१५ पोलिस निरीक्षकांसह ३० अधिकाऱ्यांच्या बदल्या

एलसीबी तानाजी सावंत यांच्याकडे

दोन उपअधीक्षकांच्याही बदल्यांचे आदेश

म. टा. प्रतिनिधी, कोल्हापूर

जिल्ह्यातील १५ पोलिस निरीक्षकांसह ३० अधिकाऱ्यांच्या बदल्यांचे आदेश पोलिस अधीक्षक संजय मोहिते यांनी शुक्रवारी (ता. ८) रात्री काढले. याशिवाय इचलकरंजीचे उपअधीक्षक विनायक नरळे यांची बृह्नमुंबई, तर गडहिंग्लज उपविभागाचे उपअधीक्षक रमेश पाटील यांची नाशिक पोलिस आयुक्तालयात बदली झाली. अनिल कदम आणि धीरज पाटील यांची कोल्हापुरात बदली झाली आहे.

पोलिस निरीक्षक व नियुक्तीचे ठिकाण

औदुंबर पाटील (नियंत्रण कक्ष ते राजारामपुरी), अनिल गुजर (जुना राजवाडा ते शहर वाहतूक शाखा), तानाजी सावंत (लक्ष्मीपुरी ते स्थानिक गुन्हे अन्वेषण शाखा), दिलीप जाधव (करवीर ते लक्ष्मीपुरी), सुनील पाटील (आजरा ते करवीर), श्रीप्रसाद यादव (चंदगड, नव्याने हजर), मनोहर रानमळे (इचलकरंजी ते शाहूवाडी), प्रवीण चौगुले (सायबर ते शिरोळ), उदय डुबल (नियंत्रण कक्ष ते भुदरगड), सीताराम डुबल (नियंत्रण कक्ष ते हातकणंगले), अशोक पवार (नियंत्रण कक्ष ते पेठवडगाव), यशवंत गवारी (पेठवडगाव ते मानव संशोधन), सदीप भागवत (गगनबावडा ते आजरा), श्रीकृष्ण कटकधौंड (पासपोर्ट, नव्याने हजर), अंबरुषी फडतरे (सायबर - नव्याने हजर)

सहायक पोलिस निरीक्षक

शहाजी निकम (राजारामपुरी ते जयसिंगपूर), संजय हारुगडे (शिवाजीनगर ते शहापूर), संजीवकुमार झाडे (शहापूर ते कोडोली), मंगेश देसाई (कळे ते कुरुंदवाड), रवींद्र कदम (आर्थिक गुन्हे शाखा ते कळे), विठ्ठल दराडे (राजवाजडा ते मुरगूड), तृप्ती देशमुख (शाहूपुरी ते इस्पुर्ली), प्रज्ञा देशमुख (शहापूर ते महिला कक्ष), बाजीराव सूर्यवंशी (शहर वाहतूक शाखा ते गगनबावडा), कुमार कदम (कुरुंदवाड ते आर्थिक गुन्हे शाखा), समीर गायकवाड (शिरोळ ते पोलिस अधीक्षक यांचे वाचक), प्रियांका शेळके (महिला कक्ष ते एएचटीयू), भालचंद्र देशमुख (शाहूपुरी), किरण भोसले (जुना राजवाडा), स्वप्निल लोखंडे (शिवाजीनगर)

जुना राजवाडा आणि कागल येथे बाहेरच्या जिल्ह्यातून येणाऱ्या अधिकाऱ्यांची नियुक्ती केली जाणार आहे. बदली झालेल्या अधिकाऱ्यांना पोलिस अधीक्षकांची परवानगी घेऊन बदलीच्या ठिकाणी हजर होण्याचे आदेश देण्यात आले आहेत.

जिल्ह्यात तीन उपअधीक्षक

अनिल कदम यांची पुणे ते गडहिंग्लज, धरज पाटील यांची मिरज ते इचलकरंजी यासह राजन कुलथे यांची सातारा ते नागरी संरक्षण हक्क या विभागात उपअधीक्षक पदी बदली झाली आहे. इचलकरंजीचे विनायक नरळे यांची बृह्नमुंबई येथे, तर गडहिंग्लजचे रमेश पाटील यांची नाशिक येथे बदली झाली.

करवीर तहसीलदार दीघेंची वर्ध्याला बढती

म. टा. प्रतिनिधी, कोल्हापूर

करवीर तहसीलदार उत्तम दिघे यांची उपजिल्हाधिकारीपदी बढती झाली असून त्यांची नियुक्ती वर्धा जिल्हाधिकारी कार्यालयात रोजगार हमी उपजिल्हाधिकारी पदी झाली आहे. भैरप्पा रामू माळी यांची कोल्हापुरात रोजगार हमी योजना उपजिल्हाधिकारीपदी नियुक्ती केली आहे. गेले वर्षभर हे पद रिक्त होते. नागेश पाटील यांची सांगली जिल्ह्यातील वाळवा प्रांताधिकारीपदी तर मोहिनी चव्हाण यांची भूसंपादन उप जिल्हाधिकारीपदी तर सांगली महसूल उपजिल्हाधिकारीपदी विजया जाधव यांची नियुक्ती झाली.

आत्मदहनाचा इशारा

कोल्हापूर : सलग २५ दिवस जिल्हाधिकारी कार्यालयासमोर विविध मागण्यांसाठी धरणे धरणाऱ्या भूविकास बँकेच्या निवृत्त कर्मचाऱ्यांनी पालकमंत्री चंद्रकांत पाटील यांच्या निवासस्थानासमोर रविवारी (ता.१०) सकाळी साडेदहा वाजता आत्मदहन करण्याचा इशारा दिला आहे. इशाऱ्यानंतर शहर पोलिस अधीक्षक डॉ. प्रशांत अमृतकर यांच्यावर प्रतिबंधात्मक कारवाई केली आहे.

फोटो आहे

म. टा. प्रतिनिधी, कोल्हापूर

पानसरे स्मृती ट्रस्टतर्फे विद्यार्थी आणि युवक कार्यकर्त्यांच्या राज्यव्यापी सात दिवसांचे शिबिर पन्हाळा येथे झाले. नगराध्यक्ष रूपाली धडेल यांच्या हस्ते रोपाला पाणी घालून शिबिराचे उद्घाटन झाले. अध्यक्षस्थानी उमा पानसरे होत्या.

यावेळी पानसरे म्हणाल्या, 'माणूस मारता येतो, मात्र त्याचे विचार कधीही मारता येत नाहीत. सामाजिक समता, विवेकवादाचा विचार युवक आणि युवती निश्चितच पुढे नेणार आहेत.' भाकपचे जिल्हा सेक्रेटरी सतीश कांबळे म्हणाले, 'ज्येष्ठ विचारवंत गोविंदराव पानसरेंच्या खुनानंतर त्यांचे कार्य अव्याहतपणे सुरू राहण्यासाठी पानसरे स्मृती ट्रस्टची स्थापना करण्यात आली. या ट्रस्टतर्फे दरवर्षी शिबिराचे आयोजन केले जात आहे. सात दिवसांचे हे शिबिर आहे. पानसरेंचे खूनी सापडत नसल्याने सरकारचा धिक्कार केला पाहिजे.'

