कोल्हापूर : कंदील, झगमगत्या दिव्यांनी उजळलेली बाजारपेठ आणि पावसाच्या शक्यतेने छत्री, रेनकोटची सोबत घेऊन सुरू असलेली खरेदी अशा चित्राने दिवाळीच्या आगमनाची चाहूल दिली. दिवाळी निमित्त बाजारपेठांमधील उलाढालीला चांगलीच चालना मिळाली दोन आठवड्यांपासून तेजीत असलेल्या धान्य बाजारपेठेनंतर आता कपडे, इलेक्ट्रॉनिक्स वस्तू, वाहने, सोन्याच्या बाजारातील उलाढालीला वेग आला आहे. नवीन कपडे खरेदीसाठी बाहेर पडलेल्या नागरिकांमुळे रेडीमेड कपड्यांबरोबर साड्यांची दुकाने दिवसभर गर्दीने ओसंडून वाहत आहेत. पाडव्याच्या मुहुर्तावर गृहोपयोगी इलेक्ट्रॉनिक्स वस्तू तसेच वाहन व सोने खरेदीची तयारी आतापासूनच चालवली असल्याने या आठवड्यामध्ये दिवाळी निमित्ताने होणाऱ्या कोट्यवधींच्या उलाढालीला प्रारंभ झाला आहे. अधिकाधिक ग्राहकांना आकृष्ट करण्यासाठी मोठ्या डिलर्सपासून छोट्या दुकानामध्ये विविध ऑफर्स जाहीर करण्यात आल्या आहेत.
दिवाळीसाठी फराळ तयार करण्यासाठी आवश्यक असलेल्या साहित्यासाठी धान्य बाजारात खरेदीसाठी मोठी गर्दी झाली होती. किरकोळ व्यापाऱ्यांकडूनही खरेदीसाठी गर्दी झाल्याने दोन आठवडे लक्ष्मीपुरीतील धान्य बाजार फुलून गेल्याचे चित्र होते. गेल्या वर्षीच्या तुलनेत हरभरा डाळ, खोबरे यांचे दर वाढलेले असतानाही त्याची अपेक्षित खरेदी झाल्याचे व्यापाऱ्यांकडून सांगण्यात आले. दिवाळीनिमित्त रेडीमेड कपडे खरेदी करण्याचा कल वाढत चालला असल्याने राजारामपुरी, महाद्वार रोड, लक्ष्मी रोड यासारख्या कपड्यांच्या बाजारपेठांमध्ये गेल्या आठवड्यापासून वर्दळ वाढली आहे. सायंकाळी पडणाऱ्या पावसामुळे अनेकजणांनी दिवसभरात खरेदी करण्याचा मार्ग अवलंबल्याने कपड्यांच्या दुकानांमध्ये दिवसभर गर्दी दिसत आहे. रेडीमेड कपड्यांबरोबरच साड्यांच्या दुकानांमध्येही गर्दी हटत नसल्याचे चित्र आहे. यामुळे दुकानदारांनीही जादा कर्मचारी नेमण्याबरोबरच रात्री उशिरापर्यंत दुकाने सुरू ठेवण्याचा मार्ग अवलंबला आहे. आकाशकंदील, रांगोळी, विद्युत रोषणाईसाठी लागणाऱ्या माळा, विविध प्रकारची फुले अशा किरकोळ बाजारातही तेजी असून गेल्यावर्षीच्या तुलनेत दरांमध्ये थोडी वाढ झाली आहे. छोट्या आकाशकंदीलांची मागणीही कायम असल्याने चाळीस रुपयांपासून ८० रुपयांपर्यंत डझन मिळत असलेले आकाशकंदील नागरिकांच्या पसंतीस पडत आहेत.
