म. टा. प्रतिनिधी, कोल्हापूर

भूविकास बँकेच्या कर्मचाऱ्यांची देणी इमारती विकून भागविण्याचा निर्णय राज्य सरकारने घेतला आहे. पण यासाठी कर्मचाऱ्यांनी खटले मागे घ्यावेत, असा सूर सहकारी मंत्री सुभाष देशमुख यांनी आळवला. प्रत्यक्षात बँकेच्या इमारतीवर कोणत्याही प्रकारचा कायदेशीर खटला नाही. तसेच इमारत 'ब' सत्ता प्रकारात येत असताना दोनवेळा ई-निविदा प्रसिद्ध केली आहे. त्यावर लाखो रुपयांचा खर्च झाला असून त्याची चौकशी करणार पालकमंत्री चंद्रकांत पाटील करणार का? असा प्रश्न निवृत्त कर्मचाऱ्यांनी निवेदनाद्वारे उपस्थित केला आहे.

भूविकास बँकेच्या कर्मचाऱ्यांचे गेल्या सहा दिवसांपासून जिल्हाधिकारी कार्यालयासमोर आंदोलन सुरू आहे. याच दरम्यान सहकार मंत्री देशमुख यांनी देणी मिळण्यासाठी प्रथम कर्मचाऱ्यांनी खटले मागे घेण्याची मागणी केली. वस्तुत: सहकार मंत्री देशमुख यांनी इमारत विक्री करून देणी भागवावीत, अशी सूचना करताना तसा आदेशही काढला होता. पण आपल्याच वक्तव्यावर घूमजाव करत प्रथम खटले मागे घ्या, असे दिशाभूल करणारे वक्तव्य केले आहे. बँकेची इमारत 'ब' सत्ता प्रकारात येत असताना ई-निविदा प्रसिद्ध केली कशी? कर्मचाऱ्यांची देणी इमारत विकून भागणार की, कर्जमाफीतून व कधी देणार याचा खुलासा पालकमंत्री पाटील यांनी करावा अशी मागणी केली आहे.

दरम्यान, आंदोलनाच्या सहाव्या दिवशी कर्मचाऱ्यांनी राजर्षी शाहू महाराजांच्या प्रतिमेचे पूजन करून अभिनव पद्धतीने आंदोलन केले. यावेळी बी. एच. गुरव, एस. ए. पाटील, आर. पी. चौगले, एस. एच. कदम, एन. आर. पाटील यांच्यासह कर्मचारी धरणे आंदोलनात सहभागी झाले होते.

बचत गटांना सक्षम करणार

रोजगार मार्गदर्शन शिबिरात आमदार क्षीरसागर यांची ग्वाही

म. टा. प्रतिनिधी, कोल्हापूर

'बचत गटांच्या माध्यमातून स्वयंरोजगार उपलब्ध करून महिला सबलीकरणाद्वारे कुटुंबांचे सक्षमीकरण करणे काळाची गरज आहे. येणाऱ्या काळात महिला बचत गटांना विविध शासकीय योजना, कर्ज योजनांचा लाभ देऊन सक्षम करण्याची जबाबदारी शिवसेनेने स्वीकारली आहे,' अशी ग्वाही आमदार राजेश क्षीरसागर यांनी दिली.

आमदार क्षीरसागर फाउंडेशन आणि भगिनी मंच यांच्या संयुक्त विद्यमाने शनिवारी दैवज्ञ बोर्डिंगमध्ये महिला रोजगार मार्गदर्शन शिबिराचे आयोजन करण्यात आले होते, त्यावेळी ते बोलत होते.

शिबिराचे उद्घाटन आमदार क्षीरसागर, भगिनी मंचच्या अध्यक्षा वैशाली क्षीरसागर यांच्या हस्ते झाले. आमदार क्षीरसागर म्हणाले, 'प्रत्यक्ष सरकारी योजनांनाचा लाभ घेताना कागदोपत्री माहितीची कमतरता यामुळे अनेक लाभार्थी योजनांपासून वंचित राहत आहेत. प्रशासन आणि सर्वसामान्य लाभार्थी यांचा समन्वय साधून त्यांना सरकारी योजनांचा लाभ मिळवून देण्याचा प्राथमिक प्रयत्न असून, या पुढील काळात यापेक्षाही मोठ्या प्रमाणात शिबिरांचे आयोजन करून लाभार्थींना प्रत्यक्ष लाभ देण्याचा प्रयत्न केला जाईल.'

संजय गांधी निराधार योजनेचे अध्यक्ष किशोर घाटगे यांनी संजय गांधी निराधार योजना, श्रावणबाळ निराधार योजना, इंदिरा गांधी पेन्शन योजनेची सविस्तर माहिती देऊन त्यासाठी आवश्यक कागदपत्रांची व मिळणाऱ्या आर्थिक लाभाची माहिती दिली. जिल्हा अग्रणी बँक वित्तीय सहाय्यता केंद्राचे समुपदेशक शहाजी शिंदे यांनी मुद्रा लोनची माहिती दिली. उद्योग भवनच्या उद्योग निरीक्षक सुजाता देसाई यांनी उद्योग भवनमार्फत चालणाऱ्या पंतप्रधान रोजगारनिर्मिती योजना, बीज भांडवल योजना, जिल्हा उद्योग कर्ज योजनेची माहिती दिली. महिला आर्थिक विकास महामंडळाचे उमेश लिंगनूरकर यांनी महिला विकास महामंडळाच्या स्थापनेचा उद्देश स्पष्ट केला.

अंकुश निपाणीकर यांनी प्रास्ताविक केले. यावेळी ऋतुराज क्षीरसागर, नगरसेविका प्रतिज्ञा उत्तुरे, महिला आघाडी शहर संघटक मंगलताई साळोखे, पूजा भोर, शिवसेना उपशहरप्रमुख जयवंत हारुगले, दीपक गौड, रघुनाथ टिपुगडे, गजानन भुर्के, पद्माकर कापसे, आदींसह शिवसैनिक मोठ्या संख्येने उपस्थित होते.

००००००००००००

म. टा. प्रतिनिधी, कोल्हापूर

'देशाच्या इतिहासात मराठा साम्राज्याचे योगदान महत्त्वपूर्ण असून छत्रपती शिवरायांनी स्थापन केलेल्या स्वराज्याचा आदर्श आजच्या राज्यकर्त्यांना आदर्शवत आहे. रायगड किल्ल्याच्या विकासासाठी महाराष्ट्र व केंद्र सरकार यांच्यावतीने संयुक्त प्रयत्न करण्यात येतील,' अशी माहिती केंद्रीय पर्यटनमंत्री के.जे. अल्फोन्स यांनी दिली. त्यांनी शनिवारी किल्ले रायगडला भेट दिल्यानंतर ते बोलत होते.

अल्फोन्स म्हणाले, 'जगभरात अनेक किल्ले पाहिले परंतु रायगड किल्ला पाहिल्यावर मी अक्षरशः भारावून गेलो. गडावर चाललेले उत्खननाचे काम समाधानकारक आहे. गडाचा लष्करीदृष्ट्या अभ्यास, तसेच गडावर मिळालेल्या सर्व वस्तूचा अभ्यास करणे गरजेचे आहे. महाराजांचा इतिहास व महाराष्ट्रात असलेले गडकिल्ले यांचे चांगल्याप्रकारे सादरीकरण केल्यास, जगभरातला अभ्यासक रायगडाकडे आकर्षित होतील.'

खासदार संभाजीराजे छत्रपती हे शिवाजी महाराजांचे वंशज आहेत, त्यानी या किल्ल्याच्या संवर्धनाचे काम हाती घेतले आहे ही विशेष समाधानाची बाब आहे. रायगड किल्ल्याबरोबरच किल्ला परिसरातील गड पायथ्याला असलेल्या एकवीस (२१) गावांचा विकास करण्याच्या योजनेला सहकार्य राहील, अशी ग्वाही त्यांनी दिली.

