म. टा. प्रतिनिधी, कोल्हापूर

कोल्हापूर परिक्षेत्रातील सांगली, सातारा, पुणे ग्रामीण आणि सोलापूर ग्रामीणमध्ये ५८ टोळ्यांवर 'मोक्कां'तर्गत कारवाई करण्यात आली आहे. आगामी शिवजयंती, डॉ. बाबासाहेब आंबेडकर जयंतीनिमित्त १५० गुन्हेगारांना तडीपार करण्याचे आदेश दिले आहेत. अवैध शस्त्रे, बनावट नोटांचे रॅकेटही उघडकीस आणून परिक्षेत्रातील गुन्हेगारीला चाप लावण्याचा प्रयत्न केला जात आहे, अशी माहिती विशेष पोलिस महानिरीक्षक विश्वास नांगरे-पाटील यांनी सोमवारी दिली.

परिक्षेत्रात खून, घरफोड्या, लूटमारीसारख्या घटना वाढत आहेत. गुन्हेगारांमुळे कायदा आणि सुव्यवस्था बिघडून जनजीवन विस्कळीत होऊ नये, यासाठी रेकॉर्डवरील गुन्हेगारांवर कारवाई केली जात आहे. पाचही जिल्ह्यांत मटका, जुगार आणि खासगी सावकारी यांसह सराईत गुन्हेगारी टोळ्यांवर 'मोक्का' कारवाई करण्यासाठी प्रस्ताव पाठविण्याचे आदेश नांगरे-पाटील यांनी दिले होते. त्यानुसार पाचही जिल्ह्यात पोलिस अधीक्षकांनी प्रस्ताव तयार करून ते विशेष पोलिस महानिरीक्षक नांगरे-पाटील यांच्याकडे मंजुरीसाठी पाठविले होते. कोल्हापूर परिक्षेत्रातून ५८ टोळ्यांविरोधात 'मोक्कां'तर्गत कारवाईसाठी सादर झालेल्या प्रस्तावांना मंजुरी दिली आहे. यातील गुंडांवर महाराष्ट्र संघटित गुन्हेगारी नियंत्रण अधिनियम १९९९ प्रमाणे 'मोक्का'ची कारवाई करण्यात आली आहे. मोक्काअंतर्गत कारवाईमध्ये कोल्हापूर जिल्ह्यातील अजय उर्फ आज्या लातूर टोळी, गुंड्या उर्फ मुसा जमादार टोळी, सनी उर्फ संतोष बगाडे टोळी, शाम लाखे, अमोल उर्फ आर्याभाई मोहिते, अविनाश उर्फ जर्मनी आदी टोळ्यांचा समावेश आहे. आरसी, एसटी यासह इचलकरंजीतील अगरवाल, तेलनाडे, पेठ वडगावातील राज पाटील, आदी टोळ्यांवर मात्र कारवाई झालेली नाही.

लोगो - साहित्य संस्कृती

फोटो - आहे

महिन्याला बहरणारा 'बोल कट्टा'

तरुणाईत लेखन वाचनाची गोडी लावणारा साहित्यिक उपक्रम

Appasaheb.mali@timesgroup.com

Tweet:@Appasaheb_MT

कुणाला कविता सुचतेय, काहींना कथा लेखन करायला आवडतं, तर काही जण अवती भवतीच्या घटना आणि भवताला ललित लेखनात शब्दबध्द करु ईच्छितात. पण कवितेची रचना, कथासूत्र गवसत नाही, ललित लेखनाची वैशिष्ट्ये उमजत नाहीत आणि योग्य मार्गदर्शन लाभत नाही अशी तक्रार आता कुणाला करता येणार नाही. कारण नवोदित लेखक, कवींसाठी कोल्हापुरात 'बोल कट्टा' साकारला आहे.

दर महिन्याच्या शेवटच्या रविवारी खुल्या वातावरणात 'बोल कट्टा'भरविण्याचे नियोजन आहे. विशेष म्हणजे, तरुणाईत लेखन वाचनाची गोडी निर्माण करणाऱ्या या साहित्यिक उपक्रमासाठी विविध कॉलेजियसमधील विद्यार्थी पुढे सरसावले आहेत. शिवाजी विद्यापीठातील मराठी विभाग, गोखले कॉलेज, राजाराम कॉलेज, न्यू कॉलेज, कॉमर्स कॉलेज, शहाजी कॉलेज, विवेकानंद कॉलेज, डी. डी. शिंदे सरकार कॉलेज अशा वेगवेगळ्या कॉलेजमधील विद्यार्थ्यांचा समावेश आहे. 'रजनीगंधा कला अॅकेडमी'च्या माध्यमातून हे विद्यार्थी एकवटले आहेत. सुमारे ५० मुलांच्या सहभागातून 'रजनीगंधा...'ची स्थापना झाली आणि गेल्या चार वर्षात सभासद संख्या १५० पर्यंत पोहचली आहे.

नृत्य, नाट्य आणि संगीत या त्रिसूत्रीवर संस्थेचा कलात्मक प्रवास आधारलेला आहे. त्यामध्ये अॅकेडमीचे अध्यक्ष युवराज केळुसकर, प्रदीप चौगुले, अमोल यादव, दिगंबर खांडेकर, यशस्वी गुळवणी, आकाश गुळवणी, सूरश्री कुलकर्णी, वरद टक्कळगी आदींचा पुढाकार आहे. 'बोल कट्टा' हा कोल्हापूर आणि परिसरातील युवा लेखकांसाठी हक्काचं व्यासपीठ ठरावा या पध्दतीने कार्यक्रमांची आखणी केली आहे. दर महिन्याच्या शेवटच्या रविवारी शहरातील उद्यानांत 'बोल कट्टा'भरणार आहे. प्रत्येक महिन्याला लिखाणासाठी एक विषय सुचविण्यात येतो. कथा, कविता, ललित लेख अशा वाङमय प्रकारात लिखाण करायचे आणि 'बोल कट्टा'वर ते सादर करायचे अशी साधारण संकल्पना आहे. 'बोल कट्टा'मुळे नवोदित लेखकांना विविध वाङमयीन प्रकारात कशा पध्दतीने लिखाण करावे यासंबंधी तज्ज्ञांचे मार्गदर्शनही होते. शिवाय पुस्तक, लिखाणावर चर्चा ठरलेली. युवा लेखकांना प्रोत्साहित करणे हा त्यामागील मुख्य उद्देश आहे. साहित्यविषयक गोडी निर्माण करणारा हा उपक्रम नि:शुल्क आहे.

नवोदितांना लिखाणासंदर्भात मार्गदर्शन हा प्रमुख उद्देश आहे. तसेच विविध विषयावरील पुस्तके, कांदबऱ्या, कविता, समीक्षणे यावर चर्चा होते. दर महिन्यातून एकदा होणाऱ्या 'बोल कट्टा'मध्ये नाटककार, लेखक, कवी, कादंबरीकार यांना आमंत्रित करुन नवोदितांशी थेट संवाद घडविण्याचा मानस आहे. निसर्गाच्या सान्निध्यात बोल कट्टा भरवून साहित्यविषयक मुक्त संवाद घडविणे हा उद्देश आहे.

