म. टा. प्रतिनिधी, कोल्हापूर

शहरात डेंगीचा प्रादुर्भाव वाढल्याने सर्वसाधारण सभेत टीकेची झोड उठल्यानंतर महापालिकेची यंत्रणा बुधवारी खडबडून जागी झाली. डेंगीवर नियंत्रण मिळवण्यासाठी २० ते २६ जून या कालावधीत शहरातील ३३ भागांत डेंगीचा धोका उद्भवण्याची शक्यता असून घर टू घर सर्व्हे सुरू झाला आहे. पहिल्याच दिवशी ३८४० कुटुंबांचा सर्व्हे केला, त्यामध्ये २८४ घरांत अळ्या सापडल्या. लक्षतीर्थ वसाहत आणि दुधाळी परिसरात अळया सापडण्याचे प्रमाण जास्त असल्याने प्रशासनाने या भागावर लक्ष केंद्रित केले. शिवाय चिले कॉलनी आणि फिरंगाई परिसरातील तीन कुटुंबीयांना दंडात्मक कारवाई केली. दरम्यान जानेवारी ते जून या कालावधीत ३७९ जणांना डेंगीची लागण झाल्याचे सामोर आले आहे. यामध्ये जूनमध्येच १९५ रुग्ण आढळले आहेत.

घरातील पाणी साठवणुकीचे बॅरेलसह फ्रीजच्या पाठीमागील ट्रेमध्येही अळया सापडल्या आहेत. दरम्यान डेंगी प्रतिबंधात्मक मोहिमेतील कर्मचाऱ्यांना नागरिकांना सहकार्य करावे असे आवाहन प्रशासनाने केले आहे. गेल्या वर्षी डेंगीचा प्रादुर्भाव असलेली शहरातील ३३ ठिकाणावर प्रशासनाने लक्ष केंद्रित करुन प्रतिबंधात्मक मोहिमेला प्रारंभ केला. यामध्ये जवाहरनगर, कनाननगर, सीपीआर हॉस्पिटल, टेंबलाईवाडी, महाडिक माळ, न्यू शाहूपुरी, कदमवाडी, ताराबाई पार्क, संभाजीनगर एनसीसी भवन, शिवाजी पार्क, सिध्दार्थ नगर, लाइन बाझार कसबा बावडा, जुना वाशी नाका, साळोखेनगर रविवार पेठ, कारंडे मळा विचारे माळ, सानेगुरुजी वसाहत, देवकर पाणंद, लक्ष्मीपुरी, दुधाळी, गंगावेश, मंगळवार पेठ, शास्त्रीनगर सागरमाळ, भोसले पार्क, महालक्ष्मीनगर, राजारामपुरी, कावळा नाका परिसर, कळंबा जेल परिसरात सर्व्हे होणार आहे.

बुधवारी महापौर शोभा बोंद्रे व आयुक्त अभिजित चौधरी प्रत्यक्ष पाहणीसाठी रस्त्यावर उतरल्याने अधिकारीही हडबडले आणि यंत्रणा गतिमान केली. महापौरांनी दुधाळी, गंगावेश, फिरंगाई परिसरात तर आयुक्तांनी दुधाळी, लक्षतीर्थ वसाहत प्रभागात पाहणी केली. डेंगी प्रतिबंधात्मक कामाची पाहणी करून अधिकारी व कर्मचाऱ्यांना सूचनाही केल्या. तत्पूर्वी बुधवारी सकाळी सात ते दुपारी दोन या कालावधीत डेंगी प्रतिबंधात्मक कार्यवाहीला सुरुवात केली. दरम्यान महापौर व आयुक्त हे गुरुवारी सकाळी दहा वाजता शहाजी वसाहत भागात पाहणी करणार आहेत. उपमहापौर महेश सावंत यांनी शहरातील अस्वच्छता, डेंगीला अटकाव करण्यात प्रशासनाचा कुचकामीपणावरुन सर्वसाधारण सभेत आयुक्त व इतर अधिकाऱ्यांना गुलाब फूल देऊन निषेध नोंदविला होता.

...........

दिवसभरात ३८४० कुटुंबांचा सर्व्हे

बुधवारी सदर बाजार, मंगेशकरनगर, चिले कॉलनी, फिरंगाई, लक्षतीर्थ वसाहत, साळोखेनगर, दुधाळी भागात सर्वेक्षण केली. आरोग्य विभाग, पवडी आणि नागरी कुटुंब कल्याण केंद्राकडील मिळून ३०० हून अधिक कर्मचाऱ्यांचा समावेश आहे. कर्मचाऱ्यांनी १९ ठिकाणचा खरमाती उठाव केला. सदर बाजार प्रभागात ८६० तर दुधाळी भागात ८३०, लक्षतीर्थ वसाहत येथे ७२० कुटुंबांचा सर्व्हे झाला. चिले कॉलनीत ४५८, फिरंगाई परिसरात ३५०, साळोखेनगरमध्ये ३३० कुटुंबांचा सर्व्हे झाला. दरम्यान, जानेवारीत ३३, फेब्रुवारीत नऊ, मार्चमध्ये पाच, एप्रिलमध्ये २४, मेमध्ये ११३ तर जून महिन्यात आतापर्यंत १९५ जणांना डेंगीची लागण झाल्याची माहिती महापालिकेकडील आकडेवारीवरुन समोर आली आहे.

..........

कोल्हापूर : शहरात डेंगीचा प्रादुर्भाव वाढल्याने महापालिकेच्या सर्वसाधारण सभेत नगरसेवकांनी प्रशासनाला धारेवर धरले होते. महापौर शोभा बोंद्रे यांनी मुख्य आरोग्य निरीक्षक विजय पाटील यांच्या निलंबनाचे आदेश दिले होते. दरम्यान, महापौर बोंद्रे व आयुक्त अभिजित चौधरी यांच्यात बुधवारी चर्चा झाली. त्यामध्ये मुख्य आरोग्य निरीक्षक पाटील यांच्या निलंबनाबाबत टोकाचा निर्णय घेऊ नये, असे महापौरांनी सुचविले. महापौर व आयुक्त यांच्यातील चर्चेमुळे पाटील यांच्या निलंबनाचाा आदेश मागे पडल्याचे स्पष्ट झाले.

(फोटो आहे)

परशुराम वाघमारेचा ताबा घ्या

पानसरे समता संघर्ष समितीचे तपास अधिकाऱ्यांना निवेदन

म. टा. प्रतिनिधी, कोल्हापूर

पत्रकार गौरी लंकेश हत्येप्रकरणी कर्नाटक एसआयटीने अटक केलेल्या संशयित आरोपीचा कॉम्रेड पानसरे यांच्या हत्येतही सहभाग असल्याची शक्यता व्यक्त केली जात आहे. महाराष्ट्र एसआयटीने त्याचा ताबा घेऊन पानसरे हत्येबाबत तपास करावा. यासह वाघमारे आणि संशयितांशी संबंधित असलेल्या धार्मिक संस्थांचीही चौकशी करावी, अशी मागणी कॉम्रेड पानसरे समता संघर्ष समितीने केली आहे. या मागणीचे निवेदन बुधवारी (ता. २०) तपास अधिकारी तिरुपती काकडे यांच्याकडे दिले.

कर्नाटक एसआयटीने पत्रकार गौरी लंकेश यांच्या हत्येप्रकरणी परशुराम वाघमारे या संशयिताला अटक केली आहे. त्याच्या चौकशीदरम्यान लंकेश यांच्यासह डॉ. एम. एम. कलबुर्गी आणि कॉम्रेड पानसरे यांच्याही हत्या एकाच शस्त्रातून केल्याचे समोर येत आहे. या पार्श्वभूमीवर महाराष्ट्र एसआयटीने संशयित वाघमारेचा ताबा घेऊन पानसरे हत्येप्रकरणी चौकशी करावी, अशी मागणी पानसरे समता संघर्ष समितीने केली आहे. या मागणीचे निवेदन बुधवारी तपास अधिकारी तिरुपती काकडे यांच्याकडे दिले. या निवेदनात म्हटले आहे, पानसरे कुटुंबियांच्या याचिकेमुळे या तपासावर हायकोर्टाचे लक्ष आहे. कोर्टाने तपासाबद्दल अनेकदा असमाधान व्यक्त केले. पानसरे, कलबुर्गी आणि पत्रकार लंकेश यांच्या हत्यांमध्ये साम्य आहे. विचारसरणीच्या विरोधातून या हत्या झाल्याचे मत कोर्टाने नोंदवले आहे. त्यामुळे लंकेश हत्या प्रकरणातील संशयित वाघमारे याला ताब्यात घेऊन तपास केल्यास महाराष्ट्र एसआयटीला महत्त्वाची माहिती मिळू शकते. याबाबत एसआयटीने तातडीने कार्यवाही करावी. यावेळी मेघा पानसरे, हसन देसाई, दिलीप पवार, व्यंकाप्पा भोसले, सुरेश शिप्पूरकर आदी उपस्थित होते.

......................

रेसकोर्स नाका परिसरात निर्भय मॉर्निंग वॉक

दरम्यान, तपास यंत्रणांवरील दबाव कायम रहावा यासाठी पानसरे समता संघर्ष समितीच्या प्रत्येक महिन्याच्या २० तारखेला शहरात निर्भय मॉर्निंग वॉक आंदोलन केले जाते. बुधवारी (त. २०) रेसकोर्स नाका, संभाजीनगर परिसरात आंदोलन करण्यात आले. यावेळी बोलताना ' गरज पडल्यास कर्नाटकचे मुख्यमंत्री कुमारस्वामी यांची महाराष्ट्र एसआयटीने भेट घ्यावी', असे आवाहन सीमा पाटील यांनी केले. यावेळी अरुण पाटील, प्रा. टी. एस. पाटील, कॉ. बी. एस. बरगे, कृष्णात स्वामी, अनिल शेलार, मीना चव्हाण, निखील कुंभार, दिगंबर लोहार, शंकर काटाळे आदी उपस्थित होते.

