म. टा. प्रतिनिधी, कोल्हापूर
केवळ दोन दिवसांवर नाताळ सण आल्याने शहर आणि जिल्ह्यातील प्रमुख बाजारपेठ फुलून गेली आहेत. ख्रिसमस ट्री, रंगीबेरंगी पताका यांसह नविन कपडे, विविध वस्तू खरेदीसाठी गर्दी होत आहे. शहरातील सर्व चर्चमध्ये विविध कार्यक्रम सुरू झाले आहेत. लक्षवेधी विद्यूत रोषणाईने शहराच्या सौदर्यांत भर पडली आहे.
सोमवारी (ता. २५) नाताळ आहे. त्यामुळे ख्रिस्ती समाजाची तयारी अंतिम टप्यात आली आहे. शहरातील राजारामपुरी, शाहुपूरी, लक्ष्मीपुरी, महानगरपालिका चौक, गांधीनगर या भागातील दुकानात नाताळासाठी आवश्यक वस्तूंची आकर्षक पध्दतीने मांडणी केली आहे. होली रीट, बेल्स, प्रभू येशू आणि मेरी यांच्या मूर्ती, बालकांसह अबालवृध्दांचे रेडीमेड कपडे, चांदणी, खेळणी, सांताक्लॉज, ख्रिसमस बॉल्स, टोप्या खरेदी करण्याकडे ग्राहकांचा कल आहे. शुभेच्छावेळी भेट देण्यासाठी मिठाई खरेदी केली जात आहे. होलीक्रॉस, सेंट झेवियर्स हायस्कूलमध्ये आज (शनिवारी) सांस्कृतिक कार्यक्रमाचे आयोजन केले आहे. ख्रिस्ती युवाशक्तीतर्फे बुधवारी शहरातून सुवार्ता रॅली काढण्यात आली.
सेंट फ्रान्सिस, ख्राइस्ट, वायल्डर मेमोरियल, ऑल सेंट, झेवियर्स चर्चना आकर्षक विद्यूत रोषणाई केली आहे. सोमवारी सर्व चर्चमध्ये दिवसभर धर्मगुरूंचे प्रवचन, प्रार्थना होणार आहे. त्याची तयारी पूर्ण झाली आहे. शनिवारपासून सरकारी कार्यालयांना तीन दिवसांची सलग सुटी मिळत आहे. त्यामुळे पुन्हा खरेदीला गर्दी वाढणार आहे. या पार्श्वभूमीवर दुकानदारांनी नियोजन केले. आतापासून सोशल मीडियावरून नाताळच्या शुभेच्छांचे वर्षाव सुरू झाले आहेत. एसएमएस, व्हॉट्सअॅप, ट्विटरवरून शुभेच्छा दिल्या जात आहेत.
वायल्डर मेमोरियल चर्चमध्ये सायंकाळी ६ ते रात्री १० पर्यंत ख्रिसमस फेस्टिव्हलचे आयोजन केले आहे. फेस्टिव्हलमध्ये फुड स्टॉल्स, विविध खेळ, कॅरल सॉग्स, फनी गेम्स, फॅन्सी ड्रेस, ड्राईंग स्पर्धा घेतल्या जात आहेत. पाहण्यासाठी प्रेक्षकांची मोठी गर्दी होत आहे. यामुळे चर्च परिसराला यात्रेचे स्वरूप आले आहे.
महोत्सवाची मेजवानी
पोलिस उद्यानात २४ ते २८ डिसेंबर दरम्यान फुलांचा महोत्सव आयोजित केला आहे. नाताळमध्ये महोत्सव होत असल्याने बाहेर गावांहून आलेल्या पर्यटकांना फुल महोत्सव पाहण्याची मेजवानी मिळणार आहे. चर्चसह विविध ठिकाणच्या कार्यक्रमांना हजेरी लाऊन महोत्सव पाहता येणार आहे.
मोबाइल अॅप डाउनलोड करा आणि राहा अपडेट
