कोल्हापूर टाइम्स टीम
अंधारावर मात करत प्रकाश उजळणारा सण म्हणजे दीपावली. फराळाचा आस्वाद, रांगोळीचा सडा, पणत्यांची रांग, नवलाईचा साज आणि आनंदाची उधळण करत येणाऱ्या दिवाळीचा सण प्रत्येकालाच हवाहवासा वाटतो. बोचऱ्या थंडीसोबत येणारा हा सण तेजाचा उत्सव म्हणून साजरा करण्यात येतो. पण ज्यांच्या घरी गरीबीचा, जेमतेम परिस्थितीचा अंधार आहे, निराधारपणाचा अंधार आहे, त्यांच्या घरीही आनंदाचे दीप उजळावेत यासाठी कोल्हापुरातील अनेक संवेदनशील व्यक्ती आणि संस्थांनी पुढाकार घेतला. माणुसकीचे दीप उजळत अनेकांच्या घरी दिवाळी साजरी करणाऱ्या अनोख्या मंडळींमुळे कित्येकांच्या आयुष्यात उमेदीचा प्रकाश पडला आहे.
शिवाजी चौक तरूण मंडळातर्फे बालकल्याण संकुलातील २२५ मुलांना नवीन कपडे वाटप करण्यात आले. खासदार धनंजय महाडिक यांच्या हस्ते याचे वितरण झाले. त्यांनी शिवाजी चौक तरूण मंडळाच्या विधायक दिवाळी उपक्रमाचे कौतुक केले. मंडळाचे अध्यक्ष माजी महापौर नंदकुमार वळंजू यांनी ‘संकुलातील मुलांना दिवाळीसाठी नवीन कपडे दिल्याने आम्हालाही एक वेगळा आंनद मिळतो’, असे सांगितले. मंडळाचे उपाध्यक्ष सुहास भेंडे यांनी, ‘प्रत्येकवर्षी दिवाळीत संकुलातील मुलांना नवीन कपडे दिले जातील’, असे सांगितले. बाल संकुलच्या पद्मजा तिवले यांनी, ‘समाजातील दानशूर व्यक्तीमुळे संकुलनास काहीही कमी पडत नाही’, असे सांगितले. उद्योगपती शंकर दुल्हाणी, बसवराज खोबरे, मनोहर चूघ, सुंदर पोपटानी, अतुल शहा, जयसिंगराव कदम, यशवंत वळंजू, दिलीप खोत, प्रफुल्ल भेंडे आदी
उपस्थित होते.
भारती विद्यापीठ औषध निर्माण शास्त्र महाविद्यालय माजी विद्यार्थी संघटनेकडून डॉ. सर्वपल्ली राधाकृष्णन बालसुधार, अनाथ मुलांच्या वसतीगृहास डालड्याचा डबा, मुला, मुलींना मेहंदी कोन, नेलपॉलीश अशा भेट वस्तू देण्यात आले. नगरसेवक महेश सावंत, प्राचार्य डॉ. एच. एन. मोरे, उपप्राचार्य डॉ. एम. एस. भाटीया, तेजस ठाकूर, किरण पाटील, आदिल्य चौगुले, डॉ. एस. ए. पिशवीकर, डॉ. डी. ए. भागवत, एफ. ए. ताबोली पी. के. डवरी उपस्थित होते.
विहान प्रकल्प, एन. के. पी. प्लस सामाजिक संस्था, कलापी स्टोअर्स व इतर दानशूर व्यक्ती, संस्थेतर्फे एचआयव्हीग्रस्त मुलांना कपडे, स्वेटर, फराळ, अभ्यंगस्नानाचे साहित्य देण्यात आले. शाहू स्मारक भवनात वितरणाचा कार्यक्रम झाला. प्रा. दिपक भोसले, प्रा. सुमन बुवा, आशिष तुर्कीया, शीतल ओसवाल, डॉ. अमरनाथ सेलमोकर, सागर बकरे, कृष्णात हिरूगडे, दीपा शिपूकर आदी उपस्थित होते. अन्कुली कुलकर्णी यांनी सूत्रसंचालन केले. युवराज भणगे यांनी आभार मानले.