- युवराज केळुसकर, संस्थापक अध्यक्ष, रजनीगंधा कला अकादमी

मनोरंजन अन् सामाजिक संस्थांना मदत

रजनीगंधा कला अकादमीतर्फे गेल्या चार वर्षापासून रंकाळा तलाव परिसरात महोत्सव भरविला जातो. महोत्सवमधून जमलेल्या निधीतून सामाजिक संस्थांना मदत केली जाते. नाम फाऊंडेशन, करुणालय बालकाश्रम, चोकाक येथील वृध्दाश्रमांना आर्थिक हातभार लावला आहे. अकादमीतर्फे एकांकिका स्पर्धेचे आयोजन केले जाते. संस्थेचे सगळे कलाकार विनामोबदला त्यामध्ये सहभाग नोंदवितात.

फोटो

.................

सागर बिराजदारचे माऊली जमदाडेला अस्मान

दिंडनेर्लीत कुस्ती मैदान

म. टा. वृत्तसेवा, कुडित्रे

दिंडनेर्ली(ता. करवीर ) येथील निकाली कुस्त्यांच्या जंगी मैदानात प्रथम क्रमांकासाठी माऊली जमदाडे विरुद्ध सागर बिराजदार यांच्यात कुस्ती झाली. शड्डू ठोकत दोन्ही पैलवानांनी एकमेकांवर चढाई करण्यास सुरुवात केली. डाव - प्रतिडाव करत एकमेकांना खाली खेचण्यासाठी धडपड सुरू झाली, पण निकाल लागत नव्हता. कुस्ती १५ व्या मिनिटाला आली असताना सागर बिराजदारने माऊली जमदाडेवर कब्जा घेऊन कलेलोट डावावर अस्मान दाखवले.

दिंडनेर्ली येथे आमदार सतेज पाटील यांच्या वाढदिवसानिमित्त कोल्हापूर जिल्हा व राष्ट्रीय तालीम संघाच्या मान्यतेने निकाली कुस्त्यांचे आयोजन करण्यात आले होते. महाराष्ट्र केसरी समाधान घोडके विरुद्ध महापौर केसरी कौतुक डाफळे यांच्यात दुसऱ्या क्रमांकासाठी काटाजोड लढत झाली. दोघेही सरस ठरत होते. कोण कधी डाव साधेल हे सांगणे कठीण बनले होते. एकमेकांवर आक्रमकपणे चढाई करत कुस्ती ऐन रंगात आली असताना दोन्ही पैलवान आखाड्याच्या बाहेर गेल्याने दुखापतीमुळे खबरदारी म्हणून कुस्ती बरोबरीत सोडविण्यात आली.

तिसऱ्या क्रमांकाच्या कुस्तीत समीर देसाई याने योगेश बोंगाळेवर मात केली. चौथ्या कुस्तीत हसन पटेल याने शिवाजी पाटील यास एकलिंग डावावर चित केले. तर सचिन जामदार(कोपार्डे) विरुद्ध संतोष लवटे (मोतीबाग) यांची कुस्ती बरोबरीत सोडवण्यात आली.

महिला कुस्त्यांचा प्रारंभ चंद्रकांत कदरे यांच्या हस्ते करण्यात आला. यामध्ये प्रथम क्रमांकाची कुस्ती अनिता कांबऴे (आमशी) व अर्चना मोरे (शाहूवाडी) यांच्यात झाली. अनिता कांबऴे हिने चौथ्या मिनिटाला अर्चना मोरे हिला पराभूत केले. साक्षी चौगले(नंदगाव) विरुद्ध निकीता मगदूम (जांभळी) यांच्यातील लढतीत साक्षी चौगलेने निकीताला चित केले.

विजयी मल्लांना माजी महसूल मंत्री बाळासाहेब थोरात, आमदार हसन मुश्रीफ,आमदार सतेज पाटील, माजी आमदार भोगावतीचे चेअरमन पी.एन. पाटील , आमदार जयकुमार गोरे,आमदार संग्राम थोपटे यांच्या हस्ते गदा व रोख पारितोषिक देऊन गौरवण्यात आले. तसेच मान्यवरांच्या हस्ते संभाजी वरुटे,चंद्रकांत चव्हाण, विक्रम कुऱ्हाडे, शुक्ला बिडकर यांचा सत्कार करण्यात आला. यावेळी माजी आमदार के.पी.पाटील, राष्ट्रवादीचे जिल्हाध्यक्ष ए. वाय. पाटील, शिवसेनेचे सपर्क प्रमुख संजय मंडलिक, युवा नेते ऋतुराज पाटील, गोकुळचे संचालक बाळासाहेब खाडे , भोगावतीचे माजी अध्यक्ष सदाशिव चरापले आदी उपस्थित होते. पंच म्हणून संभाजी पाटील, मारुती जाधव, बबन चौगले, प्रकाश खोत, कृष्णात पाटील, दादू चौगले, बाळासो मेटकर यांनी काम पाहिले. राजाराम चौगले यांनी उत्कृष्ट निवेदन केले.

अन्य विजयी मल्ल : अक्षय पाटील (दिंडनेर्ली ), सागर येळके (कळंबा), विजय शिंदे (दिंडनेर्ली ), राणा नलवडे (नंदगाव), अनिल चव्हाण (नंदगाव), तानाजी कुऱ्हाडे (नंदगाव) आदी.

फोटो :

कोल्हापूर

महापालिकेची परवानगी न घेता शहरात सार्वजनिक ठिकाणी लावण्यात आलेल्या जाहिराती, फलक व बॅनर्स सात दिवसात काढून घेण्याचे आवाहन इस्टेट विभागाने केले आहे. अशा जाहिरातींमुळे शहराचे विद्रुपीकरण होत आहे. विनापरवाना उभारण्यात आलेले फलक, होर्डिंग्ज, बॅनर्स सात दिवसांत काढून घ्यावेत, असे आवाहन करण्यात आले आहे. अन्यथा संबंधितांवर महापालिकेच्यावतीने गुन्हे नोंद करण्याचा इशाराही दिला आहे.

डॉ. खेमनार यांची अधिकाऱ्यांना सूचना

म. टा. प्रतिनिधी, कोल्हापूर

'जिल्ह्यात टंचाईची कामे विनाविलंब सुरू करावीत. विविध योजनांतून आतापर्यंत सुरू करण्यात आलेल्या टंचाईच्या कामांचा अहवाल तातडीने द्यावा. येत्या पंधरा दिवसात टंचाई निवारण्यासाठी कराव्या लागणाऱ्या कामांची यादी द्यावी', अशा सूचना मुख्य कार्यकारी अधिकारी (डॉ. कुणाल खेमनार यांनी दिल्या.

