मलकापूरची मतदार यादी जाहीर

म. टा. वृत्तसेवा, कराड

मलकापूरमध्ये प्रसिद्ध करण्यात आलेल्या प्रारुप मतदार यादीवर ४७० मतदारांनी हरकती दाखल केलेल्या होत्या. मतदारांच्या वेळेत आलेल्या हरकती व सूचना विचारात घेऊन किरकोळ बदल करीत शनिवारी २९ रोजी अंतिम मतदार याद्या प्रसिद्ध करण्यात आल्या आहेत. सदर याद्यांनुसार ९ हजार ७७० पुरुष व ८ हजार ८६० स्त्रिया, असे एकूण १८ हजार ६३० मतदारांची यादी तयार करण्यात आली आहे. आज, सोमवारी मतदान केंद्रांची यादी प्रसिद्ध करण्यात येणार आहे.

............

आगीत दोन दुकाने खाक

कराड :

शहराला लागून असलेल्या मलकापूर येथील शिवछावा चौकात दोन दुकानांना अचानक लागलेल्या आगीत फर्निचरसह माल जळून खाक झाला. दोन्ही दुकानांचे सुमारे साडेतीन लाखांचे नुकसान झाले आहे. ढेबेवाडी फाटा येथे शनिवारी पहाटेच्या सुमारास ही घटना घडली. अचानक लागलेल्या आगीमुळे परिसरातील व्यावसायिकांची चांगलीच धावपळ झाली. मात्र, आगीचे नेमके कारण अद्यापपर्यंत स्पष्ट झालेले नाही.

मलकापूर येथील ढेबेवाडी फाट्यावर शिवछावा चौकात उपमार्गालगत दुकानांची रांग आहे. अनेक वर्षांपासून ३५ ते ४० व्यावसायिक येथे व्यवसाय करतात. तेथील हॉटेल बेकर्स गार्डनशेजारी संजय नांगरे-पाटील यांच्या मालकीचा नांगरे-पाटील पेपर स्टॉल व पान शॉप आहे. त्यांच्याच शेजारी प्रकाश रघुनाथ खराडे यांच्या मालकीचे पी. के. कॉफी हाउस हे दुकान आहे. संजय नांगरे नेहमीप्रमाणे रात्री आठ वाजण्याच्या सुमारास दुकान बंद करून करवडीला गेले तर खराडे रात्री साडेदहा वाजता दुकान बंद करून सनसिटी येथील घरी गेले. शनिवारी पहाटे पाच वाजण्याच्या सुमारास वडापाव गाडा चालक विजय चौहान नेहमीप्रमाणे दुकान सुरू करण्यासाठी फाट्यावर आले असता दोन्ही दुकानांमधून धूर निघत असल्याचे त्यांच्या निदर्शनास आले. त्यांनी आगीबाबत जागा मालक मुकुंद चव्हाण यांना सांगितले. चव्हाण यांनी खराडे व नांगरेंसह आसपासच्या दुकानदारांना फोन करून तत्काळ घटनास्थळी येण्यास सांगितले. नगरपालिका व कृष्णा रुग्णालयाच्या अग्निशामक दलाने आग विझवली. या ठिकाणी एकाच रांगेत सलग दुकाने आहेत. त्यामुळे आग वेळीच आटोक्यात आणल्याने मोठा अनर्थ टळला.

मिलची भिंत कोसळली

सोलापूर :

सोलापुरातील दमानी नगर परिसरातील बंद पडलेल्या जाम मिलची जुनी मोडकळीस आलेली भिंत रविवारी मध्यरात्रीच्या सुमारास अचानक कोसळली. भिंतीच्या शेजारी असलेल्या पाण्याच्या टाकीवर भिंत कोसळल्याने टाकी ही जमीनदोस्त झाली. शिवाय बाजूच्या विजेच्या खांबावर भिंत पडल्याने आजूबाजूच्या खांबावरील वीजेचा तारा वीज प्रवाह चालू असलेल्या स्थितीत नागरिकांच्या घरावर लोबकळत होत्या. मात्र, तत्काळ वीजपुरवठा खंडित केल्याने मोठा अनर्थ टळला. मात्र वीज वितरण कंपनीने दिवसभरात जुना खांब काढून नवीन खांब टाकून वीजपुरवठा खंडित केला. शिवाय महापालिकेने उर्वरित धोकादायक भिंतही जेसीबीच्या मदतीने पाडून टाकली.

Maruti.Patil@timesgroup.com

tweet: @MarutipatilMT

कोल्हापूर : शहरात व उपनगारात वाढत्या नागरीकरणामुळे मिळकतदारांची संख्या वाढत असताना महापालिकेच्या घरफाळा विभागाकडे नवीन अथवा वाढीव बांधकामांची नोंदच केली जात नाही. अशा मिळकतदारांचा शोध घेऊन नोंद करण्यासाठी सायबरटेक प्रायव्हेट कंपनीला सर्वेक्षणाचे काम देण्यात आले. मात्र दोनदा मुदतवाढ देऊनही कंपनीने सर्वेक्षणाला विलंब लावला. त्यामुळे कंपनीला दररोज एक हजार रुपये दंड आकारण्यात येत आहे. तर तिसऱ्यांदा मुदवाढ देण्याचा कंपनीचा प्रस्ताव प्रशासनाने फेटाळून लावला. त्यामुळे महापालिका क्षेत्रातील प्रत्यक्ष मिळकदारांची संख्या समजण्यास आणखी विलंब लागण्याची शक्यता आहे.

महापालिकेने शहरातील मिळकतदारांना २०११मध्ये घरफाळा वाढ लागू केली होती. भांडवली मूल्याधारित कर रचनेमुळे २० ते २५ टक्के घरफाळा वाढ झाली असल्याने पाच वर्षात घरफाळा वाढ करू नका अशी मागणी नगरसेवकांनी महासभेत उपसूचनेमध्ये केली होती. तरीही दरवर्षी प्रशासनाकडून घरफाळावाढीचा प्रस्ताव आणला जातो. मात्र नगरसेवकांच्या विरोधामुळे गेल्या सात वर्षात घरफाळ्यात वाढ झालेली नाही. शहरात नवीन मिळकती बांधल्या गेल्या. त्यांना घरफाळा लागू करण्यास प्रशासन कमी पडते. लाइट, पाणी कनेक्शनधारकांची संख्या जास्त असताना घरफाळा भरणाऱ्या मिळकतदारांची संख्या नगण्य का? असा मुद्दा उपस्थित करत प्रथम अशा मिळकतींचा शोध घेण्याची मागणी नगरसेवकांनी केली.

