म. टा. प्रतिनिधी, कोल्हापूर

'येथील बागल चौकातील श्री महालक्ष्मी गृहतारण संस्थेतील गैरकारभाराची चौकशी करावी तसेच दोषींवर फौजदारी दाखल करावी,' या मागणीकडे लक्ष वेधण्यासाठी राष्ट्रीय समाज पक्षातर्फे उद्योग भवनातील विभागीय सहनिबंधक कार्यालयासमोर ठिय्या आंदोलन केले. विभागीय उपनिबंधक रंजन लाखे यांनी कारवाईचे ठोस आश्वासन दिल्यानंतर आंदोलन मागे घेण्यात आले.

महालक्ष्मी गृहतारण संस्थेची रंकाळा परिसरात २६ एकर जागा आहे. या संस्थेत गैरकारभार झाल्याचा आरोप काही सभासदांचा आहे. त्यामुळे राष्ट्रीय समाज पक्षातर्फे दोषींवरील कारवाईसाठी पाठपुरावा सुरू आहे. १९९६ ते १९९९ काळातील सरकारी लेखापरीक्षण अहवालाची छाननी करून दोषींवर फौजदारी दाखल करावी, सरकारी लेखापरीक्षकावर फौजदारी दाखल करावी, संस्थेच्या ५३७ सभासदांची वैधता तपासावी, प्रशासन अधिकाऱ्यांच्या भूखंडाची चौकशी करावी, आदी मागण्यांसाठी ठिय्या आंदोलन करण्यात आले. जिल्हा विशेष लेखापरीक्षक धनंजय पाटील, शहर उपनिबंधक प्रदीप बरगे यांच्याशी आंदोलकांची चर्चा झाली. मागण्यासंबंधी अधिकाऱ्यांनी सकारात्मक आश्वासन दिल्यानंतर आंदोलन स्थगित करण्यात आले. आंदोलनात जिल्हाप्रमुख चंद्रकांत खोंद्रे, समीर पटवेगार, बाळासाहेब पुशाप्पा, पांडूरंग तेली आदींचा सहभाग होता.

-------------------

जैन संघटनेतर्फे जिल्ह्यात

'स्मार्ट गर्ल' उपक्रम

संघटनेचे राष्ट्रीय अध्यक्ष पारेख यांची माहिती

म. टा. प्रतिनिधी, कोल्हापूर

भारतीय जैन संघटनेतर्फे युवती सक्षमीकरणांतर्गत 'स्मार्ट गर्ल टू बी हॅपी, टू बी स्ट्राँग' उपक्रम गेली दहा वर्षे राबविला जात आहे. राज्यात आठवी ते बारावीपर्यंतच्या सुमारे दोन लाखांहून अधिक विद्यार्थिनींपर्यंत संवाद साधला आहे. राज्याच्या शिक्षण विभागाच्या सहकार्याने काही ठिकाणी उपक्रम सुरू आहे. कोल्हापूर जिल्ह्यातही हा उपक्रम सुरू केला जाणार असल्याची माहिती संघटनेचे राष्ट्रीय अध्यक्ष प्रफुल्ल पारेख यांनी पत्रकार परिषदेत दिली.

पारेख म्हणाले, 'संघटनेतर्फे युवती सक्षमीकरण, दुष्काळमुक्त महाराष्ट्र आणि मूल्यवर्धन शिक्षण या विषयांवर काम सुरू आहे. संघटना सामाजिक, नैसर्गिक आपत्ती व्यवस्थापन आणि शैक्षणिक क्षेत्रात कार्यरत आहे. 'स्मार्ट गर्ल' उपक्रमात शाळांमध्ये १२ तासांचा कार्यक्रम आहे. काही शाळांमध्ये दररोज दीड तासाचा कार्यक्रम घेतला जात आहे, तर काही ठिकाणी दोन दिवसांत कार्यशाळा होत आहे. स्मार्ट गर्लची माहिती ऑडिओ आणि व्हिडीओमधून सांगितली जात आहे. विद्यार्थिनी आणि पालकांसोबत चर्चा केली जात आहे. जीवन कसे जगावे, संवाद, आत्मविश्वास, मासिक पाळी, स्वसंरक्षण, योग्य वेळी योग्य निर्णय घेण्याची क्षमता निर्माण केली जात आहे. कोल्हापूर जिल्ह्यात हा उपक्रम लवकरच राबविला जाणार आहे.'

पत्रकार परिषदेस संघटनेचे राष्ट्रीय कार्यकारिणी सदस्य पारस ओसवाल, राज्य उपाध्यक्ष अभिनंदन खोत, डॉ. शीतल पाटील, अतुल भंडारे, राजाभाई शहा, अनिल पाटील, प्रकाश मुंगळे, आदी उपस्थित होते.

००००००००००००००

पोलिस डायरी

................

मारामारीत चौघे जखमी

कोल्हापूर

पिसात्रीपैकी सोनारवाडा (ता. पन्हाळा) येथे दोन गटात मारामारी होऊन चौघे जखमी झाले. मिनाक्षी यशवंत पाटील, सत्यूबाई बापू पाटील, यशवंत पाटील, जनाबाई राजाराम पाटील अशी जखमींची नावे आहेत. सीपीआर रुग्णालयात त्यांना उपचारास दाखल करण्यात आले.

...........

अपघातात महिला जखमी

कोल्हापूर

इचलकरंजी कोल्हापूर रस्त्यावर माणगाव पेट्रोल पंपाजवळ मागून आलेल्या वाहनाने धडक दिल्याने मोटारसायकलवरील गीता नागेश मेरवाडे (रा. कराड, जि. सातारा) या जखमी झाल्या. त्या पती नागेश यांच्यासमवेत मोटारसायकलवरुन जात होत्या.

............

मारहाणीत एक जखमी

कोल्हापूर

नंदगाव (ता. करवीर) येथे मारहाणीत भिवाजी दत्तात्रय चौगुले (वय ५५) हे जखमी झाले. त्यांना सीपीआर रुग्णालयात उपचारास दाखल करण्यात आले. इस्पुर्ली पोलिस ठाण्यात मारहाणीची नोंद झाली आहे.

............

मोटारसायकल घसरून जखमी

कोल्हापूर

कोल्हापूर गारगोटी रस्त्यावर मोटारसायकल घसरून राजाराम दत्त खंदरे (वय ५५, रा. चंद्रे, ता. राधानगरी) हे जखमी झाले. त्यांना सीपीआर रुग्णालयात उपचारास दाखल करण्यात आले.

................

अपघातात एक जखमी

कोल्हापूर

पुणे बंगळुरु महामार्गावर साताऱ्याजवळील अजिंक्यतारा सहकारी साखर कारखान्यासमोर मोटारसायकल घसरून झालेल्या अपघातात सागर प्रभाकर कुंभार (वय ३२, रा. हाडणगे, ता. गडहिंग्लज) हे जखमी झाले. ते मित्राच्या मोटारसायकलवरुन पुण्याहून कोल्हापूरकडे येत असताना हा अपघात झाला.

गोकुळ नोकर भरतीप्रकरणी

गुन्हा नोंदवण्याची मागणी

म. टा. प्रतिनिधी,कोल्हापूर

जिल्हा दूध संघ गोकुळमध्ये नोकरभरतीची खोटी माहिती दिल्याप्रकरणी जिल्हा दूध संघाचे कार्यकारी संचालक आणि विभागीय उप निबंधक संस्था (दुग्ध) पुणे यांच्याविरोधात फसवणुकीचे गुन्हे दाखल करावेत, अशी मागणी ब्लॅक पँथर पक्षाने केली आहे. पक्षाच्या शिष्टमंडळाने शाहूपुरी पोलिस ठाण्याचे निरीक्षक संजय मोरे यांची भेट घेऊन गुन्हा दाखल करण्याच्या मागणीचे निवेदन दिले.

निवेदनात म्हटले आहे, गोकुळ दूध संघाला राज्य सरकारकडून जागा, मशिनरी,वाहने, भागभांडवल दिले आहे. पण गोकुळ प्रशासनाने सरकारने दूध संघाला भागभांडवल दिले नसल्याने मागासवर्गीयांची सरळसेवा भरती तसेच पदोन्नती देता येत नाही, असे खोटे पत्र २५ ऑक्टोबर २०१७ रोजी उपनिबंधक सहकारी संस्था (दुग्ध) यांना दिले आहे. खोटे पत्र देऊन गोकुळ प्रशासनाने मागासवर्गीय समाजासह, सरकार, प्रशासन यांची फसवणूक केली आहे. सरकारी कामात अनियमितता करणे फौजदारी गुन्हा ठरत असल्याने गुन्हा दाखल करावा, अशी मागणी केली आहे. शिष्टमंडळात सुभाष देसाई, साजिद खान, बाबूराव जैताळकर, धोंडीराम कांबळे, प्रेमकुमार पेडणेकर यांच्यासह कार्यकर्त्यांचा समावेश होता.

'जैन संघटनेतर्फे

युवती सक्षमीकरण'

कोल्हापूर टाइम्स टीम

भारतीय जैन संघटनेतर्फे युवती सक्षमीकरणांतर्गत 'स्मार्ट गर्ल टू बी हॅपी, टू बी स्ट्राँग' उपक्रम गेली दहा वर्षे राबविला जात आहे. राज्यात आठवी ते बारावीपर्यंतच्या सुमारे दोन लाखांहून अधिक विद्यार्थिनींपर्यंत संवाद साधला आहे. राज्याच्या शिक्षण विभागाच्या सहकार्याने काही ठिकाणी उपक्रम सुरू आहे. कोल्हापूर जिल्ह्यातही हा उपक्रम सुरू केला जाणार असल्याची माहिती संघटनेचे राष्ट्रीय अध्यक्ष प्रफुल्ल पारेख यांनी पत्रकार परिषदेत दिली.

पारेख म्हणाले, 'संघटनेतर्फे युवती सक्षमीकरण, दुष्काळमुक्त महाराष्ट्र आणि मूल्यवर्धन शिक्षण विषयावर काम सुरू आहे. संघटना सामाजिक, नैसर्गिक आपत्ती व्यवस्थापन आणि शैक्षणिक क्षेत्रात कार्यरत आहे. 'स्मार्ट गर्ल' उपक्रमात शाळांमध्ये १२ तासांचा कार्यक्रम आहे. काही शाळांमध्ये दररोज दीड तासाचा कार्यक्रम घेतला जात आहे, तर काही ठिकाणी दोन दिवसांत कार्यशाळा होत आहे. स्मार्ट गर्लची माहिती ऑडिओ आणि व्हिडीओमधून सांगितली जात आहे. विद्यार्थिनी आणि पालकांसोबत चर्चा केली जात आहे. जीवन कसे जगावे, संवाद, आत्मविश्वास, मासिक पाळी, स्वसंरक्षण, योग्य वेळी योग्य निर्णय घेण्याची क्षमता निर्माण केली जात आहे. कोल्हापूर जिल्ह्यात हा उपक्रम लवकरच राबविला जाणार आहे.' यावेळी संघटनेचे राष्ट्रीय कार्यकारिणी सदस्य पारस ओसवाल, राज्य उपाध्यक्ष अभिनंदन खोत, डॉ. शीतल पाटील, अतुल भंडारे, राजाभाई शहा, अनिल पाटील, प्रकाश मुंगळे, आदी उपस्थित होते.