पंचगंगा प्रदूषण रोखण्यासाठी क्लस्टर योजना

जिल्हा नियोजनासाठी ३६४ कोटी ८३ लाखांच्या आरखड्याला मंजुरी : पालकमंत्री चंद्रकांत पाटील यांची माहिती

म. टा. प्रतिनिधी, कोल्हापूर

'पंचगंगा नदीकाठावरील गावांचे सांडपाणी नदीत मिसळत असल्यामुळे नदी प्रदूषणाचा प्रश्न ऐरणीवर आला आहे. नदीचे प्रदूषण रोखण्यासाठी काठावरील चार-पाच गावांसाठी क्लस्टर योजना तयार करण्यात येणार आहे. तसेच नदीकाठावरील गावांना पिण्याचे शुद्ध पाणी उपलब्ध करुन देण्यासाठी आरओ सिस्टिम प्रकल्पाला जिल्हा नियोजन समितीमध्ये मंजुरी दिली असून यासाठी सीएसआर फंडातून निधी घेण्यात येणार आहे', अशी माहिती पालकमंत्री चंद्रकांत पाटील यांनी पत्रकार बैठकीत दिली. जिल्हा वार्षिक योजनेतंर्गत या वर्षासाठी जिल्ह्यास ३६४ कोटी ८३ लाखांचा आराखडा मंजूर करण्यात आला असून आराखड्यातील एक रुपयांचा निधीही परत जाणार नाही, याची दक्षात घेण्याची सूचना केली असल्याचे पालकमंत्री पाटील यांनी सांगितले. जिल्हा नियोजन समितीची बैठक जिल्हाधिकारी कार्यालयाच्या महाराणी ताराराणी सभागृहात झाली.

पालकमंत्री पाटील म्हणाले, 'दिवसेंदिवस पंचगंगा नदी प्रदूषणाचा विषय चिंतेचा ठरत आहे. औद्योगिक कारखान्याबरोबरच नदीकाठावरील गावांचे सांडपाणी थेट नदीत मिसळत असल्याने प्रदूषणामध्ये अधिक भर पडते. यासाठी काठावरील गावांचे सांडपाणी रोखण्यासाठी चार-पाच गावांसाठी एकत्रित क्लस्टर योजना हाती घेण्यात येणार आहे. या गावांच्या सांडपाण्यावर प्रक्रिया करुन पाण्याचा वापर शेती व बगीच्यासाठी करण्यात येईल. तसेच नदीच्या प्रदूषणामध्ये वाढ झाल्याने काठावरील गावांचा पिण्याचा पाण्याचा प्रश्न गंभीर बनला आहे. या गावांना शुद्ध पाणी देण्यासाठी प्रकल्पाबरोबरच आरओ सिस्टिम हाती घेतली जाईल. यासाठी जिल्हा नियोजन मंडळाकडून निधी कमी पडल्यास सीएसआर फंडाचा वापर करण्यात येणार आहे.'

'यावर्षी जिल्ह्यासाठी ३६४ कोटी ८३ लाखांच्या आराखड्याला नियोजन मंडळामध्ये मंजुरी दिली आहे. यामध्ये सर्वसाधारण योजनांसाठी २६३ कोटी व अनुसूचित जाती उपयोजनेसाठी ११३ कोटी ४१ लाख रुपयांची तरतूद केली आहे. गतवर्षी ९९ टक्के निधीचा खर्च झाला असली, तरी वर्षाखेरीस निधी परत जावू नये, यासाठी धावधाव करावी लागते. यावर्षी मात्र अशी धावधाव करु लागू नये, यासाठी एक ऑगस्टपर्यंत निधीचे प्रस्ताव देण्याची सूचना केली आहे. मागील कामाच्या खर्चाचे प्रमाणपत्र दिल्याशिवाय निधी देण्यात येणार नाही. जाहीर केलेला निधी खर्च होण्यासाठी समिती प्रमुखांची दरमहा बैठक घेण्यात येणार असून स्वत: जिल्हाधिकाऱ्यांसोबत दर आठवड्याला दोन तास बैठक घेणार आहे. गेल्या वर्षी अतिवृष्टीमुळे खराब झालेल्या रस्त्यांच्या दुरुस्तीसाठी १२ कोटीचा निधी दिला होता. यावर्षी २० कोटीचा निधी देण्यात येणार असल्याचे मंत्री पाटील यांनी सांगितले.

'आडवाटेवरचं कोल्हापूर या उपक्रमाच्या यशस्वीतेनंतर जिल्ह्यातील चार धार्मिक तीर्थक्षेत्रे लोकांना पाहण्यास उपलब्ध व्हावीत, यासाठी येत्या श्रावण महिन्यात आठवड्यातून एक अशा सहलींचे आयोजन केले जाणार आहे, याचा लाभ घेण्याचे आवाहन करून पालकमंत्री म्हणाले, 'यावर्षीच्या आपल्या वाढदिवसाचे औचित्य साधून जिल्ह्यात महिलांसाठी स्वच्छतागृहे उभारण्याचा उपक्रम हाती घेतला आहे. यापुढील काळात जिल्ह्यात जेथे-जेथे महिलांसाठी स्वच्छतागृह उभारण्याची गरज आहे, तिथे- तिथे संबंधितांनी तयारी दर्शविल्यास शौचालयाची उभारणी मोफत करुन दिली जाईल.'

बैठकीस जिल्हा परिषदेच्या अध्यक्षा शौमिका महाडिक, खासदार धनंजय महाडिक, आमदार हसन मुश्रीफ, सुरेश हाळवणकर, डॉ. सुजित मिणचेकर, उल्हास पाटील, जिल्हाधिकारी अविनाश सुभेदार, आयुक्त डॉ. अभिजीत चौधरी, सीईओ डॉ. कुणाल खेमनार, सार्वजनिक बांधकाम विभागाचे अधिक्षक अभियंता सदाशिव साळुंखे, जिल्हा नियोजन अधिकारी सरिता यादव, समाजकल्याण विभागाचे सहायक आयुक्त बाळासाहेब कामत यांच्यासह अनेक पदाधिकारी व सदस्य उपस्थित होते.

........................

पॉइंटर

एक ऑगस्टपर्यंत अपेक्षीत निधीचे प्रस्ताव सादर करा

निमंत्रीत सदस्यांना मिळणार निधी

जलयुक्तमध्ये ८० गावांची निवड

दलित वस्ती सुधारणासाठी विधानसभा मतदारसंघाला एक कोटीचा निधी

पॅचवर्कसाठी २० कोटीचा निधी

................

चौकट

पालकमंत्री, आमदार मुश्रीफांमध्ये जुगलबंदी

जिल्हा नियोजन मंडळाच्या बैठकीत चांगलीच टोलेबाजी रंगली. खासदार धनंजय महाडिक यांना संसदरत्न पुरस्कार मिळाल्याबद्दल अभिनंदनाचा ठराव मांडण्यात आला. यावेळी राष्ट्रवादीचे खासदार, असा उल्लेख करण्याची मागणी आमदार हसन मुश्रीफ यांनी केली. यावर असा उल्लेख करण्यास काही हरकत नाही, पण त्यांना लोकसभेची उमेदवारी देणार आहात का, असा प्रश्‍न करुन पालकमंत्री चंद्रकांत पाटील उपस्थित केला. याचवेळी एका कार्यकर्त्याने पालकमंत्र्यांना मुख्यमंत्री पदाचा कार्यभार मिळाल्याबददल शुभेच्छा दिल्या. मात्र हा कार्यभार कालच परत केल्याचा खुलासा मंत्री पाटील यांनी केला. यावर मुख्यमंत्री होण्यासाठीच दादांना शुभेच्छा द्या, असा सल्ला आमदार मुश्रीफ यांनी दिला. यावर तुमचा यासाठी पाठिंबा आहे का? असा प्रश्‍न मंत्री पाटील यांनी मुश्रीफांना केला असता त्यांनी होकार दिला. यावर मला पाठिंबा देण्यापूर्वी पवार साहेबांना विचारा, असा टोला पालकमंत्री पाटील यांनी लगावला.

.................................

...............................................

'पगारी पुजारी नियुक्ती

प्रक्रिया कायदेशीर'

म. टा. प्रतिनिधी, कोल्हापूर

'अंबाबाई मंदिरात पगारी पुजारी नेमण्याचा ऐतिहासिक निर्णय घेतला आहे. कायद्याच्या अंमलबजावणीसाठी विधी व न्याय विभागाची दर पंधरा दिवसाला बैठक होत असून विधी व न्याय विभागाने दिलेल्या सूचनेनुसारच पगारी पुजारी नेमण्याची कायदेशीर प्रक्रिया सुरू आहे. पुजारी नेमताना कोणाच्या श्रद्धास्थानाला धक्का पोहोचू नये याची दक्षता घेतली जात आहेत', अशी माहिती पालकमंत्री चंद्रकांत पाटील यांनी दिली. आंदोलनामुळे प्रशासन हैराण झाले असून धार्मिक भावना नजरेआड करता येणार नसल्याचेही पालकमंत्री पाटील यांनी आंदोलकांना सांगितले.