खासदार संभाजीराजे म्हणाले, 'रायगड प्राधिकरणचा अध्यक्ष आणि गडकिल्ल्यांचा ब्रँड अ‍ॅम्बेसेडर म्हणून मी जगाच्या नकाशावर शिवछत्रपतींचा इतिहास तसेच रायगड किल्ल्यांचा लौकीक पोहचवण्यासाठी प्रयत्नशील राहीन. केंद्रीय पर्यटन मंत्रालयाकडून भरीव निधी मिळावा.'

यावेळी पुरातत्व खात्यातील निवृत्त अधिकारी डॉ. ए. के. सिन्हा, कॅप्टन शिवाजीराव महाडकर, प्रा. श्री. रामनाथन, बिपीन नेगी, पांडुरंग बलकवडे, सुधीर थोरात आदी उपस्थित होते.

गजानन सूर्यवंशी

कोल्हापूर : फुलेवाडी येथील गजानन महादेव सूर्यवंशी (वय ६५) यांचे निधन झाले. त्यांच्या पश्चात पत्नी, मुलगा, मुली, जावई, भाऊ असा परिवार आहे. रक्षा विसर्जन रविवारी (२०) सकाळी नऊ वाजता होणार आहे.

म. टा. प्रतिनिधी, कोल्हापूर

'वारणेच्या पाणी वापरावरून इचलकरंजी व वारणाकाठच्या गावांमध्ये संघर्ष निर्माण झाला आहे. संघर्षामध्ये पंचगंगा नदीचे प्रदूषण कारणीभूत असून, पंचगंगा प्रदूषणमुक्तीसाठी खासदार राजू शेट्टी यांनी दहा वर्षांच्या कालावधीत केंद्रीय पातळीवर कोणतेही काम केले नसल्याने पाणी युद्ध पेटले आहे,' असा आरोप जिल्हा परिषदेचे माजी उपाध्यक्ष धैर्यशील माने यांनी प्रसिद्धी पत्रकाद्वारे केला आहे.

पत्रकात म्हटले आहे की, 'शहरी व ग्रामीण भागाची जीवनदायी असलेली पंचगंगा नदी अत्यंत प्रदूषित झाली आहे. साखर कारखाने, उद्योग, कत्तलखाने, आदीच्या माध्यमातून रसायनयुक्त पाणी थेट पंचगंगा नदीत मिसळत आहे. बालिंगा (ता. करवीर) पासून कोल्हापूर शहर, इचलकरंजी, हातकणंगले व शिरोळ तालुक्यातील नदीकाठावरील ३८ गावे अतिप्रदूषित पाणी पित आहेत. कोल्हापूर शहरासाठी थेट पाइपलाइनचे काम सुरू असले, तरी नदीकाठावरील गावे हेच प्रदूषित पाणी पित आहेत. दूषित पाण्यामुळे काठावरील गावांमधील नागरिकांच्या आरोग्याच्या प्रश्न वारंवार निर्माण होत आहे. प्रदूषण रोखण्यासाठी प्रदूषण महामंडळ व अन्य सरकारी विभागाबरोबर लोकप्रतिनिधींची अनास्थाही कारणीभूत आहे. पंचगंगा प्रदूषणमुक्तीसाठी जिल्हा परिषदेने ३० गावांतील सांडपाणी व सहा गावांचा घनकचरा व्यवस्थापनासाठी १०८ कोटी खर्चाचा प्रकल्प अहवाल राज्य सरकारच्या पर्यावरण विभागाकडे सादर केला होता. अहवाल पर्यावरण विभागान राष्ट्रीय नदी संवर्धन संचालनालय वने व पर्यावरण विभागाकडे पाठवला होता. विविध कारणे दाखवून या विभागाने अहवाल नाकारला. नदीकाठावरील गावांमध्ये सर्वाधिक गावे व इचलकरंजी शहर हे खासदार शेट्टी यांच्या मतदारसंघातील असून त्यांनी लाखो लोकांना अक्षरश: मृत्यूच्या दाढेत ढकलले आहे. प्रदूषणमुक्तीसाठी खासदार शेट्टी यांनी वेळीच उपाययोजना केली असती, तर सुरू असलेला संघर्ष निर्माण झाला नसता. प्रदूषित पाणी असल्याने नागरिकांना पाण्याचे कॅन विकत घ्यावे लागत आहेत. याला सर्वस्वी खासदार शेट्टी जबाबदार आहेत.'

कोल्हापूर : शिवाजी विद्यापीठाच्या व्यस्थापन परिषदेच्या बैठकीमध्ये असणाऱ्या सदस्यांची ज्येष्ठता डावलून डॉ. व्ही. एन. शिंदे यांना बैठकीस बसण्यास परवानगी दिल्याच्या विरोधात विद्यापीठ विकास मंचने कुलगुरू डॉ. देवानंद शिंदे यांना निवेदन दिले. यावेळी झालेल्या चर्चेवेळी सातत्याने एकाच व्यक्तीकडे हा कार्यभार दिला जात असल्याबद्दल सदस्यांनी तीव्र नापसंती व्यक्त केली. कुलगुरूंनी याबाबत पुनर्विचार करण्याचे आश्वासन शिष्टमंडळास दिले. शिष्टमंडळात अधिसभा सदस्य नंदकुमार दिवटे, पंकज मेहता, दिनेश जंगम, आरती शिंदे, विद्यापीठ विकास मंचाचे प्रा. शंकरराव कुलकर्णी आदींचा समावेश होता.

हालचाली गतिमान, इच्छुकांच्या मुलाखती

काँग्रेसकडून महापौरपदासाठी सातजण शर्यतीत; नगरसेवक सोमवारी सहलीवर

म. टा. प्रतिनिधी, कोल्हापूर

महापौर व उपमहापौरपदासाठी हालचाली गतिमान झाल्या असून काँग्रेस आघाडीकडून शनिवारी इच्छुकांच्या मुलाखती झाल्या. काँग्रेसकडून महापौरपदासाठी सातजण इच्छुक असल्याने नेत्यांच्या अडचणीत आणखी भर पडली आहे. काँग्रेसच्या शोभा बोंद्रे व भाजपच्या सविता भालकर यांच्यात ही निवडणूक होण्याची शक्यता आहे. उपमहापौरपदासाठी राष्ट्रवादीकडून नगरसेवक महेश सावंत व सचिन पाटील दोघांनी मागणी केल्यामुळे नेत्यांसमोर पेच निर्माण झाला. सोमवारी (ता.२१) या दोन्ही पदांसाठी उमेदवारी अर्ज भरण्याची मुदत असून काँग्रेसकडून त्याच दिवशी दुपारी उमेदवाराच्या नावाची घोषणा होणार आहे.

दरम्यान, भाजप-ताराराणी आघाडीने निवडणूक लढविण्याच्या निर्णयावर ठाम आहे. यामुळे महापौरपदाच्या निवडणुकीतील चुरस कायम आहे. निवडणुकीत कुठलाही दगाफटका होऊ नये यासाठी दोन्ही काँग्रेसच्या सदस्यांना सोमवारी अर्ज भरल्यानंतर सहलीवर पाठविण्यात येणार आहे. महापालिकेत काँग्रेस, राष्ट्रवादीचे बहुमत आहे. सर्वसाधारण महिलासाठी महापौरपद असल्याने अनेकजण इच्छुक आहेत. इच्छुक महिला सदस्या व त्यांच्या नातेवाइकांनी शिष्टमंडळासह नेते मंडळीची भेट घेऊन फिल्डिंग लावली आहे. शनिवारी काँग्रेस कमिटीत त्याची प्रचिती आली. इच्छुक महिला सदस्यांसोबत कुटुंबातील सदस्यही हजर होते. दुपारी एकच्या सुमारास काँग्रेसचे आमदार सतेज पाटील, शहराध्यक्ष प्रल्हाद चव्हाण यांनी महापौरपदासाठी इच्छुक महिला सदस्यांच्या मुलाखती घेतल्या.

