म. टा. प्रतिनिधी, कोल्हापूर

अपघातात डोक्याला जबर मार बसला, काही दिवस उपचार करण्यात आले. मात्र ब्रेनडेड झालेल्या या तरुणाला बाहेर काढण्यात यश आले नाही. दु:खाचा डोंगर कोसळलेल्या अवस्थेतही पत्नी आणि अन्य नातेवाईकांनी त्याची इच्छा पूर्ण करण्याचा निर्धार केला. त्याच्या इच्छेनुसार त्याचे अवयव दान करण्यात आले. हृदय, किडनी आणि यकृत दान केल्याने चौघांना जीवनदान मिळाले. मरणानंतरही मिळालेल्या 'अमर'त्वाची ही कहाणी. कोल्हापुरात पहिल्यांदाच ग्रीन कॉरिडॉरच्या माध्यमातून पुणे आणि मुंबईला मानवी अवयव पाठवण्याची ही प्रक्रिया पार पडली.

अमर पांडुरंग पाटील (वय ३१, रा. निगवे खालसा) असे या तरुणाचे नाव. टेम्पोच्या धडकेत अमरच्या डोक्याला गंभीर दुखापत झाली होती. सीपीआरमध्ये उपचारानंतर त्याला अॅस्टर आधारमध्ये दाखल करण्यात आले. मात्र डॉक्टरनी त्याला ब्रेनडेड घोषित केले. पत्नीसह सर्वच नातेवाईकांसाठी हा मोठा धक्का होता. डॉक्टरांनी कुटुंबीयांना धीर देत ब्रेनडेड झालेल्या व्यक्तीचे अवयव दान करता येतात, असे सांगितले होते. विशेष म्हणजे अमरनेही पत्नी शीतलकडे त्यापूर्वी अशीच इच्छा बोलून दाखवली होती. पत्नी, भाऊ आणि मुलांची क्षणक्षणाला होणारी घालमेल उपस्थिताचे हृदय पिळवटून टाकत होती. याही अवस्थेत पाटील कुटुंबीयांनी अवयवदानाचा निर्णय घेतला. त्यानुसार शनिवारी अमरच्या किडनी, हदय आणि यकृत काढण्याचा निर्णय झाला. अवयव ज्या ठिकाणी पाठवण्यात येणार होते त्या पुणे आणि मुंबईतील हॉस्पिटल्सना कल्पना देण्यात आली. सर्व त्या प्रक्रिया पूर्ण करण्यात आल्या. पोलिस प्रशासनाला माहिती देण्यात आली आणि तज्ज्ञ डॉक्टरांच्या मार्गदर्शनाखाली दुपारी दोनपासून अॅस्टर आधारमध्ये अवयव काढण्याची प्रक्रिया सुरू झाली.

दोन ते तीन या वेळेत हृदय काढण्याची प्रक्रिया सुरू झाली. चार वाजून तीन मिनिटांनी हृदय हॉस्पिटलमधून विशेष अॅम्ब्युलन्सने विमानतळाकडे नेण्यात आले. चार वाजून ११ मिनिटांनी ते विमानतळावर पोहोचले. या काळात एअर अॅम्ब्युलन्स विमानतळावर आली होती. अॅस्टर आधार ते विमानतळापर्यंत ग्रीन कॉरिडॉर करण्यात आला होता. अवघ्या नऊ मिनिटांत हृदय विमानतळावर पोहोचले. हृदय घेऊन एअर अॅम्ब्युलन्सने मुंबईच्या दिशेने तातडीने उड्डाण केले. दुपारी चार वाजून ३० मिनिटांनी यकृत व ५.५० वाजता किडनी हॉस्पिटलमधून बाहेर काढण्यात आल्या. ग्रीन कॉरिडॉरमधूनच किडनी आणि यकृत अनुक्रमे पुण्याच्या ज्युपिटर आणि आदित्य बिर्ला हॉस्पिटलकडे नेण्यात आले. विशेष अॅम्ब्युलन्ससाठी हायवेवरही स्वतंत्र मार्ग ठेवला होता. त्यामुळे केवळ अडीच तासांत अवयव पुण्यात पोहोचले. तेथे तातडीने शस्त्रक्रिया करण्यात आल्या. एका किडनीचे प्रत्यारोपण अॅस्टरमध्येच करण्यात आले.

अडीच तासांत अवयव हॉसिप्टलमध्ये

संध्याकाळी ४.०३

हृदय हॉस्पिटलबाहेर

४.११

विमानतळावर

४.३० वा.

यकृत आणि

५.५०

किडनी अॅम्ब्युलन्समधून पुण्याकडे

पान ३ मेन

...........................

भिंत घालून शिवाजी पूल बंद करू

सर्वपक्षीय नागरी कृती समितीचा इशारा, पर्यायी पुलाचे बांधकाम पूर्ण करण्याची मागणी

म. टा. प्रतिनिधी, कोल्हापूर

धोकादायक शिवाजी पुलाच्या दोन्ही बाजूला भिंत बांधून वाहतुकीस बंद करण्याचा इशारा कोल्हापूर जिल्हा सर्वपक्षीय नागरी कृती समितीने पोलिस प्रशासनाला दिला. शिवाजी पुलाला असलेल्या पर्यायी पुलाचे शिल्लक बांधकाम सुरु करण्यासंदर्भात जिल्हाधिकाऱ्यांशी चर्चा करुन निर्णय घेतला जाईल, असे आश्वासन पोलिस अधीक्षक संजय मोहिते यांनी दिले. दरम्यान, आपत्ती व्यवस्थापन कायद्यानुसार पर्यायी पुलाच्या बांधकामासंदर्भात चर्चा करण्यासाठी जिल्हाधिकारी अविनाश सुभेदार यांच्यासमवेत सोमवारी (९) दुपारी चार वाजता बैठक होणार आहे.

पोलिस अधीक्षक कार्यालयात कृती समितीच्यावतीने महापौर स्वाती यवलुजे यांच्या नेतृत्वाखाली पोलिस अधीक्षक मोहिते यांच्याशी चर्चा करुन निवेदन देण्यात आले. कृती समितीचे निमंत्रक आर.के. पोवार म्हणाले, 'पर्यायी शिवाजी पुलाच्या बांधकामाला परवानगी देण्यासाठी जनतेने अनेकवेळा आंदोलन केले आहे. पण प्रशासन पुलाच्या बांधकामाबाबत कोणताच निर्णय घेत नाही. पावसाळा तोंडावर आल्याने शिवाजी पुलाला धोका निर्माण होऊ शकतो. जिवितहानी टाळण्यासाठी पुलाच्या दोन्ही बाजूला भिंत बांधून अथवा चर खोदून रस्ता वाहतुकीसाठी बंद केला जाईल.'

समितीच्यावतीने पोलिस अधीक्षकांना दिलेल्या निवेदनात म्हटले आहे, लोकप्रतिनिधी आणि प्रशासनाच्या बेजबाबदार व नाकर्तेपणामुळे पर्यायी पुलाचे काम रखडले आहे. २६ जानेवारीच्या मध्यरात्री पुलाचा कठडा तोडून मिनी कार पंचगंगा नदीत पडल्याने १३ जणांचे जीव गेले. स्ट्रक्चरल ऑडिटच्या अहवालात शिवाजी पूल वाहतुकीसाठी अयोग्य आहे, असे जाहीर करण्यात आले आहे. शिवाजी पुलाला पर्याय असणारा राजाराम बंधारा पावसाळ्यात पाण्याखाली जाणार आहे. रत्नागिरी मार्गावरील वाहतूक शियेमार्गे वळवली असली तरी हा मार्ग अवजड वाहतुकीसाठी अयोग्य आहे. पर्यायी पुलाच्या बांधकामास परवानगी न देता धोकादायक पुलावरुन वाहतूक सुरू करुन कोल्हापूरच्या जनतेची गळचेपी केली जात आहे.

यावेळी किशोर घाटगे, शिवसेना उपप्रमुख सुरेश जरग,माजी जिल्हा परिषद सदस्य एस.आर. पाटील, प्रसाद जाधव, अॅड पंडितराव सडोलीकर यांनी मनोगत व्यक्त केले. शिष्टमंडळात काँग्रेस गटनेते शारंगधर देशमुख, नगरसेवक अशोक जाधव, अर्जुन माने, संजय मोहिते, नगरसेविका सुरेखा शहा, बाबा पार्टे, अशोक पोवार, रमेश मोरे, अजित सासने, वसंतराव मुळीक, माणिक मंडलिक, किसन कल्याणकर, जहिदा मुजावर यांचा समावेश होता.

०००००

'पावसाळा तोंडावर आला आहे. शिवाजी पुलावरील दुर्घटना टाळण्यासाठी प्रशासनाने तातडीने पावले उचलावीत. केंद्र व राज्य सरकार पर्यायी पुलाबाबत गांभीर्य दाखवत नसल्याने पुन्हा आंदोलन छेडावे लागेल.