इलेक्ट्रॉनिक्स वस्तूंची बाजारपेठ सज्ज
कपड्यांच्या बाजारपेठेबरोबरच सध्या इलेक्ट्रॉनिक्स वस्तूंची बाजारपेठही नवनवीन वस्तूंनी सजली आहे. फ्रीज, वॉशिंग मशिन, टीव्ही, एसीसारख्या वस्तूंबरोबर मोबाइल, लॅपटॉप, साउंड सिस्टिमलाही मोठी मागणी आहे. या साऱ्या वस्तूंच्या कंपन्यांनी विविध ऑफर्स आधीच जाहीर केल्याने त्यादृष्टीने नागरिकांनी यंदा पाडव्याच्या मुहुर्तावर नवीन वस्तू घरी नेण्याचे ठरवले आहे. तीन दिवसच हातात असल्याने व बँकांना सुटी असल्याने त्यासाठीचे डाउनपेमेंट, कागदपत्रांची पुर्तता व वस्तू निवडून ठेवल्या जात आहेत. सध्या दुकानांमध्ये त्याचीच धावपळ सुरू असून बुकींग जोरात सुरू आहे. तर ऑफर्समध्ये काही वस्तूंचे पॅकेज दिली आहेत. त्यामध्ये कोणकोणत्या वस्तू आपल्याला आवश्यक आहे हे पाहून सवलतीत वस्तू खरेदी करण्याचा कल अनेकांचा दिसून येत आहे. मोबाइल, लॅपटॉपसारख्या इलेक्ट्रॉनिक्स वस्तूंसाठी ठिकठिकाणची शोरुम पाहिली जात आहेत. यामध्ये मोठमोठ्या ऑफर्स सुरू आहेत.
सराफ कट्ट्यावर
तयारी पाडव्याची
पाडव्याच्या मुहुर्तावर छोटा दागिना खरेदी करण्याची मानसिकता अनेकांची असते. त्यामुळे ज्वेलरी दुकानांमध्ये नवनवीन दागिन्यांचे प्रकार पाहण्यास मिळत आहेत. दर स्थिर आहेत. त्यामुळे दसऱ्यानंतर पाडव्यासाठी खरेदी होण्याच्या अपेक्षेने सराफ व्यावसायिकांनी तयारी केली आहे. यापूर्वी दसरा सण आणि त्याआधाचीही मार्केटमध्ये फारशी हालचाल नव्हती असे व्यावसायिकांचे म्हणणे आहे. त्यामुळे आता दिवाळी पाडव्याचा मुहूर्त साधण्याची लगबग सुरू आहे.
वाहन खरेदीसाठी बंपर ऑफर्स
वाहन खरेदीच्या क्षेत्रातही मोठी उलाढाल होणार असून कंपन्यांकडून दिल्या जाणाऱ्या विविध ऑफर्सबरोबर डिलर्सही काही ऑफर्स देत आहेत. त्यामुळे दुचाकी खरेदी केली जात असताना कंपनीबरोबरच ऑफर्सचाही विचार केला जात आहे. पाडव्यासाठी नवीन दुचाकी व चारचाकी घरी घेऊन जाण्यासाठी बहुतांश ठिकाणी वाहने यापूर्वीच बुकींग करुन ठेवण्यात आली आहेत. काही कंपन्यांनी दिवाळीच्या सणासाठी विशेष व्याज दर जाहीर केला आहे तर रोख रकमेच्या सवलतीबरोबर काही अॅक्सेसरीजमधून ग्राहकांना जास्तीत जास्त लाभ देण्याचा प्रयत्न चालवला आहे. यामुळे या क्षेत्रात चांगली उलाढाल होईल, अशी अपेक्षा आहे.
सणानिमित्ताने मोबाइल मार्केटमध्ये मोठी उलाढाल होत असते. त्याप्रमाणे रविवारपासूनच खरेदी सुरू झालेली आहे. सध्या होत असलेली खरेदी पाहता पाडव्याच्यानिमित्ताने मोठी उलाढाल होण्याची चिन्हे दिसू लागली आहेत. त्यामुळे विविध व्हरायटी बाजारात आली आहे. त्याला ग्राहकांचा, जास्तीत जास्त तरुणाईचा प्रतिसाद मिळत आहे.
प्रभू मखिजा, डायरेक्टर, हिरापन्ना
गेल्या काही महिन्यांपासून सोने बाजारातील उलाढाल अपेक्षेप्रमाणे नाही. दसऱ्यामध्येही तशी मोठी उलाढाल जाणवली नाही. दिवाळीच्यानिमित्ताने पाडव्याला मात्र सोन्याची खरेदी होईल व बाजाराला झळाळी येईल, अशी अपेक्षा आहे. त्यासाठी ग्राहकांना आवडतील अशा व्हरायटी उपलब्ध करुन दिल्या आहेत.
प्रसाद कामत, तनिष्क
मोबाइल अॅप डाउनलोड करा आणि राहा अपडेट
