जीपने दोन महिलांना चिरडले

February 25, 2017, 1:30 pm

≫ Next: जुळ्यांच्या फिंगरप्र‌िंट वेगळ्याच

≪ Previous: कॉँग्रेसमध्ये राजीनामा सत्र

$

0

0

म. टा. वृत्तसेवा, शाहूवाडी

कासार्डे येथील धोपेश्वर देवस्थानापासून दोनशे मीटर अंतरावर ब्रेकफेल झालेल्या जीपने रस्त्याकडेने जाणाऱ्या यात्रेकरूंना चिरडल्याने दोन महिलांचा मृत्यू झाला. एका स्कॉर्पिओ आणि इंडिका मोटारीला धडक देऊन जीप रस्त्याकडेच्या ओढ्यात उलटली. शनिवारी सकाळी झालेल्या या विचित्र अपघातात अन्य २० भाविक गंभीर जखमी झाले. शाहूवाडी पोलिस ठाण्यात अपघाताची नोंद झाली आहे.

सुलाबाई महादेव पाटील (वय ६०, रा. शिरगाव, ता. शाहूवाडी) आणि आक्काताई धोंडू कांबळे (वय ६२, रा. ओकोली, ता. शाहूवाडी) अशी मृतांची नावे आहेत. यात्रेच्या वेळी असलेल्या गर्दीत झालेल्या या अपघाताने परिसरात गोंधळ उडाला.

शनिवार (ता. २५) कासार्डेतील धोपेश्वर (ता. शाहूवाडी) देवस्थानाची यात्रा होती. यात्रेला महाराष्ट्रासह कर्नाटकमधून भाविक देवदर्शनासाठी आले होते. देवदर्शन आटोपून भाविकांना घेऊन परतणाऱ्या क्रूझर जीपचा (केए २६-४५११) ब्रेक निकामी झाला. चालक धोंडू बाबू येडगे (कर्नाटक) याचा गाडीवरील ताबा सुटल्याने भरधाव क्रूझरने रस्त्याच्या बाजूने चालणाऱ्या यात्रेकरूंना अक्षरशः चिरडले. जीप तशीच पुढे गेली. याचवेळी देवदर्शन करून कुटुंबासह परत चाललेल्या अमोल कोळी (रा. भावले, ता. हातकणंगले) यांच्या स्कॉर्पिओतून जीपने पाठीमागून धडक दिली. स्कॉर्पिओ (एमएच २४ व्ही ४११) रस्त्यालगतच्या दरीत जाऊन झाडावर आदळली. त्यापुढील इंडिका कारला (एमएचबीएन ३५३२) धडकून क्रूझर रस्त्याकडेला उलटली.

दरम्यान, यात्रेनिमित्त देवदर्शनासाठी आलेल्या भाविकांची रस्त्यावर गर्दी होती. अशावेळी भरधाव जीपने भाविकांना धडक देऊन जखमी केले.

अपघातात सचिन बाळू पाटील (रा. कडवे, ता. शाहूवाडी), संदीप मारुती देसाई (३२ शिराळा), प्रदीप दगडू पाटील (रा. पेरीड), विठू बाबू कुंभार, बिरू नवलू एडगे, धोंडू बाबू येडगे ( सर्व रा. कर्नाटक), सुभाष बाळू इंगवले (रा. इंगवलेवाडी), आदित्य सतीश पाटील, शंकर पाटील, भिकू नायकू पाटील आदींसह २० जण जखमी झाले. त्यांच्यावर मलकापूर ग्रामीण रुग्णालयात उपचारानंतर तातडीने कोल्हापूरला सीपीआर हॉस्पिटलमध्ये उपचारसाठी पाठविण्यात आले.

स्कार्प‌िओ अडकली झाडात

जीपने पाठीमागून धडक दिलेल्या स्कॉर्पिओत भादोली येथील कोळी कुटुंबीय केवळ दैव बलवत्तर म्हणून बचावले. दरीच्या दिशेने निघालेली ही स्कॉर्पिओ झाडाला धडकून अडकल्याने त्यांचे प्राण वाचले.

मोबाइल अॅप डाउनलोड करा आणि राहा अपडेट

---

जुळ्यांच्या फिंगरप्र‌िंट वेगळ्याच

February 26, 2017, 2:57 pm

≫ Next: घडणार एकजुटीचे दर्शन

≪ Previous: जीपने दोन महिलांना चिरडले

$

0

0

संशोधनातील निष्कर्ष

म. टा. प्रतिनिधी, कोल्हापूर

हुबेहूब सारख्या दिसणाऱ्या जुळ्यांचे रक्तगट, जनुकीय साम्य असले तरी त्यांच्या हस्तरेषांमध्ये फरक असतो, असे महत्त्वाचे संशोधन येथील पत्की हॉस्प‌िटल आणि रिसर्च फाउंडेशन आणि डी. वाय. पाटील हॉस्पिटलच्या शरीरशास्त्र विभागाने केले आहे. गेली दोन वर्षे केलेल्या संशोधनास राष्ट्रीय मान्यता मिळविणारा हा देशांतर्गत पहिलाच प्रकल्प असल्याचे प्रसिद्ध स्त्रीरोग तज्ज्ञ डॉ. सतीश पत्की यांनी पत्रकार सांगितले. यावेळी गेल्या २५ वर्षामध्ये पत्की हॉस्पिटलमध्ये जन्माला आलेल्या जुळी व तिळी मुले-मुली उपस्थित होते.

डॉ. पत्की म्हणाले, ‘दोन वर्षांपूर्वी स्नेहमेळाव्यादरम्यान माहिती संकलन करताना २८ जुळी व एक तिळी मुले दिसण्यास हुबेहूब दिसत असल्याचे आढळून आले. त्या मुलांच्या रक्तगटाचा अभ्यास केल्यानंतर सारखाच असल्याचे निदर्शनास आले. आयडेंटिकल जुळ्यांमध्ये तंतोतंत जनुकीय साम्य असल्यामुळे अशा जुळ्या भावंडांच्या हस्तठशांमध्ये तंतोतंत साम्य असते का? त्यामुळे व्यवहारामध्ये व्यक्ती ओळखीमध्ये काही चूक होण्याची शक्यता आहे का? हे पडताळण्यासाठी मे २०१४ पासून संशोधनास सुरुवात झाली. मी स्वत:, शरीरशास्त्र तज्ज्ञ डॉ. अनिता गुणे, डॉ. आनंद पोटे यांनी गेली दोन वर्षे हे संशोधन केले. या प्रकल्पांतर्गत पत्की हॉस्पिटलमध्ये जन्म झालेल्या व विविध वयोगटातील २८ आयडेंटिकल जुळ्यांच्या बोटांचे तसेच दोन्ही हातांचे ठसे घेण्यात आले. या ठशांचा अभ्यास लेन्सद्वारे शरीरशास्त्रज्ञांतर्फे करण्यात आला. या संशोधनामध्ये मुख्यतः चार प्रकारच्या ठेवणींचा अभ्यास करण्यात आला. गर्भावस्थेत असताना अवघ्या ३ ते ५ महिन्यांच्या कालावधीमध्ये तळहात व बोटांवरील रेषा निर्माण होतात, त्यानंतर त्या कधीच बदलत नाहीत. या संशोधनाचे निष्कर्ष ठशांमधील बारकाव्यांवर आधारित आहे. आयडेंटिकल जुळ्यांमध्ये दिसण्यामध्ये साम्य, त्यांचा रक्तगट एक व त्यांच्यामधील जनुकीयदेखील तंतोतंत असले तरी त्यांच्या फिंगर प्रिंटमध्ये फरक असतो. गर्भाशयातील गर्भजलाच्या सूक्ष्म वातावरणामधील तफावतींमुळे अशा जुळ्यांमधील प्रत्येक व्यक्तीचे ठसे हे वेगळे व स्वतंत्र निर्माण होतात. त्यामुळे बायोमेट्रीमध्ये व्यक्ती ओळखीमध्ये फसगत होऊ शकत नाही. हे संशोधन राष्ट्रीय स्तरावरील नॅशनल जर्नल ऑफ क्लिनिकल अॅनॉटॉमी या नियतकालिकामध्ये एप्रिलमध्ये प्रसिद्ध होणार आहे. यावेळी डॉ. उज्ज्वला पत्की, डॉ. श्वेता पत्की, डॉ. अनिता गुणे, डॉ. आनंद पोटे व डॉ. विश्वनाथ भोसले उपस्थित होते.

मोबाइल अॅप डाउनलोड करा आणि राहा अपडेट

घडणार एकजुटीचे दर्शन

February 26, 2017, 3:01 pm

≫ Next: पाच लाखांचा ऐवज लंपास

≪ Previous: जुळ्यांच्या फिंगरप्र‌िंट वेगळ्याच

$

0

0

म. टा. प्रतिनिधी, कोल्हापूर

महिला शक्तीची एकजूट दाखविण्यासाठी आपल्या आवडत्या बाइकसोबत महिला दिन साजरा करण्याची संधी ‘महाराष्ट्र टाइम्स’ने उपलब्ध करून दिली आहे. जागतिक महिला दिनाच्या पार्श्वभूमीवर रविवारी (५ मार्च) वुमेन्स बाइक रॅलीच्या माध्यमातून महिला शक्ती आणि एकजुटीचे अनोखे दर्शन कोल्हापूरकरांना होणार आहे. सकाळी आठ वाजता पेटाळा मैदान येथून रॅलीला सुरुवात होणार आहे.

रॅलीमध्ये सहभागी होणाऱ्या सर्व महिला, युवतींना प्रमाणपत्र देण्यात येणार आहेत. तसेच विविध स्पॉट गेम्सचेही आयोजन केले आहे.

कोल्हापुरात ‘महाराष्ट्र टाइम्स’तर्फे गेली तीन वर्षे महिला बाइक रॅली आयोजित केली जाते. या रॅलीला मिळणाऱ्या उत्स्फूर्त प्रतिसादामुळे यावर्षीही बाइक रॅलीचे आयोजन केले आहे. रॅलीत कॉलेजमधील एनएसएस व एनसीसीमधील विद्यार्थिनी कॅडेट्स युनिटच्या वेशभूषेत सहभागी होणार आहेत. त्यानंतर महिला शक्तीचा गजर करत रॅली मार्गस्थ होईल. त्यानंतर राजाराम कॉलेजपर्यंतच्या रस्त्यावर फक्त महिलांच्या एकजुटीचा प्रवास होणार आहे.

‘मटा बाइक राइड’च्या निमित्ताने महिलांच्या स्वावलंबनाचे दर्शन घडविणाऱ्या या रॅलीविषयी कोल्हापूरकरांमध्ये उत्सुकता आहे. ‘मटा’च्या याआधी आयोजित विविध उपक्रमांना जोरदार प्रतिसाद मिळाला आहे. तसाच प्रतिसाद ‘महाराष्ट्र टाइम्स वुमेन्स बाइक रॅली’लाही मिळेल यात शंका नाही. जागतिक महिला दिनानिमित्ताने रविवारी (ता. ५) बाइक रॅलीच्या माध्यमातून महिला शक्तीचे, त्यांच्या एकजुटीचे अनोखे दर्शन होणार आहे.