जयकुमार शिंदे, राष्ट्रवादी जिल्हा उपाध्यक्ष

००००

'शिवाजी पुलावर भविष्यात दुर्घटना घडली तर पालकमंत्री, दोन्ही खासदार, जिल्हाधिकारी यांच्यावर सदोष मनुष्यवधाचे गुन्हे दाखल करावेत. पूल बंद करण्यावरुन शहरी व ग्रामीण असा भेद केला जाऊ नये. जनभावना लक्षात घेऊन प्रशासनाने पुढाकार घ्यावा.

राजू लाटकर, शहराध्यक्ष, राष्ट्रवादी काँग्रेस

००००

'राष्ट्रीय आपत्ती व्यवस्थापन कायद्याचा वापर करुन जिल्हाधिकाऱ्यांनी पर्यायी पुलाच्या बांधकामास परवानगी द्यावी. भविष्यात जर शिवाजी पुलावरुन दुर्घटना झाल्यास जिल्हाधिकाऱ्यांच्यावर गुन्हे दाखल करावेत.

अशोक पोवार.

००००००

चौकट

शिवाजी पूल पडला तर काय ?

पोलिस अधीक्षक संजय मोहिते म्हणाले,' शिवाजी पुलाबाबत प्रशासन गंभीर असून पोलिस प्रशासनाने जिल्हाधिकारी कार्यालयाला सविस्तर निवेदन दिले आहे. पोलिस प्रशासन 'शिवाजी पूल पडला तर काय होईल?' ही शक्यता लक्षात घेऊन गांभीर्याने प्रयत्न करत आहे. पर्यायी पूल बांधणीसाठी कॅटिलेव्हर बीमचा वापर करण्याबाबत पोलिस प्रशासन जिल्हा प्रशासनाला सूचना करणार आहे. त्यासाठी फक्त ३० चौरस मीटर जागा लागणार आहे. ही जागा पुरातत्व खात्याच्या अखत्यारीत येत नसल्याने शिवाजी पुलाचे बांधकाम एक महिन्यात सुरु करण्याबाबत जिल्हा प्रशासनाकडे आपत्ती व्यवस्थापन कायद्यानुसार मत मागवणार आहे.'

..............

पाइपलाइन योजनेतील ४८ कोटींची फाइलच गायब

महाराष्ट्र जीवन प्राधिकरणच्या अधिकाऱ्यांचीच माहिती

म. टा. प्रतिनिधी, कोल्हापूर

थेट पाइपलाइन योजनेतील भाववाढ समर्थनार्थ समाविष्ठ ४८ कोटी रुपयांच्या रकमेची फाइलच सापडत नसल्याची कबुली अधिकाऱ्यांनी बैठकीत दिली. महाराष्ट्र जीवन प्राधिकरणच्या कार्यालयात आयोजित बैठकीत हा प्रकार समोर आला. हा प्रकार गंभीर असून त्या विरोधात हायकोर्टात दाद मागण्याचा इशारा अॅड. बाबा इंदूलकर यांनी दिला. या बैठकीत बोलताना इंदूलकर यांनी पाइपलाइन योजनेत मोठा घोटाळा झाला आहे. एकूण प्रकल्प किंमतीच्या ४८८ कोटी रकमेपैकी १४० कोटींनी प्रकल्प किंमत फुगवली असल्याच्या आरोपाचा पुनरुच्चार केला.

महाराष्ट्र जीवन प्राधिकरण व महापालिका अधिकाऱ्यांनी आपआपल्या कार्यालयाकडे ४८ कोटी रुपयांसदर्भातील फाईल सापडत नसल्याचे सांगितल्यावर इंदूलकर यांनी त्या संदर्भात लेखी म्हणणे द्या असा आग्रह धरला. अखेर याप्रश्नी पाच जून रोजी पुन्हा बैठक घेण्याचे ठरले. बैठकीच्या प्रारंभी इंदूलकर यांनी, थेट पाइपलाइन योजनेची किंमत १४० कोटींनी फुगवली आहे. या योजनेची भाववाढ समर्थनार्थ ४८ कोटी रुपयांची रक्कम ही मूळ किंमतीमध्ये महाराष्ट्र जीवन प्राधिकरणने घातली. त्यामुळे या योजनेच्या किंमतीमध्ये मोठा घोटाळा झाल्यासंदर्भातील कागदपत्रे नऊ महिन्यांपूर्वी महापालिकेला सादर केली होती. तसेच महाराष्ट्र जीवन प्राधिकरणच्या अधिकाऱ्यांसोबत बैठक घ्यावी असे सुचविले होते. मात्र नऊ महिन्यांनी अधिकाऱ्यांनी बैठक बोलावली, यावरुन पाइपलाइन योजनेविषयी अधिकाऱ्यांना गांभीर्य नाही. गेले वर्षभर स्टीलचे दर ३० ते ४० टक्क्यांनी उतरले आहेत. यामुळे भाववाढ समर्थनार्थ सुचविलेच्या रकमेची एकूण प्रकल्पाच्या किंमतीतून वजावट केली पाहिजे. त्यानुसार ४८ कोटी रुपये कमी करावेत असा मुद्दा मांडला.

प्राधिकरणचे कार्यकारी अभियंता एन. बी. भोई यांनी महापालिकेच्या प्रकल्पाचे मूल्याकंन प्राधिकरण करत नाही. त्यामुळे भाववाढ समर्थनार्थ समाविष्ठ रकमेच्या कागदपत्रांशी येथील प्राधिकरण कार्यालयाचा संबंध येत नसल्याचे सांगितले. या संदर्भात अधिक माहिती हवी असल्यास प्राधिकरणचे मुख्य अभियंता पुणे कार्यालयाकडे माहिती मागवावी असे सुचविले.

महापालिकेचे जल अभियंता सुरेश कुलकर्णी यांच्याकडे विचारणा केल्यावर त्यांनी 'मी कार्यभार स्वीकारण्याअगोदर प्रकल्पाची किंमत, भाववाढ समर्थनार्थ रक्कम निश्चित केली होती. मात्र त्या संदर्भातील कागदपत्रे उपलब्ध नाहीत तसेच सापडत देखील नाहीत असे उत्तर दिले. दोन्ही कार्यालयाकडे तांत्रिक मंजुरीची कागदपत्रे सापडत नसल्यामुळे फाईल गायब झाल्याचा संशय व्यक्त करण्यात आला. तसेच याप्रश्नी हायकोर्टात दाद मागू, असा इशारा इंदूलकर यांनी दिला. यावेळी महाराष्ट्र जीवन प्राधिकरणचे उपकार्यकारी अभियंता पी.एच. टकले, महापालिकेचे उपअभियंता भास्कर कुंभार आदी उपस्थित होते.

निधन

इंदाबाई कलमडे

इस्लामपूर : शिंदेवाडी (ता. कवठेमहांकाळ) येथील श्रीमती इंदाबाई रामू कलमडे (वय ८०) यांचे निधन झाले. त्यांच्या पश्चात तीन मुलगे, सुना, नातवंडे असा परिवार आहे. रक्षाविसर्जन रविवारी (ता.६) सकाळी ९.३० वाजता आहे. राजारामबापू सहकारी साखर कारखान्याचे अकाउंटंट शिवाजी कलमडे, सेवानिवृत्त प्राचार्य मारुती कलमडे यांच्या त्या आई होत.

आज झिरो शॅडो अद्भूत चमत्कार

म. टा. प्रतिनिधी, कोल्हापूर

आपली सावली कधीच आपली साथ सोडत नसल्याचे नेहमीच म्हटले जाते. रविवारी (ता.६) मात्र आपली सावली ५२ सेंकद आपली साथ सोडणार आहे. दुपारी साडेबारा वाजता झिडो शॅडोचा अद्भूत चमत्कार आपल्या पाहता येणार आहे. 'झिरो शॅडो डे' अर्थात शून्य सावली दिवसानिमित्त हा अनुभव घेता येणार आहे.

कर्कवृत्त व मकरवृत्तामध्ये राहणाऱ्या लोकांना वर्षातून दोन वेळेला शून्य सावलीचा अनुभव येतो. कर्कवृत्ताच्या वरील व मकरवृत्ताच्या खालच्या भागातील लोकांना या शून्य सावलीचा आनंद घेता येत नाही. पृथ्वी ज्या अक्षाभोवती फिरते त्याला २३.५ डिग्री एवढा कल आहे. पृथ्वीच्या सूर्याभोवती फिरण्याच्या मार्गाला आमनिक वृत्त असे म्हणतात. पृथ्वी कर्कवृत्तावरुन बरोबर तीन महिन्यांनी वसंत संचात बिंदूपाशी येते. या दिवशी १२ तासांचा दिवस व १२ तासांची रात्र असते. या दिवशी सूर्याची किरणे विषुवृत्तावर वरुन पडतात. त्यामुळे विषुवृत्तावरती आपण कोठेही आपण उभा असलो, तरी काही काळासाठी आपली सावली गायब होत असते. यानंतर तीन महिन्यांनी मकरवृत्तावर त्याच्या तीन महिन्यांनी परत विषुवृत्तावर आणि नंतर पुन्हा तीन महिन्यांनी कर्कवृत्तावर शून्य सावलीचा आनंद घेता येणार आहे.

