म. टा. प्रतिनिधी, कोल्हापूर
कोल्हापूर जिल्हा परिषदेच्या अध्यक्षपदासाठी कुणाला पाठिंबा द्यायचा, यावरुन गेले अनेक दिवस चर्चा होऊनही शिवसेनेत सोमवारी अखेर फूट पडली. सेनेत उभी फूट पडल्याने प्रचंड चुरस निर्माण झाली आहे. अपेक्षेप्रमाणे शिवसेनेच्या संजय मंडलिकांसह आमदार उल्हास पाटील, सत्यजित पाटील यांनी काँग्रेसला पाठिंबा जाहीर केला. तर आमदार चंद्रदीप नरके, डॉ. सुजित मिणचेकर आणि संजय घाटगे गटाने भाजपसोबत जाण्याचा निर्णय घेतला. या दोन्ही गटाकडे प्रत्येकी पाच सदस्य आहेत. त्यामुळे चुरस वाढली आहे. मंगळवारी (ता. २१) दुपारी तीन वाजता अध्यक्षपदाची निवड होणार आहे.
माजी मंत्री प्रकाश आवाडे, स्वाभिमानी संघटना आणि सेनेच्या पाच सदस्यांमुळे भाजपचे पारडे जड झाले असले तरीही आवाडे आणि नरकेंना सोबत ठेवण्यासाठी प्रसंगी उमेदवार बदलण्याची तयारी काँग्रेसने दाख‍विली तर ऐनवेळी काहीही होऊ शकते. या पार्श्वभूमीवर सोमवारी दिवसभर सत्तेचे पारडे दोलायमान राहिले. शेवटच्या क्षणापर्यंत संख्याबळ बदलण्याची चिन्हे आहेत.
जि. प. अध्यक्षपदाच्या निवडणुकीत भाजपने ३८ तर काँग्रेसने ३५ संख्याबळाचा दावा केला आहे. अध्यक्षपदासाठी काँग्रेसकडून राहुल पाटील आणि भाजपकडून शौमिका महाडिक यांची उमेदवारी निश्चित झाली आहे. सोमवारी दिवसभर पालकमंत्री चंद्रकांत पाटील, माजी आमदार महादेवराव महाडिक, सुरेश हाळणवकर, विनय कोरे भाजपसाठी फिल्डिंग लावत होते. रेसिडन्सी क्लबमध्ये दिवसभर ठाण मांडून नेत्यांनी भाजपचे संख्याबळ वाढविण्यासाठी प्रयत्न केला. दुसरीकडे आमदार सतेज पाटील, पी. एन. पाटील आणि आमदार हसन मुश्रीफ यांनी सूत्रे हलविली. शिवसेनेचा निर्णय काय होतो, याबाबत उत्सुकता होती. सायंकाळी पाच वाजता सेनेने काँग्रेसला पाठिंबा जाहीर केला. पण तत्पूर्वीच सेनेचे आमदार चंद्रदीप नरके, सुजित मिणचेकर यांनी भाजपला जवळ केले होते. याची कल्पना असलेल्या संपर्कप्रमुखांनी सायंकाळनंतर कोल्हापूर सोडले.
शिवसेनेचे पाच सदस्य काँग्रेससोबत असले तरी अन्य पाचजण भाजपसोबत गेल्याने काँग्रेस-राष्ट्रवादीच्या अडचणी वाढल्या. सेना फुटल्यानंतर आवाडे आणि स्वाभिमानीला सोबत घेण्यासाठी दोन्ही बाजूने प्रयत्न सुरू झाले. आवाडेंना गाठण्यासाठी दोन्हीकडून फिल्डिंग लावण्यात आली. आवाडेंनी भाजपसोबत जाण्याचा निर्णय जाहीर केला. आवाडेंच्या निर्णयाने सत्तेचे पारडे फिरले. यामुळे आमदार मुश्रीफ यांनी सक्रिय होत आवाडेंची मनधरणी सुरू केली. त्यासाठी रात्री त्यांनी इचलकरंजीही गाठली. खासदार राजू शेट्टी परगावी आहेत. त्यांनी अजूनही निर्णय जाहीर केला नाही. मात्र त्यांचे दोन सदस्य भाजपसोबत राहतील, अशी माहिती आवाडे यांनी दिली. अपक्ष रसिका पाटील याही भाजपसोबत असल्याने या आघाडीचे पारडे जड झाले. तरीही काँग्रेसचा उमेदवार बदलल्यास हे पारडे ऐनवेळी फिरण्याची शक्यता आहे. कारण राहुल पाटील यांच्या उमेदवारीला विरोध करून नरके, आवाडे भाजपसोबत गेले. उमेदवारी बदलल्यास ते काँग्रेससोबत येण्याची चिन्हे आहेत. यामुळे मंगळवारी दुपारपर्यंत अध्यक्षपदाची अनिश्चितच कायम आहे.
०००
............