रॅलीसाठी शहर आणि परिसरातील विविध कॉलेजच्या विद्यार्थिनी, युवती व महिला संघटना, नोकरी, व्यवसायात कार्यरत महिलाही उत्स्फूर्तपणे सहभाग नोंदवत आहेत. कोल्हापुरात दुचाकी चालविणाऱ्या पहिल्या पिढीचे प्रतिनिधित्व करणाऱ्या, पण तरीही वेळ पडली तर अजूनही बाइक काढू शकणाऱ्या यंग सीनिअर महिलांनाही सलाम करण्यासाठी महिला बाइक रॅलीचे व्यासपीठ दिले आहे.

बाइक रॅलीमध्ये सहभागी होणाऱ्या महिला व ग्रुपसाठी यावर्षीही खास स्पर्धा होणार आहेत. यामध्ये बेस्ट ड्रेस, बेस्ट हेल्मेट, बेस्ट बाइक सजावट, बेस्ट सामाजिक संदेश आणि ग्रुपसाठी बेस्ट ड्रेसकोड या स्पर्धा होणार आहेत. विजेत्या महिला व ग्रुपसाठी आकर्षक बक्षीस देण्यात येणार आहे.

बाइक रॅलीमध्ये सहभागी होणाऱ्या महिला व ग्रुपसाठी एसएमएसद्वारे नोंदणीची सुविधा उपलब्ध करून देण्यात आली आहे. महिलांनी एसएमएस BIKERALLYKOL to 58888 या क्रमांकावर पाठवावेत, असे आवाहन करण्यात आले आहे. किंवा http://allwomenbikerally.com या वेबसाइटवरही आपण बाइक रॅलीत सहभागी होण्यासाठी नोवनोंदणी करू शकता.

मोबाइल अॅप डाउनलोड करा आणि राहा अपडेट

पाच लाखांचा ऐवज लंपास

February 26, 2017, 3:02 pm

≫ Next: भाजपच पक्ष फोडतोय...

≪ Previous: घडणार एकजुटीचे दर्शन

$

0

0

ताराबाई पार्कात डॉक्टरांच्या घरी भर दुपारी चोरी

म. टा. प्रतिनिधी, कोल्हापूर

ताराबाई पार्क येथील गजबजलेल्या शासकीय विश्रामगृहाच्या समोर रिट्रीट अपार्टमेंटमध्ये रविवारी (ता. २६) दुपारी चोरट्यांनी डॉ. धीरज भागवत महाजन यांचा फ्लॅट फोडून सोन्या-चांदीच्या दागिन्यांसह किमती डायमंट सेट असा सुमारे पाच लाखांचा ऐवज लंपास केला. महाजन यांनी याबाबत शाहूपुरी पोलिस ठाण्यात फिर्याद दाखल केली आहे.

ताराबाई पार्कातील शासकीय विश्रामगृहासमोरील रिट्रीट अपार्टमेंटच्या दुसऱ्या मजल्यावर डॉ. धीरज महाजन व त्यांची पत्नी डॉ. आभा महाजन हे दोघे आपल्या लहान मुलासह भाड्याने राहतात. रविवार सुटी असल्याने डॉ. धीरज सकाळी साडेअकराच्या सुमारास पत्नी व मुलाला घेऊन चित्रपट पाहण्यासाठी गेले होते. सायंकाळी चारच्या सुमारास महाजन कुटुंबीय घरी आल्यानंतर त्यांना मुख्य दरवाजाचा कडी-कोयंडा तोडलेला दिसला. त्यांनी आत जाऊन पाहिले असता बेडरुममधील दोन कपाटातील साहित्य विस्कटलेले होते. त्यातील डायमंट सेट, सोन्या-चांदीचे दागिने, रोख रक्कम असा सुमारे पाच लाख किंमतीचा ऐवज अज्ञात चोरट्यांनी लंपास केला होता. त्यांनी या प्रकाराची माहिती शेजाऱ्यांना आणि मित्रांना दिली. पोलिसांना याची माहिती मिळताच शहर पोलिस उपअधीक्षक भारतकुमार राणे, शाहूपुरी पोलिस ठाण्याचे निरीक्षक प्रवीण चौगुले आदींनी घटनास्थळी जाऊन पाहणी केली. भरदिवसा घरफोडी झाल्याने शहरात नाकाबंदी करण्यात आली.


गेल्या महिन्याभरात शहरात घरफोड्या, दुकानांचे शटर उचकटून चोरी करणे आणि चेन स्नॅचिंगचेही प्रमाण वाढले आहे. ताराबाई पार्कात भरदिवसा चोरट्यांनी फ्लॅट फोडल्याने पोलिस खडबडून जागे झाले आहेत. शहर पोलिस उपअधीक्षक राणे यांनी रविवारी तातडीने राजारामपुरी, शाहूपुरी, लक्ष्मीपुरी आणि शाहूपुरी पोलिस ठाण्यातील डीबी पथकांची बैठक घेतली.

मोबाइल अॅप डाउनलोड करा आणि राहा अपडेट

भाजपच पक्ष फोडतोय...

February 26, 2017, 2:31 pm

≫ Next: खंडपीठासाठी आग्रही

≪ Previous: पाच लाखांचा ऐवज लंपास

$

0

0

म. टा. प्रतिनिधी, कोल्हापूर

‘भाजपमध्ये राबणाऱ्या कार्यकर्त्यांची वानवा आहे. त्यामुळे तयार कार्यकर्त्यांवर त्यांचा डोळा असतो. कार्यकर्ते तयार करण्यास खूप वेळ लागलो. भाजपला इतरांच्या घरात डोकावण्याची सवय आहे, त्यामुळे ते कार्यकर्ते फोडण्याच्या भानगडी करतात’, असा टोला खासदार राजू शेट्टी यांनी रविवारी लगावला. पक्षाचे नेते, राज्यमंत्री सदाभाऊ खोत हे भाजपच्या वाटेवर असल्याच्या चर्चेबद्दल कोल्हापुरात पत्रकारांशी बोलत होते.

जिल्हा परिषदेच्या निवडणुकीनंतर स्वाभिमानी शेतकरी संघटनेचे नेते खासदार राजू शेट्टी आणि मंत्री सदाभाऊ खोत यांच्यात तणाव निर्माण झाला आहे. या वादावर पडदा टाकण्याचा प्रयत्न खासदार शेट्टी यांनी केला. शेट्टी म्हणाले, ‘सदाभाऊ खोत यांची गोफण संघटनेचे लचके तोडणाऱ्यांसाठी आहे. संघटनेचे नुकसान करण्यासाठी नाही. आम्ही दोघे गेली २० वर्षे चांगले मित्र आहोत. राजकारणात तात्विक भूमिका वेगळ्या असू शकतात. काही मुद्यांवरून मतभेद झाले असले तरीही मनभेद नाहीत. वैयक्तिक दुरावा नव्हताच. आजही नाही. मतमतांतरे हे चळवळीच्या जीवंतपणाचे लक्षण आहे. पक्षप्रमुख म्हणून माझी वक्तव्ये तत्कालिन संदर्भांवर अवलंबून होती.’ ‘दोन्ही नेत्यांमधील विसंवादाला भाजपचे नेते कारणीभूत होते का?’ या प्रश्नावर खासदार शेट्टी यांनी भाजपवर टोलेबाजीची संधी सोडली नाही. ते म्हणाले, ‘भाजप विस्तारवादी पक्ष आहे. त्यांच्याकडे स्वतःचे कार्यकर्ते नसल्याने ते इतरांच्या कार्यकर्त्यांना आमिष दाखवतात. त्यांना दुसऱ्यांच्या घरात डोकावायची सवय आहे.’

सांगली, कोल्हापूर जिल्हा परिषदेत कोणाला मदत करणार यावर भाष्य करणे त्यांनी टाळले. पंचायत समित्यांमधील आघाड्या, कार्यकर्त्यांशी चर्चा करूनच निर्णय घेऊ असे ते म्हणाले.

झेडपीसाठी दोन्हीकडून संपर्क

कोल्हापूर जिल्हा परिषदेत कोणत्याच पक्षाला बहुमत नाही. कॉँग्रेस-भाजपकडूनही सत्ता स्थापनेसाठी जुळवाजुळव सुरू आहे. भाजप आणि कॉँगेसच्या स्थानिक नेत्यांनी संपर्क साधला आहे. मात्र कार्यकर्त्यांशी चर्चेने कोणासोबत राहायचे याचा निर्णय घेऊ. सांगलीतील रयत विकास आघाडी आणि स्वाभिमानीचा निर्णयही चर्चेने होईल, असे खासदार शेट्टी म्हणाले.

मोबाइल अॅप डाउनलोड करा आणि राहा अपडेट

खंडपीठासाठी आग्रही

February 26, 2017, 2:29 pm

≫ Next: शहराला आगामी तीन महिने पाणी प्रदूषणाचा धोका

≪ Previous: भाजपच पक्ष फोडतोय...

$

0

0

पालकमंत्री चंद्रकांत पाटील यांची स्पष्टोक्ती

म. टा. प्रतिनिधी, कोल्हापूर

‘मुंबई उच्च न्यायालयाचे कोल्हापुरात खंडपीठ (सर्किट बेंच) व्हावे, असा स्पष्ट अहवाल विधी व न्याय विभागाच्या समितीने दिला आहे. हा अहवाल उच्च न्यायालयाला पाठविला आहे. मुख्य न्यायाधीश व मुख्यमंत्री देवेंद्र फडणवीस यांच्या नियोजित भेटीत हा विषय प्राधान्यक्रमाने मांडू’, असे आश्वासन पालकमंत्री चंद्रकांत पाटील यांनी दिले. रविवारी (ता. २६) शासकीय विश्रामगृहात सर्वपक्षीय खंडपीठ कृती समितीची पालकमंत्र्यांसोबत बैठक झाली.

पालकमंत्र्यांनी याबाबत महापालिकेने पाठविलेला जागा आरक्षण प्रस्ताव, बजेटमध्ये २०० कोटींच्या तरतुदीची मागणीही मुख्यमंत्र्यांपर्यंत पोहचवण्याचा शब्दही दिला. खंडपीठासाठी सुरू असलेल्या आंदोलनाकडे सरकारने दुर्लक्ष केल्याने खंडपीठ कृती समितीने पालकमंत्र्यांसोबत बैठकीचा आग्रह धरला होता.

ज्येष्ठ नेते डॉ. एन. डी. पाटील म्हणाले, ‘मुख्यमंत्री फडणवीस यांनी कोल्हापुरातील खंडपीठासाठी ११०० कोटी रुपये मंजूर केल्याचे जाहीर केले आहे. खंडपीठासाठी ठराव केला. मात्र पुण्याची मागणी याच ठरावात घुसडल्याने तांत्रिक अडचण निर्माण झाली आहे. आता न्याययंत्रणेकडे बोट दाखवणाऱ्या सरकारने येत्या अर्थसंकल्पात कोल्हापूरसाठी किमान २०० कोटी रुपयांची तरदूत करावी. खंडपीठासाठी ५० एकर जागा आरक्षित केल्याचा प्रस्ताव महानगरपालिकेने सरकारकडे पाठवला आहे. या प्रस्तावाला राज्य सरकारने मंजुरी द्यावी. मुंबई हायकोर्टाच्या मुख्य न्यायमूर्तींशी भेटून, माजी न्यायमूर्ती मोहित शहा यांच्या अहवालाच्या पूर्ततेचा आग्रह धारावा.’