अंबाबाई मंदिरामध्ये पगारी पुजारी नेमण्याची प्रक्रिया बेकायदेशीर असल्याच्या कृती समितीच्या आरोपाबाबत बोलताना पालकमंत्री पाटील म्हणाले, 'अंबाबाईच मंदिरात पगारी पुजारी नेमण्याचा ऐतिहासिक निर्णय घेतला. सरकार सर्वसामान्यांचे असल्याने आंदोलकांनी केलेल्या आंदोलनामुळे कायद्याचा मसुदा तयार केला. पण देवीची विधीवत पूजा कोणी करायची असा प्रश्न उपस्थित होऊ नये, यासाठी कायद्याची प्रक्रिया राबवली जात आहे. यासाठी राज्याच्या विधी व न्याय विभागाची दर पंधरा दिवसाला बैठक होऊन अंजेडा ठरवून कार्यवाही केली जात आहे. बुधवारी (ता. १३) झालेल्या बैठकीमध्ये पॅनेल तयार करुन मुलाखतीसाठी अर्ज मागवणे, निवड प्रक्रिया व प्रशिक्षण देण्याची सूचना केली होती. या सूचनेनुसारच मुलाखतीची कायदेशीर प्रक्रिया सुरू आहे. यामध्ये घाई गडबड करणे उचित ठरणार नाही. अंबाबाई देवी अनेकांचे श्रद्धास्थान आणि धार्मिक भावनेशी निगडीत असल्याने विधीवत पूजा होणे आवश्यक आहे. यासाठी प्रशिक्षित पुजाऱ्यांची आवश्यकता आहे. यासाठी परंपरागत पुजारीही काम करु शकतील, पण यासाठी त्यांना अर्ज करावा लागेल.'

भ्रष्टाचाराविरोधात

जिपसमोर शंखध्वनी

कोल्हापूर : शिरोळ तालुक्यातील शिरदवाड, शिवनाकवाडी, लाटवाडी गावात पेयजल योजनेत भ्रष्टाचार झाल्याचे उघड झाले आहे. भ्रष्टाचारामुळे पाणी योजना रखडली असून या तीन गावांतील ग्रामस्थांना शुध्द पाणी मिळालेले नाही. परिणामी पेयजलमध्ये भ्रष्टाचार करणारे अधिकारी, ठेकेदाराविरोधात दुधगंगा संघर्ष समितीर्फे जिल्हा परिषदेसमोर शंखध्वनी आंदोलन करण्यात आले. यावेळी आंदोलकांनी पाणी योजनेत पाच कोटी रूपये खाणाऱ्यांवर कारवाई करा, यासह विविध मागण्यांच्या घोषणा देत परिसर दणाणून सोडला. काहीवेळ मुख्य प्रवेशव्दारावर ठिय्या मारून प्रशासनाचा निषेध केला. यावेळी संजय कुलकर्णी, विनायक कांबळे, बाळासाहेब पगडे, चंद्रकांत कांबळे, डी. के. चौगुले, दत्तात्रय बुवा आदी उपस्थित होते.

कोल्हापूर : जर्मनीतील बर्लिन येथे झालेल्या आयडीएम बर्लिन वर्ल्ड पॅरास्विमिंग स्पर्धेत कोल्हापूरचा आंतरराष्ट्रीय पॅराजलतरणपटू स्वप्नील संजय पाटील याने ५० मीटर बॅक स्ट्रोकमध्ये ब्राँझ पदक पटकावले. स्वप्नीलने या पदकासह स्पर्धेत ५० मीटर फ्री स्टाईल, १०० मीटर बॅकस्ट्रोक, २०० मीटर आयएम व मेडले या क्रीडाप्रकारात सहभाग नोंदवला. स्वप्नीलने आंतरराष्ट्रीय स्तरावर १७, राष्ट्रीय ८४ व राज्यस्तरीय स्तरावर ३७ पदके मिळवली आहेत. त्याचे कोल्हापूर डिस्ट्रीक पॅरा ऑलंपिक असोसिएशनच्यावतीने कोल्हापुरात जंगी स्वागत करण्यात आले. खासदार धनंजय महाडिक यांच्या हस्ते त्याचा सत्कार झाला. मराठा महासंघाचे अध्यक्ष वसंत मुळीक, आर. डी. आरळेकर, मनसे शहराध्यक्ष राजू जाधव, डिस्ट्रीक पॅरालिम्पिक असोसिएशनचे संस्थापक अध्यक्ष अनिल पोवार, आकाश कोरगावकर, दिलीप कांबळे, शुक्ला बिडकर, जलतरण प्रशिक्षक संजय पाटील आदी उपस्थित होते.

'कोल्हापूर लोकसभा

निवडणूक लढणार'

कोल्हापूर : 'कोल्हापूर लोकसभा मतदारसंघातून निवडणूक लढवण्याची तयारी केली आहे', असे सांगत प्रा. संजय मंडलिक यांनी गेल्या चार वर्षात जिल्ह्याचा विकास खोळंबला आहे, अशी टीका केली. पिंपरी चिंचवड येथील आकुर्डीमध्ये आयोजित केलेल्या कोल्हापूरवासियांच्या मेळाव्यात ते बोलत होते. यावेळी पिंपरी चिंचवडचे खासदार श्रीरंग बारणे, आमदार प्रकाश आबीटकर उपस्थित होते. प्रा. मंडलिक म्हणाले, 'माजी खासदार मंडलिक यांनी आयुष्यभर जिल्ह्याच्या विकासासाठी दिलेले योगदान कोणत्याच पिढीला विसरता येणार नाही. जनतेनेही त्यांना जपले. त्यामुळे ते चारवेळा आमदार, चारवेळा खासदार व एकदा मंत्री झाले. त्यांच्या स्वप्नातील जिल्ह्याच्या उर्वरित विकासासाठी साऱ्यांचे पाठबळ द्यावे.' यावेळी खासदार बारणे, आमदार आबीटकर यांची भाषणे झाली.

Bhimgonda.Desai@timesgroup.com

Tweet : @bhimgondaMT

कोल्हापूर : वर्गात विद्यार्थ्यांना संस्काराचे धडे देताना 'नेहमी खरे बोलावे' असा उपदेश देणाऱ्या गुरुजींनीच सोयीच्या ठिकाणची शाळा मिळण्यासाठी लबाडी केल्याचे उघड झाले. आतापर्यंत अशा ५५ शिक्षकांची बनावटगिरी प्रशासनाच्या निदर्शनास आली आहे. पती, पत्नी एकत्रिकरण, अपंग, मतिमंद, घटस्फोटित, विधवा असल्याची कागदपत्रे जोडून सोयीच्या बदलीच्या ठिकाणासाठी ऑनलाइन कागदपत्रे अपलोड केलेल्या सर्वच शिक्षकांच्या कागदपत्रांची छाननी जिल्हा परिषद प्राथमिक शिक्षण प्रशासन करीत आहे. छाननीनंतर खोटी, बनावट कागदपत्रे जोडलेल्या सर्व गुरुजींवर कडक कारवाई होणार आहे.

सरकारच्या शिक्षण विभागाने ऑनलाइन बदलीची प्रक्रिया राबविल्याने वशिलेबाजी, राजकीय आशीर्वादाने वर्षांनुवर्षे सोयीच्या शाळेत नोकरी करीत असलेल्या गुरुजींची उचलबांगडी झाली. उचलबांगडी टाळण्यासाठी काही शिक्षकांनी पळवाट शोधली. त्यासाठी त्यांनी बदलीत सवलत आणि सोयीच्या शाळा मिळण्यासाठी पती-पत्नी एकत्रिकरण, अपंग, मतिमंद, घटस्फोटित, विधवा, नियुक्तीची तारीख बदलणे, जन्मतारीख दुसरी दाखविण्यासाठी खोटी, बनावट कागदपत्रे बदलीच्या ऑनलाइन पोर्टलवर अपलोड केली. प्रक्रिया ऑनलाइन असल्याने लबाडी खपून जाईल, असे त्या गुरुजींना वाटले. बदली प्रक्रिया झाल्यानंतर गुरुजींना अपलोड केलेल्या कागदपत्रांआधारे निवडलेली शाळाही मिळाली. मात्र, खोटी माहिती अपलोड करून सोयीची शाळा मिळविल्याची तक्रार अन्यायग्रस्त शिक्षकांनी केली.

शिक्षणाधिकारी, मुख्य कार्यकारी अधिकारी, अतिरिक्त मुख्य कार्यकारी अधिकारी ते मंत्रालयातील शिक्षण सचिवांपर्यंत तक्रारींचा ओघ कायम आहे. त्याची दखल घेत तक्रारी झालेल्या आणि संशयित शिक्षकांच्या कागदपत्रांची छाननी पहिल्या टप्प्यात शिक्षण प्रशासन करीत आहे. त्यात जिल्ह्यातील ५५ शिक्षकांची नावे समोर आली आहेत. त्यांच्यावर कडक कारवाई होणार आहे. सापडले त्यांच्यावर कारवाई आणि न सापडलेले मोकाट असे होऊ नये, म्हणून सवलतीच्या बदली योजनेतून बदली झालेल्या सर्वच गुरुजींच्या कागदपत्रांची छाननी होणार आहे. यामुळे हव्या त्या ठिकाणी बदलीसाठी बनावटगिरी केलेल्याचा खरा चेहरा उघड होणार आहे. त्यामुळे संबंधित शिक्षक बचावासाठी शिक्षक नेते, पदाधिकाऱ्यांच्या आश्रयाला जात कारवाई टाळण्यासाठी प्रयत्न करताना दिसत आहेत.

०००

बनावटगिरी कशी‌?