००००००००००००००

आवाज

..................

टीईटी परीक्षेची

तारीख बदण्याची गरज

केंद्रीय माध्यमिक शिक्षण मंडळाच्या(सीबीएसई) वतीने महाविद्यालयात सहाय्यक प्राध्यापक पदासाठी घेण्यात येणारी नेट परीक्षा आणि महाराष्ट्र राज्य पात्रता परीक्षा परिषदेच्यातवतीने घेण्यात येणारी टीईटी परीक्षा आठ जुलै रोजी घेण्यात येणार आहे. या दोन्ही परीक्षा एकाच दिवशी आल्यामुळे एका परीक्षेला विद्यार्थ्यांना मुकावे लागणार आहे. त्यामुळे कोणत्याही एका परीक्षेची तारीख बदलण्याची मागणी विद्यार्थ्यांतून होत आहे.

००००

उमेदवारांच्या करिअरवर परिणाम

पदवी शिक्षणानंतर करिअरच्यादृष्टीने विद्यार्थी अभ्यास करत असतात. नोकरीसाठी नेट व टीईटी या दोन्ही परीक्षा महत्वाच्या असतात. त्यासाठी विद्यार्थी जिद्दीने अभ्यास करत असतात. पण प्रशासनाने नेट व टीईटी या दोन्ही परीक्षा एकत्र घेतल्यास काही विद्यार्थ्यांना एक परीक्षा ड्रॉप करावी लागणार आहे. त्याचा फटका उमेदवारांच्या करिअर होण्याची शक्यता आहे. त्यामुळे प्रशासनाने वेळीच परीक्षेच्या तारखेत बदल करावा

प्रियांका धनवडे, विद्यार्थी

००००

विद्यार्थ्यांचे नुकसान टाळावे

परीक्षांचे आयोजन करणाऱ्यांनी अन्य परीक्षांच्या तारखा लक्षात घेणे गरजेचे असते. नेट व टीईटी परीक्षा एकत्र घेतल्याने विद्यार्थ्यांना एका परीक्षेला मुकावे लागणार आहे. कोणती परीक्षा द्यायची यावरुन शिक्षकांच्यात द्विधा मन:स्थिती होणार आहे. अशा चुकांमुळे उमेदवारांच्या करिअरवर दूरगामी परिणाम होऊ शकतात. ही चूक दुरूस्त करून सीबीएसई अथवा महाराष्ट्र राज्य पात्रता परिषदेने परीक्षेची तारीख बदलण्याची गरज आहे.

प्रा. प्रशांत पाटील

००००

भवितव्याशी खेळण्याचा प्रकार

नेट व टीईटी परीक्षा एकाच दिवशी घेऊन विद्यार्थी व उमेदवारांची अडचण केली आहे. कोणती परीक्षा ड्रॉप करायची, एक परीक्षा दिल्यानंतर त्यामध्येही उत्तीर्ण होणार का याची चिंता सतावत राहणार आहे. विद्यार्थी अतिशय काळजीपूर्व व कष्ट करुन अभ्यास करत असतात. अशा परीक्षा देताना एकाच दिवशी दोन परीक्षा असणे हे विद्यार्थ्यांच्या भवितव्याशी खेळण्याचा प्रकार आहे. त्यासाठी एका परीक्षेचे वेळापत्रक बदलण्याची गरज आहे.

असिफ मुल्लानी, विद्यार्थी

०००००

टीईटीची तारीख बदलावी

आजचा विद्यार्थी शिक्षणाकडे करिअर म्हणून पाहत आहे. नोकरीसाठी तो नियोजनबद्ध अभ्यास करत असतो. शिक्षक म्हणून काम करण्यासाठी नेट व टीईटी परीक्षांसाठी अनेक विद्यार्थ्यांनी फॉर्म भरले आहेत. दोन्ही परीक्षांचा अभ्यास विद्यार्थी करत आहेत. पण एकाच दिवशी परीक्षा आल्याने विद्यार्थ्यांचे नुकसान होणार आहे. नेटची परीक्षा देशभर एकाच दिवशी होते. पण टीईटीची परीक्षा बदलता येऊ शकते. टीईटी परीक्षेत संधी मिळावी यासाठी राज्य सरकारने सकारात्मक विचार करावा.

सुधाकर सावंत, शिक्षक

०००००

राज्य सरकारने पुढाकार घ्यावा

नोकरीसाठी अनेक विद्यार्थ्यांनी नेट आणि टीईटीसाठी फॉर्म भरले आहेत. पण एकाच दिवशी परीक्षा आल्याने एका परिक्षेवर पाणी सोडावे लागणार आहे. दोन्ही परीक्षांसाठी विद्यार्थ्यांनी अभ्यास करत आहेत. विद्यार्थ्यांचे कष्ट वाया जाऊ नये यासाठी राज्य सरकारने पुढाकार घेण्याची गरज आहे. सरकार यातून मार्ग काढेल अशी आशा वाटते.

राजेश वरक,शिक्षक

हॉटेल सयाजीचे पाणी बिल नियमानुसार

नळ जोडणी रितसर, ग्राहकांना पिण्यासाठी मिनरल वॉटर

म. टा. प्रतिनिधी, कोल्हापूर

'हॉटेल सयाजीने पाण्यासाठी महापालिकेकडून रितसर नळ जोडणी घेतली आहे. पाणी पुरवठा विभागाचे कर्मचारी पाण्याचे मीटर तपासून बिल देतात. त्यामुळे हॉटेल सयाजी नियमानुसाच पाणी वापरत आहे,' असे पत्रक हॉटेल सयाजीचे सरव्यवस्थापक पुनीत महाजन यांनी प्रसिध्दीस दिले आहे.

पत्रकात पुढे म्हटले आहे, 'हॉटेलमध्ये दैनंदिन खर्चासाठी बोअरच्या पाण्याचा वापर केला जातो. तसेच हॉटेलमधील ग्राहकांना पिण्यासाठी मिनरल वॉटरच्या बाटल्या दिल्या जातात. या हॉटेलमध्ये महापालिकेच्या पाण्याचा वापर फारच कमी प्रमाणात होतो. त्यामुळे पाण्याचे बिल कमी होते. हॉटेल व्यवस्थापनने महाापलिकेच्या पाणी पुरवठा विभागाकडून रितसर नळ जोडणी घेतली आहे. हॉटेल व्यवस्थापनने बोअरच्या पाण्याच्या शुध्दीकरणासाठी लाखो रुपये खर्चून आरओ प्लांट उभारला आहे. सुमारे वीस लाख रुपये खर्चून सांडपाणी प्रक्रिया प्रकल्प बांधला आहे. सांडपाणी रिसायकलिंग करुन पुन्हा बागेतील झाडांसाठी वापरले जाते. महापालिकेच्या पाण्याचा वापर अत्यल्प होतो. कमर्शिअल दराने पाण्याचे बिल भरले जाते. पाणी पुरवठा विभागाचे कर्मचारी पाण्याचे मीटर तपासून बिल देतात. त्यामुळे कुणीही केवळ राजकारणातून सयाजी हॉटेलची बदनामी करु नये. सयाजी हॉटेलमुळे शहराच्या विकासात व सौंदर्यात भर पडली आहे, हे आरोप करणाऱ्यांनी विसरु नये.'

ऊर्दू शिक्षकांच्या कायम

सेवेसाठी प्रयत्नशील

राज्य प्राथमिक शिक्षक समितीचे अधिवेशन महापौर यवलुजे यांची ग्वाही

म. टा. प्रतिनिधी, कोल्हापूर

'शैक्षणिक क्षेत्रातील अडचणी सोडविण्यासाठी महाराष्ट्र राज्य प्राथमिक शिक्षक समितीचे महत्त्वपूर्ण योगदान आहे. शिक्षक, शिक्षकेतर कर्मचाऱ्यांच्या मागण्यांसाठी त्यांनी लोकशाहीच्या मार्गाने लढा दिला. शाळा बचाव आंदोलनात त्यांची भूमिका महत्त्वाची असून, महापौर म्हणून आपण सातत्याने त्यांच्या पाठीशी राहू. ऊर्दू शाळेतील शिक्षकांना कायम करण्यासंबंधीच्या मागणीचा अग्रक्रमाने विचार करत असून, त्यांना कायम करण्यासाठी प्रयत्नशील राहू,' अशी ग्वाही महापौर स्वाती यवलुजे यांनी दिली.

महाराष्ट्र राज्य प्राथमिक शिक्षक समितीचे त्रैवार्षिक अधिवेशन व गुणवंताचा सत्कार कार्यक्रम गुरुवारी अजिंक्यदत्त बेलबाग येथे पार पडला यावेळी त्या बोलत होत्या. कार्यक्रमास प्राथमिक शिक्षण समिती सभापती वनिता देठे उपस्थित होत्या. अध्यक्षस्थानी अखिल भारतीय प्रारंभिक शिक्षक महासंघाचे राष्ट्रीय अध्यक्ष प्रभाकर आरडे होते.

उर्दू शिक्षण सेवकांना ताबडतोब कायम करून फरकासह पगार आदा करावा, वरिष्ठ श्रेणीची प्रकरणे तातडीने निकालात काढावीत, कला शिक्षकांना वरिष्ठ श्रेणी लागू करावी, दरमहा एक तारखेला पगार करावा, सेवानिवृत्तीसह कार्यरत शिक्षकांना निवड श्रेणी लागू करावी, शिक्षकांच्या बदल्या १२ मेपूर्वी ऑनलाइन व सध्या अस्तित्वात असलेल्या नियमाप्रमाणेच कराव्यात, महापालिकेने संघटनेसाठी व शैक्षणिक उपक्रम राबविण्यासाठी जागा तसेच इमारत उपलब्ध करून द्यावी, उर्दूच्या रिक्त जागा त्वरित भराव्यात तसे आदेश द्यावेत, बदल्यांपूर्वी पदोन्नती द्यावी, प्रभारी मुख्याध्यापकांना नियमित मुख्याध्यापकांचे आदेश द्यावेत, विषय शिक्षकांच्या रिक्त जागा भराव्यात, नगरपालिका व महापालिकेकडील शिक्षकांना गटविमा लागू करावा, महाराष्ट्रातील एकही शाळा बंद करू नये, सर्व मुलांना सरकारकडून गणवेश व शैक्षणिक साहित्य पुरविण्यात यावे, सर्वांना जुनी पेन्शन योजना लागू करावी, नगरपालिका व महापालिकांकडील शिक्षकांचे बदल्यांचे धोरण निश्चित करावे, शालेय पोषण आहार योजना स्वतंत्र यंत्रणेमार्फत राबवावी, विद्यार्थ्यांच्या गणवेशासाठी पूर्वीप्रमाणे शाळेकडे अनुदान द्यावे, अन्यथा सरकारनेच गणवेश पुरवावेत अशा मागण्या यावेळी करण्यात आल्या.