जिल्ह्यातील ग्रामिण पाणी पुरवठा विभागाच्या अधिकाऱ्यांची बैठक जिल्हा परिषदेमध्ये झाली. बैठकीत डॉ. खेमनार यांनी विविध सूचना दिल्या. तालुकास्तरीय अधिकाऱ्यांनी टंचाईची कामे करताना येणाऱ्या अडचणी, समस्या मांडल्या. त्यावर डॉ. खेमनार यांनी सरकारच्या आदेशानुसार, निकषानुसार टंचाईची कामे मार्गी लावावीत. निधीची कमतरता असेल तर १४ व्या वित्त आयोगातून मिळालेले पैसे वापरावेत. निधीची गरज असल्यास तातडीने प्रस्ताव तयार करून द्यावेत. आमदार, खासदार, सदस्यांच्या फंडातून टंचाई निवारण्यासाठी केलेल्या कामांचीही यादी तयार करावी. वाड्या, वस्त्यांमध्ये पाणी टंचाई तीव्र होत आहे. त्यामुळे टंचाईच्या कामात कुचराई करू नये, असेही सांगितले. त्याचबरोबर भुदरगड तालुक्याने टंचाई कामांच्या यादीचा आराखडा चांगला दिला आहे, त्याप्रमाणे इतर तालुक्यातील अधिकाऱ्यांनीही द्यावा, असे आवाहन केले. यावेळी पाणी पुरवठा विभागाचे अभियंता, उपअभियंता उपस्थित होते.

-----------------------------------------------

परीट समाजाचा इशारा

कोल्हापूर

मध्य प्रदेशातील ग्वाल्हेरमध्ये संत गाडगे महाराज यांच्या पुतळ्याची विटंबना करणाऱ्यांना तातडीने अटक करावी, अशी मागणी येथील महाराष्ट्र राज्य परीट सेवा मंडळातर्फे जिल्हाधिकारी अविनाश सुभेदार यांच्याकडे एका निवेदनाव्दारे करण्यात आले. मध्य प्रदेश सरकारने त्यांना अटक करावी, अन्यथा महाराष्ट्रात सनदशीर मार्गाने आंदोलन केले जाईल, असा इशाराही त्यांनी दिला. यावेळी जिल्हा अध्यक्ष आनंदराव शिंदे, वृंदा वठारकर, वसंतराव वठारकर, सागर परीट, दिपक लिंगम, प्रकाश भालकर आदी उपस्थित होते.

----------------

फोटो आहे

..........

लिंगायत माळी

समाजाचे उपोषण

म. टा. प्रतिनिधी, कोल्हापूर

लिंगायत माळी समाजाला ओबीसी दाखले मिळावेत, या मागणीसाठी वीरशैव लिंगायत माळी समाजाच्यावतीने जिल्हाधिकारी कार्यालयासमोर एक दिवसाचे लाक्षणिक उपोषण करण्यात आले. जिल्ह्यातील माळी समाजातील कार्यकर्ते उपोषणात सहभागी झाले होते.

समाजाच्या शिष्टमंडळाने जिल्हाधिकारी अविनाश सुभेदार यांची भेट घेऊन निवेदन दिले. निवेदनात म्हटले आहे, माळी या ओबीसी जातीमध्ये फुलमाळी, फुले, हळदे, काचा, कडू, बावने, अंधप्रभू, आधशेटी, जीरे, उंडे, लिंगायत माळी, बागवान, मराळ, वनमाळी, सावतामाळी यांचा समावेश आहे. लिंगायत माळी समाजच्या मुलांची शाळेत नोंद करताना हिंदू / लिंगायत, लिंगायत असा उल्लेख आहे. माळी शब्दाचा उल्लेख नसल्याने विद्यार्थ्यांना ओबीसी दाखले मिळत नाहीत. लिंगायत हा धर्म असून त्यामध्ये माळी ही पोटजात आहे. ६० ते ७० वर्षात जातीच्या चुकीच्या नोंदी झाल्यामुळे दाखले मिळत नाहीत. लिंगायत माळी समाजात माळीऐवजी खोबरे, तोडकर पाटील, चौगले, भंडारे, लांडगे, वानरे, मगदूम, कोरे, यादव, दामटे अशी आडनावे आहेत. या आडनावाच्या वीरशैव माळी समाजाच्या जातीच्या दाखल्यामध्ये केवळ हिंदू लिंगायत, लिंगायत अशी नोंद झाली आहे. जातीचे दाखले मिळण्यासाठी वीरशैव माळी जिल्हा संघटनेच्या अध्यक्षांकडून जातीचे दाखले प्रमाणित केल्यास ते ग्राह्य मानून अडचणीत सापडलेल्या विद्यार्थ्यांना ओबीसी दाखल मिळावेत यासाठी सरकारशी पत्रव्यवहार केला आहे. पण न्याय न मिळाल्याने पुन्हा उपोषण करत आहोत. आंदोलनस्थळी दिवसभर खासदार धनंजय महाडिक, आमदार सतेज पाटील, राजेश क्षीरसागर, धैर्यशिल माने, सरलाताई पाटील, वसंतराव मुळीक, अनिल यादव, बबन रानगे यांच्यासह अनेकांनी भेट देऊन पाठींबा दिला. आंदोलनात वीरशैव लिंगायत माळी समाजाचे जिल्हाध्यक्ष अशोक माळी, उपाध्यक्ष संतोष माळी, सचिव काशिनाथ माळी, खजानिस बाळासाहेब माळी, सुनील माळी, कुमार माळी, एस.आर. बुमणे यांच्यासह मोठ्या संख्येने कार्यकर्ते सहभागी झाले होते.

डॉ. गोपाळ गुरू यांचे

शनिवारी व्याख्यान

कोल्हापूर

डॉ. बाबासाहेब आंबेडकर यांच्या १२७ व्या जयंतीनिमित्त शिवाजी विद्यापीठाच्यावतीने ज्येष्ठ विचारवंत प्रा. डॉ.गोपाळ गुरू यांचे व्याख्यान आयोजित केले आहे. 'डॉ. बाबासाहेब आंबेडकर यांची लोकशाही संकल्पना' या विषयावर ते विवेचन करणार आहेत. शनिवारी १४ एप्रिल रोजी विद्यापीठाच्या राजर्षी शाहू सभागृहात सकाळी साडेनऊ वाजता हे व्याख्यान होणार आहे.

म. टा. प्रतिनिधी, कोल्हापूर

शिवाजी विद्यापीठाचे कुलगुरू डॉ. देवानंद शिंदे यांच्या विद्यापीठ प्रशासनाकडील दुर्लक्ष व सततच्या गैरहजेरीमुळेच केंद्रीय मनुष्यबळ विकासमंत्रालयातर्फे करण्यात आलेल्या राष्ट्रीय स्पर्धेतील मानांकन घसरले, असा आरोप शिवाजी विद्यापीठ शिक्षक संघाने (सुटा) पत्रकाद्वारे केला आहे.