कुणी सेवाज्येष्ठता दाखविण्यासाठी खोट्या नियुक्तीचा दाखला जोडला आहे. विधवा, घटस्फोटित असल्याचा बनावट दाखला मिळविला. पती-पत्नी एकत्रिकरणातील अंतर कमी दाखवले. सरकारी डॉक्टरांना हाताशी धरून धडधाकट असताना अपंगत्व असल्याचा दाखला मिळविल्याचे प्रकार समोर आले आहेत. प्रकरणनिहाय छाननी केल्यानंतर गुरुजी इतक्या टोकाची लबाडी करू शकतात याबद्दल वरिष्ठ अधिकारी डोक्यावर हात मारून घेत आहेत. त्यावरून आपल्याला हवी तशी खोटी, बनावट कागदपत्रे तयार करून देणारी यंत्रणा कार्यरत असल्याचेही स्पष्ट होत आहे.

०००००

'त्या' शिक्षिकेची खातेनिहाय चौकशी

शिक्षिका प्रतिभा मोरे नाशिक जिल्हा परिषदेमधील शिक्षण विभागाकडे पती-पत्नी एकत्रिकरणाच्या सवलतीतून बदलीने हजर होण्यासाठी गेल्या. मात्र, आंतरजिल्हा बदलीचा गैरफायदा घेतल्याचे निदर्शनास आल्यानंतर त्यांना नाशिकचे मुख्य कार्यकारी अधिकारी डॉ. नरेश गीते यांनी हजर करून घेतले नाही. त्यांनी बदलीबाबत चूक केल्याबद्दलचे पत्र कोल्हापूर जि.प.च्या सीईओंना पाठविले. त्यामुळे शिक्षिका मोरे यांची खातेनिहाय चौकशी होणार आहे.

००००००

सर्वाधिक लबाड हातकणंगलेतील

बदली अर्जात चुकीची माहिती भरून लबाडी केलेल्या शिक्षकांची संख्या तालुकानिहाय अशी : हातकणंगले : १५, करवीर : १४, पन्हाळा : १२, कागल : १०, आजरा : ४.

००००००

ऑनलाइन बदली प्रक्रियेत काही शिक्षकांनी चुकीची, खोटी माहिती अपलोड केल्याचे समोर येत आहे. अशा शिक्षकांचा शोध घेण्यासाठी कागदपत्रांची छाननी करण्याची सूचना शिक्षण प्रशासनास दिली आहे. खोटी, चुकीची माहिती अपलोड केलेल्या दोषी शिक्षकांवर शिक्षण सचिवांनी दिलेल्या आदेशानुसार कडक कारवाई होईल.

- डॉ. कुणाल खेमनार, सीईओ, जि.प.

००००००

दुचाकी चोरट्यांचा सुळ‌सुळाट

महिन्याभरात ७० दुचाकींची चोरी, भरदिवसा हँडललॉक तोडून दुचाकी लंपास

कोल्हापूर टाइम्स टीम

शाहूपुरी पोलिस ठाण्याच्या हद्दीतून सोमवारी (ता. १८) एकाच दिवशी दोन ठिकाणाहून दुचाकींची चोरी झाली. मुकुंद चिंतू शिंदे (वय ५३, मूळ रा. वाफेगाव, जि. सोलापूर) हे सोमवारी कामानिमित्त मध्यवर्ती प्रशासकीय इमारतीत गेले होते. पार्किंगमध्ये हँडेल लॉक करून दुचाकी लावली होती. अर्ध्या तासात काम आवरून परतल्यानंतर त्यांना दुचाकी आढळली नाही. या दोन्ही घटना एकाच दिवशी घडल्या आहेत.

राहुल यशवंत सूर्यवंशी (वय २९, रा. रायगड कॉलनी, पाचगाव) या तरुणाने चार महिन्यांपूर्वीच एका फायनान्स कंपनीच्या लिलावातून महागडी दुचाकी खरेदी केली. सोमवारी एका अनोळखी व्यक्तीचा त्याच्या मोबाइलवर फोन आला. त्या व्यक्तीने राहुलला आरटीओ ऑफिसमध्ये बोलवून घेतले. आरटीओ ऑफिसच्या पार्किंगमध्ये दुचाकी पार्क करून आत गेल्यानंतर काही क्षणात पार्किंगमधील दुचाकी अज्ञाताने लांबवली.

तत्पूर्वी रविवारीही अशाच पद्धतीने मोटारसायकल लांबविण्याचा प्रकार घडला. भाऊसिंगजी रोडवरील सीपीआर हॉस्पिटलमध्ये काही कामानिमित्त सागर संतराम सातपुते (वय ३२, रा. राजेंद्रनगर) हे आले होते. सीपीआरच्या आवारात त्यांनी आपली दुचाकी पार्क केली होती. काम आटोपून परतल्यावर त्यांनाही आपली दुचाकी चोरट्यांनी लांबवल्याचे दिसले.

या तिन्ही घटना प्रातिनिधिक आहेत. शहरात गेल्या महिन्याभरापासून दुचाकी चोरट्यांचा अक्षरश: धुमाकूळ सुरू आहे. घरासमोर पार्क केलेली दुचाकीही चोरटे पळवत आहेत. भरदिवसा वर्दळीच्या ठिकाणाहून हँडेल लॉक तोडून दुचाकींची चोरी होत असूनही चोरटे पोलिसांना सापडत नाहीत. तीन दुचाकींची चोरी झाल्याची फिर्याद मंगळवारी शाहूपुरी आणि लक्ष्मीपुरी पोलिस ठाण्यात दाखल झाली आहे. गेल्या महिन्याभरात जिल्ह्यात ७० हून अधिक दुचाकींची चोरी झाल्याने चोरट्यांना पकडण्याचे आव्हान पोलिसांसमोर निर्माण झाले आहे.

दरवर्षी सुट्यांच्या काळात घरफोड्यांचे गुन्हे वाढतात. यंदा सुटीच्या दिवसात घरफोड्यांचे गुन्हे काही अंशी कमी झाले. मात्र, वाहन चोरीच्या गुन्ह्यांमध्ये कमालीची वाढ झाली. विशेषत: दुचाकी चोरीच्या घटना मोठ्या प्रमाणात वाढल्या आहेत. मध्यवर्ती बसस्थानक, रेल्वे स्टेशन, भाऊसिंगजी रोड, सीपीआर, आरटीओ ऑफिस, जिल्हाधिकारी कार्यालय आणि मॉल्स यांच्या परिसरात दुचाकी चोरीचे गुन्हे घडत आहेत. मंगळवार पेठ आणि शिवाजी पेठेत घरासमोर पार्क केलेल्या दुचाकीही चोरट्यांनी भरदिवसा लंपास केल्या आहेत. विशेष म्हणजे गेल्या महिन्याभरात ७० हून अधिक दुचाकींची चोरी झाली. यातील निम्मे गुन्हे शहरातील आहेत. अपवाद वगळता चोरटे पोलिसांना सापडलेच नाहीत. चोरटेच सापडत नसल्याने चोरीस गेलेल्या दुचाकींचाही शोध लागत नाही. वर्दळीच्या ठिकाणावरूनही हँडेल लॉक केलेली दुचाकी काही क्षणात गायब केली जाते, त्यामुळे नागरिकांमध्ये धास्ती निर्माण झाली आहे.

सीसीटीव्हीचे काम काय?

गेल्या काही महिन्यांत अनेकांना दुचाकी चोरीच्या घटनांचा सामना करावा लागतो. मोबाइल चोरीच्या घटनांसारख्या दुचाकी चोरीच्या घटना सातत्याने घडत आहेत. शहरात सीसीटीव्ही कॅमेरे आहेत. तरीही पोलिसांना चोरटे का सापडत नाहीत? असा संतप्त सवाल नागरिकांकडून विचारला जात आहे. गेल्या महिन्याभरात केवळ चार चोरटे पोलिसांच्या हाती लागले. त्यांच्याकडून आठ दुचाकी पोलिसांना मिळाल्या. अन्य घटनांतील चोरटे पोलिसांना सापडलेले नाहीत. त्यामुळे चोरीला गेलेली दुचाकी परत मिळण्यासाठी नागरिकांना प्रतीक्षा करावी लागत आहे.

अवैध विक्रीवर हवा वॉच

ग्रामीण भागात कमी किंमतीत जुन्या दुचाकींची विक्री करणाऱ्या टोळ्या सक्रीय आहेत. पोलिसांनी अशा टोळ्यांचा शोध घेऊन त्यांची चौकशी करणे गरजेचे आहे. अनेकदा बनावट कागदपत्रे तयार करून चोरीच्या दुचाकींची विक्री केली जाते. कमी किंमतीत दुचाकी मिळत असल्याने कागदपत्रांशिवायही खरेदी होते. सीमाभागातील चोरट्यांच्या टोळ्याही यात सक्रीय असल्याचा अंदाज पोलिसांचा आहे. यावर वॉच ठेवल्यास चोरटे सापडण्याची शक्यता नाकारता येत नाही.

दुचाकी चोरीच्या वाढत्या घटना रोखण्यासाठी पोलिसांच्या रेकॉर्डवरील सराईत चोरट्यांवर नजर आहे. शिवाय काही ठिकाणी साध्या वेशातील पोलिसांकडून सापळेही लावले आहेत. काही ठराविक टोळ्यांकडून हे काम होत असल्याचा संशय आहे. एखादा चोरटा हाती लागल्यास अनेक गुन्हे उघडकीस येण्याची शक्यता आहे. या घटना टाळण्यासाठी नाकाबंदीही केली जात आहे.

- डॉ. प्रशांत अमृतकर, शहर पोलिस उपअधीक्षक

नलिनी भोसले

कोल्हापूर

शांतिनिकेतन शाळेजवळील ग्रीन पार्क येथील नलिनी हिंदुराव भोसले (वय ८५) यांचे निधन झाले. त्यांच्या पश्चात दोन मुले, दोन मुली, सुना, नातवंडे असा परिवार आहे. रक्षाविसर्जन रविवारी (ता. २४) सकाळी आहे.