उमेश देसाई यांनी प्रास्ताविक केले. यावेळी शिक्षक नेते दिलीपराव भोईटे, शिक्षक समिती जिल्हाध्यक्ष अर्जुन पाटील, जिल्हा सरचिटणीस प्रमोद तौंदकर, कार्यालयीन चिटणीस सुधाकर सावंत, उत्तम गुरव, आशालता कांजर, वसंत आडके, सुभाष धादवड, संजय पाटील, उमेश देसाई आदी शिक्षकवर्ग उपस्थित होते.

फोटो

...........

... तर आमदारांच्या दारात उपोषणाला बसणार

म. टा. प्रतिनिधी, कोल्हापूर

महाराष्ट्र ज्येष्ठ नागरिक महासंघाच्या (फेस्कॉम) कोल्हापूर प्रादेशिक विभागाच्या वतीने आंदोलनाच्या पुढील टप्प्यात मागण्यांचे निवेदन आमदारांना पाठविण्यात येणार असून मागण्या मान्य न झाल्यास आमदारांच्या दारात उपोषण करण्याचा इशारा दिला. गुरूवारी विविध मागण्यांचे निवेदन जिल्हाधिकारी अविनाश सुभेदार यांना देण्यात आले. त्यांनी मागण्यांचे निवेदन सरकारकडे पाठविण्यात येईल, असे आश्वासन दिले. संघटनेतर्फे गेले दोन दिवस जिल्हाधिकारी कार्यालयासमोर साखळी उपोषण सुरू होते.

ज्येष्ठ नागरिकांसाठी स्वतंत्र आयोग निर्माण करावा, २०१५ च्या ज्येष्ठ नागरिक धोरणास आर्थिक तरतुदीसह मंजुरी द्यावी, विनामूल्य आरोग्य विमा योजना लागू करावी आदी मागण्यांसाठी महाराष्ट्र ज्येष्ठ नागरिक महासंघ (फेस्कॉम) कोल्हापूर विभागातर्फे उपोषण करण्यात आले. गुरूवारी विविध मागण्यांचे निवेदन जिल्हाधिकारी सुभेदार यांना देण्यात आले. फेस्कॉमचे विभागीय अध्यक्ष डॉ. मानसिंगराव जगताप यांनी ज्येष्ठ नागरिकांना येणाऱ्या विविध समस्या मांडल्या. १९९९ मध्ये ज्येष्ठ नागरिकांसाठी धोरणाची पुनर्रचना करण्यात आली. सप्टेंबर २०१५ मध्ये अंतिम पुनर्रचना करूनही आर्थिक तरतुदीसह धोरणांची अंमलबजावणी केलेली नाही. त्याचा अध्यादेशही काढलेला नाही. सेवानिवृत्तीचे वय ५८ असताना ६५ वर्षावरील व्यक्तींचा ज्येष्ठ नागरिक म्हणून मान्यता दिली जात आहे. यामुळे ज्येष्ठ नागरिकांना मिळणाऱ्या अनेक सरकारी योजनांचा लाभ घेता येत नाही. सरकारने या मागण्यांचा गांभीर्याने विचार करावा. दरम्यान, या मागण्यांचे निवेदन स्वीकारून जिल्हाधिकारी सुभेदार यांनी मागण्यांचे निवेदन सरकारकडे पाठविण्याचे आश्वासन दिले. उपोषणाला राष्ट्रवादी काँग्रेसचे राष्ट्रीय कार्यकारिणी सदस्य आर. के. पोवार, उपमहापौर सुनील पाटील, भू विकास बँकेचे सेवक प्रतिनिधी संघटना, मराठा महासंघाचे जिल्हाध्यक्ष वसंतराव मुळीक, पद्माकर कापसे आदींनी भेट देऊन पाठिंबा दिला. शिष्टमंडळात श्रीकांत आडीवरेकर, आर. डी. नार्वेकर, डॉ. दशरथ चौगुले, डॉ. शिवाजीराव हिलगे, सुलोचना श्रीधर, सी. के. नलवडे, माजी प्राचार्य य. ना. कदम, भरत चव्हाण, वसंत खांडेकर, सुशिला ओडेयार, जयवंत लाटकर, आण्णासाहेब दानोळे आदींचा समावेश होता. उपोषणामध्ये सुमारे ६० हून अधिक ज्येष्ठ नागरिक सहभागी झाले. गारगोटी, चंदगड, आजरा आणि हातकणंगले येथेही तहसीलदार कार्यालयासमोर उपोषण करण्यात आले.

झीप कॉइनच्या सूत्रधाराचा बीडमध्ये शोध

म. टा. प्रतिनिधी, कोल्हापूर

लाखो रुपयांचा गंडा घालणाऱ्या झीप कॉइनचा मुख्य सूत्रधार बालाजी गणगे याच्या शोधासाठी स्थानिक गुन्हे अन्वेषण शाखेच्या पथकाने आता पुण्यानंतर बीडमध्ये शोध सुरु केला आहे. दरम्यान, शुक्रवारी झीप कॉइनमध्ये फसवणूक झालेल्या नऊ गुंतवणूकदारांनी स्थानिक गुन्हे अन्वेषण विभागाकडे तक्रार केली आहे.

अंदाजे २५ कोटी रुपयांची झीप कॉइन क्रिप्टो करन्सीद्वारे फसवणूक झाल्याने पोलिसांनी संशयित राजेंद्र नेर्लेकर, अनिल नेर्लेकर, संजय कुंभार या तिघांना अटक केली आहे. त्यांना सोमवार(ता.७)पर्यंत पोलिस कोठडीत ठेवण्याचे आदेश कोर्टाने दिले आहे. पोलिसांनी तिघांच्याकडे चौकशी सुरु केली असून मुख्य सुत्रधार बालाजी गणगेचा शोध सुरु केला आहे. गुरुवारी पुण्यातील घर व फॉर्म हाऊसवर पोलिसांनी छापे टाकले, पण तो मिळून आला नाही. संशयित बालाजीने बीडकडे पलायन केल्याची माहिती कळताच पोलिस बीडमध्ये पोचले आहेत. बीडमध्ये बालाजीने झीप कॉइनमधून मिळालेली रक्कम गुंतवणूक केल्याचा पोलिसांचा अंदाज आहे.

२०१७ पासून कोल्हापूर, सांगली व सातारा जिल्ह्यातील उद्योजक, कारखानदार, राजकीय मंडळींनी झीप कॉइन्समध्ये गुंतवणूक केली आहे. त्यांनी अंदाजे २५ कोटींहून अधिक रक्कम गुंतवली आहे. काही बांधकाम व्यावसायिकांनी झीप कॉइन्समध्ये लाखो रूपयांची रक्कम गुंतवली आहे, याकडेही पोलिसांनी लक्ष केंद्रीत केले आहे. झीप कॉइन्सविरोधात गुंतवणूकदार तक्रार करण्यास पुढे येऊ लागले असून शुक्रवारी नऊ तक्रारदारांनी स्थानिक गुन्हे अन्वेषण विभागाशी संपर्क साधला. सहाजणांचे जबाब घेण्यात आले असून तीनजणांना तक्रार दाखल करण्यासाठी आणखीन पुरावे आणण्यास सांगितले आहे.

झीप कॉइन्सचे कोल्हापुरात लक्ष्मीपुरी येथे कार्यालय असून पोलिसांनी यापूर्वी कार्यालयातील संगणक जप्त केला आहे. सायबर शाखेच्या माध्यमातून संगणकातील डाटा ओपन करण्यासाठी प्रयत्न केले जात आहेत. डाटा ओपन झाल्यावर गुंतवणूकदारांची नावे उघड होणार असून पोलिसांना तपास करण्यास मदत होणार आहे. गुंतवणूदारांना आकर्षित करण्यासाठी कंपनीने १५ हून अधिक एजंट नेमले होते. त्यांना २० टक्के कमिशन दिले होते. हे एजंट सध्या भूमिगत झाले आहेत.

फोटो आहे

गोकुळच्या निमंत्रणाला

मंत्री जानकरांचा थंडा प्रतिसाद

म. टा. प्रतिनिधी, कोल्हापूर

कोल्हापूर जिल्हा दौऱ्यावर असलेल्या दुग्धविकास मंत्री महादेव जानकर यांची शुक्रवारी कोल्हापूर जिल्हा दूध उत्पादक सहकारी संघाचे (गोकुळ) चेअरमन विश्वास पाटील यांनी अधिकारी व पदाधिकाऱ्यांसह भेट घेतली. यावेळी त्यांनी मंत्री जानकर यांनी गोकुळला भेट देण्याचे निमंत्रण दिले. पण मंत्री जानकर यांनी निमंत्रणला थंडा प्रतिसाद दिला. विभागीय उपनिबंधक (दुग्ध) यांच्यापुढील सुनावणी दरम्यान वकिलांनी चांगली बाजू मांडल्याचे सांगत पदाधिकाऱ्यांची फिरकीही जानकरांनी घेतली.

