म. टा. वृत्तसेवा, इचलकरंजी वारंवार मागणी करूनही रस्त्याच्या दुरुस्तीकडे दुर्लक्ष केले जात असल्याने शहरातील सर्व रिक्षा संघटनांच्या प्रतिनिधींनी वर्गणी काढून शहापूर ते थोरात चौक या रस्त्यावरील खड्डे मुरुम टाकून मुजविले. नवरात्रीचे औचित्य साधत दुर्गामातेने नगरपरिषद व लोकप्रतिनिधींना सुबुद्धी द्यावी अशी प्रार्थना केली. या अनोख्या आंदोलनाची शहरात चांगलीच चर्चा रंगली होती. थोरात चौक ते शहापूर हा नेहमी वर्दळीचा रस्ता. पण या रस्त्याची दयनीय अवस्था झाल्याने या रस्त्यावरील खड्डे मुजवावेत अशी मागणी रिक्षा चालक संघटनांसह परिसरातील नागरिकांतून सातत्याने केली जात आहे. खड्ड्यांमुळे दररोज लहान-मोठे अपघात होण्यासह वाहनांचा बिघाड व नागरिकांच्या आरोग्याचा प्रश्न निर्माण होत आहे. मागणी करुनही नगरपरिषद प्रशासनाकडून दुर्लक्ष होऊ लागल्याने इचलकरंजी विद्यार्थी वाहतूक संघासह शहरातील विविध रिक्षा संघटना प्रतिनिधींनी वर्गणी काढून जमा झालेल्या वर्गणीतून या रस्त्यावरील खड्डे मुजविले. यावेळी रिक्षा संघटना प्रतिनिधींनी नगरपरिषद प्रशासनासह लोकप्रतिनिधींच्या कामाबद्दल नाराजी व्यक्त करत नवरात्रीच्या निमित्ताने तरी प्रशासनला जाग यावी यासाठी हा मार्ग अवलंबिल्याचे सांगितले. आंदोलनात नंदा साळुंखे, मन्सूर सावनूरकर, लियाक गोलंदाज, दशरथ मोहिते, अनिल बमण्णावर, सचिन मस्के, खलिल हिप्परी, बजरंग संगपान यांच्यासह महाराष्ट्र रिक्षा चालक संघटना, विद्यार्थी वाहतूक संघटना, इंदिरा ऑटो रिक्षा संघटना, छत्रपती शिवाजी चौक एसटी स्टँड संघटना, शहापूर रिक्षा संघटना, विक्रमनगर रिक्षा मालक संघटनांचे प्रतिनिधी सहभागी झाले होते.
मोबाइल अॅप डाउनलोड करा आणि राहा अपडेट