचा काही भाग मातीने व्यापल्याने धुळीचे साम्राज्य पसरत आहे. रात्रीच्या वेळी अंदाज न आल्याने दुचाकीस्वार पडून अपघात होत आहेत. संबंधितांनी चर खुदाई केलेल्या ठिकाणी फलक उभारावेत अशी मागणी वाहनधारकांतून होत आहे.

प्रेमानंद गज्वींना

देणार मानपत्र

सोलापूर

अखिल भारतीय मराठी नाट्य परिषद सोलापूर शाखा, महानगरच्या वतीने नाटककार तथा नागपूरच्या नियोजित नाट्य संमेलनाचे अध्यक्ष प्रेमानंद गज्वी यांचा सत्कार आणि मानपत्र देण्यात येणार आहे. बुधवारी, १३ फेब्रुवारी रोजी रोजी सायंकाळी सहा वाजता माजी केंद्रीय गृहमंत्री सुशीलकुमार शिंदे यांच्या हस्ते निर्मलकुमार फडकुले सभागृहात गज्वींचा सन्मान करण्यात येणार आहे, अशी माहिती सोमवारी पत्रकार परिषदेत देण्यात आली. महानगर शाखेचे अध्यक्ष अजय दासरी कार्यक्रमाचे अध्यक्षस्थान भूषविणार आहेत. या प्रसंगी ज्येष्ठ रंगकर्मी प्रा. रेवण शाबादे प्रेमानंद गज्वींची मुलाखत घेणार आहेत. या मुलाखतीमध्ये त्यांच्या आतापर्यंतचा साहित्य प्रवास, त्यांची नाट्यनिर्मिती-नाट्यलेखन, सोलापूरकरांसमोर मांडण्यात येणार आहे. गज्वी नाट्य संमेलनाचे अध्यक्ष झाल्यानंतर प्रथमच सोलापुरात येत आहेत.

उदयनराजे 'छत्रपती' म्हणून लढल्यास

बिनविरोध विजयी करू

परिवहन मंत्री दिवाकर रावते यांची भूमिका

म. टा. वृत्तसेवा, सातारा

'आगामी लोकसभा व विधानसभा निवडणुकीच्या पार्श्‍वभूमीवर शिवसेना व भाजपा युतीचा निर्णय शिवसेना पक्ष प्रमुख उद्धव ठाकरे घेतील. मात्र, पदाधिकारी व कार्यकर्त्यांना पक्ष वाढीसाठी ताकदीने झोकून देऊन काम करावे लागेल. खासदार उदयनराजे भोसले 'छत्रपती' म्हणून लढले तर साताऱ्यांची जागा बिनविरोध करू. मात्र, राष्ट्रवादी काँग्रेसमधून लढले तर शिवसेना त्यांच्या विरोधात लढणारच,' असे मत शिवसेनेचे ज्येष्ठ नेते व परिवहन मंत्री दिवाकर रावते यांनी पत्रकारांशी बोलताना व्यक्त केले.

सातारा येथील सरकारी विश्रामगृहावर शिवसेनेच्या सातारा, सांगली व कोल्हापूर जिल्ह्यातील जिल्हाप्रमुख व उपजिल्हा प्रमुखांची बैठक दिवाकर रावते यांच्या अध्यक्षतेखाली झाली. या वेळी शिवसेनेचे उपनेते व कृष्णा खोरे विकास महामंडळाचे उपाध्यक्ष नितीन बानुगडे-पाटील, जिल्हा प्रमुख चंद्रकांत जाधव, माजी जिल्हा प्रमुख नरेंद्र पाटील, हर्षल कदम, कोल्हापूरचे जिल्हा प्रमुख संजय पवार, रणजितसिंह भोसले, प्रताप जाधव प्रमुख उपस्थित होते.

रावते म्हणाले, 'सातारा लोकसभा निवडणुकीसंदर्भात उदयनराजे भोसले यांच्याशी मुंबईत सह्याद्री अतिथीगृहावर भेट झाली होती. त्या वेळी भाजपचे चार मंत्री त्यांना गराडा घालून बसले होते. तुम्ही छत्रपती म्हणून निवडणुकीत उभे राहा. तुमच्या विरोधात कुणीच उभे राहिले नाही पाहिजे. छत्रपतींचा सन्मान कायम राहिला पाहिजे. मात्र, तुम्ही पक्ष म्हणून लढला तर आम्हाला त्यांच्या विरोधात लढावे लागेल.'