त्यानुसार शहरातील नव्या-जुन्या मिळकतींचा सर्व्हे करण्यासाठी सायबरटेक प्रायव्हेट कंपनीला २०१६ मध्ये काम देण्यात आले. कंपनीने एप्रिल २०१६पासून कामाला सुरुवात केली. २०१७पर्यंत सर्वेक्षण पूर्ण करण्याचे उद्दीष्ट होते. पण कंपनीला मुदतीत काम करता आले नाही. त्यामुळे मुदतवाढ देण्यात आली. पण वाढीव मुदतीतही काम पूर्ण न झाल्याने दुसऱ्यांदा मुदतवाढ देत दिवसाला एक हजार रुपये दंड करण्याचा निर्णय होऊन त्याच्या अंमलबजावणीसही सुरुवात झाली. सर्वेक्षणाला कंपनी विलंब लावत असताना त्यांच्या कामाबाबतही अनेक तक्रारी झाल्या आहेत. घरफाळा कमी लागू करण्यासाठी मिळकतदार चिरीमिरीची मागणी करत असल्याची व्हिडिओ क्लिप नगरसेवकांनी सादर केली होती. त्यानंतरही कंपनीच्या कारभारात सुधारणा झाली नाही. कंपनीने १५ डिसेंबर रोजी तिसऱ्यांदा मुदतवाढीचा प्रस्ताव दिला. मात्र प्रशासनाने हा प्रस्ताव फेटाळून लावला. 'कंपनीकडून सर्वेक्षणाचे ८० काम पूर्ण झाले आहे. ए., सी., डी. आणि ई वार्डाचा यामध्ये समावेश आहे. केवळ बी वॉर्डातील काम अपूर्ण आहे' असे करनिर्धारक दिवाकर कारंडे यांनी सांगितले.

वसुली कशी करायची ?

शहरातील सुमारे दीड लाख मिळकतींचा सर्वे करण्यासाठी कंपनीला ३ कोटी ७२ लाखांचा ठेका दिला. तीन टप्प्यांत कंपनीला पैसे देण्यात येणार होते. त्यापैकी एक कोटी ४५ लाख कंपनीला अदा केले आहेत. कंपनीचे काम समाधानकारक नसताना पैसे दिल्याने वादाचा मुद्दा उपस्थित झाला आहे. नगरसेवकांच्या मागणीनुसार कंपनीला ब्लॅकलिस्टमध्ये टाकल्यास रक्कम कशी वसूल करायची? असा प्रश्न निर्माण होणार आहे.

कार्यपद्धतीवर प्रश्नचिन्ह

कंपनीने आतापर्यंत केलेल्या सर्वेक्षणामध्ये सी आणि डी वार्डात केवळ २५६ नव्या मिळकती आढळून आल्या आहेत. शहराचा हा जुना भाग असला तरी येथे दाट लोकसंख्या आणि बांधकामाच्या रचनेमुळे मिळकतदारांची संख्या वाढण्याची शक्यता होती. पण, प्रमाणापेक्षा कमी मिळकती आढळल्याने कंपनीच्या कार्यपद्धतीवरच प्रश्नचिन्ह निर्माण झाले आहे. घरफाळा वसुली हा महापालिकेच्या उत्पन्नाचा प्रमुख स्रोत असताना शहरातील सर्व मिळकती कररचनेत येत नसल्याने उत्पन्नावर पर्यायाने विकासावर परिणाम दिसून येत आहे.

कोट

कंपनीने अत्यंत चुकीच्या पद्धतीने मिळकतींचे सर्वेक्षण केले आहे. दोनवेळा मुदतवाढ देऊनही काम पूर्ण केलेले नाही. कंपनीला नाममात्र दंड केला असला तरी यापूर्वी दिलेले पैसे प्रशासनाने वसूल करावेत. नंतरच कंपनीला ब्लॅकलिस्ट करावे.

- भूपाल शेटे, उपमहापौर

१,४५,६१३

मिळकतींची संख्या

१,१६,३२३

करपात्र निवासी इमारती

२९,२९०

करपात्र अनिवासी इमारती

७५ कोटी

घरफाळा वसुलीचे उद्दीष्ट

३९.८७ कोटी

आतापर्यंतची वसुली

जयसिंगपूर : येथील प्राइम ऑटो वर्कशॉपच्या खिडकीचे ग्रील तोडून चोरट्याने ६५ हजार रुपयांचे साहित्य लंपास केले. ही घटना रविवारी पहाटे घडली. याबाबत ओंकार निंबाळकर यांनी जयसिंगपूर पोलिसात फिर्याद दिली आहे. पोलिसांनी सांगितले की, निंबाळकर शनिवारी रात्री वर्कशॉप बंद करुन गेले होते. रात्री चोरट्याने वर्कशॉपच्या खिडकीचे ग्रील उचकटून आत प्रवेश केला. आतील तीन गिटार, कम्प्युटर, दोन होम थिएटर, ओव्हन, मिक्सर, एलईडी बल्ब, सीसी टीव्ही कॅमेरा सेट असे ६५ हजार रुपयांचे साहित्य लंपास केले. सकाळी चोरी झाल्याचे निदर्शनास आल्यानंतर निंबाळकर यानी पोलिसात फिर्याद दिली.

०००

अल्पवयीन मुलीवर बलात्काराचा प्रयत्न

जयसिंगपूर : अल्पवयीन मुलीला खाऊचे आमिष दाखवून बलात्काराचा प्रयत्न केल्याप्रकरणी कुरुंदवाड पोलिसानी तेरवाड (ता. शिरोळ) येथील किराणा दुकानदारावर गुन्हा दाखल केला आहे. सुरेश वडर (वय ५५) असे त्याचे नाव आहे.

पोलिसांतून मिळालेली माहिती अशी : पीडित मुलगी व तिचा लहान भाऊ दुपारी तीनच्या सुमारास किराणा दुकानात खाऊ आणण्यासाठी गेले होते. यावेळी वडरने मुलीच्या भावास खाऊ देऊन घरी पाठविले. यानंतर मुलीस खाऊचे आमिष दाखवून घरात बोलावले आणि दरवाजा बंद केला. यावेळी मुलीचे पालक शोध घेत दुकानात आले. त्यावेळी वडर अतिप्रसंग करण्याच्या तयारीत असल्याचे निदर्शनास आले. यानंतर पालकांनी कुरुंदवाड पोलिस ठाण्यात फिर्याद दिली. त्यानुसार पोलिसांनी वडरवर गुन्हा दाखल केला आहे.

