भगिनी महोत्सवात स्त्री शक्तीचा गौरव नसीमा हुरजूक, अश्विनी दानिगोंड यांना भगिनी पुरस्कार प्रदान म. टा. प्रतिनिधी, कोल्हापूर मराठीतील आघाडीच्या कलाकारांचा सहभाग, गीत नृत्याचा धमाकेदार आविष्कार आणि प्रेक्षकांचा शिट्ट्या, टाळ्यांचा वर्षाव अशा जल्लोषी वातावरणात रंगलेल्या भगिनी महोत्सवात स्त्री शक्तीचा गौरव करण्यात आला. याप्रसंगी विविध क्षेत्रांत कर्तबगारी सिद्ध केलेल्या पाच महिलांचा भगिनी पुरस्कारांनी सन्मान करताच हजारो नागरिकांनी उभे राहून टाळ्यांच्या गजरात त्यांना जणू सलाम ठोकला. प्रायव्हेट हायस्कूलच्या मैदानावर रविवारी सायंकाळी हा दिमाखदार सोहळा झाला. ज्येष्ठ सिने अभिनेत्री सुषमा शिरोमणी, अभिनेत्री सरोज सुखठणकर, हेल्पर्स ऑफ दि हँडिकॅप संस्थेच्या नसीमा हुरजूक, उद्योजिका अश्विनी दानिगोंड आणि आंतरराष्ट्रीय स्कुबा डायव्हर खुशी परमार यांचा भगिनी पुरस्कार प्रदान करण्यात आले. पालकमंत्री चंद्रकांत पाटील, खासदार धनंजय महाडिक, आमदार राजेश क्षीरसागर, महापौर स्वाती यवलुजे यांच्या प्रमुख उपस्थितीत कार्यक्रम झाला. कोल्हापुरी फेटा, शाल, श्रीफळ, सन्मानचिन्ह व रोख ११ हजार रुपये असे पुरस्काराचे स्वरूप आहे. याप्रसंगी मिसेस भगिनी स्पर्धेतील पहिल्या तीन विजेत्या स्नेहल वैभव चौगुले, राजनंदिनी रामेश्वर पत्की, प्रिया कमलेझ नाझरे तर मिस भगिनीतील विजेत्या पूजा संकपाळ, साक्षी कमते, पूर्वा कोडोली यांना बक्षिसे देण्यात आली. भगिनी मंचच्या अध्यक्षा वैशाली क्षीरसागर यांनी महोत्सवाची संकल्पना स्पष्ट केली. ऋतुराज क्षीरसागर यांनी स्वागत केले. कार्यक्रमाला पश्चिम महाराष्ट्र देवस्थान समितीचे अध्यक्ष महेश जाधव, परिवहन समिती सभापती राहुल चव्हाण, सुरेखा शहा, अजिंक्य चव्हाण, सुनंदा मोहिते, तेजस्विनी इंगवले, माजी उपमहापौर रविकिरण इंगवले, दिगंबर फराकटे, दिग्दर्शक यशवंत भालकर आदी उपस्थित होते.
मोबाइल अॅप डाउनलोड करा आणि राहा अपडेट