कर्कवृत्त व विषुवृत्त या दोन स्थानांच्या मध्ये सूर्याची किरणे ज्यावेळी १६.७४ डिग्री उत्तर या रेखावृत्तांवरती पडतील, त्यावेळी या ठिकाणी असणाऱ्या सर्व जागांवर काही सेकंदांपर्यंत शून्य सावलीचा आनंद घेता येणार आहे. 'झिरो शॅडोचा हा अद्भूत चमत्कार कोल्हापूरमध्येही अनुभवता येणार असून रविवारी १२ वाजून २९ मिनिटे ११ सेकंद ते १२ वाजून ३० मिनिटे चार सेकंदांपर्यंत कोल्हापूरकरांना ५२ सेकंदापर्यंत हा अनुभव घेता येणार असल्याचे विवेकानंद कॉलेजच्या पदार्थ विज्ञान विभागाचे विभागप्रमुख डॉ. मिलिंद कारंजकर यांनी सांगितले.

पतीची अवयवदानाची इच्छा पूर्ण

'ज्या व्यक्ती मृत्यूच्या दारात उभ्या आहेत, त्यांना माझ्या पतीच्या अवयवामुळे जीवनदान मिळेल. पतीची अवयवदान करण्याची अपुरी इच्छा पूर्ण झाली आहे. जीवनदान मिळालेल्यांचे आशीर्वाद माझ्या मुलांवर कायम राहतील', अशा भावना अवयदान केलेल्या अमर पाटील यांच्या पत्नी शीतल यांनी व्यक्त केल्या. सरकारने आम्हा कुटुंबियांचा विचार करावा, अशी अपेक्षाही त्यांनी व्यक्त केली.

शीतल म्हणाल्या, 'अमर स्प्रे पेटिंगचे काम करत होते. वृत्तपत्रातील वाचनातून अवयवदान प्रक्रियेची माहिती होती. एक वर्षापूर्वी पतींनी अवयवदान करण्याचा संकल्प व्यक्त केला होता. मात्र त्यांना संकल्प अर्ज भरता आला नाही. अपघात झाल्याचे निमित्त झाले, अपघातातून ते सुखरूपपणे घरी पोहोचतील, अशी सर्व कुटुंबांची अपेक्षा होती. मुलांनाही पप्पा कधी घरी येणार याची हुरहुर लागली होती. मात्र नियतीच्या मनात काही वेगळेच होते. आयुष्याची सुरूवात होत असतानाच 'अमर' मृत्यूच्या दाढेत ओढले गेले. त्यांनी व्यक्त केलेली इच्छेनुसार वैयक्तिक निर्णय घेऊ शकत नव्हते. त्यासाठी अॅस्टरमधून ब्रेन डेड झाल्याचे सांगितल्यानंतर अमर यांची अवयवदान करण्याची इच्छा असल्याचे कुटुंबात सांगितले. त्या वेळी कुटुंबियांनी होकार दर्शवित हा निर्णय घेतला. आयुष्यात कधीही आता मला पती दिसणार नाहीत. मात्र माझे पती वेगवेगळ्या रूपात जिवंत रहावेत, अशी आमच्या सर्व कुटुबियांची इच्छा आहे. मला पती नेहमी सांगायचे की, आयुष्यात कितीही संकटे आली तरी खचून जायचे नाही. त्यांनी दिलेला आयुष्याचा कानमंत्र जगण्याला प्रेरणा देणारा ठरणार आहे.'

००....

अॅस्टरमध्ये अवयवदानची दुसरी शस्त्रक्रिया

अॅस्टर आधारचे कार्यकारी संचालक डॉ. उल्हास दामले, अवयव प्रत्यारोपण समन्वयक डॉ. अनिकेत सूर्यंवंशी, मुख्य कार्यकारी अधिकारी डॉ. चंडीलकुमार आणि प्रशासकीय प्रमुख शिवानंद अपराज यांनी याबाबत माहिती देताना सांगितले, 'रुग्णांच्या नातेवाईकांना अवयव प्रत्यारोपण करण्याची कायदेशीर प्रक्रिया सांगितली. कायदेशीर बाबी पूर्ण केल्यानंतर संबधित हॉस्टिपटलकडून त्यांचे पथक अॅस्टर आधार हॉस्पिटलमध्ये दाखल झाले. अॅस्टरमधील डॉक्टरांच्या पथकाने अवयव काढण्यासाठी आणि प्रत्यारोपणासाठी लागणारया वेळेचे नियोजन केले. बेंगळूरू येथील अॅस्टर सी. एम. आय. चे मेडिकल पथकही यामध्ये सहभागी झाले. अॅस्टरमध्ये अवयवदानाची ही दुसरी वेळ आहे. तर कीडनी प्रत्यारोपण करण्याची तिसरी शस्त्रक्रिया आहे. अवयव काढण्याची शस्त्रक्रिया डॉ. अमोल मुतकेकर आणि डॉ. प्रवीण घुले यांनी केली.'

फोटो आहे

माणसाचे स्वातंत्र्य हा मार्क्सचा मुख्य उद्देश

प्रा. डॉ. अशोक चौसाळकर यांचे प्रतिपादन

म. टा. प्रतिनिधी, कोल्हापूर

'माणसाचे स्वातंत्र्य हा कार्ल मार्क्सचा मुख्य उद्देश होता. कार्ल मार्क्सच्या शास्त्रीय समाजवादात अतिरिक्त मूल्यसिद्धान्त, वर्गसंघर्ष, द्वंद्वात्मक भौतिकवाद, ऐतिहासिक भौतिकवाद आणि वर्गविहीन समाज या सर्वांचा समावेश होतो', असे प्रतिपादन राज्यशास्त्राचे ज्येष्ठ अभ्यासक प्रा. डॉ. अशोक चौसाळकर यांनी केले. शिवाजी विद्यापीठातील अर्थशास्त्र परिसंवाद सभागृहात शनिवारी दुपारी कार्ल मार्क्सच्या दुसऱ्या जन्मशताब्दीप्रसंगी ज्येष्ठ अर्थतज्ज्ञ प्रा. डॉ. जे. एफ पाटील यांनी संपादित केलेल्या 'प्रेषित अर्थशास्त्री : कार्ल मार्क्स' या पुस्तकाच्या प्रकाशन सोहळ्यात ते बोलत होते. अध्यक्षस्थानी विद्यापीठाचे अर्थशास्त्र विभागप्रमुख प्रा. डॉ. पी. एस. कांबळे होते.

डॉ. चौसाळकर म्हणाले, 'माणसांचे स्वातंत्र्य हा मुख्य उद्देश डोळ्यासमोर ठेवूनच कार्ल मार्क्स सातत्याने कार्यरत राहिला. मार्क्स हा तत्त्वज्ञानाचा सखोल अभ्यासक होता. त्याच्या मते माणूस हा इतिहासाचा कर्ता आहे. मार्क्स हा इतिहासवादीसुद्धा होता. हेगेलच्या तत्त्वज्ञानाचा मार्क्सवर परिणाम होता, असे काही अभ्यासकांचे मत आहे. हेगेलसह रिकार्डो, फ्रेंच भौतिकवादाचा परिणामही त्याच्यावर असल्याचा दुसरा प्रवाह होता.'

डॉ. जे. एफ. पाटील म्हणाले, 'मार्क्स हा क्रांतिकारक विचार मांडणारा होता; म्हणून त्याला 'प्रेषित' असेही म्हटले जाते. मार्क्सवादाचे विचार लोकांपर्यंत पोहोचण्यासाठी हे पुस्तक उपयुक्त ठरणार आहे.' याप्रसंगी प्रा. डॉ. एस. एम. भोसले, प्राचार्य जी. जे. ताम्हणकर, प्रसाद कुलकर्णी, प्रा. डॉ. सिंधुदेवी कोरे, प्राचार्य डॉ. ए. एम. महाडिक, अर्थशास्त्र परिषदेचे माजी अध्यक्ष डॉ. टी. एम. भोसले, प्रा. डॉ. एन. बी. जाधव, प्रा. डॉ. यू. एम. मालकर, प्रा. डॉ. ए. के. वावरे आदी उपस्थित होते.

क्राईम पट्टा...

००००००००००००००

पिस्तूल तस्कराची दहशत

इचलकरंजी : बिल देण्याच्या कारणावरून तांबे माळ येथील बिअर बारमध्ये शुक्रवारी रात्री गुंडांनी दहशत माजवून तोडफोड केली. यामध्ये कुख्यात पिस्तूल तस्कराचा सहभाग असल्याचे समजते. यावेळी बारसमोरील एक दुचाकी व चारचाकी वाहन जाळण्याचा प्रयत्न केला. नरेंद्र हाउसिंग सोसायटीतील एका चारचाकी गाडीच्या काचाही या गुंडांनी फोडल्या. माहिती मिळताच शिवाजीनगर पोलीस घटनास्थळी पोहोचले, तोपर्यंत गुंड पसार झाले होते.