०००

कोल्हापूर : येथील युवा सेनेचे पदाधिकारी, कार्यकर्त्यांनी सरत्या वर्षाला निरोप आणि नविन वर्षाच्या स्वागतानिमित्तच्या कार्यक्रमात ' मद्यपान टाळा, अपघात टाळा' असे फलक हातात धरून रविवारी जनजागृती केली. माळकर तिकटी चौकात हा उपक्रम राबवण्यात आला. ऋतुराज क्षीरसागर, योगेश चौगुले, चेतन शिंदे, पियूष चव्हाण, विश्वदीप साळोखे, अविनाश कामते, प्रशांत जगदाळे यांच्यासह कार्यकर्ते उपस्थित होते.

जयसिंगपूर : सातव्या वेतन आयोगातून नगरपरिषदेच्या कर्मचाऱ्यांना वगळण्यात आल्याने कुरुंदवाड येथे नगरपालिकेतील कर्मचाऱ्यांनी जोरदार निदर्शने केली. पालिका चौकात हे आंदोलन करण्यात आले. एक जानेवारीपूर्वी नगरपरिषद कर्मचाऱ्यांना सातवा वेतन आयोग लागू न केल्यास कामबंद आंदोलन करण्यात येईल, असा इशारा कर्मचाऱ्यांनी दिला. यावेळी नगर अभियंता योगेश गुरव, निशिकांत ढाले, नामदेव धातुंडे, अजित दीपंकर, सुरेश सासणे, विनायक दळवी, राजेंद्र गोरे, आदी उपस्थित होते.

०००

पाटणमध्ये बुधवारी

कुस्त्यांचे मैदान

कराड :

माजी सार्वजनिक व पर्यटन मंत्री विक्रमसिंह पाटणकर यांच्या अमृत महोत्सवी वाढदिवसानिमित्त पाटण येथील मार्केट यार्डमध्ये येत्या बुधवारी, २ जानेवारी रोजी दुपारी दोन वाजता जंगी कुस्त्यांचे मैदान आयोजित करण्यात आले आहे. या कुस्ती मैदानात नुकताच महाराष्ट्र केसरीचा किताब पटकाविणारा पुण्याचा बाला रफीक तसेच इतर नामवंत मल्लांचा सहभाग असणार आहे.

पै. हर्षदा चव्हाण, (सुपने) विरूद्ध पै. समृद्धी पाटील (चाफळ), पै. जयंती पाटील (कोल्हापूर) विरूद्ध पै. वैशाली साळुंखे (किवळ) या महिलांच्या प्रेक्षणीय कुस्त्याही आयोजित केल्या असल्याची माहिती अमृतमहोत्सव कुस्ती नियोजन समितीच्या वतीने देण्यात आली.

महाराष्ट्र केसरी बाला रफीक विरूद्ध कोल्हापूरचा माऊली जमदाडे यांच्यात पहिल्या क्रमांकाची दोन लाखांची कुस्ती होणार आहे. द्वितीय क्रमांकासाठी जालनाच्या विलास डोईफोडे विरूद्ध गारगोटीचा समीर देसाई यांच्यात एक लाख ५० हजारांची. तृतीय क्रमांकासाठी कोल्हापूरचा सिकंदर शेख विरूद्ध विक्रम पारखे यांच्यात एक लाखांची. चतुर्थ क्रमांकासाठी पुण्याचा संतोष पडळकर विरूद्ध कोल्हापूरचा नवनाथ इंगळे यांच्यात ७५ हजार रुपयांची कुस्ती होणार आहे.

कराड :

राष्ट्रीय एकात्मता तसेच युवकांच्या सुप्त गुणांना वाव देण्यासाठी सुप्त कलागुणांचे सादरीकरण होण्यासाठी राष्ट्रीय युवा महोत्सवाचे येत्या ४ ते ५ जानेवारीच्या कालावधीत आयोजन करण्यात येणार आहे. हा महोत्सव सातारा येथील झेडपीच्या यशवंतराव चव्हाण सांस्कृतिक सभागृहात व जिल्हा मध्यवर्ती सहकारी बँकेच्या सांस्कृतिक हॉलमध्ये होईल, अशी माहिती माहिती सांस्कृतिक कार्य विभागाच्या पत्रकात देण्यात आली आहे.

युवा महोत्सवात कोल्हापूर, पुणे, मुंबई, नाशिक, औरंगाबाद, लातूर, अमरावती, नागपूर या आठ विभागाचे संघ व कलाकार सहभागी होणार आहेत.

राज्यस्तरीय एकांकिका स्पर्धा

म. टा. वृत्तसेवा, इचलकरंजी

येथे सुरू असलेल्या राज्यस्तरीय एकांकिका स्पर्धेच्या चौथ्या दिवशी मुंबई, पुणे, कोल्हापूर भागातील मान्यवर संघांनी विविध प्रकारच्या दर्जेदार एकांकिका सादर करून स्पर्धेची रंगत वाढवली.

'हात धुवायला शिकवणारा माणूस' ही पहिली एकांकिका कोल्हापूरच्या शिंदे अ‍ॅकॅडमीने सादर केली. डॉ. समीर मोने यांचे लेखन होते तर सुनील शिंदे यांचे दिग्दर्शन होते. एकोणिसाव्या शतकात, माता मृत्यू व बाल मृत्यू रोखण्यासाठी योगदान देणाऱ्या शास्त्रज्ञाच्या जीवनावर आधारित ही एकांकिका होती. त्यानंतर एस. एम. प्रॉडक्शन पुणे या संघाने डॉ. पराग भोंगे लिखीत आणि संकेत मोडक दिग्दर्शीत 'अंधार कैद' ही एकांकिका चांगल्या प्रकारे सादर केली. प्रेमभंग झालेल्या तरूणाला अ‍ॅक्सीडेंटमध्ये अंधत्व येते, नंतर त्याची होणारी परिस्थिती या एकांकिकेने दाखविली.

जिराफ थिएटर्स मुंबई या संघाने 'सरफिऱ्या' ही राकेश जाधव लिखीत आणि बॉबी दिग्दर्शीत वेगळ्या प्रकारची एकांकिका सादर करून रसिकांची दाद मिळवली. एका क्रिकेटपटूचे आणि संकट या पात्राचे द्वंद दाखविणारी ही एकांकिका होती. बी. जे. मेडिकल कॉलेज या संघाने माणूस बनवून मिळेल ही एकांकिका उत्साहाने सादर केली. लेखन ऋषीकेश तुराई यांचे होते. तर श्रध्दा-निलीमा यांनी दिग्दर्शन केले होते. एका दिवसाच्या कार्यशाळेत माकडाचे रुपांतर माणसात करण्याची उपहासात्मक कल्पना मांडणारी ही एकांकिका विनोद शैलीची आणि सद्यस्थितीवर भाष्य करणारी होती.