नगरसेविका शोभा बोंद्रे, इंदुमती माने, उमा बनछोडे, दीपा मगदूम, जयश्री चव्हाण, निलोफर आजरेकर आणि प्रतीक्षा पाटील यांनी महापौरपदासाठी दावा केला. महापौरपदासाठी इच्छुकांची संख्या जादा असल्याने कुणीही दुखावले जाऊ नये म्हणून स्वतंत्रपणे चर्चा न करता एकत्रितपणे चर्चा केली. प्रतीक्षा पाटील या मुलाखतीसाठी दाखल झाल्यानंतर आमदार पाटील यांनी, 'तुम्हीही महापौरपदासाठी इच्छुक आहात का, मला माहीत नव्हते,' असे म्हणताच साऱ्यांनाच हसू आवरणे अवघड झाले. इच्छुकांशी चर्चा केल्यानंतर आमदार पाटील यांनी काँग्रेसच्या नगरसेवकांशी संवाद साधला. गटनेते शारंगधर देशमुख, प्रताप जाधव, संजय मोहिते, अर्जुन माने, अशोक जाधव, स्वाती यवलुजे, मधुकर रामाणे, सचिन चव्हाण आदी उपस्थित होते.

...................

महेश सावंत की सचिन पाटील?

राष्ट्रवादी काँग्रेसच्या वाट्याला उपमहापौरपद मिळणार आहे. पक्षाचे नेते हसन मुश्रीफ यांच्या उपस्थितीत सर्किट हाऊस येथे सायंकाळी नगरसेवकांची बैठक झाली. नगरसेवक महेश सावंत, सचिन पाटील हे या पदासाठी इच्छुक आहेत. ज्येष्ठतेचा निकष लावून उपमहापौरपदी संधी द्यावी असे सावंत यांचे म्हणणे आहे. सावंत हे कामानिमित्त बाहेरगावी असल्याने बैठकीला उपस्थित नव्हते. यावेळी माजी महापौर आर. के. पोवार, शहराध्यक्ष राजू लाटकर, प्रा. जयंत पाटील, नगरसेवक सुनील पाटील, संदीप कवाळे, नगरसेविका सरिता मोरे, माजी स्थायी समिती सभापती आदिल फरास, नंदकुमार मोरे, प्रकाश गवंडी, उत्तम कोराणे, विनायक फाळके, आशिष पाटील, सलीम मुल्ला, फिरोज सौदागर आदी उपस्थित होते. स्थायीच्या निवडणुकीत भाजप उमेदवाराला पाठिंबा देणारे राष्ट्रवादीचे नगरसेवक अजिंक्य चव्हाण, अफजल पिरजादे बैठकीला अनुपस्थित होते.

..............................

काँग्रेस आघाडी महापौर निवडणुकीत घोडेबाजार करणार नाही. महापालिकेत काँग्रेस, राष्ट्रवादीचे बहुमत आहे. यामुळे भाजप-ताराराणी आघाडीच्या नेत्यांनी महापौरपदाची निवडणूक बिनविरोध करण्यासाठी सहकार्य करावे. स्थायी सभापतिपदाच्या निवडणुकीत दगाफटका झाला. महापौरपदाच्या निवडणुकीत तसा प्रकार शक्य नाही. स्थायी निवडणुकीतून आम्ही खूप काही शिकलो. त्या घटनेपासून काही बोध घेतला नाही तर आम्हाला राजकारण सोडावे लागेल.

सतेज पाटील, आमदार

............

दोन्ही आघाड्यांच्या आज बैठका

महापौरपदाची निवडणूक दोन्ही आघाड्यांसाठी प्रतिष्ठेची ठरली आहे. दोन्ही आघाड्यांमध्ये इच्छुक आणि अल्पसंतुष्ट सदस्य आहेत. महापौरपदासाठी घोडेबाजाराचाही प्रयत्न झाला. महापौरपदाच्या निवडणुकीत कसलाही घोळ होऊ नये म्हणून नेत्यांनी काळजी घेतली आहे. आघाडी एकसंध ठेवण्यासाठी नगरसेवकांवर वॉच सुरू आहे. निवडणुकीबाबत रणनीती ठरविण्यासाठी काँग्रेस-राष्ट्रवादी आघाडीची रविवारी दुपारी बारा वाजता एकत्रित बैठक होत आहे. आमदार सतेज पाटील, आमदार हसन मुश्रीफ बैठकीत मार्गदर्शन करणार आहेत. सायंकाळी पाच वाजता भाजप-ताराराणी आघाडीच्या नगरसेवकांची बैठक आयोजित केली आहे. पालकमंत्री चंद्रकांत पाटील हे बैठकीला उपस्थित राहणार असल्याचे सांगितले जाते.

..................

कोल्हापूर : निगवे दुमाला येथील दिलीप गणपती कराडे (वय ६४) यांचे निधन झाले. सरपंच विक्रम कराडे यांचे ते वडील होत. त्यांच्या पश्चात पत्नी, दोन मुले, सुन व नातवंडे असा परिवार आहे. रक्षाविसर्जन रविवारी आहे.

पालकमंत्री पाटील यांचे आश्वासन

म. टा. प्रतिनिधी,कोल्हापूर

'राधानगरी तालुका निसर्ग संपन्नतेने नटलेला आहे. येथील जैवविविधता आणि सृष्टीसौंदर्य पर्यटकांना मोहित करणारे असून या ठिकाणी भरणारा काजवा महोत्सव देशभरात प्रसिद्ध आहे. राधानगरी तालुक्याच्या पर्यटन विकासासाठी ऑक्टोंबर ते मे या कालावधीत राहण्याची सुविधा, जेवण व वाहनांची सुविधा मोफत पुरवून पर्यटन घडवून आणण्यात येईल,' अशी ग्वाही पालकमंत्री चंद्रकांत पाटील यांनी दिली. शाहूकालीन बेनझीर व्हिला या इमारतीची डागडुजी करण्याचे आदेश यावेली पालकमंत्री चंद्रकांत पाटील यांनी दिले.

जैवविविधतेने नटलेल्या निसर्ग संपन्न राधानगरीच्या पर्यटनाला चालना देण्यासाठी राधानगरी ग्रामापंचायतीच्यावतीने पर्यटन महोत्सवाचे आयोजन करण्यात आले आहे. या महोत्सवाचे उद्घाटन पालकमंत्री चंद्रकांत पाटील यांच्या हस्ते झाले. यावेळी सरपंच कविता शेट्टी, प्रभारी जिल्हाधिकारी नंदकुमार काटकर, जिल्हा परिषदेचे माजी शिक्षण व अर्थ सभापती अभिजीत तायशेटे, तुझ्यात जीव रंगला या मालिकेचे कलाकार हार्दिक जोशी, अक्षया देवधर, तहसीलदार शिल्पा ओसवाल, एमटीडीसीचे दीपक हर्णे, दीपक शिरगांवकर, प्रकाश शिंदे, सचिन पालकर,पंचायत समितीचे उपसभापती हरीश पाटील, अरविंद हुपरीकर, सुधाकर साळूंखे यांची प्रमुख उपस्थिती होती.