यावर पालकमंत्री चंद्रकांत पाटील यांनी, आंदोलन संपण्याच्या मार्गावर असल्याचे सांगितले. पाटील म्हणाले, ‘कोल्हापुरातील खंडपीठासाठी राज्य सरकारच्या मानत संदेह नाही. तातडीने सर्किट बेंच सुरू करणे फारसे खर्चिक नाही, मात्र, त्यासाठी पायाभूत सुविधा आवश्यक आहेत. खंडपीठाचा अंतिम निर्णयाचा सरकारला अधिकार नाही. खंडपीठाची मुख्य न्यायमूर्तींना गरज पटवून देण्याची जबाबदारी आमची आहे. मी आणि मुख्यमंत्री यावर काम करीत आहे. मुख्य न्यायमूर्तींशी चर्चा करण्यासंदर्भात मुख्यमंत्र्यांपर्यंत निरोप पोहोचवू.’

याशिवाय वकिलांनी साखळी उपोषण मागे घ्यावे अशी विनंतीही त्यांनी केली. खंडपीठ मंजुरीच्या प्रक्रियेवरून पालकमंत्री आणि वकिलांमध्ये जुगलबंदी झाली. सर्वपक्षीय कृती समितीचे निमंत्रक आर. के. पोवार आणि खंडपीठ कृती समितीचे निमंत्रक अॅड. प्रकाश मोरे, महापौर हसीना फरास यांनी मनोगते व्यक्त केली.

मोबाइल अॅप डाउनलोड करा आणि राहा अपडेट

शहराला आगामी तीन महिने पाणी प्रदूषणाचा धोका

February 27, 2017, 1:30 pm

≫ Next: पोलिसांतील हद्दीच्या वादात गुंडगिरीची हद्द

≪ Previous: खंडपीठासाठी आग्रही

$

0

0

म. टा. प्रतिनिधी, कोल्हापूर

पंचगंगा नदीत मोठ्या प्रमाणात सांडपाणी मिसळत असल्याने पुढील तीन महिने प्रदूषणाचा मोठा धोका उद्भवण्याची भीती व्यक्त केली जात आहे. पंचगंगा नदीत धरणातून ४०० क्युसेक पाण्याचा विसर्ग सुरू आहे. त्या तुलनेत कोल्हापूर महानगरपालिकेचे २५ एमएलडी सांडपाणी, इचलकरंजी शहर, नदीकाठच्या १८ गावे, औद्योगिक कारखाने असे ५० एमएलडी सांडपाणीही मिसळत आहे. त्यामुळे नदीकाठच्या गावांत साथीचे रोग पसरण्याची शक्यता व्यक्त केली जात आहे.

या पार्श्वभूमीवर जिल्हाधिकारी कार्यालयात सोमवारी बैठक झाली. तीत प्रदूषणास कारणीभूत असलेल्या घटकांवर कारवाई करण्यात कसलीही हयगय करू नका, अन्यथा आपत्ती व्यवस्थापन प्रमुख म्हणून कडक कारवाई करावी लागेल, असा इशाराच जिल्हाधिकारी डॉ. अमित सैनी यांनी दिला. सर्व संबंधितांनी सांडपाण्यावर प्रक्रिया करुन मगच नदीत पाणी सोडण्यासाठी सर्व यंत्रणांनी प्रयत्न करावेत, असा आदेशही जिल्हाधिकाऱ्यांनी दिला.

पंचगंगा नदीवर १८ गावे पिण्याच्या पाण्यासाठी अवलंबून आहेत. पाणी प्रदूषणाचा धोका लक्षात घेऊन या गावांनी पर्यायी व्यवस्था करावी, अशी सूचनाही करण्यात आली. प्रदूषणास कारणीभूत घटकांची प्रांताधिकाऱ्यांनी प्रत्यक्ष जागेवर जाऊन पाहणी करावी. जे कारखाने पाणी प्रदूषित करतात त्यांच्यावर कारवाई करण्यासाठी प्रस्ताव तयार करण्याचे आदेश प्रदूषण नियंत्रण मंडळाला यावेळी देण्यात आले.

पंचगंगा नदीकाठी पाणी प्रदूषण करणाऱ्या १०५ उद्योग आहेत. या उद्योगांची तपासणी २०१४ मध्ये केली आहे. या उद्योगाच्या सांडपाणी प्रकल्पात त्रूटी असून त्यांच्या फेरतपासणीचे आदेशही दिले आहेत. इचलकरंजीतील सांडपाण्याचा वापर बांबू शेतीसाठी करण्याचे ठरवले होते. पण, त्यासाठी जमीन उपलब्ध नाही. ती उपलब्ध करण्यासंदर्भात पुन्हा बैठक घेण्यात येणार आहे. सांडपाणीप्रश्नी गांभीर्याने कारवाई न केल्याबद्दल संबंधित विभाग प्रमुखांवर कारवाई करण्याचा इशाराही यावेळी देण्यात आला.

जिल्हा परिषदेचे मुख्य कार्यकारी अधिकारी डॉ. कुणाल खेमनार, उप प्रादेशिक अधिकारी इंदिरा गायकवाड, महापालिका उपायुक्त विजय खोराटे, इचलकरंजीचे मुख्य कार्यकारी अधिकारी प्रशांत रसाळ, गृह पोलिस उपअधीक्षक सतीश माने, पाटबंधारेचे उपअभियंता एस.एस. शिंदे, पर्यावरण चळवळीतील कार्यकर्ते उदय गायकवाड उपस्थित होते.

चौकट

०००००

हॉस्पिटलवर कारवाई करा

जिल्ह्यातील अनेक हॉस्पिटल जैववैद्यकीय कचऱ्याचे शास्त्रीय पद्धतीने विघटन करण्यासाठी देत नाहीत. पंचगंगा खोऱ्यातील १२७ हॉस्पिटल्स, महापालिका हद्दीतील २५, इचलकरंजीतील २० हॉस्पिटल्स जैववैद्यकीय कचऱ्याचे योग्य पद्धतीने विघटन करत नसल्याने त्यांना नोटीस पाठवण्याचे आदेश जिल्हाधिकाऱ्यांनी दिले.

चौकट

कपडे व बसेस धुणाऱ्यांवर कारवाई

नदीमध्ये कपडे धुणाऱ्या व खासगी प्रवासी बसेस धुणाऱ्यांवर पोलिसांनी कारवाई करावी, असे असे आदेश देण्यात आले. पंचगंगेत हॉस्पिटलचे कपडे व प्रवासी बसेस धुतल्या जातात या बाबी यावेळी निदर्शनास आणून देण्यात आल्या.

००००००

मोबाइल अॅप डाउनलोड करा आणि राहा अपडेट

पोलिसांतील हद्दीच्या वादात गुंडगिरीची हद्द

February 27, 2017, 12:30 pm

≫ Next: जि. प. अखेरच्या सभेत सदस्यांची दिलखुलास टोलेबाजी

≪ Previous: शहराला आगामी तीन महिने पाणी प्रदूषणाचा धोका

$

0

0

satish.ghatage@timesgroup.com

twitter:@satishgMT

कोल्हापूर ः छेडछाडीला कंटाळून बोंद्रेनगरातील धनगरवाड्यात दोन तरुणींनी आत्महत्या केली. अशा सलग दोन गंभीर घटना घडूनही पोलिसांना अद्याप या घटनेचे गांभीर्य दिसत नाही. अद्यापही त्यांच्याकडून केवळ बघ्याचीच भूमिका घेतली जात असल्याचे चित्र आहे. धनगरवाड्याकडे जायला रस्ता नाही, रस्त्यावर लाईट नाही. त्यातच जुना राजवाडा व करवीर पोलिस ठाण्यात हद्दीचा वाद आहे. त्यामुळे पोलिस या भागात फिरकतच नाहीत. त्यामुळे या भागातील गुंडगिरीने हद्द ओलांडली आहे. पोलिसांतील अंतर्गत वादामुळे गुंडांना अभयच मिळाल्यासारखी स्थिती आहे. त्यामुळे पीडित कुटुंबीयांना न्याय मिळणे कठीण झाले आहे.

बोंद्रेनगर परिसरातील धनगरवाड्यांत दहा दिवसांपूर्वी (ता.१८) गीता बोडेकर या युवतीने गळफास लावून आत्महत्या केली. आत्महत्येपूर्वी गिताच्या कानशिलात लावून तिला बेदम मारहाण केल्याची माहितीही पुढे आली. त्यामुळे घटनेचे गांभीर्य वाढले. पोलिसांनी संशयिताला अटक केली. गेल्या सहा महिन्यांत धनगरवाड्यातील दोन युवतींनी गावगुंडांना कंटाळून आत्महत्या केली. त्यामुळे धनगरवाडे हादरुन गेले आहेत. गेल्या सहा महिन्यांत पोलिसांनी दुर्लक्ष केल्यानेही येथील परिस्थिती चिघळली असल्याचे स्थानिक नागरिकांचे म्हणणे आहे.

दहा दिवसानंतर सोमवारी या परिसराचा कानोसा घेतला असता येथील भयावह परिस्थितीचा अनुभव आला. फुलेवाडी रिंगरोडवरील खड्डेमय रस्त्यावरून बोंद्रेनगरातून पश्चिमकेडे बालिंगा-पाडळी रस्ता लागतो. या रस्त्याला रस्ता म्हणायचे कसे? असा प्रश्न पडावा, इतकी या रस्त्याची अवस्था भयंकर. बोंद्रेनगर ते धनगरवाड्याकडे जाणारे सुमारे दोन किलोमीटरचे रस्ते निमर्नुष्य. हा भाग नागदेववाडी ग्रामपंचायतीच्या हद्दीत. त्यामुळे स्थानिक लोकप्रतिनिधी येथील सुविधांत फारसे लक्ष घालत नाहीत. याच निर्मनुष्य रस्त्यांवरून सकाळी सातच्या सुमारात घरातील धुणीभांडी आणि जेवण आटोपून कर्ते पुरूष आणि महिला शहरात कामाला जातात. सकाळी आठ ते सायंकाळी पाचवाजेपर्यंत शाहूपुरी, राजारामपुरी, ताराबाई पार्क, नागाळा पार्क परिसरात या महिला धुणीभांडी करण्याचे काम करतात. त्या जेथे काम करतात तेथे नाष्टा, जेवण मिळाले तर जेवतात, नसेल तर उपाशीपोटीच काम करतात. पुरूष मंडळी हमाली, लाकडे तोडणे, नारळ काढणे किंवा फांद्या मारणे अशी कामे करतात. त्यामुळे दिवसभर मुलीच घर सांभाळतात.