युती होणे कठीण

भाजपा सरकारकडून अगामी लोकसभा व विधानसभा निवडणुका एकाच वेळी घेण्याचे नियोजन आहे. त्यातच सर्व पक्षांनी स्वबळावर लढण्याचा इशारा दिला आहे. भाजप व शिवसेना यांची युती होणे कठीण आहे. मात्र, युतीचा निर्णय उद्धव ठाकरेच घेणार आहेत. त्यामुळे कार्यकर्त्यांनी पक्ष वाढीसाठी झोकून द्यावे. जिल्हा परिषद गट व पंचायत समिती गणात बैठका घ्याव्यात. पक्षाची बांधणी गावपातळीपर्यंत करावी. प्रचाराची जबाबदारी उपनेते ना. नितीन बानुगडे-पाटील यांच्या खांद्यावर टाकण्यात आली आहे. त्यामुळे पश्‍चिम महाराष्ट्रात शिवसेनेचा झेंडा फडकणार यात शंकाच नाही. राष्ट्रवादीचा बालेकिल्ला असलेल्या सातारा जिल्ह्यातही भगवा फडकवायचा असल्याने शिवसैनिकांनी ताकदीने काम करावे. शिवसेनेच्या वतीने लवकरच जिल्ह्यात सभासद नोंदणी कार्यक्रम हाती घेण्यात येणार आहे. तसेच शिवसेनेच्या बुथ प्रमुखांनी गावोगावी सभासद नोंदणीसाठी पुढाकार घ्यावा, अशा सुचनाही रावते यांनी पदाधिकाऱ्यांना दिल्या.

आज महापालिकेची सभा

महापालिका लोगो

म. टा. प्रतिनिधी, कोल्हापूर

शहर पाणीपुरवठा विभागाकडून पाणीपट्टी करवाढीच्या प्रस्तावाबरोबर इस्टेट, नगरचना व परवाना विभागाकडून आलेल्या प्रस्तावांवर सभेत खडाजंगी होण्याची शक्यता आहे. अर्थसंकल्पाच्या पार्श्वभूमीवर प्रशासनाने सादर केलेले प्रस्ताव महापालिकेच्या मंगळवारी (ता.१२) सकाळी साडेअकरा वाजता होणाऱ्या सभेत चर्चेला येणार आहेत. सभेच्या अध्यक्षस्थानी महापौर सरिता मोरे आहेत.

महापालिकेचा अर्थसंकल्प जाहीर होण्यापूर्वी विविध विभागांनी करामध्ये वाढ करण्याचे प्रस्ताव स्थायी समितीला सादर केले. यामध्ये विशेषत: मालमत्ता कराचे दर मागील कराच्या दराप्रमाणे कायम ठेवण्याचा, घरफाळा विभागाचा स्थायी समितीच्या शिफारसीसह आलेला प्रस्ताव तसेच पाणीपट्टी व इतर विभागांच्या करवाढीचा प्रस्तावांचा समावेश आहे. पाणीपुरवठा विभागाने यावर्षी २५ टक्के दरवाढीचा प्रस्ताव ठेवला आहे. या प्रस्तावांवरुन सभेत खडाजंगी होण्याची शक्यता आहे. स्थायी समितीने यापूर्वीच चालू आर्थिक वर्षात कोणत्याच करात वाढ न करण्याचे सुतोवाच केले असल्याने प्रशासनाच्या प्रस्तावावर वादळी चर्चा होण्याची शक्यता आहे.

महापालिकेच्या २०१३-१४ च्या स्थानिक निधी लेखापरिक्षण अहवालातील परिच्छेदांचे अनुपालन करण्यासाठी मुख्यलेखा विभागाकडून प्रस्ताव सादर होणार आहे. तसेच सरळसेवा भरतीमध्ये स्थानिकांना प्राधान्य देण्यासाठी सदस्य ठराव दाखल केला आहे. महासभेत चौक व रस्त्याला नाव देण्यासाठीही चर्चा होणार आहे.

म. टा. प्रतिनिधी, कोल्हापूर

'थकीत एफआरपीबाबत कोल्हापूर विभागातील उर्वरीत २४ कारखान्यांवर कारवाई करावी या मागणीसाठी पुन्हा साखर आयुक्त कार्यालयावर धडक मारू' असा इशारा खासदार राजू शेट्टी यांनी दिला. 'थकीत एफआरपीच्या बदल्यात कारखान्यांनी शेतकऱ्यांना साखर दिली तर प्रतिक्विंटल ३००० रुपये दराने त्याची खरेदी करण्याची तयारी मुंबईतील व्यापाऱ्यांनी दर्शवली आहे,' अशी माहितीही शेट्टी यांनी दिली. कारखान्यांनी दिलेली साखर एकत्रित करण्यााठी स्वाभिमानी शेतकरी संघटनेकडून नियोजन केले जात आहे, असे त्यांनी सांगितले.