शिबिरात मार्क्सवादी तत्वज्ञान, राजकीय अर्थशास्त्र, प्रसारमाध्यमांचे बदलते स्वरुप आणि परिवर्तनवादी चळवळी, कामगार चळवळी समोरील आव्हाने, महात्मा फुले आणि सत्यशोधक परंपरा, सांस्कृतिक दहशतवाद, भारतातील राजकीय पक्ष, जात आणि वर्ग, महिलांची चळवळ, आरक्षण, डॉ. बाबासाहेब आंबेडकरांचे आर्थिक विचार आदी २५ विषयांवर विविध वक्त्यांनी मार्गदर्शन केले. यावेळी स्मिता पानसरे, रवींद्र धडेल, रघुनाथ कांबळे, रत्नाकर तोरसे, बी. एल. बरगे, राम बाहेती, डॉ. युगल रायलू, स्नेहल कांबळे, धीरज काठारे, आरती रेडेकर, बन्सी सातपुते, सुभाष लांडे, दिलदार मुजावर, इरशाद फरास, अमोल पांढरे, रमेश वडणगेकर, बाबा ढेरे, सुशील शिंदे, शिवप्रसाद शेवाळे, अतुल कवाळे आदी उपस्थित होते. ऑल इंडिया स्टुंडंटस् फेडरेशनचे अध्यक्ष प्रशांत आंबी यांनी प्रास्ताविक केले. नामदेव गावडे यांनी आभार मानले.

स्वच्छतेचा जागर, प्लास्टिकला 'नो एन्ट्री'

म. टा. प्रतिनिधी, कोल्हापूर

पर्यावरण दिनाचे औचित्य साधून रॅली, व्याख्यानाच्या माध्यमातून शहरात स्वच्छतेचा जागर करण्यात आला. शाळकरी मुलांनी, रिक्षा, बसवर 'अहो ताई, प्लास्टिक पिशवी सोबत असेल तर एन्ट्री नाय' या आशयाचे स्टीकर्स लावले. प्रदूषणामुळे होणाऱ्या पर्यावरणाच्या हानीची जाणीव करुन दिली. तसेच पर्यावरण रक्षणाची शपथ दिली.

प्रदूषण नियंत्रण मंडळ कोल्हापूर कार्यालयामार्फत पर्यावरणदिनानिमित्त रॅली काढण्यात आली. लहान मुलांच्या स्केटिंगचे आयोजन केले. प्रादेशिक अधिकारी नागेश लोहळकर व उपप्रादेशिक अधिकारी प्रशांत गायकवाड यांनी हिरवा झेंडा दाखवून रॅलीस प्रारंभ झाला. यामध्ये अॅमॅच्युअर कोल्हापूर डिस्ट्रिक्ट रोलर स्केटिंग असोसिएशनच्या खेळाडूंचा समावेश होता. उद्योग भवनपासून शिवाजी चौकपर्यंत रॅली निघाली. रॅलीसाठी प्रा. महेश कदम यांचे सहकार्य लाभले.

छत्रपती शिवाजी चौक येथे रिक्षा चालकांना एकत्र करुन प्लास्टिकचे प्रदूषण रोखण्यासाठी आवाहन केले. प्रत्येक रिक्षावर 'अहो ताई, ए भाऊ...प्लास्टिक पिशवी सोबत असेल तर एन्ट्री नाही'असे स्टीकर्स लावले. तसेच बसवरही पर्यावरण जागृतीचे स्टीकर्स लावले. कार्यक्रमास जिल्हा पर्यावरण समितीचे सदस्य अनिल चौगुले, कॉमन मॅन संघटनेचे बाबा इंदूलकर, प्रजासत्ताक सामाजिक सेवा संस्थेचे दिलीप देसाई आदी उपस्थित होते.

..............

एकटीतर्फे कचरा वर्गीकरण मोहीम

एकटी संस्थेमार्फत मध्यवर्ती बस स्थानक परिसरात ओला व सुका कचरा संकलन मोहिमेचे उद्घाटन झाले. या परिसरात हातगाडीवाले, फेरीवाले, लहानसहान व्यावसायिकांकडून कचरा संकलन करण्यात येत आहे. स्थायी समिती सभापती आशिष ढवळे यांच्या हस्ते मोहिमेचे उद्घाटन झाले. याप्रसंगी अवनि संस्थेचे समन्वयक जैनुद्दीन पन्हाळकर, मनीषा पोटे, सविता कांबळे, वनिता कांबळे, राहूल संकपाळ आदी उपस्थित होते.

...............

महापालिकेतर्फे वृक्षारोपण

महापालिकेतर्फे शहरात विविध ठिकाणी वृक्षारोपण करण्यात आले. यामध्ये कळंबा फिल्टर हाऊस, तुळजाभवानी कॉलनी, फुलेवाडीत वृक्षारोपणाचा कार्यक्रम झाला. कळंबा फिल्टर हाऊस येथे आयुक्त डॉ. अभिजित चौधरी व नगरसेविका वृषाली कदम, नगरसेविका इंदुमती माने यांच्या हस्ते वृक्षारोपण झाले. याप्रसंगी सभागृहनेता दिलीप पोवार, शहर अभियंता नेत्रदीप सरनोबत, पर्यावरण अधिकारी समीर व्याघ्रांबरे, उद्यान अधीक्षक मधुकर डोंगरे, दुर्वास कदम, ॠग्वेदा माने, प्रकल्प शाखेचे कनिष्ठ अभियंता अनुराधा वांडरे, डॉ. सतीश इंगवले आदी उपस्थित होते.

लोगो: साहित्य संस्कृती

Appasaheb.mali@timsgroup.com

Tweet:@Appasaheb_MT

कोल्हापूर : विभागीय साहित्य संमेलन असो की मोठी साहित्य संमेलने, त्या व्यासपीठावर नवोदित कवींना स्थान मिळत नाही. कविता सादर करण्यासाठी धडपड करावी लागते. यामुळे उद्योन्मुख कवींच्या कविता समाजासमोर येत नाहीत. साहित्य संमेलनातून कविता सादर करण्याची संधी दवडते. नवोदितांची नेमकी हीच अडचण हेरुन त्यांच्या काव्यगुणांना प्रोत्साहित करण्यासाठी 'कविमित्र'ही संकल्पना साकारली आहे. दर महिन्याच्या चौथ्या रविवारी नवोदित कवींचे काव्य वाचनाचा कार्यक्रम आयोजित केला जातो.

या काव्य वाचनाच्या कार्यकमाचे आणखी एक वैशिष्ट्य आहे. या संमेलनाला कुणी अध्यक्ष नसतो. व्यासपीठावर पाहुण्यांची भाऊगर्दी नाही. दीपप्रज्वलन, फीत कापणे अशी उद्घाटनाची पारंपरिक पद्धत नसते. कवींनी व्यासपीठासमोर यायचे आणि कविता सादर करायची. कविता सादरीकणानंतर त्याचे विश्लेषण असे कार्यक्रमाचे स्वरुप आहे. या अनोख्या काव्य संमेलनाची संकल्पना हुपरी येथील ६३ वर्षीय कवी सुरेश जयेंद्र पाटील यांनी मूर्त रुपात आणली आहे. एप्रिल आणि मे महिन्यात आयोजित काव्य संमेलनात अनुक्रमे २८ व ३३ कवींनी सहभाग घेतला.