सरकारचा आदेश डावलून दूध खरेदी दर न देणाऱ्या सहकारी दूध संघांची चौकशी सुरू आहे. यामध्ये गोकुळ दूध संघाचाही समावेश आहे. त्यामुळे मंत्री जानकर यांच्या दौऱ्याकडे सर्वांचे लक्ष लागले होते. मंत्री जानकर कोल्हापूर जिल्हा दौऱ्यावर असताना ते काहीकाळ शासकीय विश्रामगृह येथे थांबले होते. यावेळी मंत्री जानकर यांची चेअरमन पाटील यांच्यासह संचालक बाबा देसाई, महाव्यस्थापक आर. सी. शहा यांनी भेट घेतली. पाटील यांनी गायीच्या दुधाचा सरकारचा हमीभाव २७ रुपये असला, तरी उत्पादकांना देण्यात येणाऱ्या सर्व सुविधांचा विचार करता हा दर २८ रुपयापर्यंत जात आहे. म्हशीच्या दुधाचा दर ३६ रुपये असताना प्रत्यक्ष उत्पादकांना फरकासह ४० रुपयांपर्यंत दर दिला जात आहे, असे सांगितले. चेअरमन पाटील गोकुळच्या विविध योजना सांगत असतानाच मंत्री जानकर यांनी गुरुवारी विभागीय उपनिबंधकांसमोर झालेल्या सुनावणी दरम्यान गोकुळच्या वकिलांनी चांगले मुद्दे मांडल्याचे निदर्शनास आणून देत फिरकी घेतली. मंत्री जानकरांच्या या वक्तव्यामुळे पदाधिकारी चांगलेच गोंधळून गेले.

त्यानंतरही चेअरमन पाटील यांनी गोकुळने २०१७-१८ वर्षात दोन हजार ११५ कोटींची उलाढाल केली असल्याचे सांगत गोकुळला भेट देण्याची विनंती केली. यावर मंत्री जानकर यांनी गोकुळचे कार्य कौतुकास्पद असल्याचे सांगितले. पण निमंत्रणाला फारसा प्रतिसाद दिला नाही. पण सरकारचा आदेश डावलल्याने दूध संघाची चौकशी सुरू असताना मंत्री जानकर यांनी केलेल्या वक्तव्याने उपस्थितही अवाक झाले.

म. टा. प्रतिनिधी, कोल्हापूर

'समाजात महिलांवर होणाऱ्या अत्याचाराच्या घटना निंदनीय असून, काश्मीरमधील घटना अत्यंत वेदनादायी अशीच आहे. अशा घटनांमधील लोकप्रतिनिधींचा सहभाग लोकशाहीला घातक असून, समाजातील उणिवा दूर करण्याचे काम राज्यकर्त्यांचे आहे. राज्यकर्त्यांनी अशा उणिवा शोधून महिला सक्षमीकरणासोबत त्यांना स्वावलंबी बनविले पाहिजे,' असे मत परिवहन मंत्री दिवाकर रावते यांनी व्यक्त केले. भगिनी मंचच्या वतीने आयोजित भगिनी महोत्सवाच्या उद्घाटनप्रसंगी ते बोलत होते.

प्रायव्हेट हायस्कूल येथे शुक्रवारपासून सुरू झालेल्या महोत्सवाचे उद्घाटन महापौर स्वाती यवलुजे यांच्या हस्ते झाले. प्रमुख पाहुणे म्हणून बोलताना मंत्री रावते म्हणाले, 'महिलांवर ठिकठिकाणी होणाऱ्या अत्याचाराच्या घटनांमुळे त्यांच्या सुरक्षेचा प्रश्न ऐरणीवर आला आहे. कठुआ, उन्नाव येथील घटना समाजाला विचार करायला लावणाऱ्या आहेत. कठुआसारख्या घटनेतील लोकप्रतिनिधींचा सहभाग हा तर त्याहून गंभीर प्रश्न असून, यामुळे लोकशाहीच धोक्यात येण्याची शक्यता आहे. एकीकडे वैज्ञानिक प्रगती वेगाने होत असताना कौटुंबिक कलहातून होणाऱ्या आत्महत्या गंभीर स्वरूप धारण करत आहेत. कौटुंबिक जीवनात महिलांबाबत चिंता व्यक्त करण्यासारखी परिस्थिती निर्माण होत आहे. अशा परिस्थितीला विभक्त कुटुंब पद्धती कारणीभूत आहे का? टीव्ही मालिकांमधून वारंवार महिलांमधील बेबनाव दाखवला जातो. अशावेळी महिलांमध्ये सामाजिक, वैचारिक, शैक्षणिक आदान-प्रदान होण्याची आवश्यकता असून, त्यासाठी अशा महोत्सवांतूम समुपदेशन होण्याची गरज आहे.'

आमदार क्षीरसागर यांनी गोरगरीब रुग्णांना आरोग्यसेवा देण्याचे महत्त्वाचे कार्य केले आहे. भगिनी मंचच्या माध्यमातून बचत गटाची चळवळ उभा करून महिलांना स्वालंबन बनविण्याचे कार्य केले आहे. अशा महोत्सवातून प्रेरणा घेऊनच परिवहन महामंडळाचे कँटीन महिला बचतगटांना चालविण्यास देण्यासाठी निविदा काढल्याचे मंत्री रावते यांनी सांगितले.

आमदार राजेश क्षीरसगार म्हणाले, 'महिलांना आत्मनिर्भर आणि स्वावलंबी बनविण्यासाठी महोत्सवाचे आयोजन केले आहे. बचतगटांच्या माध्यमातून शहरातील अनेक महिलांना स्वयंपूर्ण बनवले आहे. बचत गटांना त्यांच्या वस्तू विक्रीसाठी महोत्सवाच्या माध्यमातून खुले व्यासपीठ दिले जात आहे.'

भगिनी मंचच्या अध्यक्षा वैशाली क्षीरसागर म्हणाल्या, 'मंचच्या माध्यमातून २०० बचत गटांची स्थापना केली आहे. याद्वारे दहा गारमेंट पार्कची निर्मिती करून महिलांना रोजगार उपलब्ध करून त्यांना स्वावलंबी बनवले आहे. यामुळेच दरवर्षी होणाऱ्या महोत्सवाने एक वेगळी ओळख निर्माण केली आहे.' महापौर यवलुजे यांनीही मनोगत व्यक्त केले.

यावेळी मंत्री रावते यांच्या हस्ते मुख्यमंत्री सहाय्यता निधीतून रुग्णांना निधीचे पत्रे देण्यात आली. तसेच कर्तृत्वत्वान महिलांचा सत्कार करण्यात आला. उद्घाटन समारंभास परिवहन सभापती राहुल चव्हाण, माजी नगरसेवक रवी इंगवले, नगरसेवक अभिजित चव्हाण, नगरसेविका प्रतिज्ञा उत्तुरे, नंदकुमार मोरे, मारुतराव कातवरे, उदय पवार, अमर समर्थ, जितू सलगर, किशोर घाटगे, आदी उपस्थित होते. वैशाली क्षीरसागर यांनी प्रास्ताविक केले. हृषिकेश देसाई, पद्माकर कापसे, अंकुश निपाणीकर यांनी सूत्रसंचालन केले. ऋतुराज क्षीरसागर यांनी आभार मानले.

०००

महोत्सवात आज

भगिनी महोत्सवात शनिवारी सकाळी दहा वाजता टीव्ही कलाकार सुनील होळकर यांच्या 'वहिनी सरकार' या महिलांच्या स्पर्धात्मक खेळांचे आयोजन केले आहे. विजेत्या भगिनीला 'भगिनी कोल्हापूरची २०१८' किताब व आकर्षक बक्षीस देण्यात येणार आहे, तर सायंकाळी पाच वाजता 'मिस भगिनी व मिसेस भगिनी' स्पर्धा होईल. त्यानंतर सायंकाळी सात वाजता 'चला हवा येऊ द्या'फेम भाऊ कदम आणि कॉमेडीची बुलेट ट्रेनफेम अभिनेत्री सुप्रिया पाठारे यांची कॉमेडीची जुगलबंदी पाहावयास मिळणार आहे.

०००००

खंडणीसाठी कर्ज सल्लागाराचे

अपहरण करुन मारहाण

म. टा. प्रतिनिधी, कोल्हापूर

पंचवीस लाखांच्या खंडणीसाठी कर्ज सल्लागार विजय निवृत्ती कांबळे (वय ३८, रा. बुद्धविहार शेजारी, निगवे खालसा, ता. करवीर) यांचे अपहरण करुन त्यांच्याकडील ७८ हजार ५०० रुपये लुटून नेण्यात आले. याप्रकरणी जुना राजवाडा पोलिसांनी संशयित विशाल शिंदे, कांबळे, राजा, गणी भाई यांच्यासह चारजणांच्याविरोधात गुन्हा नोंदवला आहे.

याबाबत अधिक माहिती अशी, विजय कांबळे हे कर्ज सल्लागार असून बँकांच्या कर्ज प्रकरणांची कामे ते करुन देतात. ३० एप्रिल रोजी विशाल शिंदे याने कांबळे यांच्याशी मोबाइलवर संपर्क साधून त्यांना कळंबा रोडवरील सूर्यकांत मंगल कार्यालयाजवळील सदगुरु ट्रेडर्स येथे बोलावले. तेथे शिंदे याने कांबळे यांना इनोव्हा कारमध्ये बसण्यास सांगितले. कारमध्ये शिंदे व त्याच्या सहकाऱ्यांनी कर्जासंदर्भात चर्चा सुरु केली. दरम्यान, इनोव्हा कारने कांबळे यांना आयटीआय कॉर्नर, पाचगाव रोड, आर.के.नगर, भारती विद्यापीठ, चित्रनगरी, राष्ट्रीय महामार्ग, गोकुळ शिरगांव एमआयडीसी, फाईव्ह स्टार एमआयडीसी, रेमंड चौक आदी ठिकाणी फिरवले. त्यानंतर परत त्याच मार्गाने येताना चालत्या कारमध्ये शिंदे याने कांबळे यांच्याकडे २५ लाख रुपयांची खंडणी मागितली. तू कर्ज प्रकरणामध्ये भरपूर पैसे मिळवले आहेस, असे सांगून लाथाबुक्क्यांनी मारहाण केली. २५ लाख रुपये न दिल्यास तुला ठार मारण्याची सुपारी मिळाली आहे, अशी धमकीही शिंदे व त्याच्या सहकाऱ्यांनी दिली. कांबळे यांच्या पाकिटातील रोख साडेचार हजार रुपये त्यांनी काढून घेतले. तसेच एटीएम सेंटरजवळ कार थांबवून कांबळे याला पैसे काढण्यास सांगितले. कांबळे यांनी एटीएममधून चार हजार रुपये काढून संशयितांना दिले. पैसे कमी मिळाल्याने संशयितांनी घरच्यांकडून किंवा मित्रांकडून पैसे मागून घेण्याची सूचना केली. सायबर चौक परिसरात आल्यानंतर कांबळे यांनी जिवाच्या भितीने मित्र बाबासाहेब कांबळे यांच्याकडे मोबाइलवरुन पैसे मागितले. बाबासाहेब कांबळे हे सायबर चौकात ७० हजार रुपये घेऊन आल्यावर संशयितांनी कांबळे यांच्याकडील ७० हजार रुपये हिसकावून घेतले. तसेच झालेली घटना सांगितल्यास ठार मारले जाईल, अशी धमकी देऊन विजय कांबळे यांना सोडून दिले. विजय कांबळे यांनी राजारामपुरी, जुना राजवाडा, करवीर पोलिसांना खंडणीची धमकी व लुटीची माहिती दिल्यावर जुना राजवाडा पोलिस ठाण्यात गुन्हा नोंदवण्यात आला. संशयितांचा शोध घेतला जात आहे, अशी माहिती पोलिस निरीक्षक अनिल गुजर यांनी सांगितले.