टिटवाळा - ठाणे येथील गंधर्व कलाधारा संघाने 'रेनबोवाला' ही हर्षल-राकेश लिखीत आणि हर्षल गढरी दिग्दर्शीत एकांकिका प्रभावीपणे सादर करून उत्स्फूर्त प्रतिसाद मिळविला. एका अंध युवतीच्या आयुष्यावर आधारित एकांकिकेत कलाकारांचा अभिनय तसेच तांत्रिक बाजू अतिशय उत्तम होत्या. आमचे आम्ही पुणे या संघाने 'आय अ‍ॅग्री' ही माधव जोगळेकर यांनी लिहिलेली व प्रणव-राहुल यांनी दिग्दर्शीत केलेली एकांकिका परिणामकारकपणे सादर केली. युगात सोशल मीडियाचा अतिवापर कसा घातक आहे हे यामधून दाखविण्यात आले.

शेवटच्या सत्रात कोल्हापूरच्या अ‍ॅडव्हेंचर प्रॉडक्शन या संघाने चैतन्य सरदेशपांडे लिखीत आणि अमर कुलकर्णी दिग्दर्शीत 'फोबिया' ही एकांकिका सादर केली. जागतिकीकरणाच्या युगात मोबाइलच्या गैरवापरामुळे निर्माण होणारी समस्या आणि त्याचा एका नवीन जोडप्यावर होणारा परिणाम दाखविण्याचा प्रयत्न या एकांकिकेने केला. त्यानंतर समांतर सांगली या संस्थेने इरफान मुजावर लिखीत व दिग्दर्शीत 'उत्खनन' ही एकांकिका सादर केली. राजकीय इतिहासातील मोजक्या घटनांचे भांडवल राजकारणी लोक कशा प्रकारे करतात हे यामध्ये दाखविण्यात आले. चौथ्या दिवशी शेवटी मराठवाडा मित्र मंडळाचे वाणिज्य महाविद्यालय पुणे या संघाने 'अफसाना' ही एकांकिका सादर केली. मंदार इंगळे यांनी लिहलेली ही एकांकिका अभिप्राय कामटे व मुकुल ढेकळे यानी दिग्दर्शीत केली होती. ही एकांकिका सदाअत हसन मंटो या साहित्यिकाच्या जीवनावर आधारित होती.

म. टा. वृत्तसेवा, हातकणंगले

'श्रमिक व कष्टकऱ्यांचे स्वतंत्र विचार व लोकशाही रुजवणारे केंद्रात सरकार अस्तित्वात येणे गरजेचे असून सरकार बदलून चालणार नाही या राजकारण्यांचे विचार बदलता आले पाहिजेत. ज्या मतदारसंघात विजयानजीक असलेल्या आमच्या विचारांच्या उमेदवारांला पाठिंबा द्यावा. तसेच काँग्रेस व डावी आघाडी तसेच वंचीत बहुजनांसाठी लढणाऱ्या आघाडीला बळ व प्रोत्साहन देऊन पाठिंबा दिला जाईल' असे श्रमुदचे अध्यक्ष डॉ. भारत पाटणकर यांनी जाहीर केले.

लाटवडे (ता. हातकणंगले) येथे श्रमिक मुक्ती दलाच्या २२व्या राज्यस्तरीय अधिवेशनाची सांगता झाली. तिसऱ्या दिवशी खुले अधिवेशन झाले. दोन दिवस अधिवेशनात झालेली चर्चा, ठरावांची माहिती देण्यात आली. श्रमिक मुक्ती दलाने राजकीय भूमिका जाहीर केली.

डॉ. पाटणकर म्हणाले, 'सर्वांचा विकास-समन्यायी विकास या धोरणानुसार लोकसभा निवडणुकीत धर्मांध शक्तींविरोधात महाराष्ट्रात फिरुन कष्टकऱ्यांच्या जीवनात अंधकार आणणाऱ्या 'अच्छे दिन'वाल्या हुकूमशाही प्रवृत्तीचा नायनाट करण्यासाठी प्रयत्नशील आहे. काँग्रेस पक्षाच्या नेतृत्वाखाली निर्माण होत असलेल्या आघाडीला सशर्त पाठिंबा दिला जाईल. त्यांच्याकडून श्रमिक मुक्ती दलाच्या धोरणांची अंमलबजावणी करावी लागेल असे आश्वासन लेखी स्वरूपात घेण्यात येईल. त्यांनी तसे आश्वासन दिले तर त्यांच्या पाठीशी आम्ही उभे राहू. शेतकरी, कामगार, कर्मचाऱ्यांच्या विकासाला गती मिळालेली नाही. जमिनवाले लोक भूमिहीन होत चालले आहेत. भांडवलदारांच्या फायद्यासाठी शेतजमीन काढून घेतल्या जात आहे. मानवी विकासाचा निर्देशांकातील क्रमांक खाली घसरला आहे. राष्ट्रीय उत्पादनातील शेतीचा वाटा कमी होत चालला आहे. भांडवलदार, उद्योगपतींच्या विकासासाठी सध्याच्या सरकारचे प्रयत्न सुरू आहेत. म्हणून श्रमिक मुक्ती दलाने विकासाआड येणाऱ्या प्रवृत्तींविरोधात भूमिका घेण्याचा निर्णय अधिवेशनात घेतला आहे. पंढरपूर येथील विठोबा मंदिरात पगारी सेवेकरी नेमण्याचा निर्णय झाला. कोल्हापूर येथील अंबाबाई मंदिरासाठीही कायदा झाला. तसाच कायदा राज्यात इतर ठिकाणीही व्हावा असा ठराव करण्यात आला.

यावेळी काँ. संपत देसाई, वाय. सी. पाटील, मेजर सुखदेव बन, अंकुश शेडगे, मोहन अनपट यांची भाषणे झाली. गेल ऑम्व्हेट, मालोजीराव पाटणकर, संतोष गोटल, डी. के. बोडके, वसंत पाटील, शफिक सय्यद आदी उपस्थित होते. लाटवडे ग्रामपंचायतीच्या वतीने गेल ऑम्व्हेट यांचा सत्कार सरपंच कांचन चोपडे यांच्या हस्ते करण्यात आला. उपसरपंच किरण माळी, निवास पाटील, अमर पाटील, ग्रामविकास अधिकारी व्ही. टी. फोलाने उपस्थित होते. वसंत पाटील यांनी स्वागत केले. नजीर चौगुले यांनी आभार मानले.

