म. टा. प्रतिनिधी, कोल्हापूर
जयंती नाल्यात वाहून गेलेला लोखंडी पूल आणि ड्रेनेज पाइप बाहेर काढताना क्रेनच कोसळण्याची घटना शनिवारी संध्याकाळी घडली. प्रचंड रहदारीच्या या पुलावर ऐन वर्दळीच्या वेळीच ही घटना घडल्याने शहरवासीयांना धक्काच बसला. सुदैवाने या घटनेत कुणीही जखमी झाले नाही. लोखंडी पूल आणि पाइपलाइनचा भार न पेलल्याने क्रेन पुलावरुन तब्बल ३० फूट खोल नाल्यात कोसळली. दहा टन वजनाच्या क्रेनमुळे पुलालाही धोका पोहचला असून संरक्षक कठडाही उद्‍ध्वस्त झाला आहे.
क्रेन कोसळल्यामुळे नागरिकांची आरडाओरड आणि जिवांच्या आकांताने कर्मचारी व बघ्यांनी केलेली धावपळ यामुळे या ठिकाणी घबराट निर्माण झाली. तासाभराच्या अथक प्रयत्नानंतर क्रेन बाहेर काढण्यात यश आले.
अपघातानंतर खबरदारीचा उपाय म्हणून पुलावरुन एका बाजूकडील वाहतूक बंद ठेवण्यात आली. शिवाय दसरा चौक परिसर, खानविलकर पेट्रोल पंप आणि महावीर गार्डन परिसरातील वीजपुरवठा खंडीत करण्यात आला. पावसामुळे नाल्यातील साडेतीन फूट व्यासाची लोखंडी पाइप (रायझिंग मेन) आणि लोखंडी पूल वाहून गेला आहे. नाल्याकडून कसबा बावडा सांडपाणी प्रक्रिया केंद्राकडे सांडपाणी वाहून नेणारी पाइप तुटल्याने गेले दीड महिने पंचगंगेत थेट मैलायुक्त पाणी मिसळत आहे. त्यामुळे महापालिकेवर चौफेर टीका सुरु झाली होती. जिल्हा प्रशासन, पाटबंधारे विभाग आणि महाराष्ट्र प्रदूषण नियंत्रण मंडळाकडून महापालिकेला कारवाईच्या नोटिसा दिल्या होत्या.
या पार्श्वभूमीवर महापालिकेने पाइपलाइन दुरुस्तीसाठी २८ लाखांच्या कामाची निविदा काढली आहे. ठेकेदार मिलिंद कणसे यांनी दुपारी दोनच्या सुमारास नाल्यातील लोखंडी पूल, पाइप हटविण्याच्या कामाला सुरुवात केली. चौदा, बारा आणि दहा टन वजनाच्या क्षमतेच्या तीन क्रेनव्दारे सायंकाळी साडे पाचच्या सुमारास लोखंडी पूल आणि ड्रेनेज पाइप काढण्याचे काम सुरु होते. लोखंडी पुलात साडेतीन फूट व्यासाची पाइप अडकली होती. रेणुका सर्व्हिसच्या तीनही क्रेन एकाचवेळी कार्यान्वित होत्या. मात्र नाल्यातील पूल आणि पाइपचा भार क्रेनला पेलवला नाही. त्यामुळे काही कळायच्या आतच पुलावरील क्रेनची मागील चाके पहिल्यांदा वर उचलली आणि क्षणार्धात पुलाचा कठडा तोडून क्रेन नाल्यात कोसळली.
नशीब बलवत्तर म्हणून वाचले
नाल्यातून लोखंडी पूल वर काढताना ड्रेनेज विभागाचे चार आणि ठेकेदार कंपनीचे दोन कर्मचारी नाला पात्रात होते. काहीजण लोखंडी पुलावर दोरी पकडून उभे होते. क्रेन उंचावल्याचे लक्षात येताच सर्वच कर्मचारी जिवाच्या आकांताने पात्रातून सुरक्षितस्थळी धाव घेतली. अपघाताच्या थरारामुळे घटनास्थळी एकच धावपळ उडाली. काही नागरिक पुलावर क्रेनजवळ उभे होते. तेही जिवाच्या आकांताने धावत सुटले. कोसळलेल्या क्रेनमध्ये ड्रायव्हर महेश अडकला होता. अन्य कर्मचाऱ्यांनी त्याला क्रेनमधून बाहेर काढले. घटनेची माहिती अग्निशमन विभागाला कळविण्यात आली. पाच मिनिटांत अग्निशमन विभागाच्या तीन गाड्या घटनास्थळी दाखल झाल्या. क्रेन मागावून घेण्यात आली. अग्निशमन विभाग, ड्रेनेज विभाग आणि ठेकेदार कंपनीच्या कर्मचाऱ्यांच्या तासाभराच्या प्रयत्नानंतर क्रेन बाहेर काढण्यात आली.
मोबाइल अॅप डाउनलोड करा आणि राहा अपडेट