सुरेश पाटील हे मूळचे कागल येथील आहेत. १९८५ पासून ते हुपरी येथे वास्तव्यास आहेत. कापड व्यापारी म्हणून त्यांची ओळख आहे. कापड व्यवसाय मुलांकडे सोपविला आहे. सुरेश पाटील यांना वाचन, लिखाणाची आवड आहे. गेल्या वीस वर्षांपासून ते कविता करतात. त्यांनी सामाजिक विषयावर १०० हून अधिक कविता केल्या आहेत. मात्र मोठ्या साहित्य संमेलनात नवोदित कवींना कविता सादर करण्याची संधी मिळत नाही हे लक्षात आल्यानंतर त्यांनी नवोदितांसाठी 'कविमित्र'ही संकल्पना अंमलात आणण्याचा निर्णय घेतला. www.kavimitra.com या नावांनी वेबसाइट सुरू केली.

नवोदित कवीसाठी दर महिन्याच्या चौथ्या रविवारी काव्य वाचनाचा कार्यक्रम आयोजित केला जातो. एप्रिल महिन्यातील कार्यक्रमाला २८ तर मे महिन्यात ३३ नवोदित कवींनी सहभाग घेतला. कोल्हापूर, कुरुंदवाड, जयसिंगपूर, गारगोटी अशा विविध ठिकाणाहून कवी सामील झाले. सुरेश पाटील यांनी कविमित्र या नावांनी व्हॉटसअप ग्रुप तयार केला आहे. दर महिन्याच्या तिसऱ्या रविवारपर्यंत नवोदितांनी नोंदणी करायची आणि चौथ्या रविवारी कविता वाचनाचा कार्यक्रम होतो. 'कविमित्र'चे व्यासपीठ हे नवोदित कवींसाठी हक्काचे बनले आहे. 'कविमित्र'साठी सभासद योजना राबवली आहे. या वर्षी दर महिन्याला होणारा कविता वाचनाचा कार्यक्रम शाहू स्मारक भवन, मिनी हॉल येथे होणार आहेत. पुढील वर्षी इचलकरंजी व अन्य ठिकाणी कार्यक्रम होतील, असे संयोजकांनी सांगितले. कवींचे हे अनोखे व्यासपीठ नवोदितांचे आकर्षण ठरले आहे.

........................

दर महिन्यात होणाऱ्या कविता वाचनाच्या कार्यक्रमावेळी परीक्षण होते. चार ते पाच उत्कृष्ट कविता निवडल्या जातात. प्रत्येक महिन्यातील उत्कृष्ट ठरलेल्या कविता संकलित करुन वर्षभरानंतर कविता संग्रह प्रकाशित करण्याचा मानस आहे. शिवाय वर्षभरानंतर नवोदितांचे मोठ्या स्वरुपात कवी संमेलन भरविण्याचा विचार आहे.

सुरेश पाटील,

हुपरी 'कविमित्र'चे संयोजक

कोल्हापूर : देवदासींना संजय गांधी निराधार व श्रावणबाळ निवृत्ती वेतनाचे लाभ मिळण्यासाठी सरकारकडे शिफारस करण्याचा निर्णय उपजिल्हाधिकारी कार्यालयातील बैठकीत घेण्यात आला. महसूल उपजिल्हाधिकारी अरविंद लाटकर यांच्या अध्यक्षतेखाली बैठक झाली. २००७ पासून देवदासींना ७०० रुपये निवृत्तीवेतन मिळते. पण देवदासी प्रथा नष्ट करण्याचा निर्णय सरकारने घेतला आहे. या निर्णयामुळे अनेक देवदासी निवृत्तीवेतनापासून वंचित राहिल्या आहेत, असे नेहरु युवा देवदासी विकास मंडळाचे अशोक भंडारे व मायादेवी भंडारे यांनी सांगितले. बैठकीला नायब तहसीलदार दिलीप सावंत, जिल्हा परिवेक्षा अधिकारी बी. जी. काटकर, योगेश गवळी, पंकज भंडारे, मानसिंग माने, दिलीप आवळे, रेखा वडर, अरुणा पाटील, सुनंदा चव्हाण आदी उपस्थित होत्या.

म. टा. प्रतिनिधी, कोल्हापूर

शहरातील विविध संस्था, संघटनांतर्फे शिवराज्याभिषेक दिन विविध कार्यक्रमांनी साजरा करण्यात आला. येथील राजर्षी शाहू गव्हमेंट सर्व्हंटस को- ऑपरेटिव्ह बँकेत छत्रपती शिवाजी महाराज यांचा राज्याभिषेक सोहळा झाला. बँकेचे अध्यक्ष रवींद्र पंदारे, उपाध्यक्ष राजेंद्र पाटील यांच्यासह संचालकांच्या हस्ते छत्रपती शिवाजी महाराज यांच्या प्रतिमेस पुष्पहार अर्पण केले. यावेळी शशिकांत तिवले, प्रकाश पाटील, राजेंद्र चव्हाण, भरत पाटील, अतुल जाधव, रमेश घाटगे आदी उपस्थित होते.

हिंदू एकता आंदोलनतर्फे मिरजकर तिकटी येथे शिवराज्याभिषेक सोहळा आयोजित केला होता. मराठा महासंघाचे अध्यक्ष वसंतराव मुळीक यांच्या हस्ते शिवप्रतिमेचे पूजन झाले. चंद्रकांत बराले, लाला गायकवाड, जयदीप शेळके, सुनील गायकवाड, किशोर घाटगे, दीपक मगदूम आदी उपस्थित होते.

जिल्हाधिकारी कार्यालयासमोर ठिय्या आंदोलन करीत असलेले भू विकास बँकेच्या सेवानिवृत्त कर्मचाऱ्यांनीही शिवराज्याभिषेक सोहळा साजरा केला. छत्रपती शिवाजी महाराजांच्या पुतळ्याचे पूजन करण्यात आले. त्यानंतर आंदोलन सुरू केले. त्यामध्ये पालकमंत्री चंद्रकांत पाटील यांच्या निषेधाच्या घोषणा देण्यात आल्या. यावेळी एच. डी. जमादार, सुरेश पाटील, पी. वाय. शिंदे, एस. ए. पाटील, व्ही. वाय. पाटील आदी उपस्थित होते.

म. टा. प्रतिनिधी, कोल्हापूर

हिंदू एकता आंदोलनाचे शिलेदार प्रा. विजय गणेश कुलकर्णी यांच्या प्रथम स्मृतिदिनानिमित्त आज (ता. ९) विविध कार्यक्रमाचे आयोजन केले आहे. राजलक्ष्मीनगर विश्वस्त मंडळ, हिंदू ऐकता मंडळातर्फे राजलक्ष्मीनगरात कार्यक्रम होतील, अशी माहिती विश्वस्त मंडळाचे अध्यक्ष शामराव चौगुले, हिंदू एकताचे चंद्रकांत बराले, हिंदुराव शेळके, लाला गायकवाड यांनी पत्रकार परिषदेत दिली.