गेल्या दोन वर्षापूर्वी याच मानांकनात शिवाजी विद्यापीठ २८ व्या स्थानावर होते. मात्र यंदा ते पहिल्या शंभरच्या क्रमवारीतही समाविष्ट नाही. मुंबई विद्यापीठाचा अतिरिक्त कार्यभार घेतल्यापासून डॉ. शिंदे यांचे शिवाजी विद्यापीठ प्रशासनकडे लक्ष नाही. त्यांनी विद्यापीठाच्या अधिविभागांना गेल्या दोन वर्षात भेटही दिलेली नाही, असे या निवेदनात म्हटले आहे. विद्यापीठ कायद्यानुसार व्यवस्थापन परिषदेसमोर दर तीन महिन्याचा अहवाल सादर करणे कुलगुरूंना बंधनकारक आहे. मात्र असा कोणताही अहवाल गेल्या तीन महिन्यात डॉ. शिंदे यांनी सादर केलेला नाही. त्यामुळे विद्यापीठाचे मानांकन घसरण्यामध्ये डॉ. शिंदे जबाबदार आहेत. सातत्याने असलेल्या गैरहजेरीमुळे प्रलंबित कामाबाबत चर्चा करण्यासंदर्भात सुटाने केलेल्या पत्रव्यवहारालाही डॉ.शिंदे यांनी प्रतिसाद दिलेला नाही, असेही या पत्रकात नमूद करण्यात आले आहे.

म. टा. प्रतिनिधी, कोल्हापूर

पर्यटन विकासासाठी तयार केलेल्या बांबू हाऊसची तपासणी करून दर्जाबाबत निर्दोष अहवाल देण्यासाठी चार हजार रुपयांची लाच घेणाऱ्या शासकीय तंत्रनिकेतन कॉलेजच्या प्राध्यापकाला लाचलुचपत प्रतिबंधक विभागाच्या पथकाने रंगेहात अटक केली. शिवाजी तुकाराम काटकर (वय ५५, रा. संकल्पसिद्धा, शांतिनिकेतन शाळेसमोर, मोरेवाडी रोड, कोल्हापूर) असे लाचखोर प्राध्यापकाचे नाव आहे. सोमवारी संध्याकाळी साडेसहाच्या सुमारास टाकाळा परिसरात ही कारवाई करण्यात आली.

लाचलुचपत प्रतिबंधक विभागाचे उपअधीक्षक गिरिष गोडे यांनी दिलेल्या माहितीनुसार, वन विभागाने रामलिंग, आळते (ता. हातकणंगले) येथे पर्यटन विकासासाठी बांबू हाऊस तयार करण्याची जाहिरात प्रसिद्ध केली होती. टिंबर मार्केट येथील अशपाक मकानदार यांनी त्यांच्या नेचर्स बांबू फर्निचर अँड रिसॉर्ट मॅन्युफॅक्चरिंग कंपनीच्या नावे ठेका घेतला. ९ लाख रुपयांचे काम मार्च २०१७ ते जानेवारी २०१८ मध्ये पूर्ण केले. या कामाचे बिल अदा करण्यापूर्वी वन विभाग आणि आळते येथील संयुक्त समितीने कोल्हापुरातील शासकीय तंत्रनिकेतन कॉलेजकडून त्रयस्त तपासणी करून घेण्यास सांगितले.

यानुसार कॉलेजमधील प्राध्यापक शिवाजी काटकर यांनी सहकाऱ्यासह ३ एप्रिलला बांबू हाऊसची तपासणी केली. तपासणीचा अहवाल सादर करण्यास मात्र त्यांनी टाळाटाळ सुरू केली. निर्दोष अहवाल देण्यासाठी त्याने मकानदार यांच्याकडे पाच हजार रुपयांची मागणी केली. दोन दिवसांपूर्वी वन विभागाकडे अहवाल सादर करून प्रा. काटकर यांनी पैशांसाठी तगादा लावला. पैसे न दिल्यास अहवालात फेरफार करण्याची धमकीही त्याने मकानदार यांना दिली. मकानदार यांनी शनिवारी लाचलुचपत प्रतिबंधक विभागाकडे तक्रार दिल्यानंतर उपअधीक्षक गोडे यांनी तक्रारीची खात्री करून सोमवारी संध्याकाळी सापळा रचला. टाकाळा येथे चार हजार रुपये घेताना त्याला रंगेहात अटक करण्यात आली.

....३

०००००००००००

लिफ्ट देण्याच्या बाहण्याने

मोबाइल लंपास

म. टा. प्रतिनिधी, कोल्हापूर

खासगी क्लासवरुन घरी जाणाऱ्या शालेय विद्यार्थ्याला लिफ्ट देण्याचा बहाणा करून एका मोटारसायकस्वाराने दहावीच्या विद्यार्थ्याचा सुमारे १२ हजार किमंतीचा मोबाइल लंपास केला. सोमवारी सकाळी साडे अकरा वाजता सीपीआर आवारात हा प्रकार घडला. याची नोंद लक्ष्मीपुरी पोलिस ठाण्यात झाली असून सीसीटीव्ही फुटेजवरुन मोटारसायकलस्वाराचा शोध सुरू आहे.

याबाबत पोलिसांकडून मिळालेली माहिती अशी, वळीवडे येथील दहावीच्या वर्गात शिकणारा मुलगा राजारामपुरी येथील खासगी क्लासला नियमित येत आहे. सोमवारी सकाळी ११ वाजता क्लासवरून घरी जात असताना एका अज्ञात मोटारसायकलस्वाराने आपण वळीवड्यास निघालो, असून तुला लिफ्ट देतो, असे सांगत त्याला मोटारसायकलवर बसवले. आणि सीपीआर येथे घेऊन आला. त्याचवेळी मित्राला फोन करायचा असून आपल्या मोबाइलचे चार्जिंग संपल्याचे सांगत मोबाइलद्वारे अनोळखी व्यक्तीशी संपर्क साधला. त्यानंतर विद्यार्थ्याला घेऊन तो सीपीआरमधील दुधगंगा इमारतीच्या दुसऱ्या मजल्यावर गेला. विद्यार्थ्याला तेथेच थांबवून तो तिसऱ्या मजल्यावर जातो, असे म्हणून गेला, तो परत आलाच नाही. विद्यार्थ्यांने मोटारसायकलस्वाराचा सर्वत्र शोध घेतला, पण त्याला सापडला नाही. त्यानंतर त्याने पीसीओवरुन संपर्क साधत घडल्या प्रकाराची माहिती आपल्या आईला दिली. त्यानंतर आई व मुलांने सीपीआरमधील पोलिस संदीप कापसे यांना घडला प्रकार सांगितला. कापसे यांनी सीपीआरमधील सीसीटीव्ही फुटेजमध्ये ११ वाजून ४५ मिनिटांनी मोटारसायकलस्वार विद्यार्थ्याला घेऊन आल्याचे दिसून आले. त्यांनी तत्काळ लक्ष्मीपुरी पोलिस ठाण्याला माहिती दिली. त्यानुसार पोलिस नाईक अभिजित घाटगे, श्रीधर जाधव यांनी फुटेज पाहिले. सीसीटीव्ही फुटेजमधील मोटारसायकलचा नंबर आणि युवकाच्या फोटोवरून शोध घेत आहेत.