पालकमंत्री पाटील म्हणाले, 'राधानगरी निसर्ग संपन्नतेने नटलेले आहे. या निसर्ग संपन्नतेचा आस्वाद घेण्यासाठी जगभरातून पर्यटक यावेत. यासाठी ऑक्टोबर ते मे या कालावधीमध्ये राहण्याची सुविधा, जेवण व वाहनांची सुविधा मोफत उपलब्ध करून देण्यासाठी पॅकेज सहलींचे आयोजन करण्यात येईल. त्यासाठी लागणारी आवश्यक ती सर्व मदत करू. पाटील यांच्या हस्ते राधानगरी तालुक्यातील विविध पर्यटन स्थळांच्या छायाचित्र प्रदर्शनाचे व

खाद्यमहोत्सवाचे उद्घाटन झाले. निसर्गसंपन्न राधानगरी या पुस्तिकेचे प्रकाशनही या कार्यक्रमात करण्यात आले. तर एम. आर. गुरव यांनी आभार मानले.

शेतीमालाला भाव देणे

हे सरकारचे कर्तव्य

फोटो -

म. टा. वृत्तसेवा, इचलकरंजी

'शेतकरी काबाडकष्ट करून पिकवतो, पण त्याच्या शेतमालाला योग्य किंमत मिळत नाही. त्याचबरोबर शेतीमालाचा उपभोग घेतो त्या ग्राहकालाही स्वस्त दरात शेतमाल मिळत नाही, त्यामुळे शेतमालाचा दर ठरवून तो शेतकऱ्याला देणे हे सरकारचे कर्तव्य आहे, असे प्रतिपादन खासदार राजू शेट्टी यांनी केले. ते येथील मनोरंजन व्याख्यानमालेत 'शिवार ते माजघर-शेतीमालाचा प्रवास सुखकर कसा होईल' या विषयावर बोलत होते.

ते म्हणाले, 'शेतीमधून तयार झालेला शेतमाल ग्राहकांच्यापर्यंत पोहोचेपर्यंत अनेक दलाल असल्यामुळे या मालाची किंमत वाढत जाते. शेतकऱ्याला कमी किंमत मिळते आणि ग्राहकही महागाईने त्रस्त आहे. अशी परिस्थिती का निर्माण झाली आहे याचा विचार करून यातून मार्ग काढला पाहिजे. शेतमालाला भाव मिळत नसल्याने नवी पिढी शेती करत नाही. शेती व्यवस्थाच जर अशा पद्धतीने मोडून पडली तर आपल्यासारख्या १२५ कोटी जनता असणाऱ्या देशाच्या अन्न सुरक्षिततेचा प्रश्‍न गंभीर होईल. शेतकऱ्यांना नव्या तंत्रज्ञानाचा लाभ देवून पायाभूत सुविधा पुरवून त्याच्या शेतीमालाला योग्य भाव मिळवून देणे हे सरकारचे कर्तव्य आहे. शेतकरी खेड्यातच राहील आणि त्याची शेती पिकत राहील याची काळजी घेतली तर देशापुढील महत्वाचा प्रश्‍न सुटेल. शेतीमाल नाशवंत असल्याने त्याला बाजारपेठेतील परिस्थितीवर अवलंबून राहावे लागते. पूर्णपणे व्यापार म्हणून शेती केली जात नाही. शेतकरी शेती करतो याचे कारण ती त्याची संस्कृती आहे. शेतकरी वर्ग मोठ्या प्रमाणात असला तरी तो विखुरलेला असून संघटीत नाही. आपल्या संघटित शक्तीने तो आपल्या मालाचा भाव ठरवू शकत नाही. उत्पादित केलेल्या मालाची विक्री जलद गतीने होण्यासाठी पायाभूत सुविधा तयार केल्या पाहिजेत. शेतकऱ्यांच्या समुहाला पिकानुसार क्लस्टर तयार करून कॉमन मार्केटिंगची यंत्रणा करावी लागेल. ग्राहकावर पडणारा बोजा कमी होऊन शेतकऱ्यांचा प्रश्‍नही सुटायचा असेल तर नव्या पद्धतीचा स्वीकार पुढील काळात करावाच लागेल. नव्या तंत्रज्ञानाचा वापर शेतीत केल्याशिवाय शेतकऱ्यांना लाभ मिळणार नाही. शेतीमाल उत्पादन ग्राहक यातील साखळी दूर केली तरच सर्वांचे हित होणार आहे, असे सांगितले.

म. टा. प्रतिनिधी, कोल्हापूर

मुस्लिम बांधवांच्या पवित्र रमजान महिन्यास शुक्रवारी प्रारंभ झाला. दिवसभर उपवास आणि नमाज पठणाद्वारे अल्लाची उपासना करत लहान मुलांपासून वृद्धांपर्यंत सर्वजण कडक उपवास करत आहेत.

गुरुवारी (ता.१७) चंद्रदर्शन झाल्यावर रमजान रोजास सुरुवात झाली. शुक्रवारी पहिला रोजा पाळण्यात आला, तर सायंकाळी उपवास सोडण्यात आला. शनिवारी दुसरा रोजा झाला. यंदा रमजान महिना मे महिन्यात आला असून, दिवस मोठा असल्याने सहरी आणि इफ्तार यांच्यामध्ये तब्बल साडेबारा तासांचा कालावधी आहे. कडक उन्हाळा व हवेत आर्द्रता असूनही मुस्लिम बांधव रोजाचे पालन करत आहेत. सहरीनंतर साडेचार वाजल्यापासून निर्जली उपवास करतात. दिवसभर पाचवेळा नमजपठण केले जाते, त्यामुळे शहरातील सर्व मशिदींमध्ये प्रार्थनेसाठी गर्दी होत आहे. कडक उपवास असतानाही नोकरी व व्यवसाय केले जात आहेत.

सायंकाळी सात वाजता इफ्तारपूर्वी नमाजपठण झाल्यानंतर साखर पाणी, चहा पिऊन अथवा खजूर खाऊन रोजा सोडला जात आहे. रोजा सोडल्यानंतर शाकाहारी व मांसाहारी पदार्थ एकाच ठिकाणी मिळावेत यासाठी मटण मार्केट परिसरातील कसबा मशीद ते बडी मशीद या परिसरात खाद्यपदार्थांचे स्टॉल मांडण्यात आहेत. रात्री उशिरापर्यंत खाद्यपदार्थांच्या स्टॉलवर खमंग पदार्थावर ताव मारण्यासाठी गर्दी होत आहे.

फाइल फोटो...

घाऊकमध्ये साखरेची घसरण

नाचणीचा दरही चार हजारांवरून २५०० रुपयांवर

म. टा. प्रतिनिधी, कोल्हापूर

अतिरिक्त उत्पादनामुळे साखर उद्योगाची झोप उडाली असतानाच साखरेच्या घाऊक दरात सातत्याने घसरण सुरू आहे, तर किरकोळ विक्री दर स्थिर राहिले. घाऊक बाजारात साखर प्रतिक्विंटल २५६५ ते २६६० रुपयांपर्यंत कमी झाली असताना किरकोळ बाजारात हाच दर एक महिन्यापासून ३२ रुपये किलोवर स्थिर राहिला. साखरेच्या बाजारात निराशेचे वातावरण असताना नाचणी दरातही घसरण झाली आहे. चार हजार रुपये क्विंटलवरून २५०० रुपयांपर्यंत दर कमी झाला. त्यामुळे किरकोळ बाजारात नाचणी सरासरी ३२ ते ३५ रुपयांनी विक्री सुरू आहे.

औषधी गुणधर्मामुळे गेल्या काही वर्षांत नाचणीच्या खरेदीत चांगलीच वाढ झाली आहे. जिल्ह्यासह प्रामुख्याने कर्नाटक राज्यातून आवक होत असते. नाचणीला मागणी चांगली असल्याने घाऊक बाजारात दर चांगलेच वधारले होते. सरासरी चार हजार रुपये क्विंटल दर असल्याने किरकोळ बाजारात ४५ ते ४८ रुपये किलोने विक्री सुरू होती. पण गेल्या दोन दिवसांत नाचणीच्या क्विंटल दरात निम्म्याने घट झाली आहे. चार हजार रुपयांवरून थेट २५०० रुपयांपर्यंत दर कमी झाला आहे. क्विंटलच्या दरात घट झाल्याने किरकोळ दरात तब्बल १३ रुपयांनी घट झाली आहे.