ते म्हणाले, प्रा. कुलकर्णी गोखले कॉलेजमध्ये प्राध्यापक होते. हिंदू ऐकता संघटनेच्या माध्यमातून ते समाज कार्यात सक्रिय राहिले. पाणी, मीटर प्रश्न आणि चांगल्या रस्त्यासाठी संघर्ष केला. विकास कामांना निधी मिळविला. ९ जून २०१७ रोजी त्यांचा मृत्यू झाला. त्यांच्या प्रथम स्मृतिदिनानिमित्त राजलक्ष्मीनगरात विविध कार्यक्रम होतील. आर. के. नगरातील वृद्धाश्रमात फळे वाटप केले जाईल. चांगली कामगिरी करणाऱ्यांचा सत्कार करण्यात येणार आहे. त्यासाठी महापौर शोभा बोंद्रे, उपमहापौर महेश सावंत, नगरसेविका दीपा मगदूम यांना निमंत्रित केले आहे.

फोटो..

ज्ञानदेव मोरे

पन्हाळा : मोहरे (ता. पन्हाळा) येथील ज्ञानदेव अर्जुन मोरे (वय ६३) यांचे अल्पशा आजाराने निधन झाले. सरस्वती शिक्षण प्रसारक मंडळाचे संचालक व जिल्हा परिषद सदस्य शिवाजी मोरे यांचे ते चुलत बंधू होते. रक्षाविसर्जन शनिवारी (ता.९) मोहरे येथे सकाळी १० वाजता आहे.

फोटो आहे.

म. टा. प्रतिनिधी, कोल्हापूर

वडील शिरोली एमआयडीसीत एका खासगी कंपनीत नोकरीला. घरची परिस्थिती बेताची असतानाही पुलाची शिरोली येथील अभिजित जोतिराम ठमके याने दहावीच्या परीक्षेत ९७. ६० टक्के गुण मिळवून झेंडा लावला.

जोतिरामचे गाव हातकणंगले तालुक्यातील पुलाची शिरोली. कुटुंबाला उदरनिर्वाहाचे कोणतेही साधन नसल्याने कंपनीत मिळणाऱ्या पगारावर ते चरितार्थ चालवतात. मुलगा अभिजित पहिल्यापासूनच शाळेत हुशार असल्याने त्याला येथील वालावलकर हायस्कूलमध्ये प्रवेश घेतला. दहावीत दाखल झाल्यानंतर सुरुवातीपासून त्याने नियोजनबद्ध अभ्यास केला. शाळेत दिलेला अभ्यासक्रम वेळच्यावेळी पूर्ण करून उजळणी, वाचन, चिंतनावर अधिक भर दिला. पहाटे लवकर उठून आणि रात्री उशिरापर्यंत त्याने अभ्यास केला. अभ्यासात सातत्य ठेवल्याने वर्षभरात घेतलेल्या सर्वच चाचणी परीक्षेत चांगले गुण मिळविले. कुटुंब सर्वसामान्य असल्याने वर्गातील श्रीमंत मुलांप्रमाणे चैनी न करता परिस्थितीची जाणीव ठेवत त्याने अभ्यास केला. चांगले करिअर करण्यासाठी सर्व अडचणी, प्रतिकूल परिस्थिवर मात करीत त्याने यश मिळविल्यामुळे कुटुंबात आनंदाचे वातावरण आहे. पुढे कोणता अभ्यासक्रम निवडायचा त्यासंबंधी अजून वडील जोतिराम यांनी अंतिम निर्णय घेतलेला नाही. तज्ज्ञांचे मार्गदर्शन घेऊन पुढील शिक्षणासंबंधी निर्णय घेणार असल्याचे त्याने सांगितले.

गावापासून शाळेपर्यंत रोज बसने ये-जा करत असे. दहावीसाठी कोणताही खासगी क्लास लावला नाही. शाळेतील शिक्षकांचे मार्गदर्शन आणि घरी नियमित अभ्यास केला. शाळेतून घरी आल्यानंतर रोज संध्याकाळी ६ ते ९ या वेळेत आणि पहाटे चार उठून अभ्यास केला. पुढे विज्ञान शाखेला प्रवेश घेण्याची इच्छा आहे. तज्ज्ञांचा सल्ला घेऊन पुढील अभ्यासक्रमांची निवड करणार आहे.

अभिजित ठमके

कागल पं.स.चे माजी सभापती

श्रीकांत लोहार यांचे निधन

म. टा. वृत्तसेवा, कागल

मौजे सांगाव (ता. कागल) येथील कागल पंचायत समितीचे माजी सभापती पैलवान श्रीकांत ऊर्फ पिंटू लोहार (वय ४२) यांचे हृदयविकाराच्या तीव्र धक्क्याने शुक्रवारी निधन झाले. त्यांना ५ मे रोजी कोल्हापुरातील खासगी रुग्णालयात दाखल केले होते. मात्र, उपचारादरम्यान त्यांचा शुक्रवारी मृत्यू झाला. कोणतीही राजकीय पार्श्वभूमी नसताना प्रतिकूल परिस्थितीवर मात करत त्यांनी कुस्ती क्षेत्रात प्रावीण्य मिळविले होते. प्रंचड जनसंपर्काच्या जोरावर ग्रामपंचायत सदस्य ते पंचायत समितीचे सभापती अशी त्यांनी झेप घेतली होती. लोहार यांनी कुस्ती, कबड्डीसह क्रीडाक्षेत्राला प्रोत्साहन दिले. सायंकाळी गावातील मुख्य मार्गावरून अंत्यंयात्रा काढण्यात आली. अंत्ययात्रेत सिंधुदुर्ग जि.प.चे माजी अध्यक्ष गोट्या सांवत, शेतकरी संघाचे अध्यक्ष युवराज पाटील, माजी आमदार संजय घाटगे, कृषी उत्पन्न बाजार समितीचे सभापती कृष्णात पाटील, निराधार समितीचे अध्यक्ष धनराज घाटगे, मंडलिक साखर कारखान्याचे संचालक कैलाससिंह जाधव, शाहू साखरचे संचालक युवराज पाटील, सरपंच रणजित कांबळे, आदींसह हजारोंच्या उपस्थितीत त्यांच्यावर इंदिरानगर येथील स्मशानभूमीत अंत्यसंस्कार करण्यात आले. त्यांच्या पश्चात आई, वडील, पत्नी, मुलगा, मुलगी असा परिवार आहे.

000000000000

म. टा. प्रतिनिधी, कोल्हापूर

मुलांचा चांगले शिक्षण मिळावे,यासाठी त्यांनी गाव सोडले. कोल्हापुरात भाड्याच्या घरात संसार मांडून रंगाच्या दुकानात नोकरी केली. मुलांच्या शिक्षणासाठी खर्च लागणार असल्याने नोकरी सोडून कर्ज काढून रंग विक्रीचे दुकान काढले. आई वडील आपल्यासाठी कष्ट करतात म्हणून तिने जिद्दीने अभ्यास केला. दहावीत ९८ टक्के गुण मिळवायचेच असा निर्धार केला. तिच्या कष्टाला यश आले. प्रायव्हेट हायस्कूलच्या तेजस्विनी युवराज पाटीलने ९७.८० टक्के गुण मिळवत पालकांच्या कष्टाचे चीज केले.