०००

कैद्याचा मृत्यू

कोल्हापूर : कळंबा मध्यवर्ती कारागृहात शिक्षा भोगत असलेला कैदी विजय पांडुरंग वाघमारे (वय ५३, रा. मिरज) याचा सीपीआरमध्ये उपचार सुरू असताना रविवारी सकाळी मृत्यू झाला. वाघमारेच्या पोटात दुखत असल्याने दोन मे रोजी सीपीआरमध्ये उपचारासाठी दाखल केले होते. खुनाच्या गुन्ह्याखाली २००६ पासून तो जन्मठेपेची शिक्षा भोगत होता.

विष पिलेल्या तरुणाचा मृत्यू

कोल्हापूर : किरकोळ कारणावरून वाद झाल्यानंतर विष प्यायलेल्या शंकर बापू रोटे (वय ४०, रा. सोनाळी, ता. करवीर) यांचा सीपीआरमध्ये उपचार सुरू असताना शनिवारी पहाटे तीन वाजता मृत्यू झाला. २८ एप्रिलला त्यांना सीपीआरमध्ये दाखल केले होते.

सुपरवायझरचा मृत्यू

कोल्हापूर : राजारामपुरी रोडवर शाहूनगर येथे शुक्रवारी रात्री रस्त्याकडेला बेशुद्ध अवस्थेत पडलेल्या शिवाजी राऊ खवरे (वय ५५, रा. शाहूनगर) यांचा सीपीआरमध्ये उपचार सुरू असताना दुपारी साडेबाराच्या सुमारास मृत्यू झाला.

गळफास लावून आत्महत्या

कोल्हापूर : वाशी (ता. करवीर) येथील मळा नावाच्या शेतात दाजी पांडुरंग पाटील (वय ४३, रा. वाशी) यांनी गळफास लावून आत्महत्या केली. दुपारी साडेतीन वाजता ही घटना घडली. पाटील यांच्या नातेवाइकांनी त्यांना बेशुद्धावस्थेत सीपीआरमध्ये दाखल केले, पण उपचारापूर्वीच त्यांचा मृत्यू झाला. करवीर पोलिस ठाण्यात आत्महत्येची नोंद झाली आहे.

विषय प्यायल्याने मृत्यू

कोल्हापूर : तणनाशक प्यायल्याने स्वाती प्रवीण चावरे (वय २१, रा. कोरोची) हिचा सीपीआरमध्ये उपचार सुरू असताना शुक्रवारी मृत्यू झाला. २५ एप्रिलला तणनाशक प्यायल्यानंतर तिला सीपीआरमध्ये दाखल केले होते.

००००००००००००००००००००००००००००००००००००००

अपघातात तरुण जखमी

कोल्हापूर : वाशी नाका ते कळंबा रोडवरील बापूरामनगर पाण्याच्या टाकीजवळ मोटारसायकल स्लीप होऊन झालेल्या अपघात होऊन अजय जीवन हुंदली (वय २० रा. जरगनगर) जखमी झाला. शनिवारी सकाळी साडेदहा वाजता अपघात झाला. जखमी अजयवर सीपीआरमध्ये उपचार सुरू आहेत.

युवक जखमी

कोल्हापूर : कळे (ता. पन्हाळा) येथे मोटारसायकलचा अपघात होऊन संतोष महादेव पवार (वय ३२, रा. वाटंबरे, ता. सांगोला, जि. सोलापूर) जखमी झाला. त्याला सीपीआरमध्ये उपचारास दाखल केले असून, त्यांची प्रकृती चिंताजनक झाल्याने त्यांच्या नातेवाइकांनी खासगी हॉस्पिटलमध्ये उपचारास दाखल केले.

झीप कॉइनचा तपास

आर्थिक गुन्हे शाखेकडे

म. टा. प्रतिनिधी, कोल्हापूर

लाखो रुपयांची फसवणूक झालेल्या झीप कॉइन क्रिप्टो करन्सी गुन्ह्याचा तपास पोलिस अधीक्षक संजय मोहिते यांनी आर्थिक गुन्हे शाखेकडे वर्ग केला. गुन्हा वर्ग करण्यापूर्वी स्थानिक गुन्हे अन्वेषण विभागाने पावणे दोन कोटी रुपयांचा मुद्देमाल हस्तगत केला .

झीप कॉइनमध्ये कोल्हापूर, सांगली, सातारा, कोकणातील २५० हून अधिक गुंतवणूकदारांनी अंदाजे २५ कोटी रुपये गुंतवले आहेत. पोलिसांनी सहाजणांच्याविरोधात गुन्हा नोंदविला असून मुख्य सूत्रधार बालाजी गणगेचा पुणे व बीड येथे शोध घेतला जात आहे. या गुन्ह्याची व्याप्ती एक कोटी रुपयांपेक्षा जास्त झाल्याने आर्थिक शाखेकडे गुन्हे शाखेकडे वर्ग करण्यात आला आहे. पोलिसांनी या गुन्ह्यात राजेंद्र नेर्लेकर, अनिल नेर्लेकर, संजय कुंभार या तीन संशयितांना अटक केली आहे. गुन्ह्याचा तपास करताना राजेंद्र नेर्लेकर याला शेळी पालन व्यवसायात १७ लाख रुपयांचे नुकसान झाल्याने तो झीप कॉइनमध्ये वळल्याची माहिती पुढे आली आहे. झीप कॉइनचे प्रमोशन करण्यासाठी मुंबईत त्यांनी सव्वा कोटी रुपयाहून अधिक रक्कम खर्च केल्याची माहिती तपासात पुढे आली आहे. पोलिसांकडे आतापर्यंत २५ हून अधिक गुंतवणूकदारांनी तक्रार केली आहे.

ग्रीन कॉरिडॉरने चौघांना जीवदान

नऊ मिनिटात विमानतळ तर २७ मिनिटांत सांगली हद्द आणि अडीच तासात पुणे

म. टा. प्रतिनिधी, कोल्हापूर

अपघातात 'ब्रेन डेड' झालेल्या अमर पाटील यांचे ह्दय ग्रीन कॉरिडॉरच्या माध्यमातून नऊ मिनिटात विमानतळावर पोहोचले. तर किडनी आणि यकृत कोल्हापूर ते राष्ट्रीय महामार्गावरील सांगली जिल्ह्याच्या हद्दीपर्यंत २७ मिनिटांत अवयव पोहोचले. शास्त्रीनगरमधील अॅस्टर आधार हॉस्पिटलमधून या रुग्णाचे अवयव यशस्वीपणे काढून मुंबई, पुणे जिल्ह्यातील रूग्णालयाकडे सुपूर्द करण्यात आले. कोल्हापूर ते पुणे पर्यंतचा प्रवास अडीच तासात पूर्ण करण्या आला. एअर अॅम्बुलन्सद्वारे एका तासात विमानतळावर आणि तेथून पुढे दीड तासांच्या कालावधीत मुंबईतील मुलुंड येथे अवयव पोहोचले.

अमर पांडुरंग पाटील (वय ३१, रा. निगवे खालसा, ता. करवीर) असे या अवयवदान केलेल्या तरुणाचे नाव आहे. त्यांचे हृदय एअर अ‍ॅब्युलन्सने मुंबईला पाठविण्यात आले. एक किडनी व यकृत स्वतंत्र रुग्णवाहिकेतून पुणे येथील हॉस्पिटमध्ये पाठविण्यात आले. अॅस्टर आधारमध्येच एक रुग्णासाठी किडनीची गरज होती. त्या रुग्णाचे रक्ताचे नमुने जुळल्याने त्या ठिकाणीच बेंगळुरूच्या तज्ज्ञ डॉक्टरांनी किडनी प्रत्यारोपण केली. शनिवारी सकाळपासून कायदेशीर प्रक्रिया पार पाडण्यात आली. अमरचा मेंदू निकामी झाल्याची माहिती डॉक्टरांनी नातेवाईकांना दिली. त्यावेळी पत्नी शीतल आणि पाटील कुटुंबियांनी अवयवदान करण्याचा धाडसी निर्णय घेतला. संबंधित हॉस्पिटलला प्रत्यारोपणाबाबत माहिती मिळाल्यानंतर त्यांच्या रुग्णवाहिका दुपारी साडेबारा वाजेपर्यंत अ‍ॅस्टर हॉस्पिटलच्या दारात दाखल झाल्या. अ‍ॅस्टरमधील डॉक्टरांच्या पथकाने नियोजनबद्ध तयारी केली. अवयदान काढल्यानंतर प्रत्यारोपण करण्याचा निश्चित कालावधी असल्याने पथकाची धावपळ सुरू झाली. सुमारे दोन तास रुग्णावर शस्त्रक्रिया करून हृदय, दोन किडन्या व एक लिव्हर काढून प्रत्यारोपणासाठी पाठविले.

