शिवाजी पेठेतील पद्माराजे उद्यानाच्या पिछाडीस बेकायदेशीर विदेशी मद्याचा साठा असलेली कार राज्य उत्पादन शुल्क विभागाच्या पथकाने पकडली. कारमधून ६२ हजार रुपये किमतीचा मद्यसाठा व कार असा सुमारे दीड लाखांचा मुद्देमाल जप्त केला. शुक्रवारी (ता. २६) दुपारी ही कारवाई करण्यात आली. संशयित कारचा चालक गर्दीचा फायदा घेऊन पसार झाला, राज्य उत्पादन शुल्क विभागाचे अधीक्षक गणेश पाटील यांनी ही माहिती दिली.
प्रजासत्ताक दिनानिमित्त ड्राय डे असूनही काही ठिकाणी छुपी मद्यविक्री होत असल्याची माहिती उत्पादन शुल्क विभागाच्या पथकाला मिळाली होती. या माहितीनुसार पथकाने शिवाजी पेठेतील पद्माराजे उद्यानाच्या पिछाडीस सापळा लावला होता. या परिसरात संशयित कार (एम. एच. ०३ एस. ८४८१) रस्त्याकडेला पार्क केली होती. कारमधील तरुण अवैध मद्यविक्री करीत असल्याचे लक्षात येताच पथकाने कारकडे धाव घेतली. राज्य उत्पादन शुल्क विभागाचे पथक आल्याचे समजताच संशयिताने तिथून पळ काढला. पथकाने गोवा बनावटीचे मद्य आणि कार आसा सुमारे एक लाख दोन हजार रुपयांचा मुद्देमाल जप्त केला.
याच पथकाने खंडोबा तालमीनजीक संशयित दुचाकी ताब्यात घेतली. या दुचाकीला लावलेल्या नायलॉनच्या पिशव्यांमध्ये सुमारे ३० हजार रुपयांचा मद्यसाठा होता. पोलिसांनी मद्यासह दुचाकी जप्त केली. दोन्ही कारवायांमध्ये संशयित विक्रेते पसार झाले आहेत. पथकाने एक कार, एक दुचाकी आणि गोवा बनावटीचे मद्य असा सुमारे दीड लाख रुपयांचा मुद्देमाल जप्त केला आहे. निरीक्षक संजय जाधव, विक्रम मोरे, जगन्नाथ पाटील, एम. आर. लाडके, जवान आय. आय. गडकरी, अमर पाटील, संदीप हालुंडे, राहुल सकपाळ, आदींनी कारवाईत सहभाग घेतला.
मोबाइल अॅप डाउनलोड करा आणि राहा अपडेट