थकीत एफआरपीप्रश्नी साखर आयुक्तांच्या आदेशानुसार कोल्हापूर विभागातील १२ साखर कारखान्यांची साखर जप्त करण्यासंदर्भात तहसीलदारांनी कारवाई सुरू केली आहे. ऊस उत्पादकांना किती एफआरपी दिली? याचा अहवाल देण्यासाठी तहसलीदारांनी कारखान्यांना नोटिसा दिल्या आहेत. कारखान्यांना सात ते पंधरा दिवसांची मुदत दिली आहे. नोटिसींना उत्तर देण्यासाठी वारणा कारखान्याला सात दिवसांची मुदत दिली होती. ही मुदत संपल्यानंतर पन्हाळ्याचे तहसीलदार गणेश शिंदे यांनी 'साखर जप्त करण्यात का येऊ नये?' अशी नोटीस बजावली आहे. अन्य कारखान्यांना अहवाल देण्यासाठी शनिवारपर्यंत (ता. १६) मुदत आहे.

दरम्यान, थकीत एफआरपीच्या बदल्यात साखर देण्याची मागणी स्वाभिमानी शेतकरी संघटनेने केली आहे. मुंबईतील व्यापाऱ्यांनी साखर खरेदीची तयार दर्शवली असून प्रतिक्विंटल ३००० रुपये देण्याची तयारी दर्शवली आहे. कारखान्यांकडून मिळालेली साखर एकत्र करून व्यापाऱ्यांना दिली जाणार आहे. नंतर मिळालेल्या रक्कमेचे वाटप करण्याचे नियोजन 'स्वाभिमानी'ने केले आहे. दरम्यान 'कोल्हापूर विभागातील २४ कारखान्यांवर कारवाईस चालढकल केली जात असल्याने पुन्हा साखर आयुक्त कार्यालयवर धडक मारली जाईल,' असा इशाराही शेट्टी यांनी दिला आहे. सध्या ते अधिवेशनासाठी दिल्लीत आहेत. अधिवेशन संपल्यानंतर पुन्हा एफआरपीप्रश्नी साखर आयुक्त व कारखानदारांकडे तगादा लावण्याचे संकेत दिले आहेत.

किसान सभेचा गुरुवारी मोर्चा

सरकारने कारखान्यांकडून उर्वरीत साखर खरेदी करुन एफआरपीची रक्कम शेतकऱ्यांच्या खात्यावर जमा करावी या प्रमुख मागण्यांसह अन्य मागण्यांसाठी अखिल भारतीय किसान सभेच्यावतीने गुरुवारी (ता. १४) जिल्हाधिकारी कार्यालयावर मोर्चा काढण्यात येणार आहे. सरकारने साखर खरेदी करुन रास्त दुकानातून ग्राहकांना पुरवावी अशी मागणीही करण्यात येणार आहे. 'दसरा चौकातून दुपारी बारा वाजता मोर्चास सुरुवात होणार आहे. 'देवस्थान'च्या जमिनी शेतकऱ्यांच्या नावे कराव्या, कर्जातून शेतकऱ्यांची मुक्तता करावी, रत्नागिरी-नागपूर महामार्गासाठी हस्तांतरीत केलेल्या शेतकऱ्यांना बाजारभावाच्या पाचपट भरपाई मिळावी, जिल्ह्यातील अपूर्ण सिंचन प्रकल्प पूर्ण करावेत, या मागण्या करण्यात येणार आहे,' असे पत्रक जिल्हाध्यक्ष डॉ. उदय नारकर यांनी प्रसिद्धिस दिले आहे.

म. टा. प्रतिनिधी, कोल्हापूर

बालकांना जीवनसत्वयुक्त लस देण्याच्या नावाखाली राजारामपुरी येथे सामाजिक संस्था व हॉस्पिटलकडून सुरू असलेली लसीकरण मोहीम महापालिकेच्या कारवाईनंतर थांबवण्यात आली. नोंदणीशुल्क आणि लसीकरणासाठी घेण्यात आलेले पैसेही नागरिकांना परत देण्यात आले. नागरिकांच्या सतर्कतेमुळे सकाळी हा प्रकार उघडकीस आला.

राजारामपुरी येथील पंत दत्त मंदिराजवळ सामाजिक संस्था व हॉस्पिटलकडून शून्य ते पाच वयोगटातील बालकांना जीवनसत्वयुक्त लस देण्यात येत होती. राज्य सरकारची मोहीम असल्याचे स्पष्ट करत नागरिकांकडून नोंदणीशुल्क १५ व लसीकरणासाठी ३० रुपये आकारले जात होते. आयुर्वेदिक लस असल्याचे वैद्यकीय अधिकारी सांगत असल्याने काही वेळात नागरिकांनी येथे लहान बाळांसह गर्दी केली. सुमारे शंभर नागरिकांनी येथे नोंदणी केली. व दुपारनंतर लसीकरण देण्यास सुरुवात केली. त्याचवेळी काही नागरिकांनी महापालिकेचे आरोग्याधिकारी डॉ. दिलीप पाटील यांच्याशी संपर्क साधला.