लक्ष्मीपुरीत लॉजवर छापा

टाकून आठजण अटकेत

म. टा. प्रतिनिधी, कोल्हापूर

लक्ष्मीपुरी फोर्ड कॉर्नर येथील किरण लॉजवरील कुंटणखाण्यावर टाकलेल्या छाप्यात सात जणांसह लॉमालक व दोन महिलांना ताब्यात घेतले. विशेष पोलिस महानिरीक्षकांच्या विशेष पथकाने केलेल्या कारवाईमध्ये २४ हजार रुपयांची रोख रक्कम व मोबाइल जप्त करण्यात आले. सहायक पोलिस निरीक्षक आरती नांद्रेकर यांच्या पथकाने रात्री साडेसात वाजता ही कारवाई केली.

याप्रकरणी बाळकृष्ण प्रभाकर काणकेकर (वय ३५ रा. वरेरी तळेबाजार,ता. देवगड, जि. सिंधुदूर्ग), अभिजित हरी खोत (वय २१, रा. डोणोली, ता. शाहूवाडी), मीनिष कुमार आसाराम बिंद (वय २६), लवकुश माताराम बिंद (४५), राम माताराम बिंद (४५), राकेश सिताराम भारद्वाज (२८) सर्व (रा. सराय इनायत, ता. फुलपूर जि. अलाहाबाद, उत्तरप्रदेश), मारुती धोंडिराम सणगर (वय ५३, रा. प्लॉट नं. ११ भाऊसाहेब घाटगे कॉलनी, कदमवाडी) व लॉजचे मालक किरण हणमंतराव जोशी (रा. शाहुपूरी ३ री, गल्ली) यांना ताब्यात घेतले आहे. दोन पीडित महिलांना सोडून देण्यात आले.

सहायक पोलिस निरीक्षक नांद्रेकर यांच्या पथकाला फोर्ड कॉर्नर येथील किरण लॉजवर कुंटणखाणा सुरू असल्याची माहिती मिळाली. पथकांने लॉजवर छापा टाकून अवैध व्यवसाय करणाऱ्यांना ताब्यात घेतले. सुरुवातीस उडवाउडवीची उत्तरे दिली, पण दोन महिलांकडून माहिती मिळाल्यानंतर सर्वांना ताब्यात घेतले. पथकांने तत्काळ लक्ष्मीपुरी पोलिस ठाण्याशी संपर्क साधल्यानंतर अधिक पोलिक कुमक दाखल झाली. अवैध व्यवसाय करणाऱ्या सातजण, लॉजमालक व पीडित महिलांना लक्ष्मीपुरी पोलिस ठाण्यात आणण्यात आले. नंतर दोन पीडित महिलांना सोडून देण्यात आले. रात्री उशीरापर्यंत गुन्हा नोंद करण्याची प्रक्रिया सुरू होती. कारवाईमध्ये लक्ष्मीपुरीचे पोलिस उपनिरीक्षक किशोर डोंगरे यांनीही सहभाग घेतला.

सहकारी संघाच्या अध्यक्षपदी डॉ. पाटील

५० वर्षानंतर कोल्हापूरला अध्यक्षपदाची संधी; उपाध्यक्षपदी पथाडे

फोटो आहे

म. टा. प्रतिनिधी, कोल्हापूर

राज्यातील सहकारी संस्थांची शिखर संस्था असलेल्या महराष्ट्र राज्य सहकारी संघाच्या अध्यक्षपदी राष्ट्रवादी काँग्रेसचे डॉ. प्रताप पाटील (कोल्हापूर) तर उपाध्यक्षपदी सिद्धार्थ पथाडे (चंद्रपूर) यांची बिनविरोध निवड झाली. डॉ. पाटील यांच्या निवडीमुळे ५० वर्षानंतर कोल्हापूरला अध्यक्षपदाची संधी मिळाली. निवडणूक अधिकारी म्हणून पुणे ग्रामीणचे उपनिबंधक आनंद कटके होते. पदाधिकारी निवडीवेळी संघाच्या कार्यालयाबाहेर मोठा पोलिस बंदोबस्त तैनात ठेवला होता.

राज्य सहकारी संघाच्या पंचवार्षिक निवडणुकीमध्ये २१ पैकी सात संचालकांची निवड बिनविरोध झाली होती. १४ जागांसाठी राज्यातील सात मतदान केंद्रावर चार मार्च रोजी मतदान व त्यानंत मतमोजणी झाली. यामध्ये परिवर्तन पॅनेलने भाजप पुरस्कृत आमदार प्रवीण दरेकर पॅनेलचा धुव्वा उडवत बिनविरोध जागांसह एकूण २० जागांवर विजय मिळवला होता. संचालक मंडळातून अध्यक्ष, उपाध्यक्षपदाची निवड १९ मार्च रोजी होणार होती. पण यावेळी दोन्ही गटांमध्ये झालेल्या वादांमुळे निवडणूक अधिकारी कटके यांनी निवड स्थगित करून पुन्हा घेण्याची घोषणा केली होती. त्यानंतर मुख्यमंत्री देवेंद्र फडणवीस व राष्ट्रवादी काँग्रेसचे अध्यक्ष शरद पवार यांनी आपआपल्या समर्थकांना सामंजस्याची भूमिका घेण्याच्या सूचना केल्या होत्या. तरीही मंगळवारी होणाऱ्या पदाधिकारी निवडीसाठी पुणे रेल्वे स्थानकाजवळील संघाच्या कार्यालयाबाहेर कडेकोट बंदोबस्त ठेवण्यात आला होता.

अध्यक्षपदासाठी राष्ट्रवादी काँग्रेसचे डॉ. पाटील यांचे नाव एम. एम. हिंदाळकर यांनी सुचवले, त्याला सुभाष आकरे यांनी अनुमोदन दिले. त्यानुसार डॉ. पाटील यांची व उपाध्यक्षपदी पथाडे यांची बिनविरोध निवड झाली. तर मानद सचिवपदी काँग्रेसच्या विद्या पाटील (लातूर) यांनी हिरामण सातकर यांचा १२ विरुद्ध नऊ मतांनी पराभव करत विजय मिळवला. डॉ. पाटील यांच्या निवडीमुळे कोल्हापूरला ५० वर्षानंतर अध्यक्षपदाचा मान मिळाला. यापूर्वी भास्करराव जाधव यांनी राज्य सहकारी संघाचे अध्यक्षपद भूषवले होते. डॉ. पाटील गेल्या दहा वर्षांपासून राज्य संघाचे उपाध्यक्ष तर १८ वर्षांपासून संचालक म्हणून कार्यरत आहेत. सध्या ते शिवाजी विद्यापीठाच्या विद्या परिषद व अधिसभेवरही कार्यरत आहेत.

