. टा. वृत्तसेवा, मिरज
जून महिना संपून जुलैचा पहिला आठवडा संपला तरी पावसाने ओढ दिल्याने खरीप हंगाम पेरण्या रखडल्या आहेत. मिरज, तासगाव, कवठेहाकाळ, जत, खानापूर, आटपाडी, पलूस, कडेगाव, वाळवा आणि शिराळा या दहाही तालुक्यात अपवाद वगळता समाधानकारक पाऊस झाला नाही. त्यामुळे सांगली जिल्ह्यात सरासरी ४० ते ४४ टक्के इतक्याच पेरण्या झाल्या असून, सुमारे ६० टक्के क्षेत्र कोरडेच राहण्याची भिती आहे. येत्या आठवडाभरात पाऊस पडला नाही तर सर्व खरीप हंगामच वाया जाण्याची भिती शेतकरी व्यक्त करीत आहेत.
मान्सूच्या सुरुवातीला अपवाद वगळता काही भागात पाऊस थोडाफार पडला. नंतर मात्र पावसाने पाठ फिरवल्याने शेतकरी चिंतेत सापडला आहे. यंदा तरी पाऊस वेळेत आणि समाधानकारक पडेल असा वेधशाळेने अंदाज व्यक्त केला होता. त्याप्रमाणे जून महिना संपून जुलैचा दुसरा आठवडा सुरु झाला मात्र पाऊसाने अपेक्षित सुरूवात केली नाही. सुरुवातीला थोडाफार पाऊस पडल्याने शेतकऱ्यांची मशागतीच्या कामाने वेग घेतला. मशागतीपाठोपाठ शेतकऱ्यांनी पेरण्याची धांदल सुरू केली. मिरज तालुक्यात सुमारे ४४ हजार हेक्टर खरीप क्षेत्र आहे. ज्वारी, बाजरी, सोयाबीन, तसेच मूग, चवळी, उडीद आदी पिके घेतली जातात. मिरज पूर्व भागात जूनच्या पहिल्या पंधरवड्यात होणाऱ्या पेरण्या लांबल्या आहेत. केवळ ४० टक्केच पेरण्या झाल्या आहेत. काही शेतकऱ्यांनी पेरण्या केल्या असल्या तरी पाऊसच नसल्याने शेतकरी हवालदिल झाले आहेत. तर शेतीची सर्व मशागत करून पाऊस कधी पडणार आणि पेरण्या कधी करायच्या या चिंतेत शेतकरी आहे.
कवठेमहांकाळ तालुक्यात २४ हजार २७५ हेक्टर खरीप पीकांचा आराखडा कृषी विभागाने तयार केला आहे. तरीही ५० टक्क्यांपेक्षा कमी म्हणजे १२ हजार १४० हेक्टर क्षेत्रात पेरणी झाली आहे. ज्वारी, बाजरी, मका, सोयाबीन, मूग, उडीद, तूर या सारख्या पिकांची पेरणी केली असली तरी येत्या चार-आठ दिवसांत पाऊस झाला नाही, तर मात्र शेतकऱ्यांना मोठा भुर्दड बसणार आहे. आजही तालुक्यातील ४६ हजार लोकांना टॅँकरने पाणी पुरवठा केला जात आहे. पावसाने ओढ दिली तर आणखी टॅँकर वाढवण्याची गरज भासण्याची शक्यता आहे.
जत तालुक्यात वरुण राजाने अपेक्षित कृपादृष्टी न दाखवल्याने शेतकऱ्यांच्या तोंडचे पाणी पळाले आहे. या खरीप हंगामात जवळपास ७० टक्के शेतकऱ्यांनी पेरण्या केल्या आहेत. पण पाऊसच नसल्याने दुबार पेरण्या करून तरी पिके तग धरतील का? या चिंतेत आहेत. तासगाव तालुक्यातील ४३ हजार हेक्टर क्षेत्रापैकी अवघ्या साडेबारा हजार हेक्टर क्षेत्रात पेरण्या झाल्या आहेत. पावसाने अबोला धरल्याने शेतीबरोबर पिण्याच्या पाण्याचेही संकट वाढण्याची शक्यता आहे. विहिरीतील पाण्याची पातळी खाली गेली असून, तालुक्यातील अपवाद वगळता तलावातील पाण्याचा साठाही झपाट्याने कमी होत असल्याने शेतकरी व्यथित झाला आहे. खानापूर-आटपाडीमध्येही पाऊस नसल्याने शेतकऱ्यांसमोर दुबार पेरणीचे संकट निर्माण झाले आहे. कडेगाव-पलूस तालुक्यातही ५० टक्के पेरण्या झाल्या आहेत. पावसाच्या अपेक्षेने शेतकऱ्यांनी खरीप पेरण्या केल्या असल्या तरी मेघराजाने डोळे वटारल्याने शेतकरी चिंतातूर दिसत आहे.
शिराळा तालुक्यात जूनमध्येच पेरण्यांची धांदल सुरू असते. कोकण पट्याजवळील भाग असल्याने अधूनमधून पाऊस पडतो. मात्र, पावसाचे प्रमाण कमी असल्याने पिकांची वाढ खुंटली आहे. सुमारे २८ हजार हेक्टर क्षेत्रात पेरण्या झाल्या आहेत. यात मोठ्या प्रमाणात भात पिक पेरणी केली आहे. उर्वरित क्षेत्रात मका, नाचणी, उडीद, सोयाबीन, आदी पीकांची पेरणी करण्यात आली आहे.१५० गावांना टँकरने पाणीपुरवठा
जुलैचा दुसरा आठवडा सुरू झाला आहे. मात्र, अजूनही पाऊस पडण्याची चिन्हे दिसत नाहीत. उन्हाळ्यात सुरू केलेले पाण्याचे टॅँकर अद्याप सुरूच आहेत. येत्या आठवडाभरात पाऊस पडलाच नाही तर परिस्थिती अतिशय कठीण होण्याची शक्यता आहे. जत, कवठेमहाकाळ, तासगाव, खानापूर आणि आटपाडी तालुक्यात समारे दीडशेहून अधिक गावांना टॅँकरच्या माध्यमातून पाणीपुरवठा करावा लागत आहे. तसेच वाड्यावस्त्यावरही पाणीपुरवठा करावा लागत आहे.
मोबाइल अॅप डाउनलोड करा आणि राहा अपडेट