फोटो ओळी

लाटवडे (ता. हातकणंगले) येथे श्रमिक मुक्ती दलाच्या २२ व्या राज्यस्तरीय अधिवेशनाच्या सभारंभात बोलताना डॉ. भारत पाटणकर.

म. टा. वृत्तसेवा, इचलकरंजी

सातवा वेतन आयोगाची १ जानेवारी २०१६पासून अंमलबजावणी करावी यासह विविध प्रश्‍नांसाठी १ जानेवारी २०१९पासून नगरपरिषदेतील सर्व कर्मचारी संघटनांनी बेमुदत कामबंद आंदोलन पुकारल्याने नगरपरिषदेमार्फत पुरविल्या जाणार्‍या सेवांमध्ये अनियमितता निर्माण होण्याची शक्यता आहे. त्यामुळे शहरवासियांनी सहकार्य करावे, असे आवाहन मुख्याधिकारी दीपक पाटील यांनी केले आहे.

बेमुदत आंदोलनाच्या पार्श्‍वभूमीवर मुख्याधिकारी पाटील यांच्या दालनात सोमवारी नगरपरिषद कर्मचारी संघटनांच्या पदाधिकार्‍यांची बैठक घेतली. चर्चेवेळी मुख्याधिकारी पाटील यांनी कर्मचारी संघटनांच्या मागणीवरून २९ डिसेंबर २०१८ रोजी झालेल्या सर्वसाधारण सभेत शासनाकडे पाठपुरावा करणेचा निर्णय घेण्यात आल्याचे सांगत नगरपरिषदही नागरिकांना मुलभूत सेवा देणारी संस्था असल्याने अत्यावश्यक सेवा आंदोलनातून वगळण्यात याव्यात, बेमुदत कामबंद आंदोलन न करता काळ्या फिती लावून कामकाज सुरू ठेवावे असे सांगितले. त्यावर संघटना प्रतिनिधींनी अत्यावश्यक सेवेबाबत राज्यस्तरीय नेतेमंडळींडी चर्चा करून त्यांच्या सुचनेनुसार निर्णय घेऊ असे सांगत तुर्तास बेमुदत संपाचे निर्णयाबाबत ठाम असल्याचे सांगितले.

म. टा. वृत्तसेवा, आजरा

आजरा तालुक्यात गेल्या आठवडाभरात परतवून लावल्यानंतर पुन्हा एकदा दाखल झालेल्या हत्तींच्या कळपाकडून पुन्हा एकदा नुकसानीचे सत्र सुरू झाले. दोन दिवस थांबलेल्या हत्तीच्या कळपाने काल रात्री जंगलातून उतरून आवंडी ग्रामस्थांच्या पिकांचे मोठे नुकसान केले. विशेषतः ऊस आणि केळी पीक हत्तींच्या भक्ष्यस्थानी पडले. तोडणीला आणि काढणीला आलेल्या पिकांचे नुकसान असे पाहवत नाही, अशा भावना नुकसानग्रस्त शेतकऱ्यांकडून व्यक्त होत आहे.

गेल्या आठवड्यात हत्ती कळप इथे आल्यावर सलग आठवडाभर नुकसान करीत होता. घनदाट जंगल आणि पिण्यासाठी मुबलक पाणी येथील चित्री प्रकल्पात तसेच जंगल परिसरात असल्याने आता कळप इथून लवकर जाण्याची चिन्हे नाहीत. त्यामुळे त्यांना प्रतिबंध करण्यावरच शेतकरी आणि वनविभागाचा भर होता. त्या दृष्टीने वनविभागाने नियोजन केले होते. अशातच गेले दोन दिवस हत्तींचा कळप शेतात उतरला नाही की नुकसान केले नाही. त्यामुळे कळप परतला की काय, अशा विचारात असताना काल रात्री कळपाने आवंडी परिसरात उतरून मोठेच नुकसान केले.

तोडणीला आलेला ऊस आणि घडाला आलेल्या केळीचे यात मोठे नुकसान झाले आहे. कारखान्याची ऊसतोड प्रतीक्षेत असताना झालेले ऊसाचे नुकसान मोठे आहे. तर अर्ध्या-कच्च्या केळीचे घड पाहात बसण्याशिवाय किंवा जनावरांना घळण्याशिवाय पर्याय नसल्याचे नुकसान ग्रस्त शेतकरी सांगत आहेत. चंद्रकांत निकम, प्रकाश निकम, रामचंद्र मोतीराम मांगले, अर्जुन मांगले यांच्या पिकांचे मोठे नुकसान झाले आहे. वनविभागाला याची माहिती मिळताच नुकसानीची माहिती घेऊन पंचनामे करण्यात आले आहेत.

नुकसान मोठे भरपाई छोटी

हत्ती किंवा अन्य वन्यप्राण्यांच्याकडून होणारे पीक अथवा अन्य प्रकारचे नुकसान मोठे असते. त्याची भरपाई नुकसान पंचनामे करून शासन वनविभागामार्फत देते. पण हजारातील नुकसानीची भरपाई फक्त काही शेकड्यात अदा होते. त्यामुळे नुकसान करणाऱ्या हत्ती व अन्य प्राण्यांचा बंदोबस्त करून शेतकऱ्यांची संकटातून सुटका करावी, अशा भावना नुकसानग्रस्त शेतकरी वारंवार व्यक्त करीत आहेत.

महापालिका लोगो

म. टा. प्रतिनिधी, कोल्हापूर

'वाणिज्य व रहिवासी मिळकतदारांकडे थकीत घरफाळ्यावरील दंडाला ५० टक्के सवलत देण्याचा ठराव महापालिकेच्या महासभेत केला आहे. ठरावानुसार मिळकतदारांना जानेवारी ते मार्च २०१९ अखेर 'सवलत योजना' लागू केली असून मिळकतदारांनी योजनेचा लाभ घ्यावा,' असे आवाहन महापौर सरिता मोरे यांनी सोमवारी पत्रकार बैठकीत केले. ठरावानुसार महापालिकेच्या एक लाख ४७ हजार मिळकतदारांपैकी थकीत ६८ हजार मिळकतदारांना लाभ होण्याची शक्यता आहे.