डॉ. पाटील यांनी राजारामपुरी येथील नागरी आरोग्य केंद्राच्या वैद्यकीय अधिकारी डॉ. शोभा दाभाडे यांना लसीकरण मोहिमेची त्वरीत तपासणी करण्याचे आदेश दिले. लसीकरणासाठी महापालिकेच्या आरोग्य विभागाची परवानगी नसल्याने लसीकरण थांबवण्याबरोबरच शुल्क परत देण्याचे आदेश दिले. महापालिकेच्या कारवाईनंतर संबंधितांनी लसीकरण मोहीम थांबवत नागरिकांचे घेतलेले पैसेही परत दिले. याबाबत आवाहन करताना आरोग्याधिकारी डॉ. दिलीप पाटील म्हणाले, 'विनापरवाना लसीकरण मोहिमेमध्ये नागरिकांनी सहभागी होऊ नये, तसेच त्याबाबत महापालिकेशी त्वरीत संपर्क साधावा.'

म. टा. वृत्तसेवा, गारगोटी

राज्यात मुख्यमंत्री ग्राम सडक योजना ग्रामविकास विभागाच्या महाराष्ट्र ग्रामीण रस्ते विकास संस्थेमार्फत राबविण्यात येत आहे. योजनेंतर्गत राधानगरी तालुक्यातील ५.२५० किलोमीटर लांबीच्या रस्त्यांसाठी ४ कोटी २३ लाख रुपयांचा निधी मंजूर झाला आहे. आमदार प्रकाश आबिटकर यांनी ही माहिती दिली.

आमदार आबिटकर म्हणाले, 'राधानगरी विधानसभा मतदारसंघ हा भौगोलिकदृष्ट्या वाड्या-वस्त्यांमध्ये विखुरलेला असल्यामुळे रस्त्यांची संख्या मोठया प्रमाणात आहे. गेल्या ४ वर्षांपासून मतदारसंघातील रस्ते निर्मितीसाठी प्राधान्याने प्रयत्न सुरू आहेत. सातत्याने पाठपुरावा केल्यामुळेच राधानगरी-भुदरगड व आजरा तालुक्यातील दयनीय अवस्था असणाऱ्या रस्त्यांची दुरुस्ती झाली. आता मुख्यमंत्री ग्रामसडक योजनेमधील कामे पूर्ण झाल्यानंतर मतदारसंघातील रस्त्यांचा दर्जा सुधारण्यास मदत होणार आहे. निधीसाठी ग्रामविकास मंत्री पंकजा मुंडे, पालकमंत्री चंद्रकांत पाटील, ग्रामविकास राज्यमंत्री दादा भुसे यांचे सहकार्य लाभले. योजनेतून राधानगरी तालुक्यातील इजिमा ५२ ते कुपलेवाडी (कोणोली) रस्ता १.७२३ कि.मी. करीता १ कोटी ५३ लाख, केळोशी बुद्रुक ते शिंदेवाडी रस्ता सुधारणा १.७०० कि.मी.साठी १ कोटी ३० लाख, केळोशी बुद्रुक ते माळवाडी रस्ता सुधारणा १.८२५ कि.मी.साठी १ कोटी ४२ लाख निधी मंजूर करण्यात आला आहे असे आबिटकर यांनी पत्रकात म्हटले आहे.

म. टा. वृत्तसेवा, कुडित्रे

करवीर विधानसभा मतदारसंघातील ६ रस्त्यांच्या दर्जोन्नतीसाठी मुख्यमंत्री ग्रामसडक योजना बॅच १ अंतर्गत ८ कोटी १४ लाख ८१ हजार रुपये मंजूर झाल्याची माहिती आमदार चंद्रदीप नरके यांनी दिली.

आमदार नरके म्हणाले, 'रस्त्यांची दुरावस्था झाल्याने परिसरातील ग्रामस्थांची दुरुस्तीची मागणी होती. ती मागणी लक्षात घेऊन ही कामे मुख्यमंत्री ग्रामसडक योजनेतून सुचविली होती. त्यानुसार कोल्हापूर जिल्ह्यातील रस्त्यांची दर्जोन्नती करणेकरिता खालील रस्त्याच्या कामासाठी निधी मंजूर झाला आहे. राज्य मार्ग १७७ खुपीरे ते कुंभार वसाहत रस्त्याची सुधारणेसाठी १ कोटी २६ लाख ६७ हजार, इतर जिल्हा मार्ग ८३ ते म्हालसवडे पोहोच रस्त्यासाठी १ कोटी ६७ लाख ९ हजार, इतर जिल्हा मार्ग ७२ ते चाफोडीपैकी दोनवडी पोहोच रस्त्यासाठी ५८ लाख ७३ हजार, प्रमुख जिल्हा मार्ग ३५ ते हिरवडे खालसा पोहोच रस्त्यासाठी ५३ लाख ७२ हजार, प्रमुख जिल्हा मार्ग २९ ते सावरवाडी रस्त्यासाठी १ कोटी १४ लाख ३७ हजार, वेतवडे ते धनगरवाडा रस्त्यासाठी २ कोटी ९४ लाख २३ हजार असे एकूण ११.१६५ कि.मी. लांबीच्या रस्त्यांसाठी ८ कोटी १४ लाख ८१ हजार रुपये निधी मंजूर झाला आहे. देखभाल व दुरुस्तीसाठी ४९ लाख, ४० हजार रुपये मंजूर आहेत. या कामांसाठी पालकमंत्री चंद्रकांत पाटील, ग्रामविकास मंत्री पंकजा मुंडे, ग्रामविकास राज्यमंत्री दादा भुसे यांचे सहकार्य मिळाले.'

