Twitt:satishgMT
कोल्हापूर ः ऐतिहासिक, धार्मिक, सामाजिक आणि निसर्गरम्य परिसरामुळे कोल्हापूर जिल्ह्यात पर्यटन व्यवसायाला मोठी संधी आहे. देशविदेशातील पर्यटकांकडून कोल्हापुरात देवदर्शन घेऊन गोवा आणि कर्नाटककडे जातात. पर्यटकांचे कोल्हापुरात वास्तव्य वाढावे, यासाठी पायाभूत सुविधा, पर्यटनस्थळांचा विकास, पर्यटकांना आकर्षित करणाऱ्या नाविन्यपूर्ण योजना व्हाव्यात यासाठी अनेक योजना राज्य सरकारने जाहीर केल्या आहेत. पण या योजना अद्याप कागदावरच राहिल्या आहेत. त्या पूर्णत्वास येण्यासाठी बराच कालावधी लागणार आहे. लोकप्रतिनिधी आणि प्रशासनाने योजनांचे कागदी घोडे नाचवण्याऐवजी पर्यटनासंबंधीच्या योजना तातडीने मार्गी लावण्यासाठी प्रयत्न करणे गरजेचे आहे.
अंबाबाई तीर्थक्षेत्र विकास आराखडा
२००९ मध्ये आघाडी सरकारच्या काळापासून सुरू झालेले अंबाबाई तीर्थक्षेत्र विकास आराखड्याचे काम अद्याप सुरुच आहे. २५० कोटींचा हा आराखडा तयार करण्यात आला असून पहिल्या टप्प्यात ७० कोटी, तर दुसऱ्या टप्प्यात ९० कोटी निधी देण्याची राज्य सरकारकडून घोषणा झाली. दर्शन मंडप आणि पार्किंग अशी पहिल्या टप्प्यातील कामे होती. पालकमंत्री चंद्रकांत पाटील यांनी तर नवरात्र उत्सवात दर्शन मंडप कामाचा प्रारंभ होईल, असे सांगितले होते. मुख्यमंत्र्यांसमवेत तीर्थक्षेत्र विकास आराखड्याबाबत उच्चस्तरीय बैठक झाली, पण अजूनही तीर्थक्षेत्र विकासाच्या कामाचा नारळ फुटलेला नाही.
जोतिबा तीर्थक्षेत्र विकास
जोतिबा तीर्थक्षेत्र विकास आराखड्यासह २५ कोटी रुपये निधीला मंजुरीही मिळाली आहे. पाच कोटी रुपयांचा निधी जिल्हा नियोजन मंडळाकडे वर्ग करण्यात आला आहे. दर्शन मंडप व टॉयलेट कॉम्प्लेक्स, घनकचरा व्यवस्थापन, इलेक्ट्रीकल, पाणी पुरवठा या कामांना प्रथम प्राधान्य देण्यात येणार आहे. मात्र प्रत्यक्षात कामांच्या वर्कऑर्डर अद्याप निघालेल्या नाहीत.
पन्हाळा लाइट अँड साउंड शो
पन्हाळा व पावनखिडींचा इतिहास पर्यटकांना माहित व्हावा, यासाठी पन्हाळा येथे लाइट अँड साउंड शोसाठी साडेचार कोटींचा निधी मंजूर झाला आहे. अंदमान सेल्युलर जेल आणि गोवळकोंडा किल्ल्याच्या धर्तीवर लाइट अँड साउंड शोचे नियोजन मंजूर केला आहे. पन्हाळा नगरपरिषदेने या प्रकल्पाला मंजुरी मिळावी, म्हणून केंद्रीय पुरातत्त्व विभागाकडे प्रस्ताव पाठवला आहे. हा प्रस्ताव वेळेत मंजूर होण्यासाठी लोकप्रतिनिधींनी पाठपुरावा करण्याची गरज आहे.