.......................

सूर्यकांत भिंगारदिवे

कोल्हापूर

राजारामपुरी, दुसरी गल्ली मातंग वसाहत येथील सूर्यकांत आकाराम भिंगारदिवे यांचे निधन झाले. त्यांच्या पश्चात पत्नी, मुलगा, सून, मूली, जावई, नातवंडे असा परिवार आहे.

म. टा. प्रतिनिधी, कोल्हापूर

खरीप हंगामासाठीच्या सर्वच रासायनिक खतांच्या दरात गेल्या वर्षाच्या तुलनेत दहा टक्क्यांनी वाढ झाली आहे. यामुळे खरीप हंगामातील शेतकऱ्यांचे पेरणीचे आर्थिक गणित कोलमडले आहे. बियाणांचे दर जैसे थे आहेत. मात्र बाजारपेठेत बनावट बियांणाची विक्री होत असल्याच्या तक्रारी आहेत. बनावट बियाणे शोधून काढण्यासाठी घेतलेल्या नमुन्यांचा अहवाल अद्याप मिळालेला नाही. पहिल्या टप्यातील पेरण्या झाल्या तरी अहवाल येऊन बनावट बियाणे विकणाऱ्या कंपनीवर कारवाई झालेली नाही. परिणामी बनावट बियाणांचीही मोकाटपणे विक्री सुरू आहे. आठ दिवसाच्या विश्रांतीनंतर पुन्हा पाऊस पडत असल्याने हंगाम साधण्यासाठी मिळेल ते बियाणे घेऊन शेतकरी पेरणी पूर्ण करीत आहे. त्यामुळे शहरातील सर्वच कृषी सेवा केंद्रात गर्दी दिसत आहे.

युरिया, अमोनियम सल्फेट, डीएपी, १०२६२६, १२३२१६, एमओपी, एसएसपी दाणेदार, एसएसपी पावडर, १६१६१६, २४२४०८, १४३५१४, २०२०२०१३ अशी रासायनिक खते विक्रीसाठी आहेत. ही खते अनुदानावर दिली जातात. अनुदान कंपनीच्या नावे जमा होते. त्यामुळे अनुदानाची रक्कम कमी करूनच ही खते शेतकऱ्यांना विकली जात आहेत. या सर्वच खतांच्या किंमतीमध्ये दहा टक्यांनी वाढ झाली आहे. आंतरराष्ट्रीय पातळीवरील खुल्या बाजारपेठेतील दरानुसार खतांच्या दरातही चढउतार होत आहे. युरियाचे ४५ किलोचेही पोते यावर्षीच विक्रीसाठी ठेवण्यात आले आहे. त्याची किंमत २६६ रूपये आहे. ५० किलो युरियाची किंमत २९५ रूपये आहे. सर्वाधिक डीएपीची ५० रूपये किलोच्या पोत्याची किंमत १२५० तर २४२४०८ खतांचा दर ११५५ रूपये आहे. बियाणांपेक्षा रासायनिक खतांवर पैसे अधिक खर्च होत असल्याने शेतकऱ्यांच्या खिशाला आर्थिक झळ बसत आहे.

सरकारमान्य महाबीजसह कंपनीसह इतर कंपन्यांचे बियाणेही कृषी सेवा केंद्रात विक्रीसाठी आहेत. महाबीज कंपनीने हायब्रीड ज्वारीच्या पाच जाती विक्रीसाठी ठेवल्या आहेत. त्यांचा दर प्रती किलोचा १२० ते १५० असा आहे. कर्जत ३, ६, ८ आणि जीएल, एमटीयू , सह्याद्री २, ३, ४, सुवर्णा, भोगावती, मसुरी, इंद्रायणी, श्रीराम या जातीचे भात बियाणे आहे. त्याचा प्रती किलोचा दर २० ते ४१ रूपये असा आहे. ज्वारीच्या तीन मुख्य जाती विक्रीसाठी ठेवल्या आहेत. सोयाबीनच्या चार प्रमुख जाती आहेत. २५ ते ४० रूपये प्रती किलो असा दर आहे. याशिवाय मूग, उडीद, तूर, भूईमूग, हायब्रीड सूर्यफूल, हायब्रीड मक्याचीही बियाणे आहेत.

बनावट बियाणे ओळखण्यासाठी कृषी विभागाच्या गुणनियंत्रण समितीने जिल्हयातील कृषी सेवा केंद्रात विक्रीसाठी ठेवलेल्या बियांणाचे नमुने घेतले आहे. विभागात एकाच ठिकाणी असलेल्या पुणे येथील प्रयोगशाळेत तपासणीसाठी नमुने पाठविले. दरम्यानच्या काळात २५ ते ३० टक्के क्षेत्रावर पेरण्या झाल्या. अहवाल अद्याप आलेला नाही. व्यापकपणे बनावट बियाणे विक्री करणाऱ्या कंपन्यावर कारवाई होताना दिसत नाही. गडहिंग्लज तालुक्यात बोगस, बनावट बियाणे विक्रीचे प्रकरण चव्हाट्यावर आले. यामुळे शिवसेनेने निवेदन देऊन कारवाईची मागणी केली आहे.

----------------------------

चौकट

सेंद्रीय खतांनाही मागणी

रासायनिक खतांच्या अतिवापरामुळे जमिनीचा पोत बिघडत आहे. त्याचे दरही वाढले आहेत. त्यामुळे शेतकरी सेंद्रीय खत वापरण्यावर शेतकऱ्यांनी भर दिला आहे. शेणखत, हिरवळीचे खतही वापरण्याकडे कल वाढला आहे. परिणामी या खतांनाही मागणी वाढली आहे.

------------

कोट

'जिल्ह्यातील कृषी सेवा केंद्रात पुरेशा प्रमाणात रासायनिक खते, बियाणे उपलब्ध आहेत. कुठेही टंचाईच्या तक्रारी नाहीत. जादा दराने बियाणे, खते विक्री करणे, बनावट बियाणांसंबंधीच्या तक्रारींची तातडीने दखल घेतली जात आहे.

चंद्रकांत सूर्यवंशी, जिल्हा कृषी विकास अधिकारी

चहावाल्याचा मुलगा बनला पीएसआय

एक्स्टर्नल शिक्षण अन् नोकरी सांभाळून केला अभ्यास

म. टा. प्रतिनिधी, कोल्हापूर

कुटुंबाच्या उदरनिर्वाहाला केवळ वडिलांच्या चहा टपरीचाच आधार असल्याने एक्स्टर्नल अॅडमिशन घेऊन बी.कॉम.चे शिक्षण पूर्ण केले. यानंतर नोकरी करीत अभ्यास केला आणि पीएसआय बनण्याचे स्वप्न साकार केले. पाचगावमधील तानाजी आडसुळे याच्या जिद्दीचा हा प्रवास अनेकांसाठी प्रेरणादायी ठरत आहे. महाराष्ट्र लोकसेवा आयोगाने घेतलेल्या पोलिस उपनिरीक्षक परीक्षेत राज्यात २० वा क्रमांक पटकावला.

तानाजीचे मूळ गाव राधानगरी तालुक्यातील ऐनी. २० वर्षांपूर्वी त्याचे वडील कामाच्या शोधात कोल्हापुरात आले. उद्यमनगर परिसरात त्यांनी चहाची गाडी सुरू केली. सध्या ते पाचगावातील साईनाथ पार्कमध्ये राहतात. घरात येणाऱ्या तुटपुंज्या पैशांमुळे त्याने वडिलांना हातभार लावण्याचा निर्णय घेतला. बी.कॉम.साठी एक्स्टर्नल अॅडमिशन घेतले. चहाच्या गाडीवर मदत करीत तो कम्प्युटर दुरुस्तीची अर्धवेळ नोकरीही करीत होता. शिक्षण पूर्ण होताच त्याने स्पर्धा परीक्षांचा अभ्यास सुरू केला. २०१६ मध्ये पोलिस उपनिरीक्षक पदाची जाहिरात आल्यानंतर त्याने अभ्यासाची गती वाढवली. घरात याआधी कोणीही सरकारी नोकरीत नाही. आपण पोलिस दलात अधिकारी बनायचेच या निश्चयाने त्याने अभ्यास सुरू केला. पहिल्याच प्रयत्नात त्याने खुल्या प्रवर्गात ३४० पैकी २५३ गुण मिळवून राज्यात २० वा क्रमांक पटकावला.

पूर्व परीक्षा पास झाल्यानंतर त्याने अभ्यासात स्वत:ला झोकून दिले. आई-वडिलांच्या प्रोत्साहनामुळे त्याचा उत्साह वाढला. दिवसभर मित्रांसोबत अभ्यास, रोज उजळणी, ग्रुप डिस्कशन आणि सराव प्रश्नपत्रिका सोडविल्याने अभ्यासात सातत्य राहिले. यापूर्वी एसटीआयची परीक्षा दिली होती, त्यामुळे वेळ आणि प्रश्नांचा अंदाज आला होता. ७५० पदांसाठी परीक्षा असल्याने ही संधी दवडायची नाही, असे ठरवूनच अभ्यास केल्याचे तानाजी सांगतो. त्याच्या यशाने राधानगरी तालुक्यातील ऐनी गावाला पहिलाच पोलिस अधिकारी मिळाला.

फोटो आहेत...