म. टा. वृत्तसेवा, कागल

शिक्षकांच्या रिक्त जागा भरण्याची मागणी करूनही बाळेघोल (ता. कागल) येथील प्राथमिक शाळेकडे दुर्लक्ष केल्याप्रकरणी प्रशासनाचा निषेध करून ग्रामस्थांनी सोमवारी शाळेला कुलूप ठोकले. त्यामुळे दिवसभर शिक्षक बाहेर आणि मुले घरी अशी स्थिती राहिली. सरपंचांसह संतप्त ग्रामस्थांनी सकाळी आंदोलन केले.

बाळेघोलची ही शतकमहोत्सवी आणि परिसरात गुणवंत विद्यार्थी घडविणारी आहे. मात्र गेल्या दोन वर्षांपासून सुरुवातीला पाच, नंतर चार, तीन असे शिक्षक कमी होत आता दोनच शिक्षक उरले आहेत. पंधरा दिवसांपासून सांगलेवाडी येथील एक कामगारी व मूळचे दोन असे तीन शिक्षक कार्यरत आहेत. इयत्ता पहिली ते सातवी असे सात वर्ग असून ७९ पटसंख्या आहे. त्यानुसार येथे सात शिक्षक हवेत अशी ग्रामस्थांनी मागणी केली आहे. ती पूर्ण होत नाही म्हणून त्यांनी आज शाळेला कुलपे घातली. याबाबत पंचायत समितीच्यावतीने गटशिक्षणाधिकारी जी. बी. कमळकर, आर. एस. पाटील यांनी भेट देऊन ग्रामस्थांची समजूत घालण्याचा प्रयत्न केला.

'शाळेच्या पटसंख्येनुसार दोन विषय शिक्षक व दोन अध्यापक पदे मंजूर आहेत. त्यापैकी दोन कार्यरत व एक कामगारी असे तीन शिक्षक कार्यरत आहेत. रोटेशन पद्धततीने आणखी एक देता येईल. भरती नसल्याने तालुक्यात ४८ पदे रिक्त आहेत. त्यामुळे कठीण स्थिती झाली आहे. तरीही शैक्षणिक नुकसान होणार नाही याची काळजी घेऊ. ग्रामस्थांनी सहकार्य करावे' असे गटशिक्षणाधिकारी जी. बी. कमळकर यांनी सांगितले.

फोटो

बाळेघोल : येथे ग्रामस्थांनी मुलांना व शिक्षकांना बाहेर काढून शाळेला कुलूप ठोकले. (सार्थक फोटो, कापशी)

म. टा. वृत्तसेवा, हातकणंगले

मुख्यमंत्री ग्रामसडक योजनेमधून हातकणंगले मतदारसंघातील विविध गावांतील रस्त्यांच्या व विविध विकासकामांसाठी ६ कोटी ५५ लाख व अन्य योजनांतून ५ कोटी असे एकूण ११ कोटी ५५ लाख रुपये निधी मंजूर झाला आहे. आमदार डॉ. सुजित मिणचेकर यांनी पत्रकार परिषदेत ही माहिती दिली.

आमदार मिणचेकर म्हणाले, 'साजणी ते संकाण्णा मळा रस्ता सुधारण्यासाठी १ कोटी १४ लाख, प्र.रा.मा. ६ ते मजले रस्ता सुधारणेसाठी ९० लाख, ग्रामीण मार्ग ५० रेंदाळ ते शाहूनगर रस्ता सुधारणेसाठी १ कोटी ६ लाख, इजिमा १९२ हेर्ले ते सिद्धेश्वरनगर रस्ता सुधारणेसाठी १ कोटी ३२ लाख, इजिमा २८ भेंडवडे ते माळभाग रस्ता सुधारणेसाठी ४८ लाख, प्ररामा ६ अतिग्रे ते चौगुलेवाडी रस्ता सुधारणेसाठी ४६ लाख, प्रजिमा २१ रुई ते मानेनगर रस्ता सुधारणेसाठी १ कोटी १८ लाख, २५१५ योजनेतून मतदारसंघातील गावात सुविधा पुरविण्यासाठी ५ कोटी रुपये मंजूर आहेत. निधी मंजूरीसाठी पालकमंत्री चंद्रकांत पाटील, मंत्री पंकजा मुंडे, मंत्री दादा भुसे यांचे विशेष सहकार्य लाभले. '

यावेळी मुख्यमंत्री ग्रामसडक योजनेचे अधिकारी कोकणे, संजय गांधी योजना अध्यक्ष महेश चव्हाण, जि. प. सदस्य प्रविण यादव, पं. स. सदस्य पिंटू मुरुमकर, राजेश पाटील, राजू मगदूम, संजय चौगुले, सुरेश यादव, दीपक यादव, सुरेश मोघे, संभाजी हांडे, विजय भोसले आदी उपस्थित होते.