येथील तरुण मुले आठवी, नववीतच शाळा सोडत असल्याचे दिसून आले. अधिक माहिती घेतली असता ही मुले शहरातील विविध ठिकाणच्या खाद्यपदार्थांच्या गाड्यावर काम करतात, असे सांगण्यात आले. काही तरुण सकाळी सहा ते दहावाजेपर्यंत शहरातील चारचाकी धुण्याचे काम करतात. त्यानंतर दुपारी बारानंतर तरुण मंडळी उनाडक्या करायला मोकळी होतात. धुण्याभांड्याला जाणाऱ्या मुलींचा मोटारसायकलवरुन पाठलाग करणे, त्यांच्या ओढण्या ओढणे, केस ओढणे असे भयंकर प्रकार सुरू होतात. काहींची मजल तर या तरुणींचा विनयभंग करण्यापर्यंत जाते. त्यातूनच एकतर्फी प्रेमाच्या तीन ते चार घटना गेल्या सहा महिन्यांत घडल्या. त्यातील काहींना चोपही मिळाला. पण, परिस्थिती सुधारण्याऐवजी दिवसेंदिवस चिघळतच चालली आहे.

निर्भया पथक तर कुठे आहे?

खाद्यपदार्थ विकणाऱ्या परप्रांतीयांना दादागिरी करणाऱ्या फाळकूटदादांची संख्याही परिसरात वाढू लागली आहेत. रात्री लुटण्याच्या छोट्या-मोठ्या टोळ्याही तयार झाल्या आहेत. काही गावगुंडांना फुलेवाडीतील तरुणांनी बेदम चोपही दिला आहे. काही गावगुंड पोलिसांचे खबरे आहेत. ही गावगुंड मुले घरातील लोकांना दादागिरी करुन मोटारसायकल घेण्यास भाग पाडतात. कमाई नसतानाही जीन्स, महागडे शूज, गॉगल असा पेहराव करून दिवसभर निर्लज्जपणे मुलींचा पाठलाग करत वेळ घालवतात. या प्रकाराने मुलींना बाहेरही पडू वाटेनासे झाले आहे, अशी माहिती स्थानिक नागरिकांनी दिली. या प्रकाराची माहिती देऊनही पोलिस किंवा निर्भया पथक इकडे फिरकत नसल्याचे चित्र आहे.

हा भाग करवीर पोलिस ठाण्याच्या हद्दीत येतो. मात्र पोलिस इकडे फिरकत नाहीत. ‘गेले आठवडाभर तीन दिवस पोलिस आले होते. जाबजबाब घेतले. गुंडांना सोडणार नाही, असे सांगण्यात आले.. काय झाले तर आम्हाला कळवा, असे सांगण्यात आले. आमच्याकडे फोन नाही की मोबाईल् नाहीत. मग पोलिसांशी संपर्क साधायचा कसा?,’ असा प्रश्न एका वृद्धाने उपस्थित केला.

पोलिसच दहशत संपवू शकतील

ये‌थील विहीर मालकाला महिन्याला तीनशे रुपये देऊन आम्ही पाणी आणतो. जागा आमची आहे. लाईट आली आहे. पण, बाकीची कसलीच सोय नाही. पोटापाण्यासाठी दिवसभर मजुरीसाठी शहरात जायचे, आमची लहान मुले आम्ही देवाच्या भरवशावर सोडायची. या परिस्थितीत पोलिसच येथील दहशत संपवू शकतील. पण, त्यांना इकडे यायला रस्ते नाहीत, लाईट नाही मग ते तर इकडे कशाला येतील? असे हताश उद्गारही या परिसरातील नागरिकांनी काढले.

पोलिस चौकीची मागणी

गावगुंडांना जरब बसवण्यासाठी पोलिसांनी कडक पावले उचलावीत, अशी या परिसरातील नागरिकांची मागणी आहे. फुलेवाडी रिंगरोडवर लुटालुटीचे प्रकार घडतात, छेडछाडीच्या घटना घडतात. या सर्व प्रकारांना पायबंद घालण्यासाठी परिसरात पोलिस चौकी सुरू करावी, अशी मागणी येथील नागरिकांनी पोलिस प्रशासनाकडे केली आहे.

००००००

सहा महिन्यांपूर्वी पोरगीने आत्महत्या केली. तिने चिठ्ठी लिहिली होती. ज्या पोरग्याच्या त्रासाला कंटाळून आत्महत्या केली त्याला पोलिसांनी अटक केली. पण तो कोर्टातून लगेच सुटला. आपले कुणी वाकडे करु शकत नाही, असा गंड या मुलांच्या मनात आहे. गाड्या उडवत पोरे येतात, शिव्या देतात. पण, पोलिस इकडे फिरकतही नाहीत. आम्हाला बघत बसण्याशिवाय दुसरा पर्यायच नाही.

-साऊ जनू बोडकर

अंगणवाडीविना मुलांचे भविष्यही वाऱ्यावर

लहान मुलांचे भविष्यही असेच वाऱ्यावर आहे. येथे अंगणवाडीच नाही. दिवसभर ही लहान मुले खेळत असतात. धनगरवाड्यापासून दीड ते दोन किलोमीटरवर अंगणवाडी आहे. पोषण आहाराअभावी या मुलांची आबाळ होते. जिल्हा परिषदेने या परिसरात अंगणवाडीचीतरी सोय करावी, अशी अपेक्षा आहे.

मोबाइल अॅप डाउनलोड करा आणि राहा अपडेट

---

जि. प. अखेरच्या सभेत सदस्यांची दिलखुलास टोलेबाजी

February 27, 2017, 6:54 pm

≫ Next: परिचारक यांच्या घरावर सात मार्चला मोर्चा

≪ Previous: पोलिसांतील हद्दीच्या वादात गुंडगिरीची हद्द

$

0

0

म. टा. प्रतिनिधी, कोल्हापूर

पाच वर्षे एकत्रितपणे आणि विविध विकासकामांसाठी सभागृहात एकमेंकाच्यावर आरोप करणाऱ्या जिल्हा परिषद सदस्यांचा ऋणानुबंधाचा सोहळा जिल्हा परिषदेच्या सभागृहात सोमवारी झाला. सातत्याने आवाज उठविणारे आणि विरोधी पक्षाच्या सदस्याला बोलू न देणाऱ्या सदस्यांनी निरोपाच्या सभेत नरमाई घेतली. जिल्हा परिषदेच्या सदस्यांची कारकीर्दीतील शेवटची सभा असल्याने एकमेकांचे कौतुक आणि काही सदस्यांनी चिमटेही काढले.

मुख्य कार्यकारी अधिकारी कुणाल खेमनार यांच्या हस्ते जिल्हा परिषदेच्या अध्यक्षा विमल पाटील यांचा सत्कार झाला. अतिरिक्त मुख्य कार्यकारी अधिकारी इंद्रजित देशमुख यांच्या हस्ते उपाध्यक्ष शशिकांत खोत यांचा सत्कार झाला. शिक्षण समिती सभापती अभिजित तायशेटे, समाजकल्याण सभापती किरण कांबळे आणि वित्त अधिकारी गणेश देशपांडे यांचा सेवानिवृत्तीनिमित्त सत्कार झाला. जिल्हा प्रशासनाच्या वतीने शाल, श्रीफळ, गुलाबपुष्प देऊन मान्यवरांचा सत्कार सोहळा झाला.

डॉ खेमनार म्हणाले, ‘जिल्हा परिषदेच्या विकासाचे खरे शिलेदार पदाधिकारी आहेत. नेते, सदस्य आणि पदाधिकारी यांच्यात विकासाचा दृष्टीकोन असल्यानेच जिल्हा परिषद प्रगतीपथावर आहे. अधिवेशनानंतर जिल्हा नियोजन समितीतून विविध कामांसाठी निधी उपलब्ध होईल.’ जिल्हा परिषदेच्या अध्यक्ष विमल पाटील, उपाध्यक्ष शशिकांत खोत, जिल्हा परिषद सदस्य सुरेश कांबळे, विजया पाटील, एस. आर. पाटील, सुवर्णा अपराज, बाजीराव पाटील आदींची भाषणे झाली.

शिक्षण समिती सभापती अभिजित तायशेटे म्हणाले, ‘काँग्रेसचे जिल्हाध्यक्ष पी. एन. पाटील आणि आमदार सतेज पाटील यांच्या मार्गदर्शनानुसार काम केले. सर्वसमावेशक बजेट तयार केले.’ सायंकाळी साडेचार वाजता सभागृहाचे कामकाज संपल्यानंतर सदस्यांनी फोटोसेशन केले. पाच वर्ष एकमेकांच्या विरोधात बोलणारे आणि तुम्ही खाली बसा म्हणणाऱ्या सदस्यांनी खांद्यावर हात टाकून ग्रुप फोटो काढले.

मोबाइल अॅप डाउनलोड करा आणि राहा अपडेट

परिचारक यांच्या घरावर सात मार्चला मोर्चा

February 27, 2017, 6:57 pm

≫ Next: कोलोली खिंडीत चालती कार पेटली

≪ Previous: जि. प. अखेरच्या सभेत सदस्यांची दिलखुलास टोलेबाजी

$

0

0

म. टा. प्रतिनिधी, कोल्हापूर

भारतीय सैनिक व त्यांच्या पत्नींबाबत आक्षेपार्ह विधान केलेल्या आमदार प्रशांत परिचारक यांच्यावर राष्ट्रद्रोहाचा गुन्हा दाखल करून त्यांचा राजीनामा घ्यावा, अशी मागणी सोमवारी अखिल मराठा महासंघाच्यावतीने आयोजित निषेध सभेत करण्यात आली. यावेळी ७ मार्च रोजी, पंढरपूरमध्ये परिचारकांच्या घरावर मोर्चा काढण्याचा निर्णय घेण्यात आला.

भाजपचे आमदार प्रशांत परिचारक यांनी जिल्हा परिषद निवडणुकीच्या प्रचारसभेत सैनिक व त्यांच्या पत्नींबाबत आक्षेपार्ह विधान केले. या निषेधार्थ शाहू स्मारक भवन येथे सोमवारी निषेध सभा घेण्यात आली. या सभेच्या अध्यक्षस्थानी ग्रुप कॅप्टन अशोक आवटे होते.
माजी सैनिक दिलीप पवार म्हणाले, ‘परिचारक यांना सैनिकांबद्दल बोलण्याचा नैतिक अधिकार नाही. राष्ट्रद्रोहाचा गुन्हा दाखल करुन त्यांच्या आमदरकीचा राजीनामा घ्यावा.’ कर्नल पी. ए. देसाई म्हणाले, ‘परिचारक यांच्या विधानाबाबत काही लोक त्यांना पाठिंबा देऊन सैनिकांच्या धैर्याचे खच्चीकरण करत आहेत.’

वसंतराव मुळीक म्हणाले, ‘परिचारक यांच्या चुकीच्या वक्तव्या निषेधार्थ ७ मार्च रोजी, त्यांच्या घरावर मोर्चा काढण्यात येणार आहे. यासाठी ६ मार्च रोजी, रेल्वे स्टेशवर रात्री १० वाजता सर्वंानी एकत्र यावे.’ दरम्यान माजी सैनिक तुकाराम साळोखे, सुभेदार जी. एस. पाटील, संग्राम पाटील यांनी आपल्या भावना व्यक्त केल्या. यावेळी चंद्रकांत चव्हाण, शंकरराव शेळके, बबनराव रानगे, राजदीप सुर्वे, शिवाजीराव परुळेकर, पी. जी. मांढरे, उपस्थित होते.