शेतकऱ्याचा मुलगा राज्यात दुसरा

कंदलगावच्या उदय पाटीलची परिस्थितीवर मात

म. टा. प्रतिनिधी, कोल्हापूर

महाराष्ट्र लोकसेवा आयोगाच्या वतीने २०१६ मध्ये घेण्यात आलेल्या पोलिस उपनिरीक्षकपदाच्या परीक्षेत कंदलगाव (ता. करवीर) येथील उदय पाटील याने खुल्या गटातून राज्यात दुसरा क्रमांक पटकावला. घरात शैक्षणिक पार्श्वभूमी नसतानाही उदयने जिद्दीने यश खेचून आणले. पहिल्याच प्रयत्नात राज्यात दुसरा क्रमांक पटकावून त्याने स्पर्धा परीक्षांचा अभ्यास करणाऱ्या विद्यार्थ्यांसमोर आदर्श ठेवला आहे.

उदयचे वडील विष्णू पाटील अल्पशिक्षित असून, आई गृहिणी आहे. त्याच्या दोन बहिणी विवाहित आहेत. कोरडवाहू चार एकर जमिनीतून मिळणाऱ्या उत्पन्नावरच त्याच्या कुटुंबाचा उदरनिर्वाह चालतो. उदयने कंदलगाव विद्यामंदिर शाळेत प्राथमिक शिक्षण घेतले. पाचगावच्या भारती विद्यापीठ प्रशालेत माध्यमिक शिक्षण पूर्ण केले. गोपाळ कृष्ण गोखले कॉलेजमध्ये बीएस्सीचे शिक्षण सुरू असतानाच त्याने स्पर्धा परीक्षांचा अभ्यास सुरू केला. २०१६ मध्ये पोलिस उपनिरीक्षक पदासाठीची महाराष्ट्र लोकसेवा आयोगाकडून जाहिरात प्रसिद्ध झाली. अभ्यासातील सातत्य आणि चिकाटी याच्या जोरावर त्याने पूर्व परीक्षेत १०० पैकी ५४ गुण मिळवले. मुख्य परीक्षेत २०० पैकी १३१, शारीरिक चाचणीत १०० पैकी १००, तर मुलाखतीत ४० पैकी ३० असे एकूण ३१५ गुण मिळवले. उदयच्या यशाने कंदलगावमध्ये आनंदोत्सव साजरा करण्यात आला.

उदयने स्वयंअध्ययनावर भर दिला. सुरुवातीला स्वत:च्या नोट्स तयार केल्या. कठीण वाटणाऱ्या विषयांसाठी अधिक वेळ दिला. सराव परीक्षा आणि उजळणी आणि अवांतर वाचन यामुळे परीक्षेचे सूत्र सापडले. मुख्य परीक्षेसाठी रोज किमान १० ते १२ तास त्याने अभ्यास केला. सर्व घटकांचा अभ्यास व्हावा यासाठी त्याने काटेकोर नियोजन केले. शिक्षकांचे मार्गदर्शन, आई-वडिलांकडून मिळणारी प्रेरणा आणि स्वत:ची जिद्द यामुळे यश मिळवता आल्याची भावना तो व्यक्त करतो.

०००

कोट...

खात्रीशीर आणि प्रतिष्ठेची नोकरी म्हणून मी स्पर्धा परीक्षांचा अभ्यास सुरू केला. पहिल्याच प्रयत्नात राज्यात दुसऱ्या क्रमांकाने यश मिळेल असे अपेक्षित नव्हते. मात्र, पुरेपूर प्रयत्न केल्याने हे यश मिळाले. स्वत:च्या नोट्स काढून ग्रुप डिस्कशनवर भर दिल्याने चांगला अभ्यास झाला आणि यश मिळाले.

उदय पाटील

०००००००००००००

सिंगल फोटो...

वडिलांचे स्वप्न साकारले

आनंद चरापले, राधानगरी

माध्यमिक शिक्षण घेताना वडिलांचे छत्र हरपलेले. घरची परिस्थिती बेताची आणि कुटुंब चालविण्याची जबाबदारीची जाणीव असताना कॉलेज पूर्ण करीत स्पर्धा परीक्षेची तयारी सुरू केली आणि तिसऱ्या वर्षीच यश मिळाले. वडिलांचे स्वप्न साकार केले. अवघ्या चोविसाव्या वर्षी कौलव (ता. राधानगरी) येथील सुप्रिया प्रकाश जाधव हिने पोलिस उपनिरीक्षक परीक्षेत यश मिळवून गावातील पहिली महिला पोलिस उपनिरीक्षक बनण्याचा बहुमान पटकावला.

सुप्रियाच्या वडिलांचे मूळ गाव कौलव पैकी पिंपळवाडी, पण वडील प्रकाश जाधव भोगावती महाविद्यालयात प्राध्यापक होते. घरची चांगली परिस्थिती होती. कौलव येथे दोन मुली आणि एक मुलगा राहत असताना अचानक प्रा. प्रकाश जाधव यांचे निधन झाले आणि सुप्रियाच्या घरावर दुःखाचा डोंगर कोसळला. पूर्ण परिस्थिती ढासळलेली. तरीही न डगमगता सुप्रियाने माध्यमिक शिक्षण बाळासाहेब पाटील-कौलवकर प्रशालेत पूर्ण केले. माध्यमिक शिक्षण घेत असताना विज्ञान प्रदर्शन, साहित्य संमेलन, काव्यवाचन, स्नेहसंमेलन अशा विविध सहशालेय उपक्रमात सहभागी होत व्यक्तिमत्त्व विकसित केले. पुढे भोगावती महाविद्यालयात प्रवेश घेऊन काव्यलेखन, यूथ फेस्टिव्हल छंद जोपासत इंग्रजी विषय घेऊन पदवी प्रथम श्रेणीत संपादन केली. पुढे मास्टर डिग्री पूर्ण करत असताना अधिकारी होण्याचे स्वप्न बाळगत स्पर्धा परीक्षेची तयारी सुरू केली.

कोणतेही कोचिंग क्लास न घेता स्वतःच नोट्स काढून परीक्षेची तयारी सुरू ठेवली. दरम्यान पोलीस उपनिरीक्षक पदासाठी अर्ज भरला आणि पहिल्याच प्रयत्नात यश मिळाले. सुप्रियाने अतिशय खडतर परिस्थितीत मिळवलेले यश ग्रामीण भागातील मुलींना आदर्शवत आहे. आईचे पाठबळ, बाळासाहेब पाटील प्रशालेचे सहकार्य आणि दीपक अतिग्रे यांचे मार्गदर्शन मिळाले. भविष्यात वरिष्ठ अधिकारी बनण्याचा तिने मनोदय व्यक्त केला.

०००

कोट...

मिळालेले यश हे कष्टाचे प्रतीक आहे. घरची परिस्थिती कोलमडली असतानाही लग्न करण्याचा विचार बाजूला ठेवून दररोज दोन तास अभ्यास केला. मुलगा आणि मुलगी असा भेदभाव समाजाने करू नये. स्पर्धा परीक्षेत यश मिळेपर्यंत मानसिक लढाई करणे महत्त्वाचे असते. भविष्यात अधिकारी पदावर कार्यरत राहण्यासाठी प्रयत्नशील राहणार आहे.

सुप्रिया जाधव

००००००००

म. टा. प्रतिनिधी, कोल्हापूर

महाराष्ट्र लोकसेवा आयोगामार्फत घेतलेल्या पोलिस उपनिरीक्षक पदाच्या परीक्षेत जिल्ह्यातील अनेक उमेदवारांनी बाजी मारली. खुल्या गटात उदय विष्णू पाटीलने राज्यात दुसरा, सोनी सदाशिव शेट्टी राज्यात तिसऱ्या क्रमांकाने उत्तीर्ण झाली. एनटी (बी) प्रवर्गात शाहूवाडी तालुक्यातील सरुड येथील राहुल चंद्रकांत आपटे राज्यात प्रथम क्रमांकाने उत्तीर्ण झाला. पूजा कोंडीराम शिंदेने एसटी प्रवर्गात राज्यात पाचवा क्रमांक पटकावला.

शिवाजी विद्यापीठ सेवापूर्व मार्गदर्शन केंद्र

पोलिस उपनिरीक्षक पदाच्या परीक्षेत शिवाजी विद्यापीठातील सेवा पूर्व मार्गदर्शन केंद्रातील विद्यार्थ्यांनी यश मिळवले. या केंद्रातील विद्यार्थी संतोष शिवाजी यादव, प्रमोद बाळासाहेब पाटील आणि समाधान चंद्रकांत केंगार यांची निवड झाली. त्यांना केंद्राचे समन्वयक डॉ. जगन कराडे यांचे मार्गदर्शन लाभले.

नरके फाउंडेशनच्या २१ विद्यार्थ्याची बाजी

येथील अरुण नरके फाउंडेशनच्या २१ विद्यार्थ्यांनी बाजी मारली. यामध्ये उदय पाटील, सोनी शेट्टी, पूजा शिंदे यांच्यासह करवीर तालुक्यातील निखिल मगदूम, नीलम पाटील, पन्हाळा येथील रवींद्र रणभिसे, सुजाता पाटील, स्नेहल चव्हाण, मच्छिंद्रनाथ पाटील, विनायक केसरकर, युनूस इनामदार, सचिदानंद शेलार आदींचा समावेश आहे. प्रमोद पाटील, विशाल यळेकरने यश मिळवले.

विद्या प्रबोधिनीचा राहुल आपटे राज्यात प्रथम

विद्या प्रबोधिनीचा विद्यार्थी राहुल चंद्रकांत आपटे एनटी बी प्रवर्गात राज्यात प्रथम क्रमांकाने उत्तीर्ण झाला. राहुलचे वडील पोलिस दलात कार्यरत आहेत, तर आई मुख्याध्यापिका आहे. त्याने आयपीएस होण्याचे ध्येय निश्चित केले आहे. त्याला विद्या प्रबेधिनीचे अध्यक्ष राहुल चिकोडे, प्रवीण गांगुर्डे, अमित लव्हटे यांचे मार्गदर्शन लाभले.