म. टा. वृत्तसेवा, कागल

कागल तालुक्यातील करनूरच्या ओढ्याजवळील वळणावर भरधाव वेगात जाणार्‍या टेम्पोचालकाचा ताबा सुटून टेम्पो उलटला. या अपघातात ३१ महिला जखमी झाल्या. सर्वांना कागलच्या ग्रामीण रुग्णालयामध्ये ६ रुग्णवाहिकांसह मिळेल त्या वाहनांनी दाखल करण्यात आले. यातील १७ गंभीर जखमी महिलांना प्राथमिक उपचार करून कोल्हापूरच्या सरकारी दवाखान्यात पाठविण्यात आले.

चिकोडी तालुक्यातील सुळगाव येथील समाजातील एका महिलेच्या अनैतिक संबंधाच्या त्रासाला कंटाळून गावातील सुमारे १२५ ग्रामस्थ तीन टेम्पोतून निपाणी ग्रामीण पोलिस ठाण्याला निवेदन देण्यासाठी गेले होते. गावाकडे परतताना मत्तिवडे-सुळगाव रस्त्यावर हा अपघात झाला. सुळगावच्या अल्पवयीन मुलाचे गावातील विवाहित महिलेशी अनैतिक संबंध होते. समाजातील लोकांनी त्या महिलेला अनेकवेळा समज दिली. मात्र, तिने दुर्लक्ष केले. याबाबत सुळगाव येथील १२५ जणांनी तीन टेम्पो भाड्याने घेतले. यातील शेंडूर येथील टेम्पोत (एमएच ०९ ए ७५८९) गावातील ३५ महिला बसल्या होत्या. सर्वजण टेम्पोतून निपाणी ग्रामीण पोलिस ठाण्यात निवेदन देण्यासाठी गेले. निवेदन देवून दुपारी बेंगळुरू-पुणे महामार्गावरून कोगनोळी टोलनाक्याजवळ मत्तीवडे-सुळगाव रस्त्याने तिन्ही टेम्पो जात होते. करनूर ओढ्याजवळ दुपारी ३.३० वाजता चालक जगदिश रायगोंड कांबळे (रा. शेंडूर ता. कागल) याचा टेम्पोवरील ताबा सुटला. टेम्पो उलटला. पाठीमागून आलेल्या अन्य लोकांनी टेम्पोतील महिलांना बाहेर कम्ले. विविध ठिकाणच्या १०८ रुग्णवाहिकाही दाखल झाल्या. जखमींना कागलच्या ग्रामीण रुग्णालयात दाखल करण्यात आले. डॉ. सुनीता पाटील, डॉ. रवींद्र बल्लुरगी यांनी कर्मचार्‍यांना एकत्र करून उपचारास सुरुवात केली. डॉ. मुकुंद सादिगले यांना बोलवून घेतले. जखमींपैकी ३ महिला गंभीर असल्याने त्यांना तातडीने कोल्हापूरच्या सरकारी रुग्णालयात पाठविण्यात आले. अपघातामध्ये अनेक महिलांना डोक्याला, छातीला, हाताला जबर दुखापत झाली होती.

अपघातात रेखा मनोहर कांबळे (४५), सुनीता विनायक कांबळे (४२), साताबाई आप्पासो कांबळे (४०), मंगल नेताजी कांबळे (३०), आक्काताई दत्तात्रय कांबळे (४०), मनीषा भिकाजी कांबळे (२८), आक्‍काताई मधुकर कांबळे (५०), सरस्वती दत्तू कांबळे (४१), आवूबाई प्रल्हाद कांबळे (४३), मंगल शिवाजी कांबळे (५५), रेणुका गौतम कांबळे (३०), शांताबाई अशोक कांबळे, उमा शिवाजी कांबळे (३५), यमनाबाई केरबा कांबळे (६५), छाया अशोक कांबळे (३५) आदींना उपचारासाठी कोल्हापूर येथे पाठविण्यात आले. ग्रामीण रुग्णालयात जखमींवर सविता गाजरे, माधवी खोपडे, जयश्री गोंधळी, कल्पना रत्नाकर, मनोज मगर, प्रमोद बागडी, अमोल पेडणेकर, दिलीप निवळे, रुपेश वाघेला आदींनी तातडीने उपचार केले.