मोबाइल अॅप डाउनलोड करा आणि राहा अपडेट

कोलोली खिंडीत चालती कार पेटली

February 27, 2017, 7:00 pm

≫ Next: हातकणंगलेत काँग्रेसमधील मतभेद विरोधकांच्या पथ्थ्यावर

≪ Previous: परिचारक यांच्या घरावर सात मार्चला मोर्चा

$

0

0

म. टा. वृत्तसेवा,पन्हाळा

पन्हाळा तालुक्यातील कोलोली खिंड परिसरात चालत्या स्कोडा कारला अचानक आग लागली. सोमवारी (ता.२७) पहाटे पाच वाजण्याच्या सुमारास ही घटना घडली. शॉर्ट सर्किटमुळे कारने पेट घेतल्याचा प्राथमिक अंदाज व्यक्त केला जात आहे. सुदैवाने या घटनेत गाडीतून प्रवास करणारे तिघेही जण बचावले.

याबाबत अधिक माहिती अशी, नणुंद्रे गावातील इंगळे कुटुंबिय सोमवारी स्कोडा कारमधून सौंदत्ती यात्रेसाठी पहाटे पाचच्या दरम्यान गावातून निघाले. सव्वा पाचच्या सुमारास कोलोली खिंड परिसरात येताच गाडीला आग लागल्याचे कृष्णा इंगळे यांच्या लक्षात आले. त्यांनी तातडीने आपला दहा वर्षाचा मुलगा अथर्व व आई बेबीताई यांना गाडीतून बाहेत काढले. बघता-बघता संपूर्ण कारने पेट घेतेला. सुदैवाने जीवितहानी झाली नाही. आगीमध्ये गाडीचे सुमारे पाच लाखांचे नुकसान झाले आहे. कोल्हापूर-सोनुर्ले हा राज्यमार्ग असून ज्याठिकाणी गाडीने पेट घेतला त्याठिकाणी पाईपलाईनच्या पाण्याने मोठा खड्डा पडला आहे. सार्वजनिक बांधकाम विभागाने या ठिकाणचा खड्डा तातडीने बुजवावा, अशी नागरिकांतून मागणी होत आहे.

मोबाइल अॅप डाउनलोड करा आणि राहा अपडेट

हातकणंगलेत काँग्रेसमधील मतभेद विरोधकांच्या पथ्थ्यावर

February 27, 2017, 7:03 pm

≫ Next: स्टेंटच्या किमतीबाबत संभ्रमच

≪ Previous: कोलोली खिंडीत चालती कार पेटली

$

0

0

राजेंद्र पाटील, इचलकरंजी

राष्ट्रीय काँग्रेसमधील अंतर्गत गटबाजी, राष्ट्रवादीची खिळखिळी अवस्था अन् भाजपाची चाणक्य रणनिती यामुळे हातकणंगले तालुका काँग्रेसमुक्त झाल्याचा प्रत्यय जिल्हा परिषद व पंचायत समिती निवडणुकीच्या निमित्ताने आला. या तालुक्याने जिल्ह्याला अनेक दिग्गज नेते दिले असताना गट-तट आणि पाडापाडीच्या राजकारणामुळे दोन्ही काँग्रेसची झालेली वाताहत विरोधकांच्या पथ्यावर पडली. काँग्रेसला पुन्हा उभारी मिळवून देण्यासाठी नेतेमंडळींना शहाणपण सूचणार का ? असा परखड सवाल खुद्द कार्यकर्त्यांतून विचारला जात आहे.

जिल्हा परिषद अध्यक्षपदाच्या रुपाने काँग्रेस पक्षाने सातत्याने जिल्ह्यावर आपली एक पकड निर्माण केली होती. राजकारणातील एकजुटीमुळे सुरुवातीच्या काळात काँग्रेसची ताकद मजबूत होती. अशावेळी गट-तट बाजूला ठेवून पक्ष वाढीसाठी नेतेमंडळी एकत्र यायची. कालांतराने पक्षातील अंतर्गत कलह वाढत गेल्याने गट-तट आणि आघाड्यांना महत्व प्राप्त झाले. सर्वचजण पक्षाच्या माध्यमातून स्वत:चे अस्तित्व दाखविण्यासाठी धडपडू लागला. त्यातूनच पक्षाचा बुरुज हळूहळू ढासळू लागला. जिल्हा काँग्रेसचे राजकारण काही ठराविक व्यक्तींभोवतीच गुरफटू लागल्याने एकनिष्ठ नेते व कार्यकर्ते दुखावू लागले. एकसंघ असलेला हातकणंगले तालुका माजी खासदार जयवंतराव आवळे, माजी मंत्री प्रकाश आवाडे, जिल्हाध्यक्ष पी. एन. पाटील, आमदार सतेज पाटील आणि माजी आमदार महादेवराव महाडिक अशा गटात विखुरला गेला.

हा तालुक्यांत पहिल्यापासून माजी खासदार कल्लाप्पाण्णा आवाडे यांनी स्वतंत्र ताकद निर्माण केली. परंतु त्यांच्या सहकार चळवळीला पक्षांतर्गत विरोध झाल्याने इचलकरंजीत आवाडे विरुध्द आवळे अशी संघर्षाची ठिणगी पडली. याचा फटका सहाजिकच आवाडे यांना सहन करावा लागला. दोन लोकसभा, दोन विधानसभा, कोल्हापूर जिल्हाध्यक्षपद निवडणूक, नगरपरिषद निवडणूक यामध्ये पराभवाचा सामना करावा लागला. स्वत:ची ताकद असतानाही काँग्रेस अंतर्गत कलहामुळे आवाडेंचे पंख छाटण्याचे काम यंदाच्या निवडणुकीत केले गेले. मात्र आवाडे यांनी स्थानिक आघाडीद्वारे त्याला चोख प्रत्युत्तर देत आपली ताकद दाखवून दिली.

जिल्ह्यातील घुणकी, भादोले, कुंभोज या मतदारसंघावर जनसुराज्य शक्तीचे प्राबल्य होते. घुणकीत मागील निवडणुकीत काँग्रेसचे शहाजी बापू पाटील विजयी झाले होते. यंदा त्यांच्याच घरात सुनेला उमेदवारी दिली. पण नेत्यांच्या हट्टीपणामुळे त्या चौथ्या क्रमांकावर गेल्या. भादोलेत यंदा मनीषा माने यांनी बाजी मारली. कुंभोजमध्ये अचूक वेध शिवसेनेने निशाणा साधत जनसुराज्य शक्तीला घायाळ केले. एकेकाळी काँग्रेसने या मतदासंघाला जिल्हा परिषद अध्यक्षाचा मान दिला असताना काँग्रेसची स्थिती नगण्य दिसून आली. याचा तोटा जयवंतराव आवळे यांना भविष्यात होण्याची शक्यता आहे.

हातकणंगले, शिरोली, कबनूर, कोरोची या चारही मतदारसंघात अपेक्षेप्रमाणे ‘कमळ’ खुलले. महादेवराव महाडिक आणि आमदार सुरेश हाळवणकर यांचे वर्चस्व असलेल्या या मतदारसंघातील काँग्रेस-राष्ट्रवादी नामशेष झाल्याचे दिसून आले. राष्ट्रवादीचा म्हणजेच माने गटाचा बालेकिल्ला असलेल्या रुकडी व पट्टणकोडोली मतदारसंघातही आवाडे गट-स्वाभिमानी युतीने बाजी मारली. माजी खासदार निवेदीता माने यांचे सुपुत्र धैर्यशील माने यांनी युवक क्रांती आघाडी करुन भाजपाला साथ दिली. मात्र त्यांचे गणित नेमके कुठे चुकले याचे आत्मचिंतन करणे माने गटाला गरजेचे बनले आहे. हुपरीत अपेक्षेप्रमाणे भाजपाने आपले वर्चस्व दाखवून दिले. जातीय समीकरणात ही जागा काँग्रेसला राखता आली नाही. रेंदाळमध्ये आवाडे गटाचेच वर्चस्व होते. ते राहुल आवाडे यांच्या विजयाने कायम राखण्यात आले.

मोबाइल अॅप डाउनलोड करा आणि राहा अपडेट

स्टेंटच्या किमतीबाबत संभ्रमच

February 27, 2017, 7:17 pm

≫ Next: यूथ एक्स्चेंज प्रोग्रॅमची ब्रँड अॅम्बेसिडर

≪ Previous: हातकणंगलेत काँग्रेसमधील मतभेद विरोधकांच्या पथ्थ्यावर

$

0

0

कोल्हापूर ः स्टेंटच्या किमती समान करण्यात आल्या असल्या तरी सर्वसामान्यांच्या मनात त्याबाबत अद्याप संभ्रमच आहे. एकीकडे सरकारने स्टेंटची किंमत सरसकट किमान ७ हजार २०० रुपये व २९ हजार ६०० रुपये केली आहे. मात्र अद्यापही खासगी रुग्णालयातील पूर्वीच्याच पॅकेजनुसार उपचार केले जात आहे. कोल्हापुरातील अनेक मोठ्या हॉस्पिटलमध्ये नव्या दराबाबतची अंमलबजावणी कधी होणार? या प्रतीक्षेत हे रुग्ण आहेत.

कोलेस्ट्रॉल वाढल्यामुळे हृदयाला रक्तपुरवठा कमी होत असल्यास संबंधित रुग्णाची अँजिओप्लास्टी करावी लागते. त्यासाठी विशेषतः अमेरिकन कंपन्यांचे स्टेंट बसविले जात होते. ‘बेअर मेटल' आणि ’ड्रग इल्युटिंग’ असे स्टेंटचे दोन प्रकार आहेत. त्यांपैकी ‘ड्रग इल्युटिंग’ हा स्टेंट वापरण्यावर डॉक्टरांचा भर असतो.

कोल्हापुरात दिवसाला किमान १२ ते १५ जणांवर अँजिओप्लास्टी होते. खासगी रुग्णालयांकडून सर्वसामान्य रुग्णांची होणारी लूटमार थांबवण्यासाठी सरकारने १५ दिवसांपूर्वी स्टेंटच्या किमतीवर नियंत्रण आणले. यामुळे स्टेंटची किंमत सरसकट किमान ७ हजार २०० रुपये व २९ हजार ६०० रुपये झाली. मात्र अद्यापही काही हॉस्पिटल्समध्ये पूर्वीच्याच पॅकेजनुसार आकारणी होते. त्यामुळे सर्व हॉस्पिटलमध्ये शस्त्रक्रिया व तपासण्याबाबतचे दरफलक लावल्यास व्यवहारांत पादर्शकता येईल.