युनिक अॅकॅडमीच्या १२ विद्यार्थ्यांचे यश

युनिक अॅकॅडमीच्या १२ विद्यार्थ्यांनी यश मिळवले आहे. यामध्ये हणमंत नकाते, स्वप्नाली गायकवाड, रिझवाना काकेरी, अजिंक्य मोरे, विनायक केसरकर, निखिल मगदूम, प्रमोद पाटील, सचिन रेडेकर, समरजित पाटील, प्रशांत जाधव, उमेश कोलगे यांची निवड झाली. त्यांना संस्थेचे संचालक शशिकांत बोराळकर यांचे मार्गदर्शन लाभले.

फोटो आहेत...

शेतकऱ्याचा मुलगा राज्यात दुसरा

कंदलगावच्या उदय पाटीलची परिस्थितीवर मात

म. टा. प्रतिनिधी, कोल्हापूर

महाराष्ट्र लोकसेवा आयोगाच्या वतीने २०१६ मध्ये घेण्यात आलेल्या पोलिस उपनिरीक्षकपदाच्या परीक्षेत कंदलगाव (ता. करवीर) येथील उदय पाटील याने खुल्या गटातून राज्यात दुसरा क्रमांक पटकावला. घरात शैक्षणिक पार्श्वभूमी नसतानाही उदयने जिद्दीने यश खेचून आणले. पहिल्याच प्रयत्नात राज्यात दुसरा क्रमांक पटकावून त्याने स्पर्धा परीक्षांचा अभ्यास करणाऱ्या विद्यार्थ्यांसमोर आदर्श ठेवला आहे.

उदयचे वडील विष्णू पाटील अल्पशिक्षित असून, आई गृहिणी आहे. त्याला दोन बहिणी विवाहित आहेत. कोरडवाहू चार एकर जमिनीतून मिळणाऱ्या उत्पन्नावरच कुटुंबाचा उदरनिर्वाह चालतो. उदयने कंदलगाव विद्यामंदिर शाळेत प्राथमिक शिक्षण घेतले. पाचगावच्या भारती विद्यापीठ प्रशालेत माध्यमिक शिक्षण पूर्ण केले. गोपाळ कृष्ण गोखले कॉलेजमध्ये बीएस्सीचे शिक्षण सुरू असतानाच त्याने स्पर्धा परीक्षांचा अभ्यास सुरू केला. २०१६ मध्ये पोलिस उपनिरीक्षक पदासाठीची महाराष्ट्र लोकसेवा आयोगाकडून जाहिरात प्रसिद्ध झाली. अभ्यासातील सातत्य आणि चिकाटी याच्या जोरावर त्याने पूर्व परीक्षेत १०० पैकी ५४ गुण मिळवले. मुख्य परीक्षेत २०० पैकी १३१, शारीरिक चाचणीत १०० पैकी १००, तर मुलाखतीत ४० पैकी ३० असे एकूण ३१५ गुण मिळवले. उदयच्या यशाने कंदलगावमध्ये आनंदोत्सव साजरा करण्यात आला.

कोट...

खात्रीशीर आणि प्रतिष्ठित नोकरी म्हणून मी स्पर्धा परीक्षांचा अभ्यास सुरू केला होता. पहिल्याच प्रयत्नात राज्यात दुसऱ्या क्रमांकाने यश मिळेल असे अपेक्षित नव्हते. मात्र, पुरेपूर प्रयत्न केल्याने हे यश मिळाले. स्वत:च्या नोट्स काढून ग्रुप डिस्कशनवर भर दिल्याने चांगला अभ्यास झाला आणि यश मिळाले.

उदय पाटील

०००००००००००००

कोल्हापूर स्पर्धा परीक्षेचे केंद्र

४० हून अधिक विद्यार्थ्याचे यश

म. टा. प्रतिनिधी, कोल्हापूर

महाराष्ट्र लोकसेवा आयोगाच्या वतीने २०१६ मध्ये घेण्यात आलेल्या पोलिस उपनिरीक्षकपदाच्या परीक्षेत कोल्हापुरात अभ्यास करणाऱ्या ४० हून अधिक उमेदवारांनी उल्लेखनीय यश मि‌ळवल्याने कोल्हापूर हे स्पर्धा परीक्षांचा अभ्यास करणाऱ्या विद्यार्थ्यांसाठी महत्त्वाचे केंद्र बनत असल्याचे स्पष्ट झाले आहे. यात कोल्हापूरसह सांगली, सातारा, सोलापूर जिल्ह्यातील उमेदवारांचाही समावेश आहे.

पोलिस उपनिरीक्षकपदाच्या ७५० जागांसाठी महाराष्ट्र लोकसेवा आयोगाने मार्च २०१६ मध्ये पूर्वपरीक्षा घेतली होती. जून २०१७ मध्ये मुख्य परीक्षा पार पडली, तर शारीरिक चाचणी आणि मुलाखत ऑक्टोबर २०१७ मध्ये घेतली. बुधवारी रात्री या परीक्षेचा ऑनलाइन निकाल जाहीर झाला. कंदलगावच्या उदय विष्णू पाटील याने ३१५ गुण मिळवून खुल्या गटात राज्यात दुसरा क्रमांक पटकावला. पहिल्या क्रमांकावर औरंगाबादच्या सोमनाथ दौंड याने बाजी मारली.

विशेष यशात कोल्हापूरकरांची आघाडी

कंदलगावच्या उदय पाटीलने खुल्या गटात राज्यात दुसरा क्रमांक पटकावला. एनटीबी प्रवर्गातून पाचगावचा राहुल आपटे राज्यात प्रथम आला, तर अविनाश गवळी (निलजी, ता. गडहिंग्लज) तिसरा आला. जयसिंगपूरची सोनी शेट्टी ही महिला प्रवर्गातून राज्यात तिसरी, तर इचलकरंजीच्या पूजा शिंदेने एसटी प्रवर्गात राज्यात पाचवा क्रमांक पटकावला. विविध प्रवर्गात पहिल्या दहामध्ये येणाऱ्या उमेदवारांची संख्या लक्षणीय आहे.

यशस्वी उमेदवार व कंसात रँक

हरीश पाटील (तेरवाड, ता. शिरोळ, ९), नीलम पाटील (सोनाळी, ता. करवीर, १८), तानाजी आडसूळ (पाचगाव, ता. करवीर, २०), वर्षाली चव्हाण (तळसंदे, ता. हातकणंगले, २९), तेजस्विनी पाटील (मांगेवाडी, ता. राधानगरी, ७१), आफरीन बागवान (तुरंबे, ता. राधानगरी, ९५), सुजाता पाटील (शिराळे तर्फ मलकापूर, ता. शाहूवाडी, ८५), सचिन भिलारी (वाळवेकरवाडी, ता. पन्हाळा, १०४), निखिल मगदूम (हळदी, ता. करवीर, १०५), स्नेहल चव्हाण (कणेरीवाडी, ता. करवीर, १२०), हेमंत पवार (लाटवडे, ता. हातकणंगले, १२१), सुप्रिया जाधव (कौलव, ता. राधानगरी, १३४), विनायक केसरकर (सरळी, ता. आजरा, १४६), सचिन रेडेकर (थेरगाव, ता. शाहूवाडी, १८०), विश्वजित फराकटे (बोरवडे, ता. कागल, १९५), सच्चिदानंद शेलार (मंगळवार पेठ, २५१), नीलेश वाडकर (कसबा बीड, ता. करवीर, २८५), संतोष यादव (कंदलगाव, एससी ५), आदी ४० हून अधिक उमेदवार पोलिस उपनिरीक्षक पदासाठी पात्र ठरले.

००००००००००००

राष्ट्रवादीचे उपहासात्मक

आंदोलन नैराश्यातून

भाजपकडून आंदोलनाचा निषेध

म. टा. प्रतिनिधी, कोल्हापूर

'राष्ट्रवादी काँग्रेसला ग्रामपंचायत, जिल्हा परिषद, महानगरपालिका अशा सर्व निवडणुकांमध्ये दारुण पराभवाला सामोरे जावे लागत आहे. वारंवार होणाऱ्या पराभवातून आलेल्या नैराश्यातून उपहासात्मक आंदोलन करण्याची वेळ आली आहे', अशी टीका भारतीय जनता पक्षाने एका पत्रकाद्वारे केली आहे.