अमर यांच्या पत्नी शीतल यांनी खंबीरपणे घेतलेला निर्णय आणि पतीने केलेल्या संकल्पाची पूर्ती करून चौघांना जीवनदान मिळाले. दरम्यान 'ब्रेन डेड' झालेल्या रुग्णाचे हृदय प्रत्यारोपणासाठी यशस्वीरीत्या काढणारे कोल्हापूरचे 'अ‍ॅस्टर आधार' हे राज्यातील चौथे हॉस्पिटल ठरल्याची माहिती हॉस्पिटल प्रशासनाने दिली.

००

येवती फाटा येथे झाला होता अपघात

अमर पाटील हे स्प्रे पेंटिंग व्यावसायिक होते. कामासाठी लागणारे साहित्य आणण्यासाठी ते मित्रासोबत ३० एप्रिल रोजी कोल्हापूरला आले होते. दुचाकीवरून परत जाताना कोल्हापूर ते गारगोटी रस्त्यावरील येवती फाटा (ता. करवीर) येथे एका टेम्पोने त्यांच्या दुचाकीला धडक दिल्याने ते गंभीर जखमी झाले होते. प्रथम त्यांना सीपीआरमध्ये आणि त्यानंतर अॅस्टरमध्ये उपचारासाठी दाखल केले होते. त्यांच्या पश्चात चार वर्षांचा मुलगा प्रेम, सहा वर्षांची मुलगी स्मिता, पत्नी, वडील, दोन भाऊ असा परिवार आहे.

००

कोट

'आम्हाला माहिती नाही की, अमरचे अवयव कोणाला देणार आहेत. मात्र ज्यांना दिले जातील, त्यांचा जीव वाचणार आहे. अमरच्या इच्छेनुसारच अवयनदान करण्याचा निर्णय सर्व कुटुंबियांनी चर्चेनुसार घेतला आहे. अमर हा अवयवरूपी इतरांच्या शरीरात 'अमर' राहील, हीच आमची इच्छा आहे.

मनीष पाटील, अमरचा भाऊ

००

येथे पाठविले अवयव

हृदय : फोर्टिस हॉस्पिटल, मुलुंड, मुंबई

एक किडनी : आदित्य बिर्ला हॉस्पिटल, पुणे

लिव्हर : ज्युपिटर हॉस्पिटल, बाणेर, पुणे

एक किडनी : अ‍ॅस्टर आधार हॉस्पिटल, कोल्हापूर

०००

प्रत्यारोपण समन्वयक डॉ. अनिकेत सूर्यंवंशी

यांनी दिलेल्या माहितीनुसार अवयव काढण्याची प्रक्रिया

दुपारी २ वाजता : हदय काढण्याची प्रक्रिया

दुपारी ३ वाजता : हदय काढले

सायंकाळी ४ वाजता : यकृत, किडनी काढण्याची प्रक्रिया सुरू

सायकांळी ५ वाजून २० मिनिटे : प्रक्रिया पूर्ण

००

अॅस्टर हॉस्पिटलमधूनचा प्रवास

४ वाजून ३ मिनिटांनी हॉस्पिटलबाहेर

४ वाजून ११ मिनिटांनी कोल्हापूर विमानतळावर हदय

४ वाजून ३० मिनिटांनी यकृत

५ वाजून ५० मिनिटांनी किडनी

०००

ग्रीन कॉरिडॉरची तयारी

ग्रीन कॉरिडरसाठी १२० पोलिस तैनात केले होते. कोल्हापूरपासून सांगली हद्दीपर्यंत हे पोलिस तैनात करण्यात आले. अॅस्टरपासून प्रतिभानगर, सम्राटनगर, एनसीसी भवन, सायबर चौक, शिवाजी विद्यापीठ, शाहू टोल नाका, उजळावाईवाडीपर्यंत दुसरा ग्रीन कॉरिडॉर करण्यात आला. या मार्गावर सकाळी आठ वाजल्यापासूनच पोलिस बंदोबस्त तैनात करण्यात आला. त्यासाठी या मार्गावर यापूर्वी सराव करण्यात आला. कोल्हापूर, सांगली, सातारा जिल्ह्यातील पोलिसांनी आपआपल्या हद्दीनुसार चोख बंदोबस्त ठेवला. 'टोल नाक्याच्या ठिकाणी स्वतंत्र मार्ग खुला ठेवण्यात आला. त्यामुळेच कोल्हापूरपासून अॅम्ब्युलन्स अवघ्या अडीच तासांत पुणे येथील संबधित रुग्णालयात पोहोचली', असे शहर पोलिस उपअधीक्षक डॉ. प्रशांत अमृतकर यांनी सांगितले.

००

अवयव काढणे ते प्रत्यारोपणचा अवधी

हदय : ४ ते ६ तास

किडनी : २४ ते ३६ तास

लिव्हर : ८ ते १२ तास

फुफ्फुस : ४ ते ६ तास

आतडी : ८ ते १६ तास

गुरूच्या मार्गदर्शनाने

माझी जडणघडण

अभिनेते किशोर कदम यांनी व्यक्त केली कृतज्ञता

म. टा. प्रतिनिधी, कोल्हापूर

'अभिनेता हा तावून सुलाखून घडत असतो. कुठल्याशी क्षेत्रातील यशस्वी माणसाची वाटचाल त्याच्या गुरूच्या मार्गदर्शनाखाली होत असते. माझी जडणघडण सत्यदेव दुबे यांच्या सहवासात झाली. नाटकांपासूनचा सुरू झालेला हा प्रवास चित्रपटापर्यंत त्यांच्या सहकार्याशिवाय शक्य नव्हता,' अशी कृतज्ञता अभिनेते, कवी किशोर कदम यांनी शनिवारी व्यक्त केली.

कोल्हापुरातील केशवराव भोसले नाट्यगृहात प्रत्यय नाट्यमहोत्सवांतर्गत झालेल्या 'रंगसंवाद' कार्यक्रमात ते बोलत होते. प्रकाश फडणीस यांनी त्यांच्याशी संवाद साधला. कॉ. संतराम पाटील श्रमिक चॅरिटेबल ट्रस्ट आणि प्रत्यय नाट्य संस्था यांच्या वतीने या महोत्सवाचे आयोजन केले आहे. महोत्सवात दुपारी मॅथेमॅजिशियन व रात्री सियाह मंटो ही नाटके सादर झाली.

अभिनेते कदम म्हणाले, 'अभिनय हा अवघड प्रवास असला तरी त्यातील बारकावे नव्या पिढीने टिपायला हवेत. भाषेवरचे प्रभुत्व आणि अत्यंतिक तळमळ तुम्हाला अभिनय क्षेत्रात पुढे जायला मदत करते. माझे गुरू दुबे रोज नवनवीन आव्हाने आणि निवडीचे पर्याय समोर ठेवायचे. त्यावर निर्णय घेणे खूप अवघड असायचे. त्याच काळात मी 'नटसम्राट' केला आणि डॉ. श्रीराम लागूंसोबत काम करण्याची संधी मिळाली. पुढे मला शरद जोशींच्या हिंदी साहित्याची आवड लागली. 'आनंदगौरी' हे माझं आवडतं पुस्तक आहे. अतुल पेठेंबरोबर चर्चा झाल्यानंतर आम्ही ते रंगमंचावर आणलं. कविता माणसाच्या जगण्याचा श्वास असतात. कवी हा वेदनेशी नाते सांगणारा असतो असेही ते म्हणाले. यावेळी, डॉ. शरद भुथाडिया, रसिया पडळकर उपस्थित होत्या.

००००००

आजचे कार्यक्रम

सकाळी दहा वाजता : अतुल पेठे यांच्याशी रंगसंवाद

दुपारी चार वाजता : विंदाक्षर ही विंदांच्या कवितांची मैफल आणि मधुचंद्र वीरूपिका सादरीकरण

सायंकाळी सहा वाजता : परवा आमचा पोपट वारला (नाटक)

मंगळसूत्र लंपास

कोल्हापूर : चाकूचा धाक दाखवून मंगळसूत्र लंपास केल्याची घटना सुर्वेनगर परिसरात घडली. या घटनेची कोणत्याच पोलिस ठाण्यात नोंद झालेली नाही. पण सुर्वेनगर परिसरात या घटनेची चर्चा सुरु होती. सुर्वे नगरात एका महिलेच्या घरातील पुरुष मंडळी कामाला गेली असल्याने महिला पापड लाटत होती. घराच्या उघड्या फाटकातून काळसर वर्णाचा उंच पुरुष घरात घुसला. तुमचा मुलगा अशोक कुठे आहे अशी विचारणा केली. माझ्या मुलाचे नाव महेश असून घरात बूट घालून यायचे नाही, असे सुनावले. बूट काढण्याच्या बहान्याने सॉक्समध्ये लपवलेला चाकू युवकाने बाहेर काढून महिलेच्या मानेवर रोखला. मंगळसूत्र तोडून खिशात घातले. त्यानंतर चोरटा मोटार सायकलवरुन पळून गेला. यासंदर्भात करवीर, जुना राजवाडा पोलिस ठाण्यात गुन्ह्याची माहिती घेतली असता पोलिसांनी अशा प्रकारचा कोणताही गुन्हा नोंद झाला नसल्याचे सांगितले.