सीपीआरमधील पोस्टमार्टम विभागात अनेक वर्षे पोस्टमार्टमचे काम करणारे रणजित गोहीरे आणि सागर सारंगधर यांना दिवाळीनिमित्त कपडे,फराळ आणि भेटवस्तू देण्याचा कार्यक्रम शाहीर विशारद आझाद नायकवडी लोककला सांस्कृतीक मंचतर्फे आयोजित केला होता. सागर सारंगधर आणि रणजीत गोहिरे यांचा आणि त्यांच्या कुटुंबीयांचा भेटवस्तू देऊन सत्कार करण्यात आला. उपजिल्हाधिकारी अशोक पाटील, उपविभागीय पोलिस अधिकारी डॉ. प्रशांत अमृतकर, जिल्हा शल्यचिकिस्तक डॉ. एल. एस. पाटील, डॉ. वासिम मुल्ला, आरोग्यमित्र बंटी सावंत, प्रजासत्ताकचे दिलीप देसाई, डॉ. सागर पाटील, ‘अनिस’चे उमेश सूर्यवंशी, शाहीर पापालाल नायकवाडी, शाहीर आझाद नायकवाडी आदी उपस्थित होते.
‘शिवम’तर्फे दिवाळीची अनोखी भेट
शिवम प्रतिष्ठानतर्फे जिल्ह्यातील ऊस तोडणी करणारी कुटुंबे, वीटभट्टी, बांधकाम कामगार, गावातील गरीब कुंटुंबास फराळ किट वाटप केले जात आहे. दिवाळी साऱ्यांसाठी उपक्रमातर्गंत हे किट दिले जात आहे. गावातील संबंधीत कुटुंबांच्या घरासमोर रात्री किट ठेवले जाते. थेट झोपडपट्टीत जाऊन पोहच केले जाते. अशाप्रकारे फराळ किट वाटप करताना कुठेही गाजावाजा केला जात नाही. शिवम प्रतिष्ठानचे जिल्हयातील सुमारे २०० कार्यकर्ते चार वर्षापासून वंचितांच्या घरी दिवाळी साजरी व्हावी, यासाठी धडपडतात. यंदाही दिवाळीच्या आधी आवाहन करून दानशूर लोकांकडून फराळ, अभ्यंगस्नानासाठीचा साबण, सुगंधी तेल, नविन कपडे संकलित केले. त्याचे किट तयार केले. दोन दिवसांपासून किट जिल्ह्यातील राधानगरी, वारणानगर, मुरगूड, शिरोळ परिसरातील ऊस तोडणी, वीट भट्टी, बांधकाम कामगारांच्या घरी जाऊन पोहच करीत आहेत. पुढील दोन दिवस वाटप सुरू राहणार आहे. शिवमचे कार्यकर्ते सोमनाथ यरनाळकर, डॉ. संतोष निकम यांच्या नेतृत्वाखाली कार्यकर्ते या कामात सक्रिय आहेत.
शिवसेना शहर कार्यालयातर्फे मातोश्री वृद्धाश्रमात फराळ वाटप करण्यात आले. यावेळी आश्रमातील आजीआजोबांसोबत शिवसेनेच्या शहर कार्यकर्त्यांनी मनमोकळा संवाद साधला. महालक्ष्मी अन्नछत्र सेवा ट्रस्टतर्फे समाजातील वंचित घटकांना दिवाळीचा आनंद देण्यासाठी विशेष उपक्रमाचे आायेजन करण्यात आले. एचआयव्ही बाधित मुलामुलींना अर्बन बँकेचे अध्यक्ष जयसिंगराव माने यांच्या हस्ते नवीन कपडे व फराळ वाटप करण्यात आले. यावेळी राजू मेवेकरी यांनी उपक्रमाबाबत मनोगत व्यक्त केले. यावेळी ट्रस्टचे पदाधिकारी उपस्थित होते. महाराष्ट्र पोलीस बॉइज संघटनेच्यावतीने ऊसतोडणी कामगार व वीटभट्टीवर काम करणाऱ्या कामगारांसह अनाथ व निराधारांना दिवाळीचा फराळ वाटप बुधवार दि. १८ ऑक्टोबर रोजी करण्यात येणार आहे. राजारामपुरी येथील १२ वी गल्ली येथे सकाळी साडेदहा वाजता हा उपक्रम होणार आहे.
मोबाइल अॅप डाउनलोड करा आणि राहा अपडेट