गळीत हंगामाचा एक महिन्याचा अवधी वगळता साखरेच्या दरात सातत्याने घसरण सुरू आहे. दरातील घसरण अद्याप थांबलेली नाही. सद्य:स्थितीत घाऊक बाजारात २५६५ ते २६६० पर्यंत दर कमी झाला आहे. दरात घसरण सुरू असली तरी मागणी नसल्याने बाजारपेठेत शांतता आहे. याचवेळी किरकोळ बाजारात साखरेचा दर ३२ रुपये किलोवर स्थिर आहे.

...................

किराणा दर (किलोमध्ये)

पोहे : ४२ रु.

साखर : ३० ते ३२ रु.

शेंगदाणा : ७५ रु.

मैदा : २८ रु.

रवा : २८ रु.

आटा : ३० रु.

गूळ : ४५ रू.

शाबू : ५५ रु.

तीळ : १४० रु.

..................

डाळीचे दर (किलोमध्ये)

तूरडाळ : ७० रु.

मूगडाळ : ७५ रु.

उडीदडाळ : ६५ रु.

हरभराडाळ : ५४ रु.

मसूरडाळ : ६० रु.

मूग : ७० रु.

मसूर : ६० रु.

चवळी : ८० ते १०० रु.

हिरवा वाटाणा : ४० ते ६० रु.

काळा वाटाणा : ७२ ते ८० रु.

मटकी : ८० रु.

छोले : १४० रु.

पावटा : १२० रु.

.................

तेलाचे दर (किलोमध्ये)

शेंगतेल : १२४ रु.

सरकीतेल : ९० रु.

खोबरेल तेल : ३०० रु.

वनस्पती तूप : ९० रु.

.....................

म. टा. प्रतिनिधी, कोल्हापूर

अवयवदान, शिक्षणासाठी मदत अशा सामाजिक उपक्रमांसह व्याखाने, पारंपरिक वाद्याच्या गजरात मिरवणुकीचे आयोजन करून भव्य शिवराज्यभिषेक सोहळा साजरा करण्याचा निर्णय अखिल भारतीय मराठा महासंघाच्या बैठकीत घेण्यात आला. अध्यक्षस्थानी निवृत्त पोलिस उपअधीक्षक विश्वासराव चौगुले होते.

मंगळवार पेठेतील बजापराव माने तालमीच्या सभागृहात शिवराज्याभिषेक सोहळा नियोजनासंदर्भात बैठक झाली. यावेळी बोलताना जिल्हाध्यक्ष वसंतराव मुळीक म्हणाले, 'शिवरायांनी सर्व जाती-धर्मातील लोकांना एकत्र करुन स्वराज्यांची स्थापना केली. राज्यभिषेक करुन स्वतंत्र राज्याची द्वाही फिरवली. शिवजयंती प्रमाणेच शिवराज्याभिषेक सोहळ्याचे मोठे महत्व असल्याने हा सोहळा साजरा करण्यासाठी बारा बलुतेदार व आठरा अलुतेदारांचा सहभाग राहील. शिवाजी महाराजांचा खरा इतिहास जनतेला कळावा यासाठी व्याख्यानांचे आयोजन करण्यात आले आहे. तसेच अवयवदान चळवळ, गरीब व गरजू विद्यार्थ्यांना शिक्षणांसाठी मदत हे सामाजिक उपक्रम राबविण्यात येतील.'

इतिहास संशोधक इंद्रजित सावंत म्हणाले, 'संपूर्ण मानवजातीला आदर्श घालून देणाऱ्या शिवरायांचा लढाऊ बाणा आपण विसरल्याने देशावर इंग्रजांचे राज्य आले. शिवरायांचे स्मरण ठेवण्यासाठी राजर्षी शाहू महाराजांनी शिवशक सुरू केला. शिवाजी महाराजांचा आदर्श युवा पिढीसमोर ठेवण्यासाठी शिवराज्यभिषेक सोहळा जल्लोषात साजरा करण्यासाठी युवकांनी सहभागी व्हावे.'

धनाजी जाधव यांनी सर्व जाती-धर्मातील नागरिकांना सोहळ्यात सहभागी करून घेण्याची सूचना केली. विद्यार्थ्यांना सोहळ्यात सहभागी करुन घेण्याचे आवाहन सुरेंद्र घोरपडे यांनी केले. यावेळी साजिद खान, संभाजी जगदाळे, अशोक माळी, प्रसाद जाधव यांनी सूचना केल्या. बबनराव रानगे यांनी प्रास्ताविक केले. व्ही. के. पाटील, संजय जाधव, शशिकांत पाटील, महादेव पाटील, उत्तम जाधव, संजय काटकर, वैभव राजेभोसले, किशोर घाटगे, डॉ. शिवाजीराव हिलगे, अशोक पोवार, रमेश मोरे आदी उपस्थित होते.

००००

फलकावर शिवरायांचीच प्रतिमा असावी

शिवजयंती व शिवराज्याभिषेक सोहळ्यासाठी अनेक ठिकाणी डिजिटल फलक उभारले जातात. या फलकावर शिवरायांच्या प्रतिमेबरोबर नेतेमंडळी, सामाजिक कार्यकर्ते स्वत:लाही मिरवून घेत असतात. अशा फलकांवर फक्त शिवरायांची प्रतिमा हवी यासाठी प्रबोधन करण्याची सूचना बहुतांश कार्यकर्त्यांनी केली.

भाजलेल्या महिलेचा मृत्यू

कोल्हापूर : स्वयंपाक करताना गॅसचा भडका उडाल्याने जखमी झालेल्या महिलेचा उपचारादरम्यान शनिवारी मृत्यू झाला. सुजाता भीमराव रेडेकर (वय ४०, रा. सोनाळी, ता. कागल) असे मृत महिलेचे नाव आहे. सोमवारी (ता. १४) सुजाता रेडेकर भाजून गंभीर जखमी झाल्या होत्या. त्यांच्यावर सीपीआरमध्ये उपचार सुरू होते. प्रकृती अधिकच बिघडल्याने शनिवारी सकाळी सव्वासातच्या सुमारास त्यांचा मृत्यू झाला. या घटनेची नोंद सीपीआर पोलिस चौकीत झाली आहे.

दुचाकी घसरून तरुण जखमी

कोल्हापूर : टेंबलाईवाडी नाका येथे दुचाकी घसरून झालेल्या अपघातात रविराज महेश कसबेकर (वय २१, रा. टेंबलाई नका) जखमी झाला. शनिवारी सकाळी नऊच्या सुमारास हा अपघात झाला. परिसरातील नागरिकांनी जखमी कसबेकरला उपचारासाठी सीपीआरमध्ये दाखल केले. उपचारानंतर त्याची प्रकृती ठिक असल्याचे डॉक्टरांनी सांगितले.

तरुण जखमी

कोल्हापूर : कोतोली (पन्हाळा) येथे दुचाकीच्या आडवे कुत्रे आल्याने दुचाकी घसरून अपघात झाला. यात कृष्णा अर्जुन सावंत (वय २९, रा. बांदिवडे, ता. पन्हाळा) गंभीर जखमी झाला. शनिवारी सकाळी अपघात घडला. जखमी सावंतला परिसरातील नागरिकांनी उपचारासाठी सीपीआरमध्ये दाखल केले.