म. टा. प्रतिनिधी, कोल्हापूर

'घर घेण्यासाठी इच्छुक असलेल्यांना क्रिडाईच्या दालन प्रदर्शनाची मदत झाली. एकाच छताखाली विविध प्रकारची घरे पाहायला मिळाली. बांधकाम साहित्याची माहिती चांगली मिळाली,' असे प्रतिपादन जिल्हा पोलिसप्रमुख अभिनव देशमुख यांनी सोमवारी केले. शाहूपुरीतील जिमखाना मैदानात 'क्रिडाई'तर्फे चार दिवसांपासून आयोजित 'दालन २०१९'च्या सांगता कार्यक्रमात ते बोलत होते. जिल्हा परिषद मुख्य कार्यकारी अधिकारी अमन मित्तल प्रमुख उपस्थित होते. दरम्यान, चार दिवसांत ३ लाख ८३ हजार लोकांनी भेट दिली. ५१ फ्लॅट बुक झाले असल्याची माहिती क्रिडाईने दिली.

पोलिसप्रमुख देशमुख म्हणाले, 'दालन प्रदर्शनामुळे हवे तसे घर निवडण्याची संधी मिळाली. घर बांधण्यासाठीचे साहित्य पाहायला मिळाले. यामुळे क्रिडाई कौतुकास पात्र आहे. पोलिस दलातील शिपाई पदावर काम करणाऱ्या कर्मचाऱ्यांसही घर मिळण्यासाठी पोलिस हौसिंग कार्पोरेशन गृहकर्ज देते. सातवा वेतन आयोगही लागू झाला आहे. यामुळे क्रिडाईने पुढाकार घेऊन परवडतील अशा दरात पोलिसांना घरे उपलब्ध करून देण्यासाठी विशेष प्रकल्प साकारावा. यासाठी क्रिडाईने पोलिस प्रशासनाकडे प्रस्ताव द्यावेत.'

सीईओ मित्तल म्हणाले, 'बांधकाम व्यवसायात नविन तंत्रज्ञान आले आहे. ते स्वीकारून क्रिडाई गृहप्रकल्प उभारत आहे. प्रकल्प उभारताना जागा मिळवणे, भांडवल उभारणी, सरकारी परवानग्या मिळविणे आणि ग्राहक शोधणे अशा टप्यांतून व्यवसायिकांना मार्गक्रमण करावे लागते. हे टप्पे यशस्वी करून ग्राहकांच्या बजेटमध्ये हवे तसे घर मिळवून देणे आव्हानात्मक आहे.'

दालन आयोजन समितीचे अध्यक्ष सचिन ओसवाल म्हणाले, 'चार महिन्यांच्या अथक परिश्रमातून प्रदर्शन घेण्यात आले. प्रदर्शनाची प्रचार, प्रसिद्धी व्यापक करण्यात आली. त्यामुळेच चार दिवसांत ३ लाख ८३ हजार लोकांनी भेट दिली. ५१ फ्लॅट्स बुक झाले. त्यामुळे 'यंदा संधी सर्वांसाठी' हे ब्रिदवाक्य घेऊन आयोजन केलेले दालन यशस्वी ठरले.'

यावेळी फ्लॅट बुक केलेल्यांतून काढलेल्या लकी ड्रामध्ये तीन, दोन, एक लाखांचे बक्षीस अनुक्रमे अभिलाष चव्हाण, रवींद्र हराणे, शबाना मुल्ला यांनी मिळवले. बांधकाम व्यवसायिक गटातून पहिला क्रमांक रामसीना ग्रुप, वरद डेव्हलपर्स, दुसरा क्रमांक आयडिल कन्ट्रक्शन, ओम गणेश कन्ट्रक्शनने मिळवला. प्रायोजक गटातून क्रिस्ट इलेव्हेटर्स, मिरासो शेपर्स, वक्रतुंड एंटरप्रायझेस तर बांधकाम साहित्य पुरवठादार गटातून काकडे लेसर, एमजीडब्लू यांनी विजेतेपद मिळवले. त्यांचा सन्मान करण्यात आला.

क्रिडाईचे अध्यक्ष महेश यादव, उपाध्यक्ष विद्यानंद बेडेकर, राज्य उपाध्यक्ष राजू परीख, विक्रांत जाधव, संजय चव्हाण, प्रदीप भारमल, जितू गांधी, विश्वजित जाधव, संग्राम दळवी यांच्यासह बांधकाम व्यवसायिक उपस्थित होते. सचिव के. पी. खोत यांनी आभार मानले.

शेवटच्या दिवशीही गर्दी

प्रदर्शन पाहण्यासाठी शेवटच्या दिवशीही मोठी गर्दी राहिली. अनेकजण सर्व स्टॉलवर थांबून माहिती घेताना दिसत होते. त्यामुळे चार दिवसांत तब्बल ३ लाख ८३ हजार ८३ हजार लोकांनी भेट दिल्याची नोंद प्रवेशव्दारावरील फुट सेन्सरवर झाली.

