लोगो .......... जिल्ह्यात पाच ठिकाणी आयपीपीबीची स्थापना, एक तारखेला उद्घाटन म. टा. प्रतिनिधी, कोल्हापूर सर्व प्रकारच्या बँकीग सुविधा लोकांपर्यंत पोहचविण्यासाठी पोस्ट खात्याने 'इंडिया पोस्ट पेमेंटस बँक'ची (आयपीपीबी) स्थापना केली आहे. पहिल्या टप्प्यात जिल्ह्यात पाच ठिकाणी पोस्ट बँकेची सुविधा उपलब्ध असणार आहे. 'आयपीपीबी'व्दारे लोकांना घरबसल्या बँकीग सुविधा मिळणार आहेत. लोकांच्या सोयीसाठी पोस्टमन घरी जाऊन बँक खाती उघडण्याची प्रक्रिया पूर्ण करणार आहेत. बँक खाते चालू करण्यासाठी आधार कार्ड क्रमांक व मोबाइल नंबर आवश्यक आहे. पोस्ट खात्याने त्वरित व पेपरलेस प्रक्रियेचा अवलंब केला आहे. ग्राहकांना, ठेवीवर चार टक्के व्याजदर मिळणार आहे. पोस्ट बँकेव्दारे लोकांना विम्याचे हप्ते, मोबाइल बिल, वीज, पाणी बिल भरण्याची सुविधा मिळणार आहे. केंद्र सरकारच्या पुढाकारातून 'आयपीपीबी'ची स्थापना करण्यात आली आहे. पंतप्रधान नरेंद्र मोदी यांच्या हस्ते शनिवारी १ सप्टेंबर रोजी पोस्ट पेमेंटस बँक अंतर्गत ६५० शाखा व ३२५० सेवा केंद्राचे लोकार्पण होणार आहे. कोल्हापूर डाक विभागातील पहिल्या टप्प्यामध्ये पाच ठिकाणी ही सुविधा असणार आहे. कसबा बावडा रोडवरील कोल्हापूर प्रधान डाक घर येथे मुख्य शाखा असणार आहे. मार्केट यार्ड उप डाकघर, शुक्रवार पेठ उप डाकघर, उचगाव शाखा डाकघर, हेर्ले शाखा डाकघर येथे सेवा केंद्र असणार आहेत. पालकमंत्री चंद्रकांत पाटील, खासदार धनंजय महाडिक, आमदार राजेश क्षीरसागर, आमदर अमल महाडिक, आमदार सुजित मिणचेकर यांच्या हस्ते उद्घाटन होणार आहे. आयपीपीबी बचत खाते, चालू खाते,पैशाचे हस्तांतरण, थेट लाभ हस्तांतरण अशा विविध सुविधा ग्राहकांना मिळणार आहेत. या सुविधा पोस्ट ऑफीस, मायक्रो एटीएम पोस्टमनजवळील मोबाइलव्दारे, बँकीग अॅप, एसएमएसव्दारे मिळणार आहेत. पोस्ट खात्याने यासाठी आधुनिक तंत्रज्ञानाचा अवलंब केला आहे. कोल्हापुरात ९६ पोस्ट ऑफीसेस तर ४६७ शाखा डाकघर आहेत. सामान्य नागरिकांसाठी सर्वात जवळची स्वस्त आणि विश्वसनीय बँक तयार करणे हा प्रमुख उद्देश असल्याचे विभागाने म्हटले आहे.
मोबाइल अॅप डाउनलोड करा आणि राहा अपडेट