माणगाव परिषद
हातकणंगले तालुक्यातील माणगाव येथे झालेल्या माणगाव परिषदेला शंभर वर्षे पूर्ण होत असल्याच्या पार्श्वभूमीवर या ठिकाणाच्या विकासाची योजनाही आहे. राजर्षी शाहू महाराज आणि डॉ. बाबासाहेब आंबेडकर यांच्या उपस्थितीत ही परिषद झाली होती. या परिसराचे सामाजिक महत्त्व लक्षात घेता माणगावातील या स्थळाचा विकास करण्यासाठी राज्य सरकारने दोन कोटी निधीची घोषणा केली आहे. सामाजिक न्याय विभागाकडून या कामाचा पाठपुरावा सुरु असला तरी प्रत्यक्षात काम सुरु झालेले नाही.
लक्ष्मी विलास पॅलेस,शाहू जन्मस्थळ
राजर्षी शाहू महाराज यांच्या कसबा बावडा येथील लक्ष्मी विलास पॅलेस जन्मस्थळांचे काम गेली अनेक वर्षे सुरु आहे. आजअखेर निधीतून सर्व दालनांचे काम पूर्ण झाले असले तर राजर्षी शाहू महाराजांच्या जीवनचरित्रावर आधारित आर्ट गॅलरीचे काम अपूर्ण आहे. त्यासाठी दोन कोटींचा निधी मंजूर झाला आहे. राज्य पुरातत्त्व विभागाकडून चित्रे आणि शिल्पे घडवण्यासाठी टेंडर प्रक्रिया सुरु असली तरी त्याला प्रतिसाद न मिळाल्याने हे काम रखडले आहे. राज्य पुरातत्त्व विभागाच्या कला विभागाकडून चित्रे व शिल्पे तयार करुन घ्यावीत, असा प्रस्ताव तीन महिन्यापूर्वी शाहू जन्मस्थळ समितीने देऊनही सरकारने निर्णय घेतलेला नाही.
पंचगंगा घाट विकास
पंचगंगा घाट विकास संवर्धनासाठी राज्य सरकारने चार कोटी ७८ लाख रुपयांचा निधी मंजूर केला आहे. दगडी प्रवेशव्दार, बागबगीचा, नवीन घाटबांधणी, घाटांचे संवर्धन करण्यात येणार आहे. केंद्रीय पुरातत्त्व विभागाने कामास मंजुरी दिली असून प्रत्यक्षात कामास प्रारंभ झालेला नाही.
३०३ फूट तिरंगा ध्वजाचे दर्शन क्वचितच
देशातील दुसऱ्या क्रमांकाचा ३०३ फूट उंचीवरील तिरंगा ध्वज व पोलिस उद्यानाचे उद्घाटन एक मे रोजी झाले आहे. वर्षभर तिरंगा ध्वज फडकत राहील, अशी घोषणा यावेळी करण्यात आली होती. पर्यटक हा ध्वज पाहण्यासाठी मोठ्या संख्येने येतील व नवीन पर्यटनस्थळ विकसीत होईल, अशी अपेक्षा पालकमंत्री पाटील यांनी त्यावेळी केली होती, पण वाऱ्याच्या प्रचंड वेगामुळे गेल्या सहा महिन्यात ५० दिवसही तिरंगी ध्वज फडकू शकलेला नाही.
००००००
कोल्हापुरातील पर्यटनस्थळे विकसित करण्यासाठी जिल्हा प्रशासनाकडून पाठपुरावा सुरु आहे. काही कामांना मंजुरी मिळाली असून काही कामांच्या वर्कऑर्डर दोन महिन्यात काढण्यात येतील. दोन वर्षांत सर्व कामे पूर्ण करण्याचा प्रशासनाचा प्रयत्न आहे.
अविनाश सुभेदार, जिल्हाधिकारी
मोबाइल अॅप डाउनलोड करा आणि राहा अपडेट
