म. टा. वृत्तसेवा, कसबा बावडा 'पैसे म्हणजे काय? धातूचा एक तुकडा कशामुळे इतका मौल्यवान ठरतो? ज्याने वस्तूंची, सार्वजनिक सेवांची तसेच विचारांची देवाण-घेवाण करता येते? सर्वात पहिले नाणी कशी विकसित झाली? नाण्यांवरून इतिहासाची पुनर्रचना करता येते का? नाणी अस्तित्वात अर्थव्यवस्था कोणती होती? अशा सर्व प्रश्नांची उत्तरे वस्तूविनिमय ते पतपेढी व्यवस्था या प्रदर्शनातून मिळाली. कसबा बावडा येथील राजर्षी शाहू जन्मस्थानावर विद्यार्थ्यांनी 'म्युझियम ऑन व्हील्स'च्या प्रदर्शनाचा लाभ घेतला. मुंबईतील छत्रपती शिवाजी वस्तूसंग्रहालय व सिटी इंडियाच्या संयुक्त विद्यमाने संग्रहालयाचा प्रसार व्हावा या उद्देशाने मांडणी केलेली म्युझियमची बस आज कोल्हापूर वस्तूसंग्रहालयाच्यावतीने राजर्षी शाहू जन्मस्थळावर आणण्यात आली. बसमध्ये मांडलेला भारताच्या पैशाचा इतिहास पाहण्यासाठी कसबा बावडा परिसरातील विद्यार्थ्यांनी गर्दी केली. बसचे स्वागत कोल्हापूर वस्तू संग्रहालयाचे अभिरक्षक अमृत पाटील व शाहू जन्मस्थानचे उप अभिरक्षक उत्तम कांबळे यांनी केले. या फिरत्या वस्तुसंग्रहालयात वस्तूविनिमय ते पतपेढी व्यवस्था म्हणजेच भारतीय चलन व्यवस्थेचा इतिहास मांडण्यात आला आहे. छत्रपती राजाराम हायस्कूल, जीवन कल्याण हायस्कूलसह महापालिकेच्या सर्व शाळांच्या विद्यार्थ्यांनी या ठिकाणी भेट दिली. मुंबईच्या वस्तू संग्रहालयातील शिक्षण सहाय्यक कृतिका म्हात्रे, गौरव जाधव, चिन्मय गावडे, सिमरन जॉर्ज यांनी विद्यार्थ्यांना माहिती दिली. मंगळवारी (ता. १२) चित्रकला शिक्षकांसाठी एक दिवसीय कार्यशाळेचे आयोजन राजर्षी शाहू जन्मस्थळावर केले आहे. शिक्षकांना 'वस्तूसंग्रहालय शिक्षणाचे एक अनौपचारिक माध्यम' या विषयावर लघुपटाद्वारे संग्रहालयाची माहिती देवून बसमधील वस्तूसंग्रहालयही दाखविण्यात येणार आहे. बुधवारी (ता. १३) गारगोटीतील शाहू कुमार भवनात ही बस जाणार आहे. त्यानंतर प्रायव्हेट हायस्कूल, स. म. लोहिया हायस्कूल कोल्हापूर येथे बस असेल. रविवारी (ता. १७ ) टाउन हॉल येथील कोल्हापूर वस्तू संग्रहालयाच्या दारात बस असेल. मुंबईतील छत्रपती शिवाजी वस्तुसंग्रहालय व सिटी इंडियाच्या संयुक्त विद्यमाने म्युझियमची बस राजर्षी शाहू जन्मस्थळावर आणण्यात आली. यावेळी विद्यार्थ्यांची गर्दी झाली होती. फोटो : राहुल मगदूम
मोबाइल अॅप डाउनलोड करा आणि राहा अपडेट
