म. टा. प्रतिनिधी, कोल्हापूर
छत्रपती शिवरायांचे कार्य व चरित्र जगासमोर जावे यासाठी अखिल भारतीय मराठा महासंघाच्यावतीने शिवराज्याभिषेक दिनानिमित्त विविध कार्यक्रमांचे २९ मे ते सहा जून या कालावधीत करण्यात आले आहे. यानिमित्ताने शिवराज्याभिषेक व्याख्यानमाला घेण्यात येत आहे. हा सोहळा लोकोत्सोव म्हणून साजरा होणार आहे. सहा जूनला सायंकाळी साडेचार वाजता भव्य शिवराज्याभिषेक मिरवणूक काढण्यात येणार असल्याची माहिती अखिल भारतीय मराठा महासंघाचे जिल्हा अध्यक्ष वसंतराव मुळीक यांनी पत्रकार बैठकीत दिली.
मुळीक म्हणाले, 'मिरवणुकीला मंगळवार पेठ येथील मराठा महासंघाच्या कार्यालयापासून सुरुवात होणार आहे. प्रमुख पाहुणे म्हणून पालकमंत्री, खासदार, आमदार, महापौर,उपमहापौर, ज्येष्ठ इतिहास संशोधक, प्रशासकीय अधिकारी, नगरसेवक, जिल्ह्यातील विविध संस्था व पक्षाचे पदाधिकारी यांना निमंत्रित केले आहे. मिरवणूक मार्ग कोळेकर तिकटी, मिरजकर तिकटी, बिनखांबी गणेश मंदिर, महाद्वार रोड, पापाची तिकटीमार्गे शिवाजी पुतळा असा असेल. विविध राष्ट्रपुरुषांचे ऐतिहासिक प्रेरणादायी फलक, तसेच शिवकालीन व सद्यपरिस्थितीवर आधारित सामाजिक प्रबोधनात्मक फलकांचा समावेश मिरवणुकीत असणार आहे. हा सोहळा डॉल्बीमुक्त असणार असून यात धनगरी ढोल, लेझीम, मर्दानी खेळ, वारकरी पथक, शिवकालीन वेशभूषेचा समावेश केला जाणार आहे.
यावेळी शैलेजा भोसले, चंद्रकांत चव्हाण, शशिकांत पाटील, शंकराव शेळके, एकनाथ जगदाळे, प्रकाश पाटील, शरद साळुंखे, उत्तम पोवार, शिरीष जाधव आदी उपस्थित होते.
'ही तर शिवभक्तांची फसवणूक'
इतिहास संशोधक इंद्रजित सावंत यांनी रायगड किल्ल्याच्या संवर्धनासाठी सरकारने जाहीर केलेले ६०० कोटी कुठे आहेत असा प्रश्न उपस्थित करत ते म्हणाले, 'शिवाजी महाराजांच्या नावाचा वापर करत जे मोठे झाले त्यांच्यात कृतिशीलता अजिबात दिसत नाही. अरबी समुद्रात बांधण्यात येणाऱ्या शिवस्मारकाची अजून एक वीटही रचण्यात आलेली नाही ही शिवभक्तांची सरकारने केलेली फसवणूक आहे,' असा आरोपही त्यांनी केला.
असे होतील कार्यक्रम
२९ मे : चित्रकार धीरज सुतार यांच्या छत्रपती शिवरायांच्या तैलचित्राचे प्रकाशन.
३० मे : अवयवदान जनजागृतीसाठी प्रबोधनात्मक उपक्रम व अवयवदान केलेल्या अमर पाटील यांच्या
कुटुंबियांची निगवे गावी भेट व सांत्वन.
३१ मे : शाखाअंतर्गत वृक्षारोपण
शिवराज्याभिषेक व्याख्यानमाला
१ जून : ज्येष्ठ पत्रकार प्रताप आसबे
विषय : मराठा कालचा आणि आजचा
२ जून : नाबार्ड माजी अध्यक्ष यशवंतराव थोरात
विषय : वर्तमानाच्या शोधात छत्रपती शिवाजी
३ जून : आरपीएफ कमिशनर देवेंद्र कासार
व्याख्यानाचा विषय : राष्ट्रनिर्मातेः छत्रपती शिवाजी महाराज
वेळ व ठिकाण:
राजर्षी शाहू स्मारक भवन, दसरा चौक वेळ : सायंकाळी ७. ३० वा.