\B \Bम. टा. प्रतिनिधी, कोल्हापूर

'मध्यवर्ती बसस्थानकाच्या दोनशे मीटर परिसरातून अन्य वाहनांनी प्रवासी वाहतूक केल्यास त्यांच्यावर कडक कारवाई करावी. गर्दीच्या काळात खासगी ट्रॅव्हल्सनी दीडपटपेक्षा अधिक भाडे आकारल्यास तत्काळ कारवाई करावी,' असे आदेश परिवहनमंत्री दिवाकर रावते यांनी आरटीओ आणि एसटीच्या अधिकाऱ्यांना दिले. मध्यवर्ती बसस्थानकाला भेट दिल्यानंतर त्यांनी पत्रकारांशी संवाद साधला. त्यांनी एसटीचे अधिकारी आणि कामगार यांच्यासोबतही संवाद साधून समस्या जाणून घेतल्या.

मंत्री रावते म्हणाले, 'राज्यातील बसस्थानकांच्या दोनशे मीटर परिसरातून कोणत्याही खासगी वाहनाला प्रवासी वाहतूक करण्याची परवानगी नाही. मात्र, अजूनही काही शहरांत खासगी बससह अन्य वाहने रस्त्यावर थांबून प्रवासी वाहतूक करतात. अशा वाहनांवर कडक कारवाई करा. सण, सुट्टी आणि गर्दीच्या काळात खासगी वाहनांची भाडेवाढ चौपट दिसते. खासगी वाहनांना एसटी महामंडळाच्या भाडेदराच्या तुलनेत अधिकाधिक दीडपट भाडे आकारता येईल. पण दीडपटपेक्षा जादा भाडे आकारल्यास त्यांच्यावर प्रादेशिक परिवहन कार्यालयाकडून तत्काळ कारवाई केली जाणार आहे. प्रवासी हाच केंद्रबिंदू ठेवूनच एसटी कार्यरत आहे. प्रवाशांची गैरसोय टाळण्यासाठी एखाद्या मार्गावर एसटी बस बंद पडल्यास तत्काळ दुरुस्त केली जाणार आहे. त्यासाठी नव्या २५० ब्रेकडाउन व्हॅन खरेदी करणार आहोत. या व्हॅनमध्ये चार कर्मचारी नियुक्त केले जाणार आहेत. यामध्ये अत्याधुनिक साधनसामग्री असून, प्रत्येक आगाराला एक व्हॅन दिली जाणार आहे.'

यावेळी रावते यांनी कामगार व अधिकारी यांच्याशी संवाद साधून त्यांच्या समस्या जाणून घेतल्या. यावेळी आमदार राजेश क्षीरसागर, शिवसेना जिल्हाप्रमुख संजय पवार, महामंडळाचे यंत्र अभियंता एस. एस. कुलकर्णी, कामगार अधिकारी पी. यू. पाटील, विधी अधिकारी टी. वाय. साळोखे, सुरक्षा अधिकारी सुधीर भातमारे, सहायक वाहतूक अधीक्षक अतुल मोरे, आदी उपस्थित होते.

००

वेतनवाढीची घोषणा लवकरच

एसटी प्रशासनाने निवडणूक आयोगाशी तत्काळ पत्रव्यवहार करून प्रलंबित वेतनवाढ जाहीर करण्यास परवानगी देण्याची विनंती केली आहे. त्याला निवडणूक आयोगाची मंजुरी मिळाली. महामंडळाचे व्यवस्थापकीय संचालक रणजितसिंह देओल यांची कर्नाटक विधानसभा निवडणुकीसाठी निरीक्षक म्हणून नियुक्ती झाली आहे. ते परत आल्यानंतर त्यांच्या उपस्थितीत वेतनवाढीची घोषणा केली जाईल. राज्य निवडणूक आयोगाने राज्यातील लोकसभा आणि अन्य पोटनिवडणुकांसाठी आचारसंहिता जाहीर केली आहे. त्यामुळे कामगारांच्या वेतनवाढीबाबत कोणताही निर्णय जाहीर करता येणार नाही. मात्र, वेतनवाढीसह कामगारांसह अन्य सुविधा जाहीर केल्या जातील.

दूध फाइल फोटो

..............

दूध उत्पादकांना ३३ कोटींचा फटका

उत्पादकांबरोबर ग्राहकांचीही दूध संघांकडून लूट

Maruti.Patil

@timesgroup.com

tweet: @MarutipatilMT

कोल्हापूर

राज्यातील शेतकरी संपानंतर दूध उत्पादकांना दिलासा देण्यासाठी राज्य सरकारने गाय व म्हशीच्या दूध दरात प्रतिलिटर तीन रुपये वाढ केली. पण अतिरिक्त दुधाचे कारण पुढे करत सरकारचा आदेश डावलून गायीचा दूध दर प्रतिलिटर दोन रुपये दर कमी केला. दूध संघांच्या या मनमानी कारभारांमुळे जिल्ह्यातील दूध उत्पादकांना दिवसाला १८ लाख प्रमाणे सहा महिन्यात ३३ कोटी ७३ लाख ९९ हजारांचा फटका बसला आहे. पशुखाद्य, वैरण व औषधोपचारांवर होणार खर्च विचारात घेता उत्पादकांना तोटातला व्यवसाय करावा लागत असल्याचे त्याचा परिणाम ग्रामीण अर्थव्यवस्थेवर झाला आहे. दर कमी करुन एकीकडे उत्पादकांची लूट केली जात असताना ग्राहकांना मात्र जुन्याच दराने विक्री करुन दूध संघ मात्र स्वत:चा फायदा करुन घेत आहेत.

जून महिन्यात राज्यातील शेतकऱ्यांनी संप केल्यानंतर १९ जून २०१७ रोजी राज्य सरकारने गाय व म्हैस दूध खरेदीदारत प्रतिलिटर तीन रुपयांची वाढ करण्याचे निर्देश सहकारी संघांना दिले. निर्णयानुसार दूध उत्पादकांना गायची ३.५ फॅट व ८.५ एसएनएफ दुधासाठी २७ रुपये तर म्हशीच्या सहा फॅट व नऊ एसएनएफसाठी ३६ रुपये दर देण्याच्या सूचना केल्या होत्या. त्यानंतर प्रत्येक पॉइंटसाठी ३० पैसे दरवाढ देण्याचेही निर्देश दिले होते. सरकारने दरवाढ जाहीर केल्यानंतर प्रत्यक्ष उत्पादकांचा हातात ऑगस्ट महिन्यापासून दरवाढ मिळाली. जेमतेम दोन महिने दरवाढ मिळाल्यानंतर अतिरिक्त दुधाचे कारण पुढे करत पुन्हा एक नोव्हेंबरपासून गायीच्या दुधाचा दर प्रतिलिटर दोन रुपयांनी कमी करण्याचा निर्णय घेतला. मात्र असा निर्णय घेतल्यानंतर दूध विक्रीमध्ये कोणताही बदल केला नाही.

सद्य:स्थितीत जिल्ह्यात गोकुळ, वारणा, स्वाभिमानी, शाहू , यळगूड आदी दूध संघांकडून गायीचे दररोज नऊ लाख ३७ हजार लिटर दूध संकलित केले जाते. प्रतिलिटर २५ रुपये दर असला तरी सरकारच्या हमीभावापेक्षा दोन रुपये दर कमी असल्याने उत्पादकांना दररोज १८ लाख ७४ हजार तर महिन्याला पाच कोटी ६२ लाख रुपयांचा फटका बसत आहे. एका गायीपासून सरासरी दहा लिटर दुधाचे २५० रुपये उत्पादकांना उत्पन्न मिळते. मात्र यासाठी त्यांना पशुखाद्य, वैरण व औषधोपचारासाठी ३५० रुपयांचा खर्च येत आहे. त्यामुळे उत्पादकांना दररोज शंभर रुपयांचा तोटा सहन करावा लागत आहे. ग्रामीण भागाचे अर्थकारण ऊस व दुग्ध व्यवसायाशी निगडीत आहे. यावर्षीच्या गळीत हंगामामध्ये ऊस उत्पादकांना मिळालेली अर्धवट एफआरपी आणि कमी केलेल्या दूध दरांमुळे ग्रामीण भागाचे अर्थकारणच कोलमडून गेले आहे. अतिरिक्त दुधाचे उत्पादन म्हणून खरेदी दरात कपात करताना दूध संघांनी विक्री दरात मात्र कोणतीही कपात केलेली नाही. त्यामुळे आजही बाजारात प्रतिलिटर ४८ ते ५२ रुपयांनी दुधाची विक्री होत आहे. दूध संघांच्या या गोरख धंद्यामुळे एकीकडे उत्पादक नागवला जात असताना ग्राहकांचीही लूट सुरू आहे. याला चाप लावण्यात सरकारी यंत्रणाही पूर्णपणे अपयशी ठरली आहे.

............

खासगी संघांकडून लुटीचा सपाटा

सहकारी दूध संघांना सरकारी आदेशाची अंमलबजावणी करावी लागते. अंमलबजावणी न केल्यास कायदेशीर प्रक्रियेला सामोरे जावे लागते. पण खासगी दूध संघांवर सरकारचे कोणतेही निर्बंध नसल्याने ते नेहमीच मनमानीपणाने दुधाची उत्पादकांकडून खरेदी करतात. सरकारने दूध दरात वाढ केल्यानंतर सहकारी दूध संघांनी काही दिवस अंमलबजावणी केली, मात्र खासगी दूध संघांनी सरकारच्या आदेशाला केराची टोपली दाखवत पूर्वीचा २४ रुपये प्रतिलिटर दर कायम ठेवला. पण सहकारी दूध संघांनी दरवाढ मागे घेतल्यानंतर खासगी दूध संघांनीही दुधाच्या दरात कपात केली. यामुळे आजही खासगी दूध संघांनी १८ ते १९ रुपयांनी गायीचे दूध खरेदी करत उत्पादकांना लुटण्याचा सपाटाच लावला आहे.

...................