महापौर मोरे म्हणाल्या, 'महाराष्ट्र महानगरपालिका अधिनियमातील तरतुदीनुसार घरफाळा थकीत रकमेवर दरमहा दोन टक्के दंड आकारणी होते. थकीत रक्कम वसूल करण्यासाठी प्रसंगी जप्ती व मिळकतीवर बोजा नोंद करण्याची तरतूद असून अशा कटू प्रसंगाला सामोरे जाण्याऐवजी घराफाळा रक्कम मुदतीत भरा.'

आयुक्त डॉ. अभिजित चौधरी म्हणाले, 'महासभेच्या ठरावानुसार घरफाळ्याची थकीत रक्कम जमा करण्यासाठी सवलतीची योजना राबवण्यात येत आहे. चालू घरफाळा, थकबाकी आणि दंड अशी एकरकमी रक्कम भरल्यानंतरच मिळकतदारांचा या योजनेत समावेश होणार आहे. सवलत योजनेत थकबाकी रक्कम जमा न केल्यास मिळकती जप्त करण्याची कारवाई करण्यात येणार येईल. अनेकवेळा मिळकतदार घरफाळा बिल मिळत नसल्याचे कारण पुढे करतात. अशा मिळकतदारांना सीएफसीद्वारे बिल पाहण्याची संधी मिळणार आहे. परिणामी बिल मिळाले नाही, अशी सबब चालणार नाही. यापूर्वी २०१७ मध्ये दोन महिन्यासाठी सवलतीची योजना राबवली होती. मात्र वारंवार अशा प्रकारची सवलतीची योजना राबवताना मर्यादा येणार आहेत. त्यामुळे घरफाळ्याची रक्कम वसूल करण्यासाठी जप्तीची कारवाई करावी लागणार आहे.'

करनिर्धारक दिवाकर कारंडे म्हणाले, 'शहरातील मिळकतदारांकडे २००८-९ पासून घरफाळ्याची रक्कम थकीत आहे. थकीत रकमेवर आतापर्यंत १४ कोटी दंडाची रक्कम असून सवलत योजनेत मिळकदारांनी सहभाग घेतल्यास सात कोटींची रक्कम वसूल होणार आहे. १५ लाखांपेक्षा जास्त थकीत रक्कम असलेल्या २८ मिळकतदारांची सुनावणी झाली असून त्यापैकी २२ मिळकदारांनी रक्कम जमा केली आहे. '

पत्रकार बैठकीस उपायुक्त मंगेश शिंदे, शिक्षण सभापती अशोक जाधव, विरोधी पक्षनेते विलास वास्कर, सभागृह नेते दिलीप पोवार, इश्वर परमार, राजसिंह शेळके आदी उपस्थित होते.

...................................

चौकट

३७ बड्या थकबाकीदारांचे कनेक्शन तोडले

पाणीपुरवठा थकबाकीदारांचे नावे जाहीर केली असून थकबाकी वसुलीसाठी पाणी कनेक्शन तोडण्याचे आदेश दिले. शंभर बड्या थकबाकीदारांची सुनावणी घेण्यात आली. त्यापैकी ३७ थकबाकीदारांचे कनेक्शन तोडण्यात आली. थकबाकी वसुलीसाठी पाच पथकांची नेमणूक केली असून कनेक्शन तोडण्याचे आदेश दिले आहेत. तसेच घरफाळा वसुलीसाठी २२ मिळकतदारांची सुनावणी होऊन त्यांचा घरफाळा जमा केला. यापुढे अशीच कारवाई करुन मिळकती जप्त करणार असल्याचे आयुक्त डॉ. चौधरी यांनी सांगितले.

..................................

अनुदानानंतर पाणीपट्टी वसूल होणार

महापालिकेच्या पाणीपुरवठा विभागाची मोठी थकबाकी सरकारी कार्यालयाकडे आहे. सीपीआर रुग्णालयाकडे तब्बल साडेतीन कोटींची थकबाकी आहे. थकीत रक्कम वसूल करण्यासाठी वारंवार प्रत्येक कार्यालयाच्या अधिकाऱ्यांशी पत्रव्यवहार केला जात आहे. सर्व सरकारी कार्यालये राज्य सरकारकडून अनुदान मिळण्यासाठी प्रयत्न करत असून फेब्रुवारीअखेर अनुदान मिळून महापालिकेची पाणीपट्टी वसूल होण्याची शक्यता आहे.

.......................................

चौकट

एक लाख ४७ हजार

एकूण मिळकती

७१ कोटी ६६ लाख

एकूण घरफाळा

४१ कोटी ५ लाख

चालू घरफाळा

२९ कोटी ७४ लाख

थकीत घरफाळा

१९ कोटी १८ लाख

चालू थकीत घरफाळा

१४ कोटी

दंड

सात कोटी

मिळणारी सूट

म. टा. वृत्तसेवा, जयसिंगपूर

कोल्हापूर जिल्हा बँकेच्या शिरोळ शाखेतील ८५ तोळे सोन्याचे दागिने चोरट्यांनी लंपास केले. चोरट्यांनी गॅस कटरच्या सहाय्याने स्ट्राँग रूमचा दरवाजा आणि लॉकर तोडले. सोमवारी पहाटे चोरीची ही घटना घडली. शाखाधिकारी एच. आर. हेरवाडे यांनी फिर्याद दिली आहे.

पोलिसांतून मिळालेली माहिती अशी, शिरोळला नृसिंहवाडी रस्त्याशेजारी जिल्हा बँकेची शाखा आहे. बँकेच्या मागील बाजूस शेती आहे. पहाटे चोरट्यांनी शिडी लावून खिडकीचे लोखंडी गज कापले व बँकेत प्रवेश केला. गॅस कटरच्या सहाय्याने स्ट्रॉग रूमचा दरवाजा आणि लॉकर तोडले. खातेदारांनी गहाण ठेवलेले ८५ तोळे वजनाचे १७ लाख ६ हजार रूपये किमतीचे सोन्याचे दागिने लंपास केले. दागिने हाती लागल्यानंतर चोरट्यांनी ऑक्सिजन सिलिंडर खिडकीतून खाली फेकून दिला. मुख्य दरवाजाला बाहेरून लावलेली कुलपे कापून चोरटे पसार झाले.

दरम्यान, चोरीच्या घटनेची माहिती मिळताच पोलिस उपअधीक्षक कृष्णात पिंगळे व शिरोळ पोलिसांनी घटनास्थळी पाहणी केली. श्‍वान पथक आणि ठसे तज्ञांना पाचारण करण्यात आले. पथकाने मुख्य लॉकरवरील ठसे घेतले. श्‍वानाने बँकेपासून दोनशे मीटरपर्यंत माग काढला. चोरीच्या घटनेचे वृत्त परिसरात पसरल्याने नागरिकांनी घटनास्थळी गर्दी केली.

