फोटो... म. टा. वृत्तसेवा, हातकणंगले हुपरी (ता. हातकणंगले) शहरातील मुख्य रस्त्यावरील वाहतुकीला अडथळे ठरत असलेली अनेक अतिक्रमणे काढण्याची धडक मोहीम हुपरी पोलिस ठाण्याच्या सहायक निरीक्षक रिजवाना नदाफ यांनी गुरुवारी सलग दुसऱ्या दिवशी राबविली. यावेळी रस्त्यावरील मोठी झाडे, टपऱ्या, हौद काढून टाकण्यात आले. पोलिसांच्या या धाडसी कारवाईचे सर्वत्र स्वागत होत आहे. हुपरी शहरातील मुख्य रस्त्यावर पानटपऱ्या, दुकाने, डिजिटल फलक, वाहने, आदींमुळे मोठ्या प्रमाणात वाहतुकीची कोंडी होत होती. त्यातच ऊस हंगामामुळे ट्रक, ट्रॅक्टर, बैलगाड्यांमुळे वाहतुकीचा बोजवारा उडून अनेक छोटे-मोठे अपघात सर्रासपणे घडत आहेत. गावभागातील शिवाजी चौकात मोठी झाडे व त्यांच्या फांद्यांमुळे वाहनधारकांना अडचण निर्माण होत होती. त्यामुळे सहायक पोलिस निरीक्षक नदाफ यांनी बुधवारी सहकारी पोलिस तसेच होमगार्डना सोबत घेऊन जवाहर साखर कारखान्यांच्या चौपाटीपासून रस्त्यावरील अतिक्रमणे काढण्यास सुरुवात केली. दरम्यान, पोलिसांनी गुरुवारी ही अतिक्रमणांची धडक मोहीम सलग दुसऱ्या दिवशी मोठ्या धडाक्यात चालू ठेवली. यावेळी शिवाजी चौकातील रस्त्यातील मोठी झाडे, पाण्यांचे हौद जेसीबी मशिनच्या सहाय्याने काढून टाकले. यावेळी कारवाईला कोणीही विरोध केला नाही. नदाफ यांच्या धाडसी कारवाईने जवाहर साखर कारखाना ते गावभागातील सिद्धार्थ नगरपर्यंतच्या मुख्य रस्त्याने मोकळा श्वास घेतला आहे. पोलिसांची ही कारवाई सकाळी दहापासून सायंकाळी सहापर्यंत सुरू होती. ००० कारवाईचे स्वागत गेल्या अनेक वर्षांपासून शहरातील मुख्य रस्त्यावर अनेकांनी मोठ्या प्रमाणात अतिक्रमणे केली होती. यामुळे वाहतुकीची शिस्त बिघडली होती. परंतु सहायक पोलिस निरीक्षक रिजवाना नदाफ यांनी सर्वांशी चर्चा करून दोन दिवसांत पूर्णवेळ देऊन केलेल्या दणकेबाज कारवाईचे सर्वत्र स्वागत होत आहे. कोणाचाही मूलाहिजा न बाळगता संपूर्ण शहरात ही बेधक मोहीम राबवावी, अशी मागणी शहरवासीयांतून होत आहे. ००००
मोबाइल अॅप डाउनलोड करा आणि राहा अपडेट