पन्हाळा तालुक्यातील बोरगाव पोहाळे वाळोली गावचे रहिवासी युवराज पाटील हे बीकॉम पदवीधर आहेत. घरची शेती तुटपुंजी असल्याने त्यांनी कोल्हापुरात रंगाच्या दुकानात नोकरी केली. तेजस्विनी तिसऱ्या इयत्तेत असताना मुलांच्या शिक्षणासाठी त्यांनी कोल्हापुरात येण्याचा निर्णय घेतला. प्रायव्हेट एज्युकेशन संस्थेच्या शेलाजी वनाजी विद्यालयात तिसरी इयत्तेत प्रवेश घेतलेल्या तेजस्वीने अभ्यासात चांगलीच गती घेतली. मुलांच्या भवितव्यासाठी वडिलांनी रंग विक्री दुकानातील नोकरी सोडून कर्ज काढून रंग विक्रीचे छोटे दुकान काढले. नोटबंदी व जीएसटीमुळे व्यवसाय कसा बसा चालत असला तरी मुलांच्या शिक्षणासाठी प्रयत्न करायला पाहिजे, या उद्देशाने युवराज पाटील ही हिंमतीने व्यवसाय करत आहेत.

नववी इयत्तेत तेजस्वीनीला ९४ टक्के गुण मिळाले. दहावीत चांगल्या गुणाने उत्तीर्ण व्हायचा हा निर्धार तिने केला. पहिल्या दिवसापासून रोज आठ तास अभ्यास करायचा याचे नियोजन केले. पहाटे पाच ते रात्री साडेअकरा वाजेपर्यंत शाळा, क्लासबरोबर अभ्यास केला. इंग्रजी, गणित, विज्ञान हे आवडीचे विषय असले तरी मराठी, समाजशास्त्र, संस्कृत विषयावर लक्ष केंद्रीत केले. शाळेतील मुख्याध्यापक व शिक्षकांनी प्रोत्साहन दिले. प्रत्येक विषयात ९० च्या पुढे गुण मिळवायचे आणि ९८ टक्के गुण मिळवायचे असे लक्ष्य ठेवले. तिने स्वअध्ययनावर भर दिला. प्रत्येक प्रश्न व विषय समजून घेतला. निकाल जाहीर झाल्यावर तिला कष्टाचे फळ मिळाले.

\Bमराठीत ९३ गुण

\Bतेजस्विनीला ५०० पैकी ४५९ गुण मिळाले. गणित विषयात शंभर गुण मिळाले तर विज्ञात विषयात ९८ गुण मिळाले. संस्कृत आणि सामाजिक शास्त्र विषयात प्रत्येकी ९८ गुण मिळाले. इंगजी विषयात ९५ तर मराठीत ९३ गुण मिळाले. दहावीत चांगल्या गुणांनी उत्तीर्ण झाल्याने तिच्यावर अभिनंदनाचा वर्षाव होत आहे. बारावी विज्ञान शाखेत प्रवेश घेऊन वैद्यकीय व अभियांत्रिकी शाखेत प्रवेश घेण्याची इच्छा तिने बोलून दाखवली. तेजस्विनीची चमक दहावीनंतर बारावीच्या परीक्षेत दिसून येईल, असा विश्वास तिच्या आई वडिलांना वाटतो आहे.

म. टा. प्रतिनिधी, कोल्हापूर

एसटी महामंडळाने जाहीर केलेल्या नव्या वेतन करारातील तरतुदीविषयी नाराजी व्यक्त करत एसटी कर्मचाऱ्यांनी गुरुवारी रात्रीपासून अचानक काम बंद आंदोलन पुकारले. आंदोलनाचा मोठा फटका कोल्हापूर जिल्ह्याला बसला. शुक्रवारी मध्यवर्ती बसस्थानक, संभाजीनगरसह जिल्ह्यातील सर्व एसटी आगारांतून बसवाहतूक ठप्प होती. जिल्ह्यातील सर्वच आगारांतील २३९५ फेऱ्या रद्द झाल्या. त्यामुळे एसटीचे लाखो रुपयांचे नुकसान झाले. मिळेल त्या वाहनाने प्रवास करण्याची वेळ प्रवाशांवर आली तर संपाचा फायदा घेत खासगी प्रवासी वाहतूकदारांनी प्रवाशांकडून जादा प्रवासी भाडे आकारात लूट केली.

एसटी महामंडळाने जाहीर केलेल्या नव्या वेतन करारातील तरतुदीविषयी नाराजी व्यक्त करत एसटी कर्मचाऱ्यांनी गुरुवारी रात्रीपासून काम बंद आंदोलन पुकारले. आंदोलनाचा मोठा फटका कोल्हापूर जिल्ह्याला बसला. शुक्रवारी मध्यवर्ती बसस्थानक, संभाजीनगरसह जिल्ह्यातील सर्व एसटी आगारांतून बसवाहतूक ठप्प होती.

गुरुवारी बाहेरच्या जिल्ह्यातून मुक्कामासाठी आलेल्या बसेस शुक्रवारी सकाळी सोडण्यात आल्या. पण चालक व वाहक गैरहजर राहिल्याने जिल्ह्यातील सर्व एसटी आगारांतून पहाटेपासून एकही बस बाहेर पडली नाही. त्यामुळे मध्यवर्ती बसस्थानकासह जिल्ह्यातील सर्व आगारांतून छोट्या व लांब पल्ल्याच्या मार्गावरील बसेस रद्द केल्या. कर्नाटकच्या बसची वाहतूक सुरू होती, पण ही वाहतूकही सकाळी १० नंतर बंद झाली.

संपाची कोणतीच घोषणा नसल्याने मध्यवर्ती बसस्थानक परिसरात आल्यावर संप असल्याची माहिती मिळाल्याने हजारो प्रवाशांना फटका बसला. शाळांची सुट्टी संपवून आपापल्या गावी जाणाऱ्या प्रवाशांचे मोठे हाल झाले. एसटी नसल्याने गावी कसे जायचे याची चिंता कुटुंबांना सतावत होती. मुंबई, पुणे, सोलापूर, कोकणातून कोल्हापुरात सकाळी आलेल्या प्रवाशांना दुसऱ्या गावात जाण्यासाठी एसटी नसल्याने त्यांना बस स्थानकात अडकून रहावे लागले. शिवशाहीची पुणे बससेवा सुरू होती. शिवशाहीचे तिकीट काढण्यासाठी प्रवाशांच्या रांगा लागल्या होत्या. काही संघटनांतील चालक व वाहक संपात सहभागी झाले नसल्याने दुपारी अडीचपर्यंत सीबीएसमधून पुण्यासाठी १० शिवशाही बसेस, सांगली, बेळगाव, इचलकरंजीसाठी पाठविण्यात आल्या. ६० पैकी फक्त १० बसेस रस्त्यांवर धावल्या.

