वर्षभरातील कोल्हापुरातील स्थिती, नेत्रसंकलन कमी, मागणी अधिक Sachin.patil1@timesgroup.com Tweet-sachinpMT अवयव दान हे जगातील सर्वश्रेष्ठ दानांपैकी एक समजले जाते. भारतीय संस्कृतीत दानाला अत्यंत महत्व दिले जाते. कोल्हापुरात अवयवदानाबाबत जागरुकता वाढत आहे. मृत्यूनंतर डोळ्यांच्या माध्यमातून आपण जिवंत राहू, या भावनेने नेत्रदान करण्यात पुढाकार घेतला जात आहे. गेल्या वर्षभरात कोल्हापुरातील सहाशेहून अधिक रुग्णांच्या डोळ्यांत बुब्बुळ प्रत्यारोपणांसह इतर आजाराच्या यशस्वी शस्त्रक्रिया करत 'प्रकाशाची पेरणी' करण्यात आली आहे. इतर अवयवदानापेक्षा नेत्रदानाबाबत गेल्या काही वर्षांत अधिक जनजागृती झाल्याने नेत्रदान करण्यावर अधिक भर दिला जातो. अपघात तसेच इतर घटनांमळे बुब्बुळाला इजा झाल्याने अनेकांना दृष्टिहीन आयुष्य काढावे लागते. अलीकडे नेत्रसंकलनाच्या माध्यमातून बुब्बुळ प्रत्यारोपण शस्त्रक्रिया अत्याधुनिक साधनांच्या वापराने यशस्वी होण्याचे प्रमाण वाढले आहे. नेत्रदानाच्या माध्यमातून आपण इतरांना दृष्टी देऊ शकतो ही भावना रुजत असल्याने त्याबाबत उत्स्फूर्त पुढाकार घेतला जात आहे. ........... नेत्रदान करताना ... कोणत्याही वयोगटातील व्यक्ती मरणोत्तर नेत्रदान करू शकते. तसेच नेत्रदानाचा फॉर्मही भरता येतो. नेत्रदानाचा फॉर्म भरला नसेल तरीही नेत्रदान करता येते. नेत्रदान मृत्यूच्या चार ते सहा तासाच्या आत करावे लागते. नेत्रपेढीला कळवल्यानंतर नेत्रतज्ज्ञ येऊन पारदर्शक पटल किंवा डोळा काढून घेतात. या प्रक्रियेसाठी किमान २० ते ३० मिनिटांचा कालावधी लागतो. नेत्रदान करत असताना मृतदेहाला विद्रुपता येणार नाही याची काळजी घेतली जाते. कर्करोगाचे, एचआयव्ही-एड्सचे रुग्ण,कावीळ तसेच डोळ्यांना जंतूसंसर्ग झालेल्यांना नेत्रदान करता येत नाही. नेत्रदानासाठी काय कराल ... मृत्यूनंतर अवयवरुपी जिवंत राहण्यासाठी नेत्रदान हा मार्ग असतो. नेत्रदानाची इच्छा असल्यास नेत्रदानाचा फॉर्म भरावा. अगदी फॉर्म भरणे शक्य झाले नाही तरी आपल्या जवळच्या नातेवाइकांना आपली इच्छा सांगून ठेवावी म्हणजे मृत्यूनंतर ती पूर्ण केली जाईल. इच्छित व्यक्तीच्या मृत्यूनंतर तत्काळ नेत्रपेढीला संपर्क करावा. तसेच नेत्रपेढीस कळवताना संपूर्ण नाव, पत्ता, मोबाईल क्रमांक तसेच मृत्यूची अचूक वेळ कळवावी. मृत व्यक्तीच्या डोळ्यावर थंड पाण्याची पट्टी ठेवावी. त्याचबरोबर घरातील पंखे, एसी बंद करावा. तसेच मृत व्यक्तीच्या मानेखाली उशी ठेवावी. नेत्रदानावेळी डॉक्टरांनी दिलेली मृत्यूप्रमाणपत्राची झेरॉक्स प्रत व नातेवाईकांचे संमतीपत्र भरून देणे आवश्यक असते. युवापिढीने पुढाकार घ्यावा सोशल मिडीयाच्या प्रभावी वापरामुळे तरुणाई एकमेकांच्या संपर्कात आली आहे. या माध्यमांचा वापर विविध सकारात्मक गोष्टींसाठी करणे शक्य आहे. नेत्रदान चळवळ वाढण्यासाठी तरुण पिढीने सोशल माध्यमांच्या वापरातून जनजागृती करून नेत्रदान चळवळीला बळ देण्याची अपेक्षा नेत्रपेढी संस्थाकडून व्यक्त करण्यात येत आहे. अलीकडे वाढदिवसानिमित्त नेत्रदानाचे फॉर्म तरुणांकडून भरले जात आहेत. .......... या ठिकाणी करता येईल नेत्रदान छत्रपती प्रमिलाराजे सर्वोपचार रुग्णालय(सीपीआर) संपर्क: नेत्रदान समुपदेशक ९५०३२९४०८६ प्रगती नेत्र रुग्णालय: संपर्क:०२३१-२५२९३४८ नंदादीप नेत्रालय: संपर्क: ७५८८०८४९९९ ................. कोट:: 'नेत्रदान चळवळ वाढीस लागण्याची गरज आहे. नेत्रसंकलन संख्येपेक्षा मागणी अधिक असल्याने नेत्रदानाची मोहीम समाजाच्या तळागाळातील लोकांपर्यंत पोहचायला हवी. विविध सामाजिक संस्थाबरोबर तरुणाईचा सहभाग वाढल्यास या चळवळीला अधिक बळ येईल. डॉ. अतुल राउत, विभागप्रमुख, नेत्रशल्यचिकित्सा शास्त्र विभाग, सीपीआर दृष्टीक्षेप ... जगभरात ४० दशलक्ष व्यक्ती नेत्रहीन भारतातील नेत्रहीन संख्या १५ दशलक्ष बुब्बुळसंबंधी आजार असलेल्या व्यक्ती १.१ दशलक्ष .......................... डॉक्टर कोट फोटो आहे.
मोबाइल अॅप डाउनलोड करा आणि राहा अपडेट