पोलिस असल्याचे

भासवून वृध्दाला लुटले

म. टा. प्रतिनिधी, कोल्हापूर

राजारामपुरी आठवी गल्ली बस रुटवर पोलिस असल्याचे भासवून वृध्दाची सोन्याची चेन व अंगठी हातचलाखी करुन चोरट्यांनी पळवून नेली. शनिवारी दुपारी साडेतीनच्या सुमारास ही घटना घडली. राजारामपुरी पोलिस ठाण्यात चोरीच्या गुन्ह्याची नोंद झाली आहे.

याबाबत अधिक माहिती अशी, रमेश कल्लाप्पा शेटे (वय ४९, रा. कोगनोळी, ता. चिकोडी, जि. बेळगाव) हे मुलगा ऋषिकेश शेटे (वय १७) समवेत राजारामपुरीतील डॉ. विनोद वागळे यांच्या हॉस्पिटलमध्ये प्रकृती दाखवण्यासाठी आले होते. त्यांनी मोटारसायकल सर्व्हिसिंगला दिली होती. हॉस्पिटलमधून ते दुपारी तीनच्या सुमारास बाहेर पडले. सर्व्हिसिंगला दिलेली मोटारसायकल नेण्यासाठी चालत जात असताना मोटारसायकलवरुन आलेला एक तरुण त्यांच्याजवळ आला. त्याने पोलिस असल्याचे सांगून ओळखपत्र दाखवले. सध्या चेन स्नॅचिंग सुरु आहे, आपले दागिने सांभाळा असे सांगितले. याचवेळी दुसरा एक युवक मोटारसायकलने त्यांच्याजवळ आला. त्यालाही युवकाने पोलिस असल्याची बतावणी करुन गळ्यातील चेन व हातातील अंगठी काढून रुमालात ठेवण्यास सांगितले. त्यानंतर शेटे यांनीही गळ्यातील चेन व अंगठी काढून चोरट्याच्या हातात दिली. चोरट्याने सोन्याचे दागिने रुमालात ठेवून शेटे यांच्याकडे दिले. त्यानंतर पोलिस असल्याची बतावणी करणारा युवक दुसऱ्या युवकाच्या मोटारसायकलवर बसून जनता बाजारच्या दिशेने निघून गेला. पोलिस असणारा युवक दुसऱ्या युवकाच्या मोटारसायकलवरुन कसा गेला याची शंका आल्याने शेटे यांनी रुमाल उघडून पाहिले असता त्यामध्ये सोन्याचे दागिने नसल्याचे लक्षात आले. चोरट्यांनी हातचलाखी करुन दागिने पळवल्याची फिर्याद शेटे यांनी राजारामपुरी पोलिस ठाण्यात दिली.

कोल्हापूर शहरात ठिकठिकाणी पाणी गळतीची समस्या आहे. महापालिका प्रशासनाने प्रमुख गळती काढण्यासाठी एक कोटी सात लाख रुपयांची तरतूद केली आहे. पहिल्या टप्प्यात चार ठिकाणची पाइपलाइन दुरुस्ती होणार आहे. शहरात ड्रेनेजलाइन व पाइपलाइनसाठी रस्ते खोदाईची कामे ठिकठिकाणी सुरु आहेत. अपुरा पाणी पुरवठ्याचा प्रश्न महापालिकेच्या सर्वसाधारण सभेतही प्रश्न गाजला होता.

म. टा. वृत्तसेवा, इचलकरंजी

येथील इचलकरंजी इंडस्ट्रीयल इस्टेट परिसरातील हँड प्रोसेसमधून रसायनमिश्रित सांडपाणी थेट गटारीत सोडले जात असल्याचे खळबळजनक प्रकार शुक्रवारी उघडकीस आला. या प्रकारानंतर संबंधित प्रोसेसचे चार इंची नळ कनेक्शन व वीजपुरवठा तोडण्याचे आदेश प्रांताधिका-यांनी दिले आहेत. दरम्यान, प्रांताधिकारी, मुख्याधिकारी आणि स्वाभिमानी शेतकरी संघटनेच्या पदाधिका-यांनी सायंकाळी चंदूर रोड काळा ओढा, नाईक दड्ड परिसरातील प्रदूषण व उपाययोजना याबाबत पाहणी करून माहिती जाणून घेतली.

प्रदूषणाच्या प्रश्नावरून स्वाभिमानी शेतकरी संघटनेने आंदोलन छेडले आहे. त्यानंतर प्रदूषण नियंत्रण मंडळाकडून प्रदूषणास जबाबदार घटकांवर फौजदारी दाखल करण्याच्या प्रस्तावाला मंजुरी दिली आहे. परंतु त्या संदर्भात अद्याप काहीच कारवाई झालेली नाही. त्यामुळे शहरातील प्रदूषण व त्या संदर्भात केल्या जात असलेल्या उपाययोजना या अनुषंगाने विविध भागाची पाहणी करण्यात यावी अशी मागणी स्वाभिमानी शेतकरी संघटनेने प्रांताधिकारी समीर शिंगटे व मुख्याधिकारी डॉ. प्रशांत रसाळ यांच्याकडे केली होती. त्यानुसार प्रांताधिकारी शिंगटे, मुख्याधिकारी डॉ. रसाळ, आरोग्य सभापती रवि लोहार, स्वाभिमानी संघटनेचे सागर शंभुशेटे, विजय भोसले आदींसह पदाधिका-यांच्या पथकाने चंदूर ओढ्यासह जुना चंदूर रोड, नाईक दड्ड परिसरातील ओढ्याची पाहणी केली. यावेळी पंचगंगा नदी प्रदूषणप्रश्नी नगरपालिकेकडून विविध उपाययोजना राबविल्या जात आहेत. त्यानुसार चंदूर ओढा येथे सहा कच्चे मातीचे बंधारे बांधले असून आणखी दोन बंधारे बांधण्याचे काम हाती घेतले आहे. तसेच ओढ्याचे खोलीकरण व रुंदीकरणाचे काम गतीने करण्यात येत आहे. नगरपरिषदेच्या आवाहनानुसार काही शेतक-यांनी याठिकाणी पाणी उपसा सुरू केला आहे. त्यासाठी काळा ओढ्याच्या ठिकाणी स्वतंत्र वीज सयंत्र उपलब्ध करुन नगरपालिकेकडून देऊन २४ तास विजेची सोय करुन दिली आहे. त्यानुसार १७ शेतकरी ७ एमएलडी पाणी उपसा करीत आहेत. भविष्यात आणखीन शेतकर्‍यांकडून पाणी उपसा केला जाणार असल्याबाबतची माहिती जलअभियंता अजय साळुंखे यांनी दिली.

याचदरम्यान नगरपरिषदेच्या भरारी पथकाकडून इंडस्ट्रीयल इस्टेट परिसरातील सुनील व्यास यांच्या प्रोसेसमधून रसायनमिश्रित सांडपाणी थेट गटारीत सोडले जात असल्याची माहिती अधिका-यांना समजली. त्यानुसार प्रांताधिकारी शिंगटे, मुख्याधिकारी रसाळ यांच्यासह पथक इंडस्ट्रीयल इस्टेट परिसरात आले. तेथे व्यास यांच्या हँड प्रोसेसमधून अंतर्गत जलवाहिन्या टाकून रसायनमिश्रित सांडपाणी थेट गटारीत सोडण्याचा प्रकार दिसून आला. याबाबत विचारणा करता प्रोसेसधारकाने सीईटीपीकडे जोडणीसाठी मागणी केली असून लवकरच प्रक्रिया पूर्ण होणार असल्याचे सांगून सारवासारव करण्याचा प्रयत्न झाला.

०००००

फोटो आहे.

...............

साखरेवर सेस लावण्यास विरोध

१५ मे रोजी पंतप्रधानांना भेटण्याचा साखर संघाच्या बैठकीत निर्णय

म. टा. प्रतिनिधी, कोल्हापूर

साखर उद्योगावर अभूतपूर्व संकट निर्माण झाले असून यामुळे शेतकरी व साखर उद्योगावर अवलंबून असलेले घटक अडचणीत आले आहेत. अडचणीच्या स्थितीमध्ये कराच्या स्वरुपात १२४ रुपये कारखानदारांकडून वसूल केले जात असून त्यामध्ये अधिक पाच टक्के सेस लावण्याची आवश्यकता नाही. हा सेस लावू नये यासाठी माजी कृषीमंत्री शरद पवार यांच्या नेतृत्वाखाली १५ मे रोजी पंतप्रधान नरेंद्र मोदी यांची भेट घेणार असल्याचे राष्ट्रीय साखर संघाचे कार्यकारी संचालक प्रकाश नाईकनवरे यांनी बैठकीत दिली.