मोबाइल अॅप डाउनलोड करा आणि राहा अपडेट

यूथ एक्स्चेंज प्रोग्रॅमची ब्रँड अॅम्बेसिडर

February 27, 2017, 7:25 pm

≫ Next: शिरोली, रेंदाळमध्ये फेरमतदानाची मागणी

≪ Previous: स्टेंटच्या किमतीबाबत संभ्रमच

$

0

0

कोल्हापूर । मारुती पाटील

देशप्रेमाची मनात रुजलेली भावना, वडिलांकडून मिळालेली सैनिकी शिस्त, संरक्षण क्षेत्राविषयीची आवड यातून नॅशनल कॅडेट कोर्सच्या (एनसीसी) माध्यमातून विवेकानंद कॉलेजची विद्यार्थिनी, उचगाव येथील अक्षया विजयकुमार पिंपळे यांनी भूतान येथील यूथ एक्स्चेंज प्रोग्रॅमध्ये देशाची अॅम्बेसिडर म्हणून बहुमान मिळवला आहे. एनसीसीमध्ये केलेल्या दैदिप्यमान कामगिरीमुळे अक्षयाचा नुकत्याच झालेल्या शिवाजी विद्यापीठाच्या ५३ व्या दीक्षान्त समारंभात ज्येष्ठ अणुशास्त्रज्ञ डॉ. अनिल काकोडकर यांच्या हस्ते रणरागिणी ताराराणी पुरस्कारने गौरव करण्यात आला.

अक्षयाचे वडील विजयकुमार पिंगळे हे सेवानिवृत्त हवालदार. पहिल्यापासून सैन्यदलाचे आकर्षण असलेल्या अक्षयाला त्यांच्याकडून मार्गदर्शन लाभले. न्यू मॉडेल इंग्लिश स्कूलमध्ये असताना ती एनसीसीमध्ये दाखल झाली. शालेय स्तरावर विविध पारितोषके पटकावल्यानंतर बी. एसस्सीचे शिक्षण घेताना तिने एनसीसीमध्ये वेगळा ठसा उमटवण्यास सुरुवात केली. धावणे, लांब उडी या क्रीडा प्रकारांबरोबरच ड्रॉइंगची आवड तिने जपली. रक्तदान, वृक्षारोपण, पल्स पोलिओ, एड्स जनजागरण रॅली, लेक वाचवा अभियान यांसारख्या सामाजिक उपक्रमात तिने वेगळी कामगिरी केली. कोल्हापूर जिल्ह्यातून बेस्ट कॅडेट म्हणून तिची निवड झाली.

बेस्ट कॅडेट बहुमानामुळे तिची प्रजासत्ताक दिन संचलनासाठी निवड झाली. राज्यातील १४७ एनसीसी कॅडेट्सचा औरंगाबाद येथे कॅम्प झाला. या कॅम्पमध्ये अक्षयाने दुसरा क्रमांक मिळवून संचलनासाठीची निवड सार्थ ठरवली. संचलनासाठी पंधरा दिवस दररोज रात्री दोन ते सकाळी दहा वाजेपर्यंत आर्मीतील अधिकाऱ्यांच्या समवेत ट्रेनिंग सुरू होते. त्याचवेळी भूतान येथे होणाऱ्या यूथ एक्स्चेंज प्रोग्रॅमसाठीची लीडरशीप, ड्रील, गटचर्चा, फायरिंग, ब्रीफ फायरिंग, फ्लॅग एरिया, लेखी परीक्षा आणि मुलाखत यामाध्यमातून तिची देशाची अॅम्बेसिडर म्हणून निवड झाली. देशातील ८५० कॅडेट्समधून केवळ दहा जणांची यासाठी निवड झाली.

देशाच्या संस्कृतिचे सादरीकरण करून दहाजणांच्या चमुने भूतानचे शिक्षणमंत्री, आर्मीचीफ, आयएमीआरटी यांच्याबरोबर चर्चा करुन भूतान येथील संस्कृती, खेळाबाबतची माहिती घेतली. पुणे येथील थलसेना कॅम्पमध्ये सहभागी झालेली ती कोल्हापूर येथील एकमेव कॅडेट होती. राष्ट्रीय आणि आंतरराष्ट्रीय स्तरावर अक्षयाने केलेल्या उज्ज्वल कामगिरीची दखल घेऊन शिवाजी विद्यापीठाच्या नुकत्याच
झालेल्या दीक्षान्त समारंभात तिला रणरागिणी ताराराणी पुस्कारने डॉ. काकोडकर यांच्या हस्ते गौरविण्यात आले. शालेय स्तरापासून एनसीसीमध्ये मिळालेल्या पारितोषकांच्या जोरावर सैन्यदलात अधिकारीपदावर विराजमान होण्याचे स्वप्न अक्षयाने बाळगले आहे. अक्षयाला एनसीसीमधील करिअरमध्ये लेप्टनंट सुनीता भोसले-दळवी, ब्रिगेडिअर पी. के. गंजू, कर्नल साजी अब्राहम, प्राचार्य डॉ. हिंदूराव पाटील, सहा महाराष्ट्र एनसीसी गर्ल्स बटालियन आणि पीआय स्टाफचे
मार्गदर्शन मिळाले.

मोबाइल अॅप डाउनलोड करा आणि राहा अपडेट

शिरोली, रेंदाळमध्ये फेरमतदानाची मागणी

February 27, 2017, 7:08 pm

≫ Next: काँग्रेस-राष्ट्रवादी झेडपीसाठी एकत्र?

≪ Previous: यूथ एक्स्चेंज प्रोग्रॅमची ब्रँड अॅम्बेसिडर

$

0

0

म. टा. वृतसेवा, हातकणंगले

‘जिल्हा परिषदेच्या शिरोली व रेंदाळ मतदारसंघातील विजयी उमेदवार व पराभूत उमेदवारांत मतदानाच्या आकडेवारीतील फरक पाहता मतदानयंत्रात घोळ झाला असण्याची शक्यता आहे. या सर्व मतदानयंत्राची तपासणी करुन फेरमतदान घ्यावे,’ अशी मागणी सुचित्रा खवरे, तानाजी घोडेस्वार यांच्यासह चार पराभूत उमेदवारांनी जिल्हाधिकाऱ्यांकडे निवेदनाद्वारे केली आहे.

निवेदनात म्हटले आहे, शिरोली जिल्हा परिषद मतदारसंघातून सुचित्रा शशिकांत खवरे, शिरोली तालुका पंचायत समितीसाठी माधुरी पाटील, नागाव पंचायत समितीसाठी अजित घाटगे तसेच रेंदाळ जिल्हा परिषदेसाठी तानाजी घोडेस्वार या सर्वांनी राष्ट्रीय काँग्रेस पक्षातून हात चिन्हावर निवडणूक लढवली. तर त्यांच्याविरोधात शिरोली जिल्हा परिषदेसाठी भाजपच्या शौमिका महाडिक, रेंदाळमधून राहुल आवाडे यांनी निवडणूक लढविली.

मतमोजणीनंतर विजयी उमेदवारांच्या मतदानाची आकडेवारी पाहता भाजपचे आमदार अमल महाडिक यांनी सत्तेचा गैरवापर करुन मतदानयंत्रात फेरफार केला असण्याची शक्यता आहे. त्याचबरोबर रेंदाळमध्ये राहुल आवाडे यांनी सरकारी यंत्रणेला हाताशी धरून मिळवलेली तब्बल अकरा हजार मते संशयास्पद आहेत.
या दोन्ही मतदारसंघातील मतदानयंत्रांची पुन्हा तपासणी करुन सरकारी अधिकाऱ्यांची चौकशी करावी. तसेच याठिकाणी फेरमतदान घ्यावे. विजयी उमेदवार आणि पराभूत उमेदवार यांच्या मतातील फरक पाहता मतदान यंत्रात घोळ झाला असण्याची शक्यता आहे.

मोबाइल अॅप डाउनलोड करा आणि राहा अपडेट

---

काँग्रेस-राष्ट्रवादी झेडपीसाठी एकत्र?

February 27, 2017, 7:36 pm

≫ Next: राष्ट्रउभारणीची आणखी एक संधी

≪ Previous: शिरोली, रेंदाळमध्ये फेरमतदानाची मागणी

$

0

0

म. टा. वृत्तसेवा, सोलापूर

सोलापूर जिल्हा परिषदेत राष्ट्रवादी कॉँग्रेस २३ जागा जिंकून सर्वात मोठा पक्ष बनला आहे. मात्र, सत्ता स्थापन करण्यासाठी त्यांना काँग्रेस पक्षाचीच मदत घ्यावी लागणार आहे. काँग्रेस-राष्ट्रवादी आघाडी करून मिनी विधानसभेत सत्ता स्थापन करेल, असे राज्य स्तरावर ठरले असल्याने आता त्यानुसारच बोलणी सुरू झाली आहे.

नुकत्याच झालेल्या निवडणुकीत राष्ट्रवादीने २३, भाजप-शिवसेना आघाडी २२, काँग्रेस ७, स्थानिक आघाडी १०, शेकाप ३ आणि अपक्षांनी ३ जागा जिंकल्या आहेत. ६८ सदस्य संख्या असलेल्या झेडपीमध्ये सत्ता स्थापन कारण्यासाठी ३५ जागांची जुळवाजुळव करावी लागणार आहे. जिल्ह्यात खासदार विजयसिह मोहिते-पाटील यांनी त्यासाठी आपली तयारी सुरू केली आहे. राष्ट्रवादी २३, काँग्रेस ७ शेकाप ३ आणि अपक्ष किंवा स्थानिक विकास आघाडीतील काहींना बरोबर घेऊन राष्ट्रवादी सत्ता स्थापन करू शकते, असे सध्याचे चित्र आहे. थेट खासदार विजयसिह मोहिते-पाटील यांनी विरोध करणारे विरोध करणारे विधान परिषदेचे आमदार प्रशांत परिचारक, माढाचे संजय शिंदे, मंगळवेढाचे समाधान आवताडे यांनीही सत्ता स्थापन करण्यासाठी तयारी सुरू केली आहे, त्यांना कितपत यश येते याकडे ही सर्वांचे लक्ष आहे. मोहिते-पाटील घराण्यातील स्वरूपाराणी यांना अध्यक्षपदापासून दूर ठेवण्यासाठी विरोधकांनी हा खटाटोप सुरू केला आहे. राष्ट्रवादीचे २३ सदस्य निवडून आले आहेत, त्यामध्ये तब्बल ८ सदस्य एकट्या माळशिरस म्हणजेच मोहिते-पाटील यांच्या तालुक्यातील आहेत. त्यामुळे त्यांना बाजूला ठेवण्यासाठी विरोधकांचे प्रयत्न किती यशस्वी होतात, याकडे लक्ष लागून आहे. अक्कलकोटचे आमदार सिद्धाराम म्हेत्रे यांच्या गटाचे म्हणजेच काँग्रेसचे सहा जण निवडून आले असून, ते सहा जण ज्या पक्षाबरोबर जातात त्या पक्षाची सत्ता झेडपीत येणार आहे. त्यामुळे आमदार म्हेत्रे सत्तेचे किंगमेकर ठरू शकतात. झेडपीत आघाडी करण्यासाठी माजी केंद्रीय मंत्री सुशीलकुमार शिंदे यांची भूमिका महत्वाची ठरणार आहे.

मोबाइल अॅप डाउनलोड करा आणि राहा अपडेट

राष्ट्रउभारणीची आणखी एक संधी

February 28, 2017, 1:30 pm

≫ Next: तूरडाळीचे दर उतरले

≪ Previous: काँग्रेस-राष्ट्रवादी झेडपीसाठी एकत्र?