टेबल-खुर्च्यांऐवजी गाद्या अन् लोड

राज्य सहकारी संघाची निवड झाल्यानंतर परिवर्तन पॅनेलकडे २० संचालक असल्याचा दावा केला जात होता. पण १९ मार्च रोजी पदाधिकारी निवडीमध्ये आमदार दरेकर समर्थकांनी आपल्याकडे १३ सदस्य असल्याचा दावा केला होता. तर संजीव कुसाळकर यांनी आपल्याकडे पूर्ण बहुमत असल्याचा दावा केला होता. दावा-प्रतिदाव्यामुळे पदाधिकारी निवडीवेळी टेबल खुर्च्यांची आदळाआपट केली होती. त्यामुळे मंगळवारी झालेल्या निवडीवेळी टेबल - खुर्च्यांऐवजी संचालकांना बसण्यासाठी गाद्या अन् लोडची व्यवस्था केली होती.

राज्यातील सर्व सहकारी संस्थांची शिखर संस्था असून संस्थेच्यावतीने सहकाराचे शिक्षण, प्रशिक्षण, प्रचार, प्रसार आणि संशोधन केले जाते. सहकारी संस्था अधिक सक्षम करण्यासाठी प्रयत्न करणार आहे. विशेषत: ग्रामीण भागाच्या आर्थिक सक्षमीकरणाला चालना देण्याचा प्रयत्न करू.

डॉ. प्रताप पाटील, अध्यक्ष, राज्य सहकारी संघ

म. टा. प्रतिनिधी, कोल्हापूर

'राजकीय पक्ष किंवा संघटना यांचे खरे अस्तित्व हे त्यांच्या समूहातील लोकांच्या प्रतिष्ठेवर अवलंबून असते. यामध्ये संख्या महत्त्वाची नसून त्यातील शीलवान आणि चारित्र्यसंपन्न लोकांमुळे पक्ष लोकप्रिय होत असतो,' असे प्रतिपादन अॅड. लक्ष्मण केसरकर यांनी केले. अखिल भारतीय हिंदुस्थान जनता पार्टीच्यावतीने आयोजित कार्यक्रमात ते बोलत होते. यावेळी पार्टीच्या जिल्हाध्यक्षपदी निवड झाल्याबद्दल सलीम शेख व महिला आघाडीच्या आयेशा शेख यांचा प्रमुख पाहुण्यांच्या हस्ते सत्कार करण्यात आला.

अॅड. केसरकर म्हणाले, 'हिंदुस्थान जनता पार्टी जिल्ह्यात पदार्पण करत आहे. पार्टीचा जनाधार वाढवण्यासाठी दोन्ही पदाधिकारी सर्वांना सोबत घेऊन प्रयत्न करतील. पक्ष मजबूत करताना संख्येपेक्षा विश्वासार्हता अधिक महत्त्वाची आहे.'

जिल्हाध्यक्ष शेख म्हणाले, 'राजकीय पक्ष किंवा संघटनांच्या माध्यमातून चांगले समाजकार्य करण्याची संधी मिळते. केवळ निवडणुका डोळ्यासमोर ठेवून जनतेशी संपर्क ठेवणारे कालांतराने कालबाह्य होतात. परंतु, सामान्यांच्या प्रश्नांची जाणीव ठेवू सरकार दरबारी लढणारे कार्यकर्ते चिरकाल टिकतात. पक्षाच्यावतीने अशाच पद्धतीने काम केले जाईल.'

स्वराज्य प्रतिष्ठानचे अध्यक्ष सचिन पाटील, संदीप पाटील, विनोद पाटील, संजय नायकवडी, वसंतराव निकम, सुनील माळी, इक्बाल मुल्लाणी, सैफअली शेख, तौसिफ शेख आदी उपस्थित होते.

प्रास्ताविक नेमिनाथ सिदनाळे यांनी केले. रोशन शेख यांनी सूत्रसंचालन केले. संतोष कदम यांनी आभार मानले.

कोल्हापूर : नाभिक समाज व राजस्थानी मारवाडी जैन श्वेतांबर समाजाच्यावतीने पंचगंगा स्मशानभूमीत बसवण्यात आलेल्या दानपेटीला शहरवासीयांकडून भरघोस प्रतिसाद मिळत आहे. यावर्षी दानपेटी व पावतीच्या माध्यमातून पंचगंगा स्मशानभूमीसाठी नऊ लाखांचा निधी जमा झाला. पंचगंगा स्मशानभूमीत सुविधा उपलब्ध व्हाव्यात, यासाठी राजस्थानी मारवाडी जैन श्वेतांबर समाज आणि नाभिक समाज प्रयत्नशील आहे. मोफत अंत्यसंस्कारामुळे आर्थिक बोजा वाढत असल्याने दोन वर्षापूर्वी या दोन्ही समाजांनी संयुक्तरित्या दानपेटी बसवली. त्यामध्ये राजस्थानी मारवाडी समाजाने अडीच लाख रुपये तर नाभिक समाजाने ५१ हजार रुपये दानपेटीत टाकले. या वर्षी दानपेटीत सहा लाख रुपये तर पावतीच्या माध्यमातून तीन लाख रुपये जमा झाले. यातून कोल्हापूरकरांचे दातृत्व दिसून येत आहे. दानपेटीत जमलेले पैसे मोजण्यासाठी सराफ संघाचे माजी अध्यक्ष राजेश राठोड, नगरसेवक ईश्वर परमार, जयदीप ढाले, अरविंद कांबळे, भारत माने, राजू झेंडे आदी उपस्थित होते.

म. टा. प्रतिनिधी, कोल्हापूर

येथील वीरशैव को-ऑप बँकेच्या निपाणी येथील २९ व्या शाखेचे उद्घाटन शिवलिंगेश्वर महास्वामी यांच्या हस्ते झाले. अध्यक्षस्थानी बँकेचे अध्यक्ष डॉ. दिलीप चौगुले होते. डॉ. चौगुले म्हणाले, ' बँकेच्या निपाणी शाखेच्यावतीने कोअर बँकिंग, एटीएम, आरटीजीएस, एनइएफटी, एसएमएस, लॉकर्स, मोबाईल बँकिंग, पॉस मशिनद्वारे खरेदीची सुविधा, वेबसाइट, पे-पॉईंट सुविधांतर्गत विमान, रेल्वे तिकिट बुकिंग आदी सुविधा देण्यात येणार आहे. शाखेच्या उद्घाटनालाच सहा कोटीच्या ठेवी व बचत खाती सुरू केली असल्याचे सांगितले.'