संपकाळात मध्यवर्ती बसस्थानक, संभाजीनगर बसस्थानक परिसरात चालक व वाहक बसून होते. डेपोमध्ये बसेसच्या मोठ्या रांगा लागल्या होत्या. सर्व फलाट रिकामे होते, पण प्रवासी बससेवा सुरू होईल या आशेने वाट पाहत होते. कोणताही अनुचित प्रकार घडू नये यासाठी कडक पोलिस बंदोबस्त ठेवला होता. राज्य सुरक्षा दलाची एक प्लाटून बंदोबस्तास ठेवली होती. बसवाहतूक सुरू होणार नाही हे स्पष्ट होताच प्रवाशांनी खासगी प्रवासी बसचा आधार घेतला. काही प्रवाशांनी पाहुण्यांकडे मुक्काम केला.

०००००

खासगी वाहतूकदारांकडून लूट

एसटी बसेस बंद असल्याने वडाप व्यावसायिकांची चांदी झाली. पन्हाळा, गारगोटी, शाहूवाडी, मलकापूरला जाण्यासाठी प्रवाशांकडून जादा दराची आकारणी केली जात होती. निपाणी, कागल मार्गावर खासगी प्रवासी वाहतूक करण्यात आली. कोकणात सावंतवाडी, कुडाळला जाण्यासाठी ४०० रुपयांपासून एक हजार रुपयांची मागणी केली जात होती. मुंबई, पुणे, सोलापूर, बेळगावकडे नियमित जाणाऱ्या खासगी प्रवासी वाहनांनी तिकिटाचे दर वाढवले होते.

००००००

आरटीओकडून वडापला आमंत्रण

एसटी वाहतूक बंद पडल्याने प्रादेशिक परिवहन अधिकारी अजित शिंदे यांनी मध्यवर्ती बसस्थानकाला भेट देऊन संपाचा आढावा घेतला. दुपारी बारा वाजता खासगी वाहनांना प्रवासी वाहतूक करण्यास परवानगी दिली. तसेच मध्यवर्ती बसस्थानक परिसरातील शहर वाहतूक नियंत्रण शाखेच्या पोलिसांना खासगी वाहतूक करणाऱ्यांवर कारवाई करू नका, असे आदेश दिले. त्यामुळे वडाप व्यावसायिकांनी जादा भाडे आकारत चांगलीच कमाई केली.

०००

२३९५ फेऱ्या रद्द

कोल्हापुरात एसटीचा कडकडीत संप झाला असून, जिल्ह्यात २५०० पैकी फक्त १०५ बसफेऱ्या झाल्या आहेत. २३९५ फेऱ्या रद्द करण्यात आला आहेत. त्यामुळे जिल्ह्यात एसटीचा मोठा महसूल बुडाला असून, प्रवाशांचे मोठे हाल झाले. रात्री उशिरापर्यंत एसटीचे अधिकारी बसफेऱ्या सुरू करण्यासाठी प्रयत्न करत होते. पण चालक व वाहक गैरहजर राहिल्याने अधिकारी हतबल झाले होते.

०००००

प्रतिक्रिया...

मी कोकणात रत्नागिरीला बहिणीकडे राहायला गेले होते. कोल्हापुरात आल्यावर एसटीचा संप झाल्याचे कळाले. मला अथणीला जायचे आहे. तीन तास बसची वाट पाहत आहे. कर्नाटक बस मिळाली तर गावाकडे जाईन अथवा कोल्हापुरातील बहिणीकडे मुक्काम करावा लागेल.

शशिकला घाटगे, अथणी

००००००

लातूर येथे एका कंपनीत माझा नोकरीसाठी इंटरव्ह्यू आहे. मी भोगावतीहून वडापने कोल्हापुरात आलो. लातूरला जाण्यासाठी तीन तास बसची वाट पाहत आहे. संपामुळे माझा इंटरव्ह्यू चुकण्याची भीती वाटत आहे. कंपनीच्या अधिकाऱ्यांना संपाची कल्पना दिली आहे. मिळेल त्या बसने लातूरला पोहोण्याचा माझा प्रयत्न आहे.

आश्रय पाटील, परिते

०००००

शुक्रवारी सकाळी अंबाबाईच्या दर्शनासाठी सहकुटुंब बेळगावहून कोल्हापुरात आलो आहे. देवदर्शन आटोपून बेळगावला जाण्यासाठी दोन तास बसची वाट पाहत आहे. कर्नाटक बस मिळाली तरी बेळगावला जाणार आहे. संपाची माहिती समजली असती तर देशदर्शनाचा बेत पुढे ढकलला असता.

नित्यानंद अनिगोल, बेळगाव

०००००

पुण्याहून सावंतवाडीला जाण्यासाठी सकाळी कोल्हापुरात आलो. इथे आल्यावर संप असल्याची माहिती मिळाली. खासगी बस वाहतूकदारांकडे चौकशी केली असता ४०० रुपयांची मागणी केली. त्यामुळे मला एसटीची वाट पाहण्याशिवाय पर्याय नाही. संप मिटला नाही तर रात्री कोल्हापूर बसस्थानकावरच मुक्काम करणार.

रमेश चितारी, पुणे

०००००

म. टा. प्रतिनिधी, कोल्हापूर

प्रादेशिक परिवहन प्राधिकरणाच्या परिचलन बैठकीतील निर्णयानुसार प्रादेशिक परिवहन विभागाने (आरटीओ) ऑटो रिक्षा भाडेदर वाढीस मान्यता दिली. पहिल्या एक किलोमीटर अंतरासाठी १७ रूपयांवरून २० रुपये आणि पुढील प्रत्येक किलोमीटर अंतरासाठी १४ रूपयांऐवजी १७ रुपये भाडेदर निश्चित केला आहे. त्यामुळे सर्वसामान्यांची ऑटो रिक्षातून वाहतूक महागली आहे. रात्री बारा ते पहाटे पाच वाजेपर्यंत मीटरच्या दीडपट भाडे आकारण्यात येणार आहे.

प्रभारी प्रादेशिक परिवहन अधिकारी अजित शिंदे यांनी दिलेल्या माहितीनुसार मीटरचे पुनर्प्रमाणिकरण (कॅलिब्रेशन) झाल्यानंतर रिक्षा चालकांना भाडेवाढ आकारता येणार आहे. ऑटोरिक्षा परवानाधारक रिक्षाचालकांनी सुधारित भाडे दराप्रमाणे मीटरचे पुनर्प्रमाणिकरण (कॅलिब्रेशन) २१ जुलैपर्यंत करणे बंधनकारक आहे. कॅलिब्रेशन केल्याशिवाय नवीन दराने भाडे आकारणी करता येणार नाही. कॅलिब्रेशन न करता तक्रार आल्यास संबधितावर तत्काळ कारवाई केली जाणार आहे. इंधन दरवाढ, इन्शुरन्स, ऑईल, टायर आदी खर्चात वाढ झाल्याने ऑटो रिक्षा भाडेदरात वाढ करण्याची मागणी रिक्षा संघटनांनी केली होती. कॉमन मॅन तीन आसनी रिक्षा चालक व असंघटित क्षेत्र कामगार संघाने भाडेवाढीचे निवेदन दिले होते. कॉमन मॅनचे बाबा इंदूलकर, भाजपा रिक्षा संघटनेचे विजय गायकवाड, अविनाश दिंडे, संजय भोळे आदींनी आरटीओला निवेदन दिले होते.