पत्रकात म्हटले आहे, राष्ट्रवादी काँग्रेसच्या वतीने मुख्यमंत्री देवेंद्र फडवणीस यांना मिळालेल्या'आउटस्टँडिंग लीडरशीप इन डेव्हलपमेंट' या पुरस्काराची खिल्ली उडवणारे आंदोलन जिल्हाधिकारी कार्यालयासमोर करण्यात आले . या आंदोलनात एका कार्यकर्त्याला मुख्यमंत्र्याचा पेहराव करण्यात आला होता. बालिशपणाचा कळस गाठणारे आंदोलन करण्यात आले. राष्ट्रवादीची सत्ता गेली असल्याने आणि ती पुन्हा मिळणारच नसल्याचे चित्र दिसून येत असल्याने अशा प्रकारची बाळबोध आंदोलने, वक्तव्ये केली जात आहेत. अगदी टोपीपासून पगडी पागोट्यांचे राजकारण करण्यात येत आहेत. फडणवीस सरकारची गेल्या साडेतीन वर्षांतील वाटचाल भरभक्कम आणि विकासात्मक आहे. सरकारकडून शेतकऱ्यांसह सर्व घटकांसाठीचा सर्वसमावेशक अजेंडा राबवण्यात येत आहे. त्यामुळे जिल्ह्यातील राष्ट्रवादीच्या नेत्यांचे पाय लटपटू लागले असून विचलित झालेल्यांकडून पालकमंत्र्यांवर सुद्धा विनाकारण टीकास्त्र सोडले जात आहे. राष्ट्रवादीला सर्वच ठिकाणी पराभवाला सामोरे जावे लागत आहे. ग्रामपंचायत, जि.प., महानगरपालिका अशा सर्व निवडणुकांमध्ये दारुण पराभव होत आहे. अशा वारंवार होणाऱ्या पराभवामुळे नैराश्य येऊन अशा पद्धतीची उपहासात्मक आंदोलन करण्याची वेळ त्यांच्यावर आली आहे. शेतकऱ्यांना कर्जमाफी केल्याने शेतकऱ्यांच्या आत्महत्या थांबल्या आहेत. दुधाला दर वाढवून मिळला आहे. शेतीमालाला योग्य हमीभाव मिळत आहे. शेतकऱ्यांना अनेक प्रकारच्या योजनांचा लाभ होत आहे. ग्रामीण भागात मोठ्या प्रमाणात उज्वला योजनेच्या माध्यमातून स्वयंपाकाचा गॅस घरोघरी पोहचला आहे. दुष्काळ निवारणासाठी विशेष प्रयत्न केले जात आहेत. मुद्यांवर न बोलता स्वच्छ कारभार करणाऱ्या सरकारच्या विरोधात फक्त राजकीय हेतूने प्रेरित होऊन आरोप करणे म्हणजे बाळबोधपणाचे लक्षण आहे. पक्षीय कार्यक्रम नाही, कोणत्याही प्रकारचे व्हिजन नसल्याने किरकोळ संघटनेसारखी केवळ बालिश आणि सुमार आंदोलने करण्याची वेळ राष्ट्रवादीवर आली आहे.'

म. टा. प्रतिनिधी, कोल्हापूर

राजर्षी शाहू महाराज यांच्या जयंतीनिमित्त प्रत्येक वर्षी जिल्हा परिषद सदस्य, कर्मचाऱ्यांची निवड राजर्षी शाहू पुरस्कारासाठी केली जाते. सदस्यांची नावे निवडीसाठी गुरूवारी अध्यक्षा शौमिका महाडिक यांच्या अध्यक्षतेखाली बैठक झाली. बैठकीत सत्तेतील आणि विरोधी पक्षातील सदस्यांना पुरस्कार विषय देण्याचा विषय चर्चेत आला. त्यामुळे यावर्षी पाच ऐवजी सहा सदस्यांना पुरस्कार देण्याचा निर्णय झाला. परिणामी यंदाही कामगिरीपेक्षा पक्षनिहाय सदस्यांची नावे पुरस्कारासाठी निवडण्याला प्राधान्य दिले जाण्याची शक्यता आहे. अधिकृतपणे पुरस्काराची घोषणा सोमवारी करण्याची शक्यता आहे.

सामाजिक, राजकीय, सांस्कृतिक क्षेत्रात उल्लेखनिय कामगिरीची दखल घेत सदस्यांना राजर्षी शाहू महाराज पुरस्कार दिला जातो. यासाठी पाच सदस्यांची निवड केली जाते. मात्र यंदा भाजप, शिवसेना प्रत्येकी दोन, राष्ट्रवादी, काँग्रेस पक्षास प्रत्येकी एक अशी राजकीय वाटणी करीत सदस्यांची निवड केली जाणार आहे. यामुळे या पक्षाशिवाय चांगली कामगिरी करणाऱ्या सदस्यांना पुरस्कारापासून वंचित राहावे लागण्याची शक्यता आहे. पुरस्कारासाठी प्रस्ताव दिलेले सदस्य आपल्यालाच पुरस्कार मिळावा, यासाठी जोरदार मोर्चेबांधणी करीत आहेत. पहिल्या बैठकीत पुरस्कारासाठीच्या नावावर एकमत झाले नाही. त्यामुळे आज, शुक्रवारी अध्यक्ष, उपाध्यक्षासह पदाधिकाऱ्यांच्या बैठकांच्या फेऱ्या होणार आहेत.

\B

प्रस्तावासाठी मुदतवाढ\B

जिल्हास्तरावर जि. प. तर्फे पत्रकारासाठी एक पुरस्कार देण्यात येणार आहे. त्यासाठी एकच प्रस्ताव आला आहे. बैठकीत पत्रकार पुरस्कार निवडीचा विषय आला. त्यावेळी केवळ चांगल्या, सकारात्मक बातम्या देणाऱ्याचा विचार व्हावा, असा विषय चर्चेला आला. त्यावर काही सदस्यांनी जोरदार आक्षेप घेतला. प्रस्तावासाठी मुदतवाढ देण्याची मागणी केली. यामुळे मुदतवाढ देण्यात आली.

मटा इम्पॅक्ट ... लोगो

..........

म. टा. प्रतिनिधी, कोल्हापूर

सोयीच्या ठिकाणी बदलीसाठी चुकीची माहिती भरून आणि बनावट कागदपत्रे बदली पोर्टलवर अपलोड करून लबाडी केलेल्या ३७ गुरूजींना मुख्य कार्यकारी अधिकारी डॉ. कुणाल खेमनार यांनी कारणे दाखवा नोटीस बजावली आहे. दुर्गम भागात उचलबांगडी होऊ नये, तसेच सोयीची शाळा मिळण्यासाठी जिल्ह्यातील गुरूजींनी कशी लबाडी केली आहे, त्यासंबंधीचे सविस्तर वृत्त महाराष्ट्र टाइम्समध्ये गुरूवारी प्रसिध्द झाले होते. त्याची प्रशासनाने तातडीने दखल घेतली. लबाडी केलेल्या ३७ गुरूजींना कारणे दाखवा नोटीस देऊन शिस्तभंगाची कारवाई प्रस्तावित केली.

ऑनलाइन बदली प्रक्रियेमुळे वशिल्याने वर्षानुवर्षे एकाच ठिकाणी काम करणाऱ्या शिक्षकांची बदली झाली. मात्र ऑनलाइन व्यवस्थेची दिशाभूल करून खोटी माहिती भरून काही गुरूजींनी चुकीची माहिती अपलोड केली. यामुळे सोयीच्या ठिकाणी बदलीस पात्र गुरूजींवर अन्याय झाला. त्यामुळे लबाडी केलेल्या गुरूजींना शोधण्यासाठी प्रशासन मोहिम राबवत आहे. दरम्यान, 'प्राथमिक शिक्षण प्रशासनाने पहिल्या टप्प्यात राबविलेल्या मोहिमेत सापडलेल्या ३७ गुरूजींना नोटीस दिली आहे. सर्व तालुक्यातील लबाड गुरूजींना शोधण्यासाठी गटविकास अधिकाऱ्यांच्या अध्यक्षतेखाली समिती कार्यरत केली आहे', अशी माहिती सामान्य प्रशासन विभागाचे उपमुख्य कार्यकारी अधिकारी रविंद्र आडसुळ यांनी दिली.

-------------------------

'कृषी'च्या पेपरफुटीची

चौकशी सुरू

म. टा. प्रतिनिधी, कोल्हापूर

कृषी महाविद्यालयाच्या परीक्षेदरम्यान दोन मे रोजी पेपर फुटला होता. परीक्षा हॉलमध्ये हातात आलेला पेपर यापूर्वीच व्हॉट्सअॅपवर आल्याचे काही विद्यार्थिनींनी प्राध्यापकांच्या निदर्शनास आणून दिले. असाच प्रकार राज्यात अन्य ठिकाणीही झाला होता. याबाबत कॉलेज प्रशासनाने राजारामपुरी पोलिस ठाण्यात तक्रार दिली होती. या तक्रारीची चौकशी सुरू झाली असून, गुरुवारी (ता. २१) सहायक पोलिस निरीक्षक गजेंद्र लोहार यांनी आठ ते दहा विद्यार्थिनींचे जबाब नोंदवले. धुळे, पुणे, लातूर, आदी ठिकाणी असाच प्रकार घडल्याने पेपर फुटीचा गुन्हा दाखल झाला आहे. कोल्हापुरातील विद्यार्थ्यांकडून याची माहिती घेतली जात असून, राज्यातील सर्व गुन्हे एकत्र करून तपास केला जाणार आहे, अशी माहिती लोहार यांनी दिली.

म. टा. प्रतिनिधी, कोल्हापूर

गगनबावडा तालुक्यातील निवडे येथे महावितरणच्या उपकेंद्रासमोर छोटा हत्ती टेम्पो उलटून झाल्याने अपघातात सहाजण जखमी झाले. यात पाच वयोवृद्ध महिलांचा समावेश आहे. गुरुवारी दुपारी तीनच्या सुमास अपघात झाला. जखमींना निवडे प्राथमिक आरोग्य केंद्राच्या रुग्णवाहिकेतून सीपीआरमध्ये उपचारासाठी दाखल केले.

इंदुबाई गोविंद पाटील (वय ५५), मंगल दत्तात्रय पाटील (५५), इंद्रबाई बापू पाटील (५०), पार्वती शंकर पाटील (४५), चंद्राबाई सीताराम जाधव (४५), मारुती सत्तू माळवी (४०, सर्व रा. म्हाळुंगे, ता. गगनबावडा) अशी जखमींची नावे आहेत. हे सर्वजण कोदे येथील नातेवाइकाच्या दिवसकार्यासाठी गेले होते. दिवसकार्य उरकून दुपारी साळवणमार्गे परत येत होते. निवडे गावाजवळ आले असता टेम्पोचा टायर फुटल्याने टेम्पो उलटला. टेम्पोत असणाऱ्या पाच महिला, तर एक पुरुष असे सहाजण जखमी झाले. अपघाताची नोंद सीपीआर पोलिस चौकीत करण्यात आली.