म. टा. प्रतिनिधी, कोल्हापूर

'मुंबई हायकोर्टाचे खंडपीठ कोल्हापुरात व्हावे, या मागणीसाठी पुढील आठवड्यात सहा जिल्ह्यांतील वकिलांची बैठक बोलावण्यात येईल', अशी घोषणा खंडपीठ कृती समितीचे निमंत्रक बार असोसिएशनचे अध्यक्ष अॅड प्रशांत चिटणीस यांनी केली. कृती समितीच्या वतीने मुख्य न्यायमूर्ती नरेश पाटील यांची मुंबईत २६ फेब्रुवारीला भेट घेण्यात येणार आहे. तत्पूर्वी सहा जिल्ह्यांतील वकिलांचे म्हणणे ऐकूण घेण्यासाठी बैठक घेण्यात येणार आहे.

भारतीय विधिज्ञ परिषदेने वकिलांसाठी कल्याणकारी योजना राबवाव्यात, याबाबतच्या ठरावावर चर्चा करण्यासाठी सोमवारी बार असोसिएशनने सर्वसाधारण सभेचे आयोजन केले होते. सभेच्या अध्यक्षस्थानी बार असो.चे अध्यक्ष प्रशांत चिटणीस होते.

बैठकीत सर्व ठराव मांडण्यात आले. खंडपीठप्रश्नी मुख्य न्यायमूर्तींना भेट देण्यासंदर्भात वकिलांनी आपली मते मांडली. अॅड राजेंद्र मंडलिक यांनी सहा जिल्ह्यातील बार असोसिएशनच्या पदाधिकाऱ्यांना विश्वासात घेऊन व्यापक शिष्टमंडळ बनवावे, अशी सूचना केली. अॅड किरण पाटील यांनी मुख्य न्यायमूर्तींसमोर खंडपीठप्रश्नी ठोस व भक्कम बाजू मांडावी, अशी मागणी केली.

माजी अध्यक्ष अजित मोहिते म्हणाले, 'सोलापूर जिल्ह्यालाही शिष्टमंडळात सहभागी करुन घ्यावे. त्यासाठी बारच्या पदाधिकाऱ्यांनी मंगळवेढा, सांगोलासह सोलापूर जिल्ह्यातील वकिलांशी चर्चा करावी.' अॅड. विजय महाजन म्हणाले, 'मुख्य न्यायमूर्ती पाटील यांनी नुकताच पदभार स्वीकारला असल्याने शिष्टमंडळ भेटीस गेल्यावर ते मोघम उत्तर देण्याची शक्यता आहे. खंडपीठ कृती समितीने यापूर्वी केलेल्या मागण्या, सरकारकडून उचलेली पावले आणि कोल्हापुरातच खंडपीठ स्थापनेसाठी यापूर्वीच्या हायकोर्टच्या न्यायाधीशांनी दाखवलेल्या सकारत्मक अहवालाची माहिती देण्यासाठी पत्रव्यवहार करावा.'

'व्यापक शिष्टमंडळाऐवजी सात ते दहा पदाधिकाऱ्यांचे शिष्टमंडळ भेटीस जावे', अशी सूचना माजी अध्यक्ष अॅड विवेक घाटगे यांनी मांडली. तर अॅड. अशोक पाटील यांनी सहा जिल्ह्यातील २५ ते ३० जणांचे व्यापक शिष्टमंडळ घेऊन जावे, अशी सूचना केली.

वकिलांची मते जाणून घेतल्यावर समितीचे निमंत्रक अॅड.चिटणीस म्हणाले, 'कोल्हापूर, सांगली, सातारा, सिंधुदुर्ग, रत्नागिरी, सोलापूर जिल्ह्यातील वकिलांशी चर्चा सुरु केली आहे. सोलापुरातील वकिलांची शनिवारी (ता.१६) भेट घेणार असून कोल्हापूर २५ ते ३० वकिलांना घेऊन जाणार आहे. सोलापूर जिल्ह्याचा खंडपीठाला पाठिंबा मिळेल.' असोसिएशनचे सचिव सुशांत गुडाळकर यांनी प्रास्ताविक केले. उपाध्यक्ष आनंदराव जाधव यांनी ठरावाचे वाचन केले. सदस्य ओंकार देशपांडे यांनी आभार मानले.

...

सभेतील ठराव

केंद्र व राज्य सरकारने वकिलांच्या कल्याणकारी योजनांसाठी आर्थिक तरतूद करुन त्या राबवाव्यात, बार असोसिएशनमध्ये पायाभूत सुविधा द्याव्यात, वकील व त्यांच्या पक्षकारांच्या कल्याणकारी योजनेसाठी पाच हजार कोटी रुपयांची तरतूद करावी. त्यांच्या कुटुंबाला वैद्यकीय सुविधा द्यावी. नवीन वकिलांसाठी पाच वर्षापर्यंत दहा हजार रुपयांचे मानधन मिळावे.