कोल्हापूर येथील शासकीय विश्रामगृह येथे राज्य साखर संघाच्यावतीने कोल्हापूर विभागातील साखर कारखानदारांची बैठक पार पडली. नाईकनवरे म्हणाले, 'शुक्रवारी साखर उद्योगाला संकटातून बाहेर काढण्यासाठी जीएसटीची बैठक झाली. बैठकीत साखरेवर सेस लावण्यावर चर्चा झाली. साखरेवर दोन टक्के सेस लावण्याचा प्रस्ताव विचारधीन असला, तरी प्रत्यक्षात हा सेस पाच टक्के असण्याची शक्यता आहे. गॅट कराराच्या अंमलबजावणीनंतर देशात विविध उत्पादने आयात केली जातात. यासाठी त्यांना भारतीय चलन दिले जाते. पण जे देश भारताकडून कोणतीच वस्तू खरेदी करत नाहीत, यासाठी केंद्र सरकारने निश्चित धोरण ठरवण्याची गरज आहे. इंडोनेशियात टेक्सटाइल वस्तू खरेदी करताना, त्या बदल्यात रोख चलन देण्याऐवजी वस्तूंची देवाण होते. अशाच पद्धतीचा भारताने अवलंब केल्यास साखरेचा प्रश्न निकालात निघू शकेल. केंद्र सरकारने साखर निर्यातीची सक्ती केलेली असली, तरी याबाबत घाबरायचे कारण नसून निर्यातीला सुरुवात झाल्यास देशातंर्गत साखरेच्या दरात निश्चित वाढ होणार आहे. तसेच निर्यात साखरेला वाहतूक अनुदान मिळण्यासाठी संघाचा पाठपुरावा सुरू आहे.'

संभाव्य सेस आकारणीला कारखानदार प्रतिनिधींनी जोरदार विरोध केला.

जवाहर कारखान्याचे चेअरमन प्रकाश आवाडे म्हणाले, 'बाजारातील साखरेच्या दरावर कृषीमूल्य आयोग ऊसदर निश्चित करतो. पण त्यानंतर साखर दरात घसरण झाल्यास कारखानदारांना अडचणींना सामोरे जावे लागते. यातून मार्ग काढण्यासाठी ऊसदरांप्रमाणे साखर दर निश्चित करण्याची आवश्यकता आहे.'

जीवनावश्यक कायद्यामध्ये साखरेचा समावेश असून ऊसदर ठरवताना साखर उत्पादनास येणारा खर्च विचारात घेतला जातो. कृषीमूल्य आयोग केंद्र सरकारच्या कक्षेत येत असल्याने ऊसदर ठरवताना साखरेला असलेला दर त्यापेक्षा कमी येणार नाही, यासाठी जीवनावश्यक वस्तू कायदा तीन (सी) नुसार केंद्र सरकारने अध्यादेश काढावा, असा ठराव बैठकीत करण्यात आला. बैठकीस राज्य साखर संघाचे कार्यकारी संचालक संजय खताळ, आमदार चंद्रदीप नरके, राजाराम कारखान्याचे मानद कार्यकारी संचालक पी. जी. मेढे यांच्यासह जिल्ह्यातील कारखान्यांचे प्रतिनिधी उपस्थित होते.

.......................

चौकट

कारखान्यांना अडचणीत आणण्याचा प्रयत्न

थकीत एफआरपीच्या मुद्यावरुन साखर जप्तीचे आदेश काढून साखर उद्योग पर्यायाने कारखान्यांना अडचणीत आणण्याचा प्रयत्न केला जात असल्याचा आरोप राज्य साखर संघाचे कार्यकारी संचालक संजय खताळ यांनी केला. ते म्हणाले, 'सरकार साखर जप्त करताना कोणत्या दराने साखर विक्री करणार ? साखर दर पडल्याने राज्यातील अनेक साखर कारखाने शॉर्टमार्जिनमध्ये गेले आहेत. पुढील हंगाम सुरळीत पार पाडण्यासाठी निर्माण झालेले शॉर्टमार्जिन सरकारने द्यावे.'

.................

चौकट

बैठकीतील मागण्या

साखरेचा बफर स्टॉक करावा

३,२०० क्विंटल दराने सरकारने साखर खरेदी करावी

गाळप परवाना दंड कमी करावा

पुढील हंगामाचे निर्यात धोरण, अनुदान निश्चित करावे

इथेनॉल निर्मितीवर भर द्यावा

सॉफ्ट लोनचे पुर्नगठन करावे

ऊस तोडणी यंत्रास अनुदान वाढवावे

एकीकरण समितीच्या उमेदवारांना

पुरोगामी आघाडीचा पाठिंबा

म. टा. प्रतिनिधी, कोल्हापूर

सीमाप्रश्नाच्या लढ्यात कोल्हापूर जिल्ह्याने नेहमीच मराठी बांधवांना पाठिंबा दिला आहे. हा पाठिंबा कायमपणे दर्शवण्यासाठी कर्नाटक विधानसभा निवडणुकीमध्ये लढत असलेल्या महाराष्ट्र एकीकरण समितीच्या उमेदवारांना मतदान करण्यासाठी मराठी भाषिकांना आवाहन करण्यात येणार असून उमेदवारांच्या प्रचारासाठी पुरोगामी लोकशाही आघाडीचे कार्यकर्ते जाणार असल्याची माहिती आघाडीचे निमंत्रक सुनीलकुमार सरनाईक यांनी पत्रकार बैठकीत दिली. यानंतर झालेल्या सर्वपक्षीय मेळाव्यात धर्मांध, जातीयवादी पक्षांना सत्तेपासून दूर ठेवण्यासाठी सर्वांनी एकत्र येण्याचे आवाहन करण्यात आले.

सरनाईक म्हणाले, 'मुंबईसह संपूर्ण महाराष्ट्र राज्याची स्थापना करण्यासाठी संयुक्त महाराष्ट्र समितीच्या माध्यमातून मोठा लढा उभारण्यात आला. यामध्ये अनेकांना तुरुंगवास भोगावा लागला, तर अनेकांना हौतात्म पत्करावे लागले. लढ्यांमुळे मुंबईसह महाराष्ट्र राज्याची स्थापना झाली. पण मूळचे मराठी बहुभाषिक असलेले बेळगाव, निपाणी, बिदर, भालकीचा यामध्ये समावेश झाला नाही. संपूर्ण भाग महाराष्ट्रात येण्यासाठी महाराष्ट्र एकीकरण समितीच्या माध्यमातून लढा दिला जात आहे. यासाठी येऊ घातलेल्या कर्नाटक विधानसभेच्या निवडणुकीमध्ये एकीकरण समितीचे उमेदवार निवडून येणे आवश्यक आहे.'

संभाजीराव जगदाळे म्हणाले, 'सीमाभागातील मराठी जनतेला सीमालढ्याप्रमाणे पाठिंबा देण्यासाठी एकीकरण समितीच्या सर्व उमेदवारांना कोल्हापूर येथील पुरोगामी लोकशाही आघाडीने पाठिंबा दिला आहे. आघाडीच्यावतीने गेल्या काही दिवसांपासून समिती उमेदवारांच्या प्रचाराला कार्यकर्ते गेले असून टप्प्याटप्प्याने आणखी कार्यकर्ते प्रचारासाठी जाणार आहेत.'

पत्रकार बैठकीनंतर सर्वपक्षीय मेळावा शेकाप कार्यालयात झाला. कर्नाटक विधानसभा निवडणुकीच्या निमित्ताने कोल्हापूरात शेतकरी कामगार पक्षप्रणीत पुरोगामी लोकशाही आघाडीची स्थापन केली आहे. समविचारी पक्ष, संघटना यांना एकत्रित करुन काही समान प्रश्न घेवून भविष्यात देश व राज्यातील धर्मांध, जातीयवादी व सर्वसामान्यांना फसविणाऱ्या सरकारविरोधात आवाज उठवण्यात येणार आहे. याचाच भाग म्हणून कर्नाटक विधानसभेच्या महाराष्ट्र एकीकरण समितीच्या उमेदवारांना निवडून आणण्यासाठी पाठिंबा देण्याचा निर्णय मेळाव्यात घेण्यात आला. पत्रकार बैठकीस प्राचार्य डॉ. टी. एस. पाटील, बाबूराव कदम, मधुकर हरेल, दिलीपकुमार जाधव, शंकर काटाळे, अॅड. अशोक साळोखे, मनोहर पाटील, सतीशचंद्र कांबळे आदी उपस्थित होते.

पान २ मेन

..............

मटा इम्पॅक्ट ... लोगो

......................

महापालिकेचा लोगो वापरावा.

..........................

कनेक्शन अनधिकृत असल्यास गुन्हा

पाणी पुरवठाकडून पाच पथके स्थापन , महिनाभर चालणार 'घर टू घर' शोध मोहिम

Appasaheb.mali@timesgroup.com

Tweet:@Appasaheb_MT

महापालिकेच्या पाणी पुरवठा विभागाने शहरातील अनधिकृत नळ कनेक्शनविरोधात शोध मोहिम सुरु केली असून पाचही वॉर्डमध्ये स्वतंत्र पथकांची स्थापना केली आहे. या शोधपथकाला अनधिकृत नळ कनेक्शन खंडीत करण्याचे व संबंधितावर पोलिसांत गुन्हा दाखल करण्याचे अधिकार दिले आहेत. पाच पथकांनी एका महिनाभरात संपूर्ण शहरात घर टू घर मोहिम राबवून अनधिकृत नळ कनेक्शनधारकांचा शोध घ्यावयाचा आहे.