म. टा. प्रतिनिधी, कोल्हापूर

छत्रपती राजाराम महाराज विमानतळावर २७४ कोटी रूपयांची कामे मार्गी लागली आहेत. विमानतळाचे विस्तारीकरण आणि आधुनिकीकरणाच्या कामाचा आढावा घेण्यासाठी विमानतळ सल्लागार समितीची शुक्रवारी विमानतळावर बैठक झाली. बैठकीत सुरक्षा व्यवस्था, पर्यायी रस्ता, विमान झेपावताना आणि उतरताना येणारे अडथळे दूर करण्याच्या सूचना करण्यात आल्या.

एअरपोर्ट अथॉरिटी ऑफ इंडियाने छत्रपती राजाराम महाराज विमानतळासाठी २७४ कोटीचा आराखडा तयार केला. त्यासाठी राज्य सरकारने आपल्या हिस्स्याची ८२ कोटी रूपयांची रक्कमही दिली आहे. त्यामुळे विस्तारीकरण आणि आधुनिकीरणाच्या कामाला गती आली आहे. येत्या दोन वर्षाच्या कालावधीत विमानतळावरील कामे पूर्ण केली जाणार आहेत. सध्या विमानतळावर १४ कोटी रूपयांची कामे सुरू आहेत. उर्वरित ८० कोटी रूपये खर्चाच्या कामाची निविदा काढली आहे. टर्मिनल बिल्डींगचे कामही लवकरच सुरू करण्यात येणार आहे. बैठकीत विमानतळ परिसरातून जाणारा रस्ता बंद करून पर्यायी रस्ता, सुरक्षा व्यवस्थेसाठी प्रशिक्षित पोलिस, धातू शोधक यंत्रणा, प्रवाशांना वातानुकूलित सेवा, तिकीट काउंटरचे कामही लवकरच सुरू केले जाणार आहे. सध्या कोल्हापूर ते मुंबई मार्गावर एअर डेक्कन कंपनीकडून विमानसेवा सुरू आहे. ही सेवा आठवडाभर करण्याचे नियोजन सुरू आहे. त्यासह कोल्हापूर ते हैदराबाद, तिरूपती, कोल्हापूर-बेंगळुरू ही विमानसेवा सुरू करण्यासाठी आवश्यक पाठपुरावा करण्याचे सल्लागार समितीच्या बैठकीत ठरले.

००

(संबधित वृत्त पान ५ वर)

सात-बारा उतारा देण्यासाठी स्वीकारली तीन हजारांची लाच

(फोटो आहे)

म. टा. प्रतिनिधी, कोल्हापूर

६८ वर्षांपूर्वीचा शेतजमिनीचा सात-बारा उतारा देण्यासाठी तीन हजार रुपयांची लाच स्वीकारताना करवीर तहसीलदार कार्यालयातील वरिष्ठ लिपिक खैबर शरपुद्दीन नायकवडी (वय ५७, रा. नायकवडी गल्ली, कागल) हा लाचलुचपत प्रतिबंधक विभागाच्या जाळ्यात सापडला. भाऊसिंगजी रोडवरील बीएसएनएल कार्यालयासमोर शुक्रवारी दुपारी लाचलुचपत प्रतिबंध विभागाच्या पथकाने ही कारवाई केली.

लाचलुचपत प्रतिबंधक विभागाचे उपअधीक्षक गिरीश गोडे यांनी दिलेल्या माहितीनुसार, भिकाजी वाडकर (वय ४५, रा. दिंडनेर्ली, ता. करवीर) यांना कुणबी मराठा जातीचा दाखला काढायचा आहे. त्यासाठी १९५० सालचा शेतीचा सात-बारा उतारा आवश्यक होता. त्यांनी २२ मे रोजी करवीर तहसीलदार कार्यालयात अर्ज केला. हा अर्ज अभिलेख विभागातील वरिष्ठ लिपिक खैबर नायकवडी याच्याकडे गेला. वाडकर यांनी नायकवडी यांची भेट घेऊन सात-बारा उतारा वेळेत मिळावा, अशी विनंती केली. त्यावर नायकवडी याने 'तुमचे रेकॉर्ड खून जुने आहे, ते शोधून द्यायला वेळ लागेल', असे सांगत टाळाटाळ केली. अनेकदा भेटल्यानंतर नायकवडी याने उताऱ्यासाठी साडेचार हजार रुपये खर्च येईल असे सांगितले.

चार दिवसांपूर्वी वाडकर यांनी रोख १७०० रुपये व एक रिम कोरे कागद विकत घेऊन नायकवडीला दिले. उरलेले तीन हजार रुपये शुक्रवारी घेऊन येण्यास सांगितले होते. याबाबत वाडकर यांनी उपअधीक्षक गोडे यांची भेट घेऊन तक्रार दिली. गोडे यांनी तक्रारीची खात्री करून शुक्रवारी दुपारी करवीर तहसीलदार कार्यालयाच्या आवारात सापळा रचला. वाडकर यांनी दुपारी चारच्या सुमारास लाचलुचपत प्रतिबंधक विभागाच्या पथकाकडून अॅन्थ्रासीन पावडर लावलेल्या नोटा घेतल्या. नायकवडीला मोबाइलवर फोन करून बीएसएनएल कार्यालयासमोर बोलवले. तेथे वाडकर यांच्याकडून तीन हजार रुपये घेताना नायकवडीला पथकाने रंगेहात जेरबंद केले.

००००००

नायकवडी माजी मंत्र्यांचा पीए

नायकवडी हा जिल्ह्यातील एका माजी मंत्र्याचा पीए आहे. त्यावेळी अनेकांना खैबरखिंडीत पकडण्याचे काम तो करीत होता. त्याच्यामुळे बरेच कार्यकर्ते मंत्र्यांपर्यंत पोहोचत नव्हते. त्याच्या कार्यशैलीची तेव्हा जोरदार चर्चा होती. तहसीलदार कार्यालयात त्याचा दरारा होता, त्यामुळे त्याच्याविरोधात वरिष्ठांसह लाचलुचपत विभागाकडे तक्रारी दाखल होत नव्हत्या.

०००

सहा महिन्यात १४ कारवाया

एसीबीचे उपअधीक्षक गोडे यांनी गेल्या सहा महिन्यांत १४ लाचखोरांना अटक केली. यात महसूल व वन विभागातील ८, पोलिस २, कृषी खाते १, उद्योग व ऊर्जा कामगार विभाग १, उच्च व तंत्रशिक्षण विभागातील १ आणि ग्रामविकास खात्यातील एका कर्मचाऱ्याचा समावेश आहे.

०००००००००००००

फोटो आहे...