$

0

0

म. टा. प्रतिनिधी, कोल्हापूर

सैन्यदलातील कारकीर्दीत नेहमीच राष्ट्रउभारणीला प्राधान्य दिले आहे. आता तर देशाच्या एकामत्मतेसाठी आणि विकासासाठी काम करणाऱ्या अधिकाऱ्यांशी सं‌बधित असलेल्या केंद्रीय लोकसेवा आयोगावर सदस्य झाल्याने राष्ट्रउभारणीत भरीव योगदान देण्याची संधी आली आहे, अशी प्रति‌क्रिया बस्तवडे (ता. कागल) येथील एअर मार्शल अजित शंकरराव भोसले यांनी केंद्रीय लोकसेवा आयोग सदस्यपदाच्या निवडीनंतर व्यक्त केली. भोसले यांच्या निवडीने कोल्हापुरला प्रथमच बहुमान प्राप्त झाला असून कोल्हापूरच्या शिरपेचात मानाचा तुरा खोवला आहे.

एअर मार्शल भोसले मुळ बस्तवडे सारख्या ग्रामीण भागातील व्यक्त‌िमत्त्व. वडील शंकरराव राज्य सरकारच्या कृषी विभागात कार्यरत असल्याने त्यांचे बार्शी (सोलापूर) येथे प्राथमिक शिक्षण झाले. उस्मानाबाद, बीड आदी जिल्ह्यात जेथे बदली होईल तेथे जाऊन भोसले यांनी शिक्षण पूर्ण केले. १९६७ मध्ये नाशिक येथील भोसला मिलट्री स्कूलमध्ये दाखल झाले. कडक शिस्तीमध्ये शिक्षण पूर्ण केल्यानंतर नॅशनल डिफेन्स अॅकॅडमीमध्ये दाखल झाले. तेथे त्यांनी सैनिकी शिस्तीबरोबरच एम एसस्सी, एमएमएस, एमबीए आणि एम फील पदवीपर्यंत शिक्षण घेतले. १९७८ मध्ये भारतीय वायूसेनेच्या फ्लाईंग शाखेत समावेश करण्यात आला. भारतीय वायूसेनेमध्ये तब्बल ३९ वर्षांच्या सेवेत अनेक महत्त्वाच्या कारवाईत सहभाग घेतला. कारगील, सियाचीन आणि श्रीलंकेतील कारवाईत सहभाग घेतला. त्यांना २००५ मध्ये विशिष्ट सेवा पदकाने व २०१० मध्ये अतिविशिष्ट सेवा पदकाने गौरविण्यात आले आहे.

ग्रामीण भाग आणि कृषी संस्कृतीशी निगडीत असूनही कोणताही न्यूनगंड न बाळगता करिअरची वाट निश्चित केली. राष्ट्र सेवा आणि उभारणीमध्ये सलग ४० वर्षे सेवा बजावल्यानंतर नुकतेच ते सेवानिवृत्त झाले. त्यांनी आपल्या कारकिर्दीमध्ये दिलेल्या योगदानाची दखल घेऊन त्यांची केंद्रीय लोकसेवा आयोगाच्या सदस्यपदी राष्ट्रपतींनी निवड केली. प्रदीर्घ सेवेनंतर पुन्हा देशसेवेसाठी तयार असलेल्या योग्य उमेदवारांची नियुक्ती करण्याची जबाबदारी मिळाली आहे. पुढील ४० वर्षे देश उभारणीमध्ये सहभागी होणाऱ्या होतकरू युवकांची नियुक्ती करण्यासाठी एअर मार्शल भोसले सज्ज झाले आहेत. भोसले हे कोल्हापूरचे दिवंगत लेफ्टनंट कर्नल व्ही. एम. मंडलिक आणि प्रेमलता मंडलिक यांचे जावई आहेत.

भारतीय वायूसेनेमध्ये ४० वर्षे सेवा दिल्यानंतर आता भविष्यात राष्ट्र उभारणी देणाऱ्या योग्य युवकांची निवड करण्याची जबाबदारी मिळाली आहे. त्यामुळे जबाबदारी वाढलेली असली, तरी या पदाला साजेशी अशी कामगिरी करून देशसेवेला अधिक प्राधान्य दिले जाईल. या नियुक्तीमुळे राष्ट्र उभारणीच्या कार्यामध्ये अखंड सेवा दिल्याचा अभिमान आहे.

एअर मार्शल अजित भोसले

मोबाइल अॅप डाउनलोड करा आणि राहा अपडेट

तूरडाळीचे दर उतरले

February 28, 2017, 1:30 pm

≫ Next: पाण्यावरून महिला सदस्य आक्रमक

≪ Previous: राष्ट्रउभारणीची आणखी एक संधी

$

0

0

कोल्हापूर ः गेल्या महिनाभरात ९० रुपयांवरुन ८० रुपयांवर पोहचलेल्या तूरडाळीचा किरकोळ बाजारातील दर आणखी पाच रुपयांनी घसरला आहे. ७५ रुपये किलो तूरडाळ झाली असून या हंगामातील तूरडाळीचा हा सर्वात कमी दर आहे. याबरोबर हरभरा डाळीचा दरही या आठवड्यात कमी होण्याची शक्यता आहे. यंदा डाळींचे उत्पादन मोठ्या प्रमाणावर असल्याने दर कमी होण्याची शक्यता वर्तवण्यात येत होती. त्याप्रमाणे गेल्या महिन्यापासून दर कमी होत होते. फेब्रुवारीच्या सुरुवातीला ९० रुपये किलो दर होता. तो गेल्या आठवड्यापर्यंत ८० वर आला होता. मंगळवारी होलसेल बाजारात ६७०० ​रुपये क्विंटल दर झाला. यामुळे किरकोळ बाजारात चांगल्या प्रतीच्या तूरडाळीचा दर ७५ रुपयापर्यंत झाला आहे. हा दर यंदाच्या हंगामातील सर्वांत कमी आहे. यापेक्षा आणखी कमी होण्याची शक्यता नसल्याचे व्यापारी महेश सावर्डेकर यांनी सांगितले. मात्र हरभरा डाळीचा दर ९० रुपयांवरुन आणखी खाली येण्याची शक्यता आहे.

मोबाइल अॅप डाउनलोड करा आणि राहा अपडेट

पाण्यावरून महिला सदस्य आक्रमक

February 28, 2017, 1:30 pm

≫ Next: नाव बुडू लागल्यावर आठवण

≪ Previous: तूरडाळीचे दर उतरले

$

0

0

म. टा. प्रतिनिधी, कोल्हापूर

शहरातील विविध भागातील अपुरा पाणीपुरवठा, पाइपलाइन गळतीची समस्या, पाण्याच्या टँकरवरील चालकांची गैरहजेरी, आणि सार्वजनिक पाण्याच्या टाकीच्या स्वच्छतेवरुन महापालिकेतील सर्वच पक्षाच्या नगरसेविकांनी प्रशासनाच्या कारभाराचा पंचनामा केला. उन्हाच्या झळा वाढत असून मार्च, एप्रिल आणि मे महिन्यातील पाणी वाटपाच्या नियोजनाची मागणी नगरसेवक आशिष ढवळे यांनी केली. संभाव्य पाणी टंचाईवर मात करण्यासाठी गेल्या वर्षीप्रमाणे यंदाही ‘एक दिवसा आड पाणी पुरवठा’चा प्रस्तावही नगरसेवकांनी प्रशासनासमोर मांडला. महापौर हसीना फरास सभेच्या अध्यक्षस्थानी होत्या. महापालिकेने अनास्थेमुळे क्रीडा विभाग बंद आहे, यामुळे केंद्र आणि राज्याच्या अनेक योजनापासून शहर वंचित राहिल्याचा आरोप नगरसेवक सचिन पाटील, संतोष गायकवाड यांनी केला.

प्रशासनाने येत्या दोन दिवसांत उन्हाळ्यातील पाणी पुरवठा बाबत नियोजन करावे, असा आदेश महापौर फरास यांनी दिला. दरम्यान लहान ठेकेदारांना ईपीएफ बंधनकारक करण्याच्या निर्णयामुळे शहरातील विकास कामे ठप्प झाली आहेत. ३१ मार्चपर्यंत वर्कऑर्डर दिली नाही तर नगरसेवकांचा निधी परत जाण्याचा धोका आहे. लहान कंत्राटदाराकडे २० कर्मचारी नसतात त्यांना ईपीएफमधून सवलत मिळावी, अशी सूचना नगरसेवक प्रा. जयंत पाटील यांनी केली. उपमहापौर अर्जुन माने, संदीप नेजदार, दिलीप पोवार, सत्यजित कदम, शारंगधर देशमुख, शेखर कुसाळे, अनुराधा खेडकर आदींनी याप्रश्नी प्रशासनाला धारेवर धरत महापालिकेने संबंधित कंत्राटदारांकडून २० कर्मचारी नसल्याचे प्रतिज्ञापत्र घेऊन कामाच्या निविदा काढाव्यात असे सुनावले. त्यानुसार मार्च महिन्यापर्यंत प्रतिज्ञापत्र घेऊन ईपीएफ नोंदणीतून सवलत देत असल्याचे अतिरिक्त आयुक्त श्रीधर पाटणकर यांनी स्पष्ट केले.

तर नागरिकांसोबत रास्ता रोको

नगरसेविका उमा इंगळे, स्मिता माने, सीमा कदम, कविता माने, अश्विनी बारामते, गीता गुरव, वनिता देठे, शोभा कवाळे यांनी पाणी प्रश्न उचलून धरला. इंगळे यांनी ई वॉर्डातील पाणी प्रश्नी दोन दिवसांत निर्णय झाला नाही तर नागरिकांसोबत रास्ता रोको केला जाईल, असा इशारा दिला. नगरसेविका दीपा मगदूम यांनी शुश्रृषानगर येथील पाण्याच्या टाकीत गाळ साचला आहे, पक्षी मरुन पडले आहेत. नागरिकांच्या आरोग्याच्या प्रश्न निर्माण झाला तर त्याची जबाबदारी कुणावर? असा प्रश्न विचारला. जल अभियंता सुरेश कुलकर्णी यांनी पाण्याच्या टाकीच्या स्वच्छतेसाठी ३० लाख रुपयांचा प्रस्ताव तयार केल्याचे सांगितले. माधुरी लाड यांनी पाण्याच्या टाक्या उघड्या असल्याचे निदर्शनास आणले. नगरसेवक मुरलीधर जाधव यांनी राजारामपुरी वगळून ई वॉर्डसाठी एक दिवसा आड पाणी पुरवठा करावा अशी वेगळी सूचना केली. कमलाकर भोपळे, प्रवीण केसरकर यांनी अनुक्रमे टेंबलाईवाडी व शिवाजी विद्यापीठ प्रभागातील पाणी प्रश्नाची समस्या मांडली.