चौकट

संघ दैनंदिन संकलन (लि.) होणारा तोटा (एक दिवसाचा)

गोकुळ सहा लाख ३० हजार १२ लाख ६० हजार

वारणा दोन लाख १७ हजार चार लाख ३४ हजार

स्वाभिमानी ३३ हजार २०० ६६ हजार ४००

शाहू सात हजार ५०० १५ हजार

अन्नपूर्णा १४ हजार ३० २८ हजार ६००

यळगूड तीन हजार सहा हजार

ज्योतिर्लिंग १६ हजार ५०० ३३ हजार

सह्याद्री १२ हजार २४ हजार

एकूण नऊ लाख ३७ हजार १८ लाख ७४ हजार

महापालिका लोगो आणि सिंगल फोटो

.......................

काँग्रेस आघाडीचे तीन प्रभाग सभापती

भाजप आघाडीचे शेळके यांची चिठ्ठीतून तिसऱ्यांदा निवड

म. टा. प्रतिनिधी, कोल्हापूर

महापौर निवड तोंडावर असल्याने साऱ्यांचे लक्ष लागलेल्या प्रभाग समिती निवडणुकीसाठी मोठ्या घडामोडी झाल्या नाहीत. तीन प्रभाग समितींमध्ये काँग्रेस आघाडीचे सभापती झाले. स्थायी सभापतीपदाच्या निवडणुकीत भाजपच्या उमेदवाराला मतदान केलेल्या राष्ट्रवादीच्या अफजल पिरजादे व अजिंक्य चव्हाण यांनी प्रभाग समितीच्या निवडीत मात्र काँग्रेस आघाडीच्या उमेदवारांना मतदान केले. तर शिवसेनेच्या नगरसेवकांनीही काँग्रेस आघाडीलाच मदत केली. भाजप आघाडीचे उमेदवार राजसिंह शेळके यांची ताराराणी मार्केट समिती सभापतीपदी तिसऱ्यांदा चिठ्ठीतून निवड झाली.

गांधी मैदान प्रभाग समितीच्या सभापतीपदी काँग्रेसच्या प्रतिक्षा पाटील, शिवाजी मार्केट प्रभाग समिती सभापतीपदी राष्ट्रवादीच्या माधवी गवंडी, राजारामपुरी प्रभाग समिती सभापतीपदी शोभा कवाळे यांची निवड झाली. जिल्हा परिषदेचे मुख्य कार्यकारी अधिकारी डॉ. कुणाल खेमनार यांच्या अध्यक्षतेखाली निवडी झाल्या.

गांधी मैदान, शिवाजी मार्केट, बागल मार्केट प्रभाग समितीमध्ये काँग्रेस व राष्ट्रवादीचे बहुमत आहे. ताराराणी मार्केट प्रभाग समितीमध्ये समान संख्याबळ आहे. तीन समितींमध्ये शिवसेनेचे नगरसेवक आहेत. यापूर्वी काँग्रेस आघाडीसोबत त्यांचा समझोता झाल्याने शिवसेनेचे नगरसेवक काँग्रेस आघाडीसोबत असतात. त्याप्रमाणे या निवडीमध्येही शिवसेनेच्या नगरसेवकांनी काँग्रेस आघाडीला मदत केली. ताराराणी मार्केट समितीमध्ये समान संख्याबळ असल्याने चिठ्ठीवर निवड झाली. यामध्ये एखादाही नगरसेवक गैरहजर राहिला तर बहुमताच्या जोरावर उमेदवार निवडला असता. त्यामुळे दोन्ही आघाडींनी आपापले दहाही नगरसेवक उपस्थित ठेवले होते. समान संख्याबळ झाल्याने शेवटी खेमनार यांनी चिठ्ठी टाकून सभापती निवडण्याची प्रक्रिया राबवली. त्यामध्ये शालेय विद्यार्थीनी जैनब इरशाद पठाण हिने शेळके यांच्या नावाची चिठ्ठी काढली. त्यामुळे शेळके तिसऱ्यांदा चिठ्ठीतूनच सभापती झाले.

गांधी मैदान सभापतीपदासाठी काँग्रेसच्या नगरसेविका प्रतिक्षा पाटील यांना १४ मते तर भाजप आघाडीच्या अश्विनी बारामते यांना सहा मते पडली. भाजप आघाडीच्या तेजस्विनी इंगवले गैरहजर होत्या. शिवाजी मार्केट प्रभाग सभापतीपदासाठी काँग्रेस आघाडीच्या माधवी गवंडी यांना ११ मते तर भाजप आघाडीच्या सुनंदा मोहिते यांना सात मते पडली. भाजप आघाडीचे नगरसेवक किरण शिराळे व शिवसेनेचे गटनेते नियाज खान गैरहजर होते. बागल मार्केट प्रभाग सभापतीपदासाठी काँग्रेस आघाडीच्या शोभा कवाळे यांना १२ मते तर भाजप आघाडीच्या कमलाकर भोपळे यांना सात मते पडली. भाजप आघाडीच्या नगरसेविका सविता घोरपडे गैरहजर होत्या. ताराराणी मार्केट प्रभाग सभापतीपदासाठी शेळके यांच्याविरोधात काँग्रेस आघाडीच्या नगरसेविका माधुरी लाड यांनी निवडणूक लढवली. यावेळी महापौर स्वाती यवलुजे, उपमहापौर सुनील पाटील, अतिरिक्त आयुक्त श्रीधर पाटणकर, उपायुक्त मंगेश शिंदे, सहाय्यक आयुक्त संजय सरनाईक, नगरसचिव दिवाकर कारंडे उपस्थित होते.

…....................

शेळकेंच्या नशिबाची चर्चा

ताराराणी मार्केट समितीमध्ये गेल्यावर्षीचा अपवाद वगळता राजसिंह शेळके यांची सभापती म्हणून सलग निवड झाली आहे. तीनहीवेळा काँग्रेस व भाजप आघाडीचे समान संख्याबळ असल्याने चिठ्ठी टाकण्यात आली. त्यामधून शेळके यांचीच निवड झाली. यामुळे तीनवेळा, तेही चिठ्ठीच्या माध्यमातून सभापतीपद मिळाल्याने शेळके यांच्या नशिबाची चर्चा महापालिकेत सुरु होती.

.....

स्थायी सभापती निवडणुकीपुरतेच

स्थायी समितीच्या निवडणुकीमध्ये राष्ट्रवादीचे उमेदवार मेघा पाटील यांच्या विरोधात राष्ट्रवादीचे नगरसेवक अफजल पिरजादे व अजिंक्य चव्हाण यांनी मतदान केले होते. त्यांच्यावर कारवाई करण्याबाबतची प्रक्रिया विभागीय आयुक्तांच्या पातळीवर सुरु आहे. या परिस्थितीत अजिंक्य चव्हाण यांनी प्रभाग समितीच्या निवडणुकीत काँग्रेस आघाडीच्या उमेदवार प्रतिक्षा पाटील यांना तर अफजल पिरजादे यांनी काँग्रेस आघाडीच्याच उमेदवार माधवी गवंडी यांना मतदान केले. त्यांच्या या मतदानामुळे महापौरपदाच्या निवडणुकीपूर्वीची ही शांतता असल्याची चर्चा सुरु झाली. तर स्थायी सभापती निवडणुकीपुरते सांगण्यात आलेले काम त्यांनी केले, आता ते त्यांच्या मनाचे राजे, अशीही चर्चा होती. त्यातून महापौर निवडीवेळी वेगळ्या घडामोडी घडणार हेच सूचित केले जात होते.

पान ४ मेन

...........................................

१०८ रूग्णवाहिका फाइल फोटो

..............................

'त्यांचे' जन्म ठिकाण '१०८'

कोल्हापूरसह चार जिल्ह्यात ६८० बाळांचा जन्म रूग्णवाहिकेत

Bhimgonda.Desai@timesgroup.com

Tweet : @bhimgondaMT

कोल्हापूर

डॉक्टरांनी प्रसूतीची दिलेली तारीख लांब असते, तरीही अचानक प्रसव वेदना येतात. नातेवाईकांची धावाधाव सुरू होते. दवाखान्यात दाखल होण्यासाठी वाहनाचा शोध सुरू होतो, तेवढ्यात कुणाला तरी आरेाग्य सेविकेने सांगितल्याचे आठवते आणि १०८ रूग्णवाहिकेला पाचारण केले जाते. रूग्णवाहिका येते, त्यामध्ये बसल्यानंतर प्रसव वेदना तीव्र होतात. काही वेळात धावत्या १०८ मध्येच बाळाचा जन्म होतो. अशाप्रकारे कोल्हापूर, रत्नागिरी, सांगली, सिंधूदुर्ग या चार जिल्ह्यात एका वर्षात ६८० बाळांचा जन्म झाला आहे. त्यांचे जन्म ठिकाणच १०८ बनले. रूग्णवाहिकेत प्रसूती दरम्यानच्या आणि नंतरच्या प्राथमिक उपचार, औषधे उपलब्ध असल्याने त्या माता आणि बाळाचे आरोग्यही चांगले आहे.

आरोग्य प्रशासन माता,अर्भक मृत्यूचे प्रमाण कमी करण्यासाठी प्रयत्न करीत आहे. त्यासाठी घरात एकही प्रसूती होऊ नये, यासाठी खबरदारी घेतली जात आहे. आरोग्य सेविका, आशा कार्यकर्त्यांतर्फे जनजागृती केली जात आहे. गर्भवती महिलांना १०८ रूग्णवाहिकेची सेवा प्राधान्याने उपलब्ध करून दिली जात आहे. अपघातासह कोणत्याही आजारासाठी रूग्णालयापर्यंत पोहचण्यासाठी १०८ रूग्णवाहिकेची सेवा मोफत दिली जाते. १०८ या टोल फ्री क्रमांकावर संपर्क साधून नेमके ठिकाण सांगितल्यानंतर शक्य तितक्या लवकर रूग्णवाहिका पोहचते. रूग्णवाहिकेत प्रथमोपचार, बेसिक लाइफ सपोर्ट, औषधे असतात. त्यामुळे अनेक रूग्णांना जीवदान मिळाले आहे.