शिवलिंगेश्वर महास्वामीचे आशिर्वचन झाले. मुख्य कार्यकारी अधिकारी अनिल नागराळे यांनी बँकेच्या आर्थिक स्थितीची आढावा घेताला. हलशुगरचे माजी चेअरमन सुकुमार पाटील-बुदिहाळकर, केएलर्इचे अशोक बागेवाडी, डॉ. महेश कोरे, सुरेश शेटटी यांचेसह निपाणी शहर व ग्रामीण भागातील शेतकरी, व्यापारी, व्यावसायीक व नागरिक उपस्थित होते. यावेळी प्रणलिंग स्वामी, निपाणीचे उपनगराध्यक्ष सुनील पाटील, नगरसेवक राज पठाण, वीरशैव समाज निपाणीचे अथ्यक्ष श्रीकांत परमणे संचालक नानासो नष्टे, कल्लेश माळी, बाबासो देसार्इ, राजेश पाटील-चंदुरकर, रत्नमाला घाळी, चंद्रकांत स्वामी, शकुंतला बनछोडे, महादेव साखरे, राजेंद्र शेटे, अरविंद माने, राजेंद्र लकडे, सदानंद हत्तरकी, अनिल स्वामी, रंजना तवटे, चंद्रकांत सांगावकर,आप्पासो आर्वे इत्यादी संचालक उपस्थित होते. उद्योपगपती आण्णासाहेब जोल्ले व माजी आमदार काकाासो पाटील यांनी कार्यक्रमस्थळी भेट दिली. उपसरव्यवस्थापक अविनाश खोत, राजेंद्र कोरे, शाखाधिकारी संजीव देसार्इ यांनी संयोजन केले होते.

कोल्हापूर : येथील अॅड. शामरावजी शिंदे सत्यशोधक सहकारी बँकेला चालू आर्थिक वर्षात ४० लाखांचा ढोबळ नफा झाला. बँकेने निव्वळ एनपीए दोन टक्क्यांपर्यंत कमी झाला आहे. मार्च २०१८ अखेर बँकेचे भाग भांडवल एक कोटी ८५ लाख आहे. रिझर्व्ह फंड व इतर फंडामध्ये तीन कोटी दहा लाख आहे. बँकेच्या ३४ कोटीच्या ठेवी असून २० कोटींचे कर्जवितरण करण्यात आले आहे. तर बँकेचे ४१ कोटीचे खेळते भाग भांडवल आहे. बँकेने चालू आर्थिक वर्षात ५५ कोटी दहा लाखांचा व्यवसाय केला आहे. बँकेच्या प्रगतीमध्ये संचालक, अधिकारी, कर्मचारी यांच्याबरोबर खातेदारांचे बहुमोल सहकार्य लाभले असल्याचे चेअरमन सुलोचना नाईकवाडे यांनी दिलेल्या प्रसिद्धी पत्रकांत म्हंटले आहे.

कोल्हापूर : आजच्या तरूणांमध्ये विविध विषयांची माहिती असते. नव्या तंत्रज्ञानाची त्यांना चांगली माहिती आहे. या क्षमतांचा वापर त्यांनी समाजामध्ये विधायक कार्य करण्यासाठी करावा असे आवाहन कोल्हापूर जिल्ह्याचे अतिरिक्त पोलिस अधीक्षक तिरूपती काकडे यांनी केले. सायबर कॉलेजमधील दिनकरराव शिंदे समाजकार्य विभागात गुणवंत विद्यार्थ्यांच्या सत्कार कार्यक्रमात समाज व पोलिस या विषयावर ते बोलत होते. यावेळी बोलताना काकडे म्हणाले की, महाविद्यालयीन विद्यार्थ्यांनी आपला वेळ निर्मितीक्षम कार्यासाठी देण्याची गरज आहे. त्यांचे सहकार्य सामाजिक शांतता प्रस्थापित करण्यासाठी हातभार लावणारे आहे. यावेळी काकडे यांच्याहस्ते गुणवंत विद्यार्थ्यांचा सन्मान करण्यात आला. प्रा. डॉ. दीपक भोसले यांनी प्रास्ताविक केले. संचालक डॉ. एम. एम. अली, डॉ. एस. व्ही. शिरोळ, डॉ. प्रकाश रणदिवे, डॉ. बी.एन.पाटील आदी उपस्थित होते.

(फोटो आहे...अर्जुन)

सोशल मीडिया, फलकांवर पोलिसांची नजर

जयंत्यांचा व्हावा लोकोत्सव करण्याचे जिल्हाधिकाऱ्यांचे आवाहन

म. टा. प्रतिनिधी, कोल्हापूर

'राष्ट्रपुरुषांच्या जयंती लोकोत्सव म्हणून साजऱ्या कराव्यात. नागरिकांच्या उत्साहाला आवर घालण्याचा प्रशासनाचा हेतू नाही, मात्र हुल्लडबाजांमुळे उत्सवाला गालबोट लागू नये, यासाठी सर्वांनी पोलिसांना सहकार्य करावे. उत्सवकाळात सोशल मीडिया आणि डिजिटल फलकांच्या माध्यमातून वातावरण बिघडवण्याचा प्रयत्न होऊ शकतो, त्यामुळे त्यांच्यावर नजर ठेवून कडक कारवाई करावी' अशा सूचना जिल्हाधिकारी अविनाश सुभेदार यांनी दिल्या. पोलिस अधीक्षक कार्यालयात आयोजित केलेल्या शांतता समिती बैठकीत ते बोलत होते. 'शाहू महाराजांच्या विचारधारेवर चालणाऱ्या कोल्हापुरात शांततेचे आवाहन करण्यासाठी बैठक घ्यावी लागते,' ही चिंतेची बाब असल्याचेही मत त्यांनी व्यक्त केले.

येणाऱ्या दोन आठवड्यात महात्मा फुले, डॉ. बाबासाहेब आंबेडकर, बसवेश्वर आणि छत्रपती शिवाजी महाराज जयंतीनिमित्त शहरासह जिल्ह्यात विविध कार्यक्रमांचे आयोजन केले आहे. या पार्श्वभूमीवर कायदा सुव्यवस्था कायम ठेवण्यासाठी पोलिस अधीक्षकांनी मंगळवारी (ता. १०) जिल्हाधिकारी अविनाश सुभेदार यांच्या अध्यक्षतेखाली शांतता समितीची बैठक आयोजित केली होती. या बैठकीत महापौर स्वाती यवलुजे, विविध पक्ष, संघटना, तालीम, मंडळे यांचे पदाधिकारी उपस्थित होते.

यावेळी आमदार राजेश क्षीरसागर म्हणाले, 'जयंती, उत्सव शांततेत पार पाडणे ही नागरिकांचीच जबाबदारी असल्याचे स्पष्ट केले. कार्यकर्त्यांवर नियंत्रण ठेवणे ही नेत्यांची जबाबदारी आहे. याचे भान ठेऊनच कार्यक्रमांचे आयोजन करावे.'