कत्तलखान्याला विरोध

प्रशासनाने, आयसोलेशन हॉस्प‌िटलची चार एकर जागा कत्तलखान्यासाठी देण्याकरिता जागा फेरबदलाचा प्रस्ताव सभागृहापुढे ठेवला होता. त्याला नगरसेवक भूपाल शेटे, संतोष गायकवाड, अश्विनी बारामते, किरण नकाते आदी नगरसेवकांनी विरोध केला. नागरिकांनी कत्तलखान्याला विरोध केला असून जिल्हा कोर्टात दाद मागितल्याचे सांगितले. या विषयी चर्चा सुरू असताना जिल्हा कोर्टाने कत्तलखान्यासाठी जागा देण्याच्या महापालिकेच्या निर्णयाला स्थगिती दिल्याचे नगरसेवकांनी सभागृहात सांगितले.


‘कचऱ्याला बनवा उत्पन्नाचे साधन’

नगरसेविका रुपाराणी निकम यांनी कचऱ्याचा प्रश्न गंभीर बनला आहे. प्रशासनाने, शहरातील संपूर्ण कचऱ्यावर प्रक्रिया करुन बायोगॅस प्लॅट तयार करावा. जेणेकरुन उत्पन्नाचे साधन बनेल अशी सूचना केली. नगरसेवक विजय सूर्यवंशी, मोहन सालपे, माधुरी लाड यांनी कचऱ्यापासून वीज निर्मिती, कचरा उठाववरुन अधिकाऱ्यांना धारेवर धरले. मुख्य आरोग्य निरीक्षक विजय पाटील यांनी जूनपर्यंत कचरा उठाव आणि डिसेंबर अखेर कचऱ्यापासून वीज निर्मिती प्रकल्प सुरु होईल असे उत्तर दिले. नगरसेविका पूजा नाईकनवरे यांनी भाजी मंडईतील सुविधा, स्वच्छतागृहे याकडे लक्ष वेधले. प्रशासन वसुली फी जमा करते मग मंडईत सुविधा पुरवायची जबाबदारी नाही का? अशी विचारणा केली. तौफिक मुल्लाणी यांनी मोकाट कुत्र्यांचा उपद्रव वाढला असून लहान मुलांवर हल्ले होण्याचे प्रकार घडत आहेत. मोकाट कुत्र्यांचा बंदोबस्त करण्याची सूचना केली.

कुंदन लिमकरला वरिष्ठांचे पाठबळ

आस्थापना विभागातील लिपीक कुंदन लिमकरच्या लाच मागण्याच्या प्रकाराचे पडसाद सभागृहात उमटले. लिमकरविषयी गेली अनेक वर्षे तक्रारी असताना वरिष्ठांनी त्याच्यावर कारवाई का केली नाही? लिमकरला काही वरिष्ठ अधिकाऱ्यांचा पाठबळ असल्याचा आरोप नगरसेवकांनी केला.

मोबाइल अॅप डाउनलोड करा आणि राहा अपडेट

नाव बुडू लागल्यावर आठवण

February 28, 2017, 1:30 pm

≫ Next: केएमटी ऑनलाइन

≪ Previous: पाण्यावरून महिला सदस्य आक्रमक

$

0

0

म. टा. प्रतिनिधी, कोल्हापूर

पश्चिम महाराष्ट्रातही कोल्हापूर हाच राष्ट्रवादीचा बालेकिल्ला होता. मात्र यंदाच्या खासदारकीच्या निवडणुकीनंतर विधानसभा, कोल्हापूर महानगरपालिका, नगरपालिका व आता जिल्हा परिषद, पंचायत समितीच्या निवडणुकांमध्ये सुरू असलेली घसरण कायम आहे. कमकुवत ठिकाणी नेते, कार्यकर्त्यांना बळ देऊन पक्ष मजबूत करण्याऐवजी मोजक्याच तालुक्यात व स्वतःचा मतदारसंघ सुरक्षित करण्याचा प्रयत्न नेत्यांनी केला. सर्व घटकांना निर्णयात सामावून घेण्याऐवजी साऱ्यांवर निर्णय लादला जात असल्याने जुने नेते, कार्यकर्ते दुरावले. त्यामुळेच पक्षाची नाव वेगाने बुडू लागली व त्याचे भान आता आल्यावर नेत्यांना साऱ्यांची आठवण येऊ लागल्याचे स्पष्ट आहे.

राष्ट्रवादी पक्षाच्या स्थापनेवेळी असणारे मंडलिक, खानविलकर, कुपेकरांनंतर मुश्रीफ यांचाच एकखांबी तंबू झाला. मंडलिकांसोबत असल्याने व्ही. बी. पाटील यांच्यावर मुश्रीफांचा राग होता. त्यामुळे जिल्हाअंतर्गत राष्ट्रवादीत पाटील यांची कोंडी केली. त्यामुळे ते पक्षापासून दूर गेले. केवळ मंडलिकांना विरोध करायचा म्हणून संभाजीराजे छत्रपती यांच्या लोकसभा ​निवडणुकीत साथ दिली पण त्यातील पराभवाचे शल्य व मुश्रीफांविरोधातील राग मनात ठेवून संभाजीराजेही पक्षापासून दूर होत गेले. त्यानंतर खासदार धनंजय महाडिक आले पण तीन वर्षाच्या कालावधीतच त्यांनी मुश्रीफांपासून अंतर ठेवले. काही दिग्गज नेते, आव्हान देणारे सहकारी सहजासहजी मुश्रीफांच्या वाटेतून दूर होत गेले. जे पक्षात होते त्यांचे स्थानिक राजकारण ढवळून काढले. त्यामुळे निवेदिता माने, संध्यादेवी कुपेकर या जरी पक्ष कार्यक्रमात उपस्थित रहात असल्या तरी त्यांच्या मनात अस्वस्थता होती. ती अधूनमधून वेगवेगळ्या माध्यमातून व्यक्त होत होती. शाहूवाडी तालुक्यातील नेते मानसिंग गायकवाड तर राष्ट्रवादीच्या ​जिल्हा कार्यालयात कधी दिसलेच नाहीत.

या साऱ्यांमुळे जिल्ह्यातील राष्ट्रवादी म्हणजे मुश्रीफ, ए. वाय. पाटील, के. पी. पाटील यांच्याभोवती पक्ष फिरत होता. त्यातील के. पी. पाटील यांनीही अधूनमधून मुश्रीफांचे ​चिमटे घेण्याचा प्रयत्न करत असले तरी ते सावध होते. त्यामुळे येथे या तिघांव्यतिरिक्त अन्य कुणी येऊन पक्षाची धुरा वाहू नये अशीच जोडणा केली आहे. मुश्रीफांनी ‘जुन्या साऱ्यांनी प्रवाहात यावे’ या केलेल्या वक्तव्यावरुन या तिघांव्यतिरिक्त अन्य कुणी सोबत नाही हे स्पष्ट होते. जुने नेते बाजूला जात असताना नवीन नेते घडविण्यापेक्षा मुश्रीफ स्थानिक राजकारणात गुरफटल्याने त्याचा मोठा फटका पक्षाला बसला आहे. स्वतःच्या राजकारणासाठी घेतलेले निर्णय दुसऱ्यांच्या राजकारणासाठी मात्र अयोग्य असल्याची पद्धत त्यांनी अवलंबल्याच्या तक्रारी आहेत. यामुळे एकास एक व दुसऱ्यास दुसरा अशा होत असलेल्या अन्यायामुळे नेत्यांनी पक्षाकडून काही अपेक्षाच ठेवल्या नाहीत. परिणामी पक्षासाठी आता धोक्याची घंटा नव्हे तर मोठा धोकाच समोर दिसत असल्याने मुश्रीफांनी जुन्या साऱ्यांना साद घातली आहे. आतापर्यंत दूर लोटले गेलेले नेते मुश्रीफांच्या या सादला साथ देतील का? हे लवकरच समजणार आहे.


‘अस्तित्व संपल्याने त्यांना आत्ता जाग’ : व्ही. बी. पाटील

‘राष्ट्रवादीचे राज्यस्तरीय नेते म्हणवून घेणारे आमदार हसन मुश्रीफ यांना केवळ कागल मतदार संघ हाच त्यांना पक्ष वाटतो. इतर मतदार संघासाठी त्यांनी काय केले हे आतापर्यंतच्या निवडणुकांमधून दिसत आहे. पक्षाचे अस्तित्व संपुष्टात येऊ असताना आता ते जागे झाले आहेत व प्रवाहात या, असे सांगत आहेत.’ व्ही. बी. पाटील यांनी ‘महाराष्ट्र टाइम्स’ शी बोलताना मुश्रीफांना लगावला. व्ही. बी. पाटील यांच्याकडे पक्षाची धुरा सोपवण्याच्या मुश्रीफ यांनी केलेल्या वक्तव्याचा ‘त्यांना आता उपरती झाली’ अशा शब्दात समाचार घेतला. ते म्हणाले, ‘पक्षाची घसरण होत असताना पक्षनेतृत्वाने सातत्याने संधी देण्याचा प्रयत्न केला. पण मुश्रीफांकडील संघटन कौशल्य निवडणुकांमध्ये दिसले नाही. जिल्हा परिषद निवडणूक ही पक्षाचे जिल्ह्यातील अस्तित्व दाखवते. तिथे चार तालुक्यात एकही उमेदवार निवडून येऊ नये, हे दुर्देव आहे. काही तालुक्यांमधील राष्ट्रवादीचे नेते दुसऱ्या पक्षांसोबत जात असताना त्यांना थांबवण्याची जबाबदारी मुश्रीफांची होती. त्याबाबत त्यांनी काहीही केले नाही. यामुळे हे सारे जाऊ द्यायचे होते का? असा प्रश्न पडतो. मी मंडलिकांसोबत असल्याने मुश्रीफांनी त्यादृष्टीनेच माझ्याकडे पाहिले. पण मी इतरत्र न जाता घरी बसलो. पक्षाच्या विरोधात काम केले नाही. पक्षनिष्ठा मी जपली. पक्षनेतृत्वाने सांगितल्यानंतर आता साऱ्यांना प्रवाहात या, अशी विनंती करण्याचे शहाणपण त्यांना उशीरा सुचले आहे.’


आम्ही पक्षातच आहोत: निवेदिता माने

शरद पवार यांच्या विचारावर विश्वास ठेवून पक्ष स्थापनेपासून मी सोबत आहे व कायम राहणार आहे. मी स्वगृहीच असताना पक्षात या म्हणण्याची गरज नाही. पण साऱ्यांनी मिळून गतवैभव मिळवून देण्याचे हसन मुश्रीफ यांचे आवाहन म्हणजे ‘देर आये, दुरुस्त आये’ या प्रकारातील आहे. सर्व नेत्यांनी एकत्र निर्णय घेण्याऐवजी काहीजणच निर्णय घेऊ लागल्याने त्याचा फटका बसू शकतो हे दिसून येत आहे. माने गट सातत्याने राष्ट्रवादीसोबत राहिला असताना इचलकरंजी तसेच जिल्हा परिषदेच्या राजकारणात चोहोबाजूने कोंडी करण्याचा प्रयत्न झाला. पक्षाचे हित कशात आहे हे पाहून साऱ्यांनी निर्णय घेण्याची आवश्यकता आहे.

निवेदिता माने, माजी खासदार

मोबाइल अॅप डाउनलोड करा आणि राहा अपडेट