म. टा. प्रतिनिधी, कोल्हापूर

'दिल्लीत जाऊन पुरातत्त्व कार्यालयासमोर आंदोलन करा' या पालकमंत्री चंद्रकांत पाटील यांच्या वक्तव्याचा कोल्हापूर शहर व जिल्हा सर्वपक्षीय नागरी कृती समितीच्या शनिवारी झालेल्या बैठकीत निषेध करत त्यांच्या हकालपट्टीची मागणी केली. कार्यकर्त्यांनी पालकमंत्र्यावर टीकेची झोड उठवत पालकमंत्र्यांच्या राजीनाम्याची मागणीही केली. दडपशाही झाली तरी मंगळवारी (ता.२२) शिवाजी पुलावर भिंत बांधण्याचे आंदोलन केले जाईल, असा पुनरुच्चारही बैठकीत केला. अध्यक्षस्थानी निमंत्रक माजी महापौर आर.के. पोवार होते.

पर्यायी पुलाचे बांधकाम त्वरीत सुरु करावे, या मागणीसाठी सर्वपक्षीय नागरी कृती समितीच्यावतीने आंदोलन सुरू आहे. त्याचा समाचार घेताना पालकमंत्री पाटील यांनी 'आंदोलकांनी दिल्लीत जाऊन आंदोलन करावे. विमानाची तिकिटे काढून देतो. मंडप बांधून देतो' असे वक्तव्य केले होते. या वक्तव्याचा महाराणा प्रताप चौकातील आर.के. पोवार यांच्या घरी झालेल्या बैठकीत निषेध करण्यात आला.

पोवार म्हणाले, 'पालकमंत्र्यांनी जनतेची काळजी घ्यायची आहे. आम्ही जनतेची काळजी म्हणून आंदोलन करत आहे. पण पालकमंत्री दडपशाहीची भाषा करत आहेत. त्यांना पैशाची मस्ती आली आहे. पालकमंत्री सार्वजनिक बांधकाम मंत्री होते. त्यांनी तीन वर्षांत शिवाजी पुलाबाबत का निर्णय घेतला नाही? जनतेच्या आंदोलनाची खिल्ली उडवणाऱ्या पालकमंत्र्यांचा मुख्यमंत्र्यांनी राजीनामा घ्यावा.'

सतीशचंद्र कांबळे म्हणाले, 'राज्यात पुलांबाबत अनेक ठिकाणी आंदोलने झाली. पण कोणत्याही मंत्र्याने दिल्लीत जाऊन आंदोलन करण्याचा सल्ला दिला नाही. पण पालकमंत्री कोल्हापुरातील जनतेस मुंबईत जाऊन आंदोलन करण्याचा सल्ला देत आहेत. चंद्रकांत पाटील पालकमंत्री नसून बालकमंत्री आहेत.'

बाबा पार्टे म्हणाले, 'पर्यायी पूलप्रश्नी आंदोलन सुरू आहे. तरीही जिल्हाधिकारी अविनाश सुभेदार व राष्ट्रीय महामार्गाचे कार्यकारी अभियंता विजय कांडगावे रजेवर जात आहेत. पालकमंत्र्यांचा अधिकाऱ्यांवर वचक नाही.'

किशोर घाटगे यांनी गेल्या चार वर्षात पालकमंत्र्यांनी एकही प्रश्न मार्गी लावलेला नाही. त्यामुळे जनतेला 'अडचणीतील कोल्हापूर' दाखवण्याची गरज आहे, अशी खिल्ली उडवली. पुलावर भिंत बांधून पूल वाहतूक बंद करुन जनतेस वेठीस धरू नका, अशी सूचना संभाजीराव जगदाळे यांनी केली. समितीचे निमंत्रक आर. के. पोवार यांनी पालकमंत्र्यानी पुढाकार घेऊन जिल्ह्यातील तीन खासदारांना एकत्र करुन दिल्लीत पाठपुरावा करावा. प्रसंगी राष्ट्रपतींना वटहुकूम काढण्याची विनंती करावी, अशी सूचना केली. तानाजी पाटील यांनी पालकमंत्र्यांनी पालकाची जबाबदारी पार पाडावी, मालक होऊ नये असे मत व्यक्त केले.

बैठकीला स्वाभिमानी शेतकरी संघटनेचे जिल्हाध्यक्ष भगवान काटे, दिलीप पवार, अनिल कदम जयकुमार शिंदे, किसन कल्याणकर, रमेश मोरे, अजित सासने, अनिल कदम, जयदीप शेळके, गौरव लांडगे आदी उपस्थित होते.

००००

आंदोलनात नेत्यांच्या सहभागाबाबत प्रयत्न

धोकादायक पुलाचा सर्वात जास्त धोका ग्रामीण भागातील जनतेला आहे. मंगळवारच्या आंदोलनात ग्रामीण भागातील जनतेने सहभागी व्हावी यासाठी प्रयत्न केले जाणार आहेत. आमदार राजेश क्षीरसागर, चंद्रदीप नरके, माजी आमदार पी. एन. पाटील, संपतराव पवार यांची भेट घेऊन आंदोलनात सहभागी होण्याचे आवाहन केले जाणार आहे, असे निमंत्रक आर.के. पोवार यांनी सांगितले.

म. टा. प्रतिनिधी, कोल्हापूर

सूरजा-गोंद्या गँगमध्ये दोन अल्पवयीन मुलांसह सहा आरोपी आहेत. या आरोपींनी गेल्या पाच वर्षांत ३४ गुन्हे केल्याची नोंद पोलिस ठाण्यांमध्ये आहे. यातील चौघांवर 'मोक्का'च्या कारवाईला मंजुरी मिळाल्याने कोठडीतून पळ काढण्याचे नियोजन टोळीचा प्रमुख सूरजा आणि गोंद्या या दोघांनी केले होते. वाटमारी, घरफोडी, दुचाकीचोरी, चेन स्नॅचिंग, दरोडे, मारहाण असे गंभीर गुन्हे या टोळीवर दाखल आहेत. रात्रीच्या वेळी वाटेत दुचाकीस्वारांना अडवून त्यांच्याकडील किमती ऐवज आणि दुचाकी लंपास करणाऱ्या या टोळीने वारणा खोऱ्यात दहशत निर्माण केली होती.

सूरज सर्जेराव दबडे (वय २२, रा. वाठारपैकी, साखरवाडी, ता. हातकणंगले), गोविंद वसंत माळी (वय १९), ओंकार महेश सूर्यवंशी (वय १९, दोघेही रा. कासेगाव, जि. सांगली) आणि विराज गणेश कारंडे (वय १९, रा. दरवेश पाडळी, ता. हातकणंगले) या चौघांसह दोन अल्पवयीनांचा या टोळीत समावेश आहे. सूरजा-गोंद्याची टोळी या नावाने ही टोळी वारणा परिसरात कुख्यात आहे. गेल्या पाच वर्षांत टोळीने ३४ गंभीर गुन्हे केल्याची नोंद पोलिस ठाण्यांमध्ये दाखल आहे. याशिवाय इतरही अनेक गुन्हे त्यांनी केल्याचा पोलिसांना संशय आहे. टोळीतील सर्वच आरोपींनी वयाच्या १५ ते १६ व्या वर्षापासून गुन्ह्यांची सुरुवात केली आहे. पोलिसांनी टोळीला अटक केल्यानंतर वारणा खोऱ्यातील नागरिकांनी सुटकेचा नि:श्वास सोडला होता. मात्र, आरोपींनी पोलिसांच्या कोठडीतून पलायन केल्याने पुन्हा त्यांची दहशत निर्माण झाली आहे. दोन आरोपी पोलिसांच्या हाती लागले असले तरी अद्याप दोन आरोपी फरार आहेत. त्यांच्याकडून पुन्हा गुन्हे घडण्याची शक्यता असल्याने नागरिकांमध्ये भीतीचे वातावरण आहे.

०००

चौकट..