राष्ट्रवादी कॉँग्रेसचे शहर अध्यक्ष राजेश लाटकर म्हणाले, 'जयंती उत्सवांच्या पार्श्वभूमीवर मंडळ आणि तालमींमधील नेत्यांनी संशयित हुल्लडबाजांना शांतता राखण्याच्या सूचना द्याव्यात. यानंतरही ते ऐकत नसतील तर पोलिसांना माहिती द्यावी. हुल्लडबाजांना राजकीय नेत्यांनी आणि कार्यकर्त्यांनी पाठबळ देऊन पोलिसांवर दबाव वाढवू नये.'

आरपीआयचे जिल्हाध्यक्ष उत्तम कांबळे यांनी दक्षता समित्या आणि पोलिसांमध्ये समन्वय असावा असे मत मांडले. 'पोलिस अधिकाऱ्यांनी दक्षता समितीच्या सदस्यांना सन्मानाने वागणूक द्यावी. कार्यकर्त्यांनी समाजकंटक आणि हुल्लडबाजांना पाठीशी घालू नये. कायदा मोडणाऱ्या हुल्लडबाजांचा बचाव करण्यासाठी आंबेडकरवादी संघटनांचे पदाधिकारी पोलिसांना फोन करणार नाहीत. २२ एप्रिलला शहरात सम्यक ऐक्य रॅलीचे आयोजन केले आहे. या रॅलीत कोणीही मद्यप्राशन करून सहभाग घेणार नाही,' अशी ग्वाही त्यांनी बैठकीत दिली. पश्चिम महाराष्ट्र देवस्थान व्यवस्थापन समितीचे अध्यक्ष महेश जाधव म्हणाले, 'मंडळ आणि तालमीतील प्रमुखांना हुल्लडबाज कोण आहेत याची माहिती असते. प्रमुखांनी हुल्लडबाजांचा बंदोबस्त करावा. विनापरवाना फलकांच्या बाबतीत पोलिसांनी घेतलेली भूमिका स्वागतार्ह आहे. यात सातत्य असावे. डॉल्बीच्या बाबतीत मात्र सुप्रीम कोर्टाच्या निर्देशानुसार आवाज मर्यादेत साउंड सिस्टीमला परवानगी मिळावी.'

जिल्हाधिकारी अविनाश सुभेदार म्हणाले, 'सर्व जातीधर्मांना सामावून घेणारा देश अशी आपली जगभरात प्रतिमा आहे. ही प्रतिमा जपणे आपल्या सर्वाचे कर्तव्य आहे. सर्वसामान्य नागरिकांना त्रास देणाऱ्या हुल्लडबाजांवर कारवाई होणारच. राष्ट्रपुरुषांच्या जयंत्या लोकोत्सव म्हणून साजऱ्या कराव्यात. '

बैठकीत छावा संघटनेचे राजू सावंत, शिवसेनेचे पद्माकर कापसे, मुस्लिम बोर्डिंगचे गणी आजरेकर, माजी नगरसेवक आदिल फरास, प्रा. विश्वास देशमुख, अॅड. पंडितराव सडोलीकर, दिलीप देसाई, दगडू भास्कर, वसंतराव मुळीक, आदींनी मनोगते व्यक्त केली.

यावेळी पोलिस अधीक्षक संजय मोहिते, अपर पोलिस अधीक्षक तिरुपती काकडे, श्रीनिवास घाडगे, उपअधीक्षक डॉ. प्रशांत अमृतकर, सूरज गुरव, कृष्णात पिंगळे, विनायक नरळे, आर. आर. पाटील, सर्व पोलिस ठाण्यांचे निरीक्षक, राज्य उत्पादन शुल्कचे उपअधीक्षक संजय पाटील, आरटीओ, महावितरणचेही अधिकारी उपस्थित होते.

संशयितांना हद्दपारीच्या नोटिसा

जयंती उत्सवांच्या पार्श्वभूमीवर पोलिसांनी जिल्ह्यातील दीडशेहून अधिक संशयितांना तात्पुरत्या काळासाठी हद्दपारीच्या नोटिसा पाठवल्या आहेत. यात ३ जानेवारीला शहरात दगडफेक करणाऱ्या संशयितांचाही समावेश आहे. आंबेडकरवादी संघटनांच्या कार्यकर्त्यांनाही नोटिसा पाठवल्याने बैठकीत नाराजी व्यक्त करण्यात आली. कार्यकर्त्यांवर हद्दपारीची कारवाई करू नये, अशी विनंती आंबेडकरवादी संघटनांच्या पदाधिकाऱ्यांनी बैठकीत केली. प्रशासकीय कामाचा भाग म्हणून नोटिसा देणे आवश्यक असल्याचे अधीक्षक मोहिते यांनी सांगितले.

वारणा लुटीचा तपास गायकवाड यांच्याकडेच

अपर पोलिस महासंचालकांचा आदेश

म. टा. प्रतिनिधी, कोल्हापूर

वारणा लुटीचा तपास करणारे अपर पोलिस अधीक्षक नरेंद्र गायकवाड यांची तडकाफडकी पुण्याला बदली करण्यात आली आहे. मात्र, बहुचर्चित वारणा लूट प्रकरणाचा तपास गायकवाड यांच्याकडेच ठेवण्यात आला आहे. याबाबतचे आदेश सीआयडीचे अपर पोलिस महासंचालक संजयकुमार यांनी दिला. या आदेशामुळे गायकवाड यांनी पुन्हा तपासाची सूत्रे स्वीकारली आहेत.

कोल्हापुरातील सीआयडीचे अपर पोलिस अधीक्षक नरेंद्र गायकवाड यांची दोन दिवसांपूर्वी तडकाफडकी पुण्याला बदली करण्यात आली आहे. वारणानगर येथील शिक्षण संस्थेच्या इमारतीत झालेल्या ९ कोटी, १८ लाख रुपयांच्या लुटीचा तपास त्यांच्याकडे आहे. या गुन्ह्यात सात आरोपींना अटक करून त्यांनी कोर्टात आरोपपत्रही दाखल केले आहे. याशिवाय संशयितांकडून गुन्ह्यातील सुमारे चार कोटी रुपये वसूल केले आहेत. गुन्ह्याचा तपास अंतिम टप्प्यात असताना त्यांची तडकाफडकी बदली झाल्याने याबाबत उलटसुलट चर्चा सुरू होती. अखेर सीआयडीचे अपर पोलिस महासंचालक संजयकुमार यांनी वारणा लुटीचा तपास नरेंद्र गायकवाड यांच्याकडेच राहील, असे स्पष्ट केले आहे. गायकवाड हे पुणे आणि कोल्हापुरातून तपास करतील. मंगळवारी त्यांनी पुन्हा तपासाची सूत्रे स्वीकारली आहेत. तपास पूर्ण होईपर्यंत गायकवाड हेच तपास अधिकारी राहतील, अशी माहिती सीआयडीचे अधीक्षक डॉ. दिनेश बारी यांनी दिली.