शहर गुन्हे अन्वेषण शाखेच्या पथकाने शहरातील एका हॉटेलवर धाड घालून जुन्या पाचशे आणि हजारच्या तीन कोटी अकरा लाख रुपयांच्या नोटा जप्त केल्या. या प्रकरणी पोलिसांनी सहा जणांना अटक केली आहे, अशी माहिती पोलिस उपायुक्त सीमा लाटकर यांनी पत्रकार परिषदेत दिली.
जुन्या पाचशे आणि हजारच्या नोटा दिल्यास त्या बदल्यात नवीन नोटा देऊ, असे सांगून हे सहा जण फसवणूक करीत असल्याची माहिती प्राथमिक तपासात समोर आली आहे.
पोलिसांना मिळालेल्या माहितीवरून रोहन रेसिडेंसी या हॉटेलवर छापा घालून पोलिस निरीक्षक गड्डेकर यांच्या नेतृत्वाखालील पथकाने ही कारवाई करून तीन कोटी अकरा लाखांच्या पाचशे हजारच्या नोटा जप्त करून सहा जणांना अटक केली. अरविंद पुंडलिक तळवार (गोवा), सुहास अशोक पाटील (पुणे), रामा भैरू पाटील (हलगा, बस्तवाड), सद्दाम हुसेन शेख (मिरज), अनिल पटेल (गुजरात), अब्दुल नासिर मोहम्मद पाशा (भटकळ), अशी पोलिसांनी अटक केलेल्यांची नावे आहेत. रिझर्व्ह बँकेच्या अधिकाऱ्यांची आम्हाला ओळख असून, त्यांच्या मार्फत पाचशे आणि हजारच्या जुन्या नोटा बदलून देऊ, असे सांगून त्यांनी तीन कोटी अकरा लाखांची रक्कम गोळा केली होती. अनेक ठिकाणांहून नोटा गोळा करून आणून हे सहा जण रोहन रेसिडेंसीमध्ये राहिले होते. त्यांनी जुन्या नोटा कोणाकडून आणल्या याची माहिती अद्याप मिळालेली नाही. जुन्या नोटा कोठून आणल्या आणि या नोटांचे ते काय करणार होते, याचा तपास पोलिस करीत आहेत.
पोलीस उपायुक्त सीमा लाटकर यांनी कारवाई केलेल्या पोलिस पथकाचे अभिनंदन करून त्यांना बक्षीस देण्यात येणार असल्याचे सांगितले. पत्रकार परिषदेला गुन्हे विभागाचे पोलिस उपायुक्त अमरनाथ रेड्डी यांच्यासह वरिष्ठ पोलिस अधिकारी उपस्थित होते.
मोबाइल अॅप डाउनलोड करा आणि राहा अपडेट