टेम्पोच्या धडकेत

दुचाकीस्वार ठार

म. टा. प्रतिनिधी, कोल्हापूर

कोल्हापूर-रत्नागिरी मार्गावर केर्लीजवळ भरधाव टेम्पोने दुचाकीस जोराची धडक दिली. या अपघातात जालंधर ऊर्फ लक्ष्मण भाऊराव पाटील (वय ३७, रा. करंजोशी, ता. शाहूवाडी) जागीच ठार झाले. अपघात शुक्रवारी सायंकाळी साडेपाचच्या सुमारास घडला. जालंधर पाटील हॉटेल व्यावसायिक होते.

सीपीआरमधून मिळालेल्या माहितीनुसार, करंजोशी येते राहणारे जालंधर ऊर्फ लक्ष्मण पाटील यांचे गोकुळ शिरगाव येथे हॉटेल आहे. ते हॉटेलमध्येच राहत होते. आठवड्यातून एक-दोन वेळा ते गावाकडे जात होते. त्यांच्या मावशीचे निधन झाल्याने ते शुक्रवारी रक्षाविसर्जनसाठी गावी गेले होते. विधी आटोपल्यानंतर पुन्हा गोकुळ शिरगावला जाण्यासाठी चारच्या सुमारास ते करंजोशीतून बाहेर पडले. केर्लीजवळ आल्यानंतर पन्हाळ्याकडे जाणाऱ्या टेम्पोने त्यांच्या दुचाकीला जोराची धडक दिली. यात डोक्याला गंभीर इजा झाल्याने जालंधर जागीच ठार झाले. अपघातानंतर टेम्पो चालकाने पळ काढला. वाहनधारकांनी याची माहिती करवीर पोलिसांना दिली. १०८ रुग्णवाहिकेतून जालंधर यांना सीपीआरमध्ये दाखल केले. डॉक्टरांनी त्यांना मृत घोषित केले. उत्तरीय तपासणीनंतर मृतदेह नातेवाइकांच्या ताब्यात दिला. त्यांच्या पश्चात आई, वडील, पत्नी, दोन मुले असा परिवार आहे.

(फोटो आहेत)...

म. टा. प्रतिनिधी, कोल्हापूर

दाभोळकर चौकात पादचारी उड्डाण पुलाजवळ गुरुवारी (ता. ७) मध्यरात्रीच्या सुमारास मुकुंद रामचंद्र यादव (वय ४७, रा. जासूद गल्ली, मंगळवार पेठ) याने हवेत गोळीबार केला होता. याप्रकरणी पोलिसांनी यादवसह सुशांत सुनील तडवळे (४०, शिवाजी पेठ, कोल्हापूर) या दोघांना अटक केली. यादवकडील पिस्तूल आणि चार जिवंत काडतुसे पोलिसांनी जप्त केली. तसेच पिस्तूल आणि पेट्रोल पंपाचा परवाना रद्द करण्यासाठी प्रस्ताव पाठवणार असल्याचे पोलिसांनी सांगितले.

शाहूपुरी पोलिसांनी दिलेल्या माहितीनुसार, मुकुंद यादव याचा दाभोळकर कॉर्नर ते ताराराणी पुतळा चौक मार्गावर युनायटेड ऑॅटो सर्व्हिसेस नावाचा पेट्रोल पंप आहे. गेल्या काही दिवसांपासून पेट्रोलपंप बंद आहे. यादवसह त्याचा भाचा सुशांत तडवळे आणि काही मित्रमंडळी रोज रात्री उशिरापर्यंत पेट्रोलपंपावर थांबतात. पंपाच्या बाजूला एस.आर.एस. ट्रॅव्हल्स कंपनीचे ऑफिस आहे. ट्रॅव्हल्स कंपनीच्या बसेस समोरच उभ्या राहतात. त्यामुळे रात्री उशिरापर्यंत परिसरात वर्दळ असते. गुरुवारी रात्री यादव आणि त्याचा भाचा पेट्रेलपंपावर थांबले होते. रात्री पावणेबाराच्या सुमारास अर्जुन रामचंद्र पाटील (४०, रा. कंदलगाव) कामानिमित्त बेंगळुरूला जाण्यासाठी एस.आर.एस. ट्रॅव्हल्सच्या कार्यालयात आले. बसमध्ये चढण्यापूर्वी ते बॅग बसच्या डिकीत ठेवत होते. यावेळी ते लघुशंका करीत असल्याचा संशय आल्याने तडवळे तेथे गेला. त्याने अर्जुन पाटील यांना हटकले. 'तू आमच्या पेट्रोल पंपाजवळ लघुशंका का केलीस?' अशी विचारणा करीत लोखंडी रॉडने मारहाण केली.

यावेळी मद्यधुंद अवस्थेतील मुकुंद यादव बसच्या दिशेने धावत आला. त्याच्या हातात काळ्या रंगाचे विदेशी बनावटीचे पिस्तूल होते. अर्जुन पाटील यांच्या अंगावर धावून जात त्याने गोळी घालून ठार मारण्याची धमकी दिली. यावेळी एस.आर.एस. ट्रॅव्हल्सचे मॅनेजर अझरुद्दीन निसार पंजेशा यांनी यादवला अडवण्याचा प्रयत्न केला. मात्र, ऐकण्याच्या मनस्थितीत नसलेल्या यादवने पिस्तूलातून हवेत दोन गोळ्या झाडल्या. अचानक घडलेल्या या प्रकाराने परिसरात एकच गोंधळ उडाला. पोलिसांना याची माहिती मिळताच काही मिनिटात पोलिस निरीक्षक तानाजी सावंत आणि संजय मोरे घटनास्थळी दाखल झाले. यावेळी यादव हातात पिस्तूल घेऊन उभा होता. पोलिसांनी शिताफीने त्याच्याकडील पिस्तूल काढून घेतले. बसजवळ रिकाम्या दोन पुंगळ्याही मिळाल्या. यादव आणि तडवळे या दोघांनाही ताब्यात घेऊन त्यांना शाहूपुरी पोलिस ठाण्यात आणले. अर्जुन पाटील यांच्या फिर्यादीनुसार यादव आणि तडवळे यांना अटक करून गुन्हा दाखल केला. अर्जुन पाटील सीए आहेत.

०००

विदेशी बनावटीचे अद्ययावत पिस्तूल

मुकुंद यादव याने दहा वर्षांपूर्वी स्वसंरक्षणासाठी हत्यार परवाना घेतला होता. त्याने विदेशी बनावटीचे चार ते पाच लाख रुपये किमतीचे अत्याधुनिक पिस्तूल खरेदी केले आहे. अनेकदा तो सार्वजनिक ठिकाणी कमरेला पिस्तूल अडकवून त्याचे प्रदर्शन करतो, अशी चर्चा सुरू आहे. त्याच्या बंद पेट्रोलपंपावर अवैध धंदे चालत असल्याचा पोलिसांना संशय आहे, त्यामुळे पेट्रोल पंपाचा परवाना रद्द करण्याचा प्रस्ताव पेट्रोलियम कंपनीकडे पाठवला जाणार आहे, त्याचबरोबर शस्त्राचा गैरवापर करून दहशत माजविल्याने शस्त्रपरवानाही रद्द करण्यासाठी जिल्हाधिकाऱ्यांकडे प्रस्ताव पाठवणार असल्याचे पोलिस निरीक्षक संजय मोरे यांनी सांगितले.