सूरजा-गोंद्या टोळीचे गुन्हे

दरोडे - ४

दुखापत - ६

जबरी चोरी - १

घरफोडी - ८

चोरी - १२

गंभीर दुखापत - ३

एकूण गुन्हे - ३४

००००

न्यायप्रविष्ठ गुन्हे - १९

तपास सुरू असलेले गुन्हे - १५

कोट..

कोठडीतून पळालेल्या चार आरोपींपैकी दोघांना अटक केली असून, उर्वरित दोघांच्या अटकेसाठी दहा पथकांकडून काम सुरू आहे. लवकरच ते पोलिसांच्या हाती लागतील. दरम्यान, असे प्रकार पुन्हा घडू नयेत, यासाठी दक्षता घेण्याच्या सूचना सर्वच पोलिस ठाण्यांना दिल्या आहेत.

संजय मोहिते, पोलिस अधीक्षक

(फोटो आहेत)

म. टा. प्रतिनिधी, कोल्हापूर

शाहूवाडी पोलिस ठाण्यातून पलायन केलेल्या चार आरोपींपैकी ओंकार सूर्यवंशी आणि विराज कारंडे या दोघांना पकडल्यानंतर त्यांच्या चौकशीतून धक्कादायक माहिती समोर येत आहे. आरोपींनी पोलिसांच्या निष्काळजीपणाचा फायदा घेत अवघ्या दोन तासांत कोठडीचे ग्रील उचकटले. बंदोबस्तावरील पोलिसांसह पोलिस निरीक्षकांनीही कोठडीची पाहणी केली. मात्र एकाही पोलिसाला शंका आली नाही. गाढ झोपलेल्या पोलिसांमुळेच आरोपी आरामात पोलिस ठाण्यातून बाहेर पडले.

शाहूवाडी पोलिसांनी चोरीच्या गुन्ह्यात सूरजा-गोंद्या टोळीला ताब्यात घेतले होते. कोर्टाच्या आदेशानुसार २० मेपर्यंत टोळीला पोलिस कोठडी मिळाली होती. कोठडीला दोन दरवाजे आहेत. लोखंडी गजांच्या दरवाजातून कोठडीतील आरोपींच्या हालचाली स्पष्ट दिसत नाहीत, त्यामुळे पोलिसांनी केवळ ग्रीलचा दरवाजा बंद करून त्याला कुलूप लावले होते. टोळीचा प्रमुख सूरज दबडे याने पोलिसांचा निष्काळजीपणा हेरून कोठडीतून पळ काढण्याचे नियोजन केले. ग्रील उचकटण्यासाठी त्याने शौचालयाची लोखंडी कडी काढली. शुक्रवारी रात्री साडेआठच्या सुमारास त्याने लोखंडी ग्रीलची पहिली पट्टी काढली. पोलिसांची चाहूल लागताच तो हातातील कडी लपवून झोपेचे सोंग घेत होता. रात्री पावणेअकराच्या सुमारास निरीक्षक अनिल गाडे यांनी पोलिस ठाण्यात येऊन कोठडीची पाहणी केली. साडेआठ ते पावणेअकराच्या दरम्यान बंदोबस्तावरील पोलिसांनी तीनवेळा कोठडीची पाहणी केली. मात्र, एकदाही त्यांना आरोपींच्या हालचालींचा संशय आला नाही. अवघ्या दोन तासात आरोपी सूरजने ग्रीलच्या तीन पट्ट्या काढल्या.

मध्यरात्रीनंतर कोठडीतून बाहेर पडण्यासाठी आरोपींचे प्रयत्न सुरू झाले. पोलिसांची वर्दळ सुरू असल्याने त्यांनी पोलिस झोपण्याची वाट पाहिली. पहाटेच्या सुमारास ठाण्यातील सर्व पोलिस झोपल्याचे लक्षात येताच प्रथम सूरज दबडे आणि गोविंद माळी हे दोघे कोठडीतून बाहेर पडले. व्हरांड्यातून ते आरामात पोलिस ठाण्याच्या बाहेर आले. ५० फूट अंतर ते हळुवार चालत गेले. विशेष म्हणजे ठाण्याबाहेर तीन कुत्री होती. यातील एकाही कुत्र्याला आरोपींच्या जाण्याची चाहूल लागली नाही. हा प्रकार सीसीटीव्ही कॅमेऱ्यात कैद झाला आहे. सूरजा-गोंद्या पळून गेल्यानंतर ओंकार सूर्यवंशी आणि विराज कारंडे हे दोघे तासभर कोठडीतच थांबले. पळून जाताना पोलिसांना सापडेल या भीतीने ते थांबले होते. तासाभरात एकही पोलिस कोठडीकडे फिरकला नाही. यानंतर दोघांनी पळ काढला. पोलिस ठाण्याच्या बाहेरील दुचाकी (एम.एच. १० बी.डी. २०२३) घेऊन ते काही अंतर ढकलत गेले. यानंतर दुचाकी सुरू करून ते वारणानगरच्या दिशेने निघाले. वारणानगर परिसरात दुचाकीतील पेट्रोल संपल्याने तिथेच दुचाकी सोडून त्यांनी दुसरी दुचाकी चोरली. यानंतर ते पुन्हा शाहूवाडी तालुक्यातील जंगलाच्या दिशेने गेले. दिवसभर पोलिसांची नजर चुकवून ते जंगल परिसरात भटकले. रात्री पुन्हा ते वारणा परिसरात आले. झोपण्यासाठी तांदूळवाडीत एका मंदिरात गेल्यानंतर ते पोलिसांच्या खबऱ्यांच्या नजरेत आले. पोलिसांची चाहूल लागताच त्यांना पुन्हा पोलिसांना चकवा देण्याचा प्रयत्न केला. मात्र, शनिवारी सकाळी ते किणी टोलनाक्याजवळ पोलिसांच्या हाती लागले.

०००

कोठडीतून पळाल्यानंतरही दोन गुन्हे

ओंकार आणि विराज या दोघांनी कोठडीतून पलायन केल्यानंतर पोलिस ठाण्याच्या बाहेर लावलेली दुचाकी चोरली. यानंतर वारणानगर परिसरात दुसरी दुचाकी चोरली. कोठडीतून पळाल्यानंतर अवघ्या तासाभरात त्यांनी दुचाकी चोरीचे दोन गुन्हे केले. या दोन्ही गुन्ह्यांची नोंद केली आहे. याशिवाय चोरीचे अन्य गुन्हे केल्याचीही शक्यता असल्याने पोलिसांकडून दोन्ही आरोपींची चौकशी सुरू आहे. दुचाकी चोरण्यात या आरोपींचा हातखंडा असल्याचे पोलिसांनी सांगितले.

०००

घटनाक्रम...

शुक्रवारी रात्री साडेआठच्या सुमारास सूरज दबडेने ग्रीलची पहिली पट्टी काढली

पावणेअकराला निरीक्षकांनी केली कोठडीची पाहणी

बाराच्या सुमारास पोलिसांकडून कोठडीची पाहणी

पहाटे चारच्या सुमारास सूरज दबडे आणि गोविंद माळी कोठडीतून पळाले

पहाटे पाचच्या सुमारास ओंकार सूर्यवंशी आणि विराज कारंडे कोठडीतून पळाले

पोलिस ठाण्याबाहेरून पहिली दुचाकी चोरली

वारणानगरजवळ दुसरी दुचाकी चोरली

शुक्रवारी मध्यरात्री आरोपी तांदूळवाडी परिसरात असल्याची पोलिसांना मिळाली माहिती

पोलिसांकडून आरोपींवर वॉच

शनिवारी सकाळी नऊच्या सुमारास दोन आरोपींना किणी टोल नाक्यावर अटक

म. टा. प्रतिनिधी, कोल्हापूर

महापालिकेने २०१८-१९ या वर्षाच्या घरफाळा बिलामध्ये सवलत योजना जाहीर केली आहे. मिळकतधारकांनी जून २०१८ अखेर घरफाळ्याची संपूर्ण रक्कम भरल्यास बिलामध्ये सहा टक्के सवलत मिळणार आहेत. तसेच रेन वॉटर हार्वेस्टिंग सिस्टीम, कृषी मिश्रखत व बायोगॅस प्रक्रियेचा १०० टक्के अवलंब, सौरऊर्जा व पारंपरिक ऊर्जा स्रोताचा वापर केला असल्यास योजनेसाठी एक टक्का इअतिरिक्त सूट जाहीर केली आहे.