भाजपचे पारडे जड ः कमळ फुलण्याची शक्यता
कोल्हापूर ः भाजपने ३८ संख्याबळ असल्याचा दावा केला असला तरी साधारणतः ३६ सदस्य या आघाडीकडे असल्याचे खात्रीलायक वृत्त आहे. यात भाजप १४, जनसुराज्य ६, शिवसेना ५, स्वाभिमानी २, कोल्हापूर जिल्हा ताराराणी आघाडी २, चंदगड विकास आघाडीचे २ सदस्य आहेत. एका अपक्षही गळाला लागला आहे. यामुळे रात्री भाजपचे पारडे जड झाल्याने शौमिका महाडिक यांच्या अध्यक्षपदाचा मार्ग मोकळा झाला आहे. मात्र काँग्रेसकडे असलेले संख्याबळ रात्री ३२ पर्यंत खाली आले. आवाडे, स्वाभिमानी आणि शाहू आघाडीच्या एका सदस्यामुळे काँग्रेसचे संख्याबळ घटले. उमेदवार बदलूनही काही फरक पडेल का, याची चाचपणी रात्री काँग्रेसने सुरू केली. मात्र तोपर्यंत हातातील मतेच भाजपकडे गेल्याने काँग्रेसच्या प्रयत्नावर मर्यादा येणार आहेत.
सत्तेचे किंगमेकर
दोन्ही काँग्रेसकडे २५ तर भाजपकडे हक्काची २३ मते आहेत. अध्यक्षपदासाठी उर्वरित सदस्य मिळवण्यासाठी दोन्हीकडून दिवसभर प्रचंड घडामोडी घडल्या. तासातासाला संख्याबळ बदलत होते. त्यामुळे सत्तेचे पारडे फिरत होते. ते फिरवण्यात शिवसेना, कोल्हापूर जिल्हा ताराराणी आघाडी, स्वाभिमानी आघाडीवर होते. त्यांची भूमिका सतत बदलत होती. सत्तेच्या बाजूने राहण्याचा त्यांचा आग्रहच वातावरण बदलवत होता. सायंकाळनंतर आवाडेंचा भाजपसोबत जाण्याचा निर्णय झाला आणि भाजपचे पारडे जड झाले. कारण आमदार नरके गटाचे तीन सदस्य भाजपला मदत करणार हे निश्चित होते. अपक्ष रसिका पाटील या व्ही. बी. पाटील यांच्या सून आहेत. ‘व्हीबीं’चा दोन्ही काँग्रेसवर राग आहे. ताराराणी आघाडीचे दोन सदस्य फोडण्यात काँग्रेसला यश आले होते. पण, रात्री उशिरा त्यांना पुन्हा तंबूत आणण्यात भाजपला यश आल्याचा दावा करण्यात आला.
तीन वाजेपर्यंत बदलत राहणार
मंगळवारी दुपारी तीन वाजता अध्यक्षपदाची निवड होणार आहे. त्यामुळे तोपर्यंत तासातासाला पारडे बदलत जाण्याची शक्यता आहे. काहीही करून सत्ता आणण्याचे दोन्हीकडून प्रयत्न सुरू आहेत. राहुल पाटील यांची उमेदवारी काँग्रेसला अडचणीची ठरत आहे. कारण त्यांच्या उमेदवारीला विरोध करत आवाडे व नरके भाजपसोबत जात आहेत. ऐनवेळी उमेदवारी बदलल्यास नरके भूमिका बदलू शकतात. खासदार शेट्टी यांचा भाजपवर राग आहे. पण, आमदार उल्हास पाटील काँग्रेससोबत गेल्याने ते भाजपबरोबर राहण्याची चिन्हे आहेत. मात्र तेही शेवटच्याक्षणी काहीही आदेश देऊ शकतात. यामुळे शेवटच्या क्षणापर्यंत सत्तेचे पारडे फिरत राहण्याची चिन्हे आहेत.
..........
आवाडेंना उपाध्यक्षपद
भाजपला मदत करण्याची भूमिका घेणाऱ्या आवाडे गटाला उपाध्यक्षपद देण्यात येणार असल्याचे समजते. यामुळे जनसुराज्यला सभापतिपद मिळेल, असे कळते. सव्वा वर्षाचा फॉर्म्युला ठरल्यास पुढीलवेळी जनसुराज्यला हे पद देण्याबाबत चर्चा झाली.
नेत्यांची घालमेल
क्षणाक्षणाला बदलत जाणाऱ्या संख्याबळामुळे दिवसभर अनेक नेत्यांची घालमेल होत होती. पालकमंत्री चंद्रकांत पाटील, आमदार सुरेश हाळवणकर, अमल महाडिक, पी. एन. पाटील, सतेज पाटील, हसन मुश्रीफ हे दिवसभर या प्रक्रियेत होते. चर्चेचे ठिकाण बदलत होते. नेते बदलत होते. निर्णय होत नसल्याने अस्वस्थता वाढत होती.
हालचालीचे केंद्र
ताराबाई पार्कातील आमदार हसन मुश्रीफ यांचे घर, कोल्हापुरातील प्रकाश आवाडे यांचे घर, रेसिडन्सी क्लब (भाजप), अजिंक्यतारा (काँग्रेस) या ठिकाणी दिवसभर बैठकांच्या फेऱ्या होत राहिल्या. नेत्यांच्या बैठकांत काय निर्णय होतो, याकडे कार्यकर्त्यांच्या नजरा लागल्या होत्या.
मोबाइल अॅप डाउनलोड करा आणि राहा अपडेट