प्रसूतीसाठीच्या सेवा, सुविधा असलेले रूग्णालय जवळ नसलेली अनेक गावे आजही आहेत. सार्वजनिक दळणवळणाची व्यवस्था चांगली नसते. त्यामुळे प्रसव वेदना सुरू झाल्यानंतर गर्भवतीस रूग्णालयात दाखल करेपर्यंत अर्धा दिवस जातो. या कालावधीत वाटेतच प्रसूती होते. यापूर्वी बसस्थानक, बसमध्ये, रेल्वेत प्रसूती झाल्याच्या घटना आहेत. मात्र दोन वर्षापासून १०८ रूग्णवाहिकेची सेवा तत्पर मिळत आहे. त्यामुळे गरीब, सर्वसामान्य, मध्यमवर्गीय कुटुंबांतील गर्भवती सार्वजनिक वाहतूक सुविधांऐवजी १०८ रूग्णवाहिकेतून प्रसूतीसाठी रूग्णालयात दाखल होत आहेत. रूग्ण्वाहिकेत बसल्यानंतर काही गर्भवतींना प्रसववेदना तीव्र होतात. त्या मातेची आणि सोबतच्या नातेवाईकांची घालमेल वाढते. अशा स्थितीत धावत्या १०८ मध्येच ६८० बाळांचा जन्म झाला आहे. तातडीने प्रथमोपचार झाल्याने ती माता, बाळ सुखरूप आहेत, असे १०८ रूग्वाहिकेच्या प्रशासनाकडून सांगण्यात आले.

-------------

नोंद जवळच्या केंद्रात

रूग्णालयात दाखल होण्यासाठी जात असताना रूग्णवाहिकेतच प्रसूती होण्याचे प्रमाण दिवसेंदिवस वाढते आहे. प्रत्यक्षात बाळाचा जन्म १०८ रूग्णवाहिकेत झाला तरी त्याची नोंद जवळच्या प्राथमिक आरोग्य केंद्रात केली जाते. जन्माची नोंद कायदेशीरदृष्ट्या महत्वाची असल्याने रूग्णवाहिकेत करण्याऐवजी आरोग्य केंद्रात केली जाते.

-----------------

कोल्हापूर जिल्ह्यात ३१९ बाळांचा जन्म

एप्रिल २०१७ ते मार्च २०१८ अखेर १०८ रूग्णवाहिकेत जन्मलेल्या बाळांची संख्या जिल्हानिहाय अशी : कोल्हापूर : ३१९, सांगली : २०७, रत्नागिरी : ११९, सिंधुदुर्ग : ३५

---------

आकडे बोलतात

जिल्ह्यात एकूण १०८ रूग्णवाहिका

८९

चार जिल्ह्यात रूग्ण सेवा

२१३४३५

गर्भवतींना रूग्णालयात दाखल

६४०६७

--------------------

कोट

'सरकारचा आरोग्य विभाग आणि बी. व्ही. जी. इंडियातर्फे २०१४ पासून १०८ रूग्णवाहिकेची सेवा मोफत सुरू आहे. सीपीआरमध्ये याचे कार्यालय आहे. कॉल आल्यानंतर शहरी भागात २० मिनिटे तर ग्रामीण भागात अर्ध्या तासात रूग्णापर्यंत १०८ जाऊन पोहचते. तत्पर सेवा असल्याने अनेक रूग्णांचे प्राण वाचले आहेत.

डॉ. अरूण मोराले, विभागीय सल्लागार, महाराष्ट्र इमर्जन्सी मेडिकल सर्व्हिस

पान ६ मेन

....................

फाइल फोटो

.......................

वारणा पाण्याची धग कायम

दोन्ही बाजूंकडून एक पाऊल मागे घेवून समन्वय साधण्याची गरज

राजेंद्र पाटील, इचलकरंजी

इचलकरंजीकरांसाठी शुध्द व मुबलक पाण्यासाठी मंजूर वारणा पाणी पुरवठा योजना कामाला दानोळीकरांनी एकजूट होऊन केलेला विरोध पाहता प्रशासनाला पाऊल मागे घ्यावे लागले. परंतु ज्या जागेवर भूमीपूजन होणार त्याची माहितीच नसल्याचे स्पष्ट झाल्याने प्रशासन व पोलिस दलाने पूर्ण ताकदीने खेळलेला डाव अंगलट आल्याचे सिद्ध झाले. त्यामुळे तांत्रिक मुद्याचे कारण सांगून काम थांबविले असले तरी वारणा पाण्याची धग मात्र कायम आहे. दरम्यान, ही योजना रद्द होईपर्यंत शेतकऱ्यांच्या पाठीशी ठामपणे उभा राहण्याचा निर्णय ज्येष्ठ नेते प्रा. एन. डी. पाटील यांनी घेतल्याने वारणाकाठच्या ग्रामस्थांना आणखी बळ आले आहे.

इचलकरंजी शहराला वारणा नदीतून पाणी देण्यास विरोध का होतोय, याचा विचार आजपर्यंत कुणीच गांभीर्याने केलेला नाही. लोकप्रतिनिधी व प्रशासनाने वारणाकाठच्या गावातील प्रलंबित मागण्या पूर्ण करून देण्याची गरज आहे. पण दुखणं समजल्याशिवाय इलाज कुठं करायचा याचीच माहिती कोणाला नाही. पंचगंगा प्रदुषित बनल्याने अन् कृष्णा गळतीत अडकल्याने इचलकरंजीसाठी वारणा योजना हाच पर्याय उपलब्ध होता. पण सातत्याने या योजनेला होत असलेल्या विरोधाची धार कमी करुन सामंजस्यातून मार्ग काढण्याऐवजी अधिकच गुंतागुंत होत चालली आहे. इचलकरंजीची तृष्णा भागविण्यासाठी कृष्णा व पंचगंगा अशा दोन पाणीपुरवठा योजना कार्यान्वित आहेत. पण पंचगंगा प्रदुषित झाल्याने नदी उशाला आणि कोरड घशाला अशी अवस्था आहे. तर कृष्णा पाइपलाईन सातत्याने गळतीत अडकल्याने कोट्यवधीची योजना आजघडीला नसल्यासारखी आहे. साडेचार लाख लोकसंख्येच्या शहराला पाणीटंचाईचा त्रास जाणवू लागल्याने चार वर्षापूर्वी पर्याय म्हणून वारणा नदी उद्भव धरुन या योजनेचा प्रस्ताव नगरपरिषदेच्यावतीने सरकारला दिला आणि सरकारने अमृत योजनेतून त्याला मंजुरी दिली. शहराची भविष्यातील ३० वर्षांची प्रस्तावित लोकसंख्या गृहीत धरुन सुमारे ७० कोटी रूपये खर्चाची वारणा योजना तयार करण्यात आली.

इचलकरंजीसाठी एक टीएमसी पाणी आरक्षित करण्यात आले असल्यामुळे त्याचा वारणा काठावरील कोणालाही फटका बसणार नाही. नदीत सिमेंटचा बंधारा घालण्यात येणार असल्यामुळे सातत्याने पाणीसाठा उपलब्ध राहणार आहे. तसेच योजनेला २४ तास वीजेची आवश्यकता भासणार असल्याने जयसिंगपूर येथून एक्स्प्रेस फिडरवरुन वीज उपलब्ध केली जाणार असल्याने त्याचा फायदा दानोळी ग्रामस्थांनासुध्दा होणार आहे. असे असतानाही सुरुवातीपासून वारणा योजना वादाच्या भोवऱ्यात सापडली आहे. विविध मागण्या प्रलंबित असल्याने वारणा काठावरील सर्वच गावांसह सांगली जिल्ह्यातील काही गावांनी इचलकरंजीला पाणी देण्यास विरोध दर्शविला आहे. वारणा बचाव कृती समितीची बाजू ऐकून योजना पूर्णत्वास नेण्यासाठी स्थानिक पातळीपासून ते जिल्हा पातळीपर्यंत प्रयत्न झाले. पण ग्रामस्थ विरोधाच्या भूमिकेवर ठाम राहिल्याने कोणताही मार्ग निघू शकलेला नाही. त्यामध्ये आता इर्षा निर्माण झाली असून पाऊल मागे घेण्याची भूमिका कुणीच घेत नसल्याने अखेर प्रशासनाने बळाचा वापर करून योजनेचे काम सुरू करण्याचा निर्णय घेतला अन् तसा प्रयत्नही केला. मात्र दानोळीकरांची एकजूट जोपर्यंत कायम आहे, तोवर या योजनेचे पाणी इचलकरंजीकरांना मिळणे अवघडच आहे.

वारणा योजना पूर्णत्वासाठी दानोळीकरांसह नदीकाठावरील गावांनी आपली आक्रमकता बाजूला ठेवून सहकार्य करण्याची भूमिका घेण्याची आवश्यकता आहे. त्याचबरोबर या योजनेला विरोधासाठी कारणीभूत ठरणाऱ्या आक्षेपांचाही लोकप्रतिनिधी व प्रशासनाने विचार करून ग्रामस्थांना न्याय मिळवून देण्याची गरज आहे. परंतु त्यासाठी दोघांनीही एक पाऊल मागे येण्याची गरज आहे.

...............

'वारणा' हाच एकमेव पर्याय

वारणा नळ योजना पूर्ण होईपर्यंत इचलकरंजीकरांना भीषण पाणी टंचाईला तोंड द्यावे लागणार आहे. सध्या वारणा नदीकाठावरील ग्रामस्थांचा या योजनेला होत असलेला विरोध पाहता ही योजना पूर्णत्वास जाईल, असे वाटत नाही. त्यामुळे भविष्यातील पाणीटंचाई टाळण्यासाठी पंचगंगा नदीचे प्रदुषण कमी करण्यासह कृष्णा योजनेची आवश्यक तितकी जलवाहिनी बदलून कृष्णा योजना सक्षम करणे हाच पर्याय बाकी असताना यासाठी आलेला २७ कोटीचा निधी नगरपालिका प्रशासनाने सरकारकडे परत पाठविला आहे. त्यामुळे कृष्णा सक्षम करणे आता अशक्यच आहे.

......................

योजनेचे भविष्य अंध:कारमय

वारणा नदी उद्भव धरुन शहराला स्वच्छ आणि मुबलक पाणी पुरवठा करणाऱ्या योजनेला वारणाकाठावरील ३४ पेक्षा अधिक गावांचा विरोध आजही कायम आहे. पालकमंत्री, जिल्हाधिकारी, प्रांताधिकारी स्तरावर अनेक बैठका होऊन त्यातून मार्ग काढण्याचा प्रयत्न केला गेला. विरोधाच्या पार्श्वभूमीवर नगराध्यक्षांसह सत्तारुढ व विरोधी नगरसेवकांनीही दानोळी ग्रामस्थांची भेट घेऊन चर्चा केली. मात्र त्यामध्येही यश आले नाही. दरम्यान, हा प्रश्न प्रलंबित असताना मुख्यमंत्र्यांनी ग्रामस्थांना विश्वासात न घेता या योजनेचे वर्षभरापूर्वी उद्घाटन केले. या कामाची मुदत आता केवळ दोन महिनेच उरली आहे. अशातच वादही विकोपाला गेल्याने इचलकरंजीकरांना वारणेचे पाणी मिळणार की नाही असा संभ्रम निर्माण झाला आहे.

...................