महापालिकेच्या सर्वसाधारण सभेत शहरातील पाणी गळती आणि पाणी चोरीचा विषय गाजला होता. शहर आणि उपनगरात बेकायदेशीर नळ कनेक्शनची संख्या हजारोंच्या पटीत असल्याच्या तक्रारी आहेत. पाणी पुरवठा विभागाकडून कसलाही परवाना नाही, पाणीपट्टी भरणा नाही मात्र खुलेआम पाणी चोरी असा प्रकार ठिकठिकाणी सुरु आहे. शहरातील अनेक हॉटेल्स, हॉस्पिटल्स आणि मंगल कार्यालयात पाण्याचा वारेमाप वापर होत असताना त्या प्रमाणात बिलाचा हिशेब लागत नसल्याचा आरोप सभागृहाने केला होता. या साऱ्या पार्श्वभूमीवर शहरातील अनधिकृत नळ कनेक्शनविरोधात पाणी पुरवठा विभागाने शोध मोहिम सुरु केली.

ए,बी, सी, डी आणि ई वॉर्डासाठी प्रत्येकी एक अशा पाच स्वतंत्र पथकांची स्थापना केली आहे. पथक प्रमुख म्हणून मोहन जाधव, के. टी. पाटील, संजय पाटील व भिकू कांबळे, रणजित संकपाळ व दिपक चव्हाण, पी. एस. माने व उदय पाटील यांची नियुक्ती केली आहे. एका पथकात पथक प्रमुख, मीटर रीडर, सहायक मीटर रीडर आणि फिटरचा समावेश आहे. घर टू घर जाऊन ते पाण्याचे मीटर, पाणी बिलाची पावती या संदर्भात खातरजमा करणार आहेत. रोज सकाळी आठ ते दुपारी बारा या वेळेत शोध मोहिम राबविण्यात येणार आहे. पथक प्रमुखांनी तपासणी अहवाल ज्या त्या दिवशीच जल अभियंत्यांकडे सादर करण्याच्या सूचना आहेत.

दरम्यान, शहरातील नळ कनेक्शनधारकांची संख्या मोठी आहे, त्या तुलनेत कर्मचाऱ्यांची संख्या अपुरी आहे. दाट लोकवस्तीच्या भागात अनधिकृत नळ कनेक्शनचा शोध घेणे आव्हानात्मक आहे. तसेच जमीनीखालून पाण्याची लाइन टाकल्याने शोध घेताना जादा खबरदारी घ्यावी लागणार आहे. अनधिकृत नळ कनेक्शन शोध मोहिमेत मीटर रीडरची भूमिका महत्वाची ठरणार आहे. मीटर रीडरना नळ कनेक्शन, पाण्याच्या लाइनविषयी माहिती आहे. त्यांनी काम चोखपणे बजावले तर पाणी चोरांचा पर्दाफाश होऊ शकेल.

............

कोट

'पाणी पुरवठा विभागातर्फे शहरातील अनधिकृत नळ कनेक्शन शोधून काढण्यासाठी शनिवारपासून शोध मोहिमेला सुरुवात झाली. पथक प्रमुखांनी रोज अहवाल सादर करावयाचा आहे. महिनाभरात संपूर्ण शहरात ह मोहिम राबविली जाईल. अनधिकृत नळ कनेक्शन आढळल्यास ती खंडित करणे व संबंधित व्यक्तींच्या विरोधात पोलिसांत गुन्हा दाखल करण्यात येणार आहे. बेकायदेशीर नळ कनेक्शनच्या विरोधात शोध मोहिम असून नागरिकांनी शोध पथकाला योग्य माहिती द्यावी. अनधिकृत नळ कनेक्शनसंबंधी माहिती असल्यास पाणी पुरवठा विभागाला कळवावे.

प्रशांत पंडत, अधीक्षक, पाणीपट्टी वसुली विभाग

...............

शहरातील अधिकृत नळ कनेक्शन

एकूण नळ कनेक्शन ९७२४५

रहिवासी क्षेत्र नळ कनेक्शन ९४३१६

व्यापारी क्षेत्र नळ कनेक्शन १७४१

औद्योगिक क्षेत्र नळ कनेक्शन ११८५

सरकारी कार्यालय नळ कनेक्शन ३२४

ग्रामीण भागातील नळ कनेक्शन ४२२९

....................................

कोल्हापूर

पगार मिळाला नसल्याच्या कारणावरुन ब्रिक्स कंपनीचे कर्मचारी संपावर गेले असल्याने मध्यवर्ती बसस्थानकात स्वच्छतेचे तीन तेरा वाजले आहेत. सीबीएसमध्ये या कंपनीचे सात ते आठ कर्मचारी आहेत. त्यांच्याकडून स्थानक, कार्यशाळा आणि परिसराची स्वच्छता केली जाते. मात्र कर्मचाऱ्यांची नेमणूक केलेल्या या कंपनीने पगार दिलेला नाही. त्यामुळे कर्मचाऱ्यांनी संप पुकारला आहे. त्याचा फटका एसटीचे अधिकारी, कर्मचारी आणि पर्यायाने प्रवाशांना बसत आहे. काही प्रवाशांनी एसटी प्रशासनाकडे अस्वच्छता असल्याच्या तक्रारी केल्या आहेत. त्या पार्श्वभूमीवर रोजदांरीवरील काही कर्मचाऱ्यांना स्वच्छतेचे काम दिले आहे. स्थानक स्वच्छ करण्याचे काम सुरू असल्याचे स्थानकप्रमुख संजय शिंदे यांनी सांगितले.

म. टा. प्रतिनिधी, कोल्हापूर

गेली काही वर्षे अंधारात असलेल्या २९ वाड्यावस्तींवर वीज पोहोचली असून कोल्हापूर जिल्हा अंधारमुक्त झाला आहे. जिल्हा नियोजन मंडळाकडून राधानगरी, भुदरगड आणि शाहूवाडी तालुक्यातील दुर्गम वाडीवस्तीत तीन कोटी ९९ लाखांचा निधी खर्च केला आहे. वनखात्याच्या हद्दीतून खोदाईसाठी परवानगी नसलेल्या ठिकाणी अपारंपारिक उर्जेतून वीज पोहोचली आहे.

राधानगरी, भुदरगड आणि शाहूवाडी तालुक्यातील दुर्गम वस्तीवर विजेची सुविधा देण्याची मागणी केली होती. आमदारांनी जिल्हा नियोजन मंडळात याप्रकरणी प्रश्न उपस्थित केला होता. त्यावेळी पालकमंत्री चंद्रकांत पाटील यांनी 'पंडित दीनदयाल उपाध्यक्ष ग्रामीण ज्योत योजना' ऐवजी जिल्हा नियोजन मंडळाच्या निधीतून ३ कोटी ९९ लाखांचा निधी उपलब्ध करून दिला. दीनदयाल योजनेतून दिला जाणारा निधी कमी असल्याने तत्काळ जादा निधी देण्यात आला. गेल्या सहा महिन्यांपासून या २९ वाड्यावस्तींवर वीज जोडणीचे काम सुरू होते. दुर्गम भागात वन विभागाच्या हद्दीत खोदाई केल्याने वनविभागाने काही ठिकाणी गुन्हे दाखल केले होते. या वादात गेले दोन वर्षे काम रखडले होते. वनविभागाकडून परवानगी घेण्यासाठी नागपूर विभागाकडे महावितरणने अर्ज केला होता. मात्र वनविभागाकडून परवानगी मिळालेली नाही. राधानगरी तालुक्यातील काही वाड्यावस्तींवर वीजजोडणीच्या खर्चाचे ८० लाखांहून अधिक बजेट होते. या ठिकाणी वीज पोहोचण्यासाठी वादग्रस्त आणि अधिक खर्च असलेल्या सहा वस्तींवर अपारंपारिक विजेची सुविधा उपलब्ध करून दिली आहे. सोलर प्रकल्पाद्वारे या ठिकाणी वीज दिली आहे. उर्वरित वाडीवस्तींवर पारंपारिक पध्दतीने वीज पुरवठा केला आहे. यापूर्वी जिल्ह्यात ३२ दुर्गम वाडीवस्ती अंधारात होत्या. पैकी सरकारच्या 'इन्फा टू' या योजनेतून तीन गावांत वीज जोडणी पूर्ण केली. या वाडी आणि वस्तींवर ३०० ते ४०० लोकसंख्या आहे. शाहूवाडी आणि भुदरगड तालुक्यातील दुर्गम ठिकाणी वाडीवस्तींवर वनविभागाने परवानगी दिली आहे. त्या ठिकाणी महावितरणकडून वीज सुविधा उपलब्ध करून दिली आहे. दरम्यान, जिल्ह्यातील सर्व वाडीवस्तींवर वीज जोडणीचे उद्दीष्ट पूर्ण झाल्याचे महावितरणकडून सांगण्यात आले.