सांडपाण्याचा पुनर्वापर, पर्यावरणपूरक गृह निर्माण प्रकल्पाला चालना देताना घरफाळा बिलाच्या सर्वसाधारण करामध्ये प्रत्येकी एक टक्का अतिरिक्त सवलत असणार आहे. यासाठी महापालिकेच्या संबंधित विभागाच्या प्रमुखाच्या प्रमाणपत्रासह लेखी अर्ज दाखल करणे आवश्यक आहे.

महापालिकेने २०१८-१९ या वर्षाच्या घरफाळा बिलांचा तपशील महापालिकेच्या www.kolhapurcorporation.gov.in या संकेतस्थळावर जाहीर केला आहे. तसेच महापालिकेच्या नागरी सुविधा केंद्र येथेही कर रकमेचा तपशील पाहण्याची व बिल भरण्याची सुविधा आहे. घरफाळा बिले स्पीड पोस्टाद्वारे पाठविली आहेत. बिल मिळाले नाही म्हणून दंडाची रक्कम माफ होणार नाही. थकबाकी रकमेवर दरमहा दोन टक्के दंडाची आकारणी होणार असल्याचे महापालिकेने म्हटले आहे.

माजी सैनिक, शौर्यपदक विजेते सैनिक अथवा सैनिकांच्या विधवा पत्नी यांच्या एका मिळकतीची मालमत्ता कराची संपूर्ण रक्कम माफ करण्यात येणार आहे. यासाठी जिल्हा सैनिक अधिकाऱ्यांचे प्रमाणपत्र अर्जासोबत दाखल करावयाचे आहे. वार्षिक पाच लाखांपेक्षा अधिक रक्कम असलेल्या मिळकतधारकांना कराच्या बिलाबरोबर विनंती पत्र देण्यात येऊन सहा टक्के सवलतीचा लाभ घेण्यासाठी कळविण्यात येणार आहे. तसेच मिळकतधारकांना आपल्या एन्ड्राईड मोबाइलवर http://kolhapurcorportion.gov.in:8080/kmcweb/PT.aspxú या लिंकवर करदाता क्रमांक सांगून कराची रक्कम नागरी सुविधा केंद्र, अॅक्सिस बँक येथे जमा करता येईल. यासाठी कराचे बिल सोबत आणण्याची गरज नाही. नागरिकांनी कराची रक्कम भरुन महापालिकेस सहकार्य करावे असे आवाहन केले आहे.

..................

म. टा. प्रतिनिधी, कोल्हापूर

भाजप सरकारला चार वर्षे होऊनही निवडणुकीपूर्वी व नंतर दिलेल्या आश्वासनांची कोणतीही पूर्तता झालेली नाही. भाजप व पंतप्रधान नरेंद्र मोदी यांनी देशातील नागरिकांची दिशाभूल केली आहे. या फसव्या घोषणा लोकांसमोर आणण्यासाठी सर्व डाव्या पक्षाच्यावतीने 'जन एकता जन अधिकार आंदोलन' हाती घेतले आहे. 'मोदी सरकारके चार साल, पोल खोल-हल्ला बोल..' आंदोलन बुधवारी (ता. २३) संपूर्ण देशात करण्यात येणार आहे. याच भाग म्हणून बुधवारी सायंकाळी पाच वाजता बिंदू चौक येथून मोटारसायकल रॅली काढण्यात येणार आहे. रविवारी एसटी स्टँड परिसरात झालेल्या जनजागृती सभेत घोषणा केली. यावेळी सर्वच पक्षाच्या वक्त्यांनी भाजप सरकारव जोरदार टीका केली.

भाकपचे राज्य सरचिटणीस नामदेव गावडे म्हणाले, 'भाजप सरकारने सत्तेवर येण्यापूर्वी आश्वासनाची खैरात केली. प्रत्येकाच्या खात्यावर १५ लाख जमा करण्याबरोबरच दरवर्षी बेरोजगारांची संख्या कमी केली जाईल असे सांगतिले. 'अच्छे दिना'चे स्वप्न दाखवताना दिलेल्या घोषणांची पूर्तता केलेली नसल्याने या सर्व योजना फसव्या निघाल्या आहेत. या योजनांचा पोल खोल करण्यात येणार आहे. निवडणूक प्रचारांमध्ये काँग्रेसमध्ये भ्रष्टाचारांचे बेछूट आरोप केले. पण भाजप सरकारच्या काळात राफेल, व्यापम घोटाळ्याकडे दुर्लक्ष केले. भ्रष्ट मार्गातून जमा झालेला सर्व पैसा भाजपकडे जमा झाला. याचाच वापर देशातील विविध राज्यातील निवडणुकांमध्ये करुन लोकशाहीचा गळा घोटला जात आहे. भाजपने सत्ताकाळात अनेक घोटाळे समोर आले असताना त्याची चौकशीही केलेली नाही. भाजपची ही सर्व पोल खोल जनआंदोलनाच्या माध्यमातून समोर आणली जाणार आहे. यासाठी बिंदू चौक येथून बुधवारी सायंकाळी पाच वाजता रॅली काढण्यात येणार आहे. रॅली बिंदू चौक, मिरजकर तिकटी, बिनखांबी गणेश मंदिर, महाद्वार रोड, महापालिका, बिंदू चौकातून राजारामपुरी येथे जाणार आहे. राजारामपुरी आईचा पुतळा येथून पुन्हा बिंदू चौकात रॅली येईल. आंदोलनामध्ये अधिक लोकांचा सहभाग होण्यासाठी सोमवारी मिरजकर तिकटी व मंगळवारी शिवाजी पेठेतील ऊभा मारुती चौकात सायंकाळी ६.३० वाजता सभा होणार आहे.'

सतीश कांबळे म्हणाले, 'भाजप सरकारने 'अच्छे दिना'चे स्वप्न दाखवताना घोषणाचा सपाटा लावला. या घोषणांची पूर्तता झालेली नसताना दिवसेंदिवस महागाई वाढत आहे. आंतरराष्ट्रीय बाजारात क्रुड ऑइलचे दर कमी झालेले असताना देशातील इंधनाच्या दरात वाढ झाली आहे. विविध स्वरुपाचे कर लाऊन जनतेची लूट केली जात आहे. वाढलेल्या इंधन दरांमुळे महागाई वाढत असल्याने सर्वसामान्यांचे जगणे मुश्कील बनले आहे. सत्तेवर येण्यापूर्वी एफडीआयला कडाडून विरोध करणाऱ्या भाजपने सत्तेवर आल्यानंतर एफडीआय लागू करून जनतेची फसवणूक केली आहे. या फसवणुकीला विरोध करण्यासाठी जनआंदोलन हाती घेण्यात आले आहे.'

यावेळी वसंतराव पाटील, बाबूराव कदम, गिरीश फोंडे यांनी मनोगत व्यक्त केले. कोपरा सभेस राधानगरी पंचायत समितीच्या माजी सभापती वंदना पाटील, बी. एल. बरगे, रघुनाथ कांबळे, सीमा पाटील यांच्या सह डाव्या पक्षाचे कार्यकर्ते उपस्थित होते. दिलदार मुजावर यांनी आभार मानले.