दानोळीकरांच्या मागण्या

पंचगंगा नदी प्रदुषणमुक्त करा.

पंधरा वर्षात कृष्णा योजनेची पाइपलाइन कालबाह्य कशी झाली, याची चौकशी करा.

धरणातील पाणी उपसाबंदीच्या काळात नदीकाठच्या शेतीस पाणी पुरवठा कसा केला जाणार ?

वारणा धरण क्षेत्रात ज्यांच्या जमिनी गेल्या त्यांचे प्रश्न अद्यापही प्रलंबित आहेत, त्याचा निर्णय घ्या.

अद्यापही नदीकाठच्या २०५ गावात पिण्याचे पाणी पोहचलेले नाही.

कृष्णा पाइपलाइन योजनेची श्वेतपत्रिका काढा.

म. टा. प्रतिनिधी, कोल्हापूर

कोल्हापूर शहराच्या पश्चिमेला असलेल्या फुलेवाडी परिसरातील नव्याने निर्माण झालेली उपनगरे व कॉलन्यांमधील रस्त्यांची अक्षरश: चाळण झाली आहे. उपनगरांतील अंतर्गत रस्ते आणि विकास आराखड्यातील रस्त्यांकडे महापालिकेडून दुर्लक्ष केले जात आहे. त्याचा त्रास तेथील नागरिकांना होत आहे. त्यामुळे रस्त्यांची दुरुस्ती होणे गरजेचे आहे.

रस्ते विकास प्रकल्पातून जाऊळाचा गणेश मंदिर ते फुलेवाडी रिंगरोड हा चारपदरी सिमेंटचा रस्ता रुंद झाल्याने शहरात प्रवेश करताना एक चांगला रस्ता झाला. या रस्त्याच्या दोन्ही बाजूंना फुलेवाडी, लक्षतीर्थ वसाहत, जिव्हाळा कॉलनी, इंगवले कॉलनी या वसाहती आहेत. फुलेवाडी रिंगरोडवर छोट्या-मोठ्या कॉलन्या निर्माण झाल्या आहेत. फुलेवाडी पहिला स्टॉप ते सहावा बस स्टॉप हा फुलेवाडी रिंगरोडला जोडणारा रस्ता दर्जेदार झाला आहे. प्रशस्त रस्ता, दोन्ही बाजूंना सिमेंटचे पार्किंग, चौकाचौकांत वेग कमी करण्यासाठी रस्त्यांवर पांढरे पट्टे मारण्यात आले आहेत. पण या मुख्य रस्त्याला जोडणाऱ्या अंतर्गत रस्त्यांची अवस्था अत्यंत खराब आहे. सहावा बसस्टॉप म्हणून ओळखला जाणारा रस्ता खराब आहे. अमृत योजनेमुळे नवीन रस्ते पुन्हा उकरावे लागणार असल्याची चर्चा फुलेवाडीत सुरू आहे.

फुलेवाडी रिंगरोडच्या पूर्व व पश्चिम बाजूला अयोध्या कॉलनी, गजानन कॉलनी, जिल्हा परिषद कर्मचारी कॉलनी, महालक्ष्मी कॉलनी या छोट्या-मोठ्या कॉलनी आहेत. या सर्व कॉलन्यांमध्ये काही ठिकाणी निम्मे रस्ते झाले आहेत, तर काही ठिकाणी रस्त्यांवर खड्डे पडले आहेत. जिल्हा परिषद कॉलनीत ८० टक्के परिसरात रस्ते आहेत. या परिसरातील जमिनींच्या हद्दी महापालिका आणि नागदेववाडी ग्रामपंचायतीमध्ये येत असल्याने नियोजनाचा अभाव व निधीच्या कमतरतेमुळे रस्त्यांची अवस्था पाणंदीसारखी झाली आहे. गजानन नगराशेजारी बोंद्रेनगर परिसरात लाड पाणंदीत नियोजित १०० फूट रस्ता आहे. हा रस्ता थेट फुलेवाडी रिंगरोड ते शालिनी पॅलेस परिसराला जोडणार आहे. हा रस्ता तयार झाल्यास फुलेवाडीच्या मुख्य रस्त्यावरील ताण कमी होईल.

जुळी फुलेवाडी म्हणून ओळखल्या जाणा-या इंगवले कॉलनीत टोलेजंग बंगले झाले आहेत. मात्र, तेथे फक्त मोठ्या खडीचे रस्ते आहेत. बाळासाहेब इंगवले पार्कमध्ये अजूनही मातीचे रस्ते आहेत. इथे शहर व ग्रामीण भाग हा हद्दीचा प्रश्न निर्माण झाला आहे. शेतीक्षेत्र असलेल्या या परिसरात प्लॉटिंग मोठ्या प्रमाणात होत असल्याने नियोजबद्ध रस्त्यांची आखणी होण्याची गरज आहे. लक्षतीर्थ वसाहतीतील मुख्य रस्ता दर्जेदार असला तरी अंतर्गत रस्ते खराब आहेत. गिरीश जनरल स्टोअर्सजवळ पाइपलाइनसाठी खोदण्यात आलेला रस्ता खराब झाला आहे. प्रबुद्ध भारत हायस्कूल ते दुधाळी उत्तरेश्वर रस्त्यावर काही ठिकाणी मोठे खड्डे आहेत. वाहनांना अपघात होऊ नये म्हणून खड्ड्यात काठ्या उभ्या केल्या आहेत. जिव्हाळा कॉलनीतील सर्व रस्ते दर्जेदार झाले आहेत. अशा प्रकारचे रस्ते प्रत्येक कॉलनीत होणे गरजेचे आहे.

००००

कोट...

फुलेवाडी, लक्षतीर्थ वसाहतीमधील मुख्य रस्ते अतिशय सुंदर व दर्जेदार झाले आहेत. पण फुलेवाडी रिंगरोड परिसरातील अयोध्या कॉलनी, जिल्हा परिषद कॉलनी, लाड पाणंद येथील रस्ते अतिशय खराब आहेत. इंगवले कॉलनीतील रस्ते मोठ्या खडीचे असून, वाहने घसरून अपघात होण्याचा धोका निर्माण झाला आहे.

सुजय माने, रहिवासी, फुलेवाडी रिंगरोड परिसर

पान ३ मेन

......................

बांधकामातील बदलाची द्या

तावडे हॉटेल परिसर जागेप्रश्नी सुप्रीम कोर्टाचा महापालिकेला आदेश

म. टा. प्रतिनिधी, कोल्हापूर

तावडे हॉटेल परिसरातील जागेबाबत सुप्रीम कोर्टाने जैसे थे चा आदेश दिला असून त्यानुसार गुरुवारनंतर (ता.३ ) त्या परिसरातील बांधकामात बदल झाला तरी त्याची माहिती कोल्हापूर महानगरपालिका सुप्रीम कोर्टाला देऊ शकते. त्या परिसरात फोटोंच्या माध्यमातून महापालिकेने गुरुवारी केलेला पंचनामा व प्रतिज्ञापत्रही सादर करण्यास सांगितले आहे. पुढील सुनावणी २ जुलै रोजी होणार आहे.

गुरुवारी सुप्रीम कोर्टाने जैसे थे परिस्थिती राखण्याचा आदेश दिला. मात्र तो आदेश कोणत्या बांधकामांसाठी लागू आहे याची माहिती उपलब्ध झाली नव्हती. त्यासाठी आदेशाची प्रत मिळण्याची प्रतीक्षा केली जात होती. शुक्रवारी आदेशाची प्रत ऑनलाइनवर उपलब्ध झाली. त्यानंतर या आदेशातील बारकाव्यांची माहिती मिळाली.

उचगाव ग्रामपंचायतीने हायकोर्टाच्या निर्णयाला आव्हान दिले होते. त्यानुसार सुप्रीम कोर्टाने दोन्ही बाजूचे म्हणणे ऐकून घेण्यासाठी परिसरात जैसे थे चा आदेश दिला आहे. यापूर्वी या परिसरात स्थगितीचा आदेश असताना बांधकामे केली आहेत. तसेच सध्याही बांधकामे सुरु आहेत, असे महापालिकेच्या वकिलांनी कोर्टाच्या निदर्शनास आणून दिले होते. त्यानंतर कोर्टाने दोन्ही बाजूंना जैसे थे चा आदेश दिला आहे.

हायकोर्टात महापालिकेच्या बाजूने काम पाहणारे अॅड. अभिजीत आडगुळे यांनी आदेशाबाबतची माहिती देताना सांगितले की, 'त्या परिसरातील एकूण १३३ रि. स. नंबर जागेसाठी हा आदेश आहे. २०१४ पूर्वीची व नंतरची अशी विभागणी केलेली नाही. हायकोर्टाची स्थगिती असताना झालेल्या बांधकामांचा मुद्दा विचारात घेऊन जाणीवपूर्वक दोन्ही बाजूंना जैसे थे चा आदेश लागू असेल असे नमूद केले आहे. तसेच गुरुवारी (ता.३) देण्यात आलेल्या आदेशाच्या दिवसाची परिस्थिती समजण्यासाठी फोटो काढून पंचनामा करण्याची मुभा महापालिकेला दिली आहे. याबाबतचे फोटो महापालिकेने उचगाव ग्रामपंचायतीला रितसर द्यायचे आहेत. तसेच महापालिकेला प्रतिज्ञापत्र सादर करण्यासाठी नोटीस देण्याचाही आदेश दिला आहे. पंचनाम्यानंतर त्या परिसरातील बांधकामामध्ये थोडासा जरी बदल दिसून आला तर त्याची माहिती महापालिकेने सुप्रीम कोर्टाला द्यायची आहे. त्यानुसार अवमान झाल्याबाबतची प्रक्रिया राबवता येणार आहे. २ जुलै रोजी पुढील सुनावणी घेण्यात येणार आहे.

..............

कोट

'कोर्टाच्या आदेशाप्रमाणे तावडे हॉटेल परिसरातील मिळकतींचे फोटो घेण्यात आले आहेत. महापालिका सादर करणाऱ्या प्रतिज्ञापत्राबरोबर संबंधित फोटो पाठवणार आहे. कोर्टाने जैसे थे चा आदेश दिला आहे. तो नेमका कोणासाठी आहे याबाबत सुप्रीम कोर्टातील महापालिकेच्या सीनिअर कौन्सिलसोबत चर्चा करणार आहे. त्यांच्याकडून हा आदेश सर्व परिसरासाठी असल्याचे सांगितल्यास कारवाई थांबवली जाईल. काही जागांपुरता आदेश असल्यास इतर ठिकाणी कारवाई करु.

डॉ. अभिजित चौधरी, आयुक्त, महापालिका