सकाळी साडेदहा वाजता बाहेरील शटर उघडताना बँकेत चोरी झाल्याचे शिपायाच्या लक्षात आले. घटनेची माहिती व्यवस्थापक तसेच अन्य कर्मचाऱ्यांना देण्यात आली. बँकेचे संचालक डॉ. राजेंद्र पाटील यड्रावकर, व्यवस्थापक आर. जे. पाटील, उपव्यवस्थापक दिलीप ढोबळे यांनी भेट देऊन पाहणी केली. बँकेत सीसी टिव्ही कॅमेरे नसल्याने चोरट्यांचा तपासाचे आव्हान पोलिसांसमोर आहे.

.. .. ..

म. टा. वृत्तसेवा, इचलकरंजी

यंत्रमाग कामगारांच्या मजुरीत ६ पैसे महागाईभत्ता वाढ करावी असे पुणे विभागाचे अप्पर कामगार आयुक्त शैलेंद्र पोळ यांनी जाहीर केले आहे. हा वाढीव भत्ता नव्या वर्षापासून म्हणजे १ जानेवारीपासून लागू करण्याचे स्पष्ट केले. दरम्यान, यंत्रमाग कामगारांना मजूरीवाढ जाहीर करून यंत्रमागधारकांना नवीन वर्षाची विषारी भेट दिली आहे, अशी संतप्त प्रतिक्रिया यंत्रमागधारक जागृती संघटनेचे अध्यक्ष विनय महाजन यांनी दिली आहे.

यंत्रमागधारकांच्या वाढीव भत्त्याबाबत २८ फेब्रुवारी २०१३ रोजी झालेल्या बैठकीत संयुक्तिक करार झाला होता. करारानुसार १ जानेवारी २०१९ पासून महागाई भत्त्याची वाढ पिसरेटवर रुपांतरीत करून ०.०५९ पैसे वाढ होत आहे. ती पूर्णांकामध्ये ६ पैसे वाढ (५२ पिकास मिटरवर आधारीत) होत आहे. तेव्हा यंत्रमागधारकांनी एक जानेवारीपासून यंत्रमागधारकांच्या मजूरीत ६ पैसे महागाई भत्ता वाढ करावी, अशा सूचना अप्पर कामगार आयुक्त शैलेंद्र पोळ व सहाय्यक कामगार आयुक्त अनिल गुरव यांनी पत्रकाद्वारा जारी केल्या आहेत.

दरम्यान, या मजुरीवाढी संदर्भात विनय महाजन म्हणाले, 'यंत्रमाग व्यवसाय दिवसेंदिवस आर्थिक संकटातून जात आहे. त्यामुळे २०१९ पासून होणाऱ्या मजुरीवाढीबाबत आग्रह न धरण्याचे आवाहन कामगार नेत्यांची बैठक घेऊन केले होते. त्यास कामगार नेत्यांनी सकारात्मक प्रतिसाद दिला होता. त्यानंतर अप्पर कामगार आयुक्तांची भेट घेऊन नवीन मजूरीवाढ जाहीर करू नये असे आवाहन केले होते. तरीही त्यांनी मजुरीवाढीचे परिपत्रक जाहीर करून इचलकरंजीतील यंत्रमाग व्यवसाय संपविण्याचा डाव आखला आहे.

वस्त्रोद्योगाला चांगले दिवस यावेत यासाठी शासनस्तरावर मागण्या करीत असताना शासन सकारात्मक धोरण उचलण्यास सुरूवात केली आहे. मालेगाव, भिवंडीपेक्षा इचलकरंजी शहरात उत्पादन होणऱ्या कापडाचे उत्पादन खर्च जास्त आहे. तो कमी करून बाजारपेठेमध्ये कापड विकण्याचा प्रयत्न करीत असताना मजुरीवाढीमुळे या प्रयत्नांना खीळ बसणार आहे. राज्यातील इतर वस्त्रोद्योग केंद्रांमध्ये मजूरीवाढ जाहीर केली नाही. ती केवळ इचलकरंजी शहरासाठीच केली आहे. याविरोधात यंत्रमागधारकांनी रस्त्यावर उतरून तीव्र विरोध करून २०१३साली झालेला करार तोडून काढावा, असे आवाहन महाजन यांनी केले आहे.

म. टा. वृत्तसेवा, चंदगड

कोवाड (ता. चंदगड) येथे २३ डिसेंबर रोजी अज्ञातांनी घरात घुसून दहा जणांवर हल्ला केल्याप्रकरणी आज आणखी चौघांना अटक करण्यात आली. जोतिबा यलाप्पा पाटील (वय २४, रा. सोनोली), प्रविण कृष्णा संताजी (२७, रा. हालगा), बाबाजी उर्फ बबन देवेंद्र लोहार (२५, रा. हालगा) व आकाश पुंडलिक मुंचडी (१९, रा. सिंधोळी, सर्व ता. जि. बेळगाव, कर्नाटक) अशी कोवाड पोलिसांनी अटक केलेल्यांची नावे आहेत. याप्रकरणी चंदगड पोलिसांनी यापूर्वीच सात जणांना अटक केली आहे. चौघांना चंदगड येथील प्रथमवर्ग न्यायदंडाधिकारी डी. एम. गायकवाड यांच्यासमोर हजर केले असता त्यांना ३ जानेवारी २०१९ पर्यंत पोलिस कोठडीत ठेवण्याचे आदेश देण्यात आले. घटनेनंतर आतापर्यंत एकूण ११ जणांना पकडण्यात पोलिसांना यश आले.

कोवाड येथे घरात घूसून २३ डिसेंबर रोजी दहा ते पंधरा जणांनी हल्ला केला होता. यामध्ये दहा ते बाराजण जखमी झाले होते. या प्रकरणी हल्लेखोरांना पकडण्यासाठी पोलिसांची चार पथके बेळगाव परिसरात तपास करीत आहेत. २८ डिसेंबर रोजी पोलिसांनी अजय आप्पाजी पाटील, गजानन भावकान्ना पाटील, अमोल भावकान्ना मुदगेकर, महेश परशुराम पाटील, गोपाळ लक्ष्मण कलकामकर, ताब्यात घेतले होते. शनिवारी प्रकाश हणमंत पाटील, राजकुमार उर्फ कुम्या कृष्णा पाटील या दोघांना अटक केली होती. आज कोवाड पोलिसांनी कर्नाटकातून चौघांना अटक केली. चौघांनाही उर्वरीत सात जणांप्रमाणे ३ जानेवारीपर्यंत पोलिस कोठडीत ठेवण्याचे आदेश दिले आहेत. पोलिस निरिक्षक श्रीप्रसाद यादव यांच्या मार्गदर्शनाखाली कोवाड पोलिस चौकीचे उपनिरिक्षक पी. सी. वाघ, पोलिस नाईक संतोष साबळे, विशाल आंबोळे, सागर चौगुले, पोलिस हवालदार मानसिंग चव्हाण यांच्या पथकाने ही कारवाई केली.

फोटो आहेत

म. टा. प्रतिनिधी, कोल्हापूर

राजर्षी शाहू समाधीस्थळ सुशोभिकरण कामाच्या पाहणीदरम्यान आयुक्त डॉ. अभिजित चौधरी यांना अतिक्रमण झाल्याचे निदर्शनास आल्यानंतर त्यांनी अतिक्रमण हटवण्याचे आदेश दिले. आदेशानंतर सोमवारी अतिक्रमण निर्मूलन पथकाने कारवाई करत डॉ. आंबेडकर सभागृहाशेजारी असरणारी दहा अनधिकृत पत्र्याची शेड काढून टाकली. कारवाईमुळे येथील दहा फुटाचा रस्ता खुला झाला. दिवसभराच्या कारवाईत पथकाने रहदारीस अडथळ ठरणारे फुटपाथवरील ३० बोर्ड ताब्यात घेतले.

सिद्धार्थनगर नर्सरी बाग येथे गेल्या चार वर्षांपासून राजर्षी शाहू महाराज समाधीस्थळाचे काम सुरू आहे. अनेकवेळा महापौर व आयुक्तांनी कामाची पाहणी करुन सूचना केल्या. २४ डिसेंबर रोजी नूतन महापौर सरिता मोरे, उपमहापौर भूपाल शेटे यांनी पुन्हा एकदा पहाणी केली. पाहणीदरम्यान आयुक्त डॉ. चौधरी यांनी डॉ. आंबेडकर सभागृहाशेजारी असणाऱ्या वाढीव पत्र्याच्या शेडबाबत अधिकाऱ्यांना विचारणा केली. सर्व अतिक्रमणे असल्याचे माहिती मिळाल्यानंतर आयुक्तांनी तातडीने अतिक्रमण काढून टाकण्याचे आदेश दिले. त्यामुळे येथे कोणत्याही क्षणी कारवाई होण्याची शक्यता होती. गेल्या आठ दिवसांपासून शहरात अनधिकृत होर्डिंग्ज हटवण्याची मोहीम तीव्र केली असतानाच सोमवारी (ता. ३१) पथकाने भाऊसिंगजी रोड व टाऊन हॉल परिसरात होर्डिंग्ज हटवल्यानंतर थेट समाधीस्थळाकडे कूच केली.

समाधीस्थळाच्या परिसरात असलेले पत्र्यांची दहा शेड जेसीबी मशिनद्वारे काढून टाकण्यात आली. सर्व मिळकतधारकांनी घरांसमोर वाढवलेली अतिक्रमणे काढून टाकल्यानंतर दहा फुटांचा रस्ता खुला झाला. शिवाजी मार्केट विभागीय कार्यालयांतर्गत पुन्हा छत्रपती शिवाजी चौक ते भवानी मंडप रोडवरील जाहिरात फलक हटवण्यात आले. जोतिबा रोडवर अशीच कारवाई केल्यानंतर करवीरनगर वाचन मंदिर ते बिंदू चौक, आईसाहेब महाराज पुतळा व दसरा चौक परिसरातील जाहिरात फलक, स्टँडी हटवण्यात आल्या. विशेषत: या मार्गावर विद्युत खांबावर लावलेले ३० बॅनर्स काढण्यात आले.

उपशहर अभियंता एस. के. माने, कनिष्ठ अभियंता निवास पोवार, राजेंद्र वेल्हाळ, सागर शिंदे, अतिक्रमण विभाग प्रमुख पंडित पोवार, उमेश माने यांच्या मार्गदर्शनाखाली ३० कर्मचाऱ्यांनी कारवाईत सहभाग घेतला.

कोल्हापूर

कोल्हापूर शहर व जिल्हा युवक काँग्रेसतर्फे कोल्हापूर दक्षिण विधानसभा मतदारसंघात भाजप सरकारच्या विरोधात मंगळवारपासून (ता.१) परिवर्तन यात्रा काढण्यात येणार आहे. आमदार सतेज पाटील यांच्या नेतृत्वाखाली दुपारी पावणे पाच वाजता पदयात्रेचा प्रारंभ होणार आहे. लक्षतीर्थ वसाहत कमानी येथून पदयात्रेला प्रारंभ होणार असल्याची माहिती युवक काँग्रेसचे अध्यक्ष दिपक थोरात यांनी दिली.

गोंदावल्यात पुण्यतिथी साजरी

सातारा :

ब्रह्मचैतन्य गोंदावलेकर महाराज मंदिरात ब्रह्मचैतन्य गोंदावलेकर महाराज याचा निर्वाण दिन अर्थात पुण्यतिथी उत्सव सोमवारी पहाटे भाविकांच्या मोठ्या उपस्थितीत पार पडला. मागील रविवारपासून दहा दिवसांचा पुण्यतिथी महोत्सव सुरु होता. सोमवारी, ३१ डिसेंबरला या उत्सवाचा मुख्य दिवस असल्याने पहाटे काकड आरती झाल्यावर ५ वाजून ५५ मिनिटांनी मंदिरात गुलाल, फुले उधळण्यात आली. पहाटे मंदिरातील पूजा झाल्यावर कृष्ण तुळशीचा हार मूर्तीला घालण्यात आला. पानस्कर गुरुजीच्या हस्ते काकड आरती झाल्यानंतर उपस्थित शेकडो भावीकांनी गुलाल मिश्रीत फुले व तुळशी दले वाटण्यात आली. त्या नंतर महाराजांचे निर्वाण काळापूर्वी मांर्गदर्शन करणारे प्रवचन वाचन झाले, त्या नंतर रामानामाचा सामुदायिक जप करण्यात आला. निर्वाण काळी दोन मिनिटे स्तब्धता पाळण्यात आली. त्या नंतर भाविकांनी महाराजांच्या चरण पादुकांवर गुलाल पुष्पदले अर्पण केली.